ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଅପରାଧିକ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି। ଗତକାଲି ବିଳମ୍ବିତ ରାତିରେ ଭଗବାନପୁର ଅଞ୍ଚଳରେ ଏକ ଗୋଷ୍ଠୀବଦ୍ଧ ଆକ୍ରମଣ ଘଟିଥିବା ବେଳେ ଖଣ୍ଡା ଚୋଟରେ ଜଣେ ଯୁବକ ଗୁରୁତର ହୋଇଛନ୍ତି। ଏହି ପୂରା ଦୃଶ୍ୟ ସିସିଟିଭିରେ କଏଦ ହୋଇଛି।

ଭଗବାନପୁରରେ ଖଣ୍ଡା ସୁଆଙ୍ଗ

ସୂଚନା ଅନୁସାରେ, ଭଗବାନପୁରରେ ଥିବା ଏକ କାଫେ ସମ୍ମୁଖରେ ୪ ଜଣ ଯୁବକ ଛିଡ଼ା ହୋଇଥିବା ବେଳେ ୩ଟି ବାଇକରେ ୬ ଜଣ ଦୁର୍ବୃତ୍ତ ଆସି ସେମାନଙ୍କୁ ଆକ୍ରମଣ କରିଥିଲେ। ଦୁର୍ବୃତ୍ତମାନେ ସାଙ୍ଗରେ ଖଣ୍ଡା ଆଣି ଗୋଡ଼ାଇ ଗୋଡ଼ାଇ ଆକ୍ରମଣ କରିବା ସହ ସେଠାରେ ଥିବା ୩ଟି କାରକୁ ମଧ୍ୟ ଭଙ୍ଗାରୁଜା କରିଛନ୍ତି। ଏହି ଆକ୍ରମଣରେ ଜଣେ ଯୁବକ ଗୁରୁତର ଆହତ ହୋଇଛନ୍ତି। ପୂର୍ବ ଶତ୍ରୁତାରୁ ଏହି କାଣ୍ଡ ଘଟିଥିବା ସନ୍ଦେହ କରାଯାଉଛି। ଗୁରୁତର ଯୁବକଙ୍କ ବାପା ତମାଣ୍ଡୋ ଥାନାରେ ଏତଲା ଦେବା ପରେ ପୁଲିସ ସିସିଟିଭି ଫୁଟେଜ ଆଧାରରେ ଘଟଣାର ତଦନ୍ତ କରୁଛି।

ରାଜଧାନୀ ଉପକଣ୍ଠ ପାତ୍ରପଡ଼ା, ଭଗବାନପୁରରେ ବୁଲିଲା ଖଣ୍ଡା: ସିସିଟିଭିରେ କଏଦ ହେଲା ଆକ୍ରମଣ ବେଳର ଦୃଶ୍ୟ #Bhubaneswar #CrimeNews #Odisha #Police #Safety #SwordAttack pic.twitter.com/rKhVefbmAr

— Sakala News (@SakalaNews) February 17, 2026

ପୁଲିସ ଅଧିକାରୀଙ୍କ ମା'ଙ୍କଠାରୁ ସୁନା ଚେନ୍ ଲୁଟ୍

ଅନ୍ୟପଟେ, ଚନ୍ଦ୍ରଶେଖରପୁର ଥାନା ଅଞ୍ଚଳରେ ଜଣେ ମହିଳାଙ୍କଠାରୁ ସୁନା ଚେନ୍ ଲୁଟ୍ ହୋଇଥିବା ଅଭିଯୋଗ ହୋଇଛି। ଲୁଟର ଶିକାର ହୋଇଥିବା ମହିଳା ଜଣକ ଜଣେ ପୁଲିସ ଅଧିକାରୀଙ୍କ ମା' ବୋଲି ଜଣାପଡ଼ିଛି। ଲୁଟେରାମାନେ ମହିଳାଙ୍କ ବେକରୁ ଚେନ୍ ଝାମ୍ପି ନେଇ ଫେରାର ହୋଇଯାଇଛନ୍ତି। ଏହି ଘଟଣାର ଦୃଶ୍ୟ ମଧ୍ୟ ସିସିଟିଭି କ୍ୟାମେରାରେ କଏଦ ହୋଇଛି ଏବଂ ପୁଲିସ ଲୁଟେରାମାନଙ୍କୁ ଧରିବା ପାଇଁ ପ୍ରୟାସ ଜାରି ରଖିଛି।

ନାବାଳକ ଅପହରଣ ଅଭିଯୋଗ

ରାଜଧାନୀରେ ଅପରାଧ ଏତିକିରେ ଅଟକି ନାହିଁ। ଜଣେ ୧୧ ବର୍ଷର ନାବାଳକଙ୍କୁ ଅପହରଣ କରାଯାଇଥିବା ନେଇ ସହିଦ ନଗର ଥାନାରେ ଏକ ମାମଲା ରୁଜୁ ହୋଇଛି। ଏହି ଘଟଣା ପରେ ଜିଆରପି (GRP) ପକ୍ଷରୁ ଭୁବନେଶ୍ୱର ରେଳ ଷ୍ଟେସନ ଓ ଆଖପାଖ ଅଞ୍ଚଳରେ ନିଖୋଜ ନାବାଳକଙ୍କ ପୋଷ୍ଟର ଲଗାଯାଇଛି। ସମସ୍ତ ଥାନାକୁ ଏହି ସମ୍ପର୍କରେ ସୂଚନା ଦିଆଯାଇଛି ବୋଲି ଜିଆରପି ଆଇଆଇସି କହିଛନ୍ତି। ସହରରେ ଗୋଟିଏ ପରେ ଗୋଟିଏ ଅପରାଧିକ ଘଟଣା ଘଟୁଥିବାରୁ ସାଧାରଣ ଜନତାଙ୍କ ମଧ୍ୟରେ ଭୟ ଓ ଅସନ୍ତୋଷ ପ୍ରକାଶ ପାଇଛି।

ଯାଁଳା : ମେଡିକାଲରେ ପଡ଼ିଥିବା ପୁତୁରାକୁ ଦେଖିବାକୁ ଆସିଥିଲେ ଭୁବନେଶ୍ୱର। ଫେରିବା ରାସ୍ତାରେ ଲୁଟେରାମାନେ ସୁନାଚେନ୍‍ ଝାମ୍ପିନେବା ବେଳେ ସ୍କୁଟିରୁ ପଡ଼ି ମହିଳାଙ୍କ ମୃତ୍ୟୁ ଘଟିଛି। ମୃତ ମହିଳା ହେଲେ ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ମଳିପଡ଼ା ଅନ୍ତର୍ଗତ ପାଣିଛତ୍ର ଗ୍ରାମର ଭାଗିରଥୀ ବରାଳଙ୍କ ସ୍ତ୍ରୀ ପ୍ରତିମା ବରାଳ (୫୨)। ଘଟଣା ଘଟିଛି ଜଟଣୀ ଥାନା ଯାଁଳା ଫାଣ୍ଡି ଅନ୍ତର୍ଗତ ଗଙ୍ଗପଡ଼ା ନିକଟସ୍ଥ ପୂରୁଣା ଟୋଲଗେଟ୍‍ ପାଖରେ। ପ୍ରତିମାଙ୍କ ପୁତୁରା ଭୂବନେଶ୍ୱର ଚନ୍ଦ୍ରଶେଖରପୁର ନିକଟସ୍ଥ ଏକ ଘରୋଇ ମେଡିକାଲରେ ଚିକିତ୍ସାଧୀନ ଅଛନ୍ତି। ପୁତୁରାକୁ ଦେଖିବାକୁ ପ୍ରତିମା ଓ ତାଙ୍କ ସାନପୁଅ ଆଶିଷ ଏକ ସ୍କୁଟି ଯୋଗେ ମଙ୍ଗଳବାର ଭୁବନେଶ୍ୱର ଆସିଥିଲେ। ପୁତୁରାକୁ ଦେଖି ସନ୍ଧ୍ୟାରେ ଘରକୁ ଫେରୁଥିଲେ।

ବାଟରେ ପାତ୍ରପଡ଼ାଠାରେ ଥିବା ଏକ ସୋ ରୁମ୍‍ରୁ ଶାଢ଼ୀ କିଣି ଖୋର୍ଦ୍ଧା ଅଭିମୁଖେ ଯାଉଥିବାବେଳେ ରାତି ପ୍ରାୟ ସାଢେ ୭ଟାରେ ୧୬ନଂ ଜାତୀୟ ରାଜପଥ ଗଙ୍ଗପଡ଼ା ନିକଟସ୍ଥ ପୂରୁଣା ଟୋଲଗେଟ୍‍ ପାଖରେ ପଛରୁ ଦୁଇଟି ବାଇକ୍‍ରେ ୪ ଜଣ ଯୁବକ ଆସିଥିଲେ। ପ୍ରଥମ ବାଇକରେ ବସିଥିବା ଯୁବକ ପ୍ରତିମାଙ୍କ ବେକରୁ ସୁନାଚେନ୍‍ ଝାମ୍ଫି ନେଇଥିଲେ। ଦ୍ୱିତୀୟ ବାଇକରେ ବସିଥିବା ଯୁବକ ପ୍ରତିମାଙ୍କ ହାତରୁ ସୁନା ଚୁଡ଼ି ଝିଙ୍କି ନେବାକୁ ପ୍ରୟାସ କରିବାବେଳେ ସେ ସ୍କୁଟିରୁ ଖସି ପଡ଼ିଥିଲେ। ଯାଁଳା ଫାଣ୍ଡି ପୁଲିସ ପହଞ୍ଚି ଗୁରୁତର ଅବସ୍ଥାରେ ତାଙ୍କୁ ଏମସ୍‍ ମେଡିକାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର ପ୍ରତିମାଙ୍କୁ ମୃତ ଘୋଷଣା କରିଥିଲେ। ବୁଧବାର ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି।