ଇସଲାମାବାଦ: ପାକିସ୍ତାନରେ ସେନାକୁ ନିଶାଣ କରି ବିଗତ କିଛି ମାସ ଧରି ଚାଲିଥିବା ଆକ୍ରମଣକୁ ନେଇ ପାକିସ୍ତାନ ସେନାର ନିଦ ହଜି ଯାଇଛି। ବିଶେଷକରି ପଶ୍ଚିମ ସୀମାନ୍ତର ଦୁଇ ପ୍ରଦେଶ ବେଲୁଚିସ୍ତାନ ଏବଂ ଖାଇବର ପଖତୁନଖ୍ବାରେ ସେନାର ବହୁ ଠିକଣାରେ ଆତଙ୍କବାଦୀ ଏବଂ ବେଲୁଚ ବିଦ୍ରୋହୀଙ୍କ ଆକ୍ରମଣ କେବଳ ସେନା ନୁହେଁ, ପାକିସ୍ତାନ‌ ସରକାରଙ୍କ ପାଇଁ ମଧ୍ୟ ଚିନ୍ତାର କାରଣ ପାଲଟିଛି।

ଗୋଟିଏ ପଟେ ବେଲୁଚିସ୍ତାନରେ ବେଲୁଚିସ୍ତାନ ଲିବରେସନ ଆର୍ମି (ବିଏଲଏ) ସେନା ବିରୋଧରେ ସଂହାର ଚଳାଇଥିଲା ବେଳେ ଅନ୍ୟପଟେ ଖାଇବର ପଖତୁନଖ୍ବା ଇଲାକାରେ ତେହରିକ୍‌-ଇ-ତାଲିବାନ(ଟିଟିପି) ଭଳି ଆତଙ୍କବାଦୀ ସଂଗଠନ ଗୋଟିଏ ପରେ ଗୋଟିଏ ଆକ୍ରମଣ କରି ସେନାର ମନୋବଳକୁ ଦୁର୍ବଳ କରିବାରେ ଲାଗିଛି। ତେବେ ଗତ ୧୧ ତାରିଖରେ ବେଲୁଚିସ୍ତାନରେ ଜଫର ଏକ୍ସପ୍ରେସକୁ ଅପହରଣ କରାଯିବା ସହିତ ବିଏଲଏ ବିଦ୍ରୋହୀମାନେ ଶତାଧିକ ସେନା ଅଧିକାରୀଙ୍କୁ ହତ୍ୟା କରିବା ଏବଂ ଗତକାଲି ବେଲୁଚିସ୍ତାନ ପ୍ରଦେଶର ନୋସକି ଜିଲ୍ଲାରେ ସେନା କନଭୟ ଉପରେ ଆକ୍ରମଣ କରି ୯୦ ଯବାନଙ୍କୁ ହତ୍ୟା କରିବା ଘଟଣା ସେନା, ସରକାରଙ୍କ ଠାରୁ ଆରମ୍ଭ କରି ସାଧାରଣ ଲୋକଙ୍କ ମନରେ ଭୟର ବାତାବରଣ ସୃଷ୍ଟି କରିଛି। ମାର୍ଚ୍ଚ ୧ ତାରିଖରୁ ଇତିମଧ୍ୟରେ ଏହି ଦୁଇଟି ପ୍ରଦେଶରେ ୧୦୦ରୁ ଅଧିକ ଆକ୍ରମଣ ହୋଇଥିଲା ବେଳେ ଗତ ୪୮ ଘଣ୍ଟା ମଧ୍ୟରେ ବିଏଲଏ ଏବଂ ଟିଟିପି ଦ୍ବାରା ବିଭିନ୍ନ ସ୍ଥାନରେ ୫୭ ଆକ୍ରମଣ କରାଯାଇଛି। ବିଗତ ୩୦ ଦିନ ମଧ୍ୟରେ ବିଭିନ୍ନ ଘଟଣାରେ ପ୍ରାୟ ୧ ହଜାର ଯବାନ ପ୍ରାଣ ହରାଇଥିଲେ ଏହଁ ପାକିସ୍ତାନ ସେନା ଏହାକୁ ରୋକିବାରେ ସଫଳ ହୋଇପାରି ନାହିଁ। ଏହି ଦୁଇଟି ସଂଗଠନ ପଞ୍ଜାବ ପ୍ରଦେଶ ବାସିନ୍ଦା ଏବଂ ବିଶେଷକରି ସେନା କର୍ମଚାରୀଙ୍କୁ ନିଶାଣ କରି ନର ସଂହାର ଚଳାଇଥିବାରୁ ଏବେ ହଜାର ହଜାର ଯବାନ ସେନା ଛାଡି ବିଦେଶ ପଳାଉଛନ୍ତି ବୋଲି ଏକ ବିଶେଷ ରିପୋର୍ଟରୁ ଜଣାପଡ଼ିଛି। ପାକିସ୍ତାନରେ ବିଭିନ୍ନ ପ୍ରଦେଶରେ ଆତଙ୍କବାଦୀ ଆକ୍ରମଣ ବଢି ଚାଲିଥିବାରୁ ଦେଶର ଆଭ୍ୟନ୍ତରୀଣ ସୁରକ୍ଷା ବ୍ୟବସ୍ଥା ଦିନକୁ ଦିନ ରସାତଳଗାମୀ ହେବାରେ ଲାଗିଛି। ସେପଟେ ଘୋର ଆର୍ଥିକ ଦୁର୍ଗତି ଦେଇ ଗତି କରୁଥିବା ପାକିସ୍ତାନର ଅର୍ଥନୀତି ମଧ୍ୟ ନିମ୍ନଗାମୀ ହୋଇଛି। ଏହାକୁ ଦୃଷ୍ଟିରେ ରଖି ଗତ ସପ୍ତାହକ ମଧ୍ୟରେ ୨୫୦୦ରୁ ଅଧିକ ଯବାନ ସେନା ଛାଡି ବିଦେଶ ପଳାଇଥିବା କୁହାଯାଇଛି। ଏହି ଯବାନମାନେ ୟୁଏଇ, ସାଉଦି ଆରବ,କତାର ଏବଂ କୁଏତ ଆଦି ରାଷ୍ଟ୍ରରେ ଶ୍ରମ କରି ଜୀବନ ବିତାଇବାକୁ ଉତ୍ତମ ମଣି ଏଭଳି ନିଷ୍ପତ୍ତି ନେଇଥିବା କୁହାଯାଇଛି।

ଅନ୍ୟପଟେ ବିଏଲଏ ଏବଂ ଟିଟିପିର ଲଗାତର ଆକ୍ରମଣକୁ ନେଇ ଆର୍ଥିକ ଦିଗରୁ ମଧ୍ୟ ପାକିସ୍ତାନ ପାଇଁ ସ୍ଥିତି ଆହୁରି ଜଟିଳ ହେବାରେ ଲାଗିଛି। ପାକିସ୍ତାନ ଏବଂ ଚୀନ୍‌ର ମିଳିତ ସହଯୋଗରେ ଚାଇନା-ପାକିସ୍ତାନ ଇକୋନୋମିକ୍‌ କରିଡର(ସିପେକ୍‌) କାର୍ଯ୍ୟକାରୀ କରାଯାଉଛି। କିନ୍ତୁ ଏହି ପ୍ରକଳ୍ପର ଅଧିକାଂଶ ଭାଗ ବେଲୁଚିସ୍ତାନ ଏବଂ ଖାଇବର ପଖତୁନଖ୍ବା ପ୍ରଦେଶ ଦେଇ ଯାଇଥିଲା ବେଳେ ଚୀନ୍‌ ପାଇଁ ପ୍ରତିକୂଳ ପରିସ୍ଥିତି ସୃଷ୍ଟି ହୋଇଛି। ଯେଉଁଠି ବିଏଲଏ ଏବଂ ଟିଟିପି କବଳରୁ ପାକିସ୍ତାନ ସେନା ନିଜକୁ ସୁରକ୍ଷା ଦେଇ ପାରୁ ନାହିଁ ସେଠାରେ ଚୀନ୍‌ର ନାଗରିକ ଏବଂ ଅଧିକାରୀଙ୍କୁ କେଉଁଠି ସୁରକ୍ଷା ମିଳିବ ବୋଲି ଚୀନ୍‌ ପ୍ରଶ୍ନ ଉଠାଇଛି। ଏହାଛଡ଼ା ବିଏଲଏ ସିପେକ୍‌ ପ୍ରକଳ୍ପକୁ ଘୋର ବିରୋଧ କରି ଆକ୍ରମଣ ପରେ ଆକ୍ରମଣ କରିଚାଲିଥିଲା ବେଳେ ବିଭିନ୍ନ ଘଟଣାରେ ବହୁ ଚାଇନା ଲୋକଙ୍କ ମୃତ୍ୟୁ ହେବା ଏବଂ ବିପୁଳ ଆର୍ଥିକ କ୍ଷତି ହେବା ବିଷୟକୁ ମଧ୍ୟ ଚୀନ ଗୁରୁତ୍ବର ସହ ବିଚାର କରୁଛି। ପ୍ରାୟ ୬୫ ବିଲିୟନ ଡଲାରର ପୁଞ୍ଜି ନିବେଶରେ ଏହି ପ୍ରକଳ୍ପ ନିର୍ମାଣ କରାଯାଉଥିବା ବେଳେ ପାକିସ୍ତାନ ଏହାକୁ ଋଣ ଭାବେ ଗ୍ରହଣ କରିଛି। ଗୋଟିଏ ପଟେ ଆର୍ଥିକ ଦୁର୍ଗତି ଏବଂ ଅନ୍ୟପଟେ ଅସୁରକ୍ଷିତ ଆଭ୍ୟନ୍ତରୀଣ ସ୍ଥିତି ପାକିସ୍ତାନକୁ ବହୁ ଜଲଦି ଗୃହଯୁଦ୍ଧ ମଧ୍ୟକୁ ଠେଲି ଦେଇପାରେ ବୋଲି ଭୂ-ରାଜନୀତିକ ବିଶେଷଜ୍ଞମାନେ ଆକଳନ କରିବା ଆରମ୍ଭ କରିଛନ୍ତି।

ନୂଆଦିଲ୍ଲୀ: ପାକିସ୍ତାନ ଇତିହାସରେ ପ୍ରଥମ ଘଟଣା । ପୂର୍ବତନ ISI ମୁଖ୍ୟଙ୍କୁ ଗିରଫ କଲା ପାକ୍ ସେନା ।ଗୁଇନ୍ଦା ସଂସ୍ଥା ଆଇଏସଆଇର ପୂର୍ବତନ ମୁଖ୍ୟ ଫୈଜ ହମୀଦଙ୍କୁ ନିଜ ହେପାଜତକୁ ନେଇଛି ପାକିସ୍ତାନ ସେନା । ଫୈଜ ହମିଦଙ୍କୁ ସାମରିକ ହେପାଜତକୁ ନେଇ ତାଙ୍କ ବିରୋଧରେ କୋର୍ଟ ମାର୍ଶାଲ ପ୍ରକ୍ରିୟା ଆରମ୍ଭ କରିଛି ସେନା । ପାକିସ୍ତାନ ସୁପ୍ରିମକୋର୍ଟଙ୍କ ଆଦେଶ ପାଳନ କରି ଏହି ପଦକ୍ଷେପ ଗ୍ରହଣ କରାଯାଇଥିବା କହିଛି ପାକିସ୍ତାନ ସେନା । ‘ଲେଫ୍ଟନାଣ୍ଟଙ୍କ ବିରୋଧରେ ରୁଜୁ ମାମଲାର ସତ୍ୟତା ଯାଞ୍ଚ କରାଯିବ । ବର୍ତ୍ତମାନ, ପାକିସ୍ତାନ ସେନା ଅଧିନିୟମର ପ୍ରାବଧାନ ଅନୁଯାୟୀ ଲେଫ୍ଟନାଣ୍ଟ ଜେନେରାଲ ଫୈଜ ହମୀଦ (ରିଟାୟର୍ଡ)ଙ୍କ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି ।’

ଟପ ସିଟି ପକ୍ଷରୁ ମଧ୍ୟ ଫୈଜଙ୍କ ବିରୋଧରେ ସାଂଘାତିକ ଅଭିଯୋଗ ଅଣାଯାଇଥିଲା। ଟପ ସିଟି ହେଉଛି ପାକିସ୍ତାନର ଗୋଟିଏ ଘରୋଇ ହାଉସିଂ ସ୍କିମ। ସଂସ୍ଥା ଅଭିଯୋଗ କରିଥିଲା ଯେ ଫୈଜ ପୂର୍ବାଗ୍ରହ ରଖି ଏହାର ଅଫିସ ଓ ମାଲିକ ମୋଇଜ ଖାନଙ୍କ ବାସଭବନରେ ରେଡ କରିଥିଲେ। ନିଜ କ୍ଷମତାର ଅପବ୍ୟବହାର ମଧ୍ୟ କରିଥିଲେ। ଅଭିଯୋଗ ପରେ ପାକିସ୍ତାନ ସେନା ପକ୍ଷରୁ ଏପ୍ରିଲ ମାସରେ ଗୋଟିଏ ତଦନ୍ତ କମିଟି ଗଠନ କରାଯାଇଥିଲା। ଫୈଜ କ୍ଷମତାର ଅପବ୍ୟବହାର କରିଛନ୍ତି କି ତା’ର ଯାଞ୍ଚ କମିଟି କରିଥିଲା। ଗତବର୍ଷ ନଭେମ୍ବର ମାସରେ ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶ ଆଧାରରେ କମିଟି ଗଠନ ହୋଇଥିଲା।

ଇସ୍‌ଲମାବାଦ: ପାକିସ୍ତାନରେ ଆତ୍ମଘାତୀ ବିସ୍ଫୋରଣରେ ୯ ଜଣ ସୈନ୍ୟ ନିହତ ହୋଇଥିବା ସୂଚନା ମିଳିଛି । ପାକିସ୍ତାନୀ ସେନାର ଏକ ଦଳକୁ ଟାର୍ଗେଟ କରି ଏହି ଆତ୍ମଘାତୀ ବିସ୍ଫୋରଣ ହୋଇଛି । ବିସ୍ଫୋରଣରେ ୯ ଜଣ ପାକିସ୍ତାନୀ ସେନା ଯବାନଙ୍କର ମୃତ୍ୟୁ ହୋଇଥିବା ବେଳେ ୫ ଜଣ ଗୁରୁତର ଆହତ ହୋଇଛନ୍ତି। ଖାଇବର ପଖତୁନଖ୍‌ବେ ପ୍ରୋଭିନ୍ସର ବାନ୍ନୁ ଜିଲ୍ଲାରେ ଘଟିଛି ଏହି ବିସ୍ଫୋରଣ । ଏକ ବାଇକରେ ଆସି ନିଜକୁ ବିସ୍ଫୋରଣ କରିଥିଲା ଜଣେ ଆତତାୟୀ ।

ମାସକ ଭିତରେ ଖାଇବର ପଖତୁନଖ୍ୱାରେ ଏହା ଦ୍ୱିତୀୟ ବୋମା ବିସ୍ଫୋରଣ ମାମଲା। ଏହା ପୂର୍ବରୁ ଜୁଲାଇ ୩୦ ତାରିଖରେ ଏକ ରାଜନୈତିକ ଦଳ ବୈଠକରେ ଆତ୍ମଘାତୀ ବିସ୍ଫୋରଣ ହୋଇଥିଲା। ଏଥିରେ ପାଖାପାଖି ୫୪ ଲୋକଙ୍କର ମୃତ୍ୟୁ ହୋଇଥିବା ବେଳେ ୧୦୦ରୁ ଅଧିକ ଆହତ ହୋଇଥିଲେ।

ଇସଲାମାବାଦ: ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ଏବଂ ସେନାମୁଖ୍ୟ ଜେନେରାଲ କମର ଜାଭେଦ ବାଜୱାଙ୍କ ମଧ୍ୟରେ ବିବାଦ ଜାରି ରହିଛି। ଏହି ବିବାଦ ପଛରେ ତାଲିବାନ ରହିଛି। ତାଲିବାନ ପ୍ରିତିନିଧିଙ୍କୁ ଭେଟ କରିବା ଯୋଗୁଁ ବାଜଓ୍ବା ଗୁଇନ୍ଦା ଏଜେନ୍ସି ଆଇଏସଆଇ ମୁଖ୍ୟଙ୍କୁ ବଦଳେଇ ଦେଇଥିଲେ। ସେ ଗତ ସପ୍ତାହରେ ଆଇଏସଆଇ ମୁଖ୍ୟ ଜେନେରାଲ ଫୈଜ ହମିଦଙ୍କୁ ହଟାଇ ଲେପ୍ଟନାଣ୍ଟ ଜେନେରାଲ ନଦିମ ଅହମ୍ମଦ ଅଞ୍ଜୁମଙ୍କୁ ନିଯୁକ୍ତ କରିଥିଲେ। କିନ୍ତୁ ଇମ୍ରାନଙ୍କ କାର୍ଯ୍ୟାଳୟ ଏହାର ବିଜ୍ଞପ୍ତି ଜାରି କରିନଥିଲା। ଏହାକୁ ନେଇ ଇମ୍ରାନ ଏବଂ ବାଜୱାଙ୍କ ମଧ୍ୟରେ ମତଭେଦ ସୃଷ୍ଟି ହୋଇଛି।

ରିପୋର୍ଟ ଅନୁଯାୟୀ, ଫୌଜ ଅହମ୍ମଦଙ୍କୁ ହଟାଇବା ପାଇଁ ଇମ୍ରାନ ଚାହୁଁନଥିଲେ। କିନ୍ତୁ ସେନାମୁଖ୍ୟ ଚେତାବନୀ ଦେଇଥିଲେ ଯେ ଇମ୍ରାନ ସେନା ମାମଲାରେ ଦଖଲ ଦେଇ ନିଜ ସୀମା ଲଙ୍ଘନ ନ କରନ୍ତୁ। ସେ ଚାହିଁଲେ ନଭେମ୍ବର ୧୫ ପର୍ଯ୍ୟନ୍ତ ହମିଦଙ୍କ କାର୍ଯ୍ୟକାଳକୁ ବଢାଇ ପାରିବେ। କିନ୍ତୁ ଏହା ପରେ ତାଙ୍କୁ ପଦବୀରେ ରଖାଯିବ ନାହିଁ । ପାକିସ୍ତାନର ବରିଷ୍ଠ ସାମ୍ବାଦିକ ନଜିମ ସେଠ ଏକ ସାକ୍ଷାତକାରରେ ଇମ୍ରାନଙ୍କ ଆଭିମୁଖ୍ୟ ଯୋଗୁଁ ବିବାଦ ସୃଷ୍ଟି ହୋଇଥିବା କହିଥିଲେ ।

ଏଥିଯୋଗୁଁ ଏ ପର୍ଯ୍ୟନ୍ତ ସରକାରଙ୍କ ପକ୍ଷରୁ ନିଯୁକ୍ତି ନେଇ କୌଣସି ବିଜ୍ଞପ୍ତି ଜାରି କରାଯାଇ ନାହିଁ। ସରକାରଙ୍କ ପକ୍ଷରୁ କୁହାଯାଇଛି ଯେ ଇମ୍ରାନ ଏବଂ ସେନାମୁଖ୍ୟଙ୍କ ମଧ୍ୟରେ କୌଣସି ବିବାଦ ନାହିଁ । ପାକିସ୍ତାନ ସୂଚନା ମନ୍ତ୍ରୀ ଫୱାଦ ଚୌଧୁରୀ ଗତ ସପ୍ତାହରେ କହିଥିଲେ ଯେ ଆଇଏସଆଇ ମୁଖ୍ୟଙ୍କୁ ବଦଳାଇବାକୁ ନେଇ ପ୍ରଧାନମନ୍ତ୍ରୀ ଏବଂ ବାଜୱାଙ୍କ ମଧ୍ୟରେ ଚର୍ଚ୍ଚା ହୋଇଥିଲା। ବାଜୱା ଏହି ମାମଲାରେ ସରକାରଙ୍କୁ ଭରଷା ଦେଇଥିଲେ। ସେନାମୁଖ୍ୟଙ୍କ ସହ ଚର୍ଚ୍ଚା କରି ଆଇଏସଆଇ ମୁଖ୍ୟଙ୍କୁ ନିଯୁକ୍ତି କରିବାର ଅଧିକାର ପ୍ରଧାନମନ୍ତ୍ରୀଙ୍କ ରହିଛି।

ସୂଚନାଯୋଗ୍ୟ ଯେ,  ଆଫଗାନିସ୍ତାନରେ ତାଲିବାନ ସରକାର ଗଠନ ପୂର୍ବରୁ ହମିଦ କାବୁଲ ଯାଇଥିଲେ ଏବଂ ତାଙ୍କ ଦଖଲରେ ତାଲିବାନ ସରକାର ପ୍ରତିଷ୍ଠା ହୋଇଥିଲା। ମିଡିଆ ରିପୋର୍ଟ ଅନୁଯାୟୀ ହମିଦ ସେନାମୁଖ୍ୟଙ୍କ ଅନୁମତି ନ ନେଇ କାବୁଲ ଯାଇଥିଲେ। ଏହାକୁ ନେଇ ବାଜୱା ଅସନ୍ତୋଷ ପ୍ରକାଶ କରିଥିଲେ ଏବଂ ହମିଦଙ୍କୁ ପଦରୁ ହଟାଇ ଦେଇଥିଲେ।

ଅନ୍ୟ ରିପୋର୍ଟ ଅନୁଯାୟୀ, ହମିଦ ପାକିସ୍ତାନର ନୂଆ ସେନାମୁଖ୍ୟ ହେବାକୁ ଚାହୁଁଥିଲେ। ଏଥିଯୋଗୁଁ ହମିଦ ଏବଂ ବାଜୱା ଅନେକ ସମୟରେ ମୁହାଁମୁହିଁ ମଧ୍ୟ ହୋଇଥିଲେ। ତିନି ବର୍ଷ ପୂର୍ବେ ରାୱଲପିଣ୍ଡରେ ଏକ ହାଉସିଂ ପ୍ରକଳ୍ପକୁ ନେଇ ଉଭୟଙ୍କ ମଧ୍ୟରେ ବିବାଦ ଆରମ୍ଭ ହୋଇଥିଲା। ପରେ ଇମ୍ରାନ ବାଜୱାଙ୍କ କାର୍ଯ୍ୟକାଳକୁ ୩ ବର୍ଷ ପାଇଁ ବୃଦ୍ଧି କରିଥିଲେ। ଏଥିରୁ ବିବାଦ ସାମ୍ନାକୁ ଆସିଥିଲା। ହମିଦ ଅନେକ ସମୟରେ ବାଜୱାଙ୍କ ନ ଜଣାଇ ନିଷ୍ପତ୍ତି ନେଇଥାନ୍ତି।