ଲକ୍ଷ୍ନୌ: ବିକାଶ ନାମରେ ମିଠା ମିଠା ଛବି ଦେଖାଇ ଲୋକଙ୍କୁ ଆକୃଷ୍ଟ କରିବାକୁ ପ୍ରୟାସ କରାଯାଉଛି। ବିକାଶକୁ ଆଧାର କରି ନିର୍ବାଚନ ବୈତରଣୀ ପାର ହେବା ଏବେ ଅଧିକାଂଶ ରାଜନୈତିକ ଦଳର ଉଦ୍ଦେଶ୍ୟ। ସରକାରଙ୍କ ଦ୍ୱାରା କରାଯାଇଥିବା ବିକାଶକୁ ବିଜ୍ଞାପନ ମାଧ୍ୟମରେ ଲୋକଙ୍କୁ ଦେଖାଇବା ନେଇ ରାଜ୍ୟ ରାଜ୍ୟ ମଧ୍ୟରେ ଚାଲିଛି ପ୍ରତିଯୋଗିତା। ଛବି ଚମକାଇବା ପାଇଁ ମିଥ୍ୟା ବିଜ୍ଞାପନର ମଧ୍ୟ ସହାୟତା ନିଆଯାଉଛି। ଏହା ମାଧ୍ୟମରେ ଲୋକଙ୍କୁ ବିକାଶର ଛବି ଦେଖାଇ ଭୂଆଁ ବୁଲାଯାଉଛି। ଏହାର ଏକ ଜ୍ଵଳନ୍ତ ଉଦାହରଣ ହେଉଛି ଉତ୍ତରପ୍ରଦେଶ ସରକାରଙ୍କ ଦ୍ବାରା ପ୍ରକାଶିତ ବିଜ୍ଞାପନ | ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଛବି ଚମକାଇବା ପାଇଁ ରବିବାର ଖବରକାଗଜର ଏକ ସମ୍ପୁର୍ଣ୍ଣ ପୃଷ୍ଠାରେ ବିଜ୍ଞାପନ ଦିଆଯାଇଛି। କୌତୂହଳର ବିଷୟ ହେଉଛି ଏହି ବିଜ୍ଞାପନରେ ଉତ୍ତରପ୍ରଦେଶ (ୟୁପି) ବିକାଶ କଥା କୁହାଯାଉଥିବାବେଳେ ଫଟୋ କିନ୍ତୁ ପଶ୍ଚିମବଙ୍ଗର ବିକାଶ କଥା ଦର୍ଶାଉଛି। ୟୁପି ସରକାରଙ୍କ ଏହି ବିଜ୍ଞାପନରେ ପଶ୍ଚିମବଙ୍ଗର ଫ୍ଲାଏଓଭର ଫଟୋ ଦିଆଯାଇଛି, ଯାହାକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିଛି। ‘ଇଣ୍ଡିଆନ ଏକ୍ସପ୍ରେସ’ ଖବରକାଗଜରେ ଏହି ବିଜ୍ଞାପନ ପ୍ରକାଶ ପାଇଛି। ଏଥିରେ ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କ ସମୟରେ ରାଜ୍ୟରେ ହୋଇଥିବା ବିକାଶ କାର୍ଯ୍ୟ ସହିତ ପଶ୍ଚିମବଙ୍ଗ ବିକାଶର ପଟୋ ଲାଗିଛି। ସୋସିଆଲ ମିଡିଆରେ ମୁଖ୍ୟମନ୍ତ୍ରୀଙ୍କୁ ଟ୍ରୋଲ କରାଯାଉଛି। ଏହି ବିଜ୍ଞାପନକୁ ନେଇ ତୃଣମୂଳ କଂଗ୍ରେସ (ଟିଏମସି), ସମାଜବାଦୀ ପାର୍ଟୀ (ଏସପି), କଂଗ୍ରେସ ସମେତ ଅନେକ ବିରୋଧୀ ଦଳ ନେତା ୟୁପି ସରକାରଙ୍କୁ ସମାଲୋଚନା କରିଛନ୍ତି। ଆମ ଆଦମୀ ପାର୍ଟି(ଆପ୍) ନେତା ସଞ୍ଜୟ ସିଂହ ଏହି ଫଟୋ ସେୟାର କରି ଲେଖିଛନ୍ତି ଯେ ଏଭଳି ବିକାଶ ନା କେବେ ଦେଖିଥିବେ ନା କେବେ ଶୁଣିଥିବେ। ମୁଖ୍ୟମନ୍ତ୍ରୀ ଆଦିତ୍ୟନାଥ କଲକାତା ଫ୍ଲାଏଓଭରକୁ ଟାଣି ଲକ୍ଷ୍ନୌ ନେଇ ଆସିଛନ୍ତି। ବିଜ୍ଞାପନରେ ହେଉ ପଛେ ଆଣିଛନ୍ତି ତ ।

ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପିକୁ ହରାଇଥବା ଟିଏମସି ଏହି ବିଜ୍ଞାପନଙ୍କୁ ନେଇ କଡା ସମାଲୋଚନା କରିଛି । ଦଳୀୟ ନେତା, କର୍ମୀ ଏବଂ ସମର୍ଥକ ଉକ୍ତ ଫଟୋ ସହିତ କଡା ମନ୍ତବ୍ୟ ଲେଖି ବିଜେପି ଏବଂ ୟୁପି ମୁଖ୍ୟମନ୍ତ୍ରୀଙ୍କୁ ଟ୍ୟାଗ କରୁଛନ୍ତି। ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପୁତୁରା ଅଭିଷେକ ବାନାର୍ଜୀ କହିଛନ୍ତି ଯେ ଯୋଗୀ ଆଦିତ୍ୟନାଥଙ୍କ ପାଇଁ ୟୁପି ବଦଳିବା ଅର୍ଥ ମମତାଙ୍କ ନେତୃତ୍ବରେ ପଶ୍ଚିମବଙ୍ଗରେ ହୋଇଥିବା ଭିତ୍ତିଭୂମି ବିକାଶ ଚିତ୍ରକୁ ଚୋରି କରି ନିଜ ପାଇଁ ବ୍ୟବହାର କରିବା। ‘ଡବଲ ଇଞ୍ଜିନ ମଡେଲ’ ବିଜେପିର ଦବଦବା ଥିବା ଏହି ରାଜ୍ୟରେ ସମ୍ପୂର୍ଣ୍ଣ ବିଫଳ ହୋଇଯାଇଥିବା ପରି ଲାଗୁଛି । ଏବେ ସବୁକିଛି ପର୍ଦାଫାସ ହୋଇଯାଇଛି। ଅଭିଷେକ ଏହି ପୋଷ୍ଟରେ ଯୋଗୀ ଆଦିତ୍ୟନାଥ ଏବଂ ମମତାଙ୍କୁ ଟ୍ୟାଗ କରିଛନ୍ତି। ଟିଏମସି ନେତା ମୁକୁଲ ରାୟ କହିଛନ୍ତି, ଶ୍ରୀ ନରେନ୍ଦ୍ର ମୋଦୀ ନିଜ ଦଳକୁ ବଞ୍ଚାଇବା ପାଇଁ ଏତେ ଅସହାୟ ହୋଇଯାଇଛନ୍ତି ଯେ ମୁଖ୍ୟମନ୍ତ୍ରୀ ବଦଳାଇବା ବ୍ୟତୀତ ତାଙ୍କୁ ବିକାଶ ଏବଂ ଭିତ୍ତିଭୂମି କାର୍ଯ୍ୟ ଚିତ୍ରର ସହାୟତା ନେବାକୁ ପଡ଼ୁଛି। ସମାଜବାଦୀ ପାର୍ଟୀ ମଧ୍ୟ ୟୁପି ସରକାରଙ୍କୁ ସମାଲୋଚନା କରିଛି । ଦଳ ପକ୍ଷରୁ କୁହାଯାଇଛି ଯେ ମୁଖ୍ୟମନ୍ତ୍ରୀଙ୍କ ମିଛର ପର୍ଦାଫାସ ହୋଇଯାଇଛି । ବିଜ୍ଞାପନ ଲାଗି ଜନତାଙ୍କ ଟଙ୍କାକୁ ପାଣି ଭଳି ଖର୍ଚ୍ଚ କରୁଥିବା ଲୋକଙ୍କ ପାଖରେ ଦେଖେଇବା ନିଜର କୌଣସି କାମ ନାହିଁ। ତେଣୁ କଲକାତାରେ ହୋଇଥିବା ନିର୍ମାଣର ଫଟୋ ଦେଖାଇ ଲୋକଙ୍କୁ ଭୁଆଁ ବୁଲାଯାଉଛି । ଏହା ଲଜ୍ଜାଜନକ ଘଟଣା। ମିଛ କହିବାରେ ବିଜେପି ସରକାର ନଂ ୧ ।

ଇଣ୍ଡିଆନ ଏକ୍ସପ୍ରେସରେ ରବିବାର ପ୍ରକାଶ ପାଇଥିବା ୟୁପି ସରକାରଙ୍କ ଏହି ବିଜ୍ଞାପନରେ ଯୋଗୀ ଆଦିତ୍ୟନାଥଙ୍କ ଏକ ବଡ ଫଟୋ ଲାଗିଛି। ଏହା ସହିତ ଅଲଗା ଅଲଗା ଉଦ୍ୟୋଗ, ବଡ ବଡ ଏହି କୋଠା ଏବଂ ଫ୍ଲାଏଓଭରର ଚିତ୍ର ଲଗାଯାଇଛି। ଏହି ପ୍ଲାଏଓଭର ଫଟୋ କଲକାତାର । ଲୋକେ ଏହି ଫଟୋ ଦେଖିବା ପରେ ସତ ଜାଣିପାରିଥିଲେ। ଏହାର ନାମ ‘ମା ଫ୍ଲାଏଓଭର’। ମଧ୍ୟ କଲକାତାରେ ଥିବା ଏହି ଫ୍ଲାଏଓଭରକୁ ମମତାଙ୍କ ସମୟରେ ବନାଯାଇଥିଲା। ଏହାକୁ ନେଇ ବିବାଦ ବଢିବା ପରେ ଇଣ୍ଡିଆନ ଏକ୍ସପ୍ରେସ ପକ୍ଷରୁ ଟ୍ଵିଟ କରାଯାଇ ଭୁଲ ସ୍ଵୀକାର କରାଯାଇଛି। ବିଜ୍ଞାପନ ବିଭାଗର ଭୁଲରୁ ଏଭଳି ହୋଇଛି । ଏବେ ସମସ୍ତ ଡିଜିଟାଲ ପ୍ଲାଟଫର୍ମରୁ ବିଜ୍ଞାପନକୁ ହଟାଇ ଦିଆଯାଇଛି।