କ୍ୟାନ୍ସର ବା କର୍କଟ ରୋଗର ନାଁ ଶୁଣିଲେ ହିଁ ଲୋକଙ୍କ ମନରେ ଛନକା ପଶିଯାଏ। ତେବେ ଚିକିତ୍ସା ବିଜ୍ଞାନର ଅଗ୍ରଗତି ସହ ବର୍ତ୍ତମାନ ଅନେକ କ୍ଷେତ୍ରରେ କ୍ୟାନ୍ସରର ସଫଳ ଚିକିତ୍ସା ସମ୍ଭବ ହୋଇପାରୁଛି। କିନ୍ତୁ ଆପଣ ଜାଣନ୍ତି କି, କ୍ୟାନ୍ସର ମଧ୍ୟରେ ସବୁଠାରୁ ବିପଜ୍ଜନକ କ୍ୟାନ୍ସର କେଉଁଟି? ଏବଂ ଏଥିରେ ରୋଗୀ ବଞ୍ଚିବାର ସମ୍ଭାବନା କେତେ ଥାଏ? ବିଶେଷଜ୍ଞଙ୍କ ମତରେ, କର୍କଟ ରୋଗର ଭୟାବହତା ଏହାର 'ଷ୍ଟେଜ୍' ବା ପର୍ଯ୍ୟାୟ ଉପରେ ନିର୍ଭର କରେ, ତଥାପି କିଛି ନିର୍ଦ୍ଦିଷ୍ଟ କ୍ୟାନ୍ସରକୁ ଅତ୍ୟନ୍ତ ଘାତକ ବୋଲି ବିବେଚନା କରାଯାଏ।

ସବୁଠାରୁ ବିପଜ୍ଜନକ କ୍ୟାନ୍ସର କେଉଁଟି?

ଡାକ୍ତରଙ୍କ ମତରେ, ପାନକ୍ରିଏଟିକ୍ କ୍ୟାନ୍ସର (Pancreatic Cancer) ବା ଅଗ୍ନାଶୟ କର୍କଟକୁ ସବୁଠାରୁ ବିପଜ୍ଜନକ ବୋଲି ଧରାଯାଏ। ଏହାକୁ ଅନେକ ସମୟରେ "ସାଇଲେଣ୍ଟ କିଲର" ମଧ୍ୟ କୁହାଯାଏ। କାରଣ ଏହି ରୋଗର ପ୍ରାରମ୍ଭିକ ଲକ୍ଷଣ ସହଜରେ ଜଣାପଡ଼େ ନାହିଁ। ଯେତେବେଳେ ରୋଗୀ ପାଖରେ ଲକ୍ଷଣ ଦେଖାଯାଏ, ସେତେବେଳକୁ କ୍ୟାନ୍ସର ଶରୀରର ଅନ୍ୟ ଅଙ୍ଗକୁ ବ୍ୟାପି ସାରିଥାଏ। ଏହି କାରଣରୁ ଏହାର ଚିକିତ୍ସା କଷ୍ଟକର ହୋଇପଡ଼େ।

ବଞ୍ଚିବାର ସମ୍ଭାବନା କେତେ?

କ୍ୟାନ୍ସରର ପ୍ରକାର ଏବଂ ଏହା କେଉଁ ଷ୍ଟେଜରେ ଚିହ୍ନଟ ହେଉଛି, ତାହା ଉପରେ ରୋଗୀର ବଞ୍ଚିବା ସମ୍ଭାବନା ନିର୍ଭର କରେ। ରିପୋର୍ଟ ଅନୁଯାୟୀ:

* ପାନକ୍ରିଏଟିକ୍ କ୍ୟାନ୍ସର: ଏଥିରେ ୫ ବର୍ଷ ପର୍ଯ୍ୟନ୍ତ ବଞ୍ଚିବାର ହାର (Survival Rate) ଖୁବ୍ କମ୍, ଯାହା ପ୍ରାୟ ୫% ରୁ ୧୦% ମଧ୍ୟରେ ରହିଥାଏ।

* ଫୁସଫୁସ କ୍ୟାନ୍ସର: ଭାରତରେ ଫୁସଫୁସ କ୍ୟାନ୍ସର ମଧ୍ୟ ଖୁବ୍ ଘାତକ ସାବ୍ୟସ୍ତ ହୋଇଥାଏ, ଯେଉଁଥିରେ ବଞ୍ଚିବାର ହାର ୧୫% ରୁ କମ୍ ଥାଏ।

* ମୁଖ ଗହ୍ଵର କ୍ୟାନ୍ସର: ଯଦି ପ୍ରାଥମିକ ପର୍ଯ୍ୟାୟରେ ଚିହ୍ନଟ ହୁଏ, ତେବେ ବଞ୍ଚିବାର ସମ୍ଭାବନା ୮୦%ରୁ ଅଧିକ ଥାଏ। କିନ୍ତୁ ବିଳମ୍ବରେ ଚିହ୍ନଟ ହେଲେ ଏହା ୩୦%କୁ ଖସିଆସେ।

ଠିକ୍ ସମୟରେ ଚିକିତ୍ସା ଜରୁରୀ

ଡାକ୍ତରମାନେ ପରାମର୍ଶ ଦିଅନ୍ତି ଯେ, କ୍ୟାନ୍ସରକୁ ମାତ୍ ଦେବା ପାଇଁ 'ଅର୍ଲି ଡିଟେକ୍ସନ୍' ବା ପ୍ରାରମ୍ଭିକ ଚିହ୍ନଟ ସବୁଠାରୁ ଗୁରୁତ୍ୱପୂର୍ଣ୍ଣ। ଯଦି ପ୍ରଥମ କିମ୍ବା ଦ୍ୱିତୀୟ ଷ୍ଟେଜରେ ରୋଗ ଚିହ୍ନଟ ହୁଏ, ତେବେ ରୋଗୀ ସୁସ୍ଥ ହେବାର ଯଥେଷ୍ଟ ସମ୍ଭାବନା ଥାଏ। ଶରୀରରେ କୌଣସି ଅସ୍ୱାଭାବିକ ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରିବା ଉଚିତ୍।

ଆଜିକାଲିର ଜୀବନଶୈଳୀରେ ପରଫ୍ୟୁମ ବା ସୁଗନ୍ଧିତ ଦ୍ରବ୍ୟର ବ୍ୟବହାର ଏକ ସାଧାରଣ କଥା ହୋଇଗଲାଣି। ନିଜକୁ ସତେଜ ରଖିବା ଏବଂ ଅନ୍ୟମାନଙ୍କ ଆଗରେ ଆକର୍ଷଣୀୟ ଦେଖାଯିବା ପାଇଁ ଲୋକମାନେ ଦାମୀ ପରଫ୍ୟୁମ ବ୍ୟବହାର କରନ୍ତି। କିନ୍ତୁ ଆପଣ ଜାଣନ୍ତି କି, ଆବଶ୍ୟକତାଠାରୁ ଅଧିକ ପରଫ୍ୟୁମ ବ୍ୟବହାର କରିବା ଦ୍ୱାରା ଆପଣଙ୍କ ସ୍ୱାସ୍ଥ୍ୟ ଉପରେ ଏହାର ଗୁରୁତର ପ୍ରଭାବ ପଡ଼ିପାରେ? ବିଶେଷଜ୍ଞଙ୍କ ମତରେ, ଅତ୍ୟଧିକ ସୁଗନ୍ଧିତ ଦ୍ରବ୍ୟର ବ୍ୟବହାର କେବଳ ତ୍ୱଚା ନୁହେଁ ବରଂ ଶ୍ୱାସକ୍ରିୟା ଏବଂ ହରମୋନ୍ ଉପରେ ମଧ୍ୟ କୁପ୍ରଭାବ ପକାଇଥାଏ।

ମୁଣ୍ଡବିନ୍ଧା ଏବଂ ମାଇଗ୍ରେନ୍ ସମସ୍ୟା

ଯଦି ଆପଣ ନିୟମିତ ଭାବରେ କଡ଼ା ବାସ୍ନା ଥିବା ପରଫ୍ୟୁମ ବ୍ୟବହାର କରୁଛନ୍ତି, ତେବେ ଏହା ମାଇଗ୍ରେନ୍ ବା ଅଧକପାଳି ମୁଣ୍ଡବିନ୍ଧାର କାରଣ ହୋଇପାରେ। ପରଫ୍ୟୁମରେ ଥିବା ତୀବ୍ର ରାସାୟନିକ ଗନ୍ଧ ସ୍ନାୟୁକୁ ଉତ୍ତେଜିତ କରିଥାଏ, ଯାହା ଫଳରେ ମୁଣ୍ଡ ଭାରି ଲାଗିବା ସହ ବାନ୍ତି ଲାଗିବା ଭଳି ଲକ୍ଷଣ ଦେଖାଦେଇପାରେ।

ଶ୍ୱାସକ୍ରିୟାରେ ଅସୁବିଧା

ଅତ୍ୟଧିକ ପରଫ୍ୟୁମ ବ୍ୟବହାର କରିବା ଦ୍ୱାରା ଶ୍ୱାସଜନିତ ସମସ୍ୟା ସୃଷ୍ଟି ହେବାର ଆଶଙ୍କା ରହିଥାଏ। ବିଶେଷକରି ଯେଉଁମାନଙ୍କର ଆଜମା (Asthma) ବା ସାଇନସ୍ ସମସ୍ୟା ରହିଛି, ସେମାନଙ୍କ ପାଇଁ ଏହା ଅଧିକ ବିପଜ୍ଜନକ ହୋଇପାରେ। ପରଫ୍ୟୁମରେ ଥିବା ସିନ୍ଥେଟିକ୍ ଉପାଦାନ ଫୁସଫୁସକୁ କ୍ଷତି ପହଞ୍ଚାଇପାରେ ଏବଂ ନିଶ୍ୱାସ ନେବାରେ କଷ୍ଟ ଅନୁଭବ ହୋଇପାରେ।

ତ୍ୱଚା ପାଇଁ କ୍ଷତିକାରକ

ଅନେକ ପରଫ୍ୟୁମରେ ଆଲକୋହଲ୍ ଏବଂ ଅନ୍ୟାନ୍ୟ କ୍ଷତିକାରକ ରାସାୟନିକ ପଦାର୍ଥ ରହିଥାଏ। ଏହାକୁ ସିଧାସଳଖ ତ୍ୱଚାରେ ଲଗାଇବା ଦ୍ୱାରା ଚର୍ମରେ ଜଳାପୋଡ଼ା, ଲାଲ ପଡ଼ିବା କିମ୍ବା କୁଣ୍ଡାଇ ହେବା ଭଳି ଆଲର୍ଜି ଦେଖାଦେଇପାରେ। ଯେଉଁମାନଙ୍କର ତ୍ୱଚା ସମ୍ବେଦନଶୀଳ (Sensitive Skin), ସେମାନେ ପରଫ୍ୟୁମ ବ୍ୟବହାର କରିବା ପୂର୍ବରୁ ସତର୍କ ରହିବା ଉଚିତ୍।

ହରମୋନ୍ ସନ୍ତୁଳନ ବିଗାଡ଼ିପାରେ

ଗବେଷଣାରୁ ଜଣାପଡ଼ିଛି ଯେ, କିଛି ଶସ୍ତା ଏବଂ କଡ଼ା ପରଫ୍ୟୁମରେ 'ଥାଲେଟ୍ସ' (Phthalates) ନାମକ ଏକ ରାସାୟନିକ ପଦାର୍ଥ ଥାଏ। ଏହା ଶରୀରର ହରମୋନ୍ ସନ୍ତୁଳନକୁ ବିଗାଡ଼ିପାରେ, ଯାହା ଭବିଷ୍ୟତରେ ପ୍ରଜନନ ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇବାର ସମ୍ଭାବନା ଥାଏ। ତେଣୁ ପରଫ୍ୟୁମ କିଣିବା ସମୟରେ ଏହାର ଗୁଣବତ୍ତା ଯାଞ୍ଚ କରିବା ନିହାତି ଜରୁରୀ।

କିପରି କରିବେ ସଠିକ୍ ବ୍ୟବହାର?

ପରଫ୍ୟୁମକୁ ସିଧାସଳଖ ଶରୀରରେ ନ ଲଗାଇ କପଡ଼ା ଉପରେ ଲଗାଇବାକୁ ଚେଷ୍ଟା କରନ୍ତୁ। ଯଦି ଶରୀରରେ ଲଗାଉଛନ୍ତି, ତେବେ କେବଳ 'ପଲସ୍ ପଏଣ୍ଟ' ଯଥା- ବେକ, କଚଟି ଏବଂ କାନ ପଛରେ ଅଳ୍ପ ମାତ୍ରାରେ ଲଗାନ୍ତୁ। ପ୍ରାକୃତିକ ଉପାଦାନରେ ତିଆରି ହୋଇଥିବା ପରଫ୍ୟୁମ ବ୍ୟବହାର କରିବା ସ୍ୱାସ୍ଥ୍ୟ ପାଇଁ ଅଧିକ ନିରାପଦ।

ଭୁବନେଶ୍ବର: ସରକାରୀ ସ୍ୱାସ୍ଥ୍ୟ ବ୍ୟବସ୍ଥା ଉପରେ ଲୋକଙ୍କ ଭରଷା ବଢିଛି ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି। ଆଜି ଭିଡିଓ କନ୍‌ଫରେନ୍‌ସ ଜରିଆରେ ସାରା ରାଜ୍ୟରେ ସ୍ୱାସ୍ଥ୍ୟ ଭିତ୍ତିଭୂମି ପ୍ରକଳ୍ପର ଶୁଭାରମ୍ଭ କରିବା ଅବସରରେ ମୁଖ୍ୟମନ୍ତ୍ରୀ ଏହା କହିଛନ୍ତି।

ମୁଖ୍ୟମନ୍ତ୍ରୀ ଆଜି ସାରା ରାଜ୍ୟରେ ୧୧୪୦ କୋଟି ଟଙ୍କାର ସ୍ୱାସ୍ଥ୍ୟ ଭିତ୍ତିଭୂମି ପ୍ରକଳ୍ପର ଶୁଭାରମ୍ଭ କରିଛନ୍ତି। ୧୪୦ କୋଟି ଟଙ୍କା ବିନିଯୋଗରେ ୧୦୩ଟି ପ୍ରକଳ୍ପ ଉଦ୍‌ଘାଟନ କରିଥିବାବେଳେ ୧୦୦୦ କୋଟି ଟଙ୍କା ବ୍ୟୟରେ ୩୭୨ଟି ପ୍ରକଳ୍ପ ପାଇଁ ଭିତ୍ତିପ୍ରସ୍ତର ସ୍ଥାପନ କରିଛନ୍ତି।

ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ ସ୍ୱାସ୍ଥ୍ୟସେବା କ୍ଷେତ୍ରରେ 5T ଉପକ୍ରମରେ ବିଭନ୍ନ ପଦକ୍ଷେପ ଦ୍ୱାରା ସରକାରୀ ହସ୍ପିଟାଲଗୁଡିକରେ ରୂପାନ୍ତର ଆସିପାରିଛି। ଏହା ଦ୍ୱାରା ସରକାରୀ ସ୍ୱାସ୍ଥ୍ୟ ବ୍ୟବସ୍ଥା ଉପରେ ଲୋକଙ୍କ ଭରଷା ବଢିଛି।

ମୁଖ୍ୟମନ୍ତ୍ରୀ ପୁଣି କହିଥିଲେ ଯେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଲୋକଙ୍କ ପାଇଁ ଆଶୀର୍ବାଦ ହୋଇଛି। ଲୋକମାନେ ସୁବିଧାରେ ବିନା ଖର୍ଚ୍ଚରେ ଉତ୍ତମ ସ୍ୱାସ୍ଥ୍ୟସେବା ପାଉଛନ୍ତି। ପ୍ରତି ମାସରେ ୧ ଲକ୍ଷରୁ ଅଧିକ ରୋଗୀ ଚିକିତ୍ସା ସୁବିଧା ପାଉଛନ୍ତି। ଲୋକଙ୍କୁ ଉତ୍ତମ ସ୍ୱାସ୍ଥ୍ୟସେବା ଯୋଗାଇଦେବା ପାଇଁ ଏହା ଆମ ପ୍ରତିବଦ୍ଧତାର ପ୍ରତିଫଳନ। ସ୍ୱାସ୍ଥ୍ୟସେବା କ୍ଷେତ୍ରରେ ଓଡିଶାକୁ ଏକ ରୋଲ୍ ମଡେଲ୍ କରିବା ଆମର ଲକ୍ଷ୍ୟ ବୋଲି ମୁଖ୍ୟମନ୍ତ୍ରୀ କହିଥିଲେ।

ଆଜିର ପ୍ରକଳ୍ପଗୁଡିକ ସ୍ୱାସ୍ଥ୍ୟ ଭିତ୍ତିଭୂମି କ୍ଷେତ୍ରରେ ଏକ ବଡ ପରିବର୍ତ୍ତନ ଆଣିବ ବୋଲି ମତ ଦେଇ ମୁଖ୍ୟମନ୍ତ୍ରୀ କହିଥିଲେ ଯେ ଆମର ଲକ୍ଷ୍ୟ ହେଉଛି ‘ସୁସ୍ଥ ଓଡିଶା ସୁଖୀ ଓଡିଶା’। ରାଜ୍ୟର ସବୁ ଲୋକ ଯେପରି ସୁବିଧାରେ ଉତ୍ତମ ସେବା ପାଇପାରିବେ ସେ ଦିଗରେ ଆମେ କାମ କରୁଛୁ । ରାଜ୍ୟର ସରକାରୀ ହସ୍ପିଟାଲଗୁଡିକର ଭିତ୍ତିଭୂମିରେ ବହୁତ ପରିବର୍ତ୍ତନ ଆସିଛି ବୋଲି ପ୍ରକାଶ କରି କହିଥିଲେ ଯେ ଏସ୍.ସି.ବି. ମେଡିକାଲ୍ କଲେଜ୍‌କୁ ବିଶ୍ୱସ୍ତରୀୟ କରିବା ପାଇଁ କାମ ଚାଲିଛି। ନୂଆ ନୂଆ ମେଡିକାଲ କଲେଜ୍ ଖୋଲୁଛି। ବିଭିନ୍ନ ହସ୍ପିଟାଲରେ ନୂଆ ସୁବିଧାର ବିକାଶ ହେଉଛି। ନିୟମିତ ଭାବେ ଡାକ୍ତର ଓ ସହାୟକ କର୍ମଚାରୀ ପଦବୀ ପୂରଣ ହେଉଛି। ମୁଖ୍ୟମନ୍ତ୍ରୀ ସ୍ୱାସ୍ଥ୍ୟସେବା ମିଶନରେ ଭିତ୍ତିଭୂମି ବିକାଶ କାମ ଜାରି ରହିଛି। ଗତ ୫ ବର୍ଷରେ ସ୍ୱାସ୍ଥ୍ୟ ଭିତ୍ତିଭୂମିର ବିକାଶ ପାଇଁ ୧୨ ହଜାର କୋଟି ଟଙ୍କା ଖର୍ଚ୍ଚ କରାଯାଇଛି ବୋଲି ପ୍ରକାଶ କରି ମୁଖ୍ୟମନ୍ତ୍ରୀ କହିଥିଲେ ଯେ ରାଜ୍ୟର ସବୁ ସ୍ତରରେ- ପ୍ରାଥମିକ ସ୍ୱାସ୍ଥ୍ୟ, ଗୋଷ୍ଠୀ ସ୍ୱାସ୍ଥ୍ୟ ଓ ଜିଲ୍ଲା ସ୍ୱାସ୍ଥ୍ୟ ସେବା ବ୍ୟବସ୍ଥାକୁ ସୁଦୃଢ କରିବା ଆମର ଲକ୍ଷ୍ୟ।

ଏହି ଅବସରରେ ମୁଖ୍ୟମନ୍ତ୍ରୀ ରାଜ୍ୟ ବାହାରେ ରହୁଥିବା ଓଡିଆ ଲୋକଙ୍କ ପାଇଁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ଏକ ସ୍ୱତନ୍ତ୍ର ହେଲ୍‌ପ ଲାଇନ୍‌- ୧୮୦୦ ୧୨୦ ୧୨୦ ୧୦୪ ଆରମ୍ଭ କରିଥିଲେ। ମୁଖ୍ୟମନ୍ତ୍ରୀ କହିଥିଲେ ଯେ ‘ଆମ ପାଇଁ ପ୍ରତି ଜୀବନ ମୂଲ୍ୟବାନ’। ଏହି ମନ୍ତ୍ରକୁ ଆଗରେ ରଖି କାମ କରୁଛୁ ଓ କରି ଚାଲିବୁ ବୋଲି ସେ କହିଥିଲେ।

ଏହି କାର୍ଯ୍ୟକ୍ରମରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନିରଞ୍ଜନ ପୂଜାରୀ ଯୋଗଦେଇ କହିଥିଲେ ଯେ ଗତ ଦୁଇ ଦଶନ୍ଧି ମଧ୍ୟରେ ମୁଖ୍ୟମନ୍ତ୍ରୀଙ୍କ ନେତୃତ୍ୱ ଓ ଦିଗ୍‌ଦର୍ଶନରେ ରାଜ୍ୟରେ ସ୍ୱାସ୍ଥ୍ୟସେବା କ୍ଷେତ୍ରରେ ଉଲ୍ଲେଖନୀୟ ପରିବର୍ତ୍ତନ ଆସିଛି। ଆଜି ଆମ ରାଜ୍ୟ ଶିଶୁ ଓ ମାତୃ ମୃତ୍ୟୁହାର ହ୍ରାସ କ୍ଷେତ୍ରରେ ଏକ ଅଗ୍ରଣୀ ରାଜ୍ୟ। ମେଲେରିଆ ଓ ଯକ୍ଷ୍ମା ନିରାକରଣ କ୍ଷେତ୍ରରେ ମଧ୍ୟ ଆମେ ଆଗୁଆ ରହିଛୁ। ମୁଖ୍ୟମନ୍ତ୍ରୀଙ୍କର ପରିକଳ୍ପିତ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଆଜି ଦେଶରେ ଯୁଗାନ୍ତକାରୀ ସାବ୍ୟସ୍ତ ହୋଇଛି। ମୁଖ୍ୟମନ୍ତ୍ରୀଙ୍କ ସୁସ୍ଥ ଓଡିଶା ସୁଖୀ ଓଡିଶା ଓ ପ୍ରତି ଜୀବନ ମୂଲ୍ୟବାନ ନୀତିକୁ ଆଧାର କରି ଆମେ ରାଜ୍ୟବାସୀଙ୍କୁ ଉତ୍ତମ ସ୍ୱାସ୍ଥ୍ୟସେବା ଯୋଗାଇବା କ୍ଷେତ୍ରରେ ଆଗକୁ ବଢୁଛୁ।

5T ତଥା ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ କାର୍ଯ୍ୟକ୍ରମ ସଂଯୋଜନା କରିଥିଲେ।

କାର୍ଯ୍ୟକ୍ରମରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ଶ୍ରୀମତୀ ଶାଳିନୀ ପଣ୍ଡିତ ସ୍ୱାଗତ ଭାଷଣ ଦେଇଥିଲେ। ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ଏବଂ ବିଭିନ୍ନ ବିଭାଗର ପ୍ରମୁଖ ଶାସନ ସଚିବ ଓ ସଚିବମାନେ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ। ଏଥି ସହିତ ସମସ୍ତ ଜିଲ୍ଲାର ଜିଲ୍ଲାପାଳ ଓ ସ୍ୱାସ୍ଥ୍ୟ ଅଧିକାରୀମାନେ ଅନ୍‌ଲାଇନ୍‌ରେ ଏହି କାର୍ଯ୍ୟକ୍ରମରେ ଯୋଡି ହୋଇଥିଲେ ।

ହ୍ୟାଙ୍ଗ୍‌ନେଲ୍‌ ହେଉଛି, ହାତନଖର ଚାରିପଟେ ଥିବା ଚର୍ମ, ଯାହାକି ଶୁଷ୍କ ହୋଇ ମାଛକାତି ଭଳି ହୋଇଯାଏ। ଏହା ବେଶ୍‌ ଯନ୍ତ୍ରଣାଦାୟକ ଏବଂ ଏହାକୁ ବାହାର କରିବା ସମୟରେ ରକ୍ତ ବାହାରିଥାଏ। ଫଙ୍ଗସ୍‌ ଏବଂ ଭୂତାଣୁ ପ୍ରଭାବରେ ଆଙ୍ଗୁଠି ପାଖର ଏହି ତ୍ବଚାରେ ଘା’ ମଧ୍ୟ ହୋଇଥାଏ। ତେବେ, ଏହାକୁ ଦୂର କରିବା ପାଇଁ କେତେକ ଘରୋଇ ଉପାୟ ରହିଛି।

ହ୍ୟାଙ୍ଗ୍‌ନେଲ୍‌କୁ ନେଲ୍‌ କଟର୍‌ରେ କାଟିଦେବା ଦ୍ବାରା ସଂକ୍ରମଣ ହେବାର ଆଶଙ୍କା ଥାଏ। ତେଣୁ ପ୍ରଥମେ ଗୋଟିଏ ପାତ୍ରରେ ଗରମ ପାଣି ଆଣି ସେଥିରେ ଭିଟାଇନ୍‌ ଇ’ ତେଲରୁ କିଛି ବୁନ୍ଦା ପକାଇ ଛୋଟ ଟାୱଲ୍‌କୁ ୧୦-୧୫ ମିନିଟ୍‌ ବୁଡ଼ାଇ ରଖନ୍ତୁ। ସେହି ଟାୱଲ୍‌କୁ ଆଙ୍ଗୁଠିେର ଗୁଡ଼ାଇ କିଛି ସମୟ ଛାଡ଼ିଦିଅନ୍ତୁ। ଏହାଦ୍ବାରା ହ୍ୟାଙ୍ଗ୍‌ନେଲ୍‌ କୋମଳ ହୋଇଯାଏ। ଏହାପରେ ତାହାକୁ କାଟିବ। ପାଇଁ କ୍ୟୁଟିକଲ୍ସ ନିପ୍ପର ବ୍ୟବହାର କରନ୍ତୁ।

-ପ୍ରତ୍ୟେକ ଦିନ ଆଙ୍ଗୁଠିରେ ଆଣ୍ଟିବ୍ୟାକ୍ଟେରିଆଲ୍‌ କ୍ରିମ୍‌ ଲଗାନ୍ତୁ।

-ହ୍ୟାଙ୍ଗ୍‌ନେଲ୍‌ ଅଧିକ ହୋଇଥିଲେ, ବ୍ୟାଣ୍ଡେଡ୍‌ ଲଗାନ୍ତୁ।

-ହାତ ଓ ନଖ ଶୁଷ୍କ ନ ହେବା ପାଇଁ ପେଟ୍ରୋଲିୟମ୍‌ ଜେଲି, ଶୁଦ୍ଧ ନଡ଼ିଆ ତେଲ ଓ ଅଲିଭ୍‌ ଅଏଲ୍‌ ଲଗାନ୍ତୁ।

-ଅଧିକ ଡିଟରଜେଣ୍ଟ୍‌ କିମ୍ବା ସାବୁନ୍‌ର ବ୍ୟବହାରରୁ ଦୂରେଇ ରୁହନ୍ତୁ।

-ଶରୀରର ଜଳୀୟ ଅଂଶ ନ କମିବା ଏବଂ ତ୍ବଚା କୋମଳ ରହିବା ପାଇଁ ସଠିକ୍‌ ପରିମାଣରେ ପାଣି ପିଅନ୍ତୁ।

ଭୁବନେଶ୍ବର: ଚଳିତ ଶିକ୍ଷା ବର୍ଷରୁ କଳାହାଣ୍ଡିର ମେଡିକାଲ କଲେଜରେ ଛାତ୍ରଛାତ୍ରୀ ଗ୍ରହଣ କରାଯିବ। ଏନେଇ ସୂଚନା ଦେଇଛନ୍ତି ଡିଏମଇଟି ଡାକ୍ତର ସଚ୍ଚିଦାନନ୍ଦ ମହାନ୍ତି। ଆସନ୍ତା ବର୍ଷ ଯାଜପୁର ଓ କନ୍ଧମାଳ ଜିଲ୍ଲାରେ ଦୁଇଟି ଓ ୨୦୨୬ ସୁଦ୍ଧା ତାଳଚେରରେ ମଧ୍ୟ ପ୍ରତିଷ୍ଠା ହେବ ମେଡିକାଲ କଲେଜ। ଆଗକୁ ସବୁ ଜିଲ୍ଲା ସଦର ମହକୁମାରେ ମେଡିକାଲ କଲେଜ ଖୋଲିବା ଯୋଜନା ରଖିଛନ୍ତି ରାଜ୍ୟ ସରକାର।

ବର୍ତ୍ତମାନ ରାଜ୍ୟରେ ବ୍ରହ୍ମପୁର, କଟକ ଓ ବୁର୍ଲା ସମେତ ମୋଟ ୧୦ ଟି ସରକାରୀ ମେଡିକାଲ କଲେଜ ରହିଛି। ଏହା ସହିତ ୨ଟି ପୋଷ୍ଟ ଗ୍ରାଜୁଏଟ ଓ ଡେଣ୍ଟାଲ ମେଡିକାଲ କଲେଜ ରହିଛି। ପ୍ରତ୍ୟେକ ନୂତନ ମେଡିକାଲ କଲେଜରେ ୧୦୦ ସିଟ ଲେଖାଏଁ ରହିଛି। ୧୦ଟି ମେଡିକାଲ କଲେଜରେ ମୋଟ ୧୪୦୦ ଏମବିବିଏସ ସିଟ ରହିଛି। ସବୁ ଜିଲ୍ଲାରେ ମେଡିକାଲ ଖୋଲିବା ପରେ ରାଜ୍ୟର ଡାକ୍ତର ଅଭାବ ସମସ୍ୟା ଦୂର ହେବ। ଏଥିପାଇଁ ରାଜ୍ୟ ସରକାର ବେଶ ଯତ୍ନବାନ ଓ ଭିତ୍ତିଭୂମିର ବିକାଶ କରାଯାଉଛି।

ଏମବିବିଏସ ଡିଗ୍ରୀ ହାସଲ ପରେ ରାଜ୍ୟ ବାହାରକୁ ନଯିବା ପାଇଁ ଦୁଇ ବର୍ଷ ବଣ୍ଡ ବା ଚୁକ୍ତି କରାଯାଉଛି। ନକଲି ଡାକ୍ତରଙ୍କୁ ଚିହ୍ନଟ କରିବା ପାଇଁ ସ୍ୱତନ୍ତ୍ର ଟିମ ଗଠନ କରାଯାଇ ଏନେଇ ଆବଶ୍ୟକ ପଦକ୍ଷେପ ଖୁବଶୀଘ୍ର ନିଆଯିବ। ଏ ନେଇ ସୂଚନା ଦେଇଛନ୍ତି ଡିଏମଇଟି ଡାକ୍ତର ସଚ୍ଚିଦାନନ୍ଦ ମହାନ୍ତି।

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ଵରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ମାଧ୍ୟମରେ ଚାଲିଥିବା ଉନ୍ନତ୍ତମାନର ସାର୍ବଜନୀନ ସ୍ବାସ୍ଥ୍ୟ ସେବା କ୍ଷେତ୍ରରେ ନିରନ୍ତର ବିକାଶ ନିମନ୍ତେ ରାଜ୍ୟ ସରକାର ବିଭିନ୍ନ ସ୍ବାସ୍ଥ୍ୟ ଯୋଜନା ଏବଂ ମେଡ଼ିକାଲ୍ କଲେଜ ଓ ହସ୍ପିଟାଲରେ ୬ ଜଣ ନୂଆ ପରାମର୍ଶଦାତାଙ୍କୁ ନିଯୁକ୍ତି ଦେଇଛନ୍ତି ।

କ୍ୟାପିଟାଲ୍ ହସ୍ପିଟାଲର ସୁପରିଚାଳନା ଓ ବିକାଶ ପାଇଁ ସଂଜୟ ସେଠୀଙ୍କୁ ନିଯୁକ୍ତି ଦିଆଯାଇଛି । ସେହିପରି ପୁଷ୍ପାଞ୍ଜଳି ରଣା, କେ. ଶାନ୍ତି ଓ ରଂଜନ ବିଶ୍ବାଳଙ୍କୁ ଯଥାକ୍ରମେ ବି.ଏସ୍.କେ.ୱାଇ.; ଏମ୍.କେ.ସି.ଜି. ମେଡ଼ିକାଲ୍ କଲେଜ ଓ ହସ୍ପିଟାଲ ବରହମପୁର ଏବଂ ନିରାମୟ ଯୋଜନାର ପରାମର୍ଶଦାତା ଭାବେ ନିଯୁକ୍ତି ଦିଆଯାଇଛି ।

ଓଡ଼ିଶାର ଗାଁ ଗହଳିରେ ବଡ ମେଡ଼ିକାଲ୍ ଭାବେ ଜଣାଶୁଣା କଟକର ଶ୍ରୀରାମ ଚନ୍ଦ୍ର ଭଞ୍ଜ ମେଡ଼ିକାଲ୍ କଲେଜ ଏବଂ ହସ୍ପିଟାଲ ପାଇଁ ଦୁଇ ଜଣ ପରାମର୍ଶଦାତା ନିଯୁକ୍ତି ହୋଇଛନ୍ତି । ସେମାନେ ହେଲେ ଦିଲ୍ଲୀପ କୁମାର ସାହୁ ଏବଂ ସ୍ବପ୍ନାରାଣୀ ପାତ୍ର । ଏହି ନବ ନିଯୁକ୍ତ ପରାମର୍ଶଦାତାମାନେ ଅବୈତନିକ ଭାବେ ଜନସାଧାରଣଙ୍କ ପାଇଁ ଓ ସରକାରୀ ବ୍ୟବସ୍ଥା ମଧ୍ୟରେ ସେବା ପ୍ରଦାନ ନିମନ୍ତେ ଇଛା ପ୍ରକଟ କରିଛନ୍ତି । ତେବେ ରାଜ୍ୟ ସରକାର ନିର୍ଦ୍ଦାରିତ ନିୟମ ଅନୁଯାୟୀ ସେମାନଙ୍କ ଗସ୍ତ ଏବଂ ଆନୁସଙ୍ଗିକ ସୁବିଧା ଯୋଗାଇଦେବେ ବୋଲି ବିଭାଗୀୟ କାର୍ଯାଳୟ ବିଜ୍ଞପ୍ତିରୁ ଜଣାପଡ଼ିଛି ।

ଆଜିକାଲିର ବ୍ୟସ୍ତବହୁଳ ଜୀବନଶୈଳୀ ପାଇଁ ମାନସିକ ଅବସାଦ ବୃଦ୍ଧି ପାଇବାରେ ଲାଗିଛି। ଅନେକ ଲୋକ ଏହାକୁ ଅଣଦେଖା କରିଦେଉଛନ୍ତି। ଏହା ସମୟକ୍ରମେ ଅନ୍ୟାନ୍ୟ ଜଟିଳ ମାନସିକ ଓ ଶାରୀରିକ ସମସ୍ୟା ସୃଷ୍ଟି କରିଥାଏ। ତେଣୁ ମାନସିକ ଅବସାଦରୁ ମୁକ୍ତି ପାଇବା ପାଇଁ କେତେକ ସହଜ ଓ ସରଳ ଉପାୟ ରହିଛି। ଆସନ୍ତୁ ସେଗୁଡ଼ିକ ସମ୍ପର୍କରେ ଜାଣିବା…

-ଅବସାଦ ଦୂର କରିବା କ୍ଷେତ୍ରରେ ପ୍ରଥମ ପଦକ୍ଷେପ ହେଉଛି ସୁନିଦ୍ରା। ସୁନିଦ୍ରା ଯୋଗୁଁ ହରମୋନ୍‌ର ସ୍ତର ନିୟନ୍ତ୍ରଣରେ ରହିବା ସହିତ ଖାଦ୍ୟଶୈଳୀରେ ପରିବର୍ତ୍ତନ ଆଣିବା ଆବଶ୍ୟକ। ଦିନକୁ ୭ରୁ ୮ ଘଣ୍ଟା ଶୋଇବା ଦରକାର।

-ନିଜ ଜୀବନଚର୍ଯ୍ୟାର ପ୍ଲାନିଙ୍ଗ୍‌ କରନ୍ତୁ। ନିଜେ ବ୍ୟବହାର କରୁଥିବା ଜିନିଷଗୁଡ଼ିକୁ ବ୍ୟବସ୍ଥିତ ଢଙ୍ଗରେ ରଖନ୍ତୁ। ଏହାଦ୍ବାରା ଦ୍ବନ୍ଦ୍ବ ଓ ଚାପଗ୍ରସ୍ତ ସ୍ଥିତି ଉପୁଜିବ ନାହିଁ।

-ଯୋଗ, ଧ୍ୟାନ ଓ ପ୍ରାଣାୟାମ କରନ୍ତୁ। ନିଜ ନିଃଶ୍ବାସ ପ୍ରଶ୍ବାସ ଉପରେ ଧ୍ୟାନ ଦିଅନ୍ତୁ।

-ଭୁଲ୍‌ ଖାଦ୍ୟ ଅବସାଦର ସ୍ତରକୁ ପ୍ରଭାବିତ କରିଥାଏ। ତେଣୁ ଅବସାଦରୁ ଦୂର ରହିବା ପାଇଁ ସନ୍ତୁଳିତ ଖାଦ୍ୟ ଖାଆନ୍ତୁ। ଦୂଷିତ ଖାଦ୍ୟଠାରୁ ଦୂରେଇ ରୁହନ୍ତୁ।

-ନିଜକୁ ପସନ୍ଦ ହେଉଥିବା କାମ ପାଇଁ ସମୟ ବାହାର କରନ୍ତୁ। ଏହାଦ୍ବାରା ମନ ଖୁସି ରହିଥାଏ, ଯାହାଦ୍ବାରା ମସ୍ତିଷ୍କ ଆପେ ଆପେ ଅବସାଦମୁକ୍ତ ରହିଥାଏ।

-ନିୟମିତ ବ୍ୟାୟାମ କରିବା ଦ୍ବାରା ମାନସିକ ଓ ଶାରୀରିକ ସୁସ୍ଥତା ଆସିଥାଏ। ପ୍ରତିଦିନ ବ୍ୟାୟାମ କରିବା ଦ୍ବାରା ଷ୍ଟ୍ରେସ୍‌ ହରମୋନ୍‌ର ସ୍ତର କମ୍‌ ହୋଇଥାଏ।

-ଅବସାଦ ସମୟରେ ନିଜର ଭାବନାକୁ ସାଙ୍ଗସାଥୀ କିମ୍ବା ପରିବାରର ସଦସ୍ୟଙ୍କ ସହିତ ସେୟାର୍‌ କରନ୍ତୁ। ଅବସାଦ ଦୂର କରିବା ପାଇଁ ଏହା ଏକ ଭଲ ବିକଳ୍ପ।

ଅତ୍ୟଧିକ ଭାବିବା ଆମର ମାନସିକ ଓ ଭାବନାତ୍ମକ ସ୍ବାସ୍ଥ୍ୟ ପାଇଁ ବେଶ୍‌ କ୍ଷତିକାରକ ସାବ୍ୟସ୍ତ ହୋଇଥାଏ। ତଥାପି ଆମେ ଏହାକୁ ନିୟନ୍ତ୍ରଣ କରିପାରି ନଥାଉ। ଯେକୌଣସି କଥାକୁ ଅଧିକ ଭାବିବା ଏକ ନକାରାତ୍ମକ ଅଭ୍ୟାସ। ଏହା ଅନେକ ସ୍ବାସ୍ଥ୍ୟ ସମସ୍ୟାର କାରଣ ହୋଇପାରେ। ପ୍ରତ୍ୟେକ ମଣିଷ ଜୀବନରେ କିଛି ମୁହୂର୍ତ୍ତ ପାଇଁ ଏହାର ଶିକାର ହୋଇଥାନ୍ତି। ଅନେକ ଏହାକୁ ଗୁରୁତ୍ବ ଦେଉ ନଥିବାବେଳେ ଆଉ କିଛି ଲୋକ ଏଥିରେ ବୁଡ଼ି ରୁହନ୍ତି। ଯେଉଁ ଲୋକମାନଙ୍କର ଅତ୍ୟଧିକ ଭାବିବା ଅଭ୍ୟାସରେ ପରିଣତ ହୋଇଥାଏ, ସେମାନେ ସବୁ କଥାକୁ ନକାରାତ୍ମକ ଭାବେ ଦେଖନ୍ତି। ତେବେ ଏଥିରୁ କିପରି ନିବୃତ୍ତ ରହିହେବ ସେ ସଂପର୍କିତ କିଛି ଟିପ୍ସ …

ଏହା ରୋଗ ନୁହେଁ, ଏହା ଏକ ନକାରାତ୍ମକ ଅଭ୍ୟାସ। ନିୟମିତ ଅତ୍ୟଧିକ ଭାବିବା ଦ୍ବାରା ଉନ୍ମାଦ, ଅନିଦ୍ରା, ଉଚ୍ଚ ରକ୍ତଚାପ, ମାନସିକ ଚାପ ଆଦି ରୋଗକୁ ଡାକି ଆଣିଥାଏ। ଏହା ମେଦବୃଦ୍ଧିର ମଧ୍ୟ କାରଣ ହୋଇଥାଏ।

ଲକ୍ଷଣ

* ଅବସାଦ
* କଥାକଥାରେ ରାଗିଯିବା
* ଏକୁଟିଆ ଅନୁଭବ କରିବା
* ସମସ୍ତଙ୍କୁ ସନ୍ଦେହ କରିବା

କିପରି ରକ୍ଷା ପାଇବେ

ଯଦି ଆପଣ କୌଣସି କଥାକୁ ନେଇ ଅଧିକ ଭାବୁଛନ୍ତି, ତେବେ ନିଜକୁ ଭଲଲାଗୁଥିବା ଯେକୌଣସି କାର୍ଯ୍ୟ(ବହି ପଢିବା,ଗୀତ ଶୁଣିବା, ଚିତ୍ର ଆଙ୍କିବା)ରେ ମନୋନିବେଶ କରନ୍ତୁ। ଏପରି କରି ଏଥିରୁ ନିବୃତ୍ତ ରହିହେବ।
ଅତ୍ୟଧିକ ଭାବନା ଜଣକୁ ଶାରୀରିକ ଓ ମାନସିକ ସ୍ତରରେ ବ୍ୟତିବ୍ୟସ୍ତ କରିପକାଏ। ଏଥିପାଇଁ ଯେତେସମ୍ଭବ ଶାନ୍ତ ପରିବେଶରେ ବସି ଯୋଗ ପ୍ରାଣାୟାମ କରିପାରିବେ। ଏହା ମନରେ ସକାରାତ୍ମକ ବିଚାର ଆଣିଥାଏ।
ଅନେକଙ୍କର ସବୁ ଜିନିଷକୁ ଠିକ୍‌ ଭାବେ କରିବା ଅଭ୍ୟାସ ଥାଏ। କୌଣସି କାରଣରୁ ତାହା ହୋଇ ନ ପାରିଲେ ସେମାନେ ଏଥିପାଇଁ ନିଜକୁ ଦୋଷୀ ଭାବନ୍ତି। ଭାବନାରେ ବୁଡ଼ି ରୁହନ୍ତି। ଏଭଳି କ୍ଷେତ୍ରରେ ସବୁ ଜିନିଷ ଠିକ୍‌ କରିବା ଭାବନା ଛାଡ଼ନ୍ତୁ। କାରଣ, କାମ କଲେ ଭୁଲ୍ ହେବ ଏବଂ ସେଥିରୁ ଶିଖି ପରବର୍ତ୍ତୀ ଅବସ୍ଥାରେ ତାହାକୁ ସୁଧାରିବା ଦରକାର।

ଭୁବନେଶ୍ୱର: ଜରୁରୀ ଆବଶ୍ୟକତା ଭରଣା କରିବା ପାଇଁ ସରକାରୀସ୍ତରରେ ଡ଼େପୁଟେସନ ପରି ଏକ ବ୍ୟବସ୍ଥା ଅଛି। ମାତ୍ର ଏହି ଡ଼େପୁଟେସନକୁ ନିଜ ସ୍ୱାର୍ଥ ସାଧନ ନିମନ୍ତେ ଗଳାବାଟରେ ପରିଣତ କରିଛନ୍ତି କିଛି ସରକାରୀ କର୍ମଚାରୀ। ରାଜ୍ୟର ବିଭିନ୍ନ ସ୍ଥାନରେ ଡାକ୍ତର, ଶିକ୍ଷକ, ଯନ୍ତ୍ରୀ, ଅନ୍ୟ ସରକାରୀ କର୍ମଚାରୀ ଏହି ଡ଼େପୁଟେସନକୁ ଢ଼ାଲ କରି ନିଜ ସୁବିଧା ନିମନ୍ତେ ସହଜ ବାଟ ବାହାର କରିଛନ୍ତି। ନିୟମକାନୁନର ଗଳାବାଟରେ ନିଜ ସ୍ୱାର୍ଥ ସାଧନ କରୁଛନ୍ତି। ପରିଣତି ସ୍ୱରୂପ ଗ୍ରାମାଞ୍ଚଳରେ ଶିକ୍ଷକ, ଡାକ୍ତର, ସ୍ୱାସ୍ଥ୍ୟ କର୍ମୀ, ଯନ୍ତ୍ରୀ ମରୁଡ଼ି ଦେଖାଯାଉଥିବା ବେଳେ ସହରାଞ୍ଚଳରେ ବଳକା ସ୍ଥିତି ସୃଷ୍ଟି ହେଉଛି। ପୁନଶ୍ଚ ଡ଼େପୁଟେସନ ଅବଧି ସର୍ବାଧିକ ୩ ବର୍ଷ ପର୍ଯ୍ୟନ୍ତ ହୋଇପାରିବ ବୋଲି କୁହାଯାଉଥିଲେ ହେଁ ଦଶନ୍ଧି ଦଶନ୍ଧିଧରି କିଛି ଅଧିକାରୀ ଓ କର୍ମଚାରୀ ଡ଼େପୁଟେସନରେ ଥିବା ଦେଖାଯାଉଛି। କେବଳ ବିଭାଗ ନୁହେଁ, ଅନ୍ୟ ବିଭାଗକୁ ଡ଼େପୁଟେସନରେ ଯାଇ ସେହିଠାରେ କିଛି କର୍ମଚାରୀ ମଧ୍ୟ ଅବସର ନେଉଥିବା ଉଦାହରଣ ଅନେକ। ମାତ୍ର ଏହି ପ୍ରସଙ୍ଗରେ ଜିଲ୍ଲାପ୍ରଶାସନଠାରୁ ରାଜ୍ୟ ପ୍ରଶାସନ ପର୍ଯ୍ୟନ୍ତ ସମସ୍ତେ ନିରବ। ସାଧାରଣ ଲୋକଙ୍କ ସୁଖ ସୁବିଧା ଅପେକ୍ଷା ଏହି ଅଧିକାରୀମାନେ ନିଜ ବିଭାଗୀୟ କର୍ମଚାରୀଙ୍କ ସୁଖ ସୁବିଧା ବୁଝିବା ନିମନ୍ତେ ବେଶୀ ତତ୍ପର। ଏହା ପଛରେ ସେମାନଙ୍କର କି ସ୍ୱାର୍ଥ ରହିଛି ତାହା କେବଳ ସେହିମାନେ ହିଁ ଜାଣନ୍ତି। ଗୋଟିଏ ସ୍ଥାନରୁ ଦରମା ନେଇ ଡ଼େପୁଟେସନରେ ଅନ୍ୟସ୍ଥାନକୁ ଚାଲି ଯାଉଥିବାରୁ ମୂଳ ସ୍ଥାନରେ ନୂଆ ନିଯୁକ୍ତି ହୋଇ ପାରୁନାହିଁ। ଯାହା ଫଳରେ ସ୍ଥାନୀୟ ଅଞ୍ଚଳ ଅଧିବାସୀ ସ୍ୱାସ୍ଥ୍ୟ, ଶିକ୍ଷା ଓ ଅନ୍ୟାନ୍ୟ ସେବା ପାଇବାରୁ ବଞ୍ଚିତ ହେଉଛନ୍ତି। ଖୋର୍ଦ୍ଧା ଜିଲ୍ଲାର ବାଣପୁର ସିଏଚ୍‍ସିକୁ ଏହାର ଜ୍ୱଳନ୍ତ ଉଦାହରଣ।

ବାଣପୁର ସିଏଚ୍‍ସି ଅଧୀନରେ ଡାକ୍ତର ଓ ସ୍ୱାସ୍ଥ୍ୟ କର୍ମୀଙ୍କ ମଧ୍ୟରୁ ଦୁଇ ତୃତୀୟାଂଶ କର୍ମଚାରୀ ଓ ଅଧିକାରୀ ଗତ ୨ ବର୍ଷ ମଧ୍ୟରେ କୌଣସିମତେ ଅନ୍ୟତ୍ର ଡ଼େପୁଟେସନରେ ଚାଲିଯିବାକୁ ସକ୍ଷମ ହୋଇଛନ୍ତି। ବାଣପୁର ସିଏଚ୍‍ସିର ମେଡିକାଲ ଅଧିକାରୀଙ୍କ ଠାରୁ ଆରମ୍ଭ କରି ନର୍ସିଂ ଅଫିସର, ଲ୍ୟାବ୍‍ ଟେକ୍ନିସିଆନ୍‍ଙ୍କ ଭଳି ଗୁରୁତ୍ୱପୂର୍ଣ୍ଣ ପଦରେ କାର୍ଯ୍ୟରତ ୨୨ ଜଣ ଅନ୍ୟତ୍ର ନିଯୁକ୍ତି ପାଇଛନ୍ତି। ବାଣପୁର ସିଏଚ୍‍ସିରୁ ଡ଼େପୁଟେସନରେ ସ୍ଥାନାନ୍ତରିତ ସମସ୍ତ କର୍ମଚାରୀ ଭୁବନେଶ୍ୱର ସହରାଞ୍ଚଳରେ ଥିବା ସ୍ୱାସ୍ଥ୍ୟ କେନ୍ଦ୍ର ଓ ଡାକ୍ତରଖାନାରେ ଅବସ୍ଥାପିତ ହୋଇଛନ୍ତି। ସେହିପରି ଗମ୍ଭାରୀମୁଣ୍ଡା, ହଳଣ୍ଡା, ସୁନାଖଳା, ନୀଳାଦ୍ରୀପ୍ରସାଦ ସିଏଚ୍‍ସି, ପିଏଚ୍‍ସି ସମେତ କୁମରଙ୍ଗ, ଅରଙ୍ଗ, ଆୟତପୁର, ଦୀକ୍ଷିତପଡ଼ା ସବ୍‍ ସେଣ୍ଟରରେ ସମାନ ଅବସ୍ଥା ଦେଖାଯାଇଛି। ତେବେ ବାଣପୁର ସିଏଚ୍‍ସିରୁ ସର୍ବାଧିକ କର୍ମଚାରୀ ଭୁବନେଶ୍ୱରକୁ ଆସିଛନ୍ତି। ଏଠାରେ ଥିବା ମେଡିକାଲ ଅଫିସରଙ୍କୁ କଟକ ଏସ୍‍ସିବିକୁ ବଦଳି କରିଦିଆଯାଇଛି।

ପୂର୍ବରୁ ଡାକ୍ତରଖାନାରେ କର୍ମଚାରୀଙ୍କ ଅଭାବ ଥିବା ବେଳେ ଏବେ ଏତେ ସଂଖ୍ୟକ କର୍ମଚାରୀଙ୍କୁ ରାଜଧାନୀକୁ ବଦଳି କରିଦେବା ସାଧାରଣରେ ବିସ୍ମୟ ସୃଷ୍ଟି କରିଛି। ଏହାର ସିଧାସଳଖ ପ୍ରଭାବ ଜନସାଧାରଣଙ୍କ ସ୍ୱାସ୍ଥ୍ୟ ସେବା ଉପରେ ପଡୁଥିବା ଅଭିଯୋଗ ହୋଇଛି। ଏଠି ଔଷଧ ବିତରଣ କେନ୍ଦ୍ରରେ ତାଲା, ରକ୍ତଭଣ୍ଡାର ଗୃହ ଓ ଏକ୍ସରେ କର୍ମଚାରୀ ଶୂନ୍ୟ। ଡାକ୍ତରଙ୍କ ଟେବୁଲ ଖାଲି, ନର୍ସ ନାହାନ୍ତି କି ଲ୍ୟାବ୍‍ ଟେକ୍‍ନିସିଆନ ବି ନାହାନ୍ତି। ଲୋକ ଘଣ୍ଟାଘଣ୍ଟା ଧାଡ଼ିବାନ୍ଧି ଠିଆ ହେଉଥିଲେ ବି ସ୍ୱାସ୍ଥ୍ୟ ସେବାରୁ ବଞ୍ଚିତ ହେଉଛନ୍ତି।
ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ବହୁ ପଦ ଖାଲି ଥିବା ବେଳେଏହା ଅଧୀନରେ ଥିବା ସ୍ୱାସ୍ଥ୍ୟ କେନ୍ଦ୍ରରେ ଜଣେ ଲେଖାଏଁ ଡାକ୍ତରରେ କାମ ଚାଲିଛି। ବାଣପୁରରେ ଶିଶୁରୋଗ, ଭେଷଜ, ସର୍ଜରୀ ଏବଂ ଆୟୁଷ ଡାକ୍ତର ପଦ ଖାଲି ଅଛି। ଏସବୁ ସିଏଚ୍‍ସି ଏବଂ ଉପ କେନ୍ଦ୍ର ଉପରେ ସ୍ଥାନୀୟ ଅଞ୍ଚଳର ଲକ୍ଷଲକ୍ଷ ଲୋକ ନିର୍ଭରଶୀଳ। ହେଲେ କର୍ମଚାରୀ ଅଭାବ ପରିସ୍ଥିତିକୁ ଆହୁରି ଜଟିଳ କରି ଦେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ସ୍ଥାନୀୟ ବାସିନ୍ଦା ପ୍ରବୋଧ ବିଶ୍ୱାଳ କହିଛନ୍ତି ଯେ ବାଣପୁର ଡାକ୍ତରଖାନା ନାହିଁ ନାହିଁରେ ଚାଲିଛି। ଅଧା ବିଭାଗରେ କର୍ମଚାରୀ ନାହାନ୍ତି। ଯାହା ଫଳରେ ଲୋକମାନେ ଭୟଙ୍କର ସମସ୍ୟାର ସମ୍ମୁଖୀନ ହେଉଛନ୍ତି। ପୂର୍ବରୁ ଜିଲ୍ଲା ପରିଷଦ ବୈଠକରେ ଏନେଇ ଜିଲ୍ଳାପାଳ ଓ ସିଡିଏମ୍‍ଓଙ୍କ ଦୃଷ୍ଟି ଆକର୍ଷଣ କରାଯାଇ ଥିଲେ ସୁଦ୍ଧା ସୁଫଳ ମିଳିନାହିଁ। ମେଡ଼ିକାଲ ପର୍ଯ୍ୟବେକ୍ଷକ ଡ଼ା. ରମାକାନ୍ତ ନାୟକ ମଧ୍ୟ ଏଥିନେଇ ଅସହାୟତା ପ୍ରକାଶ କରିଛନ୍ତି। ସେ ଆସିବା ପୂର୍ବରୁ ୨୨ ଜଣ ସ୍ୱାସ୍ଥ୍ୟ କର୍ମଚାରୀ ଓ ଡାକ୍ତର ଅନ୍ୟତ୍ର ଡ଼େପୁଟେସନରେ ପଳାଇଥିବା ସେ ପ୍ରକାଶ କରିଛନ୍ତି। ଖୋର୍ଦ୍ଧା ସିଡିଏମ୍‍ଓ ଡାକ୍ତର ଆର୍ତ୍ତବନ୍ଧୁ ନାୟକ ଏହି ଡ଼େପୁଟେସନ ତାଙ୍କ କାର୍ଯ୍ୟକାଳ ସମୟରେ ହୋଇ ନ ଥିବାରୁ ସେ ଏଥିନେଇ କିଛି କହିବା ଠିକ୍‍ ହେବ ନାହିଁ ବୋଲି କହିଛନ୍ତି। ଅପରପକ୍ଷେ ରାଜ୍ୟ ସ୍ୱାସ୍ଥ୍ୟ ସେବା ନିର୍ଦ୍ଦେଶକ ପ୍ରଫେସର ବିଜୟ ମହାପାତ୍ର କହିଛନ୍ତି, ନୂଆ ସ୍ଥାନରେ ନିଯୁକ୍ତି ପାଇବାର ଅନ୍ତତଃ ତିନି ବର୍ଷ ପର୍ଯ୍ୟନ୍ତ କାର୍ଯ୍ୟ କରିବା ନିୟମ ରହିଛି। ତେବେ ସରକାରଙ୍କ ଦ୍ୱାରା ଧାର୍ଯ୍ୟ ପ୍ରକ୍ରିୟା ଅନୁସାରେ ସ୍ୱାସ୍ଥ୍ୟ କର୍ମଚାରୀଙ୍କ ବଦଳି କରାଯାଇ ଥାଏ। ୨୦୧୯ ପରେ ବିଶେଷ ବଡ଼ ଧରଣର ଅଦଳ ବଦଳ ହୋଇ ନାହିଁ। ତେବେ ନିକଟରେ ନୂଆ ମେଡିକାଲ କଲେଜକୁ କିଛି ଡାକ୍ତର ଓ ଅନ୍ୟ କର୍ମଚାରୀଙ୍କୁ ସ୍ଥାନାନ୍ତର କରାଯାଇଛି। ତେବେ ବାଣପୁର ଘଟଣାରେ ଅନୁସନ୍ଧାନ ପରେ କିଛି କୁହାଯାଇ ପାରିବ ବୋଲି ପ୍ରଫେସର ମହାପାତ୍ର କହିଛନ୍ତି।

କେବଳ ଖୋର୍ଦ୍ଧା ଜିଲ୍ଲାର ବାଣପୁର ନୁହେଁ; ରାଜ୍ୟର ବିଭିନ୍ନ ସ୍ଥାନରେ ଅନୁରୂପ ପରିସ୍ଥିତି ସୃଷ୍ଟି ହୋଇଛି। ଜଗତସିଂହପୁର ଜିଲ୍ଲାରେ ଶତାଧିକ ଶିକ୍ଷକ ବିଭାଗୀୟ ଅଧିକାରୀଙ୍କ ସହ ସଲାସୁତୁରା କରି ନିଜ ସୁବିଧା ଅନୁସାରେ ଡ଼େପୁଟେସନରେ ଯାଇଥିବା ସୂଚନା ମିଳିଛି। ବିଡ଼ମ୍ବନା ହେଉଛି ଗୋଟିଏ ସ୍କୁଲରୁ ଶିକ୍ଷକଙ୍କୁ ଅନ୍ୟ ସ୍ଥାନକୁ ଡ଼େପୁଟେସନରେ ପଠାଯାଇ ସେହି ସ୍ଥାନକୁ ଅନ୍ୟ ସ୍ଥାନରୁ ଶିକ୍ଷକଙ୍କୁ ଡ଼େପୁଟେସନରେ ଆଣି ସ୍ଥାନ ଭରଣା କରାଯାଇଛି। ଅବିଭକ୍ତ ସମ୍ବଲପୁର ଓ ସୁନ୍ଦରଗଡ଼ ଜିଲ୍ଲାରେ ବହୁ ଡାକ୍ତର, ଶିକ୍ଷକ ଓ ବିଭିନ୍ନ ବିଭାଗର ଯନ୍ତ୍ରୀ ଅନ୍ୟତ୍ର କାର୍ଯ୍ୟ କରୁଥିବା ସୂଚନା ମିଳିଛି। ତେଣୁ ରାଜ୍ୟ ସରକାର ଏ ସମ୍ପର୍କରେ ଅନୁଧ୍ୟାନ କରି ପଦକ୍ଷେପ ଗ୍ରହଣ କରିବାକୁ ବିଭିନ୍ନ ମହଲରେ ଦାବି ହୋଇଛି।

ଏବେ ଦିନକୁ ଦିନ ଓମିକ୍ରନ୍‌ ସଂକ୍ରମଣ ବଢ଼ିବାରେ ଲାଗିଛି। ତେଣୁ ଲୋକମାନଙ୍କୁ ମାସ୍କ ଓ ସାନିଟାଇଜର୍‌ ବ୍ୟବହାର ଉପରେ ଗୁରୁତ୍ବ ଦେବା ସମ୍ପର୍କିତ ଅଧିକରୁ ଅଧିକ ସଚେତନତା ବାର୍ତ୍ତା ଦିଆଯାଉଛି। ଏସବୁ ବ୍ୟତୀତ ରୋଗପ୍ରତିରୋଧକ ଶକ୍ତି ବଢ଼ାଇବା ପାଇଁ କାଢ଼ା, ଡ୍ରାଏ ଫୁଡ୍‌ସ ଓ ଗ୍ରୀନ୍‌ ଟିର ଚାହିଦା ମଧ୍ୟ ବୃଦ୍ଧି ପାଇଛି। ଏହା ସହିତ ଓମିକ୍ରନ୍‌ଠାରୁ ସୁରକ୍ଷା ଦେବା ପାଇଁ ୮ଟି ସୁପରଫୁଡ୍‌ ଖାଇବା ପାଇଁ ପ୍ରାଧାନ୍ୟ ଦିଆଯାଉଛି। ସେହି ୮ଟି ସୁପର୍‌ଫୁଡ୍‌ ହେଉଛି –

-ଆୟୁର୍ବେଦ ଅନୁଯାୟୀ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବା କ୍ଷେତ୍ରରେ ଘିଅ ହେଉଛି ସବୁଠାରୁ ଉତ୍କୃଷ୍ଟ। ଏହା ଇନ୍‌ଷ୍ଟାଣ୍ଟ୍‌ ଏନର୍ଜି ଦେବା ସହ ତ୍ବଚାଜନିତ ଅନେକ ସମସ୍ୟାର ସମାଧାନ ମଧ୍ୟ ସହଜରେ କରିଥାଏ।

-କନ୍ଦମୂଳରେ ଭିଟାମିନ୍‌ ଏ, ପୋଟାସିୟମ୍‌, ଭିଟାମିନ୍ ସି, ଓ ବିଟା କାରୋଟିନ୍‌ ଭରପୂର ମାତ୍ରାରେ ଥାଏ। ଏହାକୁ ସାଦା କିମ୍ବା କ୍ଷୀର ସହିତ ଖାଇବା ଦ୍ବାରା ଶରୀରରେ ରୋଗପ୍ରତିରୋଧକ ଶକ୍ତି ବୃଦ୍ଧି ହୁଏ।

-ଅଁଳାରେ ଥିବା ଔଷଧୀୟ ଗୁଣ ଅନେକ ରୋଗପାଇଁ ରାମବାଣ ଉପଚାର ସଦୃଶ।

-ଖଜୁରାରେ ଭିଟାମିନ୍‌, ମିନେରାଲ୍‌, ଫାଇବର୍‌ ଓ କ୍ୟାଲସିୟମ୍‌ ଥିବାରୁ ଏହାକୁ ଇମ୍ୟୁନ୍‌ ବୁଷ୍ଟର୍‌ ଫୁଡ୍‌ ଭାବେ ଗଣାଯାଉଛି। ତେଣୁ ଏବେ ଓମିକ୍ରନ୍‌କୁ ପ୍ରତିହତ କରିବା ପାଇଁ ଅଧିକ ମାତ୍ରାରେ ଖଜୁରା ଖାଇବା ଆବଶ୍ୟକ।

-ଥଣ୍ଡାଜନିତ ରୋଗବ୍ୟାଧି ଦୂର କରିବା କ୍ଷେତ୍ରରେ ଗୁଡ଼ ବେଶ୍‌ ଲାଭଦାୟକ। ଗୁଡ଼ରେ ଥିବା ଆଇରନ୍‌, ମ୍ୟାଗ୍ନେସିୟମ୍‌, ଜିଙ୍କ୍‌, ସେଲେନିୟମ୍‌ ଓ ପୋଟାସିୟମ୍‌, ଶରୀରର ରୋଗପ୍ରତିରୋଧକ ଶକ୍ତିକୁ ଦ୍ବିଗୁଣା କରିଥାଏ।

-ବାଜରାରେ ଥିବା ନ୍ୟୁଟ୍ରିଅନ୍ସ, ଭିଟାମିନ୍‌, ମିନେରାଲ୍‌, ଫାଇବର୍‌ ଓ ଭିଟାମିନ୍‌ ଶରୀରର ସ୍ନାୟୁ ଓ ମାଂସପେଶୀକୁ ସୁଦୃଢ଼ କରିବା ସହିତ ଶରୀରର ଉତ୍ତାପକୁ ନିୟନ୍ତ୍ରଣ କରେ। ତେଣୁ ସର୍ଦ୍ଦି ଓ ଥଣ୍ଡାକାଶ ଦୂର କରିବା କ୍ଷେତ୍ରରେ ବାଜରା ଭଳି ଅନ୍ୟ ଶସ୍ୟଜାତୀୟ ଖାଦ୍ୟ ଉପରେ ଗୁରୁତ୍ବ ଦିଅନ୍ତୁ।

-ଅକ୍ସିଡେଟିଭ୍‌ ଓ ଆଣ୍ଟି ଇନ୍‌ଫ୍ଲାମେଟାରି ଗୁଣ ଯୋଗୁଁ ଅଦା ଖାଇବା ଦ୍ବାରା ଗଳାଜନିତ ସବୁ ସମସ୍ୟା ଦୂର ହୋଇଥାଏ। କାର୍ଡିଓଭସ୍କୁଲାର୍‌ ଡିଜିଜ୍‌, କ୍ୟାନସର୍‌ ଓ ହଜମ ସମସ୍ୟା ଦୂର କରିବା ପାଇଁ ଅଦା ଲାଭଦାୟକ। ତେଣୁ ଏବେ ଓମିକ୍ରନ୍‌ ସମୟରେ ଅଦା ଖାଇବା ଉପରେ ଦୃଷ୍ଟି ଦିଅନ୍ତୁ।

-ଋତୁ ଅନୁଯାୟୀ ମିଳୁଥିବା ଖଟା ଫଳ ଓ ଲେମ୍ବୁରେ ଅଧିକ ପରିମାଣରେ ଭିଟାମିନ୍‌ ସି ଥିବା ଯୋଗୁଁ, ତାହାକୁ ପ୍ରତ୍ୟହ ଖାଦ୍ୟରେ ସାମିଲ କରନ୍ତୁ।

ଆଳୁ ଓ କନ୍ଦମୂଳ ଅତ୍ୟନ୍ତ ପୁଷ୍ଟିକାରକ। ସୋଡ଼ା, ପଟାସ୍‌ ଓ ଭିଟାମିନ୍‌ ‘ବି’ ଦ୍ବାରା ଏହା ସମୃଦ୍ଧ। କନ୍ଦମୂଳରେ ଭିଟାମିନ୍‌ ‘ସି’, ‘ଇ’ ଓ ବେଟା କାରୋଟିନ୍‌ ଫାଇବର୍‌, ଲୌହ ଓ ପଟାସିୟମ୍‌ ଅଛି। କଞ୍ଚାଆଳୁ ରସ ଅନେକ ରୋଗର ମହୌଷଧି। ଯଥା –

-ପାଚନ ପ୍ରଣାଳୀକୁ ଦୃଢ଼ କରେ।
-ସନ୍ଧିବାତ, ଫୁଲା ଓ ସିଝି ଯାଇଥିବା ତ୍ବଚା ପାଇଁ ଏହା ମହୌଷଧି ସଦୃଶ।
-ଆଳୁର ପତ୍ର ଏକ ପୁଷ୍ଟିକର ଓ ସ୍ବାଦିଷ୍ଟ ଖାଦ୍ୟ।

କନ୍ଦମୂଳ
-କନ୍ଦମୂଳ କର୍କଟ ରୋଗ ପ୍ରତିଷେଧକ।
-କନ୍ଦମୂଳ ଖାଇବା ଯୋଗୁଁ ଅଗ୍ନ୍ୟାଶୟର କାର୍ଯ୍ୟକ୍ଷମତା ବଜାୟ ରଖେ।
-କନ୍ଦମୂଳକୁ ପୋଡ଼ା ଘା’ରେ ବାଟି ଲଗାଇବା ଦ୍ବାରା ମଲମ ଭଳି କାମ କରେ।
-ଆଣ୍ଠୁଗଣ୍ଠି ବାତରେ ମଧ୍ୟ ମନ୍ଦମୂଳ ଲେପ ଦିଆଯାଏ।

ସୋୟା
ଚୀନ୍‌ ଦେଶର ଲୋକମାନେ ସୋୟାକୁ ‘ୟୋଲୋ ଜୁଏଲ୍‌’ ବା ‘ହଳଦିଆ ହୀରା’ ବୋଲି କହିଥାନ୍ତି। ଜାପାନିଜ୍‌ ମାନେ କହନ୍ତି ସୋୟା ଉଭୟ ଶରୀର ଓ ଆତ୍ମା ପାଇଁ ଉପଯୁକ୍ତ ଖାଦ୍ୟ। ଏହା ଫାଇଟୋ, କେମିକାଲ୍‌, ମ୍ୟାଗ୍ନେସିୟମ୍‌, କ୍ୟାଲସିୟମ୍‌, ଲୌହ ଓ ତନ୍ତୁରେ ଭରପୂର। ଏହାର ସ୍ବାସ୍ଥ୍ୟ ଉପଯୋଗୀ ଗୁଣଗୁଡ଼ିକ ହେଉଛି –

-ଏହା ଶରୀରରେ କୋଲେଷ୍ଟ୍ରଲ୍‌ ସ୍ତରକୁ ହ୍ରାସ କରିଥାଏ।
-ହୃତ୍‌ପିଣ୍ଡ ରୋଗ ହେବାର ଆଶଙ୍କା ଦୂର କରେ।
-ସୋୟା ଖାଇବା ଦ୍ବାରା କ୍ୟାନସର୍‌ ଆଶଙ୍କା ମଧ୍ୟ କମ୍ ହୋଇଥାଏ।
-ସୋୟା, ଦୁଗ୍ଧ, ଦହି, ତୋଫୁ ହାଡ଼ ମଜଭୁତ୍‌ କରେ।
-ମାସିକ ଋତୁଜନିତ ସମସ୍ୟା ଦୂର କରେ।

ଅମୃତଭଣ୍ଡା ଏକ କ୍ଷୀରଜାତୀୟ ପରିବା ଓ ଏହାକୁ ଗ୍ରୀଷ୍ମ ପ୍ରଧାନ ଦେଶର ‘ମେଡିକାଲ୍‌ ମେଲନ୍’ ବୋଲି କୁହାଯାଏ। କାରଣ ଏଥିରେ ବହୁତ ମାତ୍ରାରେ ଔଷଧୀୟ ତତ୍ତ୍ବ ଅଛି। ତୁଟୁକା ଚିକିତ୍ସା କ୍ଷେତ୍ରରେ ଏହା ମହୌଷଧି ସଦୃଶ।

-ଅମୃତଭଣ୍ଡା ଆଣ୍ଟିସେପ୍ଟିକ୍‌ ଶକ୍ତିରେ ଭରପୂର।

-ଖାଦ୍ୟକୁ ଅତିଶୀଘ୍ର ହଜମ କରାଇବା ପାଇଁ ଅମୃତଭଣ୍ଡା ଖାଇବା ଉଚିତ।

-ଗୋଟିଏ ସାଧାରଣ ଆକାରର ଅମୃତଭଣ୍ଡାରେ ୫୯ କ୍ୟାଲୋରି, ୧ ଗ୍ରାମ୍‌ ଫାଇବର୍‌, ଫଲିକ୍‌ ଏସିଡ୍‌, ପଟାସିୟମ୍‌ ଓ ଦିନକ ପାଇଁ ଆବଶ୍ୟକ ଭିଟାମିନ୍‌ ‘ସି’ ଥାଏ।

-ପେଟ ସଫା ରଖିବା ସହିତ ଅର୍ଶ ସମସ୍ୟା ଦୂର କରେ।

-ଲିଭର୍‌, ମାସିକ ଋତୁ ଓ ଡାଇରିଆ ସମସ୍ୟାକୁ ଠିକ୍‌ କରେ।

-କଞ୍ଚା ଅମୃତଭଣ୍ଡାକୁ ତରକାରି କରି ଖାଇଲେ ଉଦର ରୋଗ ଦୂର ହୁଏ।

-କଳାଝାଡ଼ା ପାଇଁ ଏହାର କ୍ଷୀର ଉପାଦେୟ।

-ସମ୍ପୂର୍ଣ୍ଣ ଗୋଟିଏ ଅମୃତଭଣ୍ଡା ଖାଇଲେ ଗର୍ଭ ନଷ୍ଟ ହୁଏ