ଭୁବନେଶ୍ୱର: ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକରେ ତ୍ରୁଟିକୁ ନେଇ ବିବାଦ ଏବେ ତୀବ୍ର ରୂପ ନେଇଛି। ଓଡ଼ିଶା ସରକାରଙ୍କୁ ଟାର୍ଗେଟ କରିଛନ୍ତି ଉଭୟ ବିରୋଧୀ ଦଳ ବିଜେଡି ଓ କଂଗ୍ରେସ । ତ୍ରୁଟିପୂର୍ଣ୍ଣ ପୁସ୍ତକଗୁଡ଼ିକୁ ପ୍ରତ୍ୟାହାର କରିବା ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସରକାର ଘୋଷଣା କରିଥିବା ବେଳେ ମୁଖ୍ୟମନ୍ତ୍ରୀ ଏହା ପଛରେ ଏକ 'ବଡ଼ ଷଡ଼ଯନ୍ତ୍ର' ଥିବା କହିବା ପରେ ନୂଆ ରାଜନୈତିକ ବୟାନବାଜି ଜୋର ଧରିଛି।

ବିଜେଡି ବିଧାୟକ ସାରଦା ଜେନା ସରକାରଙ୍କୁ ଟାର୍ଗେଟ କରି କହିଛନ୍ତି ଯେ, ମୁଖ୍ୟମନ୍ତ୍ରୀଙ୍କ ବୟାନ ଉତ୍ତର ଅପେକ୍ଷା ଅଧିକ ପ୍ରଶ୍ନ ସୃଷ୍ଟି କରିଛି। ସେ ଆହୁରି ମଧ୍ୟ କହିଛନ୍ତି କି, "କେବଳ ଷଡ଼ଯନ୍ତ୍ର ହୋଇଛି କହିଦେଲେ ହେବ ନାହିଁ। ଏହା ପଛରେ କିଏ ଅଛି, ତାହା ସରକାର ପ୍ରକାଶ କରିବା ଉଚିତ। ନିଜର ଦାୟିତ୍ୱ ଗ୍ରହଣ କରିବା ପରିବର୍ତ୍ତେ ସରକାର ଅନ୍ୟ ଉପରେ ଦୋଷ ଲଦିବାକୁ ଚେଷ୍ଟା କରୁଛନ୍ତି।"

ବିଜେପି ସରକାର କ୍ଷମତାରେ ଥିବା ନିଜର ୨୪ ମାସ କାର୍ଯ୍ୟକାଳ ମଧ୍ୟରେ ଶାସନ ବ୍ୟବସ୍ଥା ଉପରେ ଧ୍ୟାନ ଦେବା ପରିବର୍ତ୍ତେ ପୂର୍ବ ୨୪ ବର୍ଷର ବିଜେଡି ସରକାରକୁ ଦୋଷ ଦେବାରେ ଅଧିକ ସମୟ ବିତାଉଛନ୍ତି ବୋଲି ଶ୍ରୀ ଜେନା ଅଭିଯୋଗ କରିଛନ୍ତି। ପାଠ୍ୟପୁସ୍ତକ ପ୍ରସ୍ତୁତି ଓ ମୁଦ୍ରଣ ପାଇଁ ପ୍ରକୃତରେ କିଏ ଦାୟୀ, ସମ୍ପୃକ୍ତ ମନ୍ତ୍ରୀ ଓ ଅଧିକାରୀଙ୍କ ଭୂମିକା କ’ଣ ଥିଲା ଏବଂ କାହା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ସେ ନେଇ ସ୍ପଷ୍ଟୀକରଣ ଦେବାକୁ ବିଜେଡି ଦାବି କରିଛି। 

ପାଠ୍ୟପୁସ୍ତକ ତ୍ରୁଟି ପ୍ରସଙ୍ଗରେ ବରିଷ୍ଠ ବିଜେଡି ନେତା ଅଶୋକ ପଣ୍ଡା ମଧ୍ୟ ରାଜ୍ୟ ସରକାରଙ୍କୁ ଟାର୍ଗେଟ କରି କହିଛନ୍ତି କି, ମୁଖ୍ୟମନ୍ତ୍ରୀ କେଉଁ ଆଧାରରେ କହିଛନ୍ତି ସେ ତାଙ୍କ ଉକ୍ତି ରଖିଛନ୍ତି। ଆମ ମାତୃଭାଷା ବହୁ ପୁରାତନ। ୬ଷ୍ଠ ଭାଷା ଭାବେ ଶାସ୍ତ୍ରୀୟ ମାନ୍ୟତା ପାଇଛି। ଫକୀରମୋହନ ସେନାପତି, କର୍ମବୀର ଗୌରୀଶଙ୍କର ରାୟ, ବଳଦେବ ରଥ ଓଡ଼ିଆ ଭାଷାକୁ ରୁଦ୍ଧିମନ୍ତ କରିଛନ୍ତି। ସମ୍ପାଦନା ମଣ୍ଡଳୀରେ କିଛି ଜଣାଶୁଣା ଲୋକ ଅଛନ୍ତି। ସେମାନଙ୍କ ମଧ୍ୟରୁ କେହି ଷଡ଼ଯନ୍ତ୍ର କରିଥାଇପାରେ । ଓଡ଼ିଆ ଅସ୍ମିତା କହି ସରକାରକୁ ଆସିଲେ କିନ୍ତୁ ଅସ୍ମିତା ହାତରୁ ଖସିଗଲା। ଚାଲି ନଜାଣି ବାଟର ଦୋଷ ଦେଉଛନ୍ତି। ମୁଖ୍ୟମନ୍ତ୍ରୀଙ୍କ ଦସ୍ତଖତରେ କମିଟି ଗଠନ ହୋଇଥିବ। ଯଦି ଷଡ଼ଯନ୍ତ୍ରର ଗନ୍ଧ ବାରୁଛନ୍ତି ତେବେ ତଦନ୍ତ କରି କାର୍ଯ୍ୟାନୁଷ୍ଠାନ ନିଅନ୍ତୁ। ଭାଷାକୁ ବଦନାମ ମାନେ ଓଡ଼ିଆ ଜାତିକୁ ଅପମାନ । ଭାଷାକୁ ଅପମାନ ଅକ୍ଷମଣୀୟ ଅପରାଧ । ନବୀନଙ୍କ ସରକାରରେ ଭାଷା, ସାହିତ୍ୟ, ସଂସ୍କୃତି ବିଭାଗ ହୋଇଥିଲା । ବର୍ତ୍ତମାନ ସରକାର ଏହାକୁ ବଞ୍ଚାଇ ରଖନ୍ତୁ ବୋଲି କହିଛନ୍ତି ଅଶୋକ ପଣ୍ଡା ।

ବିଜେଡି ସହିତ ସ୍ୱର ମିଳାଇ ଓଡ଼ିଶା ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଭକ୍ତ ଦାସ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ଉପରେ ପ୍ରଶ୍ନ ଉଠାଇ ସେ ଦାବି କରିଛନ୍ତି ଯେ, ଏହି ଷଡ଼ଯନ୍ତ୍ର ପଛରେ କିଏ ଅଛି ଏବଂ ପାଠ୍ୟପୁସ୍ତକ ଛାପିବା ଦାୟିତ୍ୱ କାହାର ଥିଲା ତାହା ସରକାର ତୁରନ୍ତ ସ୍ପଷ୍ଟ କରନ୍ତୁ। 

ଶ୍ରୀ ଦାସ କହିଛନ୍ତି, "ମୁଖ୍ୟମନ୍ତ୍ରୀ ଏକ ଷଡ଼ଯନ୍ତ୍ର ହୋଇଥିବା ସ୍ୱୀକାର କରିବା ଭଲ କଥା। କିନ୍ତୁ ଏହାର ମାଷ୍ଟରମାଇଣ୍ଡ କିଏ? ତ୍ରୁଟିପୂର୍ଣ୍ଣ ପୁସ୍ତକ କିଏ ଛାପିଲା? ତ୍ରୁଟି ସ୍ୱୀକାର କରିବା ସତ୍ତ୍ୱେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ।" ତୁରନ୍ତ ତ୍ରୁଟି ସୁଧାରି ଛାତ୍ରଛାତ୍ରୀଙ୍କୁ ସଂଶୋଧିତ ପୁସ୍ତକ ବଣ୍ଟନ କରିବା ସହ ଷ୍ଟେଟ୍ କାଉନ୍ସିଲ୍ ଅଫ୍ ଏଜୁକେସନାଲ୍ ରିସର୍ଚ୍ଚ ଆଣ୍ଡ ଟ୍ରେନିଂ ବା 'ଏସସିଇଆରଟି' (SCERT) ଅଧିକାରୀଙ୍କ ସମେତ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ସେ ଦାବି କରିଛନ୍ତି।

ଲୋକସଭାର ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ୫୬ତମ ଜନ୍ମଦିନ ଅବସରରେ ଏକ ନିଆରା ଚିତ୍ର ସାମ୍ନାକୁ ଆସିଛି। ଜୁନ୍ ୧୯ ତାରିଖରେ ବାରାଣସୀର ଗଙ୍ଗା ଘାଟରେ ଯୁବ କଂଗ୍ରେସ କର୍ମୀମାନେ ଏହି ଜନ୍ମଦିନକୁ ଖାସ୍ ଅନ୍ଦାଜରେ ପାଳନ କରିଛନ୍ତି। ଏହି ଅବସରରେ ଏକ ପୋଷ୍ଟର ସାମ୍ନାକୁ ଆସିଛି, ଯାହା ଏବେ ରାଜନୈତିକ ମହଲରେ ବେଶ୍ ଚର୍ଚ୍ଚାର ବିଷୟ ପାଲଟିଛି।

ଭଗବାନ ପର୍ଶୁରାମଙ୍କ ଅବତାରରେ ରାହୁଲ ଗାନ୍ଧୀ

ଯୁବ କଂଗ୍ରେସ ଦ୍ୱାରା ଜାରି କରାଯାଇଥିବା ଏହି ପୋଷ୍ଟରରେ ରାହୁଲ ଗାନ୍ଧୀଙ୍କୁ ଭଗବାନ ପର୍ଶୁରାମଙ୍କ ଅବତାରରେ ଦର୍ଶାଯାଇଛି। ପୋଷ୍ଟରରେ ତାଙ୍କର ଗୋଟିଏ ହାତରେ ଭଗବାନ ପର୍ଶୁରାମଙ୍କ ଅସ୍ତ୍ର ଫାର୍ସା ଥିବା ବେଳେ ଅନ୍ୟ ହାତରେ ଭାରତର ସମ୍ବିଧାନର ଏକ କପି ରହିଥିବା ଦେଖିବାକୁ ମିଳିଛି। ନିକଟରେ ଶେଷ ହୋଇଥିବା ନିର୍ବାଚନରେ 'ସମ୍ବିଧାନ ବଞ୍ଚାଅ' ପ୍ରସଙ୍ଗକୁ କଂଗ୍ରେସ ନିଜର ପ୍ରମୁଖ ମୁଦ୍ଦା କରିଥିବା ବେଳେ, ଏବେ ପର୍ଶୁରାମଙ୍କ ଫାର୍ସା ସହ ସମ୍ବିଧାନକୁ ଯୋଡ଼ି ଏକ ନୂଆ ବାର୍ତ୍ତା ଦେବାକୁ ଦଳ ପ୍ରୟାସ କରିଛି।

ପୋଷ୍ଟର ପଛରେ ରହିଛି ବଡ଼ ରାଜନୈତିକ ସନ୍ଦେଶ

ରାଜନୈତିକ ସମୀକ୍ଷକଙ୍କ ମତରେ ଏହି ପୋଷ୍ଟର ପଛରେ ଏକ ବଡ଼ ଏବଂ ସ୍ପଷ୍ଟ ରାଜନୈତିକ ବାର୍ତ୍ତା ରହିଛି। ଆଗାମୀ ବିଧାନସଭା ନିର୍ବାଚନ ଏବଂ ବିଶେଷକରି ଉତ୍ତରପ୍ରଦେଶ ରାଜନୀତିକୁ ଦୃଷ୍ଟିରେ ରଖି କଂଗ୍ରେସ ନିଜର ସାମାଜିକ ସମୀକରଣକୁ ସୁଦୃଢ଼ କରିବାକୁ ଚାହୁଁଛି। ସମ୍ବିଧାନ ପ୍ରସଙ୍ଗ ଜରିଆରେ ଦଳ ନିଜ ସହିତ ଦଳିତ ଓ ପଛୁଆ ବର୍ଗଙ୍କୁ ଯୋଡ଼ିବାରେ ସଫଳ ହୋଇଛି। ଏବେ ଭଗବାନ ପର୍ଶୁରାମଙ୍କ ଅବତାର ଜରିଆରେ ଦଳ ବ୍ରାହ୍ମଣ ଏବଂ ସବର୍ଣ୍ଣ ଭୋଟରଙ୍କୁ ନିଜ ଆଡ଼କୁ ଆକୃଷ୍ଟ କରିବାର ମାଷ୍ଟରଷ୍ଟ୍ରୋକ୍ ଖେଳିଛି।

ମଧ୍ୟପ୍ରଦେଶରୁ ରାଜ୍ୟସଭା ନିର୍ବାଚନ ପାଇଁ କଂଗ୍ରେସ ନେତ୍ରୀ ମୀନାକ୍ଷୀ ନଟରାଜନଙ୍କ ନାମାଙ୍କନ ପତ୍ର ଖାରଜ ହେବା ମାମଲାରେ ସୁପ୍ରିମକୋର୍ଟ ଏକ ବଡ଼ ରାୟ ଶୁଣାଇଛନ୍ତି। ଶୁକ୍ରବାର ଦିନ ଏହି ମାମଲାର ଶୁଣାଣି କରି ସର୍ବୋଚ୍ଚ ନ୍ୟାୟାଳୟ ନିର୍ବାଚନ ପ୍ରକ୍ରିୟାରେ ହସ୍ତକ୍ଷେପ କରିବାକୁ ସ୍ପଷ୍ଟ ଭାବରେ ମନା କରିଦେଇଛନ୍ତି। କୋର୍ଟ କହିଛନ୍ତି ଯେ ଥରେ ନିର୍ବାଚନ ପ୍ରକ୍ରିୟା ଆରମ୍ଭ ହେବା ପରେ ଏଥିରେ ହସ୍ତକ୍ଷେପ କରିବାର କ୍ଷମତା ସୀମିତ ଅଟେ ଏବଂ ବର୍ତ୍ତମାନ ପରିସ୍ଥିତିରେ ଅଦାଲତ ଏଥିରେ ଦଖଲ ଦେଇପାରିବେ ନାହିଁ।

ମୀନାକ୍ଷୀ ନଟରାଜନଙ୍କୁ ଶକ୍ତ ଝଟକା

ଏହି ମାମଲାକୁ ବିଚାର କରି ବିଚାରପତି ପ୍ରଶାନ୍ତ କୁମାର ମିଶ୍ର ଏବଂ ବିଚାରପତି ଅତୁଲ ଏସ. ଚାନ୍ଦୁରକରଙ୍କୁ ନେଇ ଗଠିତ ଖଣ୍ଡପୀଠ ମୀନାକ୍ଷୀଙ୍କ ଆବେଦନକୁ ଖାରଜ କରିଦେଇଛନ୍ତି। ନାମାଙ୍କନ ପତ୍ର ଖାରଜ ହେବା ବିରୋଧରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ତାଙ୍କ ପକ୍ଷରୁ ବରିଷ୍ଠ ଆଇନଜୀବୀ ଅଭିଷେକ ମନୁ ସିଙ୍ଘଭୀ ଯୁକ୍ତି ବାଢ଼ିଥିଲେ। କିନ୍ତୁ କୋର୍ଟ ସ୍ପଷ୍ଟ କରିଥିଲେ ଯେ ସମ୍ବିଧାନର ଧାରା ୩୨୯ ଅନୁଯାୟୀ ନିର୍ବାଚନ ପ୍ରକ୍ରିୟା ଚାଲିଥିବା ସମୟରେ ନ୍ୟାୟିକ ହସ୍ତକ୍ଷେପ କରାଯାଇପାରିବ ନାହିଁ। ନିର୍ବାଚନ ଶେଷ ହେବା ପରେ କେବଳ ନିର୍ବାଚନୀ ଆବେଦନ (ଇଲେକ୍ସନ୍ ପିଟିସନ୍) ମାଧ୍ୟମରେ ହିଁ ଏହାର ସମାଧାନ ପାଇଁ ନିର୍ବାଚନ କମିଶନଙ୍କ ନିକଟରେ ଅଭିଯୋଗ କରାଯାଇପାରିବ ବୋଲି କୋର୍ଟ ପରାମର୍ଶ ଦେଇଛନ୍ତି। ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି କଂଗ୍ରେସ ଏବଂ ମୀନାକ୍ଷୀଙ୍କ ପାଇଁ ଏକ ବଡ଼ ରାଜନୈତିକ ଝଟକା ବୋଲି ବିବେଚନା କରାଯାଉଛି।

କାହିଁକି ଖାରଜ ହୋଇଥିଲା ନାମାଙ୍କନ?

ଗତ କିଛି ଦିନ ତଳେ ରିଟର୍ଣ୍ଣିଂ ଅଫିସର ମୀନାକ୍ଷୀ ନଟରାଜନଙ୍କ ନାମାଙ୍କନ ପତ୍ରକୁ ଖାରଜ କରିଦେଇଥିଲେ। ଅଭିଯୋଗ ଥିଲା ଯେ ସେ ନିଜ ନିର୍ବାଚନୀ ସତ୍ୟପାଠରେ (ଫର୍ମ ୨୬) ତାଙ୍କ ନାମରେ ତେଲେଙ୍ଗାନାରେ ପଡ଼ିରହିଥିବା ଏକ ଅପରାଧିକ ମାମଲାର ତଥ୍ୟ ଲୁଚାଇଥିଲେ। ତେବେ କଂଗ୍ରେସ ପକ୍ଷରୁ କୁହାଯାଇଥିଲା ଯେ କେବଳ ଦୁଇ ବର୍ଷ ବା ତଦୁର୍ଦ୍ଧ୍ୱ ଦଣ୍ଡ ବିଧାନ ଥିବା ମାମଲାର ତଥ୍ୟ ଦେବା ନିୟମ ରହିଛି ଏବଂ ମୀନାକ୍ଷୀଙ୍କୁ ଏହି ମାମଲାରେ କେବଳ ସମନ ଜାରି କରାଯାଇଥିଲା। ଏହି ଯୁକ୍ତିକୁ ନିର୍ବାଚନ ଅଧିକାରୀ ଗ୍ରହଣ ନକରି ଅସମ୍ପୂର୍ଣ୍ଣ ତଥ୍ୟ ଦେବା କାରଣ ଦର୍ଶାଇ ତାଙ୍କ ନାମାଙ୍କନ ରଦ୍ଦ କରିଥିଲେ।

ବଲାଙ୍ଗୀର: ବଲାଙ୍ଗୀରରେ ପୋଖରୀ ପୁନରୁଦ୍ଧାର କାମକୁ ନେଇ ବିଜେଡି-କଂଗ୍ରେସ ମୁହାମୁହିଁ । ମାଟି କାମ ଚାଲିଥିବା ସ୍ଥାନରେ ମୁହାଁମୁଁହି ପରିସ୍ଥିତି ସୃଷ୍ଟି ହୋଇଥିବା ବେଳେ ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିବା ଦେଖିବାକୁ ମିଳିଛି। ପରିତ୍ୟକ୍ତ ଅବସ୍ଥାରେ ଥିବା ସହରର ୧୧ଟି ବନ୍ଧର ପୁନରୁଦ୍ଧାର ବଲାଙ୍ଗୀର ପୌରପରିଷଦ ପକ୍ଷରୁ କରାଯାଉଥିବା ବେଳେ, ଏହାକୁ ନେଇ ନଗର କଂଗ୍ରେସ ତରଫରୁ ଆନ୍ଦୋଳନ କରାଯାଇଛି। ତେବେ ଏହି ଆନ୍ଦୋଳନକୁ ନେଇ ଏବେ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। କଂଗ୍ରେସର ଦୁର୍ନୀତି ଅଭିଯୋଗକୁ ବିଜେଡି ସମେତ ହଜାର ହଜାର ସ୍ଥାନୀୟ ଲୋକେ ଖୋଲାଖୋଲି ବିରୋଧ କରିଛନ୍ତି।

ଆଜି କରଙ୍ଗାକଣ୍ଟା ବନ୍ଧ ଆଡିରେ ମହିଳା କଂଗ୍ରେସ ପକ୍ଷରୁ ଚାଲିଥିବା ଆନ୍ଦୋଳନ ସ୍ଥଳକୁ ବିଜେଡି କର୍ମୀ ଓ ସାଧାରଣ ଲୋକେ ଧସେଇ ପଶିଥିଲେ। ଫଳରେ ସେଠାରେ କଂଗ୍ରେସ ଓ ବିଜେଡି କର୍ମୀ ମୁହାମୁହିଁ ହୋଇଛନ୍ତି। ବିଶେଷ କରି ସ୍ଥାନୀୟ ମହିଳାମାନେ ସହରର ବିକାଶ କାମରେ ବାଧା ସୃଷ୍ଟି କରାଯାଉଥିବା ଦର୍ଶାଇ କଂଗ୍ରେସର ଏହି ଆନ୍ଦୋଳନକୁ ଜୋରଦାର ବିରୋଧ କରିଛନ୍ତି। ପରିସ୍ଥିତି ଏପରି ହୋଇଥିଲା ଯେ ଉଭୟ ଦଳର ନାରାବାଜି ଭିତରେ ସ୍ଥିତି ନିୟନ୍ତ୍ରଣ କରିବାକୁ ଯାଇ ପୋଲିସ ପ୍ରଶାସନକୁ ନାକେଦମ୍ ହେବାକୁ ପଡ଼ିଛି।

ଏହି ବିବାଦ ଭିତରେ ବିଜେଡି ପକ୍ଷରୁ କଂଗ୍ରେସର ବରିଷ୍ଠ ନେତା ନରସିଂହ ମିଶ୍ରଙ୍କୁ ତୀବ୍ର ସମାଲୋଚନା କରାଯାଇଛି। ସେ ବଲାଙ୍ଗୀରର ବିକାଶ ଚାହୁଁନାହାନ୍ତି ଏବଂ ସେ ଜଣେ “ବଲାଙ୍ଗୀର ବିରୋଧୀ” ବୋଲି ବିଜେଡି ଅଭିଯୋଗ ଆଣିଛି।

ମିଳିଥିବା ସୂଚନା ଅନୁଯାୟୀ, ବନ୍ଧର ମାଟି ଖୋଳା ଓ ପୁନରୁଦ୍ଧାର କାର୍ଯ୍ୟ ଏବେ ପ୍ରାଥମିକ ପର୍ଯ୍ୟାୟରେ ଚାଲିଛି। ଏହି କାର୍ଯ୍ୟ ପାଇଁ ଏପର୍ଯ୍ୟନ୍ତ ଟଙ୍କାଟିଏ ମଧ୍ୟ ବିଲ୍ ହୋଇନାହିଁ। ତେଣୁ ବିଲ୍ ନହୋଇ ଦୁର୍ନୀତି କିଭଳି ହେଲା ବୋଲି ପ୍ରଶ୍ନ ଉଠିଛି।

ରାଜନୈତିକ ଫାଇଦା ହାସଲ କରିବା ପାଇଁ ଏବଂ ଉଦ୍ଦେଶ୍ୟମୂଳକ ଭାବେ ବିକାଶମୂଳକ କାର୍ଯ୍ୟକୁ ବନ୍ଦ କରିବାକୁ କଂଗ୍ରେସ ଏଭଳି ମିଥ୍ୟା ଦୁର୍ନୀତି ଅଭିଯୋଗ ଆଣି ଆନ୍ଦୋଳନ କରୁଥିବା ସାଧାରଣରେ ଚର୍ଚ୍ଚା ହେଉଛି। ଏହି ଘଟଣା ପରେ ବଲାଙ୍ଗୀର ସହରରେ ରାଜନୈତିକ ପାରଦ ବେଶ୍‌ ବୃଦ୍ଧି ପାଇଛି।

କର୍ଣ୍ଣାଟକ ରାଜନୀତିରେ ଏକ ନୂଆ ଅଧ୍ୟାୟର ଆରମ୍ଭ ହୋଇଛି। ବୁଧବାର ଦିନ କର୍ଣ୍ଣାଟକର ୩୪ତମ ମୁଖ୍ୟମନ୍ତ୍ରୀ ଭାବରେ କଂଗ୍ରେସର ବରିଷ୍ଠ ନେତା ଡିକେ ଶିବକୁମାର ବିଧିବଦ୍ଧ ଭାବେ ଶପଥ ଗ୍ରହଣ କରିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଇସ୍ତଫା ପରେ ରାଜ୍ୟରେ ଏହି କ୍ଷମତା ପରିବର୍ତ୍ତନ ଘଟିଛି। ଲୋକଭବନଠାରେ ଆୟୋଜିତ ଏକ ଭବ୍ୟ ସମାରୋହରେ ରାଜ୍ୟପାଳ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ସେହିପରି ବରିଷ୍ଠ ନେତା ଜି ପରମେଶ୍ୱର ରାଜ୍ୟର ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି।

ଏହି ଶପଥ ଗ୍ରହଣ ଉତ୍ସବରେ କଂଗ୍ରେସର ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖର୍ଗେ, ବରିଷ୍ଠ ନେତା ରାହୁଲ ଗାନ୍ଧୀ ଏବଂ ବିଦାୟୀ ମୁଖ୍ୟମନ୍ତ୍ରୀ ସିଦ୍ଧରମୈୟା ପ୍ରମୁଖ ଉପସ୍ଥିତ ଥିଲେ। ଶପଥ ଗ୍ରହଣ ସମୟରେ ଡିକେ ଶିବକୁମାର ନିଜ ହାତରେ ସମ୍ବିଧାନର ଏକ କପି ଧରିଥିବା ଦେଖିବାକୁ ମିଳିଥିଲା। ଦାୟିତ୍ୱ ଗ୍ରହଣ କରିବା ପୂର୍ବରୁ ସେ ଦଳୀୟ ଅଧ୍ୟକ୍ଷ ଖର୍ଗେ ଏବଂ ସିଦ୍ଧରମୈୟାଙ୍କୁ ଫୁଲତୋଡ଼ା ଦେଇ ସ୍ୱାଗତ କରିଥିଲେ। ସମାରୋହର ଆରମ୍ଭ ଜାତୀୟ ସଙ୍ଗୀତ 'ବନ୍ଦେ ମାତରମ୍' ଗାନରୁ ହୋଇଥିଲା। ଶପଥ ନେବା ପରେ ଶିବକୁମାର ମଞ୍ଚରେ ଉପସ୍ଥିତ ସମସ୍ତ ନେତାଙ୍କୁ ଭେଟିବା ସହ ରାହୁଲ ଗାନ୍ଧୀଙ୍କୁ ଆଲିଙ୍ଗନ କରିଥିଲେ।

କ୍ଷମତା ହସ୍ତାନ୍ତର ଓ ଆଗାମୀ ରଣନୀତି

ଏହି କ୍ଷମତା ପରିବର୍ତ୍ତନକୁ ନେଇ ଦଳର ନେତାମାନେ ସକାରାତ୍ମକ ପ୍ରତିକ୍ରିୟା ଦେଇଛନ୍ତି। ଉତ୍ସବରେ ଯୋଗ ଦେଇଥିବା ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ ଶିବକୁମାରଙ୍କୁ ଶୁଭେଚ୍ଛା ଜଣାଇବା ସହ ଏହି ନିଷ୍ପତ୍ତିକୁ ସ୍ୱାଗତ କରିଛନ୍ତି। ସେ କହିଛନ୍ତି ଯେ, ଡିକେ ଶିବକୁମାର ଦୀର୍ଘ ଦିନ ଧରି ଦଳର ଜଣେ ଶୃଙ୍ଖଳିତ କର୍ମୀ ଏବଂ ରାଜ୍ୟ ସଭାପତି ଭାବେ ନିଷ୍ଠାର ସହ କାର୍ଯ୍ୟ କରିଛନ୍ତି। ଦଳ ଭିତରେ ଆପୋଷ ବୁଝାମଣା ଭିତ୍ତିରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଆଗାମୀ ୩ ବର୍ଷ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଦ୍ୱାରା ଆରମ୍ଭ କରାଯାଇଥିବା ସମସ୍ତ ଜନକଲ୍ୟାଣକାରୀ ନୀତି ଓ ଯୋଜନାଗୁଡ଼ିକୁ ଶିବକୁମାର ଆଗକୁ ବଢ଼ାଇବେ ବୋଲି ସେ ଆଶା ପ୍ରକଟ କରିଛନ୍ତି।

କର୍ଣ୍ଣାଟକ: କର୍ଣ୍ଣାଟକ ରାଜନୀତିରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ସିଦ୍ଦରମୈୟା। କର୍ଣ୍ଣାଟକ ମନ୍ତ୍ରୀ ଏଚ୍.କେ ପାଟିଲ ଏହି ସୂଚନା ନିଶ୍ଚିତ କରିବା ସହ ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିବେ ବୋଲି ସ୍ପଷ୍ଟ କରିଛନ୍ତି।

ରାଜ୍ୟପାଳ ଥାୱରଚାନ୍ଦ ଗେହଲଟ୍ ବର୍ତ୍ତମାନ ରାଜ୍ୟ ବାହାରେ ଥିବାରୁ, ସିଦ୍ଦରମୈୟା ତାଙ୍କର ଇସ୍ତଫା ପତ୍ର କର୍ଣ୍ଣାଟକ ରାଜ୍ୟପାଳଙ୍କ ସ୍ୱତନ୍ତ୍ର ସଚିବ ପ୍ରଭୁ ଶଙ୍କରଙ୍କୁ ପ୍ରଦାନ କରିଛନ୍ତି। ପ୍ରଭୁ ଶଙ୍କର ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ସେ ମୁଖ୍ୟମନ୍ତ୍ରୀଙ୍କ ଇସ୍ତଫା ପତ୍ର ଗ୍ରହଣ କରିଛନ୍ତି, କିନ୍ତୁ ମଧ୍ୟପ୍ରଦେଶରୁ ରାଜ୍ୟପାଳ ଆଜି ରାତିରେ ଫେରିବା ପରେ ହିଁ ଏହାକୁ ଆନୁଷ୍ଠାନିକ ଭାବେ ଗ୍ରହଣ କରାଯିବ।

ଏକ ସାମ୍ବାଦିକ ସମ୍ମିଳନୀରେ ସିଦ୍ଦରମୈୟା କହିଛନ୍ତି ଯେ ସେ କଂଗ୍ରେସ ପାର୍ଟିର ହାଇକମାଣ୍ଡଙ୍କ ନିର୍ଦ୍ଦେଶକ୍ରମେ ନିଜ ପଦରୁ ଇସ୍ତଫା ଦେଇଛନ୍ତି। ସେ କହିଛନ୍ତି, "ହାଇକମାଣ୍ଡଙ୍କ ନିର୍ଦ୍ଦେଶ ପରେ ମୁଁ ଆଜି ମୋର ଇସ୍ତଫା ପତ୍ର ଦାଖଲ କରିଛି। ମୋର ଦୃଢ଼ ବିଶ୍ୱାସ ଯେ ରାଜ୍ୟପାଳ ଫେରିବା ପରେ ସମ୍ବିଧାନ ଅନୁଯାୟୀ ଏହାକୁ ଗ୍ରହଣ କରିବେ। ଆମ ଦଳ ପାଖରେ ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ରହିଛି। ତେଣୁ ନୂଆ ସରକାର ଗଠନ ପାଇଁ ସୁଯୋଗ ମିଳିବା ସମ୍ବିଧାନ ସମ୍ମତ।" ଏଥିସହ ସେ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ମଲ୍ଲିକାର୍ଜୁନ ଖଡ଼ଗେଙ୍କୁ ତାଙ୍କୁ ଦିଆଯାଇଥିବା ସୁଯୋଗ ପାଇଁ କୃତଜ୍ଞତା ଜଣାଇଛନ୍ତି।

ଇସ୍ତଫା ଦେବା ପୂର୍ବରୁ ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନ 'କାବେରୀ' ଠାରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ସମୟରେ ଡି.କେ ଶିବକୁମାର ସିଦ୍ଦରମୈୟାଙ୍କ ପାଦ ଛୁଇଁ ପ୍ରଣାମ କରିଥିଲେ, ଯାହା ନେତୃତ୍ୱ ପରିବର୍ତ୍ତନର ପ୍ରତୀକ ଭାବରେ ଦେଖାଯାଇଥିଲା। ଉଭୟ ନେତା ଦଳୀୟ ମନ୍ତ୍ରୀ ଓ ବିଧାୟକଙ୍କ ସାମ୍ନାରେ ପରସ୍ପରକୁ ଆଲିଙ୍ଗନ କରିଥିଲେ। ଏହି ବୈଠକରେ ପ୍ରିୟଙ୍କ ଖଡ଼ଗେ, କେ.ଜେ ଜର୍ଜ, ଏମ୍.ବି ପାଟିଲ, ଏବଂ ରାମଲିଙ୍ଗା ରେଡ୍ଡୀଙ୍କ ଭଳି ବରିଷ୍ଠ ନେତାମାନେ ଉପସ୍ଥିତ ଥିଲେ ଏବଂ ବାସଭବନ ବାହାରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।

କର୍ଣ୍ଣାଟକ: କର୍ଣ୍ଣାଟକ ରାଜନୀତିରେ ବର୍ତ୍ତମାନ ଏକ ବଡ଼ ଧରଣର ପରିବର୍ତ୍ତନର ଆଭାସ ଦେଖିବାକୁ ମିଳୁଛି। ରାଜ୍ୟର ବରିଷ୍ଠ କଂଗ୍ରେସ ନେତା ତଥା ଉପମୁଖ୍ୟମନ୍ତ୍ରୀ ଡିକେ ଶିବକୁମାର ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କୁ ଭେଟିବା ପରେ ନେତୃତ୍ୱ ପରିବର୍ତ୍ତନ ନେଇ ଚର୍ଚ୍ଚା ଜୋର ଧରିଛି। ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ସିଦ୍ଦରମୈୟା ଆଜି ନିଜ ପଦରୁ ଇସ୍ତଫା ଦେଇପାରନ୍ତି ଏବଂ ତାଙ୍କ ସ୍ଥାନରେ ଡିକେ ଶିବକୁମାର ନୂଆ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିପାରନ୍ତି।

ମୁଖ୍ୟମନ୍ତ୍ରୀଙ୍କ ବାସଭବନ କାବେରୀ ଠାରେ ଏକ ଗୁରୁତ୍ୱପୂର୍ଣ୍ଣ ପ୍ରାତଃଭୋଜନ ବୈଠକ ଅନୁଷ୍ଠିତ ହୋଇଛି। ଏହି ସମୟରେ ଏକ ଭାବପୂର୍ଣ୍ଣ ଦୃଶ୍ୟ ଦେଖିବାକୁ ମିଳିଥିଲା, ଯେଉଁଥିରେ ଡିକେ ଶିବକୁମାର ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କ ପାଦ ଛୁଇଁ ପ୍ରଣାମ କରିଥିଲେ ଏବଂ ଉଭୟ ନେତା ପରସ୍ପରକୁ ଆଲିଙ୍ଗନ କରିଥିଲେ। ଏହାକୁ ନେତୃତ୍ୱ ହସ୍ତାନ୍ତରର ଏକ ସ୍ପଷ୍ଟ ସଙ୍କେତ ବୋଲି ରାଜନୈତିକ ମହଲରେ ବିବେଚନା କରାଯାଉଛି। କଡ଼ା ସୁରକ୍ଷା ବଳୟ ମଧ୍ୟରେ ଆୟୋଜିତ ଏହି ବୈଠକରେ ପ୍ରିୟାଙ୍କ ଖଡ଼ଗେ, କେ.ଜେ. ଜର୍ଜ, ଏମ.ବି. ପାଟିଲ, ରାମଲିଙ୍ଗା ରେଡ୍ଡୀ ଏବଂ ଏଚ.କେ. ପାଟିଲଙ୍କ ଭଳି ବହୁ ପ୍ରମୁଖ ମନ୍ତ୍ରୀ ଉପସ୍ଥିତ ଥିଲେ।

ରିପୋର୍ଟ ଅନୁଯାୟୀ, ସିଦ୍ଦରମୈୟା ଆଜି ଅପରାହ୍ନରେ ରାଜ୍ୟପାଳ ଥାୱରଚାନ୍ଦ ଗେହଲଟଙ୍କୁ ଭେଟିବା ପାଇଁ ସମୟ ମାଗିଛନ୍ତି ଏବଂ ସେ ନିଜର ଇସ୍ତଫାପତ୍ର ପ୍ରଦାନ କରିବାର ସମ୍ଭାବନା ରହିଛି। ଅନ୍ୟପକ୍ଷରେ, ଡିକେ ଶିବକୁମାର କର୍ଣ୍ଣାଟକର ପରବର୍ତ୍ତୀ ମୁଖ୍ୟମନ୍ତ୍ରୀ ହେବା ନେଇ ଆଶା କରାଯାଉଥିବାରୁ ତାଙ୍କ ବାସଭବନ ବାହାରେ ସମର୍ଥକମାନେ ମିଠା ବାଣ୍ଟି ଖୁସି ମନାଇଛନ୍ତି।

କର୍ଣ୍ଣାଟକରେ କଂଗ୍ରେସ ସରକାର ନିଜ କାର୍ଯ୍ୟକାଳର ୩ ବର୍ଷ ପୂରଣ କରିଥିବା ବେଳେ ନେତୃତ୍ୱ ପରିବର୍ତ୍ତନ ନେଇ ଗତ କିଛି ଦିନ ହେବ ଲଗାତାର ଚର୍ଚ୍ଚା ଲାଗିରହିଥିଲା। ଗତ ମଙ୍ଗଳବାର ଦିନ ଉଭୟ ସିଦ୍ଦରମୈୟା ଏବଂ ଡିକେ ଶିବକୁମାର ନୂଆଦିଲ୍ଲୀ ଗସ୍ତରେ ଯାଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଏବଂ ରାହୁଲ ଗାନ୍ଧୀଙ୍କ ସମେତ ଦଳର ବରିଷ୍ଠ ନେତାମାନଙ୍କ ସହ ଆଲୋଚନା କରିଥିଲେ। ଦଳର ହାଇକମାଣ୍ଡ ନେତୃତ୍ୱ ପରିବର୍ତ୍ତନ ସପକ୍ଷରେ ଥିବା ଏବଂ ଏଥିପାଇଁ ବାଟ ଛାଡିବାକୁ ସିଦ୍ଦରମୈୟାଙ୍କୁ ସୂଚନା ଦେଇଥିବା ବିଶେଷ ସୂତ୍ରରୁ ଜଣାପଡ଼ିଛି। ତେବେ, ଏହି ବୈଠକ କେବଳ ଆଗାମୀ ରାଜ୍ୟସଭା ଏବଂ ବିଧାନ ପରିଷଦ ନିର୍ବାଚନ ପାଇଁ ଉଦ୍ଦିଷ୍ଟ ଥିଲା ଏବଂ ନେତୃତ୍ୱ ପରିବର୍ତ୍ତନ ଖବର କେବଳ ଗୁଜବ ବୋଲି ଦଳ ପକ୍ଷରୁ କୁହାଯାଇଥିଲା।

ତାମିଲନାଡୁ ରାଜନୀତିରେ ଆଉ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ନେତୃତ୍ୱାଧୀନ ତାମିଲଗା ଭେଟ୍ରି କାଜାଗମ୍ (TVK) ସରକାରର ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ହେବାକୁ ଯାଉଛି। ରାଜ୍ୟ କ୍ୟାବିନେଟରେ ସାମିଲ ହେବାକୁ ଥିବା ୨୩ ଜଣ ନୂଆ ମନ୍ତ୍ରୀଙ୍କ ତାଲିକାକୁ ତାମିଲନାଡୁର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ମଞ୍ଜୁରୀ ପ୍ରଦାନ କରିଛନ୍ତି। ମେ' ୨୧, ୨୦୨୬ (ଗୁରୁବାର) ସକାଳେ ଚେନ୍ନାଇ ସ୍ଥିତ ଲୋକଭବନରେ ଏହି ନବନିଯୁକ୍ତ ମନ୍ତ୍ରୀମାନଙ୍କର ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ।

୫୯ ବର୍ଷ ପରେ ସରକାରରେ କଂଗ୍ରେସ

ଏହି ମନ୍ତ୍ରିମଣ୍ଡଳ ସମ୍ପ୍ରସାରଣର ସବୁଠାରୁ ଗୁରୁତ୍ୱପୂର୍ଣ୍ଣ ଦିଗ ହେଉଛି କଂଗ୍ରେସର ପ୍ରତ୍ୟାବର୍ତ୍ତନ। ପ୍ରାୟ ୫୯ ବର୍ଷର ବ୍ୟବଧାନ ପରେ କଂଗ୍ରେସ ଦଳ ପୁଣିଥରେ ତାମିଲନାଡୁ ସରକାରରେ ସାମିଲ ହେବାକୁ ଯାଉଛି। ନୂତନ ମନ୍ତ୍ରୀମାନଙ୍କ ମଧ୍ୟରେ ୨୧ ଜଣ ଟିଭିକେ (TVK) ବିଧାୟକ ଥିବାବେଳେ ୨ ଜଣ କଂଗ୍ରେସ ବିଧାୟକ ରହିଛନ୍ତି। କଂଗ୍ରେସ ପକ୍ଷରୁ କିଲିୟୁର ବିଧାୟକ ରାଜେଶ କୁମାର ଏବଂ ମେଲୁର ବିଧାୟକ ପି. ବିଶ୍ୱନାଥନ ମନ୍ତ୍ରୀ ଭାବରେ ଶପଥ ଗ୍ରହଣ କରିବେ ବୋଲି ଜଣାପଡିଛି। ଏହା ସହିତ ତାମିଲନାଡୁ ସ୍ୱାଧୀନତା ପରେ ପ୍ରଥମ ଥର ପାଇଁ ଏକ ମେଣ୍ଟ ସରକାର ଦେଖିବାକୁ ପାଇବ।

ଶପଥ ଗ୍ରହଣ ସମାରୋହ ଏବଂ ସରକାରଙ୍କ ରୂପରେଖ

ମୁଖ୍ୟମନ୍ତ୍ରୀଙ୍କ ସୁପାରିଶ କ୍ରମେ ସମସ୍ତ ବର୍ଗ ଏବଂ ଅଞ୍ଚଳକୁ ପ୍ରତିନିଧିତ୍ୱ ଦେବା ପାଇଁ ଏହି ନୂତନ ତାଲିକା ପ୍ରସ୍ତୁତ କରାଯାଇଛି। ମେ' ୧୦ ତାରିଖରେ ସି. ଜୋସେଫ୍ ବିଜୟ ମୁଖ୍ୟମନ୍ତ୍ରୀ ଭାବରେ ଶପଥ ନେବା ସହ ତାଙ୍କ ସାଥିରେ ୯ ଜଣ ମନ୍ତ୍ରୀ କାର୍ଯ୍ୟଭାର ଗ୍ରହଣ କରିଥିଲେ। ବର୍ତ୍ତମାନ ଏହି ୨୩ ଜଣ ନୂଆ ମନ୍ତ୍ରୀଙ୍କ ଯୋଗଦାନ ପରେ ତାମିଲନାଡୁ ମନ୍ତ୍ରିମଣ୍ଡଳର ସଦସ୍ୟ ସଂଖ୍ୟା ଯଥେଷ୍ଟ ବୃଦ୍ଧି ପାଇବ। ଏହି ସମ୍ପ୍ରସାରଣ ଦ୍ୱାରା ପ୍ରଶାସନିକ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ଏବଂ ଲୋକାଭିମୁଖୀ ଯୋଜନାଗୁଡ଼ିକୁ ସୁଚାରୁରୂପେ ପରିଚାଳନା କରିବା ପାଇଁ ସରକାର ଲକ୍ଷ୍ୟ ରଖିଛନ୍ତି।

"ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଆଉ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି।" କଂଗ୍ରେସ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ମେଲୋଡି' ଟଫି ପ୍ରସଙ୍ଗରେ କଡ଼ା ସମାଲୋଚନା କରିଛନ୍ତି। ଦେଶର ଅର୍ଥନୈତିକ ସମସ୍ୟା ଓ ସାଧାରଣ ଜନତାଙ୍କ ଅସୁବିଧାକୁ ଦର୍ଶାଇ ସେ ଏହି ଟାର୍ଗେଟ କରିଛନ୍ତି। ନିକଟରେ ପ୍ରଧାନମନ୍ତ୍ରୀଙ୍କ ଇଟାଲୀ ଗସ୍ତ ସମୟରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେବାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା।

ନେତୃତ୍ୱ ନୁହେଁ, ଏହା ନୌଟଙ୍କି

ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ କରି ରାହୁଲ ଗାନ୍ଧୀ ଲେଖିଛନ୍ତି ଯେ, "ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଏବଂ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି! କୃଷକ, ଯୁବକ, ମହିଳା, ଶ୍ରମିକ ଏବଂ ଛୋଟ ବ୍ୟବସାୟୀ ସମସ୍ତେ କାନ୍ଦୁଛନ୍ତି - କିନ୍ତୁ ପ୍ରଧାନମନ୍ତ୍ରୀ ହସି ହସି ରିଲ୍ ବନାଉଛନ୍ତି, ଏବଂ ବିଜେପି ନେତାମାନେ ତାଳି ମାରୁଛନ୍ତି"। ସେ ପ୍ରଧାନମନ୍ତ୍ରୀଙ୍କ ଏହି କାର୍ଯ୍ୟକଳାପକୁ "ନେତୃତ୍ୱ ନୁହେଁ, ନୌଟଙ୍କି" ବୋଲି ଆଖ୍ୟା ଦେଇଛନ୍ତି।

କ'ଣ ଥିଲା ପୂରା ଘଟଣା?

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଇଟାଲୀ ଗସ୍ତ ବେଳେ ଇଟାଲୀୟ ସମକକ୍ଷ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେଇଥିଲେ। ଏହାକୁ ନେଇ ମେଲୋନୀ ସୋସିଆଲ ମିଡିଆରେ ଏକ ଭିଡିଓ ସେୟାର କରିଥିଲେ, ଯେଉଁଥିରେ ସେ କହୁଥିବାର ଶୁଣିବାକୁ ମିଳିଥିଲା, "ପ୍ରଧାନମନ୍ତ୍ରୀ ମୋଦୀ ଆମ ପାଇଁ ଏକ ଉପହାର ଆଣିଛନ୍ତି। ଏହା ହେଉଛି ମେଲୋଡି"। ଏହି ଘଟଣା ପରେ ଇଣ୍ଟରନେଟରେ ପୁଣି ଥରେ '#Melodi' ଟ୍ରେଣ୍ଡ୍ ଭାଇରାଲ ହେବାରେ ଲାଗିଥିଲା। ତେବେ ଏହି ହାଲୁକା ମୁହୂର୍ତ୍ତକୁ ନେଇ ଏବେ ଦେଶରେ ରାଜନୈତିକ ବୟାନବାଜି ତୀବ୍ର ହୋଇଛି。

କେରଳ: କେରଳର ନୂତନ ମୁଖ୍ୟମନ୍ତ୍ରୀ ଭାବେ କଂଗ୍ରେସ ନେତା ଭି.ଡି. ସତୀଶନ ଶପଥ ଗ୍ରହଣ କରିଛନ୍ତି। ଏହା ସହିତ କେରଳ ରାଜନୀତିରେ କଂଗ୍ରେସ ପାଇଁ ଏକ ନୂତନ ଯୁଗର ଆରମ୍ଭ ହୋଇଛି। କଂଗ୍ରେସ ନେତୃତ୍ୱାଧୀନ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF) କ୍ଷମତାକୁ ଫେରିବା ସହ ରାଜ୍ୟରେ ବାମପନ୍ଥୀ ଦଳର ୧୦ ବର୍ଷର ଶାସନର ଅନ୍ତ ଘଟିଛି।

ଥିରୁଭାନନ୍ତପୁରମ ସ୍ଥିତ ସେଣ୍ଟ୍ରାଲ୍ ଷ୍ଟାଡିୟମରେ ଆୟୋଜିତ ଏକ ଭବ୍ୟ ଶପଥ ଗ୍ରହଣ ଉତ୍ସବରେ କେରଳର ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକର ଶ୍ରୀ ସତୀଶନ ଏବଂ ତାଙ୍କ କ୍ୟାବିନେଟ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଏହି ଉତ୍ସବରେ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା, କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେ ଏବଂ ସାଂସଦ କେ.ସି. ବେଣୁଗୋପାଳଙ୍କ ସମେତ ବିଭିନ୍ନ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ।

ମୁଖ୍ୟମନ୍ତ୍ରୀଙ୍କୁ ମିଶାଇ ନୂତନ ସରକାରରେ ମୋଟ ୨୧ ଜଣିଆ କ୍ୟାବିନେଟ୍ ଗଠନ କରାଯାଇଛି। ଏଥିରେ କଂଗ୍ରେସ ପାଖରେ ମୁଖ୍ୟମନ୍ତ୍ରୀ ପଦ ସମେତ ୧୧ ଟି ମନ୍ତ୍ରୀପଦ ରହିଥିବା ବେଳେ ମେଣ୍ଟ ସହଯୋଗୀ ଇଣ୍ଡିଆନ୍ ୟୁନିୟନ୍ ମୁସଲିମ୍ ଲିଗ୍ (IUML) କୁ ୫ ଟି ମନ୍ତ୍ରୀପଦ ମିଳିଛି। ବିଶେଷ କଥା ହେଉଛି ନୂଆ କ୍ୟାବିନେଟରେ ଥିବା ୧୪ ଜଣ ସଦସ୍ୟ ପ୍ରଥମ ଥର ପାଇଁ ମନ୍ତ୍ରୀ ହୋଇଛନ୍ତି, ଯାହା ମନ୍ତ୍ରୀମଣ୍ଡଳକୁ ଏକ ନୂତନ ଏବଂ ଯୁବ ରୂପ ପ୍ରଦାନ କରିଛି।

ବହୁ ବର୍ଷ ଧରି ରାଜନୈତିକ ସଂଘର୍ଷ ପରେ ୟୁଡିଏଫ୍ ଏଥର ଏକ ଐତିହାସିକ ପ୍ରତ୍ୟାବର୍ତ୍ତନ କରିଛି। କେରଳ ବିଧାନସଭାର ମୋଟ ୧୪୦ ଟି ଆସନ ମଧ୍ୟରୁ ୟୁଡିଏଫ୍ ୧୦୨ ଟି ଆସନ ଜିତି ଏକ ବୃହତ୍ ବିଜୟ ହାସଲ କରିଛି। ଏଥିରେ କେବଳ କଂଗ୍ରେସ ରେକର୍ଡ ସଂଖ୍ୟକ ୬୩ ଟି ଆସନ ଅକ୍ତିଆର କରିଛି, ଯାହାକି ରାଜ୍ୟରେ ଦଳର ସର୍ବଶ୍ରେଷ୍ଠ ପ୍ରଦର୍ଶନ ଅଟେ। ସେହିପରି ମେଣ୍ଟ ସହଯୋଗୀ ଆଇୟୁଏମଏଲ୍ ୨୨ ଟି ଆସନ, କେରଳ କଂଗ୍ରେସ - କେଇସି ୭ ଟି ଆସନ, ଆରଏସପି ୩ ଟି ଆସନ ଏବଂ ଅନ୍ୟାନ୍ୟ ଦଳ ଗୋଟିଏ ଲେଖାଏଁ ଆସନ ଜିତିବାରେ ସଫଳ ହୋଇଛନ୍ତି।

ନୂଆଦିଲ୍ଲୀ: ୧୦ ଦିନ ଧରି ଲାଗି ରହିଥିବା ନେତୃତ୍ୱ ବିବାଦର ଅନ୍ତ ଘଟାଇ କଂଗ୍ରେସ ପକ୍ଷରୁ ୬ ଥରର ବିଧାୟକ ଭି.ଡି. ସତୀଶନଙ୍କୁ କେରଳର ପରବର୍ତ୍ତୀ ମୁଖ୍ୟମନ୍ତ୍ରୀ ଭାବେ ଘୋଷଣା କରାଯାଇଛି। ରାଜନୀତିରେ ୩୫ ବର୍ଷରୁ ଅଧିକ ଅଭିଜ୍ଞତା ରଖିଥିବା ସତୀଶନ, ଏର୍ଣ୍ଣାକୁଲମ ଜିଲ୍ଲାର ପରଭୁର ନିର୍ବାଚନମଣ୍ଡଳୀରୁ କ୍ରମାଗତ ୬ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି।

ନୂଆଦିଲ୍ଲୀଠାରେ କଂଗ୍ରେସର ଶୀର୍ଷ ନେତା ଦୀପାଦାସ ମୁନ୍ସୀ, ମୁକୁଲ ୱାସନିକ ଏବଂ ଅଜୟ ମାକେନ ଏହି ଘୋଷଣା କରିଛନ୍ତି। କୋଚି ଜିଲ୍ଲାରେ ଜନ୍ମିତ ସତୀଶନ କେରଳର ୧୩ତମ ମୁଖ୍ୟମନ୍ତ୍ରୀ ହେବେ। ଚଳିତ ମାସ ଶେଷ ଆଡ଼କୁ ସେ ତାଙ୍କର ୬୨ତମ ଜନ୍ମଦିନ ପାଳନ କରିବାକୁ ଯାଉଛନ୍ତି। ଏହା ପୂର୍ବରୁ କଂଗ୍ରେସ ହାଇକମାଣ୍ଡ କେରଳ କଂଗ୍ରେସ ବିଧାୟକ ଦଳ ନେତା ଚୟନ ପ୍ରକ୍ରିୟାର ତଦାରଖ ଦାୟିତ୍ୱ ୱାସନିକ ଏବଂ ମାକେନଙ୍କୁ ପ୍ରଦାନ କରିଥିଲେ। ଉଭୟ ନେତା ନବନିର୍ବାଚିତ ବିଧାୟକମାନଙ୍କ ସହ ବିସ୍ତୃତ ଆଲୋଚନା କରି ନିଜର ରିପୋର୍ଟ ନୂଆଦିଲ୍ଲୀରେ ହାଇକମାଣ୍ଡଙ୍କୁ ହସ୍ତାନ୍ତର କରିଥିଲେ।

ମେ' ୨୦୨୬ ବିଧାନସଭା ନିର୍ବାଚନରେ ବିପୁଳ ସଂଖ୍ୟାଗରିଷ୍ଠତା ହାସଲ କରିବା ସତ୍ତ୍ୱେ ମୁଖ୍ୟମନ୍ତ୍ରୀ ପଦକୁ ନେଇ କଂଗ୍ରେସ ଭିତରେ ତୀବ୍ର ଗୋଷ୍ଠୀ କନ୍ଦଳ ଦେଖାଦେଇଥିଲା। ବିଶେଷକରି କେ.ସି. ବେଣୁଗୋପାଳ ଏବଂ ବିଦାୟୀ ବିରୋଧୀ ଦଳ ନେତା ଭି.ଡି. ସତୀଶନଙ୍କ ମଧ୍ୟରେ ମୁଖ୍ୟ ପ୍ରତିଦ୍ୱନ୍ଦ୍ୱିତା ହୋଇଥିଲା। ବେଣୁଗୋପାଳଙ୍କ ସମର୍ଥକମାନେ ଯୁକ୍ତି ବାଢ଼ିଥିଲେ ଯେ ତାଙ୍କୁ ଅଧିକାଂଶ ନବନିର୍ବାଚିତ ବିଧାୟକ ଓ କେରଳ ପ୍ରଦେଶ କଂଗ୍ରେସ କମିଟି (KPCC)ର ପ୍ରଭାବଶାଳୀ ନେତାଙ୍କ ସମର୍ଥନ ରହିଛି। ଅନ୍ୟପକ୍ଷରେ, ସତୀଶନଙ୍କୁ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF)ର ବିପୁଳ ବିଜୟର ମୁଖ୍ୟ ବିନ୍ଧାଣି ଭାବେ ଗ୍ରହଣ କରାଯାଇଥିଲା। ବରିଷ୍ଠ କଂଗ୍ରେସ ନେତା ରମେଶ ଚେନ୍ନିଥାଲା ମଧ୍ୟ ନିଜର ବରିଷ୍ଠତା ଏବଂ ପ୍ରାଶାସନିକ ଅଭିଜ୍ଞତା ଆଧାରରେ ମୁଖ୍ୟମନ୍ତ୍ରୀ ପଦ ପାଇଁ ଦାବିଦାର ଥିବାରୁ ଦଳ ଭିତରେ ସହମତି ସୃଷ୍ଟି କରିବା କଷ୍ଟକର ହୋଇପଡ଼ିଥିଲା।

କଂଗ୍ରେସ ନେତୃତ୍ୱାଧୀନ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (UDF) ଦୀର୍ଘ ୧୦ ବର୍ଷ ବ୍ୟବଧାନ ପରେ କେରଳରେ କ୍ଷମତାକୁ ଫେରିଛି। ୧୪୦ ଆସନ ବିଶିଷ୍ଟ ବିଧାନସଭାରେ UDF ଐତିହାସିକ ୧୦୨ଟି ଆସନ ଦଖଲ କରି ବହୁମତ ପାଇଁ ଆବଶ୍ୟକ ୭୧ ଆସନ ସଂଖ୍ୟାକୁ ଅତିକ୍ରମ କରିଛି। ଏହି ବିଜୟ ସହିତ ଲେଫ୍ଟ ଡେମୋକ୍ରାଟିକ୍ ଫ୍ରଣ୍ଟ (LDF) ର କ୍ରମାଗତ ତୃତୀୟ ଥର ସରକାର ଗଠନ କରିବାର ଆଶା ଧୂଳିସାତ୍ ହୋଇଛି ଏବଂ କେରଳର ପାରମ୍ପରିକ କ୍ଷମତା ପରିବର୍ତ୍ତନର ଧାରା ବଜାୟ ରହିଛି।

କେରଳ ବିଧାନସଭା ନିର୍ବାଚନରେ କଂଗ୍ରେସ ନେତୃତ୍ୱାଧୀନ ୟୁଡିଏଫ୍ (UDF) ସଂଖ୍ୟାଗରିଷ୍ଠତା ହାସଲ କରିବାର ୧୦ ଦିନ ବିତିଯାଇଥିଲେ ମଧ୍ୟ ମୁଖ୍ୟମନ୍ତ୍ରୀ ପଦକୁ ନେଇ ଲାଗିରହିଥିବା ସସପେନ୍ସ ଆଜି ଶେଷ ହେବାକୁ ଯାଉଛି। କଂଗ୍ରେସ ହାଇକମାଣ୍ଡ ଗୁରୁବାର କେରଳର ପରବର୍ତ୍ତୀ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରିବେ ବୋଲି ଜଣାପଡିଛି। ଏହି ସର୍ବୋଚ୍ଚ ପଦବୀ ପାଇଁ ଏଆଇସିସି ସାଧାରଣ ସମ୍ପାଦକ କେ.ସି. ଭେଣୁଗୋପାଳ, ବିରୋଧୀ ଦଳ ନେତା ଭି.ଡି. ସତୀସନ୍ ଏବଂ ବରିଷ୍ଠ ନେତା ରମେଶ ଚେନ୍ନିଥଲାଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିଛି।

ଆଜି ବସିବ ବିଧାୟକ ଦଳର ଗୁରୁତ୍ୱପୂର୍ଣ୍ଣ ବୈଠକ

ଥିରୁଅନନ୍ତପୁରମ୍ ସ୍ଥିତ କେପିସିସି ମୁଖ୍ୟାଳୟଠାରେ ଗୁରୁବାର ଦିନ ୧ଟା ସମୟରେ କଂଗ୍ରେସ ବିଧାୟକ ଦଳ (CLP) ର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ଏହି ବୈଠକରେ କେରଳ ପ୍ରଭାରୀ ଦୀପା ଦାସମୁନ୍ସିଙ୍କ ସମେତ କେନ୍ଦ୍ରୀୟ ପର୍ଯ୍ୟବେକ୍ଷକ ଅଜୟ ମାକେନ୍ ଏବଂ ମୁକୁଲ ୱାସନିକ୍ ଉପସ୍ଥିତ ରହିବେ। ସୂଚନା ଅନୁଯାୟୀ, ଦଳର ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡ଼ଗେ ଏବଂ ବରିଷ୍ଠ ନେତା ରାହୁଲ ଗାନ୍ଧୀଙ୍କ ଦ୍ୱାରା ନିଆଯାଇଥିବା ଚୂଡ଼ାନ୍ତ ନିଷ୍ପତ୍ତିକୁ ଏକ ବନ୍ଦ ଲଫାପାରେ ଅଣାଯାଇ ବିଧାୟକମାନଙ୍କ ସମ୍ମୁଖରେ ଖୋଲାଯିବ ଏବଂ ନୂଆ ମୁଖ୍ୟମନ୍ତ୍ରୀଙ୍କ ନାମ ଆନୁଷ୍ଠାନିକ ଭାବେ ଘୋଷଣା କରାଯିବ।

କାହା ପଲା କେତେ ଭାରି?

ଏକ ରିପୋର୍ଟ ଅନୁଯାୟୀ, ଦଳର ଅଧିକାଂଶ ତୃଣମୂଳ ସ୍ତରର କର୍ମୀ ଏବଂ ୟୁଡିଏଫ୍ ସହଯୋଗୀ ଦଳଗୁଡ଼ିକ ଭି.ଡି. ସତୀସନ୍ଙ୍କ ସମର୍ଥନରେ ଅଛନ୍ତି, ଯିଏକି ଗତ ୫ ବର୍ଷ ଧରି ବାମପନ୍ଥୀ ସରକାର ବିରୋଧରେ ଦଳର ନେତୃତ୍ୱ ନେଇଥିଲେ। ଅନ୍ୟପଟେ, ବହୁ ସଂଖ୍ୟକ ନବନିର୍ବାଚିତ ବିଧାୟକ ଏବଂ ହାଇକମାଣ୍ଡଙ୍କ ସମର୍ଥନ କେ.ସି. ଭେଣୁଗୋପାଳଙ୍କ ସପକ୍ଷରେ ଥିବା କୁହାଯାଉଛି। ଦୀର୍ଘ ଦିନ ଧରି ଚାଲିଥିବା ରାଜନୈତିକ ଛକାପଞ୍ଝା ପରେ ଶେଷରେ ଦଳ ଏକ ଚୂଡ଼ାନ୍ତ ନିଷ୍ପତ୍ତିରେ ପହଞ୍ଚିଥିବା ନେଇ ବରିଷ୍ଠ କଂଗ୍ରେସ ନେତା ଜୟରାମ ରମେଶ ସୂଚନା ଦେଇଛନ୍ତି।