ଭୁବନେଶ୍ବର : ପିପିଲିରେ ଅମାନତ ହରାଇଛି କଂଗ୍ରେସ। ୨୦୧୪ ସାଧାରଣ ନିର୍ବାଚନରେ ପିପିଲିରେ ୪୯ ହଜାରରୁ ଅଧିକ ଭୋଟ୍ ପାଇଥିବା କଂଗ୍ରେସ ୨୦୧୯ରେ ପାଇଥିଲା ମାତ୍ର ୯ ହଜାର ୮୩୦ ଭୋଟ୍ । ଆଉ ଏବେ ୨୦୨୧ ଉପନିର୍ବାଚନରେ ଦଳର ସ୍ଥିତି ଆହୁରି ଖରାପ ହୋଇଛି। ପିପିଲି ଉପନିର୍ବାଚନରେ ଦଳର ଭୋଟ୍‌ ସଂଖ୍ୟା ୫ ହଜାର ମଧ୍ୟ ଛୁଇଁ ପାରିନି।  କେନ୍ଦ୍ର ଓ ରାଜ୍ୟ କଂଗ୍ରେସରେ ଲାଗି ରହିଥିବା ନେତୃତ୍ୱ ଅର୍ନ୍ତଦ୍ୱନ୍ଦ୍ୱ ଯୋଗୁଁ ଦଳ ନିର୍ବାଚନରେ ଅମାନତ ହରାଉଛି ।

ପିପିଲି ଉପନିର୍ବାଚନରେ ଦେଶର ସର୍ବ ପୂରାତନ ରାଜନୈତକ ଦଳ କଂଗ୍ରେସର ପ୍ରାର୍ଥୀ ବିଶ୍ୱକେଶନ ହରିଚନ୍ଦନ ବହୁ ପଛରେ ପଡିଛନ୍ତି। ପିପିଲି ଉପ-ନିର୍ବାଚନରେ ବିଜେଡି-ବିଜେପି ଭିତରେ କଡା ଟକ୍କର ଦେଖିବାକୁ ମିଳିଥିବା ବେଳେ ଲୋକମାନେ କଂଗ୍ରେସ ପ୍ରାର୍ଥୀଙ୍କ ପ୍ରତି ସେତେଟା ସମର୍ଥନ ଦେଇନାହାନ୍ତି । ଭୋଟ୍‌ ଗଣତିର ପ୍ରଥମ ରାଉଣ୍ଡରୁ ବିଶ୍ୱକେଶନ ହରିଚନ୍ଦନଙ୍କ ଭୋଟ୍‌ ବ୍ୟବଧ୍ୟାନ ବିଜେଡି ଓ ବିଜେପି ପ୍ରାର୍ଥୀଙ୍କ ଅପେକ୍ଷା ବହୁ କମ୍‌ ରହିଥିଲା। ତେବେ ଭୋଟ୍‌ ଗଣତି ଶେଷ ସୁଦ୍ଧା କଂଗ୍ରେସର ପ୍ରାର୍ଥୀ ବିଶ୍ୱକେଶନ ହରିଚନ୍ଦନ ମାତ୍ର ୪,୨୨୮ ଖଣ୍ଡ ଭୋଟ୍‌ ପାଇଛନ୍ତି। ଯେତେବେଳ ବିଜେଡି ପ୍ରାର୍ଥୀ ରୁଦ୍ରପ୍ରତାପ ମହାରଥୀ ୯୬,୧୯୬ ଭୋଟ୍‌ ଓ ଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ୭୫,୫୮୯ ଭୋଟ୍‌ ପାଇଛନ୍ତି।

ଯଦିଓ ୨୦୧୪ ନିର୍ବାଚନ ପରଠାରୁ କଂଗ୍ରେସ ପିପିଲିରେ ତୃତୀୟ ସ୍ଥାନରେ ରହୁଛି ତଥାପି ଭୋଟ୍ ହାର, କ୍ରମାଗତ ଭାବେ ଖସୁଛି । ୨୦୧୪ ନିର୍ବାଚନରେ ଦ୍ୱିତୀୟ ସ୍ଥାନରେ ଥିବା କଂଗ୍ରେସ ୨୦୧୯ରେ ତୃତୀୟ ସ୍ଥାନକୁ ଖସି ଆସିଥିଲା । ୨୦୧୪ରେ କଂଗ୍ରେସ ପ୍ରାର୍ଥୀ ଯୁଧିଷ୍ଠିର ସାମନ୍ତରାୟ ୪୯ ହଜାର ୭୬ ଭୋଟ୍ ପାଇଥିବା ବେଳେ ତୃତୀୟ ସ୍ଥାନରେ ରହିଥିବା ବିଜେପିର ପ୍ରଫୁଲ୍ଲ ପ୍ରସାଦ ଗଜେନ୍ଦ୍ରଙ୍କୁ ମିଳିଥିଲା ୭ ହଜାର ୬୫୬ ଭୋଟ୍ ।

ତେବେ ଏହି ଭୋଟ୍ ହାର୍ ୨୦୧୯ରେ ବଜାୟ ରଖି ପାରିନଥିଲା ଦଳ । ନିର୍ବାଚନ ନ ଲଢ଼ିବା ନେଇ ଯୁଧିଷ୍ଠିର ସାମନ୍ତରାୟଙ୍କ ଘୋଷଣା ପରେ କଂଗ୍ରେସ ପୂରା କମଜୋର୍ ହୋଇଯାଇଛି । ୨୦୧୯ରେ କଂଗ୍ରେସକୁ ଦ୍ୱିତୀୟ ସ୍ଥାନରୁ ହଟାଇ ସ୍ଥାନ ଅକ୍ତିଆର କରିଥିଲା ବିଜେପି । କଂଗ୍ରେସକୁ ମାତ୍ର ୯୮୩୦ ଭୋଟ୍ ମିଳିଥିବା ବେଳେ ବିଜେପି ପାଇଥିଲା ୭୨ ହଜାର ୭୩୧ ଭୋଟ୍ । ଏବେ ଉପନିର୍ବାଚନରେ ମଧ୍ୟ ଜାରି କଂଗ୍ରେସର ସମାନ ଧାରା । ଉପନିର୍ବାଚନ ଫଳ ଗଣତି ଶେଷ ହେବା ପରେ କଂଗ୍ରେସ ମାତ୍ର ୪,୨୨୮ ଖଣ୍ଡ ଭୋଟ୍‌ ପାଇ ପଛରେ ପଡିଯାଇଛି।

ଭୁବନେଶ୍ୱର: ପିପିଲି ଉପନିର୍ବାଚନ ପାଇଁ ଭୋଟ୍ ଗଣତି ଚାଲିଛି। ପ୍ରଥମେ ପୋଷ୍ଟାଲ ବାଲାଟ ପରେ ଇଭିଏମ ଗଣତି ଆରମ୍ଭ ହୋଇଛି । ପୋଷ୍ଟାଲ ଗଣତିରେ ବିଜେଡି ପ୍ରାର୍ଥୀ ରୁଦ୍ର ପ୍ରତାପ ମହାରଥୀ ଆଗରେ ଥିବା ସୂଚନା ମିଳିଥିଲା । ସେହିପରି ପ୍ରଥମ ରାଉଣ୍ଡରେ ମଧ୍ୟ ରୁଦ୍ର ମହାରଥୀ ଆଗୁଆ ରହିଛନ୍ତି । ପ୍ରଥମ ରାଉଣ୍ଡରେ ବିଜେଡି ପ୍ରାର୍ଥୀ ରୁଦ୍ର ୧୪୦୬ ଭୋଟରେ ଆଗୁଆ ରହିଛନ୍ତି । ତାଙ୍କୁ ୪୦୫୫ ଭୋଟ୍ ମିଳିଥିବା ବେଳେ ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କୁ ୨୬୪୯ ଭୋଟ୍ ଓ କଂଗ୍ରେସ ପ୍ରାର୍ଥୀ ବିଶ୍ୱକେଶନ ହରିଚନ୍ଦନଙ୍କୁ ୭୬୫ ଭୋଟ୍ ମିଳିଛି ।

ଭୁବନେଶ୍ୱର: ବହୁ ପ୍ରତୀକ୍ଷିତ ପିପିଲି ଉପନିର୍ବାଚନ ଫଳାଫଳ ଆଜି ପ୍ରକାଶ ପାଇବ। ସାଧାରଣତଃ ଉପନିର୍ବାଚନର ଫଳାଫଳ ଆଗକୁ ଆସୁଥିବା କୌଣସି ବୃହତ ନିର୍ବାଚନକୁ ଏତେଟା ପ୍ରଭାବିତ କରୁ ନ ଥିଲେ ମଧ୍ୟ ଭବିଷ୍ୟତ ଲାଗି ମିଳିଥାଏ ରାଜନୈତିକ ସଙ୍କେତ। ରାଜ୍ୟରେ ଅତୀତରେ ଅନୁଷ୍ଠିତ ସମସ୍ତ ଉପନିର୍ବାଚନରେ ବିଜେଡି ଅପରାଜେୟ ରହି ଆସିଛି; ପିପିଲିରେ ମଧ୍ୟ ତାହା ଅବ୍ୟାହତ ରହିବ ବୋଲି ଆଶା ବାନ୍ଧିଛି ଦଳ । ରାଜଧାନୀ ଭୁବନେଶ୍ବର ନିକଟସ୍ଥ ନିର୍ବାଚନମଣ୍ଡଳୀ ହୋଇଥିବାରୁ ପିପିଲିର ସ୍ଵତନ୍ତ୍ର ଗୁରୁତ୍ୱ ରହିଛି। ଆଗକୁ ପଞ୍ଚାୟତ ଏବଂ ପୌର ନିର୍ବାଚନ ହେବାର ରହିଛି । ତେଣୁ ପିପିଲି ଫଳାଫଳ ଏକାଧିକ ରାଜନୈତିକ ସଙ୍କେତ ଦେବ ବୋଲି ରାଜନୈତିକ ସମୀକ୍ଷକମାନେ ମତ ରଖିଛନ୍ତି ।

ଗତ ୨୦୧୯ ରେ ଏକ ଭିନ୍ନ ରାଜନୈତିକ ପରିସ୍ଥିତିରେ ସ୍ଵର୍ଗତ ପ୍ରଦୀପ ମହାରଥୀ ନିଜ ନିକଟତମ ପ୍ରତିଦ୍ଵନ୍ଦୀ ବିଜେପିର ଆଶ୍ରିତ ପଟ୍ଟନାୟକଙ୍କୁ ୧୫, ୭୮୭ ଖଣ୍ଡ ଭୋଟରେ ପରାସ୍ତ କରିଥିଲେ। ତେବେ ବିଜେପି ଏହି ସମୟରେ କଂଗ୍ରେସକୁ ଅତିକ୍ରମ କରି ଦ୍ଵିତୀୟ ସ୍ଥାନରେ ପହଞ୍ଚି ଯାଇଥିଲା । ତେଣୁ ୨ ବର୍ଷ ତଳେ ଆଶ୍ରିତ ପାଇଥିବା ପ୍ରାୟ ୭୨,୦୦୦ ଭୋଟ ରଖିପାରୁଛନ୍ତି କି ନାହିଁ ତାହା ଉପରେ ସମସ୍ତଙ୍କ ନଜର ରହିବ। ଜାତୀୟସ୍ତରରେ ବିଜେପିର ଲୋକପ୍ରିୟତା ପୂର୍ବାପେକ୍ଷା କମୁଥିବା ବେଳେ ଯଦି ଆଶ୍ରିତ ନିଜ ପୁରୁଣା ଭୋଟ ବ୍ୟାଙ୍କକୁ ବଜାୟ ରଖନ୍ତି କିମ୍ବା ତାହାକୁ ବୃଦ୍ଧି କରିବାରେ ସକ୍ଷମ ହୁଅନ୍ତି ତେବେ ଏହା ବିଜେଡି ପାଇଁ ଆଗାମୀ ଦିନରେ ଆତ୍ମଚିନ୍ତନର ବିଷୟ ହେବ ବୋଲି ରାଜନୈତିକ ମହଲରେ ଆଲୋଚନା ହେଉଛି । ଅପରପକ୍ଷରେ ଯଦି ବିଜେଡି ବିଜୟଲାଭ କରିବା ସହ ବ୍ୟବଧାନ ବୃଦ୍ଧି କରିବାରେ ସକ୍ଷମ ହୁଏ ତେବେ ତାହା କର୍ମୀଙ୍କୁ ଆଗାମୀ ଦିନରେ ପୌର ଓ ପଞ୍ଚାୟତ ନିର୍ବାଚନ ପୂର୍ବରୁ ଉତ୍ସାହିତ କରିବ।

ବିଜେଡିର ଶୀର୍ଷ ନେତା ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ବିରୋଧୀଙ୍କ ସବୁ ରଣନୀତିକୁ ନିଷ୍କ୍ରିୟ କରି ଦେଇଛି। ଆଗାମୀ ଦିନରେ ପଞ୍ଚାୟତ ନିର୍ବାଚନ ହେବାକୁ ଯାଉଛି। ଜିଲ୍ଲାପରିଷଦ ପ୍ରାର୍ଥୀମାନେ ଦଳୀୟ ଚିହ୍ନ ସହ ଲଢିବେ। ତେଣୁ ପିପିଲିରୁ ଶିକ୍ଷା ଗ୍ରହଣ କରି ବିଭିନ୍ନ ଅଞ୍ଚଳରେ ଥିବା ସ୍ଥାନୀୟ ସମସ୍ୟା ଓ ନେତାଙ୍କ ମଧ୍ୟରେ ଥିବା ମତଭେଦ ଦୂର କରିବା ବିଜେଡିର ପ୍ରାଥମିକତା ଦେବା ଦରକାର ବୋଲି ଅନେକେ ଅନୁଭବ କରିଛନ୍ତି। ଅନ୍ୟପକ୍ଷରେ ବିଜେପି ପୂର୍ବ ଭୋଟ ବଜାୟ ନ ରଖିପାରିଲେ, ତାହା କର୍ମୀଙ୍କୁ ହତୋତ୍ସାହିତ କରିବ।

ଏହାର ପ୍ରଭାବ ଆଗାମୀ ପୌର ଓ ପଞ୍ଚାୟତ ଭୋଟ୍‌ରେ ପଡ଼ିବ ବୋଲି କୁହାଯାଇଛି। ବିଜେଡି ପକ୍ଷରୁ ନବୀନ ପଟ୍ଟନାୟକ ପ୍ରତ୍ୟକ୍ଷ ନିର୍ବାଚନୀ ପ୍ରଚାର, ବିରାଟ ସମାବେଶ ଏବଂ ଶୋଭାଯାତ୍ରାରୁ ନିଜକୁ ଦୂରେଇ ରଖିଥିଲେ। ହେଲେ ବିଜେପି ପକ୍ଷରୁ ଏକାଧିକ କେନ୍ଦ୍ରମନ୍ତ୍ରୀ, ରାଜ୍ୟର ବହୁ ବରିଷ୍ଠ ନେତ୍ରୀ ଓ ନେତା ପିପିଲି ଡେଲାଙ୍ଗ ମୁହାଁ ହୋଇଥିଲେ । ବ୍ୟାପକ ପ୍ରଚାର ସତ୍ତ୍ବେ ବିଜେପିର ପୂର୍ବ ଫଳ ନ ପାଇଲେ ଦଳକୁ ଗଭୀର ଆତ୍ମଚିନ୍ତନ କରିବାକୁ ପଡ଼ିବ। ଅପରପକ୍ଷରେ ବିଜେପି ଓଡ଼ିଶା ସମେତ ସାରା ଭାରତରେ ନିଜକୁ ଏକ ସହରାଞ୍ଚଳ ଭୋଟରଙ୍କ ପ୍ରଥମ ପସନ୍ଦ ବୋଲି ଦାବି କରିଥାଏ। ଗତ ୨୦୧୯ରେ ପିପିଲି ପୌରାଞ୍ଚଳରେ ବିଜେଡି ୯୮୪ ଖଣ୍ଡ ଭୋଟରେ ବିଜେପିକୁ ପଛରେ ପକାଇଥିଲା। ଯଦି ଏହି ବ୍ୟବଧାନ ବିଜେପି ବଳବତ୍ତର ରଖୁଛି, ତେବେ ତାହା ପୌର ନିର୍ବାଚନ ପୂର୍ବରୁ ଦଳର ମନୋବଳକୁ ଉତ୍ସାହିତ କରିବ ।

କିଛିବର୍ଷ ହେବ ଦେଶର ବିଭିନ୍ନ ରାଜ୍ୟରେ ମହିଳା ଭୋଟର ମାନେ ଗୁରୁତ୍ଵପୂର୍ଣ୍ଣ ଭୂମିକା ନେଇ ଆସୁଛନ୍ତି। ୨ ଦଶନ୍ଧି ତଳେ ଆରମ୍ଭ କରାଯାଇଥିବା ମିଶନ ଶକ୍ତି ଆଜି ଏକ ଆନ୍ଦୋଳନରେ ପରିଣତ ହୋଇସାରିଛି । ଏହାର ପ୍ରଭାବ ୨୦୦୯, ୨୦୧୪ ଏବଂ ୨୦୧୯ରେ ରାଜ୍ୟରେ ଦେଖିବାକୁ ମିଳିଛି । ଚଳିତ ଥର ୮୪,୫୯୭ ଜଣ ମହିଳା ଭୋଟଦାନ କରିଛନ୍ତି । ଯାହା ମୋଟ ଭୋଟଦାନର ୪୭ ପ୍ରତିଶତ। ସେହି ନିର୍ବାଚନମଣ୍ଡଳୀରେ ପ୍ରାୟ ୬୦ ହଜାରରୁ ଊର୍ଦ୍ଧ୍ଵ ମହିଳା ସିଧାସଳଖ ବିଭିନ୍ନ ସ୍ଵୟଂ ସହାୟକ ଗୋଷ୍ଠୀ ସହ ଜଡିତ । ଯଦି ଏହି ଭୋଟର ସିଂହଭାଗ ବିଜେଡି ପ୍ରାର୍ଥୀ ରୁଦ୍ର ମହାରଥୀଙ୍କୁ ମିଳେ, ତେବେ ଏହା ପ୍ରକାରାନ୍ତରେ ମିଶନ୍ ଶକ୍ତିର ସଫଳତା କହିଲେ ଅତ୍ୟୁକ୍ତି ହେବ ନାହିଁ ବୋଲି ସମୀକ୍ଷକମାନେ ମତ ରଖୁଛନ୍ତି। ପୁରୀଜିଲ୍ଲାରେ ବିଜେପି ୨ଟି ହାଇପ୍ରୋଫାଇଲ୍ ବିଧାନସଭା ଆସନ (ପୁରୀ ଏବଂ ବ୍ରହ୍ମଗିରି) ହାତେଇପାରିଛି । ଯଦି ବିଜେଡି ବୃହତ ବ୍ୟବଧାନରେ ଜିତୁଛି ତେବେ ଏହା ପଡୋଶୀ ନିର୍ବାଚନମଣ୍ଡଳୀଗୁଡିକରେ ମଧ୍ୟ ପ୍ରଭାବ ପକାଇବ ।

ସେହିପରି କଂଗ୍ରେସ ଗତଥର ୧୦ ହଜାର ଭୋଟ ପାଇଥିଲା । ଯଦି ତିର୍ତ୍ତୋଲ ପରି କଂଗ୍ରେସ ପୂର୍ବ ଭୋଟ ବୃଦ୍ଧି କରୁଛି । ତେବେ ଏହା ଦଳର ମନୋବଳ ବୃଦ୍ଧି କରିବ। ଯଦି ବାଲେଶ୍ବର ସଦର ପରି ଭୋଟ ସଂଖ୍ୟା କମ୍ ରହିବ ତେବେ ଏହା ଦଳକୁ ଆହୁରି ରସାତଳଗାମୀ କରିବ ଓ ଦଳରେ ନେତୃତ୍ଵ ପରିବର୍ତ୍ତନ ଦାବିକୁ ଆହୁରି ଦୃଢ କରିବ ବୋଲି ଆଲୋଚନା ହେଉଛି।