ନୂଆଦିଲ୍ଲୀ: ପ୍ରସିଦ୍ଧ ମାଇକ୍ରୋବ୍ଲଗିଂ ସାଇଟ୍ ଏକ୍ସ (ପୂର୍ବର ଟ୍ୱିଟର) ସୋମବାର ଦିନ ବଡ଼ ଧରଣର ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇଛି। ଫେବୃଆରୀ ୧୬ ତାରିଖରେ ଏହି ସୋସିଆଲ ମିଡିଆ ପ୍ଲାଟଫର୍ମଟି ହଠାତ୍ ଡାଉନ୍ ହୋଇଯିବା ଫଳରେ ବିଶ୍ୱର ବିଭିନ୍ନ ପ୍ରାନ୍ତର ଶତାଧିକ ବ୍ୟବହାରକାରୀ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ବ୍ୟବହାରକାରୀମାନେ ନିଜ ଆକାଉଣ୍ଟକୁ ଲଗଇନ୍ କରିବା ସହ ନୂଆ ପୋଷ୍ଟ କରିବା ଏବଂ ଫିଡ୍ ରିଫ୍ରେଶ୍ କରିବାରେ ଅସମର୍ଥ ହୋଇଥିବା ଜଣାପଡିଛି। ଆଉଟେଜ୍ ଟ୍ରାକିଂ ୱେବସାଇଟ୍ 'ଡାଉନଡିଟେକ୍ଟର' ଅନୁଯାୟୀ ଏହି ସମସ୍ୟା ବହୁ ସମୟ ଧରି ଜାରି ରହିଥିଲା।

ବ୍ୟବହାରକାରୀଙ୍କ ପାଇଁ ବଢିଲା ସମସ୍ୟା ଆଜି ସକାଳୁ ଏକ୍ସ ବ୍ୟବହାରକାରୀମାନେ ସେମାନଙ୍କର ଟାଇମଲାଇନ୍ ଲୋଡ୍ ହେଉନଥିବା ନେଇ ଅଭିଯୋଗ କରିଥିଲେ। ଅନେକ ବ୍ୟବହାରକାରୀ ପୋଷ୍ଟ କରିବାକୁ ଚେଷ୍ଟା କରୁଥିବା ବେଳେ ଏହା ସମ୍ଭବ ହୋଇନଥିଲା। କେବଳ ମୋବାଇଲ୍ ଆପ୍ ନୁହେଁ, ବରଂ ଡେସ୍କଟପ୍ ଭର୍ସନରେ ମଧ୍ୟ ସମାନ ସମସ୍ୟା ଦେଖାଦେଇଥିଲା। ଡାଉନଡିଟେକ୍ଟରର ରିପୋର୍ଟ ମୁତାବକ, ଅଧିକାଂଶ ଲୋକ ଲଗଇନ୍ ସମସ୍ୟା ଏବଂ ସର୍ଭର କନେକ୍ସନକୁ ନେଇ ଅଭିଯୋଗ କରିଛନ୍ତି।

ବିଶ୍ୱର ବିଭିନ୍ନ ଅଞ୍ଚଳରେ ପ୍ରଭାବ ଏହି ଆଉଟେଜ୍ କେବଳ ଗୋଟିଏ ସ୍ଥାନରେ ସୀମିତ ନରହି ବିଭିନ୍ନ ଦେଶରେ ଦେଖିବାକୁ ମିଳିଛି। ସୋସିଆଲ ମିଡିଆରେ ଏହି ବିଷୟରେ ଚର୍ଚ୍ଚା ଜୋର ଧରିଥିବା ବେଳେ କମ୍ପାନୀ ପକ୍ଷରୁ ବର୍ତ୍ତମାନ ସୁଦ୍ଧା କୌଣସି ଆଧିକାରିକ ସ୍ପଷ୍ଟିକରଣ ମିଳିନାହିଁ। ସେବା ପୁନଃ ସ୍ୱାଭାବିକ କରିବା ପାଇଁ ବ୍ୟବହାରକାରୀମାନେ ଅପେକ୍ଷା କରିଛନ୍ତି। ପୂର୍ବରୁ ମଧ୍ୟ ଏଲନ୍ ମସ୍କଙ୍କ ମାଲିକାନାରେ ଥିବା ଏହି ପ୍ଲାଟଫର୍ମ ଅନେକ ଥର ଯାନ୍ତ୍ରିକ ତ୍ରୁଟିର ଶିକାର ହୋଇଥିବା ନଜିର ରହିଛି।

ୱାଶିଂଟନ୍‌: ସ୍ପେସ୍‌ଏକ୍ସ ପ୍ରତିଷ୍ଠାତା ଏଲନ୍ ମସ୍କ ଏବେ ଚନ୍ଦ୍ରରେ ସହର ନିର୍ମାଣ କରିବେ। ସେ ବର୍ତ୍ତମାନ ମଙ୍ଗଳ ଗ୍ରହରୁ ଚନ୍ଦ୍ରକୁ ତାଙ୍କର ଧ୍ୟାନ କେନ୍ଦ୍ରିତ କରିଛନ୍ତି। କାରଣ ଚନ୍ଦ୍ରକୁ ମଣିଷ ପଠାଇବା ମଙ୍ଗଳ ଗ୍ରହକୁ ମଣିଷ ପଠାଇବା ଅପେକ୍ଷା ସହଜ। ମସ୍କ ଆଜି ଏ ସମ୍ପର୍କରେ  ଘୋଷଣା କରିଛନ୍ତି। ମସ୍କ କହିଛନ୍ତି ଯେ ସ୍ପେସ୍ଏକ୍ସ ବର୍ତ୍ତମାନ ଚନ୍ଦ୍ରରେ ଏକ ‘ସ୍ୱୟଂ-ବର୍ଦ୍ଧିଷ୍ଣୁ ସହର’ ନିର୍ମାଣ କରିବାକୁ ତାର ଧ୍ୟାନ କେନ୍ଦ୍ରିତ କରିଛି। ଚନ୍ଦ୍ରରେ ପହଞ୍ଚିବାକୁ ୬ମାସ ସମୟ ଲାଗେ। ନାସା ୨୦୨୮ ସୁଦ୍ଧା ମହାକାଶଚାରୀଙ୍କୁ ଚନ୍ଦ୍ରପୃଷ୍ଠକୁ ପଠାଇବା ପାଇଁ କାମ କରୁଛି। ୧୯୭୨ ରେ ଆପୋଲୋ କାର୍ଯ୍ୟକ୍ରମ ଶେଷ ହେବା ପରେ ଏହା ପ୍ରଥମ ଥର ହେବ, ଯେତେବେଳେ ମଣିଷ ଚନ୍ଦ୍ରରେ ପାଦ ରଖିବେ। ନାସାର ମୁନ୍‌ ମିସନ୍‌ରେ ସ୍ପେସଏକ୍ସର ଲୁନାର ଲ୍ୟାଣ୍ଡର ବ୍ୟବହାର କରାଯିବ । ଏହାକୁ ନିର୍ମାଣ କରିବା ପାଇଁ ନାସା ସ୍ପେସଏକ୍ସକୁ ୩ବିଲିୟନ ଡଲାର କିମ୍ବା ପ୍ରାୟ ୨୭,୦୦୦ କୋଟି ଟଙ୍କାର ଚୁକ୍ତିନାମା ଦେଇଛି । ଏହା ବର୍ତ୍ତମାନ ପରୀକ୍ଷଣ ପର୍ଯ୍ୟାୟରେ ଅଛି । କମ୍ପାନୀ ମାର୍ଚ୍ଚ ମାସରେ ଏକ ନୂତନ ପ୍ରୋଟୋଟାଇପ୍ ପରୀକ୍ଷା କରିବ ବୋଲି ଆଶା କରାଯାଉଛି । ଅରପପେକ୍ଷ ସମାନ ଲ୍ୟାଣ୍ଡର୍ ନିର୍ମାଣ ଦୌଡ଼ରେ ଜେଫ୍ ବେଜୋସ୍‌ଙ୍କ ବ୍ଲୁ ଅରିଜିନ୍ ହେଉଛି ମସ୍କଙ୍କ ମୁଖ୍ୟ ପ୍ରତିଦ୍ୱନ୍ଦ୍ୱୀ ।

ସୂଚନାଯୋଗ୍ୟ ଯେ ମସ୍କ ଅତୀତରେ ମୁନ୍ ମିସନକୁ ସମାଲୋଚନା କରିଥିଲେ । ଗତ ବର୍ଷ ପ୍ରାରମ୍ଭରେ, ସେ ନାସାର ଚନ୍ଦ୍ର କାର୍ଯ୍ୟକ୍ରମ, ଆର୍ଟେମିସ୍ କୁ “ବିଭ୍ରାନ୍ତି” ବୋଲି କହିଥିଲେ । ସେହି ସମୟରେ, ସେ ଲେଖିଥିଲେ, “ଆମେ ସିଧାସଳଖ ମଙ୍ଗଳ ଗ୍ରହକୁ ଯାଉଛୁ । ଚନ୍ଦ୍ର କେବଳ ଏକ ବିଭ୍ରାନ୍ତି ।

ଷ୍ଟାରଲିଙ୍କର ନିଜସ୍ୱ ସ୍ମାର୍ଟଫୋନ୍ ଲଞ୍ଚ ହେବା ନେଇ ଦୀର୍ଘ ଦିନ ଧରି ଚାଲିଥିବା ଚର୍ଚ୍ଚାରେ ଏବେ ବିରାମ ଲାଗିଛି। ଟେସଲା ଏବଂ ସ୍ପେସ୍‌ଏକ୍ସର ମାଲିକ ଏଲନ ମସ୍କ ଏନେଇ ନିଜର ସ୍ପଷ୍ଟୀକରଣ ରଖିଛନ୍ତି। ସେ ସଫା ସଫା କହିଛନ୍ତି ଯେ କମ୍ପାନୀ ବର୍ତ୍ତମାନ କୌଣସି ଷ୍ଟାରଲିଙ୍କ ସ୍ମାର୍ଟଫୋନ୍ ତିଆରି କରୁନାହିଁ ଏବଂ ଏପରି କୌଣସି ପ୍ରୋଜେକ୍ଟ ମଧ୍ୟ ଚାଲୁନାହିଁ।

ସ୍ମାର୍ଟଫୋନ୍ ଲଞ୍ଚ ନେଇ କ’ଣ କହିଲେ ମସ୍କ?

ଗତ କିଛି ଦିନ ହେବ ବଜାରରେ ଏକ ଗୁଜବ ଥିଲା ଯେ ଷ୍ଟାରଲିଙ୍କ (Starlink) ଏପରି ଏକ ସ୍ମାର୍ଟଫୋନ୍ ଆଣିପାରେ ଯାହା ସିଧାସଳଖ ସାଟେଲାଇଟ୍ ସହ ସଂଯୋଗ ହେବ। ମସ୍କଙ୍କ ଏକ ପୁରୁଣା ସୋସିଆଲ ମିଡିଆ ପୋଷ୍ଟରୁ ଏହି ଚର୍ଚ୍ଚା ଆରମ୍ଭ ହୋଇଥିଲା। କିନ୍ତୁ ବର୍ତ୍ତମାନ ମସ୍କ ସ୍ପଷ୍ଟ କରିଛନ୍ତି ଯେ କମ୍ପାନୀ ପାଖରେ ଏଭଳି କୌଣସି ଆକ୍ଟିଭ୍ ପ୍ରୋଜେକ୍ଟ ନାହିଁ। ଅର୍ଥାତ୍ ନିକଟ ଭବିଷ୍ୟତରେ ଷ୍ଟାରଲିଙ୍କ ବ୍ରାଣ୍ଡର କୌଣସି ମୋବାଇଲ୍ ବଜାରକୁ ଆସିବାର ସମ୍ଭାବନା ନାହିଁ।

କମ୍ପାନୀର ଫୋକସ୍ କେଉଁଠି?

ମସ୍କଙ୍କ ଅନୁସାରେ, ଷ୍ଟାରଲିଙ୍କର ମୁଖ୍ୟ ଉଦ୍ଦେଶ୍ୟ ହେଉଛି ଦୁର୍ଗମ ଏବଂ ନେଟୱାର୍କ ବିହୀନ ଅଞ୍ଚଳରେ ହାଇ-ସ୍ପିଡ୍ ଇଣ୍ଟରନେଟ୍ ସେବା ପହଞ୍ଚାଇବା। କମ୍ପାନୀ ବର୍ତ୍ତମାନ ନିଜର ସାଟେଲାଇଟ୍ ନେଟୱାର୍କ ଏବଂ ଗ୍ରାଉଣ୍ଡ ଇନଫ୍ରାଷ୍ଟ୍ରକ୍ଚରକୁ ମଜବୁତ କରିବାରେ ବିପୁଳ ନିବେଶ କରୁଛି। ଷ୍ଟାରଲିଙ୍କ ନିଜକୁ ଏକ କନେକ୍ଟିଭିଟି ପ୍ରୋଭାଇଡର ଭାବେ ଗଢି ତୋଳୁଛି, ଫୋନ୍ ନିର୍ମାତା ଭାବେ ନୁହେଁ।

ଟି-ମୋବାଇଲ୍ (T-Mobile) ସହ ପାର୍ଟନରସିପ୍ ଏବଂ ଭାରତ ଯୋଜନା

ଯଦିଓ ଷ୍ଟାରଲିଙ୍କ ନିଜର ଫୋନ୍ ତିଆରି କରୁନାହିଁ, କିନ୍ତୁ ଆମେରିକାରେ T-Mobile ସହ ମିଶି ‘ଡାଇରେକ୍ଟ-ଟୁ-ଡିଭାଇସ୍’ ସାଟେଲାଇଟ୍ କମ୍ୟୁନିକେସନ୍ ଉପରେ କାମ ଜାରି ରଖିଛି। ଏହି ଟେକ୍ନୋଲୋଜି ମାଧ୍ୟମରେ ପାରମ୍ପରିକ ମୋବାଇଲ୍ ନେଟୱାର୍କ ନଥିଲେ ମଧ୍ୟ ୟୁଜର୍ସ ଜରୁରୀକାଳୀନ ମେସେଜ୍ ପଠାଇ ପାରିବେ। ଅନ୍ୟପକ୍ଷରେ, କମ୍ପାନୀ ଭାରତରେ ମଧ୍ୟ ନିଜର ସାଟେଲାଇଟ୍ ଇଣ୍ଟରନେଟ୍ ସେବା ଆରମ୍ଭ କରିବାକୁ ଜୋରସୋରରେ ପ୍ରସ୍ତୁତି ଚଳାଇଛି।

ଟେସ୍‌ଲା ଏବଂ ଏକ୍ସ (X)ର ମାଲିକ ଏଲନ ମସ୍କ କେବଳ ବର୍ତ୍ତମାନର ନୁହେଁ, ବରଂ ଇତିହାସର ସବୁଠାରୁ ଧନୀ ବ୍ୟକ୍ତି ହେବାର ଗୌରବ ଅର୍ଜନ କରିଛନ୍ତି। ଫୋର୍ବସ୍ ରିପୋର୍ଟ ଅନୁଯାୟୀ, ମସ୍କଙ୍କ ମୋଟ ସମ୍ପତ୍ତିର ମୂଲ୍ୟ ଏବେ ୮୫୦ ବିଲିୟନ ଡଲାର (ପ୍ରାୟ ୭୭ ଲକ୍ଷ କୋଟି ଟଙ୍କା) ଅତିକ୍ରମ କରିଛି। ଏହି ସମ୍ପତ୍ତି ପରିମାଣ ପାକିସ୍ତାନ, ବାଂଲାଦେଶ ଏବଂ ଶ୍ରୀଲଙ୍କା ଭଳି ଦେଶର ଅର୍ଥନୀତି (GDP) ଠାରୁ ମଧ୍ୟ ଅଧିକ।

କାହିଁକି ବଢିଲା ସମ୍ପତ୍ତି?

ମସ୍କଙ୍କ ସମ୍ପତ୍ତିରେ ଏହି ଅଦ୍ଭୁତପୂର୍ବ ବୃଦ୍ଧିର ମୁଖ୍ୟ କାରଣ ହେଉଛି ତାଙ୍କର ରକେଟ୍ ନିର୍ମାଣକାରୀ କମ୍ପାନୀ ସ୍ପେସ୍‌ଏକ୍ସ (SpaceX) ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ ଷ୍ଟାର୍ଟଅପ xAI ମଧ୍ୟରେ ହୋଇଥିବା ମିଶ୍ରଣ (Merger)। କେବଳ ଗୋଟିଏ ଦିନରେ ତାଙ୍କ ନେଟ୍ ୱର୍ଥରେ ୮୪ ବିଲିୟନ ଡଲାର ବା ପ୍ରାୟ ୭ ଲକ୍ଷ କୋଟି ଟଙ୍କାର ବୃଦ୍ଧି ଘଟିଛି।

ଭାରତର ଟପ୍-୪୦ ଧନୀଙ୍କଠାରୁ ବି ଆଗରେ

ମସ୍କଙ୍କ ମୋଟ ସମ୍ପତ୍ତି (୮୫୨ ବିଲିୟନ ଡଲାର) ଏତେ ବିଶାଳ ଯେ, ଏହା ଭାରତର ଶ୍ରେଷ୍ଠ ୪୦ ଜଣ ଧନୀ ବ୍ୟକ୍ତିଙ୍କ ମୋଟ ସମ୍ପତ୍ତି ମିଶାଇଲେ ମଧ୍ୟ ତାଙ୍କ ସହ ସମାନ ହେବ ନାହିଁ। ଏହାଛଡ଼ା ପାକିସ୍ତାନ, ଶ୍ରୀଲଙ୍କା, ବାଂଲାଦେଶ ଏବଂ ନେପାଳ ଭଳି ଦେଶର ମୋଟ ଜିଡିପି ମସ୍କଙ୍କ ବ୍ୟକ୍ତିଗତ ସମ୍ପତ୍ତି ଠାରୁ କମ୍ ରହିଛି।

ବିଶ୍ୱର ପ୍ରଥମ ଟ୍ରିଲିୟନେୟାର ହେବାକୁ ଯାଉଛନ୍ତି

ବର୍ତ୍ତମାନ ବିଶ୍ୱର ଦ୍ୱିତୀୟ ଧନୀ ବ୍ୟକ୍ତି ଗୁଗୁଲର କୋ-ଫାଉଣ୍ଡର ଲ୍ୟାରି ପେଜ (୨୮୧ ବିଲିୟନ ଡଲାର)ଙ୍କ ଠାରୁ ମସ୍କ ବହୁ ଆଗରେ ଅଛନ୍ତି। ଉଭୟଙ୍କ ମଧ୍ୟରେ ୫୭୮ ବିଲିୟନ ଡଲାରର ବ୍ୟବଧାନ ରହିଛି। ଯେଉଁ ଗତିରେ ମସ୍କଙ୍କ ସମ୍ପତ୍ତି ବଢୁଛି, ସେ ଖୁବଶୀଘ୍ର ବିଶ୍ୱର ପ୍ରଥମ ଟ୍ରିଲିୟନେୟାର (୧୦୦୦ ବିଲିୟନ ଡଲାର ସମ୍ପତ୍ତିର ମାଲିକ) ହେବାର ସମ୍ଭାବନା ରହିଛି।

ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ ମସ୍କ ଏକ ନୂତନ ଇତିହାସ ସୃଷ୍ଟି କରିଛନ୍ତି। ମସ୍କ ଏବେ ବିଶ୍ୱର ପ୍ରଥମ ବ୍ୟକ୍ତି ଭାବେ ୮୦୦ ବିଲିୟନ ଡଲାରର ନେଟ୍ ୱର୍ଥ (ମୋଟ ସମ୍ପତ୍ତି) ଅତିକ୍ରମ କରିଛନ୍ତି। ତାଙ୍କର ରକେଟ କମ୍ପାନୀ ସ୍ପେସ୍‌ଏକ୍ସ (SpaceX) ଏବଂ ଆର୍ଟିଫିସିଆଲ ଇଣ୍ଟେଲିଜେନ୍ସ କମ୍ପାନୀ ଏକ୍ସଏଆଇ (xAI)ର ଏକ ବଡ଼ ମିଶ୍ରଣ ପରେ ତାଙ୍କ ସମ୍ପତ୍ତିରେ ଏହି ଅଦ୍ଭୁତପୂର୍ବ ବୃଦ୍ଧି ଘଟିଛି।

ସମ୍ପତ୍ତି ବଢ଼ାଇଲା ସ୍ପେସ୍‌ଏକ୍ସ ଓ ଏକ୍ସଏଆଇ ଡିଲ୍

ଫୋର୍ବସ୍ (Forbes)ର ରିପୋର୍ଟ ଅନୁଯାୟୀ, ଏହି ଦୁଇ କମ୍ପାନୀର ମିଶ୍ରଣ ପରେ ମିଳିତ ସଂସ୍ଥାର ମୂଲ୍ୟ ୧.୨୫ ଟ୍ରିଲିୟନ ଡଲାରରେ ପହଞ୍ଚିଛି। ଏହି ଡିଲ୍ ଫଳରେ ମସ୍କଙ୍କ ବ୍ୟକ୍ତିଗତ ସମ୍ପତ୍ତିରେ ୮୪ ବିଲିୟନ ଡଲାର ଯୋଡ଼ି ହୋଇଛି ଏବଂ ତାଙ୍କର ମୋଟ ସମ୍ପତ୍ତି ଏକ ବିଶାଳ ୮୫୨ ବିଲିୟନ ଡଲାରରେ ପହଞ୍ଚିଛି। ଏହି ମିଶ୍ରଣ ପରେ ନୂତନ କମ୍ପାନୀରେ ମସ୍କଙ୍କର ୪୩% ଅଂଶଧନ ରହିଛି, ଯାହାର ଆନୁମାନିକ ମୂଲ୍ୟ ୫୪୨ ବିଲିୟନ ଡଲାର। ଏହାପୂର୍ବରୁ ସ୍ପେସ୍‌ଏକ୍ସରେ ତାଙ୍କର ୪୨% ଏବଂ ଏକ୍ସଏଆଇରେ ୪୯% ଅଂଶଧନ ଥିଲା। ଏହି ଡିଲ୍ ପରେ ସ୍ପେସ୍‌ଏକ୍ସ ଏବେ ମସ୍କଙ୍କ ସବୁଠାରୁ ମୂଲ୍ୟବାନ ସମ୍ପତ୍ତି ପାଲଟିଛି।

ଟେସଲାର ଗୁରୁତ୍ୱପୂର୍ଣ୍ଣ ଭୂମିକା

ମସ୍କଙ୍କ ସମ୍ପତ୍ତି ବୃଦ୍ଧିରେ ଇଲେକ୍ଟ୍ରିକ କାର ନିର୍ମାତା କମ୍ପାନୀ ଟେସଲା (Tesla) ଏବେ ବି ଏକ ପ୍ରମୁଖ ଭୂମିକା ଗ୍ରହଣ କରୁଛି। ଟେସଲାରେ ମସ୍କଙ୍କର ପ୍ରାୟ ୧୨% ଅଂଶଧନ ରହିଛି, ଯାହାର ମୂଲ୍ୟ ୧୭୮ ବିଲିୟନ ଡଲାର ଏବଂ ଏହା ସହିତ ଷ୍ଟକ୍ ଅପ୍ସନ୍ ବାବଦରେ ଆଉ ୧୨୪ ବିଲିୟନ ଡଲାର ମୂଲ୍ୟର ସମ୍ପତ୍ତି ରହିଛି। ନଭେମ୍ବର ମାସରେ ଟେସଲା ଅଂଶୀଦାରମାନଙ୍କ ଦ୍ୱାରା ଅନୁମୋଦିତ ହୋଇଥିବା ରେକର୍ଡ ଭଙ୍ଗା ପେ-ପ୍ୟାକେଜ୍ (pay package)କୁ ଏହି ହିସାବରେ ଅନ୍ତର୍ଭୁକ୍ତ କରାଯାଇନାହିଁ, ଯାହା ଭବିଷ୍ୟତରେ ତାଙ୍କ ସମ୍ପତ୍ତିକୁ ଆହୁରି ବଢ଼ାଇପାରେ।

ବର୍ଷକ ମଧ୍ୟରେ ଦ୍ୱିତୀୟ ବଡ଼ ମିଶ୍ରଣ

ଏହା ଏଲନ ମସ୍କଙ୍କ କମ୍ପାନୀଗୁଡ଼ିକ ମଧ୍ୟରେ ଏକ ବର୍ଷରୁ କମ୍ ସମୟ ମଧ୍ୟରେ ଦ୍ୱିତୀୟ ବଡ଼ ମିଶ୍ରଣ। ଗତବର୍ଷ ମାର୍ଚ୍ଚ ମାସରେ ମସ୍କ ଏକ୍ସଏଆଇ ଏବଂ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ (ପୂର୍ବରୁ ଟ୍ୱିଟର)କୁ ମିଶ୍ରଣ କରିଥିଲେ। ସେତେବେଳେ ଏକ୍ସଏଆଇର ମୂଲ୍ୟ ୮୦ ବିଲିୟନ ଏବଂ ଏକ୍ସର ମୂଲ୍ୟ ୩୩ ବିଲିୟନ ଡଲାର ଆକଳନ କରାଯାଇଥିଲା। ତେବେ ସ୍ପେସ୍‌ଏକ୍ସ ଚଳିତ ବର୍ଷ ଶେଷ ଆଡ଼କୁ ପବ୍ଲିକକୁ ଯିବାର ଯୋଜନା ରଖିଥିବାରୁ ବଜାର ଉପରେ ସମସ୍ତଙ୍କ ନଜର ରହିଛି।

ନୂଆଦିଲ୍ଲୀ: ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ ମସ୍କ (Elon Musk) ସୋମବାର ଏକ ଐତିହାସିକ ବ୍ୟବସାୟିକ ନିଷ୍ପତ୍ତି ଘୋଷଣା କରିଛନ୍ତି। ମସ୍କ ତାଙ୍କର ଦୁଇଟି ପ୍ରମୁଖ କମ୍ପାନୀ, ମହାକାଶ ଗବେଷଣା ସଂସ୍ଥା ସ୍ପେସ୍‌ଏକ୍ସ (SpaceX) ଏବଂ କୃତ୍ରିମ ବୁଦ୍ଧିମତା ଷ୍ଟାର୍ଟଅପ୍ xAI କୁ ମିଶ୍ରଣ କରିଛନ୍ତି। ଏହି ମିଶ୍ରିତ କମ୍ପାନୀ ଖୁବ୍ ଶୀଘ୍ର ଏକ ବିଶାଳ IPO (Initial Public Offering) ଜରିଆରେ ସେୟାର ବଜାରକୁ ଆସିବାକୁ ଯାଉଛି, ଯାହାର ମୂଲ୍ୟ ପ୍ରାୟ ୧.୨୫ ଟ୍ରିଲିୟନ ଡଲାର ହେବ ବୋଲି ବ୍ଲୁମବର୍ଗ ରିପୋର୍ଟ କରିଛି।

ମସ୍କ ଏକ ବ୍ଲଗ୍ ପୋଷ୍ଟ ଜରିଆରେ କହିଛନ୍ତି ଯେ ସେ ପୃଥିବୀ ତଥା ମହାକାଶରେ ଏକ "ସବୁଠାରୁ ଉଚ୍ଚାଭିଳାଷୀ ଇନୋଭେସନ୍ ଇଞ୍ଜିନ" ଗଠନ କରୁଛନ୍ତି। ଏଥିରେ ଏକାଧାରରେ AI, ରକେଟ୍, ସ୍ପେସ୍-ଆଧାରିତ ଇଣ୍ଟରନେଟ୍ ଏବଂ 'X' ସୋସିଆଲ୍ ମିଡିଆ ପ୍ଲାଟଫର୍ମ ଅନ୍ତର୍ଭୁକ୍ତ ରହିବ। ନେଭାଡା ରାଜ୍ୟର ସରକାରୀ ରେକର୍ଡ ଅନୁଯାୟୀ, ଫେବୃଆରୀ ୨ ତାରିଖରେ ଏହି ଡିଲ୍ ଚୂଡାନ୍ତ ହୋଇଥିଲା, ଯେଉଁଥିରେ ସ୍ପେସ୍ ଏକ୍ସପ୍ଲୋରେସନ୍ ଟେକ୍ନୋଲୋଜି କର୍ପୋରେସନ୍‌କୁ X.AI ହୋଲ୍ଡିଂର "ମ୍ୟାନେଜିଂ ମେମ୍ବର" ଭାବରେ ତାଲିକାଭୁକ୍ତ କରାଯାଇଛି।

ଏହା ମସ୍କଙ୍କ ବ୍ୟବସାୟିକ ପୋର୍ଟଫୋଲିଓର ସବୁଠାରୁ ବଡ ମିଶ୍ରଣ। ଗତ ବର୍ଷ ସ୍ପେସ୍‌ଏକ୍ସର ମୂଲ୍ୟ ୮୦୦ ବିଲିୟନ ଡଲାର ଥିବାବେଳେ, ଚଳିତ ବର୍ଷ ଆରମ୍ଭରେ xAI ର ମୂଲ୍ୟ ପ୍ରାୟ ୨୩୦ ବିଲିୟନ ଡଲାର ଆକଳନ କରାଯାଇଥିଲା। ଏହି ମିଶ୍ରଣରେ Nvidia, Cisco Investments, Fidelity, Valor Equity Partners ଏବଂ Qatar Investment Authority ଭଳି ବଡ଼ ବଡ଼ ନିବେଶକ ସାମିଲ ଅଛନ୍ତି। ଏହା ବ୍ୟତୀତ, ମସ୍କଙ୍କ ଅନ୍ୟ ଏକ କମ୍ପାନୀ Tesla ମଧ୍ୟ xAI ରେ ପ୍ରାୟ ୨ ବିଲିୟନ ଡଲାର ନିବେଶ କରିବାକୁ ଘୋଷଣା କରିଛି।

ଏହି ମିଶ୍ରଣ ପଛରେ ମସ୍କଙ୍କର ଏକ ରଣନୀତିଗତ ଭବିଷ୍ୟତ ଯୋଜନା ରହିଛି। ସେ ମହାକାଶରେ "ଅର୍ବିଟାଲ୍ ଡାଟା ସେଣ୍ଟର" ସ୍ଥାପନ କରିବାକୁ ଚାହୁଁଛନ୍ତି। ମସ୍କ ଦାବି କରିଛନ୍ତି ଯେ ଆଗାମୀ ୨ ରୁ ୩ ବର୍ଷ ମଧ୍ୟରେ ମହାକାଶରେ AI କମ୍ପ୍ୟୁଟିଂ ସବୁଠାରୁ ଶସ୍ତା ଏବଂ ପ୍ରଭାବଶାଳୀ ହେବ। ଏଥିପାଇଁ ସ୍ପେସ୍‌ଏକ୍ସ ୧ ନିୟୁତ ଉପଗ୍ରହ ଲଞ୍ଚ କରିବାକୁ ଫେଡେରାଲ୍ କମ୍ୟୁନିକେସନ୍ କମିଶନ (FCC) ନିକଟରେ ଆବେଦନ କରିଛି।

ତେବେ ଏହି ବିଶାଳ ଯୋଜନା ସତ୍ତ୍ୱେ କମ୍ପାନୀକୁ କିଛି ଆହ୍ୱାନର ସାମ୍ନା କରିବାକୁ ପଡୁଛି। ଆମେରିକାର ମେମ୍ଫିସ୍ (Memphis) ରେ xAIର ସୁପରକମ୍ପ୍ୟୁଟର ସୁବିଧା ପାଇଁ ଗ୍ୟାସ ଟର୍ବାଇନ ବ୍ୟବହାରକୁ ନେଇ ପରିବେଶବିତ୍‌ମାନେ ବିରୋଧ କରୁଛନ୍ତି। ଅନ୍ୟପକ୍ଷରେ, xAIର 'Grok' ଟୁଲ୍‌କୁ ନେଇ ବିଭିନ୍ନ ଦେଶରେ ରେଗୁଲେଟୋରୀ ତଦନ୍ତ ମଧ୍ୟ ଜାରି ରହିଛି। ତଥାପି, ସ୍ପେସ୍‌ଏକ୍ସ ବର୍ତ୍ତମାନ ଏକ ଲାଭଜନକ ସ୍ଥିତିରେ ଅଛି, ଯାହା ୨୦୨୫ ରେ ଆନୁମାନିକ ୮ ବିଲିୟନ ଡଲାର ଲାଭ କରିଛି।

ନୂଆଦିଲ୍ଲୀ: ଆମେରିକାର ପ୍ରମୁଖ ଶିଳ୍ପପତି ଏଲନ୍‌ ମସ୍କଙ୍କର ମୋଟ ସମ୍ପତ୍ତି ବଢି ୭୫୦ ବିଲିୟନ ଡଲାର ଅତିକ୍ରମ କରିଛି। ଏହା ଭାରତର ମୋଟ ବୈଦେଶିକ ମୁଦ୍ରା ଭଣ୍ଡାର ଠାରୁ ମଧ୍ୟ ଅଧିକ। ଭାରତୀୟ ରିଜର୍ଭ ବ୍ୟାଙ୍କ  (ଆରବିଆଇ)ଙ୍କ ଅନୁସାରେ ୧୨ ଡିସେମ୍ବରରେ ସମାପ୍ତ ହୋଇଥିବା ସପ୍ତାହରେ ଭାରତର ମୋଟ ବୈଦେଶିକ ମୁଦ୍ରାଭଣ୍ଡାର ୬୮୮.୯୪୯ ବିଲିୟନ ଡଲାର ରହିଛି। ଏଡାଛଡା ମସ୍କଙ୍କ ସମ୍ପତ୍ତି ପାକିସ୍ତାନ, ଶ୍ରୀଲଙ୍କା ଏବଂ ନେପାଳର ଜିଡିପିଠାରୁ ଅଧିକ ହୋଇଛି। ତାଙ୍କର ନିଟ୍ ସମ୍ପତ୍ତି ମୂଲରେ ମାତ୍ର  ୪ ଦିନରେ ୧୫୦ ବିଲିୟନ ଡଲାର (୧୩.୪୬ ଲକ୍ଷ କୋଟି ଟଙ୍କା) ବୃଦ୍ଧି ପାଇଛି। ସମ୍ପତି ଏହି ସ୍ତରରେ ପହଞ୍ଚିବାରେ ମସ୍କ ହେଉଛନ୍ତି ବିଶ୍ୱର ପ୍ରଥମ ବ୍ୟକ୍ତି। ପୂର୍ବରୁ, ଡିସେମ୍ବର ୧୬ରେ ତାଙ୍କର ସମ୍ପତ୍ତି ପରିମାଣ ୬୦୦  ବିଲିୟନ ଡଲାର ୫୪ ଲକ୍ଷ କୋଟି ଟଙ୍କା)ରେ ପହଞ୍ଚିଥିଲା। ତାଙ୍କ ସମ୍ପତ୍ତିରେ ଏହି ବୃଦ୍ଧି ଡେଲାୱେର ସୁପ୍ରିମକୋର୍ଟର ନିଷ୍ପତ୍ତିରୁ ଆସିଥିଲା, ଯାହା ମସ୍କଙ୍କ ୫୬ ବିଲିୟନ ଟେସଲା ପେ ପ୍ୟାକେଜକୁ ୧୩୯ ବିଲିୟନ ଡଲାରକୁ ବୃଦ୍ଧି କରିଥିଲା। ଉଲ୍ଲେଖଯୋଗ୍ୟ ଯେ ଆମେରିକାର ଡେଲାୱେର ସୁପ୍ରିମକୋର୍ଟ ଶୁକ୍ରବାର ମସ୍କଙ୍କ ୨୦୧୮ ବେତନ ପ୍ୟାକେଜ ଲାଗୁ କରିଛନ୍ତି।

ସୂଚନାଯୋଗ୍ୟ ଯେ, ଡେଲାୱେର କୋର୍ଟ ଟେସ୍‌ଲା ପକ୍ଷରୁ ମସ୍କଙ୍କୁ ଦିଆଯାଉଥିବା ବେତନ ପ୍ୟାକେଜକୁ ୨୦୨୪ରେ ରଦ୍ଦ କରିଦେଇଥିଲା। ୨୦୧୮ ପ୍ୟାକେଜ୍ ଶୁକ୍ରବାର ଟେସ୍‌ଲା ଷ୍ଟକ୍ ମୂଲ୍ୟ ଆଧାରରେ ପାଖାପାଖି ୧୩୯ ବିଲିୟନ ଡଲାର ଥିଲା। ଯଦି ମସ୍କ ଏହି ବେତନ ପ୍ୟାକେଜର ସମସ୍ତ ଷ୍ଟକ୍ ବିକଳ୍ପ ଉପଯୋଗ କରନ୍ତି ତାଙ୍କ ଭାଗ ପାଖାପାଖି ୧୨.୪%ରୁ ବଢି ୧୮.୧% ହୋଇଯିବ। ସମ୍ପତ୍ତିରେ ହୋଇଥିବା ତାଜା ବୃଦ୍ଧି ମସ୍କଙ୍କୁ ବିଶ୍ୱର ପ୍ରଥମ ଟ୍ରିଲିୟନେୟର ହେବା ଲାଗି ମାର୍ଗ ସୁଗମ କରିଛି। 

ଫୋର୍ବସ ଅନୁସାରେ ସୋମବାର ମସ୍କଙ୍କ ମୋଟ ସମ୍ପତ୍ତି ପାଖାପାଖି ୬୭୭ ବିଲିୟନ ଡଲାର ରହିଥିଲା। ମସ୍କଙ୍କ ସମ୍ପତ୍ତିରେ ଏପରି ବୃଦ୍ଧି ତାଙ୍କ ସ୍ପେସ୍ କମ୍ପାନୀ ସ୍ପେସ୍-ଏକ୍ସ ଯୋଗୁ ହୋଇଛି। ସ୍ପେସ୍-ଏକ୍ସ ଆଗାମୀ ବର୍ଷ ୧.୫ ଟ୍ରିଲିୟନ ଡଲାରର ଆଇପିଓ ଆଣିବାକୁ ପ୍ରସ୍ତୁତି କରୁଛି। ନିକଟରେ କମ୍ପାନୀର ମୂଲ୍ୟାୟନ ୮୦୦ ବିଲିୟନ ଡଲାରକୁ ପହଞ୍ଚିଛି। ମସ୍କଙ୍କ ନିକଟରେ ସ୍ପେସ-ଏକ୍ସର ପାଖାପାଖି ୪୨% ଅଂଶିଦାରୀ ରହିଛି। କମ୍ପାନୀର ମୂଲ୍ୟାୟନ ବୃଦ୍ଧି ଯୋଗୁ ମସ୍କଙ୍କ ସମ୍ପତ୍ତିରେ ୧୬୮ ବିଲିୟନ ଡଲାର ବୃଦ୍ଧି ହୋଇଛି।

ନ୍ୟୁୟର୍କ: ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ୍ ମସ୍କ ପୁଣି ଥରେ ଇତିହାସ ସୃଷ୍ଟି କରିଛନ୍ତି। ତାଙ୍କର ମୋଟ ସମ୍ପତ୍ତି ପରିମାଣ ୬୦୦ ବିଲିୟନ ଡଲାର ବା ପ୍ରାୟ ୫୪.୫୦ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଏତେ ବିପୁଳ ପରିମାଣର ସମ୍ପତ୍ତିର ମାଲିକ ହେବାରେ ସେ ବିଶ୍ୱର ପ୍ରଥମ ବ୍ୟକ୍ତି ପାଲଟିଛନ୍ତି।

ମସ୍କଙ୍କ ମହାକାଶ ଗବେଷଣା ସଂସ୍ଥା 'ସ୍ପେସ୍-ଏକ୍ସ'ର ଭାଲ୍ୟୁଏସନ୍ ୮୦୦ ବିଲିୟନ ଡଲାରରେ ପହଞ୍ଚିବା ଏବଂ ଆଗାମୀ ଆଇପିଓ (IPO) ଖବର ପରେ ମସ୍କଙ୍କ ସମ୍ପତ୍ତି ଗୋଟିଏ ଦିନରେ ପ୍ରାୟ ୧୬୮ ବିଲିୟନ ଡଲାର (୧୫ ଲକ୍ଷ କୋଟି ଟଙ୍କା) ବୃଦ୍ଧି ପାଇଛି। ଆଶ୍ଚର୍ଯ୍ୟର କଥା ହେଉଛି, ମସ୍କ ଗୋଟିଏ ଦିନରେ ଯେତିକି ରୋଜଗାର କରିଛନ୍ତି, ତାହା ଭାରତର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନୀଙ୍କ ମୋଟ ସମ୍ପତ୍ତି (୧୧୦ ବିଲିୟନ ଡଲାର) ଠାରୁ ମଧ୍ୟ ଅଧିକ।

ବର୍ତ୍ତମାନ ମସ୍କଙ୍କ ମୋଟ ସମ୍ପତ୍ତି ପ୍ରାୟ ୬୩୮ ବିଲିୟନ ଡଲାରରେ ପହଞ୍ଚିଛି। ଇନସାଇଡର୍ ସେୟାର୍ ବିକ୍ରି ପରେ ସ୍ପେସ୍-ଏକ୍ସ ବିଶ୍ୱର ସବୁଠାରୁ ମୂଲ୍ୟବାନ ଘରୋଇ କମ୍ପାନୀ ପାଲଟିଛି। ଏହି କମ୍ପାନୀରେ ମସ୍କଙ୍କର ୪୨% ଅଂଶଧନ ରହିଛି। ଫୋର୍ବସ୍ ଅନୁଯାୟୀ, ଯଦି କମ୍ପାନୀ ଆମେରିକୀୟ ଷ୍ଟକ୍ ମାର୍କେଟରେ ସଫଳତାର ସହ ତାଲିକାଭୁକ୍ତ ହୁଏ, ତେବେ ମସ୍କ ବିଶ୍ୱର ପ୍ରଥମ 'ଟ୍ରିଲିୟନେୟାର' (Trillionaire) ହୋଇପାରନ୍ତି।

କେବଳ ସ୍ପେସ୍-ଏକ୍ସ ନୁହେଁ, ଇଲେକ୍ଟ୍ରିକ୍ କାର୍ କମ୍ପାନୀ ଟେସଲା ଏବଂ ଏଆଇ କମ୍ପାନୀ xAI ମଧ୍ୟ ମସ୍କଙ୍କ ସମ୍ପତ୍ତି ବୃଦ୍ଧିରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ୨୦୨୫ ବର୍ଷରେ ଟେସଲାର ସେୟାର ମୂଲ୍ୟ ୧୩% ବୃଦ୍ଧି ପାଇଛି। ଟେସଲାରେ ଥିବା ମସ୍କଙ୍କ ୧୨% ଅଂଶଧନର ମୂଲ୍ୟ ବର୍ତ୍ତମାନ ୧୯୭ ବିଲିୟନ ଡଲାର ରହିଛି। ସେହିପରି ତାଙ୍କର ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଷ୍ଟାର୍ଟଅପ୍ xAI ମଧ୍ୟ ୨୩୦ ବିଲିୟନ ଡଲାର ଭାଲ୍ୟୁଏସନରେ ନୂତନ ପୁଞ୍ଜି ସଂଗ୍ରହ କରିବାକୁ ଯାଉଛି।

ଏଲନ୍ ମସ୍କ ମାତ୍ର ୧୨ ବର୍ଷ ବୟସରେ କମ୍ପ୍ୟୁଟର ପ୍ରୋଗ୍ରାମିଂ ଶିଖି ଏକ ଭିଡିଓ ଗେମ୍ ତିଆରି କରି ୫୦୦ ଡଲାରରେ ବିକ୍ରି କରିଥିଲେ। ପରବର୍ତ୍ତୀ ସମୟରେ ସେ Zip-2 ଏବଂ PayPal ଭଳି କମ୍ପାନୀ ପ୍ରତିଷ୍ଠା କରି ବିକ୍ରି କରିଥିଲେ। ସେଠାରୁ ମିଳିଥିବା ଅର୍ଥକୁ ବିନିଯୋଗ କରି ସେ ଆଜି ସ୍ପେସ୍-ଏକ୍ସ, ଟେସଲା ଏବଂ ନ୍ୟୁରାଲିଙ୍କ ଭଳି ବିଶ୍ୱସ୍ତରୀୟ କମ୍ପାନୀ ଛିଡ଼ା କରିପାରିଛନ୍ତି।

ୱାସିଂଟନ: ବ୍ୟବସାୟ, ରାଜନୀତି, ନେତାଙ୍କୁ ସମର୍ଥନ, ମନ୍ତ୍ରୀପଦ, ସରକାରୀ ନିଷ୍ପତ୍ତିକୁ ବିରୋଧ, ବିବାଦ, ଇସ୍ତଫା ପରେ ପୁଣି ରାଜନୀତିରେ ସାମିଲ ହେବା ଘଟଣା ଆମେରିକାରେ ଚହଳ ପକାଇ ଦେଇଛି। ଶିଳ୍ପପତି ଏଲନ ମସ୍କଙ୍କ ସହ ଏଭଳି ଘଟଣା ଘଟିଛି। ବନ୍ଧୁତା ବଇରୀ ପାଲଟି ଯାଇଛି। ନିର୍ବାଚନରେ ଡୋନାଲ୍ଡ ଟ୍ରମ୍ପଙ୍କ ସମର୍ଥନ କରି ଆର୍ଥିକ ସହାୟତା ଦେଇଥିବା ମସ୍କ ବିବାଦ ପରେ ରାଷ୍ଟ୍ରପତିଙ୍କ ଠାରୁ ଦୂରେଇ ଯାଇଛନ୍ତି। ଶତ୍ରୁତା ଏତେ ବଢ଼ି ଯାଇଛି ଯେ ଖୋଲାଖୋଲି ଭାବେ ଟ୍ରମ୍ପଙ୍କୁ ବିରୋଧ କରି କ୍ଷମା ମାଗିବାକୁ ପଛାଇ ନାହାନ୍ତି। ଟ୍ରମ୍ପ ମଧ୍ୟ ତାଙ୍କୁ ଧମକ ଦେଇଛନ୍ତି। ଟେସ୍‌ଲା ମାଲିକଙ୍କୁ ଦକ୍ଷିଣ ଆଫ୍ରିକା ପଠାଇ ଦେବେ ବୋଲି ମଧ୍ୟ କହିଛନ୍ତି। ଏପରି ସମୟରେ ଆମେରିକା ରାଷ୍ଟ୍ରପତିଙ୍କୁ ଜବାବ ଦେବା ଲାଗି ଅରବପତି ଏଲନ ମସ୍କ ଶନିବାର ନୂଆ ରାଜନୈତିକ ଦଳ ଗଠନ କରିବାକୁ ଘୋଷଣା କରିଛନ୍ତି। ସେ ଏହାର ନାମ ‘ଆମେରିକା ପାର୍ଟି’ ରଖିଛନ୍ତି। ନିଜର ସାମାଜିକ ଗଣମାଧ୍ୟମ ପ୍ଲାଟଫର୍ମ ଏକ୍ସରେ ମସ୍କ ଏହି ସୂଚନା ଦେଇଛନ୍ତି।

ମସ୍କ ଏହି ଘୋଷଣା କରି ଦେଶର ବର୍ତ୍ତମାନର ରାଜନୈତିକ ବ୍ୟବସ୍ଥାକୁ ସମାଲୋଚନା କରିଛନ୍ତି। ସେ ଦେଶରେ ଏକ ଦଳୀୟ ବ୍ୟବସ୍ଥା ଚାଲିଥିବା ଉଲ୍ଳେଖ କରିଛନ୍ତି। ଆମେ ଗଣତନ୍ତ୍ରରେ ନୁହେଁ, ବରଂ ଏକ ଦଳୀୟ ବ୍ୟବସ୍ଥାରେ ରହୁଛେ। ଦେଶକୁ ବର୍‌ବାଦ କରି ଦେବାଳିଆ କରିଦିଆଯାଉଛି। ଏବେ ଆମେ ଏକଦଳୀୟ ବ୍ୟବସ୍ଥାକୁ ଭାଙ୍ଗିବାକୁ ଯାଉଛୁ। ମସ୍କ ଘୋଷଣା କରିଛନ୍ତି ଯେ ଆଜି ଆମେରିକା ପାର୍ଟି ଗଠନ କରାଯାଇଛି। ଲୋକଙ୍କୁ ପୁଣିଥରେ ସ୍ବାଧୀନତା ଫେରାଇ ଦେବାକୁ ଏହି ନିଷ୍ପତ୍ତି ନିଆଯାଇଛି। ଏହାକୁ ନେଇ ସେ ଏକ୍ସରେ ସର୍ଭେ ମଧ୍ୟ କରିଥିଲେ। ଏଥିରୁ ୬୬% ଲୋକ ନୂଆ ରାଜନୈତିକ ଦଳ ଚାହୁଁଥିବା ଜଣାପଡ଼ିଛି। ଏବେ ଲୋକଙ୍କ ଇଚ୍ଛା ପୂରଣ ହେବ। ରପବ୍ଲିକାନ ଏବଂ ଡେମୋକ୍ରାଟ ପାର୍ଟି ଆମେରିକାକୁ ବର୍‌ବାଦ ଏବଂ ଦୁର୍ନୀତିର ଗନ୍ତାଘର କରିଦେଇଛନ୍ତି। ଏବେ ଦେଶକୁ ଦୁଇ ଦଳୀୟ ବ୍ୟବସ୍ଥାରୁ ସ୍ବାଧୀନତା ମିଳିବ। ଟ୍ରମ୍ପଙ୍କ ସହ ବିବାଦ ମଧ୍ୟରେ ମସ୍କ ଏଭଳି ଘୋଷଣା କରିଛନ୍ତି।

ଏହା ପୂର୍ବରୁ ଆମେରିକା ସ୍ବାଧୀନତା ଦିବସ ଅବସରରେ ମସ୍କ ଏକ୍ସରେ ଏକ ସର୍ଭେ କରାଇ ଥିଲେ। ଏଥିରେ ଦୁଇ ଦଳୀୟ ବ୍ୟବସ୍ଥାରୁ ସ୍ବାଧୀନତା ଚାହୁଁଛନ୍ତି କି ନାହିଁ ଏବଂ ଆମେରିକା ପାର୍ଟି ଗଠନ କରିବା ଉଚିତ କି ବୋଲି ପଚାରି ଥିଲେ। ସର୍ଭେରେ ୬୫.୪ ପ୍ରତିଶତ ଲୋକ ହଁ ଏବଂ ୩୪.୬ ପ୍ରତିଶତ ନା କହିଥିଲେ। ସୂଚନାଯୋଗ୍ୟ ଯେ ଗତ କିଛି ସପ୍ତାହ ହେଲା ଟ୍ରମ୍ପ ଏବଂ ମସ୍କଙ୍କ ମଧ୍ୟରେ ବିବାଦ ଉଗ୍ର ହୋଇଥିଲା। ଉଭୟ ଗୃହରେ ପାରିତ ଟ୍ରମ୍ପଙ୍କ ପ୍ରିୟ ‘ୱାନ ବିଗ୍‌ ବିୟୁଟିଫୁଲ ବିଲ୍‌’ ଏହି ନିଆଁରେ ଘିଅ ଢାଳି ଥିଲା। ଏହାକୁ ମସ୍କ ତୀବ୍ର ସମାଲୋଚନା କରିଥିଲେ। ପୂର୍ବରୁ ମସ୍କ ଟ୍ରମ୍ପଙ୍କ କ୍ୟାବିନେଟରେ ପ୍ରମୁଖ ପରାମର୍ଶଦାତା ଭାବେ କାମ କରୁଥିଲେ। ‘ଡିପାର୍ଟମେଣ୍ଟ ଅଫ୍‌ ଗମେଣ୍ଟ ଏଫିସିଏନ୍ସି’ର ନେତୃତ୍ବ ନେଇ ସେ ସରକାରୀ ଖର୍ଚ୍ଚ କାଟ୍‌ କରୁଥିଲେ। ତେବେ ଟ୍ରମ୍ପଙ୍କ ଟିକସ ଏବଂ ବ୍ୟୟ ବିଲ୍‌କୁ ସେ ବିରୋଧ କରିଥିଲେ। ଏହା ଦ୍ବାରା ଆଗାମୀ ୧୦ ବର୍ଷରେ ଆମେରିକା ୩.୩ ଟ୍ରିଲିୟନ ଡଲାରର ଋଣ ବୃଦ୍ଧି କରିବ ବୋଲି ସେ ଆଶା କରିଥିଲେ। ବିଭିନ୍ନ ପ୍ରସଙ୍ଗରେ ମତଭେଦ ତୀବ୍ର ହେବା ପରେ ସେ ଟ୍ରମ୍ପ ପ୍ରଶାସନରୁ ଇସ୍ତଫା ଦେଇଥିଲେ।

ୱାସିଂଟନ: ଆମେରିକା ରାଷ୍ଟ୍ରପତି ନିର୍ବାଚନରେ ରିପବ୍ଲିକାନ ପ୍ରାର୍ଥୀ େଡାନାଲ୍ଡ ଟ୍ରମ୍ପଙ୍କୁ ଜିତାଇବାରେ ପ୍ରମୁଖ ଗ୍ରହଣ କରିଥିଲେ ଶିଳ୍ପପତି ଏଲନ ମସ୍କ। ବିଜୟୀ ହେବାପରେ ଟ୍ରମ୍ପ ଓ ମସ୍କ ମଧ୍ୟରେ ସଂପର୍କ ଏେତ ନିବିଡ଼ ହୋଇଯାଇଥିଲା ଯେ ଦୁହେଁ ପରସ୍ପରକୁ ପ୍ରଶଂସାରେ ପୋତି ପକାଉଥିଲେ। କିନ୍ତୁ ଏବେ ହଠାତ ଟ୍ରମ୍ପ ଓ ମସ୍କ ଶତ୍ରୁ ପାଲଟିଯାଇଛନ୍ତି। ଦୁହେଁ ପରସ୍ପର ବିରୋଧରେ ବିଷୋଦଗାର କରିବାେର ଲାଗି ପଡ଼ିଛନ୍ତି। ସେମାନଙ୍କ ବିଷୋଦଗାର ନିମ୍ନ ସ୍ତରକୁ ଖସିଯାଇଛି। ଟ୍ରମ୍ପ ରାଷ୍ଟ୍ରପତି ହେବାକୁ ଅଯୋଗ୍ୟ ବୋଲି ମସ୍କ କହିଥିବା ବେଳେ ମସ୍କଙ୍କୁ ପାଗଳ ବୋଲି କହିଛନ୍ତି ଟ୍ରମ୍ପ। ଏହି ଘଟଣା କେବଳ ଆମେରିକା ନୁହେଁ, ବିଶ୍ବ ରାଜନୀତିେରେ ମଧ୍ୟ ହଟଚମଟ ସୃଷ୍ଟି କରିଛି। ବିଭିନ୍ନ କାରଣ ନେଇ ଟ୍ରମ୍ପଙ୍କ ଉପରେ କ୍ଷୁବ୍ଧ ଥିବା ମସ୍କ କହିଛନ୍ତି ଯେ ତାଙ୍କ ପାଇଁ ନିର୍ବାଚନ ଜିତିଛନ୍ତି ଟ୍ରମ୍ପ। କିନ୍ତୁ କୃତଜ୍ଞ ହେଉ ନାହାନ୍ତି। ମୁଁ ସାହାଯ୍ୟ କରିନଥିଲେ ଟ୍ରମ୍ପ ରାଷ୍ଟ୍ରପତି ହୋଇପାରି ନଥାଆନ୍ତେ। ମସ୍କଙ୍କ ଏଭଳି ମନ୍ତବ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ରାଷ୍ଟ୍ରପତି ଟ୍ରମ୍ପ। ସେ କହିଛନ୍ତି ଯେ ମସ୍କ ପାଗଳ ହୋଇଯାଇଛନ୍ତି।

ସୂଚନାଯୋଗ୍ୟ ଯେ, ଟ୍ରମ୍ପ ସରକାରରୁ ଓହରିଯିବା ପରେ ହିଁ ଏଲନ ମସ୍କ ଖୋଲାଖୋଲି ଭାବେ ତାଙ୍କର ବିରୋଧ କରିବା ଆରମ୍ଭ କରିଛନ୍ତି। ସେମାନଙ୍କ ମଧ୍ୟରେ ମୁକାବିଲାମୂଳକ ସ୍ଥିତି ସୃଷ୍ଟି ହୋଇଛି। ଗତକାଲି ଟ୍ରମ୍ପ ଓ ମସ୍କଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। କଥା ଏତେବାଟ ବଢ଼଼ିଯାଇଥିଲା ଯେ, ମସ୍କ ଟ୍ରମ୍ପଙ୍କୁ ରାଷ୍ଟ୍ରପତି ପଦରୁ ହଟାଇବାକୁ ଦାବି କରିଥିଲେ। କହିଥିଲେ ଯେ ‘ମୋ ସାହଯ୍ୟ ବିନା ଟ୍ରମ୍ପ କଦାପି ନିର୍ବାଚନ ଜିତିପାରି ନଥାନ୍ତେ। ଟ୍ରମ୍ପ ଏବେ ବେଇମାନି କରିଛନ୍ତି’। ଟ୍ରମ୍ପଙ୍କ ଉଚ୍ଚାଭିଳାଷୀ ‘ବିଗ୍‌‌ ବିୟୁଟିଫୁଲ ବିଲ୍‌‌’ ଅର୍ଥାତ ଟ୍ୟାକ୍ସ ଓ ଖର୍ଚ୍ଚ ବିଲ୍‌‌କୁ ଅଯଥା ଖର୍ଚ୍ଚ କରିବାର ଏକ ପ୍ରକ୍ରିୟା ବୋଲି ମସ୍କ କହିଛନ୍ତି। ତେଣୁ ଯଥାଶୀଘ୍ର ଟ୍ରମ୍ପଙ୍କୁ ହଟାଇ ଉପ-ରାଷ୍ଟ୍ରପତି ଜେଡି ଭାନ୍ସଙ୍କୁ ରାଷ୍ଟ୍ରପତି ପଦରେ ଅଧିଷ୍ଠିତ କରିବା ଉଚିତ୍‌‌ ବୋଲି ସେ କହିଛନ୍ତି। ମସ୍କ ଆହୁରି ସୂଚନା ଦେଇ କହିଛନ୍ତି ଯେ ସେ ଖୁବଶୀଘ୍ର ଏକ ରାଜନୈତିକ ଦଳ ଗଠନ କରିବେ।

ମସ୍କଙ୍କ ସମାଲୋଚନାର ଜବାବ ଦେଇଛନ୍ତି ରାଷ୍ଟ୍ରପତି ଟ୍ରମ୍ପ। ସେ କହିଛନ୍ତି ଯେ ଯେଉଁ ବିଲ୍‌‌ କଥା ମସ୍କ କହୁଛନ୍ତି ସେହି ବିଲକୁ ସେ ପ୍ରଥମେ ପ୍ରଶଂସା କରିଥିଲେ। ପ୍ରଶାସନରୁ ହଟିବା ପରେ ନିଜର ମତ ପରିବର୍ତ୍ତନ କରିଛନ୍ତି। ମସ୍କ ପାଗଳ ହୋଇଯାଇଛନ୍ତି ବୋଲି ଉଲ୍ଳେଖ କରି ଟ୍ରମ୍ପ କହିଛନ୍ତି ଯେ ଏଭଳି ବ୍ୟକ୍ତିଙ୍କ ସହିତ ସେ କଥା ହେବାକୁ ଚାହାନ୍ତି ନାହିଁ। ତାଙ୍କ ସହିତ ବୁଝାମଣା ପାଇଁ ମସ୍କ ଆଗ୍ରହ ପ୍ରକାଶ କରିଥିବା ନେଇ ଜଣେ ସାମ୍ବାଦିକ ପ୍ରଶ୍ନ କରିବାରୁ ଟ୍ରମ୍ପ କହିଲେ, ଏଭଳି ପାଗଳ ଲୋକ ସହିତ ସେ କଥା ହେବେନାହିଁ। ମସ୍କଙ୍କ କମ୍ପାନୀଗୁଡିକ ଉପରୁ ସରକାରଙ୍କ ଅନୁଦାନ ଓ ଅନ୍ୟାନ୍ୟ କଣ୍ଟ୍ରାକ୍ଟ ପ୍ରତ୍ୟାହାର କରିବାକୁ ଟ୍ରମ୍ପ ଧମକ ଦେଇଛନ୍ତି। ବିତର୍କିତ ବିଲ୍ ସପକ୍ଷରେ ଯୁକ୍ତି ରଖି ଟ୍ରମ୍ପ କହିଛନ୍ତି ଯେ ଏହି ବିଲ୍‌‌ ହେଉଛି ସବୁଠାରୁ ଉଚ୍ଚକୋଟୀର। ଏହାଦ୍ୱାରା ସରକାରଙ୍କ ଅର୍ଥ ବଞ୍ଚିପାରିବ। ମିଳିଥିବା ସୂଚନା ଅନୁସାରେ ମସ୍କଙ୍କ ସହିତ ବିବାଦ ପରେ ଟ୍ରମ୍ପ ତାଙ୍କର ଟେକ୍ସଲା କାର ବିକିବାକୁ ସ୍ଥିର କରିଛନ୍ତି। ମସ୍କଙ୍କ କଂପାନୀର ଏହି କାରକୁ ଟ୍ରମ୍ପ ୮୦ ହଜାର ଡଲାର ଦେଇ କିଣିଥିଲେ।

ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହଯୋଗୀ ତଥା ବ୍ୟବସାୟୀ ଏଲନ ମସ୍କ ନିଜର ସାମାଜିକ ଗଣମାଧ୍ୟମ କମ୍ପାନୀ ‘ଏକ୍ସ’କୁ ବିକ୍ରି କରିଦେଇଛନ୍ତି। ତେବେ ଅନ୍ୟ କୌଣସି ସଂସ୍ଥା ନୁହେଁ, ନିଜର ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) କମ୍ପାନୀ ‘ଏକ୍ସଏଆଇ’କୁ ୩୩ ବିଲିୟନ ଡଲାର ଅର୍ଥାତ୍‌ ୨.୮୨ ଲକ୍ଷ କୋଟି ଟଙ୍କାରେ ଏହାକୁ ବିକିଛନ୍ତି। ଏହା ଏକ ଅଲ୍‌-ଷ୍ଟକ୍‌ ଡିଲ୍‌। ଏଥିରେ ନଗଦ ପରିବର୍ତ୍ତେ ସେୟାର କାରବାର ହୋଇଛି। ଏହା ଦ୍ବାରା ଏକ୍ସର ନିବେଶକଙ୍କୁ ସେୟାର ମିଳିବ। ମସ୍କ ନିଜେ ଏହି ସୂଚନା ଦେଇଛନ୍ତି। ଡାଟା, ମଡେଲ, କମ୍ପ୍ୟୁଟିଂ, ବିତରଣ ଏବଂ ପ୍ରତିଭାକୁ ଏକାଠି କରିବା ଦିଗରେ ଏହା ବଡ଼ ପଦକ୍ଷେପ ବୋଲି ମସ୍କ କହିଛନ୍ତି। ଏକ୍ସଏଆଇର ଉନ୍ନତ ଏଆଇ ଜ୍ଞାନକୌଶଳକୁ ଏକ୍ସର ୬୦ କୋଟିରୁ ଅଧିକ ବ୍ୟବହାରକାରୀଙ୍କ ସହ ଯୋଡିବା ପାଇଁ ମସ୍କ ଏହି ପଦକ୍ଷେପ ନେଇଛନ୍ତି। ଏକ୍ସର ତଥ୍ୟ ବ୍ୟବହାର କରି ଏକ୍ସଏଆଇ ନିଜର ଏଆଇ ମଡେଲ ଗ୍ରୋକ୍‌ ଚାଟବାଟକୁ ଅଧିକ ସହଜରେ ପ୍ରଶିକ୍ଷିତ କରିପାରିବ। ସୂଚନାଯୋଗ୍ୟ ଯେ ମସ୍କ ୨୦୨୨ ଅକ୍ଟୋବରରେ ୪୪ ବିଲିୟନ ଡଲାର ଦେଇ ଏକ୍ସକୁ କିଣିଥିଲେ। ଆଜିର ହିସାବରେ ଏହା ପ୍ରାୟ ୩.୭୬ ଲକ୍ଷ କୋଟି ଟଙ୍କା ହେବ।

ୱାଶିଂଟନ: ଆମେରିକା ସୋସିଆଲ ମିଡିଆ ଇନ୍‌ଫ୍ଲୁଏନ୍ସର ତଥା ଲେଖିକା ଏସ୍‌ଲେ ସେଣ୍ଟ କ୍ଲେୟର ବଡ଼ ଦାବି କରିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହଯୋଗୀ ତଥା କ୍ୟାବିନେଟ ସଦସ୍ୟ ବ୍ୟବସାୟୀ ଏଲନ ମସ୍କ ତାଙ୍କ ସନ୍ତାନର ବାପା ବୋଲି କହିଛନ୍ତି। ସେ ୫ ମାସ ତଳେ ଗୋପନୀୟ ଭାବେ ପୂତ୍ର ସନ୍ତାନକୁ ଜନ୍ମ ଦେଇଥିଲେ। କିନ୍ତୁ ସୁରକ୍ଷା ଏବଂ ଗୋପନୀୟତା ଦୃଷ୍ଟିରୁ ଏ ବିଷୟରେ ଘୋଷଣା କରି ନ ଥିଲେ। ଏବେ ସେ ଗୋପନୀୟତା ରଖା କରିବା ପାଇଁ ଗଣମାଧ୍ୟମକୁ ଅନୁରୋଧ କରିଛନ୍ତି। ଯଦି କ୍ଲେୟରଙ୍କ ଦାବି ସଠିକ୍‌ ସାବ୍ୟସ୍ତ ହୁଏ ତେବେ ଏହା ମସ୍କଙ୍କ ୧୩ତମ ସନ୍ତାନ ହେବ। ପୂର୍ବରୁ ମସ୍କଙ୍କ ୧୨ ସନ୍ତାନ ଅଛନ୍ତି। ୩ ମହିଳା ଏହି ଶିଶୁଙ୍କୁ ଜନ୍ମ ଦେଇଛନ୍ତି।

୨୬ ବର୍ଷୀୟ ସେଣ୍ଟଙ୍କ କ୍ଲେୟର ସୋସିଆଲ ମିଡିଆରେ ଖୁବ ସକ୍ରିୟ ଅଛନ୍ତି। ସେ ‘ଏଲିଫ୍ୟାଣ୍ଟସ ଆଣ୍ଡ ନଟ୍‌ ବର୍ଡ୍ସ’ ନାମକ ଏକ ପୁସ୍ତକ ଲେଖିଛନ୍ତି। ରିପୋର୍ଟ ଅନୁଯାୟୀ ଏସ୍‌ଲେ ନ୍ୟୁୟର୍କ ମ୍ୟାନ୍‌ହଟନରେ ଏକ ବଡ଼ ଆପାର୍ଟମେଣ୍ଟରେ ରହୁଛନ୍ତି। ମାସକୁ ଏହାର ଭଡ଼ା ୧୨ରୁ ୧୫ ହଜାର ଡଲାର ଅର୍ଥାତ୍‌ ପ୍ରାୟ ୧୩ ଲକ୍ଷ ଟଙ୍କା ରହିଛି। ଏସ୍‌ଲେ ରକ୍ଷଣଶୀଳ ଚିନ୍ତାଧାରର ସମର୍ଥକ। ଏକ୍ସରେ ତାଙ୍କର ୧୦ ଲକ୍ଷ ଫଲୋଅର୍ସ ଅଛନ୍ତି। ତାଙ୍କ ପାଖରେ ଟେସ୍‌ଲାର ଏକ ସାଇବର ଟ୍ରକ୍‌ ମଧ୍ୟ ଥିଲା। ଏ ପର୍ଯ୍ୟନ୍ତ ଏହି ଦାବି ଉପରେ ମସ୍କଙ୍କ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ। ଏବେ ସେ ନ୍ୟୁରାଲିଙ୍କର ମ୍ୟାନେଜର ସିୱାନ ଜିଲ୍‌ସଲ୍‌ଙ୍କ ସହ ସମ୍ପର୍କରେ ଅଛନ୍ତି। ଉଭୟଙ୍କର ତିନି ସନ୍ତାନ ଅଛନ୍ତି। ମସ୍କ ଗତ ବର୍ଷ ଦ୍ବାଦଶ ସନ୍ତାନର ଜନକ ହୋଇଥିଲେ।

ମସ୍କ ସର୍ବପ୍ରଥମେ ୨୦୦୦ ମସିହାରେ ବିବାହ କରିଥିଲେ। କାନାଡ଼ା ବଂଶୋଦ୍ଭବ ଆଥର ଜଷ୍ଟିନ ୱିଲସନ୍‌ଙ୍କୁ ବିବାହ କରିଥିଲେ। ୨୦୦୨ରେ ଉଭୟେ ମାତାପିତା ହୋଇଥିଲା। ମାତ୍ର ୧୦ ସପ୍ତାହ ପରେ ଏହି ଶିଶୁର ମୃତ୍ୟୁ ହୋଇଥିଲା। ୨୦୦୮ରେ ମସ୍କ ୱିଲ୍‌ସନ୍‌ଙ୍କୁ ଛାଡ଼ପତ୍ର ଦେଇଥିଲେ। ପୁଣି ୨୦୧୦ରେ ବ୍ରିଟିଶ ଷ୍ଟାର ତାଲୁଲାହଙ୍କୁ ବିବାହ କରିଥିଲେ। ଏହି ବିବାହ ମାତ୍ର ଦୁଇ ବର୍ଷ ତିଷ୍ଠି ଥିଲା। ବିଚ୍ଛେଦ ପରେ ପୁଣି ଉଭୟେ ବିବାହ କରିଥିଲେ। ୨୦୧୪ରେ ତାଲୁଲାହ ଦ୍ବିତୀୟ ଥର ଛାଡ଼ପତ୍ର ଆବେଦନ କରିଥିଲେ। କିନ୍ତୁ ଏହାର ବର୍ଷରେ ଆବେଦନ ପ୍ରତ୍ୟାହାର କରି ନେଇଥିଲେ। ଏହା ପରେ ୨୦୧୬ରେ ତୃତୀୟ ଛାଡପତ୍ର ଆବେଦନ କରି ମସ୍କଙ୍କଠାରୁ ଅଲଗା ହୋଇଥିଲେ। ଉଭୟଙ୍କର କୌଣସି ସନ୍ତାନ ନାହାନ୍ତି। ପୂର୍ବରୁ ମସ୍କ ଥରେ କହିଥିଲେ ଯେ ବିଶ୍ବ ଜନସଂଖ୍ୟା ସଙ୍କଟର ସମ୍ମୁଖୀନ ହେଉଛି। ତେଣୁ ସେ ଉତ୍ତମ ବୁଦ୍ଧିମତା ଥିବା ଶିଶୁ ଜନ୍ମ କରିବାକୁ ଚାହୁଁଛନ୍ତି। ଯଦି ଲୋକ ଅଧିକ ସନ୍ତାନ ଜନ୍ମ ନ କରିବେ ତେବେ ପୃଥିବୀରେ ସଭ୍ୟତା ଧ୍ବଂସ ହୋଇଯିବ।