ଭୁବନେଶ୍ୱର: ପୁଲିସ ରେକର୍ଡରେ ଜଣେ ଅଭ୍ୟାସଗତ ଅପରାଧୀ ନିଜ ଭାବି ସ୍ତ୍ରୀଙ୍କୁ ସୁନା ହାର ଉପହାର ଦେବାକୁ ମନକଲେ। ହେଲେ ପାଖରେ ଟଙ୍କା ନଥିବାରୁ ଚୋରି କରି ଉପହାର ଦେବାକୁ ସାଙ୍ଗମାନଙ୍କ ସହ ଯୋଜନା କଲେ। ହେଲେ ଶେଷରେ ପୁଲିସ ହାତରେ ଧରାପଡ଼ି ଜଣେ ସାଙ୍ଗ ଏବଂ ସେ ଜେଲ ଗଲେ। ଭାବି ସ୍ତ୍ରୀଙ୍କୁ ଉପହାର ଦେବାକୁ ଯୋଜନା ତାଙ୍କୁ ବଡ଼ ମହଙ୍ଗା ପଡ଼ିଛି। ଚୋରି ଅଭିଯୋଗରେ ଗିରଫ ଅଭିଯୁକ୍ତମାନେ ହେଲେ ରାକେଶ ନାୟକ ଓ ତା ସହଯୋଗୀ ଦେବବ୍ରତ ବରାଳ।

ପୁଲିସ ସୂଚନା ମୁତାବକ, ଗତ ୪ତାରିଖ ସନ୍ଧ୍ୟା ୭.୩୦ ରୁ ୮.୩୦ ମଧ୍ୟରେ ଅଭିଯୋଗକାରିଣୀ ନିଜ ଅଫିସରୁ ଫେରୁଥିବା ବେଳେ ରାଧାବଲ୍ଲଭ ମଠ ନିକଟରେ ତିନି ଜଣ ଅଜ୍ଞାତ ଦୁର୍ବୃତ୍ତ ଏକ ବ୍ଲୁ-ବ୍ଲାକ୍‌‌ ପଲସର ବାଇକରେ ଆସି ତାଙ୍କ ହାତରୁ ଏକ ପୋକୋ ମୋବାଇଲ୍‌‌ ଫୋନ୍‌‌ ଝାମ୍ପି ନେଇ ରବି ଟକିଜ୍‌‌ ଛକ ଆଡ଼କୁ ଫେରାର ହୋଇଯାଇଥିଲେ। ବିଶ୍ୱସ୍ତ ସୂଚନା ଏବଂ ସିସିଟିଭି ଫୁଟେଜ୍‌‌ ଆଧାରରେ ପୁଲିସ ରାକେଶ ନାୟକକୁ ଗୌତମ ନଗର ଅଞ୍ଚଳରୁ କାବୁ କରିଥିଲା। ପଚରାଉଚରା ବେଳେ ସେ ସ୍ୱୀକାର କରିଥିଲା ଯେ, ଖୁବଶୀଘ୍ର ତା’ର ବିବାହ ହେବାକୁ ଯାଉଛି। ନିଜ ଭାବୀ ପତ୍ନୀଙ୍କୁ ଉପହାର ଦେବା ପାଇଁ ଟଙ୍କା ନଥିବାରୁ ସେ ତା’ର ଅନ୍ୟ ଦୁଇ ସାଙ୍ଗ ଦେବବ୍ରତ ଓ ସିଟୁଙ୍କ ସହ ମିଶି ଏହି ଲୁଟ୍‌‌ ଯୋଜନା କରିଥିଲା। 

ରାକେଶର ସୂଚନା କ୍ରମେ ପୋଲିସ କ୍ୟାପିଟାଲ୍‌‌ ହସ୍ପିଟାଲ୍‌‌ ମାର୍କେଟ୍‌‌ କମ୍ପେ୍ଲକ୍ସରୁ ତା’ର ସହଯୋଗୀ ଦେବବ୍ରତ ବରାଳକୁ କାବୁ କରିଥିଲା ଏବଂ ତା’ ନିକଟରୁ ଲୁଟ୍‌‌ ହୋଇଥିବା ମୋବାଇଲ୍‌‌ ଫୋନ୍‌‌ ଉଦ୍ଧାର କରି ଜବତ କରିଛି। ଏଥିସହ ଅପରାଧରେ ବ୍ୟବହୃତ ପଲସର ବାଇକକୁ ମଧ୍ୟ ଜବତ କରାଯାଇଛି। ମୁଖ୍ୟ ଅଭିଯୁକ୍ତ ରାକେଶ ଜଣେ ଅଭ୍ୟାସଗତ ଅପରାଧୀ ହୋଇଥିବା ବେଳେ ତା’ ନାମରେ ପୂର୍ବରୁ ୨ଟି ମାମଲା ରହିଛି। ସଂଗୃହୀତ ପ୍ରମାଣ ଆଧାରରେ ଗତକାଲି ଅଭିଯୁକ୍ତଙ୍କୁ ଗିରଫ କରାଯାଇ ଆଜି କୋର୍ଟ ଚାଲାଣ କରାଯାଇଛି ଏବଂ ଫେରାର ଥିବା ତୃତୀୟ ଅଭିଯୁକ୍ତକୁ ଧରିବା ପାଇଁ ପୋଲିସର ଚଢ଼ାଉ ଜାରି ରହିଛି।

ନୟାଗଡ଼: ନୟାଗଡ଼ ଜିଲ୍ଲା ଫତେଗଡ଼ ଥାନା ଅନ୍ତର୍ଗତ ଭାପୁର ଗାଁରେ ଘଟିଛି ଏକ ବଡ଼ ଧରଣର ଚୋରି ଘଟଣା। ଭାପୁର ଗ୍ରାମର ପୂର୍ବତନ ସରପଞ୍ଚ କାର୍ତ୍ତିକ ଚନ୍ଦ୍ର ନାୟକଙ୍କ ଘରୁ ଦୁର୍ବୃତ୍ତ ମାନେ ଚୋରି କରିଥିବା ଅଭିଯୋଗ ହୋଇଛି। ସୂଚନା ଅନୁସାରେ, ଗତ ରାତିରେ ଚୋରମାନେ ଘରର ସଦସ୍ୟମାନଙ୍କୁ ନିଶା ଔଷଧ ସ୍ପ୍ରେ କରି ଅଚେତ କରିଦେଇଥିଲେ। ପରେ ଘରେ ପଶି ନଗଦ ୧ ଲକ୍ଷ ୨୬ ହଜାର ଟଙ୍କା ସହିତ ପ୍ରାୟ ୨୫ ଲକ୍ଷ ଟଙ୍କାରୁ ଅଧିକ ମୂଲ୍ୟର ସୁନା ଗହଣା ଲୁଟି ନେଇଥିବା ଜଣାପଡ଼ିଛି। ଆଜି ସକାଳେ ପରିବାର ଲୋକେ ଘଟଣା ବିଷୟରେ ଜାଣିବା ପରେ ଫତେଗଡ଼ ପୁଲିସକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏହି ଘଟଣା ପରେ ଅଞ୍ଚଳରେ ଭୟ ଓ ଚାଞ୍ଚଲ୍ୟ ଖେଳିଯାଇଛି। 

କେନ୍ଦୁଝର: କଳା ପଲସର ଆସି ବନ୍ଧୁକ ମୁନରେ ଟଙ୍କା ଲୁଟ କଲେ ଦୁର୍ବୁତ୍ତ । ଦିନ ଦ୍ଵିପ୍ରହରେ ପିଇଓଙ୍କୁ ବନ୍ଧୁକ ଦେଖାଇ ଲୁଟି ନେଲେ ୮ ଲକ୍ଷ ୧୮ ହଜାର ଟଙ୍କା ।  କେନ୍ଦୁଝର ଜିଲ୍ଲା ସଦର ଥାନା ଅନ୍ତର୍ଗତ ମୁକୁନା ନିକୁଟରୁ ଆଜି ଦିବା ଆଲୋକରେ ପିଇଓଙ୍କୁ ବନ୍ଧୁକ ଦେଖାଇ  ଟଙ୍କା ଲୁଟି ନେଇଛନ୍ତି ଦୃର୍ବୁତ୍ତ  । ମିଳିଥିବା ସୂଚନା ଅନୁଯାୟୀ ବାଉରୀପଦା ପଞ୍ଚାୟତ ପିଇଓ ପଞ୍ଚୟତରେ ଭତା ଟଙ୍କା ବାଣ୍ଟିବା ପାଇଁ ବ୍ୟାଙ୍କରୁ ଟଙ୍କା ନେଇ ଆସୁଥିଲେ । ଆଉ ମାତ୍ର ୫ ଶହ ମିଟର ଯାଇଥିଲେ ପଞ୍ଚାୟତ କାର୍ଯ୍ୟଳୟ ପଡିଥାନ୍ତା, ମାତ୍ର ତା ପୂର୍ବରୁ କଳା ପଲସର ଆସି ବନ୍ଧୁକ ମୁନରେ ଟଙ୍କା ଝାମ୍ପିନେଲେ ଲୁଟେରା । ସ୍ଥାନୀୟ ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ଏକ କଳା ପଲସରରେ ତିନି ଜଣ ମୁଖା ପିନ୍ଧା ଲୋକ ଥିଲେ। ଟଙ୍କା ଲୁଟିବା ପରେ ବେଲଦା ରାସ୍ତା ଦେଇ ଚମ୍ପଟ ମାରିଛନ୍ତି। ଖବର ପାଇ ସଦର ପୋଲିସ ଘଟଣା ସ୍ଥଳରେ ପହଁଚି ଛାନଭିନ୍ ଜାରୀ ରଖିଛି।

ରାୟଗଡା: ବ୍ୟବସାୟୀଙ୍କ ଘରେ କଳାକନା ବୁଲାଇଲେ ଲୁଟେରା । ରାତିରେ ଆସି ଘରର କବାଟ ଭାଙ୍ଗି ଆଲମିରାରୁ ସୁନା ଓ ଟଙ୍କା ଲୁଟିନେଲେ ଦୁର୍ବୃତ୍ତ । ବ୍ୟବସାୟୀ ଶଙ୍କର ସେନାପତିଙ୍କ ଘରୁ ୮ ଭରି ସୁନା ଓ ୩ ଲକ୍ଷ ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି । ରାୟଗଡ଼ା ଜିଲ୍ଲା କଲ୍ୟାଣସିଂହପୁର ଥାନା ଅନ୍ତର୍ଗତ ଦାନ ସାହିରେ ଏହି ଲୁଟ୍ ହୋଇଥିବା ଜଣାପଡ଼ିଛି । ଶଙ୍କରଙ୍କ ପରିବାର ଲୋକେ ଏକ ଦଶାହ କାର୍ଯ୍ୟରେ ଯୋଗଦେବା ପାଇଁ ଭଞ୍ଜନଗର ଯାଇଥିଲେ । ଘରେ କେହି ନଥିବାର ସୁଯୋଗ ନେଇ ଗତକାଲି ରାତିରେ ଦୁର୍ବୃତ୍ତମାନେ ଘର ପଛପଟ କବାଟ ଭାଙ୍ଗି ଆଲମାରୀରୁ ସୁନା ଓ ଟଙ୍କା ଲୁଟି ନେଇଛନ୍ତି । ସକାଳୁ ଶଙ୍କର ଏନେଇ ପୋଲିସଙ୍କୁ ଖବର ଦେଇଥିଲେ । ସ୍ଥାନୀୟ ଅଞ୍ଚଳର ସିସିଟିଭି ଯାଞ୍ଚ କରି ତଦନ୍ତ ଚଳାଇଛି ପୋଲିସ । ରାତିରେ ପାଟ୍ରୋଲିଂ ବ୍ୟବସ୍ଥା କଡାକଡି କରିବା ପାଇଁ ଦାବି କରିଛନ୍ତି ଅଞ୍ଚଳବାସୀ ।

ଢେଙ୍କାନାଳ: ଜନଗଣନା ବାହାନାରେ ଆସିଲେ, ଘରେ କଳାକନା ବୁଲାଇଲା ଲୁଟେରା । ଘରୁ ମୋବାଇଲ ଓ ମଙ୍ଗଳସୂତ୍ର ଲୁଟିନେଲେ ଦୁର୍ବୃତ୍ତ । ଢେଙ୍କାନାଳ ଜିଲ୍ଲା ରାସୋଳ ଥାନା ଗିରିଧରପ୍ରସାଦ ଗାଁରେ ଲୁଟ୍ ହୋଇଛି । ଗାଁର ବୀଭତ୍ସ ପଟ୍ଟନାୟକଙ୍କ ଘରକୁ ଜଣେ ଲୁଟେରା ଜନଗଣନା ଅଧିକାରୀ ବୋଲି ପରିଚୟ ଦେଇ ଆସିଥିଲା । ପରେ ମହିଳାଙ୍କୁ ଆଧାକାର୍ଡ ମାଗିଥିଲା। ମହିଳା ଜଣକ ଆଧାରକାର୍ଡ ଆଣିବାକୁ ଘର ଭିତରକୁ ଯାଇଥିବାବେଳେ ଛୋଟ ଝିଅ ବେକରେ ଛୁରୀ ଲଗାଇଦେଇଥିଲା ଲୁଟେରା । ପରେ ମହିଳାଙ୍କୁ ଫୋନ ଓ ମଙ୍ଗଳସୂତ୍ର ମାଗିଥିଲା । ଭୟରେ ମହିଳା ଜଣକ ମୋବାଇଲ ଓ ମଙ୍ଗଳସୂତ୍ର ଦେଇଦେଇଥିଲେ । ସୁନାଗହଣା ଧରି ଚମ୍ପଟ ମାରିଥିଲା ଲୁଟେରା । ଏନେଇ ଥାନାରେ ଅଭିଯୋଗ ପରେ ତଦନ୍ତ କରୁଛି ରାସୋଳ ପୋଲିସ ।

ନୀଳଗିରି: ଘରେ ପଶିଲେ, ମୁଣ୍ଡରେ ବନ୍ଧୁକ ଲଗାଇ ଡକାୟତି କଲେ । ବନ୍ଧୁକ ମୁନରେ ଘରୁ ୨୦ ଲକ୍ଷ ଟଙ୍କା ସହ ୩୦ ଲକ୍ଷ ଟଙ୍କାର ସୁନାଗହଣା ଲୁଟିନେଲେ ୬ ଦୁର୍ବୃତ୍ତ । ବାଲେଶ୍ଵର ଜିଲ୍ଲା ନୀଳଗିରି ଥାନା ଅଧୀନ ୯ନମ୍ୱର ୱାର୍ଡ କହାଳିଆ ଗ୍ରାମରେ ଘଟିଛି ଏପରି ଅଘଟଣ । ଗାଁର ଗୋବିନ୍ଦା ସିଂହ ଘରେ ସପରିବାର ଖାଉଥିବା ସମୟରେ ୬ଜଣ ଦୁର୍ବୃତ୍ତ ତେଲେଙ୍ଗା କଟୁରୀ ଦେଖାଇ ପରିବାର ଲୋକଙ୍କ ହାତ ଗୋଡ ବାନ୍ଧି ମୁଣ୍ଡରେ ବନ୍ଧୁକ ଲଗାଇ ଲୁଟି ନେଲେ ୨୦ ଲକ୍ଷ ଟଙ୍କା ସହିତ ୩୦ ଲକ୍ଷ ଟଙ୍କାର ସୁନା ଅଳଙ୍କାର । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଡକାୟତଙ୍କ ମଧ୍ୟରେ ଦୁଇ ଜଣ ଓଡ଼ିଆ ଯୁବକ ଏବଂ ୪ ଜଣ ଅଣଓଡ଼ିଆ ଥିବା ଗୋବିନ୍ଦା କହିଛନ୍ତି। 

ରାୟଗଡା: ଦିନ ଦ୍ବିପହରରେ ୨ ଲକ୍ଷ ଟଙ୍କା ଝାମ୍ପି ନେଲେ ଲୁଟେରା । ଏପରି ଘଟଣା ରାୟଗଡା ଏଡିବି ବ୍ୟାଙ୍କ  ନିକଟରେ ଘଟିଛି। ଆଜି  ୧୨ଟା ସମୟରେ  କପିଳାସ ରୋଡ଼ରେ ଥିବା ପାତ୍ର ଏଲକ୍ଟ୍ରୋନିକ ସୋରୁମର ଏକାଉଣ୍ଟାଟ୍ ରଂଜିତ କୁମାର ଦଳାଇ ଷ୍ଟେଟ୍ ବ୍ୟାଙ୍କର ଏଡ଼ିବି ଶାଖାକୁ ଟଙ୍କା ଡିପୋଜିଟ୍ କରିବାକୁ ଯାଉଥିଲେ। ଉକ୍ତ ସମୟରେ ପଛ ପଟୁ ୨ ଜଣ ଦୁର୍ବୃତ୍ତ ଏକ ଦୁଇ ଚକିଆ ଗାଡିରେ ଆସି ଟଙ୍କା ଝାମ୍ପି ନେଇଥିଲେ। ସଂପୃକ୍ତ ଏକାଉଣ୍ଟାଟ୍ ସେମାନଙ୍କ ପିଛା କରିଥିଲେ ହେଁ ଲୁଟେରାମାନେ ଚମ୍ପଟ୍ ମାରିଥିଲେ। ଏନେଇ ଟାଉନ୍ ଥାନାରେ ଅଭିଯୋଗ ହେବାପରେ ଥାନା ଅଧିକାରୀ ପ୍ରସନ୍ନ କୁମାର ବେହେରା ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି। ସ୍ଥାନୀୟ ଅଞ୍ଚଳର ସିସିଟିଭିକୁ ଯାଞ୍ଚ୍ କରାଯାଉଛି। ରାୟଗଡା ସହରରେ ବାରମ୍ବାର ଲୁଟ୍ ଓ ଛିନତାଇ ଘଟଣାକୁ ସହରବାସୀ ନିନ୍ଦା କରିଛନ୍ତି। 

ଭୁବନେଶ୍ୱର: ଦିନ ଦ୍ଵିପ୍ରହରରେ ରାଜଧାନୀ ଭୁବନେଶ୍ୱରର ଏକ ଅଳଙ୍କାର ଦୋକାନରୁ ଲୁଟ୍ । ମୁହଁକୁ ସ୍ପ୍ରେ କରି ୬ ଲକ୍ଷ ଟଙ୍କାର ସୁନା ଅଳଙ୍କାର ଲୁଟିନେଲେ ମୁଖା ପିନ୍ଧା ଦୁର୍ବୁର୍ତ୍ତ । ଆଜି ଦିନ ଗୋଟାଏ ବେଳେ ତମାଣ୍ଡୋ ଥାନା କଳିଙ୍ଗ ବିହାରରେ ଥିବା ଏକ ଗହଣା ଦୋକାନରୁ ଏହି ଲୁଟ୍‌ ହୋଇଛି । ଖବର ପାଇ ତମାଣ୍ଡୋ ଥାନା ପୋଲିସ ଘଟଣାସ୍ଥଳରେ ପହଞ୍ଚି ସିସିଟିଭି ଅଧାରରେ ଯାଞ୍ଚ କରିବା ସହ ତଦନ୍ତ କରୁଛି । 

ଭୁବନେଶ୍ୱର: ରାଜଧାନୀରେ ୱାନ ମ୍ୟାନ ଆର୍ମି ଚୋର । ଏକୁଟିଆ ଆସୁଛି ଆଉ ଘରେ ପଶି ଲୁଟି ନେଉଛି ଲକ୍ଷ ଲକ୍ଷ ଟଙ୍କାର ସୁନା ଗହଣା । ଖଣ୍ଡଗିରି ଥାନା ଅଞ୍ଚଳରେ ଦେଖିବାକୁ ମିଳିଛି ଏହି ୱାନ ମ୍ୟାନ ଆର୍ମି ଚୋରକୁ । ଯାହାର ସିସିଟିଭି ଭିଡିଓ ଭାଇରାଲ ହେଉଛି । ସିସିଟିଭିରେ ଚୋରର ରେକି ବେଳର ଦୃଶ୍ୟ କଏଦ ମଧ୍ୟ ହୋଇଛି । ପୂର୍ବ ପ୍ରସ୍ତୁତି ମୁତାବକ ଚୋର ଚୋରି କରି ଚମ୍ପଟ ମଧ୍ୟ ମାରୁଛି । ଘଟଣାଟି ଘଟିଛି ଡୁମୁଡୁମା ରଣସିଂପୁରରେ । ଗ୍ରାମ କି ଦୁଇ ଗ୍ରାମ ନୁହେଁ, ପ୍ରାୟ ୮୧ ଗ୍ରାମ ସୁନା ଅଳଙ୍କାର ଚୋରି ହୋଇଛି। କିଛି ନଗଦ ଟଙ୍କା ମଧ୍ୟ ଚୋରି କରିନେଇଥିବା ଥାନାରେ ଅଭିଯୋଗ ହୋଇଛି। ମାନବେନ୍ଦ୍ର ବିଶୋଇ ଏ ନେଇ ଥାନାରେ ଅଭିଯୋଗ କରିବା ପରେ ଚୋରକୁ ଧରିବା ପାଇଁ ଛାନଭିନ୍ ଆରମ୍ଭ କରିଛି ପୋଲିସ ।

ସୋର: କାନ୍ଥ ତାଡି ଜୁଏଲାରି ଦୋକାନରୁ ଲୁଟ । ୨୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ଅଳଙ୍କାର ଲୁଟିନେଲେ ଦୁର୍ବୃତ୍ତ । ସୋର ଥାନା ଅନ୍ତର୍ଗତ କେଶରୀପୁର ଫଟାଅର୍ଜୁନ ଛକ ସ୍ଥିତ ନୀଳମଣି ଜୁଏଲାରି ଦୋକାନରୁ ଗତକାଲି ବିଳମ୍ବିତ ରାତିରେ ଏହି ଲୁଟ୍ ହୋଇଛି । ଜୁଏଲାରି ଦୋକାନର କାନ୍ଥକୁ କଟର ସାହାଯ୍ୟରେ ତାଡି ୫୦୦ଗ୍ରାମ ସୁନା ଅଳଙ୍କାର ଓ ୫kg ରୁପା ଅଳଙ୍କାର ଏବଂ ନଗଦ ୧୦ହଜାର ଟଙ୍କା ଲୁଟ ହୋଇଥିବା ନେଇ ମାଲିକ ସୋର ଥାନାରେ ଅଭିଯୋଗ କରିଛନ୍ତି । ପୋଲିସ ଘଟଣାର ତଦନ୍ତ ଜାରି ରଖିଛି ।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ମାତିଛନ୍ତି ବଞ୍ଜାରା ଗ୍ୟାଙ୍ଗ୍ । ଏକୁଟିଆ ବ୍ୟାଗ୍ ଧରିଥିବା ମହିଳାଙ୍କୁ କରୁଛନ୍ତି ଟାର୍ଗେଟ I ଖଣ୍ଡଗିରି ମେଳାରେ ଖେଳାଉଛନ୍ତି ଲୁଟ୍ ଆତଙ୍କ। ଆଖି ପିଛୁଳାକେ ଗାଏବ କରୁଛନ୍ତି ମୋବାଇଲ, ପର୍ସ ଓ ସୁନା ଅଳଙ୍କାର। ଲୁଟପାଟ କରି ଲୋକଙ୍କ ନିଦ ହଜାଇବା ପରେ ସ୍ପେଶାଲ ଡ୍ରାଇଭ୍ ଆରମ୍ଭ କରିଛି କମିଶନରେଟ୍ ପୋଲିସ । ପୃଥକ ପୃଥକ କେସରେ ୧୧ ଜଣଙ୍କୁ ବାନ୍ଧି କୋର୍ଟ ଚାଲାଣ କରିଛି ଖଣ୍ଡଗିରି ଥାନା ପୋଲିସ । ସେମାନଙ୍କ ଠାରୁ ନଗଦ ଟଙ୍କା ସହ ମୋବାଇଲ ଜବତ କରାଯାଇଛି। ଭିଡର ସୁଯୋଗ ନେଇ ଏମାନେ ଖେଳାଉଥିଲେ ଆତଙ୍କ। ପୂର୍ବରୁ ଅଟୋରୁ ଜଣେ ମହିଳାଙ୍କଠାରୁ ୯ଲକ୍ଷ ଟଙ୍କାର ସୁନାଗହଣା ଲୁଟି ନେବା ପରେ ପୁଣି ଆଉ ଜଣେ ମହିଳା ବରମୁଣ୍ଡା ବସ୍ ଷ୍ଟାଣ୍ଡ ପାଖରେ ତାଙ୍କୁ ଘେରିଯାଇ ବ୍ୟାଗ୍ ଖୋଲି ନେଇଯାଇଛନ୍ତି ଟଙ୍କା ଓ ମୋବାଇଲ । ଯାହାକୁ ନେଇ ସିସିଟିଭି ଫୁଟେଜ ସହୟତାରେ ଚିହ୍ନଟ କରି ୧୧ ଜଣ ବଞ୍ଜାରା ଗ୍ୟାଙ୍ଗକୁ ବାନ୍ଧି କୋର୍ଟଚାଲାଣ କରିଛି ପୋଲିସ ।

ବାରିପଦା: ମୟୁରଭଞ୍ଜ ଜିଲ୍ଲା ଉଦଳା ଥାନା ଆନ୍ତର୍ଗତ ବିସିପୁର ଗ୍ରାମରେ ଅଭାବନୀୟ। ଘଟଣା। ଚୋରି କରିବାକୁ ଆସିଥିବା ଜଣେ ଲୁଟେରାର ମୃତ୍ୟୁ ଘଟିଛି। ଚୋରକୁ ଧରି ନିର୍ଘାତ ମାଡ଼ ମାରିଥିଲେ ଗ୍ରାମବାସୀ। ଫଳରେ ଜଣେ ଲୁଟେରା ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି। ବିସିପୁର ଗ୍ରାମରେ ରାତିରେ ଗ୍ୟାସ ଟାଙ୍କି ଚୋରି କରିବାକୁ ପଶିଥିଲେ ୨ ଲୁଟେରା। ମୃତକଙ୍କ ନାଁ ଦେଉଳା ଗ୍ରାମର ବାପି କୋହ୍ଲାର ବୋଲି ଜଣାପଡ଼ିଛି। ୧୦ ରୁ ଅଧିକ ଗ୍ରାମବାସୀଙ୍କୁ ଉଠାଇ ଆଣି ପଚରାଉଚରା କରୁଛି ପୁଲିସ।