ନୂଆଦିଲ୍ଲୀ: ବ୍ୟାଙ୍କ କିମ୍ବା ଡାକଘରେ ଟଙ୍କା କାରବାରକୁ ନେଇ ସରକାର ଏକ ନୂତନ ଆୟକର ନିୟମ ଜାରି କରିଛନ୍ତି। ଏହି ନୂତନ ନିୟମ ଅନୁଯାୟୀ, ଏକ ଆର୍ଥିକବର୍ଷରେ ବ୍ୟାଙ୍କ କିମ୍ବା ଡାକଘରେ ୨୦ ଲକ୍ଷ ଟଙ୍କା କିମ୍ବା ତା’ଠାରୁ ଅଧିକ ନଗଦ ଜମା ଓ ଅର୍ଥ ପ୍ରତ୍ୟାହାର ପାଇଁ ପାନ୍ ଏବଂ ଆଧାର ଆବଶ୍ୟକ ହେବ। କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି) ପକ୍ଷରୁ ଏ ନେଇ ଏକ ବିଜ୍ଞପ୍ତି ଜାରି କରାଯାଇଛି। ସିବିଡିଟି ଏହାର ୧୫ତମ ସଂଶୋଧନ ନିୟମ ୨୦୨୨ ଅଧୀନରେ ଏହି ନୂତନ ନିୟମ ପ୍ରସ୍ତୁତ କରିଛି। ଏହି ନୂତନ ନିୟମ ମେ’ ୨୬ରୁ ଲାଗୁ ହେବ। ନୂଆ ନିୟମାନୁଯାୟୀ, ଏଣିକି ଏକ ବ୍ୟାଙ୍କିଙ୍ଗ କମ୍ପାନୀ କିମ୍ବା କର୍ପୋରେଟ ବ୍ୟାଙ୍କ କିମ୍ବା କୌଣସି ଡାକ ଘରେ ଏକ କିମ୍ବା ଅକାଧିକ ଆକାଉଣ୍ଟରେ ୨୦ ଲକ୍ଷ ନଗଦ ଅର୍ଥ ଜମା କରୁଥିଲେ ଗ୍ରାହକଙ୍କୁ ପାନ୍ ଏବଂ ଆଧାରର ସମ୍ପୂର୍ଣ୍ଣ ବିବରଣୀ ଦେବା ବାଧ୍ୟତାମୂଳକ ହେବ। ଏକ ଆର୍ଥିକ ବର୍ଷରେ ଏକ ବ୍ୟାଙ୍କିଙ୍ଗ୍ କମ୍ପାନୀ କିମ୍ବା ଏକ ସମବାୟ ବ୍ୟାଙ୍କ କିମ୍ବା ଡାକଘରରୁ କୌଣସି ଏକ କିମ୍ବା ଅଧିକ ଆକାଉଣ୍ଟରୁ ୨୦ ଲକ୍ଷ ମୂଲ୍ୟର ନଗଦ ଟଙ୍କା ଉଠାଇବା ଉପରେ ଏହି ନିୟମ ଲାଗୁ ହେବ। ବର୍ତ୍ତମାନ ପ୍ରଚଳିତ ବ୍ୟବସ୍ଥାରେ ଏକ ଆକାଉଣ୍ଟ୍ ଖୋଲିବା ପାଇଁ ଜଣଙ୍କୁ ତାଙ୍କ ପାନ୍ କାର୍ଡ ଦେଖାଇବାକୁ ପଡିବ। ପ୍ରଚଳିତ ବ୍ୟବସ୍ଥାରେ ବର୍ତ୍ତମାନ ଏକ ଚଳନ୍ତି ଖାତା ବା କରେଣ୍ଟ ଆକାଉଣ୍ଟ ଖୋଲିବା ପାଇଁ ଜଣଙ୍କୁ ପାନ୍ କାର୍ଡ ଦେଖାଇବାକୁ ପଡିବ। ସେହି ସମୟରେ ଯେଉଁମାନଙ୍କର ବ୍ୟାଙ୍କ ଆକାଉଣ୍ଟ ପୂର୍ବରୁ ପାନ୍ ସହିତ ଲିଙ୍କ୍ ହୋଇଛି, କିନ୍ତୁ କାରବାର ସମୟରେ ସେମାନଙ୍କୁ ମଧ୍ୟ ଏହି ନିୟମ ଅନୁସରଣ କରିବାକୁ ପଡିବ।

ନୂଆଦିଲ୍ଲୀ: ବଢ଼ିଲା ଆଧାର ପାନ୍ ଲିଙ୍କ୍ କରିବାର ସମୟସୀମା । ପ୍ୟାନ୍ ଓ ଆଧାର କାର୍ଡ ଲିଙ୍କ୍ କରିବା ଅବଧିକୁ ବୃଦ୍ଧି କରିଛନ୍ତି ଆୟକର ବିଭାଗ । ପାନ୍ ସହିତ ଆଧାର ସଂଯୋଗ କରିବାର ସମୟସୀମାକୁ ଆଉ ୬ ମାସ ବୃଦ୍ଧି କରିଛନ୍ତି। ପୂର୍ବରୁ ଏହି ସମୟସୀମା ୩୦ ସେପ୍ଟେମ୍ବର ୨୦୨୧ରେ ଶେଷ ହେଉଥିଲା କିନ୍ତୁ ବର୍ତ୍ତମାନ ଏହାକୁ ମାର୍ଚ୍ଚ ୩୧, ୨୦୨୨ ପର୍ଯ୍ୟନ୍ତ ବୃଦ୍ଧି କରାଯାଇଛି। ଅର୍ଥ ମନ୍ତ୍ରଣାଳୟ ଏହି ସୂଚନା ଦେଇଛି। ଆୟକର ଆଇନ ଅନୁଯାୟୀ ପେନାଲ୍ଟି ପ୍ରକ୍ରିୟା ଶେଷ ହେବାର ଧାର୍ଯ୍ୟ ତାରିଖ ମଧ୍ୟ ୩୦ ସେପ୍ଟେମ୍ବର ୨୦୨୧ରୁ ମାର୍ଚ୍ଚ ୩୧, ୨୦୨୨ ପର୍ଯ୍ୟନ୍ତ ବୃଦ୍ଧି କରାଯାଇଛି। ଆୟକର ବିଭାଗ ପକ୍ଷରୁ ଏ ନେଇ ଟ୍ୱିଟ୍ କରି ସୂଚନା ଦିଆଯାଇଛି। କରୋନା ଯୋଗୁ ଲୋକେ ବିଭିନ୍ନ ପ୍ରକାର ସମସ୍ୟାର ସମ୍ମୁଖୀନ ହେଉଥିବା ଯୋଗୁ ଏଭଳି ନିଷ୍ପତ୍ତି ନିଆଯାଇଥିବା ଏଥିରେ କୁହାଯାଇଛି।

ସୂଚନା ଥାଉକି ସରକାର ୨୩ ମାର୍ଚ୍ଚ ୨୦୧୧ରେ ଲୋକସଭା ପାରିତ ହୋଇଥିବା ଫାଇନାନ୍ସ ବିଲ୍ ୨୦୨୧ରେ ଆୟକର ଆଇନ ୧୯୬୧ରେ ଏକ ନୂତନ ବିଭାଗ ୨୩୪ଏଚ୍ (୨୩ଏଚ୍) ଯୋଡିଛନ୍ତି। ଏହି ନୂଆ ବ୍ୟବସ୍ଥା ଅନୁଯାୟୀ ଜରିମାନା ଧାର୍ଯ୍ୟ ହେବ। ନୂଆ ନିୟମ ଅନୁଯାୟୀ, ଯଦି କୌଣସି ବ୍ୟକ୍ତି ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ପାନ୍ କୁ ଆଧାର ସହିତ ଲିଙ୍କ୍ ନକରନ୍ତି, ତେବେ ଆପଣଙ୍କ ପାନ୍ ଅଚଳ ହୋଇଯାଇପାରେ | ଏହା ବ୍ୟତୀତ ଆପଣଙ୍କ ଉପରେ ଜରିମାନା ମଧ୍ୟ ଲାଗିପାରେ। ସୂଚନାଯୋଗ୍ୟ ଯେ ବ୍ୟାଙ୍କ, ଇପିଏଫ୍ କାରବାର ସହିତ ଅନେକ କାର୍ଯ୍ୟରେ ପାନ୍ ଲିଙ୍କ୍ ବାଧ୍ୟତାମୂଳକ ଅଟେ |