ହାଇଦ୍ରାବାଦର ଏକ ବିରିୟାନୀ ରେଷ୍ଟୁରାଣ୍ଟରେ କରାଯାଇଥିବା ସାଧାରଣ ଯାଞ୍ଚ ଏବେ ଦେଶର ଏକ ବଡ଼ ଟିକସ ଚୋରୀ ସ୍କାମକୁ ପଦାରେ ପକାଇଛି। ଏହି ଯାଞ୍ଚରୁ ସମଗ୍ର ଭାରତରେ ପ୍ରାୟ ୭୦,୦୦୦ କୋଟି ଟଙ୍କାର ଟିକସ ଫାଙ୍କି ହୋଇଥିବା ଜଣାପଡିଛି। ରେଷ୍ଟୁରାଣ୍ଟଗୁଡିକ ନିଜର ପ୍ରକୃତ ଆୟ ଲୁଚାଇବା ପାଇଁ ବିଲିଂ ସଫ୍ଟୱେୟାରରେ ବଡ଼ ଧରଣର ଜାଲିଆତି କରିଥିବା ତଦନ୍ତରୁ ସ୍ପଷ୍ଟ ହୋଇଛି।

କିଭଳି ହୋଇଥିଲା ଖୁଲାସା

ପୋଲିସ ଏବଂ ଟିକସ ବିଭାଗ ଅଧିକାରୀମାନେ ଅନୁସନ୍ଧାନ କରି ଜାଣିବାକୁ ପାଇଥିଲେ ଯେ, ଅନେକ ରେଷ୍ଟୁରାଣ୍ଟ ପ୍ରଚୁର ରୋଜଗାର କରୁଥିଲେ ମଧ୍ୟ କାଗଜପତ୍ରରେ ଖୁବ୍ କମ୍ ଆୟ ଦର୍ଶାଉଥିଲେ। ଏଥିପାଇଁ ସେମାନେ ଏକ ନିର୍ଦ୍ଦିଷ୍ଟ ବିଲିଂ ସଫ୍ଟୱେୟାରର ସହାୟତା ନେଉଥିଲେ। ଦେଶର ପ୍ରାୟ ଏକ ଲକ୍ଷରୁ ଅଧିକ ରେଷ୍ଟୁରାଣ୍ଟ ଏହି ସଫ୍ଟୱେୟାର ବ୍ୟବହାର କରନ୍ତି। କୃତ୍ରିମ ବୁଦ୍ଧିମତା ବା ଏଆଇ (AI) ଏବଂ ଡିଜିଟାଲ ଟୁଲ୍ସ ସାହାଯ୍ୟରେ ପ୍ରାୟ ୧.୭୭ ଲକ୍ଷ ରେଷ୍ଟୁରାଣ୍ଟର ୬୦ ଟେରାବାଇଟ୍ ଡାଟା ଯାଞ୍ଚ କରାଯାଇଥିଲା। ଯାଞ୍ଚ ପରେ ଜଣାପଡିଥିଲା ଯେ ଗ୍ରାହକମାନେ ବିଲ୍ ପୈଠ କରିବା ପରେ ସଫ୍ଟୱେୟାର ଭିତରୁ ସେହି ବିଲଗୁଡିକୁ ଚତୁରତାର ସହ ଡିଲିଟ୍ କରିଦିଆଯାଉଥିଲା।

ଟିକସ ଚୋରୀର ଚକିତ କଲା ଭଳି ତଥ୍ୟ

ରିପୋର୍ଟ ଅନୁଯାୟୀ, କେବଳ ଏହି ସଫ୍ଟୱେୟାର ଜରିଆରେ ୧୩,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଲ୍ କଟାଯିବା ପରେ ବିଲ୍ନ ଗୁଡିକୁ ନଷ୍ଟ କରି ଦିଆଯାଇଛି। ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାରେ ପ୍ରାୟ ୫,୧୦୦ କୋଟି ଟଙ୍କାର ବିକ୍ରିକୁ ଲୁଚାଇ ଦିଆଯାଇଛି। ସାରା ଭାରତରେ ଏହି ଟିକସ ଫାଙ୍କିର ପରିମାଣ ୭୦,୦୦୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି। କର୍ଣ୍ଣାଟକରେ ସବୁଠାରୁ ଅଧିକ ଟିକସ ଫାଙ୍କି ହୋଇଥିବା ବେଳେ ଏହା ପଛକୁ ତେଲେଙ୍ଗାନା ଏବଂ ତାମିଲନାଡୁ ରହିଛି। ଅଧିକାରୀମାନେ ଜାଣିବାକୁ ପାଇଛନ୍ତି ଯେ କେତେକ ସ୍ଥାନରେ ରେଷ୍ଟୁରାଣ୍ଟଗୁଡିକ ବିଲ୍ ଡିଲିଟ୍ ନକରି ମଧ୍ୟ କମ୍ ଆୟ ଦର୍ଶାଇ ଟିକସ ଫାଙ୍କୁଥିଲେ।

କେଉଁ ଉପାୟରେ ହେଉଥିଲା ଠକେଇ

ରେଷ୍ଟୁରାଣ୍ଟ ମାଲିକମାନେ ମୁଖ୍ୟତଃ ନଗଦ କାରବାର ବା କ୍ୟାଶ୍ ବିଲଗୁଡିକୁ ଟାର୍ଗେଟ୍ କରୁଥିଲେ। ନଗଦ ଟଙ୍କାକୁ ଟ୍ରାକ୍ କରିବା କଷ୍ଟକର ହୋଇଥିବାରୁ ଏହି ବିଲଗୁଡିକୁ ସିଷ୍ଟମରୁ ସମ୍ପୂର୍ଣ୍ଣ ଡିଲିଟ୍ କରିଦିଆଯାଉଥିଲା। କେତେକ କ୍ଷେତ୍ରରେ ପୂରା ମାସର କିମ୍ବା କିଛି ନିର୍ଦ୍ଦିଷ୍ଟ ଦିନର ସମସ୍ତ ବିଲ୍ ଲିଭାଇ ଦିଆଯାଉଥିଲା। ଏହି ତଦନ୍ତ ପ୍ରଥମେ ହାଇଦ୍ରାବାଦ ଏବଂ ବିଶାଖାପାଟନମରୁ ଆରମ୍ଭ ହୋଇଥିଲା, ମାତ୍ର ଏହାର ବ୍ୟାପକତା ଦେଖି ଏହାକୁ ସମଗ୍ର ଦେଶରେ ବିସ୍ତାର କରାଯାଇଛି। ଅଫିସରମାନଙ୍କ କହିବା ଅନୁଯାୟୀ, ଏହା କେବଳ ଗୋଟିଏ ସଫ୍ଟୱେୟାରର କଥା, ଅନ୍ୟ ବିଲିଂ ସଫ୍ଟୱେୟାରଗୁଡିକରେ ମଧ୍ୟ ଏଭଳି ଜାଲିଆତି ହୋଇଥାଇପାରେ।

ନୂଆଦିଲ୍ଲୀ: ଅକ୍ଟୋବର ମାସ ଶେଷ ହୋଇଥିବାବେଳେ ଆଜିଠାରୁ ଆରମ୍ଭ ହେଉଛି ନଭେମ୍ବର ମାସ। ଏହି ନୂଆ ମାସରୁ ଏଥର ବହୁତ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଘଟିବାକୁ ଯାଉଛି। ଏସବୁ ପରିବର୍ତ୍ତନ ଯାହା ସାଧାରଣ ଲୋକଙ୍କ ଦୈନନ୍ଦିନ ଆର୍ଥିକ ସ୍ଥିତିକୁ ସିଧାସଳଖ ପ୍ରଭାବିତ କରିବ। ଆଧାର ଅପଡେଟ ଫି ଏବଂ ବ୍ୟାଙ୍କ ପଞ୍ଜିକରଣରେ ପରିବର୍ତ୍ତନ ଠାରୁ ଆରମ୍ଭ କରି ନୂତନ GST ସ୍ଲାବ ଏବଂ କାର୍ଡ ଫି ପର୍ଯ୍ୟନ୍ତ ୭ଟି ବଡ଼ ପରିବର୍ତ୍ତନ ହେବାକୁ ଯାଉଛି।

ଆଧାର ଅପଡେଟ ଫି ପରିବର୍ତ୍ତନ

ଭାରତୀୟ ଅନନ୍ୟ ପରିଚୟ କର୍ତ୍ତୃପକ୍ଷ (UIDAI) ପିଲାମାନଙ୍କ ଆଧାର କାର୍ଡରେ ବାୟୋମେଟ୍ରିକ ଅପଡେଟ ପାଇଁ ୧୨୫ଟଙ୍କା ଫି ଛାଡ଼ କରିଛି। ଏହି ଫି ଏକ ବର୍ଷ ପାଇଁ ମାଗଣା ହେବ। ବୟସ୍କମାନଙ୍କ ପାଇଁ, ନାମ, ଜନ୍ମ ତାରିଖ, ଠିକଣା କିମ୍ବା ମୋବାଇଲ ନମ୍ବର ଭଳି ବିବରଣୀ ଅପଡେଟ କରିବା ପାଇଁ ୭୫ଟଙ୍କା ଖର୍ଚ୍ଚ ହେବ। ଫିଙ୍ଗରପ୍ରିଣ୍ଟ କିମ୍ବା ଆଇରିସ ସ୍କାନ ଭଳି ବାୟୋମେଟ୍ରିକ ଅପଡେଟ ପାଇଁ ୧୨୫ଟଙ୍କା ଖର୍ଚ୍ଚ ହେବ।

ନୂତନ ବ୍ୟାଙ୍କ ନାମାଙ୍କନ ନିୟମ

ନଭେମ୍ବର ୧ରୁ, ବ୍ୟାଙ୍କଗୁଡ଼ିକ ବ୍ୟବହାରକାରୀଙ୍କୁ ଏକ ଆକାଉଣ୍ଟ, ଲକର କିମ୍ବା ସୁରକ୍ଷିତ ଜମା ପାଇଁ ଚାରି ଜଣଙ୍କୁ ମନୋନୀତ କରିବାକୁ ଅନୁମତି ଦେବେ। ଏହି ନୂତନ ନିୟମର ଲକ୍ଷ୍ୟ ପରିବାରଗୁଡ଼ିକ ପାଇଁ ଜରୁରୀକାଳୀନ ପରିସ୍ଥିତିରେ ପାଣ୍ଠି ପାଇବାକୁ ସହଜ କରିବା ଏବଂ ମାଲିକାନା ଉପରେ ବିବାଦକୁ ଏଡାଇବା। ନାମାଙ୍କନ ଯୋଗ କରିବା କିମ୍ବା ପରିବର୍ତ୍ତନ କରିବା ଏହି ପ୍ରକ୍ରିୟାକୁ ବ୍ୟବହାରକାରୀଙ୍କ ପାଇଁ ସରଳ କରାଯାଇଛି। ଆପଣ ଏବେ କୌଣସି ସମର୍ଥନକାରୀ ଡକ୍ୟୁମେଣ୍ଟ ଦାଖଲ ନକରି ଅନଲାଇନରେ ଆପଣଙ୍କର ଆଧାର ଠିକଣା, ଜନ୍ମ ତାରିଖ କିମ୍ବା ନାମ ଅପଡେଟ କରିପାରିବେ।

ନୂତନ GST ସ୍ଲାବ କାର୍ଯ୍ୟକାରୀ

ନଭେମ୍ବର ୧ଠାରୁ, ସରକାର କିଛି ସାମଗ୍ରୀ ପାଇଁ ସ୍ବତନ୍ତ୍ର ହାର ସହିତ ଏକ ନୂତନ ଦୁଇ-ସ୍ଲାବ GST ବ୍ୟବସ୍ଥା ଲାଗୁ ହେବ । ପୂର୍ବ ଚାରି-ସ୍ଲାବ ସିଷ୍ଟମ ୫%, ୧୨%, ୧୮%, ଏବଂ ୨୮% କୁ ପରିବର୍ତ୍ତନ କରାଯିବ।। ୧୨% ଏବଂ ୨୮% ସ୍ଲାବ ହଟାଯିବ, ଯେତେବେଳେ ବିଳାସପୂର୍ଣ୍ଣ ଏବଂ ବିପଦପୂର୍ଣ୍ଣ ସାମଗ୍ରୀ ୪୦% ହାରରେ ରହିବ। ଏହି ପଦକ୍ଷେପ ଭାରତର ପରୋକ୍ଷ ଟିକସ ଗଠନକୁ ସରଳ କରିବା ଲକ୍ଷ୍ୟ ରଖିଛି।

NPSରୁUPS ସମୟ ସୀମା ବୃଦ୍ଧି

ଜାତୀୟ ପେନସନ ସିଷ୍ଟମ (NPS)ରୁ ଏକୀକୃତ ପେନସନ ଯୋଜନା (UPS)କୁ ସ୍ଥାନାନ୍ତରିତ ହେବାକୁ ଚାହୁଁଥିବା କେନ୍ଦ୍ର ସରକାରୀ କର୍ମଚାରୀମାନେ ବର୍ତ୍ତମାନ ପ୍ରକ୍ରିୟା ସମାପ୍ତ କରିବାକୁ ନଭେମ୍ବର ୩୦ ତାରିଖ ପର୍ଯ୍ୟନ୍ତ ସମୟ ପାଇପାରିବେ। ଏହି ସମ୍ପ୍ରସାରଣ କର୍ମଚାରୀମାନଙ୍କୁ ସମୀକ୍ଷା ଏବଂ ପରିବର୍ତ୍ତନ କରିବାକୁ ଅଧିକ ସମୟ ଦେଇଥାଏ।

ସମସ୍ତ ଅବସରପ୍ରାପ୍ତ କେନ୍ଦ୍ର ଏବଂ ରାଜ୍ୟ ସରକାରୀ କର୍ମଚାରୀଙ୍କୁ ନଭେମ୍ବର ଶେଷ ସୁଦ୍ଧା ସେମାନଙ୍କର ବାର୍ଷିକ ଜୀବନ ପ୍ରମାଣପତ୍ର ଦାଖଲ କରିବାକୁ ପଡିବ। ଏହା ସେମାନଙ୍କ ବ୍ୟାଙ୍କ ଶାଖାରେ କିମ୍ବା ଜୀବନ ପ୍ରମାଣ ପୋର୍ଟାଲ ମାଧ୍ୟମରେ ଅନଲାଇନରେ କରାଯାଇପାରିବ। ସମୟସୀମା ଶେଷ ହେବା ଦ୍ୱାରା ପେନସନ ପେମେଣ୍ଟରେ ବିଳମ୍ବ କିମ୍ବା ବାଧା ସୃଷ୍ଟି ହୋଇପାରେ।

PNB ଲକର ଫି ପରିବର୍ତ୍ତନ

ପଞ୍ଜାବ ନ୍ୟାସନାଲ ବ୍ୟାଙ୍କ (PNB) ଖୁବ ଶୀଘ୍ର ସାରା ଭାରତରେ ଏହାର ଲକର ଭଡା ଫି କରିବକୁ ଯାଉଛି। ନୂତନ ହାର ଲକରର ଆକାର ଏବଂ ବର୍ଗ ଉପରେ ନିର୍ଭର କରିବ। ରିପୋର୍ଟ ଅନୁଯାୟୀ, ଅପଡେଟ ଫି ନଭେମ୍ବରରେ ଘୋଷଣା ହେବାର ଆଶା କରାଯାଉଛି ଏବଂ ବିଜ୍ଞପ୍ତିର ୩୦ ଦିନ ପରେ କାର୍ଯ୍ୟକାରୀ ହେବ।

SBI କାର୍ଡ ବ୍ୟବହାରୀଙ୍କ ପାଇଁ ନୂତନ ଫି

ଆଜିଠାରୁ SBI କାର୍ଡ ବ୍ୟବହାରକାରୀଙ୍କଠାରୁ MobiKwik ଏବଂ Cred ପରି ତୃତୀୟ-ପକ୍ଷ ଆପ ମାଧ୍ୟମରେ କରାଯାଇଥିବା ଶିକ୍ଷା ସମ୍ବନ୍ଧୀୟ ପେମେଣ୍ଟ ଉପରେ ୧% ଫି ଆଦାୟ କରାଯିବ। ଏହା ସହିତ, SBI କାର୍ଡ ବ୍ୟବହାର କରି ଡିଜିଟାଲ ୱାଲେଟରେ ୧,୦୦୦ରୁ ଅଧିକ କାରବାର ପାଇଁ ମଧ୍ୟ ୧% ଫି ଲାଗୁ ହେବ।

ନୂଆଦିଲ୍ଲୀ:କେନ୍ଦ୍ର ସରକାର ସମ୍ପ୍ରତି ଜିଏସ୍‌ଟି ହାରରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛନ୍ତି। ଏଥିରେ ପ୍ରାୟ ୪୦୦ ସାମଗ୍ରୀ ଉପରୁ ଟିକସ ହାର ହ୍ରାସ ପାଇଛି। ନବରାତ୍ରିର ପ୍ରଥମ ଦିନ ଅର୍ଥାତ୍‌ ସେପ୍ଟେମ୍ବର ୨୨ଠାରୁ ନୂତନ ଜିଏସ୍‌ଟି ହାର ଲାଗୁ ହୋଇଛି। କେନ୍ଦ୍ର ସରକାର ଜିଏସ୍‌ଟିରେ ହ୍ରାସ ଘଟାଇଥ଄ଲେ ସୁଦ୍ଧା ବଜାର ଦରରେ ଖାଉଟିଙ୍କୁ ଏ ଯାଏ ତା’ର ଲାଭ ମିଳୁନାହିଁ।  ଏମିତିକି ଏ ପର୍ଯ୍ୟନ୍ତ ପ୍ୟାକେଜ୍ ଖାଦ୍ୟ ସହ ଔଷଧ ସାମଗ୍ରୀ କ୍ଷେତ୍ରରେ ଜିଏସ୍‌ଟି ହ୍ରାସ ପାଇ ନ ଥ଄ବା ଲୋକାଲ୍‌ ସର୍କଲ୍‌ ସର୍ଭେ ରିପୋର୍ଟରେ କୁହାଯାଇଛି। ଅପରପକ୍ଷେ ଜିଏସ୍ଟି ହାରରେ  ହ୍ରାସ ପୂର୍ବରୁ ବଡ଼ ବଡ଼ କମ୍ପାନୀଗୁଡ଼ିକ ଅନେକ ଉତ୍ପାଦର ମୂଲ୍ୟରେ ବୃଦ୍ଧି ଘଟାଇଥିବା ଭଳି ସାଂଘାତିକ ଅଭିଯୋଗ କରିଛି କଂଗ୍ରେସ। କରିଥିଲେ।

କଂଗ୍ରେସ ମହାସଚିବ ଜୟରାମ ରମେଶ 'ଏକ୍ସ'ରେ ଏକ ଗଣମାଧ୍ୟମ ରିପୋର୍ଟ ସେୟାର କରିଛନ୍ତି, ଯେଉଁଥିରେ କେନ୍ଦ୍ର ସରକାର ସେପ୍ଟେମ୍ବର ୨୨ ରୁ ଖାଦ୍ୟ ସାମଗ୍ରୀ ଉପରେ ଜିଏସ୍ଟି ହାର ୧୨ରୁ ୫ପ୍ରତିଶତକୁ ହ୍ରାସ କରିଛନ୍ତି । ଗ୍ରାହକମାନେ ଏଥିରୁ ସିଧାସଳଖ ଲାଭ ପାଇବା ଉଚିତ ଥିଲା, କିନ୍ତୁ ବାସ୍ତବତା ସମ୍ପୂର୍ଣ୍ଣ ବିପରୀତ। ରିପୋର୍ଟରେ ଦାବି କରାଯାଇଛି ଯେ ବଡ଼ ବଡ଼ କମ୍ପାନୀଗୁଡ଼ିକ ଟିକସ ହ୍ରାସ ବିଷୟରେ ଜାଣିବା ମାତ୍ରେ, ସେମାନଙ୍କ ଉତ୍ପାଦର ମୂଲ୍ୟ ୧୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଯାହାଫଳରେ ଜିଏସ୍ଟି ହାର ହ୍ରାସ ପରେ ସାଧାରଣ ଲୋକଙ୍କୁ ଉତ୍ପାଦର ବଜାର ମୂଲ୍ୟ କ୍ଷେତ୍ରରେ କୌଣସି ଆଶ୍ୱସ୍ତି ମିଳିନାହିଁ। ଏହା ‘ସଞ୍ଚୟ ଉତ୍ସବ ନୁହେଁ, ବରଂ ଏକ ଚପତ ମହୋତ୍ସବ’ ବୋଲି କଂଗ୍ରେସ କହିଛି।

ଏହି ସର୍ଭେ ରିପୋର୍ଟ ଅନୁଯାୟୀ, ପ୍ୟାକେଜ୍ ଖାଦ୍ୟ ଏବଂ ଔଷଧ ଉପରେ ଜିଏସ୍‌ଟି ହ୍ରାସର ଲାଭ ପ୍ରତି ୧୦ ଜଣ ଗ୍ରାହକଙ୍କ ମଧ୍ୟରୁ ତିନି ଜଣରୁ କମ୍ ଗ୍ରାହକଙ୍କ ପାଖରେ ପହଞ୍ଚିଛି। ଜିଏସ୍‌ଟି  ୨.୦ କାର୍ଯ୍ୟକାରୀ ହେବା ପରେ ଗ୍ରାହକଙ୍କୁ ପ୍ୟାକେଜ୍‌ଡ ଖାଦ୍ୟ ପାଇଁ କମ୍ ଦେୟ ଦେବାକୁ ପଡିବ ବୋଲି କୁହାଯାଉଥ଄ଲା। ସର୍ଭେ ହୋଇଥିବା ଲୋକଙ୍କ ମଧ୍ୟରୁ ୧୦% କହିଛନ୍ତି ଯେ ସେମାନେ ସମ୍ପୂର୍ଣ୍ଣ ଲାଭ ପାଇଛନ୍ତି, ଯେତେବେଳେ କି ୨୧% କହିଛନ୍ତି ଯେ ସେମାନେ କିଛି ଲାଭ ପାଇଛନ୍ତି। ସର୍ଭେରେ ସାମିଲ ଲୋକଙ୍କ ମଧ୍ୟରୁ ୪୭% କହିଛନ୍ତି ଯେ ସେମାନେ କୌଣସି ଲାଭ ପାଇନାହାଁନ୍ତି, ଯେତେବେଳେ କି ୨୧% ଲୋକ ଏ ନେଇ ନିରବ ରହିଛନ୍ତି। ଅପରପକ୍ଷେ ନୂତନ ଜିଏସ୍‌ଟି ହାର ଯାନବାହାନ କ୍ରୟକୁ ଶସ୍ତା କରିଛି କି ବୋଲି ପଚରାଯିବାରୁ ୭୬% ଲୋକ କହିଛନ୍ତି ଯେ ସେମାନେ ଜିଏସ୍‌ଟି ହାର ହ୍ରାସର ସମ୍ପୂର୍ଣ୍ଣ ଲାଭ ପାଇଛନ୍ତି। ୨୪% ଲୋକ କହିଛନ୍ତି ଯେ ସେମାନେ କେବଳ ଏ କ୍ଷେତ୍ରରେ ଏକ ଛୋଟ ଲାଭ ପାଇଛନ୍ତି।

ଜିଏସ୍‌ଟି ହାର ହ୍ରାସ ପରେ ଔଷଧ ସାମଗ୍ରୀ ମୂଲ୍ୟ କମିଛି କି ସର୍ଭେରେ ପଚରାଯାଇଥ଄ବା ପ୍ରଶ୍ନର ଉତ୍ତରରେ ୧୦% ଲୋକ କହିଛନ୍ତି ଯେ ସେମାନେ ଏ କ୍ଷେତ୍ରରେ ସମ୍ପୂର୍ଣ୍ଣ ଲାଭ ପାଇଛନ୍ତି। ସର୍ଭେରେ ସାମିଲ ହୋଇଥିବା ଲୋକଙ୍କ ମଧ୍ୟରୁ ୨୪% କହିଛନ୍ତି ଯେ ସେମାନେ ଜିଏସ୍‌ଟି ହ୍ରାସରୁ କିଛି ଲାଭ ପାଇଛନ୍ତି। ୬୨% ଲୋକ କହିଛନ୍ତି ଯେ ସେମାନେ ଏହି ହ୍ରାସରୁ କୌଣସି ଲାଭ ପାଇନାହାଁନ୍ତି, ଯେତେବେଳେ କି ୪% ଏହାର କୌଣସି ଉତ୍ତ ଦେଇନାହଁାନ୍ତି। 
ହ୍ବାଇଟ୍ ଗୁଡ୍ସ କିମ୍ବା ଇଲେକ୍ଟ୍ରୋନିକ୍ ଜିନିଷ କ୍ରୟ ଉପରେ ଗ୍ରାହକଙ୍କୁ ଜିଏସ୍‌ଟି ହାର ହ୍ରାସର ଲାଭ ଉପରେ ମତ ରଖି  ୩୩% ଲୋକ କହିଛନ୍ତି ଯେ ସେମାନେ କେବଳ ଏକ ଛୋଟ ଲାଭ ପାଇଛନ୍ତି। ୩୪%ଲୋକ କହିଛନ୍ତି ଯେ ସେମାନେ ସମ୍ପୂର୍ଣ୍ଣ ଲାଭ ପାଇସାରିଛନ୍ତି। ସେହିପରି ୩୩% ଲୋକ କହିଛନ୍ତି ଯେ ସେମାନେ ନୂତନ ହାରରୁ କୌଣସି ଲାଭ ପାଇନାହାଁନ୍ତି। ଲୋକାଲ୍‌ ସର୍କଲ୍ସ ଦ୍ୱାରା କରାଯାଇଥିବା ଏହି ସର୍ଭେରେ ୭୮,୦୦୦ ଲୋକ ଅଂଶଗ୍ରହଣ କରିଥିଲେ।

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଦ୍ବାରା ଦ୍ରବ୍ୟ ଏବଂ ସେବା ଟିକସ (ଜିଏସ୍‌ଟି) ହାରରେ ବଡ଼ ସଂସ୍କାର ଘୋଷଣା ପରେ ବଜାରରେ ନିତ୍ୟ ବ୍ୟବହାର୍ଯ୍ୟ ସମାଗ୍ରୀଗୁଡିକର ଦର ମହୁ ମାତ୍ରାରେ ହ୍ରାସ ଘଟିବ ବୋଲି କୁହାଯାଉଛି। ହେଲେ ପେଟ୍ରୋଲ ଏବଂ ଡିଜେଲର ଉଚ୍ଚ ଦର ସହ ଯୁଝୁଥିବା ସାଧାରଣ ଖାଉଟିଙ୍କୁ ଏଥିରୁ କୌଣସି ପ୍ରକାର ଅାଶ୍ବସ୍ତି ମିଳିପାରିନାହିଁ। କାରଣ ପେଟ୍ରୋଲ ଏବଂ ଡିଜେଲ ଏ ପର୍ଯ୍ୟନ୍ତ ଜିଏସ୍‌ଟି ପରିସରଭୁକ୍ତ ହୋଇପାରିନାହିଁ। ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସରଭୁକ୍ତ କରିବା ପାଇଁ ରାଜ୍ୟଗୁଡ଼ିକ ମଧ୍ୟରେ ଏ ପର୍ଯ୍ୟନ୍ତ ସହମତି ହୋଇପାରିନାହିଁ। ଯଦି ପେଟ୍ରୋଲ ଏବଂ ଡିଜେଲ ଜିଏସ୍‌ଟି ପରିସରକୁ ଆସିଯାଏ ତେବେ ଲିଟର ପିଛା ୧୦୦ ଟଙ୍କା ମୂଲ୍ୟରେ ପେଟ୍ରୋଲ ଏବଂ ଡିଜେଲ କିଣୁଥିବା ଗ୍ରାହକ ତାହାକୁ ଲିଟର ୬୮ ଟଙ୍କାରେ ପାଇବେ।

ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସରଭୁକ୍ତ କାହିଁକି କରାଯାଉନାହିଁ ସେ ସମ୍ପର୍କରେ ପଚରାଯାଇଥିବା ଏକ ପ୍ରଶ୍ନର ଉତ୍ତରରେ ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ, ସରକାର ଆଜି ମଧ୍ୟ ଏହାକୁ ଜିଏସ୍‌ଟି ପରିସରରେ ରଖିପାରିବେ, କିନ୍ତୁ ଏହା ଜିଏସ୍‌ଟି ପ୍ରସ୍ତାବରେ ନ ଥିଲା। ସେ କହିଛନ୍ତି ଯେ ଜିଏସ୍‌ଟି ଆଣିବା ସମୟରେ ମଧ୍ୟ ଆମେ ପେଟ୍ରୋଲ ଏବଂ ଡିଜେଲକୁ ଏହି ବର୍ଗରେ ରଖିବାକୁ ଚେଷ୍ଟା କରିଥିଲୁ, କିନ୍ତୁ ରାଜ୍ୟଗୁଡ଼ିକ ଏଥିପାଇଁ ପ୍ରସ୍ତୁତ ନ ଥିଲେ। ପେଟ୍ରୋଲିୟମ ଉତ୍ପାଦଗୁଡ଼ିକୁ ବର୍ତ୍ତମାନ ଜିଏସ୍‌ଟି ପରିସରଭୁକ୍ତ କରାଯିବନାହିଁ। ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସରଭୁକ୍ତ କରିବା ପାଇଁ ଦାବି ବହୁତ ଦିନ ଧରି ଚାଲିଛି।

ବର୍ତ୍ତମାନ, ପେଟ୍ରୋଲ ଏବଂ ଡିଜେଲ ଉପରେ ଉତ୍ପାଦ ଶୁଳ୍କ (କେନ୍ଦ୍ର ସରକାର) ଏବଂ ଭାଟ୍ (ରାଜ୍ୟ ସରକାର) ଲାଗୁ କରାଯାଏ। ବିଭିନ୍ନ ରାଜ୍ୟରେ ଟିକସ ହାର ଭିନ୍ନ, ଯାହା କାରଣରୁ ମୂଲ୍ୟ ମଧ୍ୟ ଭିନ୍ନ ରହିଛି। ଯଦି ଏହାକୁ ଜିଏସ୍‌ଟି ରେ ସାମିଲ କରାଯାଏ ତେବେ ସାରା ଦେଶରେ ଜିଏସ୍‌ଟି ହାର ସମାନ ହେବ। ବର୍ତ୍ତମାନ, ପେଟ୍ରୋଲ ଏବଂ ଡିଜେଲ ଉପରେ ମୋଟ ଟିକସ ୫୦ ପ୍ରତିଶତରେ ପହଞ୍ଚିଛି, କିନ୍ତୁ ଜିଏସ୍‌ଟିର ସର୍ବୋଚ୍ଚ ହାର ୧୮ ପ୍ରତିଶତ (ସେପ୍ଟେମ୍ବର ୨୨ ରୁ)। ଏପରି ପରିସ୍ଥିତିରେ, ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସରଭୁକ୍ତ କରି ଗ୍ରାହକମାନେ ଅତି କମରେ ୩୨ ପ୍ରତିଶତ ଅର୍ଥ ସଞ୍ଚୟ କରିପାରିବେ। ସରଳ ଭାଷାରେ, ଯଦି ପେଟ୍ରୋଲ ଏବଂ ଡିଜେଲ ଉପରେ ୧୮ ପ୍ରତିଶତ ହାରରେ ଜିଏସ୍‌ଟି ଲଗାଯାଏ, ତେବେ ଗ୍ରାହକ ୧୦୦ ଟଙ୍କା ମୂଲ୍ୟର ପେଟ୍ରୋଲ ଏବଂ ଡିଜେଲକୁ ଲିଟର ପିଛା ୬୮ ଟଙ୍କାରେ ପାଇପାରିବେ। ଯାହା ଫଳରେ ତେଲ ଲିଟର ପିଛା ପ୍ରାୟ ୩୫ ଟଙ୍କା କମିପାରିଥାଆନ୍ତା।

ଅପରପକ୍ଷେ ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ଅଧୀନରେ ଆଣିବା ପାଇଁ କେନ୍ଦ୍ର ଏବଂ ରାଜ୍ୟଗୁଡ଼ିକର ସମ୍ମତି ଆବଶ୍ୟକ। ପେଟ୍ରୋଲ ଏବଂ ଡିଜେଲ ଉପରେ ଆଦାୟ କରାଯାଉଥିବା ଭାଟ୍‌ ରାଜ୍ୟଗୁଡ଼ିକ ପାଇଁ ରାଜସ୍ୱର ଏକ ଗୁରୁତ୍ୱପୂର୍ଣ୍ଣ ଉତ୍ସ। ଜିଏସ୍‌ଟି ଲାଗୁ ହେଲେ ଭାଯ୍‌ ହଟାଇ ଦିଆଯିବ, ଯାହା ରାଜ୍ୟଗୁଡ଼ିକୁ ରାଜସ୍ୱ କ୍ଷତି ପହଞ୍ଚାଇବ। ସେଥିପାଇଁ ଅନେକ ରାଜ୍ୟ ଏଥିପାଇଁ ପ୍ରସ୍ତୁତ ନାହାଁନ୍ତି।

ଯେତେବେଳେ ରାଜ୍ୟଗୁଡ଼ି ଟିକସ ହାର ସହିତ ପ୍ରସ୍ତୁତ ହେବେ , ସେତେବେଳେ ପେଟ୍ରୋଲ ଏବଂ ଡିଜେଲକୁ ଜିଏସ୍‌ଟି ପରିସର ମଧ୍ୟକୁ ଅଣାଯାଇପାରିବ। ତଥାପି, ଏହାକୁ ଜିଏସ୍‌ଟି ପରିସରଭୁକ୍ତ କରିବା ପାଇଁ ଏହାବାଦ୍‌ ଜିଏସ୍‌ଟି ସଂସ୍କାର ଘୋଷଣା ପରେ ମଧ୍ୟ ଷ୍ଟକ୍ ବଜାର କାହିଁକି ଉପରମୁହଁା ହେଉନାହିଁ ସମ୍ପର୍କିତ ପ୍ରଶ୍ନର ଉତ୍ତରରେ ଅର୍ଥମନ୍ତ୍ରୀ କହିଛନ୍ତି ଯେ ବଜାର କେବେବି ଗୋଟିଏ କାରଣ ଉପରେ କାମ କରେ ନାହିଁ। ଏହା କାମ ନ କରିବାର ବିଭିନ୍ନ କାରଣ ହୋଇପାରେ। ଜିଏସ୍‌ଟି ହାରରେ ହ୍ରାସ ସାଧାରଣ କମ୍ପାନୀଗୁଡ଼ିକ ପାଇଁ ନୁହେଁ, ଜନସାଧାରଣଙ୍କ ପାଇଁ ଟିକସ ହ୍ରାସ କରାଯାଇଛି।

ନୂଆଦିଲ୍ଲୀ: ନୂଆ ସରକାର ଗଠନ ପରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହାର୍ଦ୍ଦିକ ସିଂ ପୁରୀ ଏକ ବଡ଼ ଘୋଷଣା କରିଛନ୍ତି। ସେ କହିଛନ୍ତି ଯେ ଏଥର ଦ୍ରବ୍ର ଏବଂ ସେବା ଟିକସ (ଜିଏସ୍‌ଟି) ଅଧୀନରେ ପେଟ୍ରୋଲ, ଡିଜେଲ ଏବଂ ପ୍ରାକୃତିକ ଗ୍ୟାସ ଭଳି ଉତ୍ପାଦଗୁଠିକୁ ଆଣିବା ପାଇଁ କେନ୍ଦ୍ର ସରକାର ସମସ୍ତ ପ୍ରକାର ଉଦ୍ୟମ କରିବେ। ଏହାଦ୍ବାରା ସାଧାରଣ ଲୋକଙ୍କୁ ବହୁତ ଆରାମ ମିଳିବ।

ଜିଏସ୍‌ଟି ପରିସରକୁ ପେଟ୍ରୋଲ ଏବଂ ଡିଜେଲ ପରି ଇନ୍ଧନ ଆଣିବା ପାଇଁ ଏହି ପ୍ରୟାସ ନୂଆ ନୁହେଁ। ଜିଏସ୍‌ଟି ବ୍ୟବସ୍ଥା କାର୍ଯ୍ୟକାରୀ ହେବା ଏବଂ ଜିଏସ୍‌ଟି ପରିଷଦର ପରବର୍ତ୍ତୀ ଗଠନ ହେବା ପରଠାରୁ ଏଥିପାଇଁ ପ୍ରୟାସ କରାଯାଉଛି। ଜିଏସ୍‌ଟି ପରିଷଦର ପ୍ରାୟ ପ୍ରତ୍ୟେକ ବୈଠକରେ ଏହି ପ୍ରସଙ୍ଗ ଆଗତ କରାଯାଇଛି। ହଲେ ପେଟ୍ରୋଲ ଏବଂ ଡିଜେଲ ଉପରେ ଭାଟ୍‌ ରାଜ୍ୟ ସରକାରଙ୍କ ପାଇଁ ଏକ ପ୍ରମୁଖ ଉତ୍ସ ହୋଇଥିବାରୁ ଏ ପର୍ଯ୍ୟନ୍ତ ରାଜ୍ୟଗୁଡିକ ମଧ୍ୟରେ ଏ ନେଇ ସହମତି ହୋଇପାରିନାହିଁ। ଏଭଳି ପରିସ୍ଥିତିରେ ଜିଏସ୍‌ଟି ଅଧୀନରେ ଆସୁଥିବା ଯୋଗୁ ପେଟ୍ରୋଲ ଏବଂ ଡିଜେଲ କ୍ଷେତ୍ରରେ ରାଜ୍ୟ ସରକାରମାନେ ସେମାନଙ୍କ ରାଜସ୍ୱ କ୍ଷତିର ସମ୍ମୁଖୀନ ହେବାକୁ ଚାହାଁନ୍ତିନାହିଁ। ତଥାପି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଗତ ବର୍ଷ ନଭେମ୍ବରରେ କହିଥିଲେ ଯେ ଗ୍ରାହକମାନେ ଜିଏସ୍‌ଟି ଅଧୀନକୁ ପେଟ୍ରୋଲ ଏବଂ ଡିଜେଲ ଆଣି ଅଧିକ ଲାଭବାନ ହେବେ। ଏଥିସହିତ, ଦେଶରେ ଏଥିପାଇଁ ବିଭିନ୍ନ ମୂଲ୍ୟ ଦେବାକୁ ପଡିବନାହିଁ। ଜିଏସ୍‌ଟି ଅଧୀନରେ ପେଟ୍ରୋଲ ଏବଂ ଡିଜେଲ ଆଣିବା ସହିତ ପେଟ୍ରୋଲିୟମ ମନ୍ତ୍ରୀ କହିଛନ୍ତି ଯେ ସରକାର ୨୦୩୦ ସୁଦ୍ଧା ପେଟ୍ରୋଲରେ ୨୦ ପ୍ରତିଶତ ଇଥାନଲ ମିଶ୍ରଣ କରିବାକୁ ଲକ୍ଷ୍ୟ ରଖିଛନ୍ତି, କିନ୍ତୁ ବର୍ତ୍ତମାନ ଏହା ଆସନ୍ତା ବର୍ଷ ଅର୍ଥାତ୍ ୨୦୨୫ ସୁଦ୍ଧା ଶେଷ ହେବ ବୋଲି ଆଶା କରାଯାଉଛି। ଏଥିସହ ସେ କହିଛନ୍ତି ଯେ ପେଟ୍ରୋଲିୟମ କ୍ଷେତ୍ରର ପିଏସ୍‌ୟୁଗୁଡିକର ଅଂଶଧନ ବିକ୍ରି କରିବା ସପକ୍ଷରେ ସରକାର ନାହାଁନ୍ତି।

ନୂଆଦିଲ୍ଲୀ : କେନ୍ଦ୍ର ସରକାର ମନି ଲଣ୍ଡ୍ରିଂ ଆଇନରେ ସଂଶୋଧନ ଆଣି ଦେଶରେ ଦ୍ରବ୍ୟ ଏବଂ ସେବା ଟିକସ (ଜିଏସ୍‌ଟି) ନିୟମକୁ ଅଧିକ କଡ଼ାକଡ଼ି କରିଛନ୍ତି। ଏହି ଅନୁଯାୟୀ, ନେଟୱାର୍କ (ଜିଏସ୍‌ଟିଏନ୍)କୁ ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (ପିଏମ୍‌ଏଲ୍‌ଏ) ଅଧୀନକୁ ଅଣାଯାଇଛି। ଏହାଦ୍ବାରା ଏଣିକି ଆଉ ଜିଏସ୍‌ଟି ଚୋରିରେ ନିସ୍ତାର ମିଳିବନାହିଁ। ସରକାରଙ୍କ ଏହି ନିୟମ ପରେ ଜିଏସଟିରେ ଜାଲିଆତି କରୁଥିବା ବ୍ୟକ୍ତି ବିପଦରେ ପଡିବେ। ନୂଆ ନିୟମରେ ଟିକସ ଫାଙ୍କିବା ଏବଂ ବିଲ୍‌ରେ ରିଗିଂ କରୁଥିବା ବ୍ୟକ୍ତିଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ। ଶନିବାର ବିଳମ୍ବିତ ରାତିରେ କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଏ ନେଇ ବିଜ୍ଞପ୍ତି ଜାରି କରାଯାଇଛି।

ଏଥିରେ କୁହାଯାଇଥିଲା ଯେ ଜିଏସ୍‌ଟି ଅଧୀନରେ ଥିବା ଅପରାଧ ଯେପରିକି ନକଲି ଇନପୁଟ୍ ଟିକସ କ୍ରେଡିଟ୍, ନକଲି ଇନଭଏସ୍ ଇତ୍ୟାଦି ପିଏମ୍‌ଏଲ୍‌ଏ ଅଧିନିୟମରେ ଅନ୍ତର୍ଭୂକ୍ତ କରାଯିବ। ସରକାରଙ୍କ ଏହି ନିଷ୍ପତ୍ତି ସହିତ ପିଏମ୍‌ଏଲ୍‌ଏ ଅଧିନିୟମ ଅନୁଯାୟୀ ଜିଏସ୍‌ଟିଏନରୁ ସୂଚନା ମଗାଯାଇପାରିବ। ଏହି ନୂତନ ସଂଶୋଧନ ସହିତ ଜିଏସ୍‌ଟିଏନ ଏବେ ସେହି ସଂସ୍ଥାଗଗୁଡିକ ସହ ସମକକ୍ଷ ହୋଇପାରିଛି ଯେଉଁଗୁଡିକ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏବଂ ଆର୍ଥିକ ଇଣ୍ଟେଲିଜେନ୍ସ ୟୁନିଟ୍ (ଏଫୟୁୟୁ) ସହିତ ସୂଚନା ସେୟାର କରିବା ଅନିବାର୍ଯ୍ୟ। ନକଲି ବିଲିଂ ମାଧ୍ୟମରେ ଟିକସ ଛାଡକୁ ରୋକିବା ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଅର୍ଥ ହେରଫେର କ୍ଷେତ୍ରରେ ଏହା ଇଡିକୁ ଅଧିକ କ୍ଷମତା ଦେବ।

ନୂଆଦିଲ୍ଲୀ : ଜିଏସଟି ସଂଗ୍ରହରେ ଜୁନ ୨୦୨୩ ରେ ରେକର୍ଡ ପରିମାଣରେ ବୃଦ୍ଧି ଘଟିଛି। ଅର୍ଥ ମନ୍ତ୍ରଣାଳୟ କହିଛି ଯେ ଜୁନ୍ ୨୦୨୩ ରେ ମୋଟ ୧,୬୧,୪୯୭ କୋଟି ଟଙ୍କା ଜିଏସଟି ସଂଗ୍ରହ କରାଯାଇଛି। ଏଥିରେ ଗତ ବର୍ଷ ଜୁନ୍ ତୁଳନାରେ ୧୨ ପ୍ରତିଶତ ବୃଦ୍ଧି ପଞ୍ଜିକୃତ ହୋଇଛି। ଅର୍ଥ ମନ୍ତ୍ରଣାଳୟ କହିଛି ଯେ ଦେଶରେ ଜିଏସଟି ଲାଗୁ ହେବା ପରେ ଏହା ଚତୁର୍ଥ ଥର ପାଇଁ ଜିଏସଟି ସଂଗ୍ରହ ୧.୬୦ ଲକ୍ଷ କୋଟି ଅତିକ୍ରମ କରିଛି। ଜିଏସ୍ଟି ୧ ଜୁଲାଇ ୨୦୧୭ ରେ ଲାଗୁ କରାଯାଇଥିଲା। ୨୦୨୧ -୨୨, ୨୦୨୨ – ୨୩ ଏବଂ ୨୦୨୩ – ୨୪ ଆର୍ଥିକ ବର୍ଷର ପ୍ରଥମ ତ୍ରୟ ମାସରେ ହାରାହାରି ମାସିକ ଜିଏସଟି ସଂଗ୍ରହ ଯଥାକ୍ରମେ ୧.୧୦ ଲକ୍ଷ କୋଟି, ୧.୫୧ ଲକ୍ଷ କୋଟି ଏବଂ ୧.୬୯ ଲକ୍ଷ କୋଟିରେ ପହଞ୍ଚିଛି। ଏଥିରୁ ଏହା ସ୍ପଷ୍ଟ ହୋଇଛି ଯେ ଜିଏସଟି ସଂଗ୍ରହ କ୍ରମାଗତ ଭାବରେ ବୃଦ୍ଧି ପାଉଛି।

ନୂଆଦିଲ୍ଲୀ: ୨୦୨୩ ଏପ୍ରିଲ ମାସରେ ଦେଶରେ ମୋଟ ୧, ୮୭,୦୩୫ କୋଟି ଟଙ୍କାର ଦ୍ରବ୍ୟ ଏବଂଳସେବା ଟିକସ (ଜିଏସ୍‌ଟି) ସଂଗୃହୀତ ହୋଇଛି। ସେଥିରେ କେନ୍ଦ୍ରୀୟ ଜିଏସ୍‌ଟିର ପରିମାଣ ୩୮, ୪୪୦ କୋଟି, ରାଜ୍ୟ ଜିଏସ୍‌ଟିର ଅଂଶ ୪୭, ୪୧୨ କୋଟି ଓ ସମନ୍ୱିତ ଜିଏସ୍‌ଟିର ପରିମାଣ ୮୯, ୧୮୫ କୋଟି ଟଙ୍କା। ଏଥିରେ ସାମଗ୍ରୀ ଆମଦାନୀ ଜନିତ ୩୪, ୯୭୨କୋଟି ଟଙ୍କାର ଟିକସ ଓ ୧୨, ୦୨୫କୋଟି ଟଙ୍କାର ସେସ୍ ଅନ୍ତର୍ଭୁକ୍ତ। ଏହି ସମୟରେ କେନ୍ଦ୍ର ସରକାର କେନ୍ଦ୍ରୀୟ ଜିଏସ୍‌ଟି ବାବଦରେ ୪୫, ୮୬୪, ରାଜ୍ୟ ଜିଏସ୍‌ଟି ଓ ସିଜିଏସଟି ବାବଦ ୩୭, ୯୫୯ କୋଟି ଟଙ୍କାର ଦେୟ ବଣ୍ଟନ କରିଛନ୍ତି।

୨୦୨୩ ଏପ୍ରିଲରେ ନିୟମିତ ଟିକସ ବାବଦ ଅର୍ଥ ପରିଶୋଧ ପରେ କେନ୍ଦ୍ର ଓ ରାଜ୍ୟମାନଙ୍କର ମୋଟ ରାଜସ୍ୱ ପରିମାଣ ୮୪, ୩୦୪ କୋଟି କେନ୍ଦ୍ରୀୟ ଓ ୮୫, ୩୭୧କୋଟି ରାଜ୍ୟ ଜିଏସ୍‌ଟି। ଏପ୍ରିଲ ୨୦୨୩ରେ ଆଦାୟ ହୋଇଥିବା ଜିଏସ୍‌ଟି ରାଜସ୍ୱ ଗତବର୍ଷର ସମାନ ମାସଠାରୁ ୧୨% ଅଧିକ। ଏହି ମାସରେ ଘରୋଇ କାରବାର (ସେବା ଆମଦାନୀ ସହିତ ) ଗତବର୍ଷଠାରୁ ୧୬% ଅଧିକ ଥିଲା। ପ୍ରଥମ ଥର ପାଇଁ ମୋଟ ଜିଏସଟି ସଂଗ୍ରହ ୧. ୭୫ ଲକ୍ଷ କୋଟି ଟଙ୍କାକୁ ଅତିକ୍ରମ କରିଛି। ମୋଟ ଇ-ୱେ ବିଲ ସଂଖ୍ୟା ୨୦୨୩ ମାର୍ଚ୍ଚ ମାସରେ ଥିଲା ୯କୋଟି।
ଏହା ୨୦୨୩ ଫେବୃୟାରୀ ମାସଠାରୁ ୧୧% ଅଧିକ।

୨୦୨୩ ଏପ୍ରିଲ ମାସରେ ଗୋଟିଏ ଦିନରେ ଅର୍ଥାତ ଏପ୍ରିଲ ୨୦ତାରିଖରେ ସର୍ବାଧିକ ୬୮, ୨୨୮କୋଟି ଟଙ୍କାର ଜିଏସ୍‌ଟି ଆଦାୟ ହୋଇଛି। ମୋଟ ୯.୮ ଲକ୍ଷ ଟ୍ରାନ୍‌ଜାକସନ ଜରିଆରେ ଟିକଟଦାତା ଏହି ଟିକସ ପୈଠ କରିଛନ୍ତି। ବର୍ଷକୁ ବର୍ଷ ଭିତ୍ତିରେ ଗତବର୍ଷ ତୁଳନାରେ ଏହି ସଂଗ୍ରହ ଗୋଟିଏ ଦିନରେ ସର୍ବାଧିକ। ୨୦୨୩ ଏପ୍ରିଲ ୨୦ରେ ୯.୮ ଟ୍ରାଞ୍ଜାକସନ ଜରିଆରେ ମୋଟ ୬୮,୨୨୮ କୋଟି ଟଙ୍କାର ଜିଏସ୍‌ଟି ସଂଗୃହୀତ ହୋଇଥିବାବେଳେ ଗତବର୍ଷ ସମାନ ତାରିଖରେ ୯.୬ଲକ୍ଷ କାରବାର ମାଧ୍ୟମରେ ସଂଗୃହୀତ ହୋଇଥିଲା ୫୭, ୮୪୬ ଟଙ୍କାର ଜିଏସ୍‌ଟି।

ନୂଆଦିଲ୍ଲୀ: ଆସନ୍ତା ମାସ ଅର୍ଥାତ୍ ମେ’ ପହିଲାଠାରୁ ଦେଶରେ ଦ୍ରବ୍ୟ ଏବଂ ସେବା ଟିକସ (ଜିଏସ୍‌ଟି) ନିୟମରେ ବହୁତ କିଛି ପରିବର୍ତ୍ତନ ଘଟିବାକୁ ଯାଉଛି। ଏହି ନୂତନ ନିୟମ ମେ’ ପହିଲାରୁ କାର୍ଯ୍ୟକାରୀ ହେବ। ବାସ୍ତବରେ, ଜିଏସ୍‌ଟି ନେଟୱାର୍କ (ଜିଏସ୍‌ଟିଏନ୍) କାରବାର ସମ୍ବନ୍ଧୀୟ ନିୟମରେ ପରିବର୍ତ୍ତନ ଆସିବ। ଜିଏସ୍‌ଟିଏନ୍ କହିଛି ଯେ ମେ’ ପହିଲାଠାରୁ ଇନଭଏସ୍ ରେଜିଷ୍ଟ୍ରେସନ୍ ପୋର୍ଟାଲ୍ (ଆଇଆରପି)ରେ କୌସି କାରବାରର ରସିଦ ଅପଲୋଡ୍ କରିବା ଆବଶ୍ୟକ ହେବ। ଏହାପରେ ଇନଭଏସ୍ ରେଜିଷ୍ଟ୍ରେସନ୍ ପୋର୍ଟାଲ୍ (ଆଇଆରପି) ରେ କାରବାରର ରସିଦ ଅପଲୋଡ୍ ହେବ ନାହିଁ।

ଦ୍ରବ୍ୟ ଏବଂ ସେବା କରରେ ଏହି ପରିବର୍ତ୍ତନ ନିୟମ ସେହି କମ୍ପାନୀଗୁଡିକ ପାଇଁ ଲାଗୁ ହେବ ଯାହାର କାରବାର ୧୦୦ କୋଟି ଟଙ୍କା କିମ୍ବା ତା’ଠାରୁ ଅଧିକ। ଏପରି ପରିସ୍ଥିତିରେ କମ୍ପାନୀଗୁଡ଼ିକୁ ଇନ୍‌ଭଏସ୍‌ ରେଜିଷ୍ଟ୍ରସନ୍‌ ପୋର୍ଟାଲ୍‌ରେ ଇଲେକ୍ଟ୍ରୋନିକ୍ ଇନଭଏସ୍ ଅପଲୋଡ୍ କରିବାକୁ ପଡିବ। ଏହାର ଅର୍ଥ ହେଉଛି ଯେଉଁଠାରେ ଇନଭଏସ୍ ଜେନେରେଟ୍ ବା ସୃଷ୍ଟି ହୁଏ , ଏ ସମ୍ପର୍କରେ ରିପୋର୍ଟ କରିବାର ତାରିଖରେ ଏହା କୌଣସି ଫରକ ପକାଏ ନାହିଁ। ଜିଏସ୍‌ଟି ନେଟୱାର୍କ ଅନୁଯାୟୀ, ଧାର୍ଯ୍ୟ କାରବାର ଅଧୀନରେ ଥିବା ଟିକସଦାତାମାନେ ରିପୋର୍ଟର ତାରିଖଠାରୁ ୭ ଦିନ ମଧ୍ୟରେ ଦାଖଲ କରିବା ଆବଶ୍ୟକ, ଠିକ୍ ସମୟରେ ଅନୁପାଳନ ନିଶ୍ଚିତ ହେବ। ୭ଦିନରୁ ଅଧିକ ପୁରୁଣା ଇନଭଏସ୍ ସମ୍ପର୍କରେ ରିପୋର୍ଟ କରିବାକୁ କୌଣସି ସୁବିଧା ନାହିଁ।

ସମସ୍ତ ଯୋଗ୍ୟ ଟିକସଦାତାଙ୍କୁ ଏହି ପରିବର୍ତ୍ତନକୁ ପାଳନ କରିବା ପାଇଁ ପର୍ଯ୍ୟାପ୍ତ ସମୟ ଦେବା ପାଇଁ ସରକାର ଏହି ପରିବର୍ତ୍ତନକୁ ଆସନ୍ତା ମେ’ ପହିଲାରୁ କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛନ୍ତି। ଜିଏସ୍୍‌ଟି ନିୟମ ଅନୁଯାୟୀ, ଯଦି ଆଇଆର୍‌ପିରେ ଏକ ଇନଭଏସ୍ ଅପଲୋଡ୍ ହୁଏ ନାହିଁ, ତେବେ ବ୍ୟବସାୟୀମାନେ ଏଥିରେ ଥିବା ଇନପୁଟ୍ ଟ୍ୟାକ୍ସ କ୍ରେଡିଟ୍ (ଆଇଟିସି)ର ଲାଭ ଉଠାଇପାରିବେ ନାହିଁ। ବର୍ତ୍ତମାନ କମ୍ପାନୀଗୁଡିକ ସେମାନଙ୍କର ଇ-ଇନଭଏସ୍ ଯେ କୌଣସି ସମୟରେ ଅପଲୋଡ୍ କରିପାରିବେ। ଏହି କାରଣରୁ, କମ୍ପାନୀଗୁଡିକ ବେଳେବେଳେ ଇ-ଇନଭଏସ୍ ଅପଲୋଡ୍ କରିବାରେ ବିଳମ୍ବ କରନ୍ତି। ବର୍ତ୍ତମାନ ନୂତନ ନିୟମ ଲାଗୁ ହେବା ପରେ କମ୍ପାନୀଗୁଡ଼ିକୁ ମାତ୍ର ୭ ଦିନ ସମୟ ମିଳିବ।

ନୂଆଦିଲ୍ଲୀ : ଦୀର୍ଘ ଦିନ ହେବ ଖୁବ୍‌ ଉପରେ ରହିଥିବା ପେଟ୍ରୋଲ ଏବଂ ଡିଜେଲ ଦର ବୃଦ୍ଧିରେ ଖାଉଟି ବେହାଲ। ତେଲ ଦର ବୃଦ୍ଧି ଯୋଗୁ ବଜାରରେ ଅତ୍ୟାବଶ୍ୟକ ସାମଗ୍ରୀ ଦର ଖୁବ୍‌ ଉପରେ। ଏହି ଦର ବୃଦ୍ଧିରୁ ଖାଉଟିଙ୍କୁ ନିସ୍ତାର ଦେବାକୁ କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ମୂଲ୍ୟ କମ୍‌ କରିବାକୁ ବିଚାର କରୁଥିବା ଜଣାଯାଇଛି। ଏଥିପାଇଁ ପେଟ୍ରୋଲ ଏବଂ ଡିଜେଲ ଉପରେ ଜିଏସ୍‌ଟି ଲଗାଯିବ। ଉଭୟ ତୈଳକୁ ଜିଏସ୍‌ଟି ପରିସରଭୁକ୍ତ କରିବା ନେଇ ଯୋଜନା ହୋଇଛି। ହେଲେ ଏ ନେଇ ରାଜ୍ୟଗୁଡିକ କୋର୍ଟକୁ ବଲ୍‌ ଛାଡିଦେଇଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ। ନିର୍ମଳା କହିଛନ୍ତି ପେଟ୍ରୋଲ ଏବଂ ଡିଜେଲ ଭଳି ପେଟ୍ରୋଲିୟମ ଉତ୍ପାଦକୁ ଜିଏସ୍‌ଟି ପରିସରଭୁକ୍ତ କରିବାକୁ ହେଲେ ରାଜ୍ୟଗୁଡିକର ସହମତି ଆବଶ୍ୟକ। ଯଦି ରାଜ୍ୟମାନେ ସହମତ ହୁଅନ୍ତି ତେବେ ସରକାର ପେଟ୍ରୋଲିୟମ ଉତ୍ପାଦକୁ ଜିଏସ୍‌ଟି ଅଧୀନକୁ ଆଣିବେ।

ଶନିବାର ଅନୁଷ୍ଠିତ ହେବାକୁ ଥିବା ଜିଏସ୍‌ଟି ପରିଷଦ ବୈଠକ ପୂର୍ବରୁ ଅର୍ଥମନ୍ତ୍ରୀଙ୍କ ଏହି ବିବୃତ୍ତି ଆସିଛି। ବୁଧବାର ଶିଳ୍ପ ସଂଗଠନ ପିଏଚ୍‌ଡି ଚାମ୍ବର ଅଫ୍ କମର୍ସ ଆଣ୍ଡ ଇଣ୍ଡଷ୍ଟ୍ରି (ପିଏଚ୍‌ଡିସିସିଆଇ) ପକ୍ଷରୁ ଆୟୋଜିତ ଏକ ବଜେଟ୍ ପରବର୍ତ୍ତୀ ବୈଠକକୁ ସମ୍ବୋଧିତ କରି ସୀତାରମଣ କହିଛନ୍ତି ଯେ ଗତ କିଛି ବର୍ଷ ଧରି ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ଜନସାଧାରଣଙ୍କ ଖର୍ଚ୍ଚ ବଢ଼ାଇବାକୁ ସରକାରଙ୍କ ଉଦ୍ୟମ କରୁଛନ୍ତି। ଗତ ୩-୪ ବର୍ଷ ଧରି ସର୍ବସାଧାରଣ ପୁଞ୍ଜି ବ୍ୟୟ ଉପରେ ଗୁରୁତ୍ୱ ଦିଆଯାଇ ଆସୁଛି। ଆମେ ଏହାକୁ ଏହି ବଜେଟରେ ମଧ୍ୟ ଜାରି ରଖିଛୁ। ଏହା ସ୍ପଷ୍ଟ ଭାବେ କୁହାଯାଇପାରେ ଯେ ଏହି ବଜେଟରେ ପୁଞ୍ଜି ବ୍ୟୟ ଉପରେ ଗୁରୁତ୍ୱ ଦିଆଯାଇଛି।

ସରକାର ୨୦୨୩-୨୪ ଆର୍ଥିକବର୍ଷର ବଜେଟରେ ପୁଞ୍ଜି ବ୍ୟୟରେ ୩୩% ବୃଦ୍ଧି କରି ୧୦ ଲକ୍ଷ କୋଟି ଟଙ୍କାକୁ ବୃଦ୍ଧି କରିଛନ୍ତି। ଦ୍ରବ୍ୟ ଏବଂ ସେବା କର ଅଧୀନକୁ ପେଟ୍ରୋଲିୟମ ଉତ୍ପାଦ ଆଣିବା ସମ୍ପର୍କିତ ସାମ୍ବାଦିକମାନେ ପଚାରିଥିବା ପ୍ରଶ୍ନର ଉତ୍ତରରେ ଅର୍ଥମନ୍ତ୍ରୀ କହିଛନ୍ତି ଯେ ଯଦି ରାଜ୍ୟମାନଙ୍କ ମଧ୍ୟରେ ଏ ନେଇ ସହମତି ହୁଏ ତେବେ ଏଥିପାଇଁ ପଦକ୍ଷେପ ନିଆଯାଇପାରେ। ଦେଶରେ ସମ୍ପ୍ରତି ଖୁଚୁରା ମୁଦ୍ରାସ୍ଫୀତିରେ ପୁନର୍ବାର ବୃଦ୍ଧି ଘଟିଛି। ଜାନୁୟାରୀରେ ଏହା ୬.୫୨ ପ୍ରତିଶତ ହାରରେ ରହିଛି, ଯାହା ଭାରତୀୟ ରିଜର୍ଭ ବ୍ୟାଙ୍କର ସର୍ବାଧିକ ସୀମା ୬ ପ୍ରତିଶତଠାରୁ ଅଧିକ । ଏଭଳି ପରିସ୍ଥିତିରେ କେନ୍ଦ୍ର ସରକାର ଖୁବ ଶୀଘ୍ର ପେଟ୍ରୋଲ ଏବଂ ଡିଜେଲ ଉପରେ ଟିକସ ହାର ହ୍ରାସ କରିପାରନ୍ତି, ଯାହାଫଳରେ ମୁଦ୍ରାସ୍ଫୀତି ନିୟନ୍ତ୍ରଣ ହୋଇପାରିବ।

ନୂଆଦିଲ୍ଲୀ: ୨୦୨୨ ଶେଷ ହେବାକୁ ଆଉ ଅଳ୍ପ କିଛି ଦିନ ବାକି ରହିଛି। ୨୦୨୩ଠାରୁ ମଧ୍ୟ କେତେକ ଗୁରୁତ୍ୱପୂର୍ଣ୍ଣ ନିୟମ ବଦଳିବାକୁ ଯାଉଛି। ଏଥିରେ କ୍ରେଡିଟ୍ କାର୍ଡ, ବ୍ୟାଙ୍କ ଲକର, ଜିଏସ୍‌ଟି ଇ-ଇନ୍‌ଭଏସ୍, ପେଟ୍ରୋଲ-ଡିଜେଲ ଏବଂ ଏଲପିଜି ମୂଲ୍ୟ କ୍ଷେତ୍ରରେ କିଛି ପରିବର୍ତ୍ତନ ଅନ୍ତର୍ଭୁକ୍ତ।

ଲକରରେ ଥିବା ସାମଗ୍ରୀର କ୍ଷତି ପାଇଁ ବ୍ୟାଙ୍କ ଦାୟୀ

ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ବ୍ୟାଙ୍କ ଲକର ସହ ଜଡିତ ନୂତନ ନିର୍ଦ୍ଦେଶନାମା ଜାରି କରିଛି। ଏହି ନିୟମଗୁଡିକ ଆସନ୍ତା ଜାନୁୟାରୀ ପହିଲାଠାରୁ କାର୍ଯ୍ୟକାରୀ ହେବ। ଏହି ନିୟମ ଲାଗୁ ହେବା ପରେ ବ୍ୟାଙ୍କଗୁଡ଼ିକ ଲକର ପ୍ରସଙ୍ଗରେ ଗ୍ରାହକଙ୍କ ସହିତ ଆଉ ଇଚ୍ଛାଧୀନ କାର୍ଯ୍ୟ କରିବାକୁ ସମର୍ଥ ହେବେ ନାହିଁ। ଏହି ନିୟମାବଳୀ କାର୍ଯ୍ୟକାରୀ ହେବା ପରେ, ଯଦି ବ୍ୟାଙ୍କ ଲକରରେ ରଖାଯାଇଥିବା ସାମଗ୍ରୀର କୌଣସି କ୍ଷତି ହୁଏ, ତେବେ ଏଥିପାଇଁ ବ୍ୟାଙ୍କ ଦାୟୀ। ବ୍ୟାଙ୍କ ଏବଂ ଗ୍ରାହକଙ୍କ ମଧ୍ୟରେ ଏ ନେଇ ଏକ ଚୁକ୍ତିନାମା ସ୍ୱାକ୍ଷରିତ ହେବ। ଏହା ୩୧ ଡିସେମ୍ବର ପର୍ଯ୍ୟନ୍ତ ବୈଧ୍ୟ ରହିବ। ଏହାଫଳରେ ବ୍ୟାଙ୍କଗୁଡ଼ିକୁ ଏମ୍‌ଏମ୍‌ଏସ୍‌ ଏବଂ ଅନ୍ୟାନ୍ୟ ଉପାୟ ମାଧ୍ୟମରେ ଗ୍ରାହକଙ୍କୁ ଲକର ସମ୍ବନ୍ଧୀୟ ନିୟମର ପରିବର୍ତ୍ତନ ବିଷୟରେ ସମସ୍ତ ସୂଚନା ଦେବାକୁ ପଡିବ।

ପେଟ୍ରୋଲ-ଡିଜେଲ ଏବଂ ଏଲପିଜିର ନୂଆ ଦର

ପ୍ରତ୍ୟେକ ମାସର ଆରମ୍ଭ ସହିତ ପେଟ୍ରୋଲିୟମ କମ୍ପାନୀଗୁଡ଼ିକ ପେଟ୍ରୋଲ ଏବଂ ଡିଜେଲର ନୂଆ ଦର ସ୍ଥିର କରିଥାନ୍ତି। ପେଟ୍ରୋଲ ଏବଂ ଡିଜେଲ ଦେଶରେ ଦୀର୍ଘ ମାସ ହେବ ସ୍ଥିର ରହିଛି। ଏଭଳି ପରିସ୍ଥିତିରେ ବର୍ଷର ଶେଷ ଦିନରେ ତୈଳ କମ୍ପାନୀଗୁଡ଼ିକ ପେଟ୍ରୋଲ ଏବଂ ଡିଜେଲର ନୂଆ ମୂଲ୍ୟ ସ୍ଥିର କରିବେ। ଏହି ନୂଆ ଦର ଜାନୁଆରୀ ପହିଲା ସକାଳୁ ସ୍ପଷ୍ଟ ହୋଇଯିବ। ପେଟ୍ରୋଲ ଏବଂ ଡିଜେଲ ସହିତ ଘରୋଇ ଏବଂ ବାଣିଜ୍ୟିକ ଏଲପିଜି ସିଲିଣ୍ଡର ମୂଲ୍ୟରେ ପରିବର୍ତ୍ତନ ମଧ୍ୟ ଘୋଷଣା କରାଯାଇପାରେ। ପେଟ୍ରୋଲ ଏବଂ ଡିଜେଲ ସହିତ ଗାଡିରେ ବ୍ୟବହୃତ ସିଏନ୍‌ଜି ଏବଂ ଘରୋଇ ରୋଷେଇ ଘରେ ବ୍ୟବହୃତ ପିଏନ୍‌ଜି ଗ୍ୟାସର ମୂଲ୍ୟରେ ମଧ୍ୟ ପରିବର୍ତ୍ତନ ହୋଇପାରେ।

କ୍ରେଡିଟ୍ କାର୍ଡ ପୁରସ୍କାର ପଏଣ୍ଟ ସହିତ ଜଡିତ ନିୟମ ପରିବର୍ତ୍ତନ ହେବ

ନୂଆବର୍ଷରୁ କ୍ରେଡିଟ୍ କାର୍ଡ ବ୍ୟବହାର ସମ୍ପର୍କିତ ନିୟମ ପରିବର୍ତ୍ତନ ହେବ। ଏହି ପରିବର୍ତ୍ତନ କ୍ରେଡିଟ୍ କାର୍ଡ ମାଧ୍ୟମରେ ଦେୟ ଉପରେ ଅର୍ଜନ ହୋଇଥିବା ପୁରସ୍କାର ପଏଣ୍ଟ ସହିତ ଜଡିତ। ନୂତନ ବର୍ଷ ଆରମ୍ଭରୁ ଏଚ୍‌ଡିଏଫ୍‌ସି ବ୍ୟାଙ୍କ ଏହାର କ୍ରେଡିଟ୍ କାର୍ଡ ଦେୟ ଉପରେ ପ୍ରାପ୍ତ ପୁରସ୍କାର ପଏଣ୍ଟରେ କିଛି ପରିବର୍ତ୍ତନ କରିବାକୁ ଯାଉଛି। ଏଭଳି ପରିସ୍ଥିତିରେ ଗ୍ରାହକମାନଙ୍କୁ ୩୧ ଡିସେମ୍ବର ପୂର୍ବରୁ ସେମାନଙ୍କର କ୍ରେଡିଟ କାର୍ଡରେ ଅବଶିଷ୍ଟ ସମସ୍ତ ପୁରସ୍କାର ପଏଣ୍ଟ ଦେବାକୁ ପରାମର୍ଶ ଦିଆଯାଇଛି।

ଜିଏସ୍‌ଟି ଇ-ଇନଭଏସ୍ ସହିତ ଜଡିତ ନିୟମ ବଦଳିପାରେ

ନୂତନ ବର୍ଷରେ ଜିଏସ୍‌ଟି ଇ-ଇନଭଏସ୍ ଏବଂ ଇଲେକ୍ଟ୍ରୋନିକ୍ ବିଲ୍ ସହିତ ଜଡିତ ନିୟମରେ ମଧ୍ୟ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ହେବ। ଜିଏସ୍‌ଟି ଇ-ଇନଭଏସ୍ ପାଇଁ କାରବାର ସୀମା ୨୦ କୋଟିରୁ ୫ କୋଟି ଟଙ୍କାକୁ ହ୍ରାସ କରାଯାଇଛି। ଜିଏସ୍‌ଟି ନିୟମରେଏହି ପରିବର୍ତ୍ତନଗୁଡିକ ଜାନୁଆରୀ ୨୦୨୩ ଜାନୁଆରୀ ପହିଲାଠାରୁ ଲାଗୁ ହେବ। ଏପରି ପରିସ୍ଥିତିରେ ଯେଉଁ ବ୍ୟବସାୟୀମାନଙ୍କର କାରବାର ୫ କୋଟି ଟଙ୍କା କିମ୍ବା ତା’ଠାରୁ ଅଧିକ ଇଲେକ୍ଟ୍ରୋନିକ୍ ବିଲ୍ ସୃଷ୍ଟି କରିବା ଆବଶ୍ୟକ ହେବ।

ଗାଡ଼ି କିଣିବା ମହଙ୍ଗା ହେବ

ନୂଆବର୍ଷଠାରୁ ନୂତନ ଗାଡ଼ି କିଣିବା ମହଙ୍ଗା ହୋଇପାରେ। ଏମ୍‌ଜି ମୋଟର, ମାରୁତି ସୁଜୁକି, ହ୍ୟୁଣ୍ଡାଇ ମୋଟର୍ସ, ହୋଣ୍ଡା, ଟାଟା ମୋଟର୍ସ, ରେନୋ, ଅଡି ଏବଂ ମର୍ସିଡିଜ୍-ବେଞ୍ଜ୍ ସହିତ ପ୍ରମୁଖ ଅଟୋମୋବାଇଲ୍ କମ୍ପାନୀଗୁଡିକ ୨୦୨୩ରୁ ସେମାନଙ୍କ ଗାଡିର ମୂଲ୍ୟ ବୃଦ୍ଧି କରିବାକୁ ଘୋଷଣା କରିଛନ୍ତି। ଟାଟା ମୋଟର୍ସ କହିଛି ଯେ ଏହା ଜାନୁୟାରୀ ୨ରୁ ଏହାର ବାଣିଜ୍ୟିକ ଯାନ ମୂଲ୍ୟ ବୃଦ୍ଧି କରିବ। ହୋଣ୍ଡା ମଧ୍ୟ ଏହାର କାର ମୂଲ୍ୟ ୩୦,୦୦୦ ଟଙ୍କା ପର୍ଯ୍ୟନ୍ତ ବୃଦ୍ଧି କରିବ ବୋଲି କହିଛି। ଏଭଳି ପରିସ୍ଥିତିରେ, ଯଦି ଆପଣ ନୂଆବର୍ଷରେ ଏକ ନୂଆ ଗାଡି କିଣିବାକୁ ଯୋଜନା କରୁଛନ୍ତି, ତେବେ ଏହା ବର୍ତ୍ତମାନର ଗାଡି ମୂଲ୍ୟ ଅପେକ୍ଷା ଆପଣଙ୍କ ପାଇଁ ମହଙ୍ଗା ହୋଇପାରେ।

ନୂଆଦିଲ୍ଲୀ : ଶନିବାର ବସିବାକୁ ଯାଉଛି ଦ୍ରବ୍ୟ ଏବଂ ସେବା ଟିକସ (ଜିଏସ୍‌ଟି) ପରିଷଦର ୪୮ତମ ବୈଠକ। ଚଳିତଥର ଭର୍ଚୁଆଲ୍‌ ମୋଡ୍‌ରେ ବସିବାକୁ ଥିବା ଏହି ବୈଠକରେ ଅନେକ ଉତ୍ପାଦ ଉପରେ ଜିଏସ୍‌ଟି ଧାର୍ଯ୍ୟ ନେଇ ନିଷ୍ପତ୍ତି ନିଆଯିବ। ବୈଠକରେ ବିଶେଷ କରି ଗୁଟଖା ଏବଂ ପାନ ମସଲା ଉପରେ ୩୮ ପ୍ରତିଶତ ଟିକସ ଲାଗୁ କରିବାର ପ୍ରସ୍ତାବ ସମେତ ଅନ୍‌ଲାଇନ୍ ଗେମିଂ, କ୍ୟାସିନୋ ଏବଂ ଘୋଡା ଦୌଡ଼ ଉପରେ ୨୮% ପ୍ରତିଶତ ଜିଏସ୍‌ଟି ଲାଗୁ କରିବା ଭଳି ପ୍ରସଙ୍ଗ ଉପରେ ଆଲୋଚନା କରାଯାଇପାରେ।

ଓଡ଼ିଶା ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କ ଅଧ୍ୟକ୍ଷତାରେ ଗଠିତ ଏକ କମିଟି ଗୁଟଖା ଏବଂ ପାନ ମସଲା ଉପରେ ୩୮ ପ୍ରତିଶତ ଟିକସ ଲାଗୁ କରିବା ସମ୍ପର୍କିତ ଏକ ପ୍ରସ୍ତାବ ଉପରେ ବିଚାର କରିପାରେ। ଯଦି ଏହା ହୁଏ ତେିବେ ଆଗାମୀ ଦିନରେ ଗୁଟ୍‌ଖା ଏବଂ ପାନ ମସଲା ମହଙ୍ଗା ହେବ। ବୈଠକ ମନ୍ତ୍ରୀଗୋଷ୍ଠୀ ଜିଏସ୍‌ଟି ହାର ଲାଗୁ ପ୍ରସଙ୍ଗରେ ତା’ର ରିପୋର୍ଟ ଦାଖଲ କରିସାରିଛି। ମନ୍ତ୍ରୀ ଗୋଷ୍ଠୀ ଗୁଟଖା ଏବଂ ପାନ ମସଲା ଉପରେ ସ୍ବତନ୍ତ୍ର ଭାବେ ୩୮% ଟିକସ ଲାଗୁ କରିବା ସମ୍ପର୍କିତ ପ୍ରସ୍ତାବ ଉପସ୍ଥାପନ କରିବାର ଯଥେଷ୍ଟ ସମ୍ଭାବନା ରହିଛି। ଯଦି ଏହାକୁ ପରିଷଦ ଅନୁମୋଦନ ଦିଏ ତେବେ ଗୁଟଖା ଏବଂ ପାନ୍ ମସାଲା ମହଙ୍ଗା ହେବ ଏବଂ ସରକାର ଏହାର ବିକ୍ରୟରୁ ଅଧିକ ରାଜସ୍ୱ ପାଇବେ।

ଗୁଟଖା ଏବଂ ପାନ୍ ମସାଲା ଉପରେ ଲାଗୁ କରାଯିବାକୁ ଥିବା ଏହି ଟିକସ ଉପରୋକ୍ତ ଉତ୍ପାଦଗୁଡ଼ିକର ଖୁଚୁରା ମୂଲ୍ୟ ସହିତ ସଂଯୁକ୍ତ ହେବ। ବର୍ତ୍ତମାନ, ଏଗୁଡିକ ଉପରେ ୨୮ ପ୍ରତିଶତ ଜିଏସ୍‌ଟି ଆଦାୟ କରାଯାଉଛି ଏବଂ ସେମାନଙ୍କ ମୂଲ୍ୟ ଅନୁଯାୟୀ କ୍ଷତିପୂରଣ ଶୁଳ୍କ ଆଦାୟ କରାଯାୁଛି। ଜିଏସ୍‌ଟି ପରିଷଦରେ ଓଡ଼ିଶା ଅର୍ଥମନ୍ତ୍ରୀ ନିରଞ୍ଜନ ପୂଜାରୀଙ୍କ ଅଧ୍ୟକ୍ଷତାରେ ଗଠିତ ଏକ ମନ୍ତ୍ରୀଗୋଷ୍ଠୀ ଏହି ଟିକସ ଛାଡ ସାମଗ୍ରୀ ଉପରେ କ୍ଷମତା ଭିତ୍ତିକ ଟିକସ ଲାଗୁ କରିବାକୁ ବିଚାର କରିବା ନେଇ କହିସାରିଛି। ଏହି ମନ୍ତ୍ରୀଗୋଷ୍ଠୀ ଗୁଟଖା ଏବଂ ପାନ ମସଲା ଉପରେ ୩୮ ପ୍ରତିଶତ ଟିକସ ଲାଗୁ କରିବାକୁ କହିଛି।

ଏକ ରିପୋର୍ଟ ଅନୁଯାୟୀ, ଯଦି ଏହି ପ୍ରସ୍ତାବ ଅନୁମୋଦନ ଲାଭ କରେ ତେବେ ଏହା ଗୁଟଖା ଓ ପାନ୍ ମସାଲା ସାମଗ୍ରୀ ଉପରେ ଟିକସ ଛାଡ ବନ୍ଦ କରିବାରେ ସାହାଯ୍ୟ କରିବ, ଯାହା ସରକାରଙ୍କ ରାଜସ୍ୱ ବଢ଼ାଇବ। ଏଥିସହିତ ଜିଏସଟି ପରିଷଦ ଅନଲାଇନ୍ ଗେମିଂ ଉପରେ ଦିଆଯିବାକୁ ଥିବା ଟିକସକୁ ୨୮ ପ୍ରତିଶତକୁ ବୃଦ୍ଧି କରିବାକୁ ଚିନ୍ତା କରୁଛି। ତେବେ ଗେମିଂ ଶିଳ୍ପ ସରକାରଙ୍କୁ ଅନଲାଇନ୍ ଖେଳ ଉପରେ ଟିକସକୁ ୧୮ ପ୍ରତିଶତରେ ରଖିବାକୁ ଅନୁରୋଧ କରିଛି । ତେବେ ବିଭିନ୍ନ ରିପୋର୍ଟ ଅନୁଯାୟୀ, ଜିଏସଟି ପରିଷଦ ଏଥିରେ ଟିକସ ହାର ବୃଦ୍ଧି କରିବାକୁ ଆଗ୍ରହୀ ଥÒବା ଜଣାପଡିଛି।