ନୂଆଦିଲ୍ଲୀ: ରାଜଧାନୀ ଦିଲ୍ଲୀର ରୋହିଣୀ କୋର୍ଟ ଭିତରେ ଘଟିଛି ଭୟାନକ ଗୁଳିକାଣ୍ଡ। ଶୁକ୍ରବାର ଦ୍ୱିପ୍ରହରରେ ମୋଷ୍ଟ ୱାଣ୍ଟେଡ ଗ୍ୟାଙ୍ଗଷ୍ଟାର ଜିତେନ୍ତ୍ର ଓରଫ ଗୋଗିକୁ ଗୁଳିକରି ହତ୍ୟା କରିଛନ୍ତି ଅନ୍ୟ ଏକ ଗୋଷ୍ଠୀ । ଜିତେନ୍ଦ୍ର ଶୁଣାଣି ପାଇଁ କୋର୍ଟକୁ ଆସିଥିଲେ । ଏହି ଗୁଳିକାଣ୍ଡରେ ତିନିରୁ ଚାରି ଜଣ ମଧ୍ୟ ଆହତ ହୋଇଛନ୍ତି। ପୋଲିସର ପାଲଟା କାର୍ଯ୍ୟାନୁଷ୍ଠାନରେ ଗୁଳି ଚଳାଇଥିବା ଦୁଇ ଜଣ ଦୁର୍ବୃତ୍ତ ନିହତ ହୋଇଥିବା ଜଣାପଡିଛି ।

ଦିଲ୍ଲୀ ପୋଲିସ ଦେଇଥିବା ସୂଚନା ଅନୁସାରେ ଅନ୍ୟ ଏକ ଗୋଷ୍ଠୀର ଦୁଇ ଜଣ ଦୁର୍ବୁତ୍ତ ଓକିଲ ବେଶରେ ଆସି କୋର୍ଟ ପରିଶର ଭିତରେ ପହଞ୍ଚିଥିଲେ ଏବଂ ଜିତେନ୍ଦ୍ର ଗୋଗୀଙ୍କୁ ଟାର୍ଗେଟ କରି ଗୁଳି ଚଳାଇଥିଲେ । ଫଳରେ ଘଟଣାସ୍ଥଳରେ ଜିତେନ୍ଦ୍ର ଗୋଗୀଙ୍କ ମୃତ୍ୟୁ ହୋଇଥିଲା। ପୋଲିସର ପାଲଟା କାର୍ଯ୍ୟାନୁଷ୍ଠାନରେ ଦୁଇ ଜଣ ଦୁର୍ବୃତ୍ତ ମଧ୍ୟ ନିହତ ହୋଇଛନ୍ତି । ନିହତ ହୋଇଥିବା ଦୁଇ ଜଣ ଦୁର୍ବୃତ୍ତ ଦିଲ୍ଲୀର ଟିଲୁ ଗ୍ୟାଙ୍ଗର ବୋଲି ଜଣାପଡିଛି । ନିହତ ହୋଇଥିବା ଦୁଇ ଆକ୍ରମଣକାରୀଙ୍କ ମଧ୍ୟରୁ ଜଣେ ହେଉଛନ୍ତି ରାହୁଲ, ଯାହାଙ୍କ ମୁଣ୍ଡରେ ୫୦ ହଜାର ପୁରସ୍କାର ରାଶିଥିଲା । ଜିତେନ୍ଦ୍ର ଗୋଗୀ ଓ ଟିଲୁ ଗ୍ୟାଙ୍ଗ୍ ମଧ୍ୟରେ ପୁରୁଣା ଶତ୍ରୁତା ଥିଲା ବୋଲି କୁହାଯାଉଛି ।