ନୂଆଦିଲ୍ଲୀ: କଲମ୍ୱିଆରେ ଭୟଙ୍କର ବିମାନ ଦୁର୍ଘଟଣା । କଲମ୍ବିଆର ଦକ୍ଷିଣାଞ୍ଚଳରେ ଥିବା ପୁଟୁମାୟୋ (Putumayo) ଅଞ୍ଚଳରେ ଏକ ସାମରିକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏହି ଭୟାବହ ଦୁର୍ଘଟଣାରେ ମୃତ୍ୟୁସଂଖ୍ୟା ୬୬ରେ ପହଞ୍ଚିଥିବା ବେଳେ ୫୭ ଜଣ ଆହତ ହୋଇଥିବା ସ୍ଥାନୀୟ ଗଣମାଧ୍ୟମ ଓ ସାମରିକ ସୂତ୍ରରୁ ଜଣାପଡ଼ିଛି।

ସାମାଜିକ ଗଣମାଧ୍ୟମ ଏକ୍ସ (X)ରେ ଏକ ଭିଡିଓ ବାର୍ତ୍ତା ଜାରି କରି କଲମ୍ବିଆ ଏରୋସ୍ପେସ୍ ଫୋର୍ସ (FAC)ର କମାଣ୍ଡର କାର୍ଲୋସ୍ ସିଲଭା ସୂଚନା ଦେଇଛନ୍ତି ଯେ, ଏହି ସି-୧୩୦ ହର୍କ୍ୟୁଲିସ୍ (C-130 Hercules) ପରିବହନ ବିମାନରେ ୧୧୪ ଜଣ ଯାତ୍ରୀ ଏବଂ ୧୧ ଜଣ କ୍ରୁ ସଦସ୍ୟ ଥିଲେ। ଏହାର କାରଣ ଅନୁସନ୍ଧାନ ପାଇଁ ଏକ ଟିମ୍ ଗଠନ କରାଯାଇଛି। କଲମ୍ବିଆ ରାଷ୍ଟ୍ରପତି ଗୁସ୍ତାଭୋ ପେଟ୍ରୋ ମଧ୍ୟ ଏକ୍ସରେ ପୋଷ୍ଟ କରି କହିଛନ୍ତି ଯେ, ବିମାନରେ ଥିବା ୪୦ରୁ ଅଧିକ ବ୍ୟକ୍ତିଙ୍କ ସ୍ଥିତି ଏବେ ବି ଅସ୍ପଷ୍ଟ ରହିଛି।

ପ୍ରତିରକ୍ଷା ମନ୍ତ୍ରୀ ପେଡ୍ରୋ ସାଞ୍ଚେଜ୍ ଜଣାଇଛନ୍ତି ଯେ, ଏହି ଦୁର୍ଘଟଣା ପେରୁ ସୀମା ନିକଟବର୍ତ୍ତୀ ପୁଏର୍ତ୍ତୋ ଲେଗୁଇଜାମୋ (Puerto Leguízamo)ରୁ ଉଡ଼ାଣ ଭରିବା ସମୟରେ ଘଟିଥିଲା। ଅଗ୍ନିଶମ ବାହିନୀ ଅଧିକାରୀ ଏଡୁଆର୍ଡୋ ସାନ୍ ଜୁଆନ୍ କାଲେଜାସ୍ଙ୍କ କହିବା ଅନୁଯାୟୀ, ରନୱେର ଶେଷ ଭାଗରେ ବିମାନଟି କୌଣସି ଜିନିଷ ସହ ଧକ୍କା ହୋଇଥିଲା ଏବଂ ତଳକୁ ଖସିବା ବେଳେ ଏହାର ଡେଣା ଏକ ଗଛରେ ବାଡ଼େଇ ହୋଇଯାଇଥିଲା। ଏହାପରେ ବିମାନଟିରେ ନିଆଁ ଲାଗିଯିବା ସହ ଭିତରେ ଥିବା କିଛି ବିସ୍ଫୋରକ ସାମଗ୍ରୀ ଫାଟି ଯାଇଥିଲା।

ଦୁର୍ଗମ ଅଞ୍ଚଳ ହୋଇଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଥିଲା। ପ୍ରଥମେ ସ୍ଥାନୀୟ ଲୋକମାନେ ନିଜ ମୋଟରସାଇକେଲ୍ ସାହାଯ୍ୟରେ ଆହତ ସୈନିକମାନଙ୍କୁ ଉଦ୍ଧାର କରିଥିଲେ। ପରେ ସାମରିକ ଗାଡ଼ିଗୁଡ଼ିକ ଘଟଣାସ୍ଥଳରେ ପହଞ୍ଚିଥିଲା। ଏହା କଲମ୍ବିଆ ବାୟୁସେନାର ନିକଟ ଅତୀତର ସବୁଠାରୁ ବଡ଼ ଏବଂ ଭୟଙ୍କର ଦୁର୍ଘଟଣା ବୋଲି କୁହାଯାଉଛି।

ନିର୍ମାତା କମ୍ପାନୀ ଲକହିଡ୍ ମାର୍ଟିନ୍ (Lockheed Martin)ର ଜଣେ ମୁଖପାତ୍ର କହିଛନ୍ତି ଯେ ସେମାନେ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବେ। ୧୯୫୦ ଦଶକରେ ପ୍ରଥମେ ପ୍ରବର୍ତ୍ତିତ ଏହି ସି-୧୩୦ ହର୍କ୍ୟୁଲିସ୍ ବିମାନକୁ କଲମ୍ବିଆ ୧୯୬୦ ଦଶକର ଶେଷ ଭାଗରେ କିଣିଥିଲା। କଲମ୍ବିଆରେ ସାମରିକ ଅଭିଯାନ ପାଇଁ ସୈନ୍ୟ ପରିବହନରେ ଏହା ବହୁଳ ଭାବରେ ବ୍ୟବହୃତ ହୁଏ। ଦେଶର ଦୀର୍ଘ ଦଶନ୍ଧି ଧରି ଚାଲିଥିବା ଆଭ୍ୟନ୍ତରୀଣ ସଂଘର୍ଷରେ ଏହିଭଳି ବିମାନର ପ୍ରମୁଖ ଭୂମିକା ରହିଛି, ଯେଉଁଥିରେ ବର୍ତ୍ତମାନ ସୁଦ୍ଧା ୪,୫୦,୦୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଲାଣି।

ନୂଆଦିଲ୍ଲୀ: କଲମ୍ବିଆର ଭେନେଜୁଏଲା ସୀମାରେ ମର୍ମନ୍ତୁଦ ବିମାନ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ବିମାନରେ ଥିବା ସମସ୍ତ ୧୫ ଜଣ ଯାତ୍ରୀଙ୍କର ମୃତ୍ୟୁ ଘଟିଥିବା ସୂଚନା ମିଳିଛି। ମୃତକଙ୍କ ମଧ୍ୟରେ ଜଣେ ସ୍ଥାନୀୟ ସାଂସଦ ଏବଂ ଜଣେ ନିର୍ବାଚନ ପ୍ରାର୍ଥୀ ସାମିଲ ଥିବା ସରକାରୀ ବିମାନ ଚଳାଚଳ ସଂସ୍ଥା ‘ସାଟେନା’ (Satena) ଏବଂ ବିମାନ ଚଳାଚଳ କର୍ତ୍ତୃପକ୍ଷ ନିଶ୍ଚିତ କରିଛନ୍ତି। 

ରିପୋର୍ଟ ଅନୁଯାୟୀ, Satena Flight NSE 8849 ନାମକ ଏହି ବିମାନଟି (Beechcraft 1900) କୁକୁଟାରୁ ଓକାନା (Ocana) ଅଭିମୁଖେ ଯାତ୍ରା କରୁଥିଲା। ସ୍ଥାନୀୟ ସମୟ ଅନୁସାରେ ଦିନ ପ୍ରାୟ ୧୨:୦୫ରେ ଏହା ଅବତରଣ କରିବାର ଥିଲା, କିନ୍ତୁ ଅବତରଣର କିଛି ମିନିଟ୍ ପୂର୍ବରୁ ଏୟାର ଟ୍ରାଫିକ୍ କଣ୍ଟ୍ରୋଲ୍ ସହ ଏହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ଦୁର୍ଗମ ତଥା ପାହାଡ଼ିଆ କାଟାଟୁମ୍ବୋ ଅଞ୍ଚଳରେ ବ୍ୟାପକ ତଲାସି ଅଭିଯାନ ପରେ ଗୁରୁବାର ଦିନ ବିମାନର ଧ୍ୱଂସାବଶେଷ ଠାବ କରାଯାଇଥିଲା।

ଏହି ବିମାନରେ ୧୩ ଜଣ ଯାତ୍ରୀ ଏବଂ ୨ ଜଣ କ୍ରୁ ସଦସ୍ୟ ଯାତ୍ରା କରୁଥିଲେ। ବିମାନ ସଂସ୍ଥାର ଯାତ୍ରୀ ତାଲିକା ଅନୁଯାୟୀ, ବିମାନରେ ସାଂସଦ Diogenes Quintero ଏବଂ ତାଙ୍କ ଦଳର ସଦସ୍ୟମାନେ ଥିଲେ। ଏହା ସହିତ ଆଗାମୀ ମାର୍ଚ୍ଚ ନିର୍ବାଚନ ପାଇଁ କଂଗ୍ରେସ ପ୍ରାର୍ଥୀ Carlos Salcedo ମଧ୍ୟ ଏହି ଦୁର୍ଘଟଣାରେ ପ୍ରାଣ ହରାଇଛନ୍ତି। ଦୁର୍ଘଟଣାସ୍ଥଳର ଚିତ୍ରରୁ ବିମାନଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି।

ପାହାଡ଼ିଆ ଅଞ୍ଚଳ ଏବଂ ଖରାପ ପାଗ ଯୋଗୁଁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇଥିଲା। କଲମ୍ବିଆର ବେସାମରିକ ବିମାନ ଚଳାଚଳ ଏଜେନ୍ସିର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଦୁର୍ଘଟଣାର କାରଣ ଖୋଜୁଛନ୍ତି। ପ୍ରାଥମିକ ସୂଚନା ଅନୁସାରେ ଖରାପ ପାଗ କିମ୍ବା ବୈଷୟିକ ତ୍ରୁଟି ଯୋଗୁଁ ବିମାନ ଦୁର୍ଘଟଣା ହୋଇଥିବା ସନ୍ଦେହ କରାଯାଉଛି ।

ନୂଆଦିଲ୍ଲୀ: କଲମ୍ବିଆରେ ପୁଣି ଥରେ ଭୟଙ୍କର ଭୂସ୍ଖଳନ ଘଟିଛି। ଏହି ଭୂସ୍ଖଳନରେ ୩୩ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଏଥି ମଧ୍ୟରୁ ୩ଜଣ ଶିଶୁ ଥିବା ଜଣାପଡ଼ିଛି । ୯ ଜଣଙ୍କୁ ଉଦ୍ଧାର କରାଯାଇଛି ଯେଉଁଥିରେ ୪ଜଣଙ୍କ ଅବସ୍ଥା ଗମ୍ଭୀର ରହିଛି ।

ସୂଚନା ଅନୁଯାୟୀ, ପ୍ରବଳ ବର୍ଷା ଯୋଗୁଁ କଲମ୍ବିଆର ରିସାରାଲ୍ଡ ଅଞ୍ଚଳରେ ଭୂସ୍ଖଳନ ହୋଇଛି। ରାଜଧାନୀ ବୋଗୋଟାରୁ ପ୍ରାୟ ୨୩୦ କିଲୋମିଟର ଦୂର ପୁଏଲବୋ ରିକୋ ଓ ସୋସିଲିଆ ଗାଁ ନିକଟସ୍ଥ ପାହାଡ଼ିଆ ଅଞ୍ଚଳରେ ଏହି ଭୂସ୍ଖଳନ ହୋଇଛି। ମାଟି ଅତଡା ତଳେ ଯାତ୍ରୀବାହୀ ବସ୍ ସମତେ ଅନେକ ଘର ଚାପି ହୋଇଯିବାରୁ ଏଭଳି ଦୁଃଖଦ ଘଟଣା ଘଟିଛି।

ଏହି ଘଟଣାକୁ ନେଇ କଲମ୍ବିଆ ରାଷ୍ଟ୍ରପତି ଓ ଗୃହମନ୍ତ୍ରୀ ଦୁଃଖ ପ୍ରକାଶ କରିବା ସହିତ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। କାଣ୍ଡୋଟୋ ନଗର ପାଳିକା ଅଧିକାରୀଙ୍କ କହିବା ଆନୁଯାୟୀ, ବସରେ ପ୍ରାୟ ଯାତ୍ରୀ ବସଥିଲେ ଏହି ସମୟରେ ଭୂସ୍ଖଳନ ହୋଇଥିଲା । ଡ୍ରାଇଭର ଲୋକଙ୍କୁ ବଞ୍ଚାଇବାକୁ ଉଦ୍ୟମ କରି ବିଫଳ ହୋଇଥିଲେ । ସ୍ଥାନୀୟ ପୋଲିସ ଓ ଉଦ୍ଧାରକାରୀ ଘଟଣାସ୍ଥଳରେ ପହଞ୍ଚି ମାଟି ତଳେ ଦବି ରହିଥିବା ଲୋକଙ୍କୁ ଉଦ୍ଧାର କରୁଛନ୍ତି।

ଜିନେଭା: ଦିନକୁ ଦିନ ନିଜର ରୂପ ବଦଳାଉଛି ମହାମାରୀ କରୋନା ଭୁତାଣୁ । କରୋନା ଆତଙ୍କ ଭିତରେ ବିଶ୍ୱବ୍ୟାପୀ ଟିକାକରଣ ଜୋରଦାର ଭାବେ ଜାରି ରହିଛି । ତଥାପି ଭୂତାଣୁର ଅଲଗା ଅଲଗା ଭାରିଆଣ୍ଟ ଆସୁଛି । କରୋନାର ବିଭିନ୍ନ ଭାରିଆଣ୍ଟ ଆସିବା ପରେ ଏବେ ଆସିଛି ନୂଆ ଭାରିଆଣ୍ଟ ‘ମୁ’ । ଏହି ନୂଆ ଭୁତାଣୁର ବୈଜ୍ଞାନିକ ନାମ ଦିଆଯାଇଛି B.1.621 ଭାରିଆଣ୍ଟ । ଜାନୁୟାରୀ ମାସରେ ପ୍ରଥମେ ଏହି ଭାରିଆଣ୍ଟ କଲୋମ୍ବିଆରେ ଚିହ୍ନଟ କରାଯାଇଥିଲା ଓ ଅଗଷ୍ଟ ମାସରେ ଭାଇରସ ଅଫ ଇଂଟରେଷ୍ଟ ଶ୍ରେଣୀରେ ରଖିଛି ଡବ୍ଲୁଏଚଓ ।ଏହି ଭାରିଆଣ୍ଟ ଟିକାର ସୁରକ୍ଷା ବଳୟକୁ ଭେଦ କରି ସଂକ୍ରମଣ କରିବାକୁ ସକ୍ଷମ । କରୋନାର ‘ମୁ’ ଭାରିଆଣ୍ଟକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ ଚିନ୍ତାବ୍ୟକ୍ତ କରିଛି । ତେବେ ଏନେଇ ଅଧିକ ଅନୁଧ୍ୟାନର ଆବଶ୍ୟକତା ରହିଛି ବୋଲି କହିଛି ବିଶ୍ୱ ସ୍ୱାସ୍ଥ୍ୟ ସଂଗଠନ ।

୨୦୨୧ ଜାନୁଆରୀରେ କଲମ୍ବିଆରେ କରୋନାର ‘ମୁ’ ଭାରିଆଣ୍ଟ ମାମଲା ପ୍ରଥମେ ସାମ୍ନାକୁ ଆସିଥିଲା । ବର୍ତ୍ତମାନ ସୁଦ୍ଧା କଲମ୍ବିଆରେ ୩୯ ପ୍ରତିଶତ ନୂଆ ଭାରିଆଣ୍ଟରେ ସଂକ୍ରମିତ ହୋଇଛନ୍ତି । ପରେ ପରେ ଏହି ଭାରିଆଣ୍ଟ ଦକ୍ଷିଣ ଆମେରିକା, ୟୁରୋପ ସହ ଅନ୍ୟ ଦେଶକୁ ବ୍ୟାପିଛି । ବୈଶ୍ୱିକ ସ୍ତରରେ ଏହି ଭାରିଆଣ୍ଟ ସଂକ୍ରମଣ ୦.୧ ପ୍ରତିଶତରୁ କମ୍ ରହିଛି ।