ଭୁବନେଶ୍ୱର: ଜଟିଳ ଜୀବନଶୈଳୀ ମଧ୍ୟରେ ବଦଳୁଛି ସାଧାରଣ ମଣିଷର ମିଜାଜ୍‍। ବ୍ୟସ୍ତବହୁଳ ଜୀବନ ମଧ୍ୟରୁ କିଛି ସମୟ ପ୍ରକୃତି କୋଳରେ ବିତାଇବା ଲାଗି ଅନେକ ଆଗ୍ରହ ପ୍ରକାଶ କରୁଛନ୍ତି। ଜଙ୍ଗଲ, ଝରଣା, ନଦୀ, ସମୁଦ୍ରତଟରେ କିଛି ସମୟ ଅତିବାହିତ କରି ଆନନ୍ଦ ଖୋଜୁଛନ୍ତି, ଶାନ୍ତି ଲୋଡୁଛନ୍ତି। ଫଳରେ ରାଜ୍ୟରେ ପରିବେଶ ପର୍ଯ୍ୟଟନ (ଇକୋ-ଟୁରିଜିମ୍‍) ଅଧିକରୁ ଅଧିକ ସମୃଦ୍ଧ ହୋଇଛି। ଲୋକଙ୍କ ଆଗ୍ରହ ଓ ଚାହିଦାକୁ ଦୃଷ୍ଟିରେ ରଖି ରାଜ୍ୟ ସରକାର ପରିବେଶ ପର୍ଯ୍ୟଟନସ୍ଥଳର ବିକାଶକୁ ଅଗ୍ରାଧିକାର ଦେଇଛନ୍ତି। ଏହାଦ୍ୱାରା ପର୍ଯ୍ୟଟକଙ୍କୁ ଆକର୍ଷିତ କରିବା ସହ ରାଜ୍ୟର ପର୍ଯ୍ୟଟନ ଶିଳ୍ପକୁ ଅଧିକ ସମୃଦ୍ଧ କରିବାକୁ ଲକ୍ଷ୍ୟ ରଖିଛନ୍ତି। ରାଜ୍ୟରେ ଇକୋ-ଟୁରିଜିମ ଆରମ୍ଭ ହେବା ପରେ ଦେଶର ବିଭିନ୍ନ ରାଜ୍ୟ ସମେତ ବିଦେଶରୁ ପର୍ଯ୍ୟଟକମାନେ ଓଡ଼ିଶା ଆସୁଛନ୍ତି। ଯାହାଦ୍ୱାରା ପର୍ଯ୍ୟଟନ ମାନଚିତ୍ରରେ ଓଡ଼ିଶା ନିଜର ସ୍ଥିତିକୁ ମଜଭୂତ କରିବାରେ ସଫଳ ହେଉଛି।

କରୋନା ସମୟରେ ପର୍ଯ୍ୟଟନ ଶିଳ୍ପ ସମ୍ପୂର୍ଣ୍ଣ ବିଗିଡ଼ି ପଡ଼ିଥିବା ବେଳେ ଚଳିତବର୍ଷ କେବଳ ଇକୋ-ଟୁରିଜିମ ସ୍ଥଳିକୁ ୨୧ ହଜାରରୁ ଅଧିକ ପର୍ଯ୍ୟଟକ ଆସିଛନ୍ତି। ଏହାଦ୍ୱାରା ୩ କୋଟିରୁ ଅଧିକ ଅର୍ଥ ଆୟ ହୋଇଛି। ଗୋଟିଏ ପଟେ ରାଜ୍ୟରେ ପର୍ଯ୍ୟଟକଙ୍କୁ ଆକର୍ଷିତ କରିବା ପାଇଁ ଏହି ଯୋଜନା ସହାୟକ ହେଉଥିବା ବେଳେ ଓଡ଼ିଶାର ଲୁକ୍କାୟିତ ଅଞ୍ଚଳଗୁଡ଼ିକ ଲୋକଲୋଚନକୁ ମଧ୍ୟ ଆସିପାରୁଛି। ରାଜ୍ୟର ବହୁ ଅଞ୍ଚଳ ଦେଶ ବିଦେଶରେ ପରିଚିତି ପାଇଛି। ୨୦୧୬-୧୭ ମସିହାରୁ ଗୋଷ୍ଠୀଭିତ୍ତିକ ପରିବେଶ ପର୍ଯ୍ୟଟନକୁ ପ୍ରୋତ୍ସାହିତ କରୁଛନ୍ତି ରାଜ୍ୟ ସରକାର। ପ୍ରଥମ ପର୍ଯ୍ୟାୟରେ ମାତ୍ର ୧୪ଟି ପରିବେଶ ପର୍ଯ୍ୟଟନସ୍ଥଳର ବିକାଶ କରାଯାଇଥିବା ବେଳେ ସେହି ବର୍ଷ ୧୧ ହଜାରରୁ ଊର୍ଦ୍ଧ୍ବ ପର୍ଯ୍ୟଟକ ଏଠାକୁ ଆସିଥିଲେ। ଏହାପରେ ରାଜ୍ୟସରକାର ପର୍ଯ୍ୟଟନସ୍ଥଳୀ ସଂଖ୍ୟା ବୃଦ୍ଧି କରିବାକୁ ଯୋଜନା କରିଛନ୍ତି। ବର୍ତ୍ତମାନ ସୁଦ୍ଧା ୪୭ଟି ସ୍ଥାନରେ ପରିବେଶ ପର୍ଯ୍ୟଟନ ବ୍ୟବସ୍ଥା କରାଯାଇଛି। ୧୮ଟି ଜିଲ୍ଲାରେ ଏହି ଇକୋ ଟୁରିଜିମ୍‍ କେନ୍ଦ୍ର ସ୍ଥାପନ କରାଯାଇଛି ଏବଂ ୭୮୫ ଜଣ ପର୍ଯ୍ୟଟକଙ୍କ ରାତ୍ରି ରହଣିର ସୁବିଧା କରାଯାଇଛି।

ରାଜ୍ୟ ଜଙ୍ଗଲ ଏବଂ ପରିବେଶ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁଙ୍କ ସୂଚନା ଅନୁଯାୟୀ ବିଭିନ୍ନ ପରିବେଶ ପର୍ଯ୍ୟଟନସ୍ଥଳୀରେ ଅନୁଷ୍ଠିତ ପ୍ରାକୃତିକ କ୍ୟାମ୍ପକୁ ୨୦୨୧-୨୨ରେ ୭୦ ହଜାରରୁ ଅଧିକ ପରିବେଶ ପର୍ଯ୍ୟଟକ ଆସିଛନ୍ତି। ଏହାଦ୍ୱାରା ୧୦.୫୧ କୋଟି ଟଙ୍କା ଆୟ ହୋଇଛି। ଏଥିରେ ସିଧାସଳଖ ଭାବେ ୬୩୨ ପରିବେଶ ବିକାଶ କମିଟି (ଇଡିସି), ବନ ସୁରକ୍ଷା ସମିତି (ଭିଏସଏସ) ଏବଂ ପରିବେଶ ପର୍ଯ୍ୟଟନ ଗୋଷ୍ଠୀ (ଇଟିଜି) ଉପକୃତ ହୋଇଛନ୍ତି। ଏଭଳି ପର୍ଯ୍ୟଟନସ୍ଥଳୀ ପାଇଁ ଅନଲାଇନ୍‍ ସଂରକ୍ଷଣ ସୁବିଧା ବି ଉପଲବ୍ଧ ରହିଛି।

ନିକଟରେ ଗୁଜୁରାଟର ଏକତାନଗରଠାରେ ଅନୁଷ୍ଠିତ ରାଜ୍ୟ ପରିବେଶ ମନ୍ତ୍ରୀମାନଙ୍କର ଜାତୀୟ ସମ୍ମିଳନୀରେ ରାଜ୍ୟର ଇକୋ ଟୁରିଜିମ ସଂକ୍ରାନ୍ତ ତଥ୍ୟ ରଖାଯାଇଥିବା ବେଳେ ଏହାଦ୍ୱାରା କେମିତି ପର୍ଯ୍ୟଟକମାନେ ଓଡ଼ିଶା ମୁହାଁ ହେଉଛନ୍ତି ତାହାର ଚିତ୍ର ରଖାଯାଇଥିଲା। ଯାହାକୁ ବିଭିନ୍ନ ରାଜ୍ୟର ପ୍ରତିନିଧିମାନେ ପସନ୍ଦ କରିଛନ୍ତି। ଅନ୍ୟପଟେ ରାଜ୍ୟରେ ଇକୋ ଟୁରିଜମ୍‍ ସହିତ ୪ଟି ଆର୍ଦ୍ରଭୂମି ସାତକୋଶିଆ ଅଭୟାରଣ୍ୟ, ହୀରାକୁଦ ଜଳଭଣ୍ଡାର, ଅଂଶୁପା ହ୍ରଦ ଏବଂ ତାମ୍ପରା ହ୍ରଦ ଆଦି ଆର୍ନ୍ତଜାତୀୟ ରାମସାର ସାଇଟ୍‍ରେ ସ୍ଥାନ ପାଇଛି। ଫଳରେ ଏହି ସ୍ଥାନଗୁଡ଼ିକ ପ୍ରତି ଦେଶ ଓ ବିଦେଶର ପର୍ଯ୍ୟଟକମାନଙ୍କର ଆଗ୍ରହ ବୃଦ୍ଧି ପାଇବାରେ ଲାଗିଛି।

ବ୍ୟସ୍ତ ବହୁଳ ଜୀବନରୁ ମଣିଷ ନିଜର କ୍ଳାନ୍ତି ମେଣ୍ଟାଇବା ପାଇଁ ପ୍ରକୃତି କୋଳରେ କିଛି ସମୟ କାଟିବା ପାଇଁ ମନ ବଳାଇଥାଏ। ବିଶେଷକରି ଭ୍ରମଣ ପ୍ରିୟ ଲୋକମାନେ ଏହାକୁ ଅଧିକ ପସନ୍ଦ କରିଥାନ୍ତି। ଏହା କେବଳ ଶାରୀରିକ ସ୍ତରରେ ନୁହେଁ, ମାନସିକ ସ୍ତରରେ ମଣିଷକୁ ଅଧିକ ଶକ୍ତିଶାଳୀ କରାଏ। ବିଭିନ୍ନ ସ୍ଥାନକୁ ପରିଭ୍ରମଣ କରିବାର ଆଧୁନିକତାର ପରିଭାଷା ହେଉଛି ପର୍ଯ୍ୟଟନ। ବିଶ୍ବର କୋଣ ଅନୁକୋଣରେ ଥିବା ପର୍ଯ୍ୟଟନସ୍ଥଳଗୁଡ଼ିକ ବିଷୟରେ ଲୋକଙ୍କୁ ଅବଗତ କରିବା ସହ ପର୍ଯ୍ୟଟନ ଶିଳ୍ପକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ପ୍ରତିବର୍ଷ ସେପ୍ଟେମ୍ବର ମାସ ୨୭ ତାରିଖକୁ ‘ବିଶ୍ବ ପର୍ଯ୍ୟଟନ ଦିବସ’ ଭାବେ ପାଳନ କରାଯାଉଛି। ସଂଯୁକ୍ତ ରାଷ୍ଟ୍ର ବିଶ୍ବ ପର୍ଯ୍ୟଟନ ସଂଗଠନଦ୍ବାରା ୧୯୮୦ ମସିହାରୁ ଏହା ପାଳିତ ହେଉଅଛି ।

ଏହି ତାରିଖର ବିଶେଷତ୍ଵ ଏହି ଯେ ୧୯୭୦ ମସିହା ଏହି ତିଥିରେ ସଂଯୁକ୍ତ ରାଷ୍ଟ୍ର ବିଶ୍ଵ ପର୍ଯ୍ୟଟନ ସଂଗଠନର (UNWTO) ଆଇନ୍କୁ ଆଇନଗତ ମାନ୍ୟତା ଦିଅଯାଇଥିଲା । ବିଶ୍ଵ ସ୍ତରରେ ପର୍ଯ୍ୟଟନକୁ ବିଶେଷ ପ୍ରୋତ୍ସାହନ ଦେବା ସନ୍ଦର୍ଭରେ ଏହି ଆଇନଗତ ପ୍ରକ୍ରିୟା ଏକ ମାଇଲ୍ ଖୁଣ୍ଟ ସଦୃଶ। ଏହି ଦିବସ ପାଳନର ମୁଖ୍ୟ ଲକ୍ଷ୍ୟ ଓ ଉଦ୍ଦେଶ୍ୟ ହେଲା ପର୍ଯ୍ୟଟନ ମାଧ୍ୟମରେ ଦେଶର ସାମାଜିକ, ରାଜନୈତିକ ତଥା ଅର୍ଥନୈତିକ ସମୃଦ୍ଧିରେ ଭାଗୀଦାରି ହେବା ତଥା ଏ ସଂପର୍କରେ ଜନସଚେତନତା ସୃଷ୍ଟି କରିବା । ମହାମାରୀ କରୋନା ଯୋଗୁଁ ସବୁଠୁ ଅଧିକ କ୍ଷତିଗ୍ରସ୍ତ ହୋଇଛି ପର୍ଯ୍ୟଟନ ଶିଳ୍ପ । ଅବଶ୍ୟ ଏବେ ପୂର୍ବାପେକ୍ଷା ପର୍ଯ୍ୟଟନସ୍ଥଳଗୁଡ଼ିକ ଟିକିଏ ଚଳଚଞ୍ଚଳ ହୋଇଉଠିଛି। କରୋନା ଦୂର ହୋଇଗଲା ପରେ ପୁଣି ଥରେ ପର୍ଯ୍ୟଟନ ସ୍ଥଳଗୁଡ଼ିକ ଚଳଚଞ୍ଚଳ ହୋଇ ଉଠିବ ବୋଲି ଆଶା କରାଯାଉଛି।