ବଲିଉଡ୍ ଅଭିନେତ୍ରୀ ତାପସୀ ପନ୍ନୁ ନିଜର ଆଗାମୀ ନେଟଫ୍ଲିକ୍ସ ଫିଲ୍ମ 'ଗାନ୍ଧାରୀ' କୁ ନେଇ ଖୁବ୍‌ ଚର୍ଚ୍ଚାରେ ଅଛନ୍ତି। ଏହି ମିଷ୍ଟ୍ରି ତଥା ଆକ୍ସନ୍ ଥ୍ରିଲର ଫିଲ୍ମରେ ସେ ଏଭଳି କିଛି ଆକ୍ସନ୍ ଦୃଶ୍ୟ କରିବାକୁ ଯାଉଛନ୍ତି, ଯାହା ସେ ପୂର୍ବରୁ କେବେ କରିନଥିଲେ। ମିଳିଥିବା ସୂଚନା ଅନୁଯାୟୀ, ଏହି ଫିଲ୍ମରେ ତାପସୀ ଆଖିରେ ପଟି ବାନ୍ଧି ଜବରଦସ୍ତ ଆକ୍ସନ୍ ସିକ୍ୱେନ୍ସ କରୁଥିବାର ନଜର ଆସିବେ।

ସୁଟିଂ ଶେଷ ହେବା ନେଇ ସୂଚନା

ନିକଟରେ ତାପସୀ ନିଜର ଏହି ଆଗାମୀ ଫିଲ୍ମର ସୁଟିଂ ଶେଷ କରିଛନ୍ତି। ସେ ସୋସିଆଲ୍ ମିଡିଆରେ ବିହାଇଣ୍ଡ-ଦ-ସିନ୍ (BTS) ଫଟୋ ସେୟାର୍ କରି ନିଜର ଅନୁଭୂତି ବଖାଣିଛନ୍ତି। ଏହି ଫିଲ୍ମଟି ତାଙ୍କ ପାଇଁ କେତେ ଆହ୍ୱାନପୂର୍ଣ୍ଣ ଥିଲା ସେ ବିଷୟରେ ଉଲ୍ଲେଖ କରି ସେ କହିଛନ୍ତି ଯେ, 'ଯଦି ମଣିଷ ଶରୀରରେ କୌଣସି NOS ମୋଡ୍ ଥାଏ, ତେବେ ମୁଁ ଏହି ଫିଲ୍ମରେ ତାହା ଅନୁଭବ କରିଛି।' ଦୃଢ଼ ଇଚ୍ଛାଶକ୍ତି ଏବଂ ସଂକଳ୍ପ ବଳରେ ସେ ଏହି କଠିନ ଆକ୍ସନ୍ ଦୃଶ୍ୟଗୁଡ଼ିକୁ ସମ୍ପୂର୍ଣ୍ଣ କରିଥିବା ପ୍ରକାଶ କରିଛନ୍ତି। ସୁଟିଂ ବେଳେ ଲାଗିଥିବା ଆଘାତ ତାଙ୍କୁ କେବଳ ଯନ୍ତ୍ରଣା ଦେଇନାହିଁ, ବରଂ ଏକ ନିଆରା ଆତ୍ମସନ୍ତୋଷ ମଧ୍ୟ ଦେଇଛି ବୋଲି ସେ କହିଛନ୍ତି। ସେୟାର କରାଯାଇଥିବା ଏକ ଫଟୋରେ ତାପସୀ ଆଖିରେ ପଟି ବାନ୍ଧି କିଛି ପିଲାଙ୍କ ଗହଣରେ ଥିବା ଦେଖିବାକୁ ମିଳିଛି।

ନିର୍ଦ୍ଦେଶନା ଏବଂ ପ୍ରଯୋଜନା

ଦେବାଶିଷ ମଖିଜାଙ୍କ ନିର୍ଦ୍ଦେଶନାରେ ନିର୍ମିତ ହେଉଥିବା ଏହି ନେଟଫ୍ଲିକ୍ସ ଫିଲ୍ମର କାହାଣୀ ଲେଖିଛନ୍ତି ଲୋକପ୍ରିୟ ଲେଖିକା କନିକା ଢିଲୋଁ। କଥା ପିକ୍ଚର୍ସ ବ୍ୟାନର୍‌ରେ କନିକା ଏହାର ପ୍ରଯୋଜନା ମଧ୍ୟ କରୁଛନ୍ତି। ଉଲ୍ଲେଖଯୋଗ୍ୟ ଯେ, ପୂର୍ବରୁ ତାପସୀ ଏବଂ କନିକାଙ୍କ ଯୋଡ଼ି 'ହସିନ୍ ଦିଲରୁବା' ଏବଂ 'ଫିର୍ ଆୟୀ ହସିନ୍ ଦିଲରୁବା' ଭଳି ହିଟ୍ ଫିଲ୍ମରେ ଏକାଠି କାମ କରି ଦର୍ଶକଙ୍କ ମନ ଜିଣିସାରିଛନ୍ତି। ଏହି ଫିଲ୍ମରେ ଇଶ୍ୱାକ୍ ସିଂହ ମଧ୍ୟ ଏକ ପ୍ରମୁଖ ଭୂମିକାରେ ନଜର ଆସିବେ।

ଫିଲ୍ମର କାହାଣୀ ଏବଂ ଆଗାମୀ ପ୍ରୋଜେକ୍ଟ

ଫିଲ୍ମର ଟାଇଟଲ୍ 'ଗାନ୍ଧାରୀ'ରୁ ଅନୁମାନ କରାଯାଉଛି ଯେ, ଏହାର କାହାଣୀ ମଣିଷର ଅନ୍ତର୍ନିହିତ ଶକ୍ତିର ଜାଗରଣ ଏବଂ ଅନ୍ୟାୟ ଉପରେ ନ୍ୟାୟର ବିଜୟ ଉପରେ ଆଧାରିତ। ନେଟଫ୍ଲିକ୍ସ ପକ୍ଷରୁ ଏଯାଏଁ ଏହାର ରିଲିଜ୍ ତାରିଖ ଘୋଷଣା କରାଯାଇନାହିଁ। କାମ କଥା କହିବାକୁ ଗଲେ, ତାପସୀଙ୍କୁ ଶେଷ ଥର ପାଇଁ ଅକ୍ଷୟ କୁମାରଙ୍କ ସହ କମେଡି ଫିଲ୍ମ 'ଖେଲ୍ ଖେଲ୍ ମେଁ'ରେ ଦେଖିବାକୁ ମିଳିଥିଲା। ଆଗାମୀ ଦିନରେ ସେ ଭରତ ନୀଳକଣ୍ଠନ୍‌ଙ୍କ ସାଇ-ଫାଇ ପ୍ରୋଜେକ୍ଟ 'ଏଲିୟନ୍' ରେ ମଧ୍ୟ ଅଭିନୟ କରୁଥିବାର ନଜର ଆସିବେ।

ବଲିଉଡର ଲୋକପ୍ରିୟ ଅଭିନେତ୍ରୀ ତାପସୀ ପନ୍ନୁଙ୍କ ଆଗାମୀ ଚଳଚ୍ଚିତ୍ର ‘ଅସି’ (Assi)ର ଟ୍ରେଲର ବୁଧବାର (ଫେବୃଆରୀ ୪, ୨୦୨୬) ମୁକ୍ତିଲାଭ କରିଛି। ପୂର୍ବରୁ 'ମୁଲ୍କ' ଓ 'ଥପ୍ପଡ' ଭଳି ହିଟ୍ ଫିଲ୍ମ ଭେଟି ଦେଇଥିବା ନିର୍ଦ୍ଦେଶକ ଅନୁଭବ ସିହ୍ନା ଓ ତାପସୀଙ୍କ ଯୋଡି ପୁଣି ଥରେ ଦର୍ଶକଙ୍କ ପାଇଁ ଏକ ହୃଦୟସ୍ପର୍ଶୀ ତଥା ସାମାଜିକ ପ୍ରସଙ୍ଗ ଭିତ୍ତିକ କାହାଣୀ ନେଇ ଆସୁଛନ୍ତି। ଟ୍ରେଲରରୁ ଜଣାପଡୁଛି ଯେ, ଏହି ଫିଲ୍ମଟି ସମାଜର ଏକ କଠୋର ସତ୍ୟ ଉପରେ ପର୍ଯ୍ୟବସିତ।

କୋର୍ଟରୁମ ଡ୍ରାମା ଓ ଶକ୍ତିଶାଳୀ କାହାଣୀ

ଏହି ଫିଲ୍ମରେ ତାପସୀ ପନ୍ନୁ ଜଣେ ଓକିଲ ଭୂମିକାରେ ନଜର ଆସିଛନ୍ତି, ଯିଏ ଏକ ବର୍ବର ଦୁଷ୍କର୍ମ ମାମଲା ବିରୋଧରେ ଲଢେଇ କରୁଛନ୍ତି। ଟ୍ରେଲରରେ ଦେଖିବାକୁ ମିଳିଛି ଯେ, ଦେଶରେ ଗୋଟିଏ ଦିନରେ କିପରି ୮୦ଟି ଦୁଷ୍କର୍ମ ମାମଲା (Assi rape cases) ରିପୋର୍ଟ ହୁଏ, ସେନେଇ ତାପସୀ କୋର୍ଟରେ ଭାବପ୍ରବଣ ଯୁକ୍ତି ଉପସ୍ଥାପନ କରୁଛନ୍ତି। ଫିଲ୍ମରେ କାନି କୁସୃତି ଏବଂ ମହମ୍ମଦ ଜିଶାନ ଆୟୁବ ଏକ ଦମ୍ପତି ଭୂମିକାରେ ଅଭିନୟ କରିଛନ୍ତି। କିଛି ଲୋକ କାନିଙ୍କ ଚରିତ୍ର ସହ ଦୁଷ୍କର୍ମ କରି ତାଙ୍କୁ ରେଳ ଧାରଣାରେ ଫିଙ୍ଗି ଦେବା ପରେ ସେମାନଙ୍କ ଜୀବନ କିପରି ଓଲଟପାଲଟ ହୋଇଯାଉଛି, ତାହା ଏଥିରେ ଦର୍ଶାଯାଇଛି। କୋର୍ଟରୁମରେ ତାପସୀ ଏବଂ ବିପକ୍ଷ ଓକିଲଙ୍କ ମଧ୍ୟରେ ଜୋରଦାର ଯୁକ୍ତିତର୍କ ଫିଲ୍ମର ମୁଖ୍ୟ ଆକର୍ଷଣ ସାଜିବ ବୋଲି ଆଶା କରାଯାଉଛି।

ତାରକା ବହୁଳ ଷ୍ଟାରକାଷ୍ଟ ଓ ମୁକ୍ତିଲାଭ ତାରିଖ

ଅନୁଭବ ସିହ୍ନା ଓ ଗୌରବ ସୋଲାଙ୍କିଙ୍କ ଦ୍ୱାରା ଲିଖିତ ଏହି ଚଳଚ୍ଚିତ୍ରରେ କେବଳ ତାପସୀ ନୁହନ୍ତି, ବରଂ ଅନେକ ଦିଗଜ୍ଜ କଳାକାରଙ୍କ ସମାହାର ଦେଖିବାକୁ ମିଳିବ। ଏଥିରେ ରେବତୀ, ମନୋଜ ପାହୱା, କୁମୁଦ ମିଶ୍ର, ନସିରୁଦ୍ଦିନ ଶାହା, ସୁପ୍ରିୟା ପାଠକ ଓ ସୀମା ପାହୱାଙ୍କ ଭଳି କଳାକାର ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି। ଭୂଷଣ କୁମାର, କ୍ରିଷନ କୁମାର ଓ ଅନୁଭବ ସିହ୍ନାଙ୍କ ଦ୍ୱାରା ପ୍ରଯୋଜିତ ଏହି ଫିଲ୍ମଟି ଆସନ୍ତା ଫେବୃଆରୀ ୨୦ ତାରିଖରେ ପ୍ରେକ୍ଷାଳୟରେ ମୁକ୍ତିଲାଭ କରିବ।