କାମାକ୍ଷାନଗର: ଜନଗଣନା କର୍ମଚାରୀଙ୍କୁ ମାଡ ଅଭିଯୋଗ । ସାରା ରାଜ୍ୟରେ ଜନଗଣନା କାର୍ଯ୍ୟ ଚାଲୁରହିଥିବା ବେଳେ କାମାକ୍ଷାନଗରରେ ଜନଗଣନା କରିବାକୁ ଯାଇଥିବା କର୍ମଚାରୀଙ୍କୁ ମରଣାତ୍ମକ ଆକ୍ରମଣ ଅଭିଯୋଗ । ଆକ୍ରମଣରେ ୪ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରେ ୨ଜଣ ମହିଳା କର୍ମଚାରୀ ଅଛନ୍ତି। ସେମାନଙ୍କ ମୁହଁରେ ଗଭୀର ଆଘାତ ଲାଗିଛି । କାମାକ୍ଷାନଗର ଏନଏସି ତିନି ନମ୍ବର ୱାର୍ଡ ମହିମାନଗର ସାହିରେ ଆଟାକ ହୋଇଛି ।

କର୍ମଚାରୀଙ୍କୁ ମାଡ଼ ମାରିବା ସହ ଜନଗଣନା କରୁଥିବା ଦିଦିଙ୍କ ଗାଡି ଭାଙ୍ଗି ଦେଇଛନ୍ତି ସମ୍ପୃକ୍ତ ବ୍ୟକ୍ତି ଓ ତାଙ୍କ ଦୁଇ ପୁଅ l ଏହା ସହ ପଥର ଧରି ମାରିବାକୁ ଗୋଡାଇଥିବା ଅଭିଯୋଗ ହୋଇଛି । ଖବର ପାଇ କାମାକ୍ଷାନଗର ଉପଜିଲ୍ଲାପାଳ, ତହସିଲଦାର, ଏସଡିପିଓ ଓ ଥାନା ଅଧିକାରୀ ଘଟଣା ସ୍ଥଳରେ ପହଞ୍ଚିଥିଲେ । ପୋଲିସ ଆକ୍ରମଣକାରୀଙ୍କୁ ଅଟକ ରଖି ତଦନ୍ତ କରୁଛନ୍ତି ।

ଭୁବନେଶ୍ୱର: ବିଜୁ ଜନତା ଦଳର ବହୁ ନେତା ଓ ପ୍ରତିନିଧିମାନେ ଆଜି ଢେଙ୍କାନାଳ ଜିଲ୍ଲାର କାମାକ୍ଷାନଗର ଅଞ୍ଚଳରେ ଦୁଷ୍କର୍ମ ଜନିତ ମୃତୁ୍ୟବରଣ କରିଥିବା କଲେଜ ଛାତ୍ରୀଙ୍କ ଶୋକାକୁଳ ପରିବାର ସଦସ୍ୟ ଏବଂ ତାଙ୍କ ମାଆଙ୍କୁ ଭେଟି ସାନ୍ତ୍ୱନା ଜଣାଇବା ସହ ସମବେଦନା ପ୍ରକାଶ କରିଥିଲେ । ସନେ୍ଦହଜନକ ପରିସ୍ଥିତିରେ ସାରୁଆଳି ଗ୍ରାମ ନିକଟସ୍ଥ ଜଙ୍ଗଳରୁ କଲେଜ ଛାତ୍ରୀଙ୍କ ମୃତଦେହ ମିଳିଥିଲା । ଏହି ଅବସରରେ ପ୍ରତିନିଧି ଦଳ ଢେଙ୍କାନାଳ ପୁଲିସ ଅଧୀକ୍ଷକଙ୍କୁ ସାକ୍ଷାତ କରି ଘଟଣା ସମ୍ପର୍କରେ ତୁରନ୍ତ ଏବଂ ଦୃଢ଼ ପଦକ୍ଷେପ ନେବା ପାଇଁ ଏକ ସ୍ମାରକପତ୍ର ପ୍ରଦାନ କରିଥିଲେ । 

ଏହି ଘଟଣାଟି ମାର୍ଥାପୁର ଗ୍ରାମର ବାସିନ୍ଦା ଥିବା ଜଣେ ଯୁକ୍ତ ଦୁଇ ପ୍ରଥମ ବର୍ଷର କଲେଜ ଛାତ୍ରୀଙ୍କ ସହ ଘଟିଥିଲା । ମିଳିଥିବା ସୂଚନାନୁସାରେ, ସେ ବୁଧବାର ଦିନ ପରୀକ୍ଷା ଦେବାକୁ ଯାଇଥିଲେ କିନ୍ତୁ ଘରକୁ ଫେରିନଥିଲେ । ଗୁରୁବାର ସକାଳେ କାମାକ୍ଷାନଗର ଥାନା ଅଧୀନସ୍ଥ ସାରୁଆଳି ଗ୍ରାମ ନିକଟସ୍ଥ ଜଙ୍ଗଳରୁ ତାଙ୍କ ମୃତଦେହ ସନେ୍ଦହଜନକ ଭାବେ ଉଦ୍ଧାର ହୋଇଥିଲା । ଏହି ମୃତୁ୍ୟର ପାରିପାଶ୍ୱିକ ପରିସ୍ଥିତି ଗୁରୁତର ସନେ୍ଦହ ସୃଷ୍ଟି କରିଛି ଏବଂ ଏକ ସମ୍ପୂର୍ଣ୍ଣ ତଥା ନିରପେକ୍ଷ ତଦନ୍ତର ଆବଶ୍ୟକତା ରହିଛି । 

ବିଜୁ ଜନତା ଦଳ ଜିଲ୍ଲା ପୁଲିସ ପ୍ରଶାସନଙ୍କୁ ଘଟଣାର ନିରପେକ୍ଷ, ସଠିକ, ପକ୍ଷପାତବିହୀନ ଓ ଯୁକ୍ତିଯୁକ୍ତ ତଦନ୍ତ କରିବାକୁ ଜୋର ଦେଇଛି । ଦୋଷୀମାନଙ୍କୁ ଶୀଘ୍ର ଚିହ୍ନଟ କରି ଗିରଫ କରାଯିବା ସହ ମାମଲାକୁ ଶୀଘ୍ର ନ୍ୟାୟ ପାଇଁ ଫାଷ୍ଟ-ଟ୍ରାକ୍ ଆଇନ ପ୍ରକ୍ରିୟାରେ ଗ୍ରହଣ କରାଯାଉ ବୋଲି ଦାବି କରିଛନ୍ତି । ଏହା ସହ ପୀଡିତା ପରିବାରଙ୍କୁ ପୋଲିସ ପକ୍ଷରୁ ଉପଯୁକ୍ତ ସୁରକ୍ଷା ଯୋଗାଇ ଦିଆଯିବାକୁ ଦାବି କରାଯାଇଛି । 

ବିଜେଡି ପ୍ରତିନିଧି ଦଳ ଜୋର ଦେଇଥିଲେ ଯେ, ନ୍ୟାୟକୁ ସୁନିଶ୍ଚିତ କରିବା ଓ ଆଇନ ଶୃଙ୍ଖଳା ପ୍ରତି ଲୋକମାନଙ୍କର ବିଶ୍ୱାସ ଅତୁଟ ରଖିବା ପାଇଁ ତୁରନ୍ତ ପଦକ୍ଷେପ ଓ ଦାୟିତ୍ୱବୋଧତାର ଆବଶ୍ୟକତା ରହିଛି । ବିଜୁ ଜନତା ଦଳର ଏହି ପ୍ରତିନିଧି ଦଳରେ ଇପ୍ସିତା ସାହୁ, ଜ୍ୟୋତ୍ସାରାଣୀ ପରିଡା, ସାଗରିକା ମିଶ୍ର, ଶୁଭଲକ୍ଷ୍ମୀ ସାହୁ, ଅର୍ଚ୍ଚନା ପୁହାଣ, ଲିପିକା ଦାସ, ତିଳୋତ୍ତମା ଚୌଧୁରୀ, ଉର୍ବଶୀ ମହାପାତ୍ର, ଶ୍ରଦ୍ଧାଞ୍ଜଳୀ ସାହୁ ଓ ଜ୍ୟୋତ୍ସାରାଣୀ ମଣ୍ଡଳ ପ୍ରମୁଖ ରହିଥିଲେ ।

କାମାକ୍ଷାନଗର: କାମାକ୍ଷାନଗର ଥାନା ସାରୁଆଳି ଗ୍ରାମ ଜଙ୍ଗଲ ନିକଟରୁ କଲେଜ ଛାତ୍ରୀଙ୍କ କ୍ଷତବିକ୍ଷତ ମୃତଦେହ ଉଦ୍ଧାର ହୋଇଛି । ଦେହରେ ଅଛି କଲେଜ ୟୁନିଫର୍ମ । ପରୀକ୍ଷା ଦେବାକୁ ଯାଇଆଉ ଘରକୁ ଫେରି ନଥିଲେ ଛାତ୍ରୀଜଣକ । କାମାକ୍ଷାନଗର ମହିଳା ମହାବିଦ୍ୟାଳୟରେ ଯୁକ୍ତ ଦୁଇ ପଢ଼ୁଥିବା ବେଳେ ଛାତ୍ରୀଙ୍କୁ ଦୁଷ୍କର୍ମ ପରେ ହତ୍ୟା ହୋଇଥିବା ନେଇ ସନ୍ଦେହ କରାଯାଉଛି l ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି । 

ସୂଚନା ଅନୁସାରେ, ଭୁବନ ଥାନା ଅଞ୍ଚଳର ଛାତ୍ରୀ କାମାକ୍ଷାନଗର ମହିଳା ମହାବିଦ୍ୟାଳୟରେ ପାଠ ପଢ଼ୁଥିଲେ । ଗତକାଲି କଲେଜରେ ପରୀକ୍ଷା ଦେବାପରେ ଘରକୁ ଆଉ ଫେରିନଥିଲେ l ରାତିରେ ପରିବାର ଲୋକ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ଆଜି ସକାଳୁ ଛାତ୍ରୀଙ୍କ ମୃତଦେହ ସାରୁଆଳି ଜଙ୍ଗଲ ଭିତରେ ପଡ଼ିଥିବା ଦେଖିବାକୁ ମିଳିଥିଲା l ଛାତ୍ରୀଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ସୃଷ୍ଟି ହୋଇଥିବା ବେଳେ ପାରିପାର୍ଶ୍ଵିକ ସ୍ଥିତିରୁ ଦୁଷ୍କର୍ମ ପରେ ହତ୍ୟା କରାଯାଇଥିବା ଅନୁମାନ କରାଯାଉଛି l ଘଟଣାସ୍ଥଳରେ ପୋଲିସ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି । ଘଟଣା ସ୍ଥଳରେ ଢେଙ୍କାନାଳ ଏସପି, ସାଇଣ୍ଟିଫିକ ଟିମ ଓ ଡଗ ସ୍କ୍ବାଡ ପହଞ୍ଚିଛନ୍ତି। 

ଢେଙ୍କାନାଳ: OSRTC ବସ୍ -ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା । ଢେଙ୍କାନାଳ ପରଜଙ୍ଗ ଥାନା ୧୪୯ ନମ୍ବର ଜାତୀୟରାଜପଥ ର ଦୁମୁହାଁଣି ନିକଟରେ ଦୁର୍ଘଟଣା ହୋଇଛି । ଦୁର୍ଘଟଣାରେ ବସରେ ଥିବା ୩ ଯାତ୍ରୀଙ୍କ ସହ ଟ୍ରକ୍ ଡ୍ରାଇଭର ଗୁରୁତର ଆହତ ହୋଇଛନ୍ତି। ଗୁରୁତରଙ୍କୁ ପ୍ରଥମେ ପରଜଙ୍ଗ ଓ ପରେ କାମାକ୍ଷାନଗର ମେଡିକାଲରେ ଭର୍ତ୍ତି କରାଯାଇଛି। ଗୁରୁତର ଆହତମାନେ ଭୁବନେଶ୍ୱରର ହୋଇଥିବା ଜଣାପଡ଼ିଛି। ବସଟି ଭୁବନେଶ୍ବରରୁ ରାଉରକେଲା ଯାଉଥିବା ସମୟରେ ବିପରୀତ ଦିଗରୁ ଆସୁଥିବା ଏକ ଦ୍ରୁତଗାମୀ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା । 

ସୂଚନା ଅନୁସାରେ, ଭୁବନେଶ୍ୱରରୁ ରାଉରକେଲା ଯାଉଥିବା ଏକ OSRTC ବସ ରାତି ପ୍ରାୟ ତିନିଟା ସମୟରେ ୧୪୯ ନମ୍ବର ଜାତୀୟ ରାଜପଥର ରଙ୍ଗଥଳି ଦେଇ ଯାଉଥିବା ବେଳେ ଅପର ପାର୍ଶ୍ଵରୁ ଆସୁଥିବା ଏକ ଦ୍ରୁତଗାମୀ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା l ଦୁର୍ଘଟଣା ଏତେ ଭୟଙ୍କର ଥିଲା ଯେ ଟ୍ରକର ସମ୍ମୁଖ ଭାଗ ସମ୍ପୂର୍ଣ୍ଣ ଭାଙ୍ଗିରୁଜି ଯାଇଥିବା ବେଳେ ବସର ସାମ୍ନା ମଧ୍ୟ ଭାଙ୍ଗିରୁଜି ଯାଇଛି l ତେବେ ଦୁର୍ଘଟଣା ଫଳରେ ବସରେ ଥିବା ତିନି ଯାତ୍ରୀ ଗୁରୁତର ହୋଇଥିବା ବେଳେ ଟ୍ରକର ଡ୍ରାଇଭର ମଧ୍ୟ ଗୁରୁତର ହୋଇଛନ୍ତି l ଖବର ପାଇ ପୋଲିସ ଓ ୧୦୮ ଆମ୍ବୁଲାନ୍ସ ପହଞ୍ଚି ସମସ୍ତ ଗୁରୁତରଙ୍କୁ ସ୍ଥାନୀୟ ପରଜଙ୍ଗ ମେଡିକାଲରେ ଭର୍ତ୍ତି କରାଇଥିବା ବେଳେ ପରେ ସେମାନଙ୍କ ସ୍ୱାସ୍ଥ୍ୟବସ୍ଥା ସଂକଟାପର୍ଣ୍ଣ ଥିବାରୁ ସେମାନଙ୍କୁ କାମାକ୍ଷାନଗର ମେଡିକାଲକୁ ସ୍ଥାନାନ୍ତର କରାଯାଇଛି l 

ଢେଙ୍କାନାଳ: ଘର ସାମ୍ନାରେ ଥିବା ବନ୍ଦ ଗ୍ୟାରେଜରେ ପ୍ରଧାନ ଶିକ୍ଷୟିତ୍ରୀଙ୍କ ସନ୍ଦେହଜନକ ମୃତ୍ୟୁ। ଘର ସାମ୍ନାରେ ଥିବା ବନ୍ଦ ଗ୍ୟାରେଜରୁ ପ୍ରଧାନ ଶିକ୍ଷୟିତ୍ରୀଙ୍କ ମୃତଦେହ ଉଦ୍ଧାର ହୋଇଛି । ଢେଙ୍କାନାଳ କାମାକ୍ଷାନଗର ତୁମୁସିଙ୍ଗା ଥାନା ଅନ୍ତର୍ଗତ ଗୁନେଇବିଲି ଗାଁର ଏ ଘଟଣା। ଘର ସାମ୍ନାରେ ଥିବା ଗ୍ୟାରେଜ ଘର ଭିତରେ ମୃତଦେହ ପଡ଼ିଥିବା ବେଳେ ଘର ବାହାରେ ପଡିଥିଲା ତାଲା । ମୃତ ପ୍ରଧାନଶିକ୍ଷୟତ୍ରୀ ଜଣକ ତୁମୁସିଙ୍ଗା ପଞ୍ଚସଖା ସରକାରୀ ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ପ୍ରଭାତୀ ଦେହୁରୀ।

ସୂଚନା ଅନୁସାରେ, ସବୁଦିନ ପରି ରାତିରେ ଖାଇପିଇ ସାରି ଘରେ ଶୋଇଥିଲେ । ସକାଳୁ ପ୍ରଭାତୀଙ୍କ ଡ୍ରାଇଭର ଘରକୁ ଆସି ପ୍ରଭାତୀଙ୍କୁ ସ୍କୁଲ ନେବା ପାଇଁ ଡ଼ାକିଥିବା ବେଳେ ଘରେ ଥିବା ଶଶ୍ୱର ବୋହୂ ଘରେ ନଥିବା କହିଥିଲେ । ପରେ ପରିବାର ଲୋକ ଏଣେତେଣେ ଖୋଜାଖୋଜି କରିବାରୁ ଘର ସାମ୍ନାରେ ଥିବା ଗ୍ୟାରେଜ ଘରୁ ବାହାରୁ ତାଲା ପଡ଼ିଥିବା ଦେଖିଥିଲେ । ଘର ତାଲା ଭାଙ୍ଗିବାରୁ ପ୍ରଭାତୀ ଘର ଭିତରେ ସନ୍ଦେହଜନକ ଭାବେ ପଡିଥିବା ଦେଖିବାକୁ ମିଳିଥିଲା।

ପ୍ରଭାତୀଙ୍କ ଶଶ୍ୱର ତୁମୁସିଙ୍ଗା ଥାନାରେ ଖବର ପରେ ପୋଲିସ ଘଟଣାସ୍ଥଳରେ ପହଞ୍ଚି ପାରିପାର୍ଶ୍ଵିକ ସ୍ଥିତି ଯାଞ୍ଚ କରି ତଦନ୍ତ ଆରମ୍ଭ କରିଛି । ଢେଙ୍କାନାଳ ଜିଲ୍ଲା ସାଇଣ୍ଟିଫିକ ଟିମ ଘଟଣା ସ୍ଥଳରେ ପହଞ୍ଚି ଅଧିକ ତଦନ୍ତ ଆରମ୍ଭ କରିଛି । ଯାଞ୍ଚ ପରେ ମୃତ ଶିକ୍ଷୟତ୍ରୀଙ୍କ ଦୁଇଟି ମୋବାଇଲ ଓ ତାଙ୍କ ଝିଅର ମୋବାଇଲ ଗାଏବ ଥିବା ସୂଚନା ପାଇଛି । ଏବଂ ଶିକ୍ଷୟତ୍ରୀ ଙ୍କ ସୁନାହାର ମଧ୍ୟ ଲୁଟ ହୋଇଥିବା ନେଇ ଜଣାପଡିଛି । ଯାହାକୁ ନେଇ ଘଟଣାରେ ନୂଆ ମୋଡ଼ ସୃଷ୍ଟି ହେଉଥିବା ବେଳେ ପ୍ରଧାନଶିକ୍ଷୟତ୍ରୀଙ୍କ ମୃତ୍ୟୁ ହତ୍ୟା ନା ଆତ୍ମହତ୍ୟା ତାହା ସନ୍ଦେହ ସୃଷ୍ଟି କରୁଛି । ତେବେ ଶିକ୍ଷୟତ୍ରୀଙ୍କ ସ୍ୱାମୀ ଦୁଇବର୍ଷ ତଳେ ମୃତ୍ୟୁବରଣ କରିଥିବା ବେଳେ ତାଙ୍କର ଗୋଟିଏ ପୁଅ ଓ ଝିଅ ଥିବା ଜଣାପଡିଛି । ତେବେ ଶିକ୍ଷୟତ୍ରୀ ଜଣକ କାମାକ୍ଷାନଗର ବ୍ଲକ ଓଷ୍ଟା ସଙ୍ଘ ର ସଭାପତି ଥିବା ଜଣାପଡିଛି । ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ପୋଲିସ ତଦନ୍ତ ଜାରି ରଖିଛି ।

କାମାକ୍ଷାନଗର: ଛତିଶଗଡ଼ରେ ଓଡ଼ିଆ ଦମ୍ପତି ମୃତ । ବିଦ୍ୟୁତ ତାର ସଂସ୍ପର୍ଶରେ ଆସି ଚାଲିଗଲା ସ୍ୱାମୀ, ସ୍ତ୍ରୀଙ୍କ ଜୀବନ l ମୃତ ଦମ୍ପତି ହେଲେ ମହାବିରୋଡ଼ ଥାନା ବାମ ପଞ୍ଚାୟତ ରଗଡାସାହିର ଦୁର୍ୟୋଧନ ମହାନ୍ତ ଓ ଭାରତୀ ମହାନ୍ତ l ଦୁର୍ୟୋଧନ ଡ୍ରାଇଭର ଭାବେ ଛତିଶଗଡ଼ରେ କାମ କରୁଥିବା ବେଳେ ଗତକାଲି ଛତିଶଗଡ଼ ରାଜ୍ୟର କୁସୁମୁଣ୍ଡା ଠାରେ ଥିବା ଘରେ ଲୁଗା ଶୁଖାଉଥିବା ବେଳେ ବିଦ୍ୟୁତ ସଂସ୍ପର୍ଶରେ ଆସିଥିଲେ ସ୍ତ୍ରୀ l ସ୍ତ୍ରୀଙ୍କୁ ବଞ୍ଚାଇବାକୁ ଯାଇ ସ୍ୱାମୀ ଦୁର୍ଯୋଧନ ମଧ୍ୟ ବିଦ୍ୟୁତ ସଂସ୍ପର୍ଶରେ ଆସିଥିଲେ l ଦୁଇ ଜଣଙ୍କୁ ଉଦ୍ଧାର କରାଯାଇ ହସପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଆଜି ଉଭୟଙ୍କ ମୃତଦେହ ମୃତଦେହ ପହଞ୍ଚିବା ପରେ ଶୋକାକୂଳ ପରିବେଶରେ ସେମାନଙ୍କର ଶେଷକୃତ୍ୟ ସମ୍ପନ୍ନ ହୋଇଛି।

କାମାକ୍ଷାନଗର(ରିତେଶ ବ୍ରହ୍ମ): ଚାଷୀ ଭାଇଟିଏ ହେଉ କିମ୍ୱା କବିର ସ୍ପର୍ଶରୁ ଆଜି ବହୁ ଦୂରରେ ବାଇଚଢ଼େଇ। କାହିଁ କେତେ ଆଦି ଅନାଦି କାଳରୁ ପ୍ରତ୍ୟକ୍ଷ ବା ପରୋକ୍ଷ ଭାବରେ ବିଭିନ୍ନ ସମୟରେ ପ୍ରକୃତି ସହ ମନୁଷ୍ୟ ସମାଜକୁ ଏକ ଅଦୃଶ୍ୟ ଖିଅରେ ଯୋଡ଼ୁଥିବା ବାଇଚଢ଼େଇ ଏବେ ଦୂର ଦିଗବଳୟ ଭିତରେ। ଆଖି ଖୋଜୁଛି, ମନ ଡାକୁଛି, କିନ୍ତୁ ଆଉ ଦିଶୁନାହିଁ ବାଇଆ ବସାର ସୁମଧୁର ଛବି ଓ କୋଳାହଳ ତାଳବଣ। ପ୍ରକୃତିର ସହ ମନୁଷ୍ୟ ଯେତେବେଳେ ପ୍ରତିଯୋଗିତା ଭାବ ରଖି ଆଗକୁ ବଢ଼ୁଥାଏ ସେତେବେଳେ ପ୍ରକୃତି କୋଳରୁ ବାଇଚଢ଼େଇ ନିଶ୍ଚିହ୍ନ ହେବାକୁ ବସିଛନ୍ତି।

ବଦଳୁଛି ଦୁନିଆ ଆଉ ବଦଳୁଛି ସଭ୍ୟତା। ଅସନ୍ତୁଳନ ପରିବେଶ ଓ ଜୈବ ବିବିଧତା ମଧ୍ୟରେ ଏଠି ବିପଦରେ ବନ୍ୟଜନ୍ତୁଙ୍କ ଠାରୁ ଅନେକ ପ୍ରଜାତିର ଜୀବ। ଆଉ ତାହାରି ଭିତରେ ଇତିହାସର ମୁକସାକ୍ଷୀ ହୋଇରହିଛି ବାଇଚଢ଼େଇ। ଯେଉଁ ବାଇଚଢେଇର କିଚିରିମିଚିରି ଶବ୍ଦରେ ଫାଟିପଡୁଥିଲା ପରିବେଶ ତାହା ଏବେ ଦିନକୁ ଦିନ ଲୋପ ପାଇବାକୁ ବସିଲାଣି। ଗାଁ ଗଣ୍ଡାରେ ଦୂର ତାଳବଣରେ ଆଉ ଦିଶୁନାହିଁ ବାଇଚଢ଼େଇ ବସା କିମ୍ୱା ସେଇ ବସା ଭିତରେ ଓହଳି ରହିଥିବା ଶହ ଶହ ବାଇଚଢ଼େଇଙ୍କ ଚିତ୍ର। ସାମ୍ପ୍ରତିକ ପରିସ୍ଥିତିରେ ବିଶ୍ୱରେ ତାପମାତ୍ରାରେ ଅସ୍ଥିରତା ଓ ବିଭିନ୍ନ ପ୍ରାକୃତିକ ଦୁର୍ବିପାକ ଆଜି ଭାଙ୍ଗି ଦେଇଛି ବାଇଚଢେଇର ବସା। ଯେଉଁ ବାଇଚଢ଼େଇ ଠାରୁ ଶିଖିବାକୁ ମିଳିଥାଏ ଯୌଥ ପରିବାରର ଚଳଣି ଆଉ ଝଡ଼ବତାସରେ ଦୃଢ ଭଳି ରହିବାର ବିରଳ ଶିକ୍ଷା।

ଗୋଟିଏ ପଟେ କ୍ରମବର୍ଦ୍ଧିଷ୍ଣୁ ଜନସଂଖ୍ୟା ଓ ସାଧାରଣ ଜୀବନଶୈଳୀରେ ବୃହତ ପରିବର୍ତ୍ତନ ଆଜି ହଜାଇ ଦେଇଛି ବାଇଚଢ଼େଇ ସହ ରହିଥିବା ସ୍ମୁତି। ସାରା ବିଶ୍ୱ ଏବେ ସମୟ କ୍ରମରେ ଉଚ୍ଚ ବୈଷୟିକ ଜ୍ଞାନକୌଶଳକୁ କରାୟତ କରିବା ପାଇଁ ଆଉ ପାଦେ ଆଗରେ। ବିଶେଷ କରି ଯୋଗାଯୋଗ କ୍ଷେତ୍ରରେ ଅନ୍ୟ ବିକଶିତ ରାଷ୍ଟ୍ର ସହ ସମତୁଲ ହେବା ପାଇଁ ଭାରତ ଏବେ ପ୍ରତିଯୋଗିତାର ଶୀର୍ଷରେ। ଯୋଗାଯୋଗ କ୍ଷେତ୍ରରେ ସହଜ ଓ ସୁଗମ ହେବା ସହ ନୂଆ ପିଢ଼ିଙ୍କ ପାଇଁ ନୂତନ ଜ୍ଞାନକୌଶଳ ଉଦ୍ଭାବନ ପାଇଁ ହୁଏତ ବାଇଚଢ଼େଇ ଆଜି ଧ୍ୱଂସ ମୁଖରେ। ଗୋଟିଏ ପଟେ ଯୋଗାଯୋଗ କ୍ଷେତ୍ରରେ ଦ୍ରୁତ ଅଭିବୃଦ୍ଧି କରିବାକୁ ଯାଇ ଆରମ୍ଭ ହୋଇଛି ୪ଜି ଆଉ ୫ଜି ଯୁଗ। ଆଉ ଏହି ନୂତନ କୌଶଳ ପାଇଁ ଜୈବମଣ୍ଡଳରେ ସୃଷ୍ଟି ହେଉଛି ରେଡିଏସନ। ଆଉ ଏହି ରେଡିଏସନର ତୀବ୍ରତା ଆଜି ଏତେ ପ୍ରଖର ଯେ ସାରା ବିଶ୍ୱରେ ଦେଖାଦେଇଛି ପ୍ରାକୃତିକ ବିପର୍ଯ୍ୟୟ ଆଉ ଏହି ବିପର୍ଯ୍ୟୟରେ ବଳି ପଡ଼ିଗଲେ ଆମ ସଂସ୍କୃତି, ପରମ୍ପରା ଓ କିମ୍ୱଦନ୍ତୀର ଗାଥା ବହନ କରୁଥିବା ବାଇଚଢେଇ ଓ ସେମାନଙ୍କ ବଂଶଧର। ଦ୍ରୁତ ଶିଳ୍ପାୟନ, ଯୋଗାଯୋଗ କ୍ଷେତ୍ରରେ ଅଭିବୃଦ୍ଧି, ନୂତନ ଜ୍ଞାନକୌଶଳର କ୍ଷମତା ଠାରୁ ଅଧିକ ବ୍ୟବହାର ସତେ ଯେମିତି ଦାଉ ସାଜିଛି ପ୍ରକୃତିର ଏକ ସୁନ୍ଦର ସୃଷ୍ଟି ବାଇଚଢ଼େଇ ଉପରେ।

କାମାକ୍ଷାନଗରର ସଙ୍ଗୀତା ମିଶ୍ର କୁହନ୍ତି ବାଇଚଢେଇ ଆଉ ଆମ ପିଲାଦିନ ମଧ୍ୟରେ ରହିଛି ଏକ ଅଲିଭା ସ୍ମୃତି। କିନ୍ତୁ ବର୍ତ୍ତମାନର ପରିବେଶ ଓ ଜଳବାୟୁ ଏତେ ବିଷାକ୍ତ ହୋଇଗଲାଣି ଯେ ବାଇଚଢେଇ ଭଳି ଗୋଟିଏ ଅତି କ୍ଷୁଦ୍ର ପକ୍ଷୀ ସେଥିରେ ବଞ୍ଚିରହିବା ବହୁ କଷ୍ଟ। ହୁଏତ ସେଥିପାଇଁ ଆଜି ଅନେକ ସ୍ଥାନରେ ବାଇଚଢେଇ ଦେଖିବାକୁ ମିଳୁ ନ ଥିବା ବେଳେ ତାହା କେବଳ ଛବି ବହିରେ ପୁରୁଣା ସ୍ମୃତିକୁ ତାଜା କରୁଛି।

ବିନୋଦ ବିହାରୀ ସେଠି କୁହନ୍ତି ଆଜିକୁ ଅନେକ ବର୍ଷ ପୂର୍ବେ କାମାକ୍ଷାନଗର ସହର ଓ ଆଖପାଖରେ ପ୍ରବଳ ବାଇଚଢେଇ ବସା ଦେଖିବାକୁ ମିଳୁଥିଲା। ମାତ୍ର ବର୍ତ୍ତମାନ ତାହା ପ୍ରାୟତଃ ବିଲୁପ୍ତ। ବାଇଚଢେଇକୁ ନେଇ ଓଡ଼ିଆ ଲୋକଙ୍କ ଭାବାବେଗ ଏବେ ବି ବଞ୍ଚିରହିଥିବା ବେଳେ ଜଙ୍ଗଲ ବିଭାଗ ଓ ସରକାରଙ୍କ ତରଫରୁ ବାଇଚଢେଇ ବଂଶର କିପରି ସୁରକ୍ଷା କରାଯାଇପାରିବ ସେଥିପାଇଁ ପଦକ୍ଷେପ ଗ୍ରହଣ କରାଯିବା ନିତ୍ୟାନ୍ତ ଆବଶ୍ୟକ।

କାମାକ୍ଷାନଗର(ରିତେଶ ବ୍ରହ୍ମା): ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ସାରା ରାଜ୍ୟରେ ଜଳକଷ୍ଟ ଦେଖିବାକୁ ମିଳୁଥିବା ବେଳେ ଢେଙ୍କାନାଳ ଜିଲ୍ଳାର କାମାକ୍ଷାନଗର ସୋଗର ଗ୍ରାମର ୮ ଫୁଟିଆ ଝରଣ କୂଅ ଗାଁ ଲୋକଙ୍କ ପାଇଁ ପାଲଟିଛି ବରଦାନ। ଏହି କୂଅରୁ ଯେତେ ପାଣି ନେଲେ ସରେନହିଁ। ଏହି ଅଲୌକିକ କୂଅର ବିରାଟ ଇତିହାସ ବିଷୟରେ ଜାଣିବା ଅସମ୍ଭବ। ଆଜି ପର୍ଯ୍ୟନ୍ତ ଏହି କୂଅ ଭିତରେ ପଥର ଖଣ୍ଡ, ବଡ଼ବଡ଼ କାଠ ଗଣ୍ଡି ସହ ଅନେକ ଜିନିଷ ରହିଛି। ପ୍ରତ୍ନତାତ୍ୱିକ ସଂସ୍ଥା ଦ୍ୱାରା ଏହାର ସର୍ବେକ୍ଷଣ କରାଯିବା ସହ ଏହାର ଇତିହାସ ବିଷୟରେ ତର୍ଜମା କରାଗଲେ ଅନେକ କଥା ସାମ୍ନାକୁ ଆସି ପାରିବ।

ଢ଼େଙ୍କାନାଳ ଜିଲ୍ଳାର କାମାକ୍ଷାନଗର-ଢେଙ୍କାନାଳ ରାସ୍ତାରେ ଶାଳୁଆ ଛକ। ସେହି ଛକରୁ ବାମ ପାର୍ଶ୍ୱରେ ଚାରି କିଲୋମିଟର ଗଲେ ପଡ଼ିଥାଏ ସୋଗର ଗ୍ରାମ। ପ୍ରାୟ ୭ହଜାରରୁ ଊର୍ଦ୍ଧ୍ବ ଗ୍ରାମବାସୀଙ୍କୁ ନେଇ ଗଠିତ ହୋଇଥିବା ଏହି ଗାଁରେ ଏବେ ଚର୍ଚ୍ଚାର କାରଣ ପାଲଟିଛି ଏକ ୮ଫୁଟର ଝରଣ କୂଅ। ଏହି କୂଅର ଝର ଏତେ ପ୍ରଖର ଯେ ଆଜିକୁ ୧୫୦ ବର୍ଷ ଧରି କୂଅ ଶୁଖିବା ତ ଦୂରର କଥା ମାତ୍ର ଚାରି ହାତରେ ରହୁଛି ପାଣି। ପ୍ରଚଣ୍ଡ ଗ୍ରୀଷ୍ମ ପ୍ରବାହରେ ସାରା ରାଜ୍ୟରେ ଜଳକଷ୍ଟ ଦେଖିବାକୁ ମିଳୁଥିବା ବେଳେ ଏହି ୮ ଫୁଟିଆ ଝରଣ କୂଅ ସୋଗର ଗାଁ ପାଇଁ ପାଲଟିଛି ବରଦାନ। ପାହାଡ ତଳେ ପଥୁରିଆ ଜାଗାରେ ଥିବା ଏହି ଛୋଟିଆ କୂଅଟି ଲୋକଙ୍କ ଜଳକଷ୍ଟ ଦୂର କରିବା ସହ ତାହାର ଇତିହାସକୁ ନେଇ ଆମ ରାଜ୍ୟର ସମୃଦ୍ଧ ମହିମାଧର୍ମକୁ କରିଛି ଉଜ୍ଜୀବିତ। ଏହି ୮ ଫୁଟିଆ ଝରଣ କୂଅ ନିର୍ମାଣ ପଛରେ ରହିଛି ଅନେକ ଲୋକକଥା ଯାହା ସେତେବେଳର ମହିମାଧର୍ମକୁ ନେଇ ଜଡିତ।

ଆଜିକୁ ୧୫୦ ବର୍ଷ ପୂର୍ବେ ମହିମା ଧର୍ମର ପ୍ରଚାର, ପ୍ରସାର ପାଇଁ ସ୍ୱାମୀ ଗୋସାଇଁ ଗାଁକୁ ଗାଁ ବୁଲି ଲୋକଙ୍କୁ ମହିମା ଧର୍ମ ବିଷୟରେ ଅବଗତ କରାଉଥିଲେ। ସେତେବେଳେ କାମାକ୍ଷାନଗର ଅଞ୍ଚଳ ମହିମାଧର୍ମ ପ୍ରଚାରର ଉତ୍କୃଷ୍ଟ ସ୍ଥାନ ଥିବା ଇତିହାସରୁ ଜଣାଯାଏ। କାମାକ୍ଷାନଗର, ଜକା, ସୋଗର ମହିମା ଟୁଙ୍ଗି, ଯୋରନ୍ଦା ଇତ୍ୟାଦି ସ୍ଥାନରେ ସେତେବେଳେ ମହିମା ଗୋସାଇଁ ଟୁଙ୍ଗି ସ୍ଥାପନା କରି ଧର୍ମ ପ୍ରଚାର କରୁଥିଲେ। ସେତେବେଳେ ସୋଗର ଗାଁକୁ ସ୍ୱାମୀ ଗୋସାଇଁ ମହିମା ଧର୍ମ ପ୍ରଚାର କରିବାକୁ ଯାଇଥିଲା ବେଳେ ଗ୍ରାମରେ ଭୀଷଣ ଜଳକଷ୍ଟ ଥିବା ଗ୍ରାମବାସୀଙ୍କ ଠାରୁ ଜାଣିବାକୁ ପାଇଥିଲେ। ଏହାର ସମାଧାନ ନିମନ୍ତେ ସ୍ୱାମୀ ଗୋସାଇଁ ନିଜ ଦୈବୀଶକ୍ତି ବଳରେ ଗାଁର ଶେଷମୁଣ୍ଡରେ ଏକ ପାହାଡ଼ ତଳେ ନିଜର ବେତ ବାଡ଼ି ସାହାଯ୍ୟରେ ଜାଗା ଚିହ୍ନଟ କରିଥିଲେ ଓ ଏହି ସ୍ଥାନରେ କୂଅ ଖୋଳାଇବା ପାଇଁ ଗ୍ରାମବାସୀଙ୍କୁ କହିଲେ। ମାତ୍ର ୮ଫୁଟ ଖୋଳାଇବା ପରେ ଏଠାରୁ ଏକ ବିରାଟ ପଥର ବାହାରିବା ନେଇ କହିଥିଲେ। ସେହି ପଥରକୁ ଖୋଲିବା ପରେ ସେହି ସ୍ଥାନରୁ ଏକ ଏମିତି ଝର ସୃଷ୍ଟି ହେବ ଯାହା କେବେ ଶୁଖିବନାହିଁ ଓ ସମସ୍ତ ଗ୍ରାମବାସୀଙ୍କ ଜଳକଷ୍ଟ ଦୂର କରିବା ନେଇ ଜଣାଇଥିଲେ। ପରେ ସ୍ୱାମୀ ଗୋସାଇଁଙ୍କ ନିର୍ଦ୍ଦେଶରେ ଗ୍ରାମବାସୀ ସେଠାରେ କୂଅ ଖୋଳି ଥିଲେ। ଆଜି ପର୍ଯ୍ୟନ୍ତ ଯେତେ ହାଇପାୱାର ମୋଟର ଲଗାଇ କୂଅର ପାଣିକୁ ନିଷ୍କାସନ କରି ଶୁଖାଇଲେ ସୁଦ୍ଧା ମାତ୍ର କେଇ ମିନିଟ ମଧ୍ୟରେ ପୁଣି କୂଅରେ ପାଣି ଦେଖାଯାଏ। ଆଜିର ଡିଜିଟାଲ ଯୁଗରେ ଏହି ୮ ଫୁଟର କୂଅ ଓ ଏହାର ଇତିହାସ ଏବେ ବି ଅନେକ ଅସମାହିତ ପ୍ରଶ୍ନ ସୃଷ୍ଟି କରୁଛି।

କାମାକ୍ଷାନଗର: ଘର ମାଲିକଙ୍କୁ ପିଟିପିଟି ହତ୍ୟା । ଘର ଛାଡ଼ିବାକୁ କହିବାରୁ ଘର ମାଲିକଙ୍କୁ ପିଟି ପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି । କାମାକ୍ଷାନଗର ଥାନା ବାଉଁଶପାଳ ଗାଁ ନୂଆ ଶଅରସାହିରେ ଘଟିଛି ଏହି ହତ୍ୟାକାଣ୍ଡ । ମୃତକ ବାଉଁଶପାଳ ସହରସାହିର ରୋହିତ ପ୍ରଧାନ । ଘର ଛାଡିବା ପାଇଁ କହିବାରୁ ରୋହିତଙ୍କୁ ଅଭିଯୁକ୍ତ ନିର ଭୂତିଆ ପିଟି ପିଟି ହତ୍ୟା କରିଥିବା ଜଣାପଡିଛି । ହତ୍ୟାକାଣ୍ଡ ପରେ ଅଭିଯୁକ୍ତ ଫେରାର ହୋଇଯାଇଥିଲା । ଖବରପାଇ କାମାକ୍ଷାନଗର ପୋଲିସ ଅଭିଯୁକ୍ତ ନିରଭୂତିଆକୁ ନିକଟସ୍ଥ ଘଞ୍ଚଜଙ୍ଗଲରୁ ମାଡିବସିଥିବା ସୂଚନା ମିଳିଛି ।

ଟ୍ୱେଭିବେ ଅଭିଯୁକ୍ତ ବିରୋଧରେ ସାଙ୍ଘାତିକ ଅଭିଯୋଗ ଆଣିଛନ୍ତି ନିଜ ସ୍ତ୍ରୀ । ଚରିତ୍ରକୁ ସନ୍ଦେହ କରି ବାରମ୍ବାର ମାଡ଼ ମାରିଥିବା ଅଭିଯୋଗ । ସ୍ୱାମୀକୁ ଗିରଫ କରି ଦଣ୍ଡ ଦେବାକୁ ସ୍ତ୍ରୀର ନିବେଦନ । ଘଟଣାସ୍ଥଳରେ କାମାକ୍ଷାନଗର ପୋଲିସ ପହଞ୍ଚି ତନାଘନା ଜାରି ରଖିଛି ।

କାମାକ୍ଷାନଗର: କୂଅରେ ସଫା କରୁଥିବା ବେଳେ ଅଘଟଣ । ଚାଲିଗଲା ଦୁଇ ଜଣଙ୍କ ଜୀବନ । ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ସରକୀଶରୀପାଳ ଗାଁରେ ଘଟିଛି ଏହି ଅଘଟଣ । ୩୫ଫୁଟ ଗଭୀର କୂଅ ସଫା କରୁଥିବା ବେଳେ ୨ ଜଣଙ୍କର ମୃତ୍ୟୁ ହୋଇଛି । ମୃତକ ଦୁଇ ଜଣ ହେଉଛନ୍ତି ସେହି ଗ୍ରାମର ଶଶିଭୂଷଣ ସାହୁ ଓ ଭଜମନ ସାହୁ ।

ସୂଚନା ମୁତାବକ, ଶଶିଭୂଷଣଙ୍କ କୂଅ ଉଭୟ ମିଶି ସଫା କରୁଥିବାବେଳେ, ଅସାବଧାନତା କାରଣରୁ ଶ୍ବାସରୁଦ୍ଧ ହୋଇ ମୃତ୍ୟୁ ହୋଇଥିବା ଅନୁମାନ କରାଯାଉଛି । ସେପଟେ ଘଟଣା ସ୍ଥଳରେ ଦମକଳବାହିନୀ ପହଂଚି ମୃତଦେହ ଉଦ୍ଧାର କରିଛି । ଶବ ବ୍ୟବଛେଦ ପାଇଁ ପରଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଛି ପୋଲିସ । ଦୁଇ ଜଣଙ୍କ ମୃତ୍ୟୁକୁ ନେଇ ଗାଁରେ ଶୋକାକୋଳ ପରିବେଶ ସୃଷ୍ଟି ହୋଇଛି ।

କାମାକ୍ଷାନଗର: ଢେଙ୍କାନାଳ ଜିଲା କାମାକ୍ଷାନଗର ଥାନା ନୁଆଁପାଣି ଗାଁରେ ଏକ ଫାର୍ମର କାନ୍ଥ ପଡି ଜଣେ ମୃତ୍ୟୁବରଣ କରିଛନ୍ତି । ଗାଁର ଅଚ୍ୟୁତ ଦିଆଣି ଗତକାଲି ଅପରାହ୍ନରେ ଗାଁ ପାଖ ଜଙ୍ଗଲକୁ ଟୋଲ ଗୋଟାଇବାକୁ ଯାଇଥିଲେ, ମାତ୍ର ଆଉ ଘରକୁ ଫେରିନଥିଲେ । ଘର ଲୋକେ ବହୁତ ଖୋଜାଖୋଜି କରିବା ପରେ ପାଇନଥିଲେ । ଆଜି ଗାଁ ପାଖରେ ଥିବା ଏକ ଫାର୍ମର କାନ୍ଥ ତାଙ୍କ ଉପରେ ମାଡିବସୀ ଥିବାର ଦେଖିଥିଲେ । ଗତକାଲି ଅପରାହନ୍ନରେ ବର୍ଷା ପବନ ହୋଇଥିଲା ଯାହାଫଳରେ ସେ ଆଶ୍ରୟ ନେବାକୁ ଯାଇଥିବା ବେଳେ ଫାର୍ମର କାନ୍ଥ ପଡ଼ି ତାଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ଘଟଣାସ୍ଥଳରେ କାମାକ୍ଷାନଗର ପୋଲିସ ପହଂଚି ମୃତ ଦେହକୁ ଜବତ କରିବା ସହ ତଦନ୍ତ ଜାରି ରଖିଛି ।

କାମାକ୍ଷାନଗର: ଭାରସାମ୍ୟ ହରାଇ ଓଲଟିଲା ଟାଟା ଏସି ମିନି ଟ୍ରକ । ୨୫ରୁ ଉର୍ଦ୍ଧ୍ୱ କୀର୍ତ୍ତନ ମଣ୍ଡଳୀ ସଦସ୍ୟ ଗୁରୁତର । ସମସ୍ତ ଆହତଙ୍କୁ କାମାକ୍ଷାନଗର ମେଡିକାଲରେ ଭର୍ତ୍ତି କରାଯାଇଛି । ସୂଚନା ଅନୁସାରେ କାମାକ୍ଷାନଗର ଥାନା ଆଳତୁମା ଗ୍ରାମର ଏକ କୀର୍ତ୍ତନମଣ୍ଡଳୀ ଦଳ ଅଷ୍ଟପ୍ରହରୀ ନାମଯଂଜ୍ଞ ରେ ଭାଗନେବା ପାଇଁ କୋଟଗରା ଯାଇଥିଲେ । ସେଠାରୁ ଅଷ୍ଟପ୍ରହରୀ ସରିଲା ପରେ ଆଜି ଭୋରୁ କାମାକ୍ଷାନଗର ଫେରୁଥିବା ବେଳେ କାମାକ୍ଷାନଗର ଥାନା ରେକୁଳା ବ୍ରିଜ ନିକଟରେ ଟାଟା ଏସି ମିନି ଟ୍ରକ ଟି ଭାରସାମ୍ୟ ହରାଇ ଓଲଟି ପଡିଥିଲା । ଯାହା ଫଳରେ ସେଥିରେ ଥିବା ପ୍ରାୟ କୋଡିଏ ରୁ ତିରିଶ ଜଣ କୀର୍ତ୍ତନ ମଣ୍ଡଳୀର ସଦସ୍ୟ ଗୁରୁତର ହୋଇଛନ୍ତି । ଆମ୍ବୁଲାନ୍ସ ଓ ସ୍ଥାନୀୟ ଲୋକଙ୍କ ସହାୟତାରେ ସମସ୍ତ ଗୁରୁତରଙ୍କୁ କାମାକ୍ଷାନଗର ମେଡିକାଲରେ ଭର୍ତି କରାଯାଇ ପ୍ରାଥମିକ ଚିକିତ୍ସା କରାଯାଉଛି l ଅଧିକ ଆଘାତ ହୋଇଥିବା ରୋଗୀମାନଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି । ସମସ୍ତ ଗୁରୁତର ଆହତଙ୍କ ଘର କାମାକ୍ଷାନଗର ଥାନା ଆଲତୁମା ଗ୍ରାମରେ ହୋଇଥିବା ଜଣା ପଡିଛି ।