ଆମ୍ ଆଦମୀ ପାର୍ଟି (ଆପ୍) ଛାଡି ଭାରତୀୟ ଜନତା ପାର୍ଟି (ବିଜେପି)ରେ ସାମିଲ ହୋଇଥିବା ପୂର୍ବତନ କ୍ରିକେଟର ତଥା ରାଜ୍ୟସଭା ସାଂସଦ ହରଭଜନ ସିଂହ ପଞ୍ଜାବ ସରକାର ଏବଂ ଆପ୍ ନେତୃତ୍ୱ ଉପରେ ସାଂଘାତିକ ଅଭିଯୋଗ ଆଣିଛନ୍ତି। ବିଜେପିରେ ସାମିଲ ହେବା ପରେ ତାଙ୍କୁ ରାଜ୍ୟସଭା ସିଟ୍ ଛାଡିବାକୁ ଆପ୍ ନେତାମାନେ ଦାବି କରୁଥିବା ବେଳେ ଏହାର କଡ଼ା ଜବାବ ଦେଇଛନ୍ତି ହରଭଜନ। ପଞ୍ଜାବରେ ରାଜ୍ୟସଭା ସିଟ୍ ଏବଂ କ୍ୟାବିନେଟ୍ ପଦବୀ କିପରି ଟଙ୍କା ଦେଣନେଣ ମାଧ୍ୟମରେ ବିକ୍ରି କରାଯାଇଛି, ସେ ସମ୍ପର୍କରେ ଖୁଲାସା କରିବେ ବୋଲି ସେ ଚେତାବନୀ ଦେଇଛନ୍ତି।

ରାଜ୍ୟସଭା ସିଟ୍ ବିକ୍ରି ଅଭିଯୋଗ

ନିଜ ସମାଲୋଚକମାନଙ୍କୁ କଡ଼ା ଜବାବ ଦେଇ ହରଭଜନ ସିଂହ କହିଛନ୍ତି ଯେ, "ଯେଉଁମାନେ ମୋତେ ରାଜ୍ୟସଭା ସିଟ୍ ଛାଡିବାକୁ କହୁଛନ୍ତି, ସେମାନେ ପ୍ରଥମେ ସ୍ପଷ୍ଟ କରନ୍ତୁ ଯେ ପଞ୍ଜାବର ରାଜ୍ୟସଭା ସିଟ୍ କେତେ ଟଙ୍କାରେ ବିକ୍ରି ହୋଇଛି।" ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ କ୍ଷମତାରେ ଥିବା ଲୋକମାନେ "ପଞ୍ଜାବକୁ ଲୁଟି ଖାଇଯାଇଛନ୍ତି" ଏବଂ ଆଗାମୀ ଦିନରେ ସେ କ୍ୟାବିନେଟ୍ ମନ୍ତ୍ରୀ ପଦ ଏବଂ ଟିକେଟ୍ ବଣ୍ଟନର ଗୁମର ଖୋଲିବେ। ତାଙ୍କର ଏହି ବିବୃତ୍ତି ପଞ୍ଜାବ ରାଜନୀତିରେ ଏକ ବଡ଼ ଧରଣର କମ୍ପନ ସୃଷ୍ଟି କରିଛି।

ବିଜେପିରେ ସାମିଲ ଏବଂ ସୁରକ୍ଷା ବିବାଦ

ଗତ ଏପ୍ରିଲ ମାସରେ ହରଭଜନ ସିଂହଙ୍କ ସମେତ ରାଘବ ଚଢ଼ା ଏବଂ ଅନ୍ୟ ୭ ଜଣ ଆପ୍ ସାଂସଦ ଦଳ ଛାଡି ବିଜେପିରେ ଯୋଗ ଦେଇଥିଲେ। ଏହା ପରେ ମୁଖ୍ୟମନ୍ତ୍ରୀ ଭଗୱନ୍ତ ମାନଙ୍କ ନେତୃତ୍ୱାଧୀନ ପଞ୍ଜାବ ସରକାର ହରଭଜନଙ୍କ ସୁରକ୍ଷା ବ୍ୟବସ୍ଥାକୁ ପ୍ରତ୍ୟାହାର କରିନେଇଥିଲେ। ସୁରକ୍ଷା ହଟିବା ପରେ କିଛି ଆପ୍ କର୍ମୀ ଜଳନ୍ଧର ସ୍ଥିତ ତାଙ୍କ ବାସଭବନ ବାହାରେ ବିକ୍ଷୋଭ ପ୍ରଦର୍ଶନ କରିବା ସହ କାନ୍ଥରେ 'ଗଦ୍ଦାର' ଲେଖିଦେଇଥିଲେ। ଏହି ଘଟଣାକୁ ନେଇ ହରଭଜନ ପଞ୍ଜାବ ଏବଂ ହରିୟାଣା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଅନ୍ୟପକ୍ଷରେ, କେନ୍ଦ୍ର ସରକାର ତୁରନ୍ତ ପଦକ୍ଷେପ ଗ୍ରହଣ କରି ତାଙ୍କୁ ସିଆରପିଏଫ୍ (CRPF) ଯବାନଙ୍କ ସହ ଜେଡ୍ ପ୍ଲସ୍ (Z+) ସୁରକ୍ଷା ଯୋଗାଇ ଦେଇଛନ୍ତି।

ପଞ୍ଜାବ ରାଜନୀତିରେ ଝଡ଼

ନିକଟରେ ପଞ୍ଜାବର ଆଇନଶୃଙ୍ଖଳା ପରିସ୍ଥିତିକୁ ନେଇ ହରଭଜନ ସୋସିଆଲ ମିଡିଆରେ ମଧ୍ୟ ପ୍ରଶ୍ନ ଉଠାଇଥିଲେ। ସେ ସ୍ପଷ୍ଟ କରିଛନ୍ତି ଯେ ରାଜ୍ୟସଭା ସାଂସଦ ଭାବରେ ସେ ପଞ୍ଜାବ ସରକାରଙ୍କଠାରୁ ମିଳୁଥିବା କୌଣସି ସୁବିଧାସୁଯୋଗ ନେଉନାହାଁନ୍ତି ଏବଂ ତାଙ୍କୁ କ୍ରିକେଟ୍ ଖେଳି ଭଗବାନ ଯଥେଷ୍ଟ କିଛି ଦେଇଛନ୍ତି। ଆପ୍ ଛାଡିବା ପରେ ପୂର୍ବତନ ସାଥୀଙ୍କ ମଧ୍ୟରେ ଆରମ୍ଭ ହୋଇଥିବା ଏହି ବାକ୍‌ଯୁଦ୍ଧ ଏବେ ତୀବ୍ର ରୂପ ନେଇଛି ଏବଂ ଆଗାମୀ ଦିନରେ ଏହା ପଞ୍ଜାବର ଶାସକ ଦଳ ପାଇଁ ଅଧିକ ଅଡ଼ୁଆ ସୃଷ୍ଟି କରିବାର ସମ୍ଭାବନା ରହିଛି।

ନିକଟରେ ଆମ୍ ଆଦମୀ ପାର୍ଟି (AAP) ଛାଡି ଭାରତୀୟ ଜନତା ପାର୍ଟି (BJP) ରେ ଯୋଗ ଦେଇଥିବା ରାଜ୍ୟସଭା ସାଂସଦ ରାଘବ ଚଢ଼ା ନିଜର ପୂର୍ବତନ ଦଳ ବିରୋଧରେ ଏକ ବଡ଼ ଅଭିଯୋଗ ଆଣିଛନ୍ତି। ପଞ୍ଜାବର ଆପ୍ ସରକାରଙ୍କ ଆକ୍ରୋଶମୂଳକ ରାଜନୀତିର ସେ "ପରବର୍ତ୍ତୀ ଟାର୍ଗେଟ" ହେବାକୁ ଯାଉଛନ୍ତି ବୋଲି ସେ ଦାବି କରିଛନ୍ତି।

ରାଷ୍ଟ୍ରପତିଙ୍କୁ ଭେଟିଲେ ରାଘବ ଚଢ଼ା ଓ ଅନ୍ୟ ସାଂସଦ

ମଙ୍ଗଳବାର ଦିନ ରାଘବ ଚଢ଼ା ଅନ୍ୟ ଦୁଇ ରାଜ୍ୟସଭା ସାଂସଦ ସନ୍ଦୀପ ପାଠକ ଏବଂ ଅଶୋକ ମିତ୍ତଲଙ୍କ ସହ ମିଶି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଛନ୍ତି। ଏହି ସାକ୍ଷାତକାର ସମୟରେ ସେମାନେ ପଞ୍ଜାବରେ ଶାସନାଧୀନ ଥିବା ଆପ୍ ସରକାରଙ୍କ କାର୍ଯ୍ୟକଳାପ ଉପରେ ନିଜର ଉଦବେଗ ପ୍ରକାଶ କରିଥିଲେ। ଗଣମାଧ୍ୟମକୁ ପ୍ରତିକ୍ରିୟା ଦେଇ ଚଢ଼ା କହିଛନ୍ତି ଯେ, "ଆମେ ରାଷ୍ଟ୍ରପତିଙ୍କୁ ଅବଗତ କରାଇଛୁ ଯେ ଯେଉଁ ସାଂସଦମାନେ ଆପ୍ ଛାଡି ବିଜେପିରେ ଯୋଗ ଦେଇଛନ୍ତି, ସେମାନଙ୍କ ବିରୋଧରେ ପଞ୍ଜାବ ସରକାର କିପରି ବିପଜ୍ଜନକ ପ୍ରତିଶୋଧମୂଳକ ରାଜନୀତି ପାଇଁ ରାଜ୍ୟ ଯନ୍ତ୍ରପାତିର ଅପବ୍ୟବହାର କରୁଛନ୍ତି।"

ପ୍ରତିଶୋଧମୂଳକ ରାଜନୀତିର ଅଭିଯୋଗ

ସୂଚନାଯୋଗ୍ୟ ଯେ, ନିକଟରେ ରାଘବ ଚଢ଼ାଙ୍କ ସମେତ ୭ ଜଣ ରାଜ୍ୟସଭା ସାଂସଦ ଆପ୍ ଛାଡ଼ି ବିଜେପିରେ ସାମିଲ ହୋଇଥିଲେ। ଏହି ଘଟଣାର କିଛି ଦିନ ପରେ ପଞ୍ଜାବ ପ୍ରଦୂଷଣ ନିୟନ୍ତ୍ରଣ ବୋର୍ଡ (PPCB) ପକ୍ଷରୁ ସାଂସଦ ରାଜିନ୍ଦର ଗୁପ୍ତାଙ୍କ ସହ ଜଡିତ ଥିବା ଧୌଲା ସ୍ଥିତ ଏକ ଟେକ୍ସଟାଇଲ୍ କାରଖାନା ଉପରେ ଚଢ଼ାଉ କରାଯାଇଥିଲା। ଏଥିସହ ରାଜ୍ୟରେ ଅନ୍ୟ ଜଣେ ସାଂସଦ ସନ୍ଦୀପ ଗୁପ୍ତାଙ୍କ ନାମରେ ଦୁଇଟି ଏଫଆଇଆର (FIR) ରୁଜୁ ହୋଇଥିବା ଖବର ମଧ୍ୟ ସାମ୍ନାକୁ ଆସିଥିଲା। ଏହିସବୁ ଘଟଣାକୁ ଦୃଷ୍ଟିରେ ରଖି ତାଙ୍କ ବିରୋଧରେ ମଧ୍ୟ ସରକାରୀ କଳର ଦୁରୁପଯୋଗ କରାଯାଇପାରେ ଏବଂ ତାଙ୍କୁ ଟାର୍ଗେଟ କରାଯାଇପାରେ ବୋଲି ଶ୍ରୀ ଚଢ଼ା ଆଶଙ୍କା ବ୍ୟକ୍ତ କରିଛନ୍ତି।

ଆମ ଆଦମୀ ପାର୍ଟି (ଆପ୍) ଛାଡି ଭାରତୀୟ ଜନତା ପାର୍ଟି (ବିଜେପି) ରେ ସାମିଲ ହେବାର କିଛି ଦିନ ପରେ ରାଜ୍ୟସଭା ସାଂସଦ ସନ୍ଦୀପ ପାଠକଙ୍କ ବିରୋଧରେ ପଞ୍ଜାବ ପୋଲିସ ଦୁଇଟି ଏଫଆଇଆର (FIR) ରୁଜୁ କରିଛି। ସୂତ୍ରରୁ ପ୍ରକାଶ ଯେ, ଅଜାମିନବିହୀନ ଦଫାରେ ଏହି ମାମଲା ରୁଜୁ କରାଯାଇଛି ଏବଂ ଖୁବ୍‌ଶୀଘ୍ର ତାଙ୍କୁ ଗିରଫ କରାଯାଇପାରେ।

ପଞ୍ଜାବ ପୋଲିସର କାର୍ଯ୍ୟାନୁଷ୍ଠାନ

ପଞ୍ଜାବର ଦୁଇଟି ଭିନ୍ନ ଭିନ୍ନ ଜିଲ୍ଲାରେ ଏହି ମାମଲା ରୁଜୁ ହୋଇଛି। ଗିରଫଦାରୀ ଆଶଙ୍କା ମଧ୍ୟରେ ପଞ୍ଜାବ ପୋଲିସର ଏକ ଟିମ୍ ନୂଆଦିଲ୍ଲୀ ସ୍ଥିତ ସନ୍ଦୀପ ପାଠକଙ୍କ ବାସଭବନରେ ପହଞ୍ଚିଛି। ତେବେ ପୋଲିସ ପହଞ୍ଚିବା ପୂର୍ବରୁ ସେ ଘରୁ ବାହାରି ଯାଇଥିବା ଦେଖିବାକୁ ମିଳିଥିଲା। ସେହିପରି ଦିଲ୍ଲୀ ପୋଲିସର ଏକ ଟିମ୍ ମଧ୍ୟ ତାଙ୍କ ବାସଭବନରେ ପହଞ୍ଚିବା ସହ ସେଠାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛି।

ବିରୋଧୀଙ୍କ ପ୍ରତିକ୍ରିୟା ଓ ରାଜନୈତିକ ବୟାନବାଜି

ଏହି ଘଟଣାକୁ ନେଇ ବିଜେପି ଏବଂ ଶିରୋମଣି ଅକାଳୀ ଦଳ (SAD) କଡ଼ା ସମାଲୋଚନା କରିଛନ୍ତି। ଏହାକୁ 'ରାଜନୈତିକ ପ୍ରତିଶୋଧ' ବୋଲି ବିରୋଧୀ ଦଳଗୁଡ଼ିକ ଅଭିହିତ କରିଛନ୍ତି। ପଞ୍ଜାବ ବିଜେପି କାର୍ଯ୍ୟକାରୀ ସଭାପତି ଅଶ୍ୱିନୀ ଶର୍ମା କହିଛନ୍ତି ଯେ, ମୁଖ୍ୟମନ୍ତ୍ରୀ ଭଗୱନ୍ତ ମାନ ଏବଂ ଅରବିନ୍ଦ କେଜ୍ରିୱାଲ ପୋଲିସକୁ ରାଜନୈତିକ ଅସ୍ତ୍ର ଭାବରେ ବ୍ୟବହାର କରୁଛନ୍ତି। ସେହିପରି ଅକାଳୀ ଦଳ ନେତା ବିକ୍ରମ ସିଂ ମଜିଠିଆ ମଧ୍ୟ ଏହାକୁ ନିନ୍ଦା କରିବା ସହ ଦଳ ଛାଡୁଥିବା ନେତାଙ୍କୁ ଆପ୍ ସରକାର ଟାର୍ଗେଟ୍ କରୁଥିବା ଅଭିଯୋଗ ଆଣିଛନ୍ତି।

ଆପ୍‌କୁ ଲାଗିଥିଲା ବଡ଼ ଝଟକା

ଏପ୍ରିଲ ୨୪ ତାରିଖରେ ସନ୍ଦୀପ ପାଠକଙ୍କ ସମେତ ଆପ୍‌ର ୭ ଜଣ ରାଜ୍ୟସଭା ସାଂସଦ ଦଳ ଛାଡି ବିଜେପିରେ ମିଶିଥିଲେ। ରାଘବ ଚଢା, ଅଶୋକ ମିତ୍ତଲ, ହରଭଜନ ସିଂହ, ରାଜିନ୍ଦର ଗୁପ୍ତା, ବିକ୍ରମଜିତ ସାହନୀ ଏବଂ ସ୍ୱାତୀ ମାଲିୱାଲଙ୍କ ଭଳି ବରିଷ୍ଠ ନେତା ଏହି ତାଲିକାରେ ସାମିଲ ଥିଲେ। ଦଳ ନିଜ ମୂଳ ଆଦର୍ଶରୁ ବିଚ୍ୟୁତ ହୋଇଥିବା ସେମାନେ ଅଭିଯୋଗ ଆଣିଥିଲେ। ଏହି ବିଦ୍ରୋହ ପରେ ମୁଖ୍ୟମନ୍ତ୍ରୀ ଭଗୱନ୍ତ ମାନ ବିଧାନସଭାରେ ଆସ୍ଥା ଭୋଟ୍ ଜିତିଥିବା ବେଳେ ମେ' ୫ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟି ଏହି 'ବେଆଇନ ଦଳବଦଳ' ପ୍ରସଙ୍ଗ ଉଠାଇବେ ବୋଲି କହିଛନ୍ତି।

ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟି (AAP) ର ରାଷ୍ଟ୍ରୀୟ ଆବାହକ ଅରବିନ୍ଦ କେଜ୍ରିୱାଲ ଦିଲ୍ଲୀ ହାଇକୋର୍ଟର ବିଚାରପତି ଜଷ୍ଟିସ୍ ସ୍ୱର୍ଣ୍ଣକାନ୍ତା ଶର୍ମାଙ୍କ କୋର୍ଟରେ ହାଜର ନହେବାକୁ ଘୋଷଣା କରିଛନ୍ତି। ସୋମବାର ଏକ ଭିଡିଓ ବାର୍ତ୍ତା ଏବଂ ସାମ୍ବାଦିକ ସମ୍ମିଳନୀ ମାଧ୍ୟମରେ ସେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ତାଙ୍କ ତରଫରୁ କୌଣସି ଓକିଲ ମଧ୍ୟ ଏହି କୋର୍ଟରେ ପକ୍ଷ ରଖିବେ ନାହିଁ। ଏହି ପ୍ରସଙ୍ଗରେ ସେ ମହାତ୍ମା ଗାନ୍ଧୀଙ୍କ ମାର୍ଗରେ 'ସତ୍ୟାଗ୍ରହ' କରିବାକୁ ନିଷ୍ପତ୍ତି ନେଇଛନ୍ତି ଏବଂ ଜଷ୍ଟିସ୍ ଶର୍ମାଙ୍କୁ ଏକ ୪ ପୃଷ୍ଠାର ଚିଠି ଲେଖି ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି।

ସ୍ୱାର୍ଥର ସଂଘାତ (Conflict of Interest) ଅଭିଯୋଗ

ଏହି ନିଷ୍ପତ୍ତି ପଛର ମୁଖ୍ୟ କାରଣ ଦର୍ଶାଇ କେଜ୍ରିୱାଲ କହିଛନ୍ତି ଯେ ଏହା ଏକ 'ସ୍ୱାର୍ଥର ସଂଘାତ' ବା 'କନଫ୍ଲିକ୍ଟ ଅଫ୍ ଇଣ୍ଟ୍ରେଷ୍ଟ' ମାମଲା ଅଟେ। ତାଙ୍କ ଅଭିଯୋଗ ଅନୁଯାୟୀ, ଜଷ୍ଟିସ୍ ସ୍ୱର୍ଣ୍ଣକାନ୍ତା ଶର୍ମାଙ୍କ ଦୁଇ ସନ୍ତାନ କେନ୍ଦ୍ର ସରକାରଙ୍କ ଓକିଲ ପ୍ୟାନେଲରେ ଅଛନ୍ତି। ଭାରତ ସରକାରଙ୍କ ପ୍ୟାନେଲରେ ୭୦୦ ରୁ ଅଧିକ ଓକିଲ ଥିବାବେଳେ, ସଲିସିଟର ଜେନେରାଲ ତୁଷାର ମେହେଟ୍ଟା ସବୁଠାରୁ ଅଧିକ ମାମଲା ଜଷ୍ଟିସ୍ ଶର୍ମାଙ୍କ ପିଲାମାନଙ୍କୁ ଆବଣ୍ଟନ କରୁଛନ୍ତି। ଉଲ୍ଲେଖଯୋଗ୍ୟ ଯେ, ତୁଷାର ମେହେଟ୍ଟା ହିଁ ସିବିଆଇ (CBI) ପକ୍ଷରୁ କେଜ୍ରିୱାଲଙ୍କ ବିପକ୍ଷରେ କୋର୍ଟରେ ଯୁକ୍ତି ଉପସ୍ଥାପନ କରୁଛନ୍ତି।

"ନ୍ୟାୟ ମିଳିବାର ଆଶା ହରାଇଛି"

ନିଜର ସୋସିଆଲ ମିଡିଆ ବାର୍ତ୍ତାରେ ଆପ୍ ସୁପ୍ରିମୋ କହିଛନ୍ତି ଯେ ସେ ଏହି କୋର୍ଟରୁ ନ୍ୟାୟ ପାଇବାର ଆଶା ହରାଇ ବସିଛନ୍ତି। ପୂର୍ବରୁ ଫେବୃଆରୀ ୨୭ ତାରିଖରେ ନିମ୍ନ ଅଦାଲତ ତାଙ୍କୁ ସମ୍ପୂର୍ଣ୍ଣ ନିର୍ଦ୍ଦୋଷ ବୋଲି ଘୋଷଣା କରିଥିଲେ। ମାତ୍ର ସିବିଆଇ ଏହି ରାୟକୁ ଦିଲ୍ଲୀ ହାଇକୋର୍ଟରେ ଚ୍ୟାଲେଞ୍ଜ କରିଥିଲା ଏବଂ ଏହି ମାମଲା ଜଷ୍ଟିସ୍ ସ୍ୱର୍ଣ୍ଣକାନ୍ତା ଶର୍ମାଙ୍କ ବିଚାରାଧୀନ ହୋଇଥିଲା। ଏହାକୁ ଦୃଷ୍ଟିରେ ରଖି କେଜ୍ରିୱାଲ ଏକ ଆଦର୍ଶଗତ ବିରୋଧାଭାଷ ଏବଂ ସିବିଆଇ ସହିତ ସମ୍ପୃକ୍ତ ପକ୍ଷପାତିତାର ଆଶଙ୍କା ପ୍ରକାଶ କରିଛନ୍ତି।

ନ୍ୟାୟପାଳିକା ଉପରେ ବିଶ୍ୱାସ ବଜାୟ ରଖିବା ଲକ୍ଷ୍ୟ

କେଜ୍ରିୱାଲ ସ୍ପଷ୍ଟ କରିଛନ୍ତି ଯେ ତାଙ୍କର ଏହି ପଦକ୍ଷେପ ନ୍ୟାୟପାଳିକାକୁ ଅସମ୍ମାନ କରିବା ପାଇଁ ଉଦ୍ଦିଷ୍ଟ ନୁହେଁ, ବରଂ ନ୍ୟାୟ ବ୍ୟବସ୍ଥା ଉପରେ ଲୋକଙ୍କର ବିଶ୍ୱାସକୁ ସୁଦୃଢ଼ କରିବା ପାଇଁ ଏହା ଏକ ପ୍ରୟାସ। ତଥାପି, ନିଜର ଆଇନଗତ ଅଧିକାରକୁ ବଜାୟ ରଖିବା ସହ ଆବଶ୍ୟକ ପଡ଼ିଲେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେବେ ବୋଲି ସେ ଚେତାବନୀ ଦେଇଛନ୍ତି।

ପଞ୍ଜାବ ରାଜନୀତିରେ ଏବେ ଏକ ବଡ଼ ଧରଣର ଝଡ଼ ସୃଷ୍ଟି ହୋଇଛି। ଆମ୍ ଆଦମୀ ପାର୍ଟି (ଆପ୍) ର ୭ ଜଣ ରାଜ୍ୟସଭା ସାଂସଦ ଦଳ ଛାଡ଼ି ଭାରତୀୟ ଜନତା ପାର୍ଟି (ବିଜେପି) ରେ ସାମିଲ ହେବା ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିଛି। ପୂର୍ବତନ କ୍ରିକେଟର ତଥା ସାଂସଦ ହରଭଜନ ସିଂହ ବିଜେପିରେ ସାମିଲ ହେବା ପରେ ତାଙ୍କ ବିରୋଧରେ କଡ଼ା ପ୍ରତିକ୍ରିୟା ଦେଖିବାକୁ ମିଳିଛି। ଆପ୍ କର୍ମୀମାନେ ତାଙ୍କ ବାସଭବନ ବାହାରେ ବିକ୍ଷୋଭ ପ୍ରଦର୍ଶନ କରିବା ସହ କାନ୍ଥରେ 'ଗଦ୍ଦାର' (ବିଶ୍ୱାସଘାତକ) ବୋଲି ଲେଖିଦେଇଛନ୍ତି।

ଆପ୍ ଛାଡି ବିଜେପିରେ ମିଶିଲେ ୭ ସାଂସଦ

ରିପୋର୍ଟ ଅନୁଯାୟୀ, ଶୁକ୍ରବାର ଦିନ ଆପ୍ ର ୭ ଜଣ ବରିଷ୍ଠ ନେତା ତଥା ରାଜ୍ୟସଭା ସାଂସଦ ବିଧିବଦ୍ଧ ଭାବେ ବିଜେପି ରେ ଯୋଗ ଦେଇଛନ୍ତି। ଏହି ତାଲିକାରେ ରାଘବ ଚଢ଼ା, ସନ୍ଦୀପ ପାଠକ, ହରଭଜନ ସିଂହ, ଅଶୋକ ମିତ୍ତଲ, ରାଜିନ୍ଦର ଗୁପ୍ତା, ସ୍ୱାତୀ ମାଲିୱାଲ ଏବଂ ବିକ୍ରମଜିତ ସାହନେ ସାମିଲ ଅଛନ୍ତି। ଏତେ ବଡ଼ ସଂଖ୍ୟାରେ ସାଂସଦଙ୍କ ଦଳବଦଳ ଆମ୍ ଆଦମୀ ପାର୍ଟିର ଜାତୀୟ ସ୍ତରୀୟ ଢାଞ୍ଚାକୁ ଦୋହଲାଇ ଦେଇଛି।

ରାସ୍ତାକୁ ଓହ୍ଲାଇଲେ ଆପ୍ କର୍ମୀ, କାନ୍ଥରେ ଲେଖିଲେ 'ଗଦ୍ଦାର'

ସାଂସଦମାନଙ୍କର ଏହି ଦଳବଦଳକୁ ନେଇ ଶନିବାର ଦିନ ଆପ୍ କର୍ମୀମାନେ ରାସ୍ତାକୁ ଓହ୍ଲାଇଥିଲେ। ଲୁଧିଆନା ଏବଂ ଜଳନ୍ଧର ଠାରେ ଥିବା ସାଂସଦ ହରଭଜନ ସିଂହ, ଅଶୋକ ମିତ୍ତଲ ଏବଂ ରାଜିନ୍ଦର ଗୁପ୍ତାଙ୍କ ଘର ବାହାରେ କର୍ମୀମାନେ ପ୍ରବଳ ବିକ୍ଷୋଭ ପ୍ରଦର୍ଶନ କରିଥିଲେ। କେବଳ ସେତିକି ନୁହେଁ, ସ୍ପ୍ରେ ପେଣ୍ଟ୍ ବ୍ୟବହାର କରି ସେମାନଙ୍କ ଘରର ପାଚେରିରେ ବିକ୍ଷୋଭକାରୀମାନେ 'ଗଦ୍ଦାର' ବୋଲି ଲେଖିଥିଲେ। କର୍ମୀମାନେ 'ପଞ୍ଜାବ ଦେ ଗଦ୍ଦାର' ସ୍ଲୋଗାନ ଦେଇ ସେମାନଙ୍କୁ ପଞ୍ଜାବବାସୀଙ୍କ ସହ ବିଶ୍ୱାସଘାତକତା କରିଥିବା ଅଭିଯୋଗ କରିଥିଲେ।

ପ୍ରତ୍ୟାହାର ହେଲା ହରଭଜନଙ୍କ ସୁରକ୍ଷା ବ୍ୟବସ୍ଥା

ହରଭଜନ ସିଂହ ବିଜେପିରେ ସାମିଲ ହେବାର କିଛି ଘଣ୍ଟା ମଧ୍ୟରେ ପଞ୍ଜାବ ପୋଲିସ ପକ୍ଷରୁ ତାଙ୍କର ସୁରକ୍ଷା ବ୍ୟବସ୍ଥାକୁ ପ୍ରତ୍ୟାହାର କରିନିଆଯାଇଛି। ରାଜ୍ୟ ସରକାର ଏହାକୁ ଏକ ସୁରକ୍ଷା ସମୀକ୍ଷା ପ୍ରକ୍ରିୟା ବୋଲି କହିଥିବା ବେଳେ ଏହା ପଛରେ ରାଜନୈତିକ ଉଦ୍ଦେଶ୍ୟ ରହିଥିବା ଚର୍ଚ୍ଚା ହେଉଛି। ଅନ୍ୟପକ୍ଷରେ, ଦଳବଦଳ ପରେ ସୋସିଆଲ ମିଡିଆରେ ମଧ୍ୟ ବ୍ୟାପକ ଅସନ୍ତୋଷ ଦେଖିବାକୁ ମିଳିଛି। ରିପୋର୍ଟ ମୁତାବକ, ବିଜେପିରେ ଯୋଗ ଦେବାର ମାତ୍ର ୨୪ ଘଣ୍ଟା ଭିତରେ ରାଘବ ଚଢ଼ାଙ୍କର ପ୍ରାୟ ୧୦ ଲକ୍ଷ (1 Million) ଫଲୋଅର୍ସ କମିଯାଇଛନ୍ତି।

କଣ କହୁଛି ଆମ୍ ଆଦମୀ ପାର୍ଟି?

ଏହି ଘଟଣାକୁ ନେଇ ଆମ୍ ଆଦମୀ ପାର୍ଟି ତୀବ୍ର ପ୍ରତିକ୍ରିୟା ପ୍ରକାଶ କରିଛି। ଆପ୍ ନେତା ପବନ କୁମାର ଟିନୁ କହିଛନ୍ତି ଯେ, "୨୦୨୭ ରେ ପଞ୍ଜାବରେ ଆପ୍ ସରକାର ପୁଣି ଥରେ କ୍ଷମତାକୁ ଫେରିବ। ବିଜେପି ନିକଟରେ କୌଣସି ରାଜନୈତିକ ଆଧାର ନଥିବାରୁ ହତାଶ ହୋଇ ସେମାନେ ଷଡ଼ଯନ୍ତ୍ର ମାଧ୍ୟମରେ ଆମ ସାଂସଦମାନଙ୍କୁ କିଣିବାକୁ ପ୍ରୟାସ କରୁଛନ୍ତି।" ସେହିପରି ଦଳର ଯୁବ ମୋର୍ଚ୍ଚା କାର୍ଯ୍ୟକାରୀ ସଭାପତି ପରମିନ୍ଦର ଗୋଲ୍ଡି କହିଛନ୍ତି ଯେ ପଞ୍ଜାବର ଜନସାଧାରଣ ଏହି ବିଶ୍ୱାସଘାତକତାକୁ କଦାପି କ୍ଷମା ଦେବେ ନାହିଁ ଏବଂ ସମସ୍ତ କର୍ମୀ ଦଳ ସହିତ ଦୃଢ଼ ଭାବରେ ଛିଡା ହୋଇଛନ୍ତି।

ଆମ୍ ଆଦମୀ ପାର୍ଟି (AAP) ପାଇଁ ଏକ ବଡ଼ ରାଜନୈତିକ ସଙ୍କଟ ସୃଷ୍ଟି ହୋଇଛି। ପଞ୍ଜାବ ନିର୍ବାଚନ ପୂର୍ବରୁ ଆପ୍‌ର ୧୦ ଜଣ ରାଜ୍ୟସଭା ସାଂସଦଙ୍କ ମଧ୍ୟରୁ ୭ ଜଣ ପାର୍ଟି ଛାଡ଼ି ଭାରତୀୟ ଜନତା ପାର୍ଟି (BJP) ରେ ସାମିଲ ହୋଇଛନ୍ତି। ଏହି ନେତାମାନଙ୍କ ମଧ୍ୟରେ ଦଳର ପ୍ରମୁଖ ଚେହେରା ତଥା ବରିଷ୍ଠ ନେତା ରାଘବ ଚଢ଼ା ମଧ୍ୟ ସାମିଲ ଅଛନ୍ତି।

ଆପ୍‌ ଛାଡ଼ିଲେ କେଉଁ ସାଂସଦ?

ରାଘବ ଚଢ଼ାଙ୍କ ସମେତ ବିଜେପିରେ ସାମିଲ ହୋଇଥିବା ଅନ୍ୟ ୬ ଜଣ ସାଂସଦ ହେଲେ ସନ୍ଦୀପ ପାଠକ, ଅଶୋକ ମିତ୍ତଲ, ହରଭଜନ ସିଂହ, ସ୍ୱାତୀ ମାଲିୱାଲ, ରାଜିନ୍ଦର ଗୁପ୍ତା ଏବଂ ବିକ୍ରମଜିତ୍ ସିଂହ ସାହନି। ଦିଲ୍ଲୀସ୍ଥିତ ବିଜେପି ମୁଖ୍ୟାଳୟରେ ଏହି ସାଂସଦମାନେ ଆନୁଷ୍ଠାନିକ ଭାବେ ପଦ୍ମ ଧରିଛନ୍ତି। ଏକ ସାମ୍ବାଦିକ ସମ୍ମିଳନୀରେ ରାଘବ ଚଢ଼ା କହିଛନ୍ତି ଯେ, ସମ୍ବିଧାନର ନିୟମ ଅନୁଯାୟୀ ଦଳର ଦୁଇ ତୃତୀୟାଂଶ ସାଂସଦ ଆପ୍‌ ଛାଡ଼ି ବିଜେପି ସହ ମିଶିବାକୁ ନିଷ୍ପତ୍ତି ନେଇଛନ୍ତି।

କେଜ୍ରିୱାଲ ଏବଂ ଆପ୍ ନେତାଙ୍କ ପ୍ରତିକ୍ରିୟା

ଏହି ଘଟଣା ପରେ ଆପ୍ ନେତାମାନେ ବିଜେପି ଉପରେ ତୀବ୍ର ବର୍ଷିଛନ୍ତି। ଦଳର ଆବାହକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏକ୍ସ (X) ରେ ଲେଖିଛନ୍ତି ଯେ, "ବିଜେପି ପୁଣି ଥରେ ପଞ୍ଜାବୀମାନଙ୍କ ସହ ଧୋକା କରିଛି।" ସେହିପରି ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ଏହି ସାଂସଦମାନଙ୍କୁ ବିଶ୍ୱାସଘାତକ ଆଖ୍ୟା ଦେଇଛନ୍ତି। ଦଳର ବରିଷ୍ଠ ନେତା ସଞ୍ଜୟ ସିଂହ ଏହାକୁ ବିଜେପିର 'ଅପରେସନ୍ ଲୋଟସ୍' ବୋଲି ଅଭିହିତ କରିଛନ୍ତି ଏବଂ ଦଳବଦଳ କରିଥିବା ସାଂସଦଙ୍କ ସଦସ୍ୟତା ରଦ୍ଦ କରିବା ପାଇଁ ରାଜ୍ୟସଭା ଅଧ୍ୟକ୍ଷଙ୍କୁ ଚିଠି ଲେଖିବେ ବୋଲି କହିଛନ୍ତି।

ପଞ୍ଜାବ ରାଜନୀତି ଉପରେ ପ୍ରଭାବ

୨୦୨୭ ପଞ୍ଜାବ ବିଧାନସଭା ନିର୍ବାଚନ ପୂର୍ବରୁ ଆପ୍ ପାଇଁ ଏହା ଏକ ଶକ୍ତ ଧକ୍କା ବୋଲି ରାଜନୈତିକ ବିଶେଷଜ୍ଞମାନେ ମତ ଦେଇଛନ୍ତି। ଯେହେତୁ ଦଳ ଛାଡ଼ିଥିବା ଅଧିକାଂଶ ସାଂସଦ ପଞ୍ଜାବରୁ ପ୍ରତିନିଧିତ୍ୱ କରୁଥିଲେ, ଏହା ରାଜ୍ୟରେ ଆପ୍‌ର ସ୍ଥିତିକୁ ଦୁର୍ବଳ କରିପାରେ। ଅନ୍ୟପଟେ ଏହି ଘଟଣାକୁ କଂଗ୍ରେସ ନିଜ ପାଇଁ ଏକ ସୁଯୋଗ ଭାବେ ଦେଖୁଛି ଏବଂ ଆଗାମୀ ଦିନରେ ଆପ୍ ବିରୋଧରେ ଆନ୍ଦୋଳନ ଜୋରଦାର କରିବାକୁ ରଣନୀତି ପ୍ରସ୍ତୁତ କରୁଛି।

ଦଳବଦଳ ବିରୋଧୀ ଆଇନର ୧୦ମ ଅନୁସୂଚୀ (Tenth Schedule) ଅନୁଯାୟୀ, ଦୁଇ ତୃତୀୟାଂଶ ସଦସ୍ୟ ଏକାଠି ଦଳ ଛାଡ଼ିଥିବାରୁ ସେମାନଙ୍କ ସଦସ୍ୟତା ରଦ୍ଦ ହେବାର ଆଶଙ୍କା କମ୍ ବୋଲି କୁହାଯାଉଛି। ଏହି ବିଲୟ ଫଳରେ ରାଜ୍ୟସଭାରେ ବିଜେପି ଏବଂ ଏନଡିଏ (NDA) ର ସଂଖ୍ୟାବଳ ଆହୁରି ବୃଦ୍ଧି ପାଇବ।

ପଞ୍ଜାବରେ ଆମ ଆଦମୀ ପାର୍ଟି (ଆପ୍) ନେତା ତଥା ରାଜ୍ୟସଭା ସାଂସଦ ଅଶୋକ କୁମାର ମିତ୍ତଲଙ୍କ ଘର ଏବଂ ତାଙ୍କ ମାଲିକାନାରେ ଥିବା ଲଭଲି ପ୍ରଫେସନାଲ ୟୁନିଭରସିଟି (LPU) କ୍ୟାମ୍ପସରେ ବୁଧବାର ସକାଳେ ଏନଫୋର୍ସମେଣ୍ଟ ଡିରେକ୍ଟୋରେଟ (ଇଡି) ପକ୍ଷରୁ ବ୍ୟାପକ ଚଢ଼ାଉ କରାଯାଇଛି। ତାଙ୍କୁ ଦଳ ପକ୍ଷରୁ ନିକଟରେ ରାଜ୍ୟସଭାର ଉପନେତା ଭାବେ ନିଯୁକ୍ତ କରାଯାଇଥିବା ବେଳେ ଏହି ଆକ୍ସନ୍ ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।

ଫେମା (FEMA) ଉଲ୍ଲଂଘନ ଅଭିଯୋଗରେ ଚଢ଼ାଉ

ମିଳିଥିବା ସୂଚନା ଅନୁଯାୟୀ, ବିଦେଶୀ ମୁଦ୍ରା ପରିଚାଳନା ଆଇନ ବା ଫେମା (FEMA) ଉଲ୍ଲଂଘନ ଅଭିଯୋଗରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଇଡିର ଜଳନ୍ଧର ଏବଂ ଚଣ୍ଡିଗଡ଼ ଟିମ୍ ମିଳିତ ଭାବେ ଏହି ଅପରେସନ୍ ଆରମ୍ଭ କରିଛନ୍ତି। ଫଗୱାଡ଼ା ସ୍ଥିତ ଏଲପିୟୁ କ୍ୟାମ୍ପସ୍ ବ୍ୟତୀତ ଲଭଲି ଗ୍ରୁପ୍ ଦ୍ୱାରା ପରିଚାଳିତ ବିଭିନ୍ନ ମିଠା ଦୋକାନ, ଲଭଲି ଅଟୋସ୍, ଦୂର ନିରନ୍ତର ଶିକ୍ଷା କେନ୍ଦ୍ର ଏବଂ ମାଲିକମାନଙ୍କ ବାସଭବନରେ ଏକକାଳୀନ ରେଡ୍ କରାଯାଇଛି।

ଏହି ଯାଞ୍ଚ ପ୍ରକ୍ରିୟାରେ ସ୍ଥାନୀୟ ପୋଲିସର କୌଣସି ସହାୟତା ନିଆଯାଇନଥିବା ଜଣେ ଅଧିକାରୀ ସ୍ପଷ୍ଟ କରିଛନ୍ତି। ଅଶୋକ ମିତ୍ତଲ ଏବଂ ତାଙ୍କ ଭାଇ ରମେଶ ମିତ୍ତଲ ଓ ନରେଶ ମିତ୍ତଲ ଏଲପିୟୁର ପ୍ରତିଷ୍ଠାତା ଏବଂ ସହ-ମାଲିକ ଅଟନ୍ତି।

ରାଜନୈତିକ ଉତ୍ତେଜନା ମଧ୍ୟରେ ଇଡିର ଆକ୍ସନ୍

ଆପ୍ ନେତା ରାଘବ ଚଢ଼ାଙ୍କୁ ରାଜ୍ୟସଭା ଉପନେତା ପଦରୁ ହଟାଇବା ପରେ ଅଶୋକ ମିତ୍ତଲଙ୍କୁ ଏହି ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଥିଲା। ପଦଭାର ଗ୍ରହଣ କରିବାର ମାତ୍ର କିଛି ଦିନ ପରେ ତାଙ୍କ ଘରେ ଇଡିର ଚଢ଼ାଉ ହେବା ଘଟଣାକୁ ନେଇ ବିଭିନ୍ନ ପ୍ରଶ୍ନବାଚୀ ସୃଷ୍ଟି ହୋଇଛି। ଅବଶ୍ୟ, ଏହା ପୂର୍ବରୁ ପଦବୀ ପରିବର୍ତ୍ତନକୁ ଏକ "ନିରନ୍ତର ପ୍ରକ୍ରିୟା" ବୋଲି ଅଶୋକ ମିତ୍ତଲ କହିଥିଲେ ଏବଂ ରାଘବ ଚଢ଼ାଙ୍କୁ ଦଳର ବରିଷ୍ଠ ନେତା ଭାବେ ସମ୍ମାନ ଜଣାଇଥିଲେ।

ଗୁରୁ ନାନକ ଦେବ ବିଶ୍ୱବିଦ୍ୟାଳୟରୁ ଆଇନରେ ସ୍ନାତକ ତଥା ପେସାରେ ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ (CA) ଥିବା ଅଶୋକ କୁମାର ମିତ୍ତଲ ୨୦୨୨ ମସିହାରେ ରାଜ୍ୟସଭାକୁ ନିର୍ବାଚିତ ହୋଇଥିଲେ। ବର୍ତ୍ତମାନ ଏହି ଚଢ଼ାଉକୁ ନେଇ ଆମ ଆଦମୀ ପାର୍ଟିର ନେତା ଏବଂ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ କେନ୍ଦ୍ର ସରକାରଙ୍କ ଉପରେ ରାଜନୈତିକ ଉଦ୍ଦେଶ୍ୟମୂଳକ ଆକ୍ରମଣ ଅଭିଯୋଗ ଆଣିଛନ୍ତି। ଯାଞ୍ଚ ପ୍ରକ୍ରିୟା ଜାରି ରହିଥିବା ବେଳେ ଆର୍ଥିକ କାରବାର ସହ ଜଡ଼ିତ ଗୁରୁତ୍ୱପୂର୍ଣ୍ଣ କାଗଜପତ୍ର ଉଦ୍ଧାର ହେବାର ସମ୍ଭାବନା ରହିଛି ।

ନୂଆଦିଲ୍ଲୀ: ରାଘବ ଚଢାଙ୍କ ବିରୋଧରେ 'ଆପ୍'ର ବଡ କାର୍ଯ୍ୟାନୁଷ୍ଠାନ । ରାଜ୍ୟସଭା ଉପ ନେତା ପଦରୁ ହଟିଲେ ରାଘବ ଚଢ଼ା ।  ଆମ୍ ଆଦମୀ ପାର୍ଟି (AAP) ନିଜର ବରିଷ୍ଠ ନେତା ତଥା ସାଂସଦ ରାଘବ ଚଢ଼ାଙ୍କୁ ସଂସଦର ଉଚ୍ଚ ସଦନ ଅର୍ଥାତ୍ ରାଜ୍ୟସଭାର ଉପନେତା ପଦରୁ ହଟାଇ ଦେଇଛି। ତାଙ୍କ ସ୍ଥାନରେ ପଞ୍ଜାବ ସାଂସଦ ଅଶୋକ ମିତ୍ତଲଙ୍କୁ ନୂଆ ରାଜ୍ୟସଭା ଉପନେତା ଭାବେ ନିଯୁକ୍ତ କରାଯାଇଛି। ୨୦୨୩ ମସିହାରୁ ଏହି ଦାୟିତ୍ୱ ତୁଲାଉଥିବା ରାଘବଙ୍କ ପାଇଁ ଏହା ଏକ ବଡ଼ ଝଟକା ବୋଲି କୁହାଯାଉଛି।

ପାର୍ଟି ପକ୍ଷରୁ ରାଜ୍ୟସଭା ସଚିବାଳୟକୁ ନେତୃତ୍ୱ ପରିବର୍ତ୍ତନ ନେଇ ସୂଚନା ଦିଆଯାଇଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଯେ, ସଂସଦରେ ପାର୍ଟିର କହିବା ସମୟ ରାଘବଙ୍କୁ ନଦେବାକୁ ଏହି ଚିଠିରେ ନିର୍ଦ୍ଦେଶ ଦିଆଯାଇଛି। ନିକଟରେ ତାଙ୍କର କିଛି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ 'ରଣନୀତିକ ନୀରବତା' ଏହାର ପ୍ରମୁଖ କାରଣ ବୋଲି ଚର୍ଚ୍ଚା ହେଉଛି। ଫେବୃଆରୀ ୨୦୨୬ରେ ଦିଲ୍ଲୀ ଅବକାରୀ ନୀତି ମାମଲାରେ ଅରବିନ୍ଦ କେଜ୍ରିୱାଲ ଏବଂ ମନୀଷ ସିସୋଦିଆ ଦୋଷମୁକ୍ତ ହେବା ପରେ ମଧ୍ୟ ସେ ସୋସିଆଲ ମିଡିଆରେ ସମ୍ପୂର୍ଣ୍ଣ ଚୁପ୍ ରହିଥିଲେ। ଏହାବ୍ୟତୀତ ନିକଟରେ ଦିଲ୍ଲୀର ଯନ୍ତରମନ୍ତର ଠାରେ ଆୟୋଜିତ ଜନସଭା ଏବଂ ପାର୍ଟି ମୁଖ୍ୟାଳୟରେ ହୋଇଥିବା ପ୍ରେସ୍‌ମିଟ୍‌ରେ ମଧ୍ୟ ସେ ଅନୁପସ୍ଥିତ ଥିଲେ।

ନୂତନ ଉପନେତା ଭାବେ ଦାୟିତ୍ୱ ଗ୍ରହଣ କରିବା ପରେ ଅଶୋକ ମିତ୍ତଲ ଏହି ବିବାଦକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ଏହା ଏକ ନିୟମିତ ପ୍ରକ୍ରିୟା ଏବଂ ପାର୍ଟି ସମସ୍ତଙ୍କୁ ସୁଯୋଗ ଦେବାରେ ବିଶ୍ୱାସ କରେ। ସଙ୍ଗଠନ ଭିତରେ ସବୁକିଛି ଠିକ୍ ଥିବା ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସ୍ପଷ୍ଟ କରିଛନ୍ତି।

୨୦୧୨ ମସିହାରେ ଆପ୍‌ ଗଠନ ହେବା ଦିନଠାରୁ ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ (CA) ଭାବେ ରାଘବ ଚଢ଼ା ପାର୍ଟିର ଏକ ଅବିଚ୍ଛେଦ୍ୟ ଅଙ୍ଗ ରହିଆସିଛନ୍ତି। ସେ ଆପ୍‌ର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା ରାଜନୈତିକ ବ୍ୟାପାର କମିଟି (PAC)ର ସଦସ୍ୟ, ପୂର୍ବତନ ଜାତୀୟ କୋଷାଧ୍ୟକ୍ଷ ଏବଂ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ଉପଦେଷ୍ଟା ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ବିରୋଧୀ ଇଣ୍ଡିଆ (INDIA) ମେଣ୍ଟ ଗଠନ ସମୟରେ ମଧ୍ୟ ସେ ପ୍ରମୁଖ ଭୂମିକା ଗ୍ରହଣ କରିଥିଲେ।

ପୂର୍ବରୁ ୨୦୨୪ ଲୋକସଭା ନିର୍ବାଚନ ଓ କେଜ୍ରିୱାଲଙ୍କ ଗିରଫଦାରୀ ସମୟରେ ଆଖି ଅସ୍ତ୍ରୋପଚାର ପାଇଁ ତାଙ୍କର ବ୍ରିଟେନ ଗସ୍ତ ଦଳ ଭିତରେ ଅନେକ ପ୍ରଶ୍ନବାଚୀ ସୃଷ୍ଟି କରିଥିଲା। ବର୍ତ୍ତମାନ ସେ ପଞ୍ଜାବର ସହ-ପ୍ରଭାରୀ ଭାବେ କାର୍ଯ୍ୟ କରୁଛନ୍ତି। ତେବେ ରାଜ୍ୟସଭା ଉପନେତା ପଦରୁ ବିଦା ହେବା ପରେ ଆପ୍‌ର ଆଭ୍ୟନ୍ତରୀଣ ସଙ୍ଗଠନରେ ରାଘବଙ୍କ ସ୍ଥିତି ଓ ପ୍ରଭାବ କେଉଁ ଆଡ଼କୁ ଯାଉଛି, ତାହା ଉପରେ ସମସ୍ତଙ୍କ ନଜର ରହିଛି।

ବଲିଉଡ୍ ଅଭିନେତ୍ରୀ ପରିଣୀତି ଚୋପ୍ରା (Parineeti Chopra) ନିଜ ସ୍ୱାମୀ ତଥା ଆମ୍ ଆଦମୀ ପାର୍ଟି (AAP) ସାଂସଦ ରାଘବ ଚଢ଼ା (Raghav Chadha)ଙ୍କୁ ନେଇ ଗର୍ବିତ ବୋଲି ପ୍ରକାଶ କରିଛନ୍ତି। ନିକଟରେ ସଂସଦରେ 'ପିତୃତ୍ୱ ଅବକାଶ' (Paternity Leave) କୁ ଏକ ଆଇନଗତ ଅଧିକାର ଭାବରେ ମାନ୍ୟତା ଦେବା ପ୍ରସଙ୍ଗରେ ରାଘବ ସ୍ୱର ଉଠାଇଥିଲେ। ଏହା ପରେ ପରିଣୀତି ନିଜ ଇନଷ୍ଟାଗ୍ରାମରେ ଏକ ଭାବପୂର୍ଣ୍ଣ ପୋଷ୍ଟ ଶେୟାର କରି ତାଙ୍କ ସ୍ୱାମୀଙ୍କ ଏହି ପ୍ରୟାସକୁ ଉଚ୍ଚ ପ୍ରଶଂସା କରିଛନ୍ତି।

ସଂସଦରେ ରାଘବ ଚଢ଼ାଙ୍କ ଯୁକ୍ତି

ରାଜ୍ୟସଭାରେ ଉଦବୋଧନ ଦେବାବେଳେ ରାଘବ ଚଢ଼ା ଦାବି କରିଥିଲେ ଯେ, ପିତାମାନଙ୍କ ପାଇଁ ପିତୃତ୍ୱ ଅବକାଶ ଏକ ଆଇନଗତ ଅଧିକାର ହେବା ଉଚିତ୍। ସେ କହିଥିଲେ ଯେ, "ଜଣେ ପିତା ନିଜର ନବଜାତ ଶିଶୁର ଯତ୍ନ ନେବା ଏବଂ ଚାକିରି ବଜାୟ ରଖିବା ମଧ୍ୟରୁ କେବଳ ଗୋଟିଏକୁ ବାଛିବା ଉଚିତ୍ ନୁହେଁ। ସେହିପରି ଜଣେ ମା' ନିଜ ସ୍ୱାମୀଙ୍କ ସମର୍ଥନ ବିନା ପ୍ରସବ ଏବଂ ଏଥିରୁ ସୁସ୍ଥ ହେବା କଷ୍ଟ ସହିବା ଉଚିତ୍ ନୁହେଁ।" ତାଙ୍କର ଏହି ପ୍ରସ୍ତାବ ଭାରତରେ ପିତାମାତାଙ୍କ ସମାନ ଦାୟିତ୍ୱବୋଧକୁ ନେଇ ଏକ ନୂଆ ବିତର୍କ ସୃଷ୍ଟି କରିଛି। ବର୍ତ୍ତମାନ କେବଳ କିଛି ସରକାରୀ କର୍ମଚାରୀଙ୍କୁ ୧୫ ଦିନର ପିତୃତ୍ୱ ଅବକାଶ ମିଳୁଥିବା ବେଳେ, ସମସ୍ତ କ୍ଷେତ୍ରରେ ଏହାକୁ ଲାଗୁ କରିବାକୁ ସେ ଦାବି କରିଛନ୍ତି।

'ପ୍ୟାରେଣ୍ଟିଂ ଏକ ମିଳିତ ଦାୟିତ୍ୱ' - ପରିଣୀତି

ରାଘବଙ୍କ ଏହି ପଦକ୍ଷେପକୁ ନେଇ ପରିଣୀତି ଚୋପ୍ରା ନିଜ ସୋସିଆଲ୍ ମିଡିଆ ହ୍ୟାଣ୍ଡେଲରେ ଏକ ଲମ୍ବା ନୋଟ୍ ଲେଖିଛନ୍ତି। ସେ ଲେଖିଛନ୍ତି, "ମୋର ପ୍ରିୟ ସ୍ୱାମୀ, ଆଜି ତୁମକୁ କେବଳ ଜଣେ ସାଂସଦ ଭାବରେ ନୁହେଁ ବରଂ ଆମ ପିଲାର ପିତା ଭାବରେ କହୁଥିବାର ଦେଖି ମୁଁ ବହୁତ ଗର୍ବିତ। ତୁମେ ବୁଝିଛ ଯେ ପିଲା ଲାଳନପାଳନ (Parenting) କେବଳ କାହାକୁ ଦିଆଯାଇଥିବା କାମ ନୁହେଁ, ଏହା ଏକ ମିଳିତ ଦାୟିତ୍ୱ।" ସୂଚନାଯୋଗ୍ୟ ଯେ, ଏହି ଦମ୍ପତି ନିଜର ପ୍ରଥମ ସନ୍ତାନ 'ନୀର' (Neer) କୁ ସ୍ୱାଗତ କରିଥିଲେ। ସେବେଠାରୁ ରାଘବ ଜଣେ ଦାୟିତ୍ୱବାନ ପିତା ଭାବରେ ନିଜର କର୍ତ୍ତବ୍ୟ ତୁଲାଉଥିବା ପରିଣୀତି ପ୍ରକାଶ କରିଛନ୍ତି।

ମା'ମାନଙ୍କ ଏକାକୀପଣ ଦୂର କରିବାର ପ୍ରୟାସ

ନିଜ ପୋଷ୍ଟରେ ପରିଣୀତି ଆହୁରି ମଧ୍ୟ ଉଲ୍ଲେଖ କରିଛନ୍ତି ଯେ, ସମାଜରେ ଏମିତି ଅନେକ ମା' ଅଛନ୍ତି ଯେଉଁମାନେ ପରିବାର କିମ୍ବା ସ୍ୱାମୀଙ୍କ ସମର୍ଥନ ବିନା ଏକୁଟିଆ ପିଲା ଛୁଆଙ୍କ ଦାୟିତ୍ୱ ନେଉଛନ୍ତି। ସଂସଦରେ ଏହି ପ୍ରସଙ୍ଗ ଉଠାଇ ରାଘବ ସେହି ମା'ମାନଙ୍କ ଏକାକୀପଣକୁ ସାମ୍ନାକୁ ଆଣିଛନ୍ତି ବୋଲି ପରିଣୀତି କହିଛନ୍ତି। ଯଦି ଏହି ପ୍ରସଙ୍ଗ ଆଗାମୀ ଦିନରେ ନୀତିଗତ ପରିବର୍ତ୍ତନ ଆଣେ, ତେବେ ଏହା ସମଗ୍ର ଦେଶର ମା' ଏବଂ ପରିବାର ପାଇଁ ଏକ ବଡ଼ ବିଜୟ ହେବ ବୋଲି ସେ ଆଶା ବ୍ୟକ୍ତ କରିଛନ୍ତି।

ନୂଆଦିଲ୍ଲୀ: ସାଧାରଣ ଜନତାଙ୍କ ମୋବାଇଲ୍ ରିଚାର୍ଜକୁ ନେଇ ସଂସଦରେ ବଡ଼ ପ୍ରସଙ୍ଗ ଉଠାଇଛନ୍ତି ଆମ୍ ଆଦମୀ ପାର୍ଟିର ସାଂସଦ ରାଘବ ଚଢା। ପ୍ରିପେଡ୍ ଗ୍ରାହକଙ୍କ ସହିତ ହେଉଥିବା ମନମାନୀ ଏବଂ ଟେଲିକମ୍ କମ୍ପାନୀଙ୍କ ପକ୍ଷରୁ କରାଯାଉଥିବା ଲୁଟ୍ ବିରୋଧରେ ସେ ସ୍ୱର ଉତ୍ତୋଳନ କରିଛନ୍ତି। ସେ କହିଛନ୍ତି ଯେ ଆଜିକାଲିର ଦୁନିଆରେ ମୋବାଇଲ୍ ସେବା କୌଣସି ବିଳାସପୂର୍ଣ୍ଣ ବସ୍ତୁ ନୁହେଁ ବରଂ ଏହା ଏକ ଅପରିହାର୍ଯ୍ୟ ଆବଶ୍ୟକତା ପାଲଟିଛି।

ସଂସଦରେ ନିଜର ବକ୍ତବ୍ୟ ରଖି ସେ କହିଛନ୍ତି ଯେ ଯଦି ଜଣେ ଗ୍ରାହକଙ୍କ ରିଚାର୍ଜ ଅବଧି ଶେଷ ହୋଇଯାଉଛି, ତେବେ ଆଉଟଗୋଇଙ୍ଗ୍ କଲ୍ ବନ୍ଦ ହେବା କଥା ବୁଝାପଡ଼େ। କିନ୍ତୁ ରିଚାର୍ଜ ସରିବା ମାତ୍ରେ ଇନକମିଙ୍ଗ୍ କଲ୍ ବନ୍ଦ କରିଦେବା ସଂପୂର୍ଣ୍ଣ ଭାବେ ଅନ୍ୟାୟ। ଏହାଦ୍ୱାରା ଜଣେ ବ୍ୟକ୍ତି ସହିତ କେହି ଯୋଗାଯୋଗ କରିପାରନ୍ତି ନାହିଁ। ଏପରିକି ବ୍ୟାଙ୍କିଙ୍ଗ୍ କାରବାର ପାଇଁ ଆସୁଥିବା ଓଟିପି ମଧ୍ୟ ବନ୍ଦ ହୋଇଯାଏ, ଯାହା ବିପଦ ସମୟରେ ଜଣେ ସାଧାରଣ ମଣିଷକୁ ସମ୍ପୂର୍ଣ୍ଣ ବେସାହାରା କରିଦିଏ।

Prepaid Recharge Customers के साथ हो रही लूट का मुद्दा आज मैंने Parliament में उठाया।

(a) अगर आपका recharge खत्म हो जाए तो Outgoing Calls बंद होना समझ में आता है, लेकिन Incoming Calls बंद करना मनमानी है।रिचार्ज खत्म होते ही न कोई आपसे संपर्क कर सकता है और न ही आपके फोन पर OTP… pic.twitter.com/VU0LuRohKK

— Raghav Chadha (@raghav_chadha) March 11, 2026

୨୮ ଦିନିଆ ରିଚାର୍ଜ ଯୋଜନାକୁ ସ୍କାମ କହିଲେ ସାଂସଦ

ରାଘବ ଚଢା ଆହୁରି ମଧ୍ୟ କହିଛନ୍ତି ଯେ ୨୮ ଦିନିଆ ରିଚାର୍ଜ ପ୍ଲାନ୍ ଏକ ପ୍ରକାରର ଠକାମି ବା ସ୍କାମ। ବର୍ଷକୁ ୧୨ଟି ମାସ ଥାଏ, କିନ୍ତୁ ଗ୍ରାହକଙ୍କୁ ବର୍ଷକରେ ୧୩ ଥର ରିଚାର୍ଜ କରିବାକୁ ପଡ଼ୁଛି। ୨୮ ଦିନକୁ ଗୋଟିଏ ମାସ ହିସାବରେ ଗଣତି କରାଯିବା ଦ୍ୱାରା ବର୍ଷକରେ ଜଣେ ଗ୍ରାହକ ଅତିରିକ୍ତ ଥରକର ଖର୍ଚ୍ଚ ବହନ କରୁଛନ୍ତି। ଟେଲିକମ୍ କମ୍ପାନୀଗୁଡିକ ରିଚାର୍ଜ ବୈଧତାକୁ କ୍ୟାଲେଣ୍ଡର ମାସ ଅର୍ଥାତ୍ ୩୦ ରୁ ୩୧ ଦିନ ଅନୁସାରେ ନିର୍ଦ୍ଧାରଣ କରିବା ଉଚିତ ବୋଲି ସେ ଦାବି କରିଛନ୍ତି। ଟେଲିକମ୍ କମ୍ପାନୀମାନେ ଗ୍ରାହକଙ୍କ ପ୍ରତି ଏକ ନ୍ୟାୟପୂର୍ଣ୍ଣ ଏବଂ ସ୍ୱଚ୍ଛ ମନୋଭାବ ରଖିବା ଆବଶ୍ୟକ। ସାଧାରଣ ନାଗରିକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏହି ପ୍ରସଙ୍ଗରେ କଡ଼ା ନିଷ୍ପତ୍ତି ନେବା ପାଇଁ ସେ ସରକାରଙ୍କ ନିକଟରେ ଦାବି ଜଣାଇଛନ୍ତି।

ନୂଆଦିଲ୍ଲୀ: ଦିଲ୍ଲୀର ବହୁଚର୍ଚ୍ଚିତ ଅବକାରୀ ଦୁର୍ନୀତି ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ବଡ଼ ଆଶ୍ୱସ୍ତି ମିଳିଛି। ଶୁକ୍ରବାର ଦିନ ଦିଲ୍ଲୀର ରାଉଜ ଆଭେନ୍ୟୁ କୋର୍ଟ ଉଭୟ ନେତାଙ୍କୁ ଏହି ମାମଲାରୁ ଦୋଷମୁକ୍ତ (Discharge) କରିଛନ୍ତି। କୋର୍ଟଙ୍କ ରାୟ ଶୁଣିବା ପରେ ଅରବିନ୍ଦ କେଜ୍ରିୱାଲ କୋର୍ଟ ରୁମରେ ଭାବବିହ୍ୱଳ ହୋଇପଡିଥିଲେ।

ବଡ଼ ଖବର: ଅବକାରୀ ଦୁର୍ନୀତି ମାମଲାରେ ଅରବିନ୍ଦ କେଜ୍ରିୱାଲ ଓ ମନୀଷ ସିସୋଦିଆଙ୍କୁ ନିର୍ଦ୍ଦୋଷରେ ଖଲାସ କଲେ କୋର୍ଟ। ରାୟ ଶୁଣିବା ପରେ ଭାବୁକ ହେଲେ କେଜ୍ରିୱାଲ। #ArvindKejriwal #ManishSisodia #DelhiExcisePolicy #AAP #LegalVictory #OdiaNews pic.twitter.com/Ao3KVuXM4r

— Sakala News (@SakalaNews) February 27, 2026

ନ୍ୟାୟିକ ଯାଞ୍ଚରେ ତିଷ୍ଠି ପାରିଲାନି ଅଭିଯୋଗ

କୋର୍ଟ ତାଙ୍କ ରାୟରେ ସ୍ପଷ୍ଟ କରିଛନ୍ତି ଯେ ସିବିଆଇ ଦ୍ୱାରା ଅଣାଯାଇଥିବା ଷଡଯନ୍ତ୍ରର ଅଭିଯୋଗଗୁଡିକ ନ୍ୟାୟିକ ଯାଞ୍ଚରେ ପ୍ରମାଣିତ ହୋଇପାରିନାହିଁ। କୋର୍ଟ କହିଛନ୍ତି ଯେ ମନୀଷ ସିସୋଦିଆଙ୍କ ପକ୍ଷରୁ କୌଣସି "ଅପରାଧିକ ଉଦ୍ଦେଶ୍ୟ" ଥିବାର ପ୍ରମାଣ ମିଳିନାହିଁ। ଏହା ସହିତ କୋର୍ଟ ଉଲ୍ଲେଖ କରିଛନ୍ତି ଯେ କୌଣସି ସାମ୍ବିଧାନିକ କର୍ତ୍ତୃପକ୍ଷଙ୍କ ବିରୋଧରେ କେବଳ ଷଡଯନ୍ତ୍ରର ତତ୍ତ୍ୱ ଉପରେ ଆଧାର କରି ମାମଲା ଚାଲିପାରିବ ନାହିଁ। ଏହି ରାୟ ପରେ କେଜ୍ରିୱାଲଙ୍କ ପତ୍ନୀ ସୁନିତା କେଜ୍ରିୱାଲ ସୋସିଆଲ ମିଡିଆରେ ଲେଖିଛନ୍ତି, "ଏହି ଦୁନିଆରେ କେହି ଯେତେ ଶକ୍ତିଶାଳୀ ହେଲେ ମଧ୍ୟ ଶିବ ଶକ୍ତିଙ୍କ ଠାରୁ ଉର୍ଦ୍ଧ୍ୱରେ ନୁହନ୍ତି। ସତ୍ୟର ସର୍ବଦା ଜୟ ହୁଏ।"

ସିବିଆଇ ଅଭିଯୋଗ କରିଥିଲା ଯେ ଅବକାରୀ ନୀତିକୁ ନିଜ ସପକ୍ଷରେ ନେବା ପାଇଁ 'ସାଉଥ୍ ଗ୍ରୁପ୍' ପକ୍ଷରୁ ୧୦୦ କୋଟି ଟଙ୍କା ପ୍ରଦାନ କରାଯାଇଥିଲା। ଏହି ମାମଲାରେ ସମୁଦାୟ ୨୩ ଜଣଙ୍କ ବିରୋଧରେ ଚାର୍ଜସିଟ୍ ଦାଖଲ କରାଯାଇଥିଲା। ତେବେ କେଜ୍ରିୱାଲଙ୍କ ଓକିଲ ଏନ୍ ହରିହରନ୍ ଯୁକ୍ତି ଦର୍ଶାଇଥିଲେ ଯେ ତାଙ୍କ ମହକିଲଙ୍କ ବିରୋଧରେ କୌଣସି ପ୍ରତ୍ୟକ୍ଷ ପ୍ରମାଣ ନାହିଁ। ସେ କହିଥିଲେ ଯେ କେଜ୍ରିୱାଲ କେବଳ ଜଣେ ମୁଖ୍ୟମନ୍ତ୍ରୀ ଭାବରେ ନିଜର ସରକାରୀ ଦାୟିତ୍ୱ ତୁଲାଉଥିଲେ ଏବଂ ତାଙ୍କ ନାମ ପ୍ରାଥମିକ ଚାର୍ଜସିଟରେ ମଧ୍ୟ ନଥିଲା। ଉଭୟ ପକ୍ଷର ଯୁକ୍ତି ଶୁଣିବା ପରେ କୋର୍ଟ ଉପଯୁକ୍ତ ପ୍ରମାଣ ଅଭାବରୁ କେଜ୍ରିୱାଲ ଓ ସିସୋଦିଆଙ୍କୁ ମାମଲାରୁ ମୁକ୍ତ କରିଛନ୍ତି।

ଭୁବନେଶ୍ବର: ବାରବାଟୀ ଏକଦିବସୀୟ କ୍ରିକେଟ ମ୍ୟାଚରେ ବିଭ୍ରାଟ ନେଇ ରାଜ୍ୟ ସରକାରଙ୍କୁ କଡା ସମାଲୋଚନା କରିଛି ଆମ ଆଦମୀ ପାର୍ଟି । ସାମ୍ବାଦିକ ସମ୍ମିଳନୀରେ କଡା ସମାଲୋଚନା କରିଛି ଆମ ଆଦମୀ ପାର୍ଟି। ମ୍ୟାଚ ସମୟରେ ଫ୍ଲଡ ଲାଇଟ ବନ୍ଦ ହେବା ଘଟଣାର ନିନ୍ଦା କରିଛି ଦଳ । ଷ୍ଟାଡିୟମରେ କାହିଁକି ବ୍ୟାକ୍ ଅପ୍ ନଥିଲା ବୋଲି ପ୍ରଶ୍ନ କରିଛି । ଏହାସହ ଟିକେଟ କଳାବଜାରୀ ପ୍ରସଙ୍ଗରେ ବି ରାଜ୍ଯ ସରକାରଙ୍କୁ ଘେରିଛି ଆପ୍। ବିଜେପି ନିଜ ନିଜ ଲୋକଙ୍କୁ ପାସ୍ ବାଣ୍ଟିଦେଇଥିବାରୁ ଅନେକ କ୍ରିକେଟ ପ୍ରେମୀ ମ୍ୟାଚ ଦେଖିବାରୁ ବଞ୍ଚିତ ହୋଇଛନ୍ତି । ୨ ଗୁଣା ଦରରେ ଟିକଟ କଳାବଜାରୀ ହୋଇଛି। ମୁଖ୍ୟମନ୍ତ୍ରୀ ଏଦିଗରେ କାର୍ଯ୍ୟାନୁଷ୍ଠାନ ନିଅନ୍ତୁ । ଏହାର ତଦନ୍ତ ପାଇଁ ସ୍ପେଶାଲ ତଦନ୍ତ ଦଳ ଗଠନ କରିବାକୁ ଦାବି କରିଛି ଆପ୍ ।

ଏଭଳି ଘଟଣା ପାଇଁ ଭାରତକୁ ପାକିସ୍ତାନ ମିଡିଆ ବି ସମାଲୋଚନା କରିଛି । କ୍ରୀଡା ମନ୍ତ୍ରୀ ଶସ୍ତା ହାଲୁକା ମନ୍ତବ୍ୟ ଦେଇ ଖସିଯିବାକୁ ବସିଛନ୍ତି । ଏହା ସଂପୂର୍ଣ୍ଣ ରାଜ୍ୟ ସରକାରଙ୍କ ଅପାରଗତା । ଖେଳ ପୂର୍ବରୁ ମନ୍ତ୍ରୀ ନିଜେ ସମୀକ୍ଷା କରିଥିଲେ। ସେତେବେଳେ ସେ ବ୍ୟାକଅପ୍ କଥା ଭାବିନଥିଲେ କାହିଁକି ? ତେଣୁ କ୍ରୀଡାମନ୍ତ୍ରୀ ସୂର୍ଯ୍ୟବଂଶୀ ସୂରଜ ତୁରନ୍ତ ଇସ୍ତଫା ଦିଅନ୍ତୁ ବୋଲି ଆପ୍ ଦାବି କରିଛି।