ବିବାହିତ ବ୍ୟକ୍ତିଙ୍କ ଲିଭ୍-ଇନ୍ ରିଲେସନସିପ୍ (ସହବାସ)କୁ ନେଇ ଆହ୍ଲାବାଦ ହାଇକୋର୍ଟ ନିକଟରେ ଦୁଇଟି ସମ୍ପୂର୍ଣ୍ଣ ଭିନ୍ନ ଓ ପରସ୍ପର ବିରୋଧୀ ରାୟ ଶୁଣାଇଛନ୍ତି। ଗୋଟିଏ ପଟେ ଜଣେ ବିଚାରପତି ବିନା ଛାଡ଼ପତ୍ରରେ ଲିଭ୍-ଇନ୍‌ରେ ରହିବାକୁ ବେଆଇନ ଦର୍ଶାଇ ସୁରକ୍ଷା ଦେବାକୁ ମନା କରିଦେଇଥିବା ବେଳେ, ଅନ୍ୟ ଏକ ଖଣ୍ଡପୀଠ ଏହାକୁ କୌଣସି ଅପରାଧ ନୁହେଁ ବୋଲି କହିଛନ୍ତି। ଏହି ପରସ୍ପର ବିରୋଧୀ ରାୟ ବ୍ୟକ୍ତିଗତ ସ୍ୱାଧୀନତା, ବୈବାହିକ ଅଧିକାର ଏବଂ ସାମାଜିକ ନୈତିକତା ମଧ୍ୟରେ ଏକ ବଡ଼ ଆଇନଗତ ବିତର୍କ ସୃଷ୍ଟି କରିଛି।

ବିନା ଛାଡ଼ପତ୍ରରେ ଲିଭ୍-ଇନ୍ ବେଆଇନ

ମାର୍ଚ୍ଚ ୨୦, ୨୦୨୬ରେ ବିଚାରପତି ବିବେକ କୁମାର ସିଂହଙ୍କ ଏକିକିଆ ଖଣ୍ଡପୀଠ ଏକ ମାମଲାର ଶୁଣାଣି କରି କଠୋର ଆଭିମୁଖ୍ୟ ଗ୍ରହଣ କରିଥିଲେ। ଖଣ୍ଡପୀଠ କହିଥିଲେ ଯେ ଯଦି ଜଣେ ବ୍ୟକ୍ତି ପୂର୍ବରୁ ବିବାହିତ ଏବଂ ତାଙ୍କ ଜୀବନସାଥୀ ଜୀବିତ ଅଛନ୍ତି, ତେବେ ସେ ଆଇନଗତ ଭାବେ ଛାଡ଼ପତ୍ର ନନେଇ ଅନ୍ୟ କାହା ସହ ଲିଭ୍-ଇନ୍ ରିଲେସନସିପ୍‌ରେ ରହିପାରିବେ ନାହିଁ। ବ୍ୟକ୍ତିଗତ ସ୍ୱାଧୀନତା ନାମରେ ଜଣେ ଆଇନଗତ ବିବାହିତ ସାଥୀଙ୍କ ଅଧିକାରକୁ କ୍ଷୁର୍ଣ୍ଣ କରାଯାଇପାରିବ ନାହିଁ। ଏହି ଯୁକ୍ତି ଦର୍ଶାଇ କୋର୍ଟ ଉକ୍ତ ପ୍ରେମୀଯୁଗଳଙ୍କୁ ପୋଲିସ ସୁରକ୍ଷା ପ୍ରଦାନ କରିବାକୁ ମନା କରିଦେଇଥିଲେ।

ଆଇନ ଓ ନୈତିକତା ଅଲଗା: ଅନ୍ୟ ଏକ ଖଣ୍ଡପୀଠଙ୍କ ଭିନ୍ନ ରାୟ

ଏହି ରାୟର କିଛି ଦିନ ପରେ, ଅର୍ଥାତ୍ ମାର୍ଚ୍ଚ ୨୫, ୨୦୨୬ ତାରିଖରେ ବିଚାରପତି ଜେ.ଜେ. ମୁନିର ଏବଂ ବିଚାରପତି ତରୁଣ ସକ୍ସେନାଙ୍କୁ ନେଇ ଗଠିତ ଏକ ଖଣ୍ଡପୀଠ ସମ୍ପୂର୍ଣ୍ଣ ଏକ ଭିନ୍ନ ମତ ପ୍ରକାଶ କରିଥିଲେ। ଏକ ପୃଥକ ମାମଲାର ଶୁଣାଣି କରି ଖଣ୍ଡପୀଠ ସ୍ପଷ୍ଟ କରିଥିଲେ ଯେ, ଜଣେ ବିବାହିତ ପୁରୁଷ ନିଜ ସମ୍ମତିରେ ଜଣେ ସାବାଳିକା ମହିଳାଙ୍କ ସହ ଲିଭ୍-ଇନ୍ ରିଲେସନସିପ୍‌ରେ ରହିବା ଆଇନ ଅନୁଯାୟୀ କୌଣସି ଅପରାଧ ନୁହେଁ। କୋର୍ଟ କହିଥିଲେ ଯେ "ଆଇନ ଏବଂ ନୈତିକତାକୁ ପୃଥକ ରଖିବା ଉଚିତ୍। ଯଦି ଆଇନଗତ ଭାବେ କୌଣସି ଅପରାଧ ହେଉନାହିଁ, ତେବେ ସାମାଜିକ ମତ ଓ ନୈତିକତା ଆଧାରରେ ନାଗରିକଙ୍କ ଅଧିକାରକୁ ଛଡ଼ାଇ ନିଆଯାଇପାରିବ ନାହିଁ।" ଏହା ସହିତ କୋର୍ଟ ପୋଲିସକୁ ସମ୍ପୃକ୍ତ ଯୁଗଳଙ୍କୁ ସୁରକ୍ଷା ଯୋଗାଇଦେବାକୁ ନିର୍ଦ୍ଦେଶ ଦେଇଥିଲେ।

ବ୍ୟକ୍ତିଗତ ସ୍ୱାଧୀନତା ବନାମ ବୈବାହିକ ଅଧିକାର

ମାତ୍ର କିଛି ଦିନର ବ୍ୟବଧାନରେ ଆହ୍ଲାବାଦ ହାଇକୋର୍ଟଙ୍କ ଏହି ଦୁଇଟି ଭିନ୍ନ ରାୟ ଆଇନ ବିଶେଷଜ୍ଞଙ୍କ ମଧ୍ୟରେ ଚର୍ଚ୍ଚାର ବିଷୟ ପାଲଟିଛି। ଗୋଟିଏ ପଟେ ବ୍ୟକ୍ତିଗତ ସ୍ୱାଧୀନତା (ଧାରା ୨୧)କୁ ଗୁରୁତ୍ୱ ଦିଆଯାଉଥିବା ବେଳେ ଅନ୍ୟ ପଟେ ବିବାହିତ ଜୀବନସାଥୀଙ୍କ ସାମ୍ବିଧାନିକ ତଥା ଆଇନଗତ ଅଧିକାରକୁ ପ୍ରାଥମିକତା ମିଳୁଛି। ବିବାହିତ ବ୍ୟକ୍ତିଙ୍କ ଲିଭ୍-ଇନ୍ ସମ୍ପର୍କକୁ ନେଇ କୋର୍ଟଙ୍କ ଏହି ବିରୋଧାଭାସୀ ଆଭିମୁଖ୍ୟ ଆଗାମୀ ଦିନରେ ବୃହତ୍ତର ଖଣ୍ଡପୀଠ କିମ୍ବା ସୁପ୍ରିମକୋର୍ଟଙ୍କ ଦ୍ୱାରା ସ୍ପଷ୍ଟ ହେବାର ଆବଶ୍ୟକତା ରହିଛି ବୋଲି ଆଇନଜୀବୀମାନେ ମତବ୍ୟକ୍ତ କରିଛନ୍ତି।

ଉତ୍ତରପ୍ରଦେଶ: ଆଲ୍ଲାହାବାଦ ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇ କହିଛନ୍ତି ଯେ ଜଣେ ବିବାହିତ ପୁରୁଷ ଅନ୍ୟ ଜଣେ ସାବାଳିକାଙ୍କ ସହ ଲିଭ୍-ଇନ୍ ସମ୍ପର୍କରେ ରହିବା କୌଣସି ଅପରାଧ ନୁହେଁ। କୋର୍ଟ ସ୍ପଷ୍ଟ କରିଛନ୍ତି ଯେ ନୈତିକତା ଏବଂ ଆଇନକୁ ସମ୍ପୂର୍ଣ୍ଣ ଭାବରେ ପୃଥକ୍ ରଖାଯିବା ଉଚିତ୍।

ବିଚାରପତି ଜେ.ଜେ. ମୁନିର ଏବଂ ବିଚାରପତି ତରୁଣ ସକ୍ସେନାଙ୍କୁ ନେଇ ଗଠିତ ଏକ ଖଣ୍ଡପୀଠ ଏକ ଲିଭ୍-ଇନ୍ ଯୋଡ଼ିଙ୍କ ସୁରକ୍ଷା ଆବେଦନର ଶୁଣାଣି କରିବା ସମୟରେ ଏହି ଟିପ୍ପଣୀ ଦେଇଛନ୍ତି। ମହିଳାଙ୍କ ପରିବାର ପକ୍ଷରୁ ଆସୁଥିବା ଧମକରୁ ସୁରକ୍ଷା ମାଗି ଏହି ଯୋଡ଼ି କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମହିଳାଙ୍କ ପରିବାରର ଓକିଲ ଯୁକ୍ତି ବାଢ଼ିଥିଲେ ଯେ ପୁରୁଷ ଜଣକ ପୂର୍ବରୁ ବିବାହିତ ହୋଇଥିବାରୁ ଅନ୍ୟ ଜଣେ ମହିଳାଙ୍କ ସହ ରହିବା ଏକ ଅପରାଧ ଅଟେ। ତେବେ କୋର୍ଟ ଏହାକୁ ଖଣ୍ଡନ କରି କହିଛନ୍ତି ଯେ ଆଇନକୁ ସାମାଜିକ ନୈତିକତା ଠାରୁ ଅଲଗା ରଖିବା ଆବଶ୍ୟକ। ଯଦି ଆଇନ ଅନୁଯାୟୀ କୌଣସି ଅପରାଧ ହୋଇନାହିଁ, ତେବେ ସାମାଜିକ ମତ ଏବଂ ନୈତିକତା ନାଗରିକଙ୍କ ସୁରକ୍ଷା ଅଧିକାରକୁ କ୍ଷୁର୍ଣ୍ଣ କରିପାରିବ ନାହିଁ।

ମହିଳା ଜଣକ ନିଜ ଇଚ୍ଛାରେ ଏବଂ ସମ୍ମତି କ୍ରମେ ସମ୍ପୃକ୍ତ ପୁରୁଷଙ୍କ ସହ ରହୁଛନ୍ତି ବୋଲି ପୂର୍ବରୁ ଶାହାଜାହାନପୁରର ଆରକ୍ଷୀ ଅଧୀକ୍ଷକଙ୍କ ନିକଟରେ ଆବେଦନ କରିଥିଲେ। ମାତ୍ର ପୋଲିସ ପକ୍ଷରୁ ଏହି ଅଭିଯୋଗ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା। ପରିବାର ସଦସ୍ୟ ସେମାନଙ୍କ ସମ୍ପର୍କକୁ ତୀବ୍ର ବିରୋଧ କରୁଥିବାରୁ ଏବଂ ହତ୍ୟା ଧମକ ଦେଉଥିବାରୁ ଉଭୟେ 'ଅନର କିଲିଂ' ଆଶଙ୍କା କରୁଥିଲେ ବୋଲି କୋର୍ଟ ଦର୍ଶାଇଥିଲେ। ସୁପ୍ରିମକୋର୍ଟଙ୍କ ଦ୍ୱାରା ନିର୍ଦ୍ଧାରିତ ମାର୍ଗଦର୍ଶିକାକୁ ଆଧାର କରି ହାଇକୋର୍ଟ କହିଛନ୍ତି ଯେ ଏକାଠି ରହୁଥିବା ଦୁଇଜଣ ପ୍ରାପ୍ତବୟସ୍କଙ୍କୁ ସୁରକ୍ଷା ଦେବା ପୋଲିସର ପ୍ରମୁଖ କର୍ତ୍ତବ୍ୟ। 

କୋର୍ଟ ମହିଳାଙ୍କ ପରିବାରକୁ କଡ଼ା ନିର୍ଦ୍ଦେଶ ଦେଇଛନ୍ତି ଯେ ସେମାନେ ଦମ୍ପତିଙ୍କୁ କୌଣସି ପ୍ରକାର ଶାରୀରିକ ବା ମାନସିକ କ୍ଷତି ପହଞ୍ଚାଇବେ ନାହିଁ। ଏଥିସହ ସେମାନଙ୍କ ବାସଭବନରେ ପ୍ରବେଶ କରିବା କିମ୍ବା କୌଣସି ବୈଦ୍ୟୁତିକ ମାଧ୍ୟମରେ ସେମାନଙ୍କ ସହ ଯୋଗାଯୋଗ କରିବାକୁ ମଧ୍ୟ ବାରଣ କରାଯାଇଛି। ସେମାନଙ୍କ ନିରାପତ୍ତା ଓ ସୁରକ୍ଷା ନିଶ୍ଚିତ କରିବା ଦାୟିତ୍ୱ କୋର୍ଟ ଶାହାଜାହାନପୁର ଏସପିଙ୍କୁ ପ୍ରଦାନ କରିଛନ୍ତି।

ଜ୍ୟୋତିଷ ପୀଠର ଶଙ୍କରାଚାର୍ଯ୍ୟ ସ୍ୱାମୀ ଅବିମୁକ୍ତେଶ୍ୱରାନନ୍ଦ ସରସ୍ୱତୀଙ୍କ ଅଡୁଆ ବଢିବାରେ ଲାଗିଛି। ତାଙ୍କ ବିରୋଧରେ ରୁଜୁ ହୋଇଥିବା ପୋକ୍ସୋ (POCSO) ମାମଲାରେ ଗିରଫଦାରୀ ଏଡାଇବା ପାଇଁ ସେ ଏବେ ଆହ୍ଲାବାଦ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ମଙ୍ଗଳବାର ଦିନ ଶଙ୍କରାଚାର୍ଯ୍ୟଙ୍କ ଓକିଲ ହାଇକୋର୍ଟରେ ଆଗୁଆ ଜାମିନ ଆବେଦନ ଦାଖଲ କରିଛନ୍ତି।

ସଙ୍ଗିନ ଅଭିଯୋଗ ଆଣିଲେ ଶିଷ୍ୟ

ସୂଚନା ଅନୁଯାୟୀ, ପ୍ରୟାଗରାଜର ଝୁସୀ ଥାନାରେ ସ୍ୱାମୀ ଅବିମୁକ୍ତେଶ୍ୱରାନନ୍ଦ ଏବଂ ତାଙ୍କ ଶିଷ୍ୟ ମୁକୁନ୍ଦାନନ୍ଦ ବ୍ରହ୍ମଚାରୀଙ୍କ ବିରୋଧରେ ଏକ ଗୁରୁତର ମାମଲା ରୁଜୁ କରାଯାଇଛି। ପୋକ୍ସୋ କୋର୍ଟଙ୍କ ନିର୍ଦ୍ଦେଶ କ୍ରମେ ପୋଲିସ ଏହି ଏଫଆଇଆର (FIR) ପଞ୍ଜୀକୃତ କରିଛି। ଅଭିଯୋଗ ରହିଛି ଯେ, ମାଘ ମେଳା ସମୟରେ ଶିବିରରେ ନାବାଳକଙ୍କ ସହ ଯୌନ ନିର୍ଯାତନା ଦିଆଯାଇଥିଲା। ଅଭିଯୋଗକାରୀଙ୍କ ପକ୍ଷରୁ ଦାଖଲ ଆବେଦନ ଭିତ୍ତିରେ କୋର୍ଟ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଥିଲେ।

ଷଡଯନ୍ତ୍ର ବୋଲି କହିଲେ ଶଙ୍କରାଚାର୍ଯ୍ୟ

ଅନ୍ୟପକ୍ଷରେ, ଶଙ୍କରାଚାର୍ଯ୍ୟ ଅବିମୁକ୍ତେଶ୍ୱରାନନ୍ଦ ଏହି ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ ଏହା ତାଙ୍କ ବିରୋଧରେ ଏକ ଗଭୀର ଷଡଯନ୍ତ୍ର। ନିକଟରେ ମାଘ ମେଳାରେ ପ୍ରଶାସନ ସହ ହୋଇଥିବା ବିବାଦ ଏବଂ ଗୋ-ରକ୍ଷା ଅଭିଯାନ କାରଣରୁ ତାଙ୍କୁ ମିଥ୍ୟା ମାମଲାରେ ଫସାଯାଉଛି ବୋଲି ସେ ଦାବି କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଯେତେବେଳେ ପୋଲିସ ଆସିବ, ସେ ସହଯୋଗ କରିବାକୁ ପ୍ରସ୍ତୁତ ଅଛନ୍ତି।

ପୂର୍ବରୁ ମଧ୍ୟ ବିବାଦରେ ଥିଲେ

ଉଲ୍ଲେଖଯୋଗ୍ୟ ଯେ, ଗତ କିଛି ଦିନ ହେବ ଶଙ୍କରାଚାର୍ଯ୍ୟ ଅବିମୁକ୍ତେଶ୍ୱରାନନ୍ଦ ଚର୍ଚ୍ଚାରେ ରହିଛନ୍ତି। ମାଘ ମେଳାରେ 'ମୌନୀ ଅମାବାସ୍ୟା' ସ୍ନାନକୁ ନେଇ ପ୍ରଶାସନ ସହ ତାଙ୍କର ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏହାବ୍ୟତୀତ ତାଙ୍କର 'ଶଙ୍କରାଚାର୍ଯ୍ୟ' ପଦବୀ ବ୍ୟବହାରକୁ ନେଇ ମଧ୍ୟ ମେଳା ପ୍ରଶାସନ ପକ୍ଷରୁ ନୋଟିସ ଜାରି କରାଯାଇଥିଲା। ବର୍ତ୍ତମାନ ପୋକ୍ସୋ ମାମଲା ରୁଜୁ ହେବା ପରେ ଘଟଣାଟି ଆହୁରି ଜଟିଳ ହୋଇପଡିଛି।

ଲକ୍ଷ୍ନୌ: ଉପଯୁକ୍ତ ପୋଷାକ ପିନ୍ଧି ଏବଂ ସାର୍ଟ ବଟନ୍‌ ନ ଦେଇ କୋର୍ଟକୁ ଆସିବା ସମ୍ବନ୍ଧିତ ଅବମାନନା ମାମଲାରେ ସ୍ଥାନୀୟ ଓକିଲ ଅଶୋକ ପାଣ୍ଡେଙ୍କୁ ଆହ୍ଲାବାଦ ହାଇକୋର୍ଟ ୬ ମାସ ଜେଲ୍‌ଦଣ୍ଡ ଶୁଣାଇଛନ୍ତି। ଏହା ସହିତ ୨ ହଜାର ଟଙ୍କା ଜୋରିମାନା ଲଗାଇଛନ୍ତି। ଏହି ରାଶି ନ ଦେଲେ ଆଉ ଗୋଟେ ମାସ ଜେଲ୍‌ଦଣ୍ଡ ଭୋଗିବେ ବୋଲି ହାଇକୋର୍ଟ କହିଛନ୍ତି। ଏହା ସହିତ ଲକ୍ଷ୍ନୌର ଚିଫ୍‌ ଜୁଡିସିଆଲ ମାଜିଷ୍ଟ୍ରେଟଙ୍କ କୋର୍ଟରେ ଚାରି ସପ୍ତାହ ମଧ୍ୟରେ ଆତ୍ମସମର୍ପଣ କରିବାକୁ ଓକିଲଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ମାମଲା ୨୦୨୧ର। ଓକିଲଙ୍କ ବିରୋଧରେ ଲାଗିଥିବା ସଙ୍ଗୀନ ଅଭିଯୋଗ ଲାଗିଥିଲା। ସେ କୋର୍ଟରେ ଖରାପ ଆଚରଣ କରିଥିଲେ। କୋର୍ଟ କାର୍ଯ୍ୟରେ ସାମିଲ ହେବାକୁ ମଧ୍ୟ ମନା କରି ଦେଇଥିଲେ। ଜଷ୍ଟିସ ବିବେକ ଚୌଧୁରୀ ଏବଂ ବିଆର ସିଂହଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରି ଗୁରୁବାର ଏହି ଦଣ୍ଡ ଘୋଷଣା କରିଥିଲେ। ମାମଲାର ଗୁରୁତ୍ବକୁ ଦେଖି ଓକିଲଙ୍କୁ କଠୋର ଦଣ୍ଡ ଦିଆଯିବା ଉଚିତ ବୋଲି କୋର୍ଟ କହିଥିଲେ। ଏହା ସହିତ ଓକିଲ ପାଣ୍ଡେଙ୍କୁ କାରଣ ଦର୍ଶାଅ ନୋଟିସ ମଧ୍ୟ ଜାରି କରିଥିଲେ। ଆହ୍ଲାବାଦ ହାଇକୋର୍ଟ ଏବଂ ଲକ୍ଷ୍ନୌ ଖଣ୍ଡପୀଠରେ ଆଇନ ଅଭ୍ୟାସ ପାଇଁ ତାଙ୍କୁ କାହିଁକି ନିଷିଦ୍ଧ କରାଯିବ ନାହିଁ ବୋଲି ଏଥିରେ ପଚରା ଯାଇଛି। ମେ’ ମାସ ସୁଦ୍ଧା ଏହା ଉପରେ ଜବାବ ଦେବାକୁ କୁହାଯାଇଛି। ୨୦୨୧ ଅଗଷ୍ଟ ୧୮ରେ ଓକିଲ ପାଣ୍ଡେ ଉଚିତ ପୋଷାକ ନ ପିନ୍ଧି କୋର୍ଟରେ ପହଞ୍ଚି ଥିଲେ। ସେ ସାର୍ଟ ବଟନ୍‌ ଦେଇ ନ ଥିଲେ। ଏହାକୁ ନେଇ ବିଚାରପତି ତାଙ୍କ ଉପରେ ପ୍ରଶ୍ନ ଉଠାଇ ଥିଲେ। କୋର୍ଟରୁ ବାହାରି ଯିବାକୁ କହିବାରୁ ଓକିଲ ବିଚାରପତିଙ୍କୁ ଖରାପ ବ୍ୟବହାର କରି ଗୁଣ୍ଡା କହିଥିଲେ। ପରେ କୋର୍ଟ ନିଜ ଆଡୁ ଅବମାନନା ମାମଲା ରୁଜୁ କରି ଓକିଲଙ୍କୁ ନୋଟିସ ଜାରି କରିଥିଲେ।

ପ୍ରୟାଗରାଜ: ପଶୁପକ୍ଷୀଙ୍କ ଭଳି ପ୍ରତି ଋତୁରେ ପାର୍ଟନର ବଦଳାଇବାର ଧାରା ଏକ ସୁସ୍ଥ ଏବଂ ସଭ୍ୟ ସମାଜର ଲକ୍ଷଣ ନୁହେଁ। ବିବାହରେ ବ୍ୟକ୍ତିଙ୍କୁ ଯେଉଁ ସୁରକ୍ଷା ଏବଂ ସାମାଜିକ ସ୍ବୀକୃତି ମିଳିଥାଏ ତାହା ଲିଭ୍-ଇନ୍-ରିଲେସନ୍ସିପରେ ମିଳି ନ ଥାଏ। ଏହି ସମ୍ବନ୍ଧ ବହୁତ ଆକର୍ଷଣୀୟ ଲାଗିଥାଏ। ଧାରାବାହିକ, ୱେବ୍ ସିରିଜ ଏବଂ ଫିଲ୍ମ ଦେଖି ଯୁବ ବର୍ଗ ଏଥିପ୍ରତି ଆକର୍ଷିତ ହୋଇଥାନ୍ତି। କିନ୍ତୁ ସମୟ ବିତିବା ସହିତ ଏହି ସମ୍ପର୍କକୁ କୌଣସି ସାମାଜିକ ସ୍ବୀକୃତି ମିଳି ନ ଥାଏ ବୋଲି ସେମାନେ ଅନୁଭବ କରିଥାନ୍ତି। ଏହା ଦ୍ବାରା ଯୁବ ଗୋଷ୍ଠୀ ନିରାଶ ହୋଇଥାନ୍ତି। ଭାରତରେ ବିବାହ ସଂସ୍କୃତିକୁ ଧ୍ବଂସ କରିବା ପାଇଁ ଏକ ସମ୍ପୂର୍ଣ୍ଣ ବ୍ୟବସ୍ଥା କାର୍ଯ୍ୟ କରୁଛି। ଚଳଚ୍ଚିତ୍ର ଏବଂ ଧାରାବାହିକ ମାଧ୍ୟମରେ ପରକୀୟା ପ୍ରୀତି ଭଳି ସମ୍ବନ୍ଧକୁ ପ୍ରୋତ୍ସାହନ ଦିଆଯାଉଛି। ଏମାନେ ସମାଜକୁ କଳୁଷିତ କରିବା ପାଇଁ କାର୍ଯ୍ୟ କରୁଛନ୍ତି। ବିବାହିତା ଲିଭ୍-ଇନ୍ ପାର୍ଟନରଙ୍କୁ ଦୁଷ୍କର୍ମ ଅଭିଯୋଗ ଲାଗିଥିବା ଅଦନାନକୁ ଜାମିନ ଦେଇ ଆହ୍ଲାବାଦ ହାଇକୋର୍ଟ ଏହି ଟିପ୍ପଣୀ ଦେଇଛନ୍ତି।

ସହରାନପୁରର ଅଦନାନଙ୍କ ବିରୋଧରେ ତାଙ୍କ ପାର୍ଟନର ଦୁଷ୍କର୍ମ ଅଭିଯୋଗ ଲଗାଇ ଥିଲେ। ଏହି ସମୟରେ ମହିଳା ଗର୍ଭବତୀ ହୋଇଥିଲେ। ଏହାକୁ ନେଇ ଜଷ୍ଟିସ ସିଦ୍ଧାର୍ଥଙ୍କ ଏକକ ଖଣ୍ଡପୀଠ କହିଥିଲେ ଯେ ଅନେକ ବିକଶିତ ଦେଶରେ ବିବାହ ବ୍ୟବସ୍ଥାକୁ ବଞ୍ଚାଇବା କାଠିକର ହୋଇଯାଇଛି। ଭାରତରେ ଯଦି ଏହା ଚାଲେ ତେବେ ଭବିଷ୍ୟତରେ ବଡ଼ ସମସ୍ୟା ସୃଷ୍ଟି ହେବ। ନିଜ ପରିବାର ସହ ଭଲ ସମ୍ବନ୍ଧ ରଖି ନ ଥିବା ବ୍ୟକ୍ତି ଦେଶର ଉନ୍ନତିରେ ଯୋଗଦାନ ଦେଇପାରେ ନାହିଁ। ଏଭଳି ପୁରୁଷ ଏବଂ ମହିଳାଙ୍କ ନିକଟରେ କୌଣସି ଆଧାର ନ ଥାଏ। ଗୋଟିଏରୁ ଆଉ ଗୋଟିଏ ସମ୍ବନ୍ଧକୁ ଗଲେ ଜୀବନରେ ସନ୍ତୋଷ ମିଳି ନ ଥାଏ। ଏଭଳି ସମ୍ବନ୍ଧରୁ ଜନ୍ମିତ ଶିଶୁ ଅନେକ ସମସ୍ୟାର ସମ୍ମୁଖୀନ ହୋଇଥାନ୍ତି। ମାତାପିତା ଅଲଗା ହୋଇଗଲେ ଶିଶୁ ସମାଜ ପାଇଁ ବୋଝ ପାଲଟି ଯାଆନ୍ତି।

ନୂଆଦିଲ୍ଲୀ: ତାଜମହଲ ପରିସରରେ ବନ୍ଦ ଥିବା ୨୨ଟି କୋଠରୀ ଖୋଲିବା ପାଇଁ ହୋଇଥିବା ଆବେଦନକୁ ଆହ୍ଲାବାଦ ହାଇକୋର୍ଟ ଖାରଜ କରିଦେଇଛନ୍ତି। ଉତ୍ତର ପ୍ରଦେଶ ଅଯୋଧ୍ୟାର ବିଜେପି ନେତା ରଜନୀଶ ଶର୍ମା ନିଜ ଆବେଦନରେ କହିଥିଲେ ଯେ ତାଜମହଲ ସମ୍ପର୍କରେ ବିଭିନ୍ନ ଇତିହାସ ଗ୍ରନ୍ଥରେ ଭୁଲ୍ ତଥ୍ୟ ଦିଆଯାଇଛି । ତାଜମହଲରେ ବନ୍ଦ ଥିବା ୨୨ଟି କୋଠରୀରେ ହିନ୍ଦୁ ଦେବାଦେବୀଙ୍କ ମୂର୍ତ୍ତି ଅଛି କି ନାହିଁ ତା’ର ଯାଞ୍ଚ କରିବା ପାଇଁ ଏହି ସବୁ ରୁମ୍ ଖୋଲିବାକୁ ଭାରତୀୟ ପ୍ରତ୍ନତାତ୍ବିକ ବିଭାଗ(ଏଏସ୍ଆଇ)କୁ ଅନୁମତି ଦିଆଯାଉ ବୋଲି ସେ ଦାବି କରିଥିଲେ।

ଆହ୍ଲାବାଦ ହାଇକୋର୍ଟର ଲକ୍ଷ୍ନୌ ବେଞ୍ଚ୍ ଏପରି ଆବେଦନ ପାଇଁ ରଜନୀଶ ଶର୍ମାଙ୍କୁ ଭର୍ତ୍ସନା କରିଥିଲେ । ଜଷ୍ଟିସ ଡି.କେ ଉପାଧ୍ୟାୟ ଆବେଦନକାରୀଙ୍କୁ ଭର୍ତ୍ସନା କରି କହିଛନ୍ତି ଯେ ଜନସ୍ୱାର୍ଥ ମାମଲା (ପିଏଲ) ବ୍ୟବସ୍ଥାର ଅପବ୍ୟବହାର କର ନାହିଁ ।

ଜଷ୍ଟିସ ଡି.କେ ଉପାଧ୍ୟାୟ ଏବଂ ଜଷ୍ଟିସ ସୁଭାଷ ବିଦ୍ୟାର୍ଥୀଙ୍କ ଏକ ବେଞ୍ଚ୍ ତାଜମହଲର ୨୨ଟି କୋଠରୀ ଖୋଲିବାକୁ ଆବେଦନର ଶୁଣାଣି କରିଥିଲେ। ହାଇକୋର୍ଟ ଆବେଦନକାରୀଙ୍କୁ କହିଥିଲେ ଯେ ତୁମେ କ’ଣ ଭାବୁଛ ତାଜମହଲ ଶାହ ଜାହାଁଙ୍କ ଦ୍ୱାରା ନିର୍ମିତ ହୋଇନାହିଁ? ଆମେ କଣ ଏହାକୁ କିଏ ନିର୍ମାଣ କରିଛି ଆଉ ତାଜମହଲର ବୟସ କ’ଣ ସେନେଇ ରାୟ ପ୍ରକାଶ କରିବାକୁ ଏଠାକୁ ଆସିଛୁ?

ହାଇକୋର୍ଟ ଆବେଦନକାରୀଙ୍କୁ କଡ଼ା ଭାଷାରେ କହିଥିଲେ ଯେ ଯେଉଁ ବିଷୟ ଉପରେ ତୁମେ କିଛି ଜାଣିନ, ସେହି ବିଷୟ ଉପରେ ଏମ୍ଏ ଓ ପିଏଚଡି କର । ଯଦି କୌଣସି ଶିକ୍ଷାନୁଷ୍ଠାନ ଆପଣଙ୍କୁ ରିସର୍ଚ୍ଚ କରିବାକୁ ଅନୁମତି ନ ଦିଏ, ତେବେ ଆମ ପାଖକୁ ଆସ।

ପ୍ରୟାଗରାଜ: ଅଭିବ୍ୟକ୍ତିର ସ୍ଵାଧୀନତା ଅସିମୀତ ନୁହେଁ। ସମ୍ବିଧାନ ଅନୁଯାୟୀ ଏଥିରେ କିଛି କଟକଣା ମଧ୍ୟ ରହିଛି। ଅଭିବ୍ୟକ୍ତିର ସ୍ଵାଧୀନତା ଆଧାରରେ ଅନ୍ୟର ଧାର୍ମିକ ଭାବନାକୁ ଆଘାତ ଦେବାର ଅଧିକାର କାହାର ନାହିଁ। ଭଗବାନ ରାମଙ୍କ ବିନା ଭାରତ ଅସମ୍ପୂର୍ଣ୍ଣ। ସୋସିଆଲ ମିଡିଆରେ ଭଗବାନ ରାମ ଏବଂ କୃଷ୍ଣଙ୍କ ବିରୋଧରେ ଦିଆଯାଇଥିବା ଆପତ୍ତିଜନକ ଟିପ୍ପଣୀ ମାମଲାର ଶୁଣାଣି କରି ଆହ୍ଲାବାଦ ହାଇକୋର୍ଟ ଏହି ଗୁରୁତ୍ବପୂର୍ଣ୍ଣ ଟିପ୍ପଣୀ କରିଛନ୍ତି। କୋର୍ଟ କହିଛନ୍ତି ଯେ ଯେଉଁ ଦେଶରେ ରହୁଛନ୍ତି ସେହି ଦେଶର ମହାପୁରୁଷ, ସଂସ୍କୃତିକୁ ସମ୍ମାନ ଦେବା ଜରୁରୀ। ଇଶ୍ବରକୁ ମାନନ୍ତୁ ଅବା ନ ମାନନ୍ତୁ ଅନ୍ୟର ଆସ୍ଥାକୁ ଆଘାତ କରିବାର ଅଧିକାର କାହାର ନାହିଁ। ଆମ ସଂସ୍କୃତି ବସୁଧୈବ କୁଟୁମ୍ବକମ୍‌ର ରହିଛି। ଆମେ ସର୍ବେ ଭବନ୍ତୁ ସୁଖିନଃ, ସର୍ବେ ଶନ୍ତୁ ନିରାମୟା । ସର୍ବେ ଭଦ୍ରାଣି ପଶ୍ୟନ୍ତୁ, ମା କଶ୍ଚିତ୍ ଦୁଃଖ ଭାଗ୍ ଭବେତ କାମନା କରୁଥିବା ଲୋକ। ଭଗବାନ ରାମ-କୃଷ୍ଣଙ୍କ ବିରୋଧରେ ଖରାପ ମନ୍ତବ୍ୟ ଦେଇଥିବା ଆକାଶ ଜାଟବକୁ ପୁଣି ଏପରି ଅପରାଧ ନ କରିବାକୁ ଚେତାବନୀ ଦେଇ କୋର୍ଟ ସର୍ତ୍ତମୂଳକ ଜାମିନ ଦେଇଛନ୍ତି।

କୋର୍ଟ ଶୁଣାଣି ସମୟରେ କହିଥିଲେ ଯେ, ଋଷିମୁନିମାନେ ମନୁଷ୍ଯକୁ ଭଗବାନ ବନାଇବାର ରାସ୍ତା ଦେଖାଇଛନ୍ତି । ରାମାୟଣ, ମହାଭାରତରେ ଭାରତର ଆତ୍ମା ଦର୍ଶନ ହୋଇଥାଏ ବୋଲି ଟାଗୋର କହିଛନ୍ତି । ମହାତ୍ମା ଗାନ୍ଧୀଙ୍କ ଜୀବନରେ ମଧ୍ୟ ରାମଙ୍କ ମହତ୍ତ୍ବ ରହିଛି। ସାମାଜିକ ସମନ୍ବୟ ରାମାୟଣ ବ୍ୟତୀତ ଆଉ କେଉଁଠାରେ ଦେଖିବାକୁ ମିଳେନାହିଁ। ଶବରୀଙ୍କ ଅଇଁଠା ଖାଇବା ଠାରୁ ନେଇ ନିଷାଦରାଜଙ୍କୁ ଆଲିଙ୍ଗନ କରିବା ପର୍ଯ୍ୟନ୍ତ ସବୁଠି ଶ୍ରୀରାମ ସାମାଜିକ ସମନ୍ବୟର ବାର୍ତ୍ତା ଦେଇଛନ୍ତି। ଭଗବତ ଗୀତାରେ
କର୍ମଫଳର ସିଦ୍ଧାନ୍ତ ବର୍ଣ୍ଣନା କରାଯାଇଛି।

ଆତ୍ମା ଅମର। ଗାଈଗୋଠରେ ବାଛୁରୀ ମା’କୁ ଖୋଜିବା ଭଳି ଆତ୍ମା ପୋଷାକ ପରି ଶରୀର ବଦଳି ଥାଏ। ମନ ଶରୀରର ଅଂଶ। ଶରୀର ସୁଖ-ଦୁଃଖର ଅନୁଭବ କରିଥାଏ। ଭଗବାନ ଶ୍ରୀକୃଷ୍ଣ କର୍ମ ଉପରେ ଧ୍ୟାନ ଦେବାକୁ କହିଛନ୍ତି। ବସୁଧୈବ କୁଟୁମ୍ବକମ୍‌ର ଭାବନା ଅନ୍ୟ କୌଣସି ଦେଶରେ ନାହିଁ । ରାମକୃଷ୍ଣଙ୍କ ଉପରେ ଅଶାଳୀନ ମନ୍ତବ୍ୟ କ୍ଷମାଯୋଗ୍ୟ ନୁହେଁ ଉପରେ କୋର୍ଟ କହିଥିଲେ ଯେ ଭଗବାନ ଧର୍ମ ରକ୍ଷା ପାଇଁ ଆସିଥାନ୍ତି। ଧର୍ମର କ୍ଷୟ ହେଲେ ଭଗବାନ ଅବତାର ନେଇଥାନ୍ତି। ଭାରତୀୟ ସମ୍ବିଧାନରେ ମଧ୍ୟ ରାମ ସୀତାଙ୍କ ଛବି ଅଙ୍କାଯାଇଛି। ଏଭଳି ସ୍ଥିତିରେ ରାମକୃଷ୍ଣଙ୍କ ବିରୋଧରେ ଟିପ୍ପଣୀ କ୍ଷମା ଯୋଗ୍ୟ ନୁହେଁ । କେବଳ ହିନ୍ଦୁ ନୁହେଁ, ମୁସଲମାନ ମଧ୍ୟ କୃଷ୍ଣ ଭକ୍ତ ରହିଛନ୍ତି। ରସଖାନ, ଅମିର ଖୁସରୋ, ଆଲମ ଶେଖ, ୱାଜିଦ ଅଲି ଶାହା ନଜିର ଅକବରବାଦୀ ରାମକୃଷ୍ଣ ଭକ୍ତ ଥିଲେ। ରାମକୃଷ୍ଣଙ୍କ ଅପମାନ ସାରା ଦେଶର ଅପମାନ।