କେନ୍ଦୁଝର: ବନ୍ଧୁକ ମୁନରେ ବ୍ୟାଙ୍କ ଲୁଟ୍ । କେନ୍ଦୁଝର ଜିଲ୍ଲା ବଡ଼ବିଲ୍ ମହାରାଷ୍ଟ୍ର ବ୍ୟାଙ୍କରୁ ହୋଇଛି ବଡ଼ ଧରଣର ଡ଼କାୟତି । ବନ୍ଧୁକ ଦେଖାଇ ଲୁଟିନେଲେ ଟଙ୍କା ଓ ସୁନା ଅଳଙ୍କାର । ୫ଟି ବାଇକରେ ୬ଜଣ ଦୁର୍ବୃତ୍ତ ବନ୍ଧୁକ ଦେଖାଇ ୫କୋଟିରୁ ଉର୍ଦ୍ଧ୍ୱ ଟଙ୍କାର ସୁନା ଓ ୮ ଲକ୍ଷ ନଗଦ ଟଙ୍କା ଲୁଟି ନେଲେ । ଘଟଣାସ୍ଥଳରେ ପୋଲିସର ଛାନବିନ୍ ଜାରି । 

ସୂଚନା ଅନୁସାରେ, ଦୁର୍ବୃତ୍ତମାନେ ଗ୍ରାହକ ଭାବେ ବ୍ୟାଙ୍କରେ ପହଞ୍ଚି ପ୍ରଥମେ ମ୍ୟାନେଜର୍ ଙ୍କ ନିକଟକୁ ଯାଇ ତାଙ୍କୁ ବନ୍ଧୁକ ଦେଖାଇ ଭୟଭୀତ କରିଥିଲେ । ଅନ୍ୟ ଗ୍ରାହକମାନଙ୍କୁ ଏକ ଘରେ ବନ୍ଦ କରିଦେବା ପରେ ଲକର୍ ତାଲା ଆଣି ସେଠାରୁ ୫କୋଟି ଟଙ୍କାରୁ ଉର୍ଦ୍ଧ୍ୱ ସୁନା ଏବଂ ନଗଦ ୮ଲକ୍ଷ ଟଙ୍କା ନେଇ ଫେରାର୍ ହୋଇଯାଇଥିଲେ । ଖବରପାଇ ବଡ଼ବିଲ୍ ପୋଲିସ ଘଟଣାସ୍ଥଳରେ ପହଞ୍ଚି ତନାଘନା ଜାରି ରଖିଛି  l

ସୋର: ଓଡିଶା ଗ୍ରାମ୍ୟ ବ୍ୟାଙ୍କରୁ ଲୁଟ ଉଦ୍ୟମ ପଣ୍ଡ। ସୋର ଥାନା ଅନ୍ତର୍ଗତ ଅନନ୍ତପୁର ବଜାରରେ ଥିବା ଓଡିଶା ଗ୍ରାମ୍ୟ ବ୍ୟାଙ୍କରୁ ଲୁଟ ଉଦ୍ୟମ ପଣ୍ଡ ହୋଇଛି। ଲୁଟେରାମାନେ ବ୍ୟାଙ୍କର ପଛପଟ ଝରକା ଏବଂ ଗ୍ରିଲ ଭାଙ୍ଗି ବ୍ୟାଙ୍କ ଭିତରେ ପଶି କିଛି ଦୁର୍ବୁତ୍ତ ସିସି କେମେରାର ହାର୍ଡଡିସ୍କକୁ ଭାଙ୍ଗି ନେଇଯାଇଛନ୍ତି । କ୍ୟାସ ଟ୍ରେଜେରୀ ଭାଙ୍ଗିବାକୁ ଉଦ୍ୟମ କରି ବିଫଳ ହେବାପରେ ଷ୍ଟ୍ରଙ୍ଗ ରୁମରେ ଥିବା ବାକ୍ସ ଗୁଡିକୁ ଭାଙ୍ଗି ଦେଇଛନ୍ତି। ଶାଖା ପରିଚାଳକଙ୍କ ଲିଖିତ ଅଭିଯୋଗ ପରେ ଅନନ୍ତପୁର ଫାଣ୍ଡି ଅଧିକାରୀ ଘଟଣାସ୍ଥଳକୁ ଯାଇ ତଦନ୍ତ ଜାରି ରଖିଛନ୍ତି ।

ଭୋଗରାଇ: ବ୍ୟାଙ୍କ କାରବାର ଚାଲିଥିବା ସମୟରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ତାଳସାରି ମେରାଇନ ଥାନା ଅନ୍ତର୍ଗତ ୫୭ନଂ ରାଜ୍ୟ ରାଜପଥ ସଂଲଗ୍ନ ଚନ୍ଦନେଶ୍ୱର-ଦୀଘା ସୀମାନ୍ତ ରାସ୍ତାର ବାଡସରିଷାଠାରେ ଥିବା ୟୁନିୟନ ବ୍ୟାଙ୍କ ଅଫ ଇଣ୍ଡିଆ ଚନ୍ଦନେଶ୍ୱର ଶାଖାରେ ସଶସ୍ତ୍ର ଡକାୟତି ହୋଇଛି। ବୁଧବାର ମଧ୍ୟାହ୍ନ ୧ଟା ୫ ମିନିଟ ସମୟରେ ଏହି ଡକାୟତି ହୋଇଥିଲା ବେଳେ ଏଥିରେ ୪୯ ଲକ୍ଷ ଟଙ୍କାରୁ ଊର୍ଦ୍ଧ୍ବ ନଗଦ ଅର୍ଥ ଏବଂ ୨ କିଲୋଗ୍ରାମରୁ ଅଧିକ ଓଜନର ବନ୍ଧକ ସୁନା ଲୁଟ ହୋଇଥିବା ସୂଚନା ମିଳିଛି। ଅନ୍ୟପକ୍ଷରେ ବ୍ୟକ୍ତିଗତ ଭାବେ ଲକର ଭଡ଼ା ନେଇ ସୁନା ଅଳଙ୍କାର ରଖିଥିବା ୯୦ଟି ଲକର ସମ୍ପୂର୍ଣ୍ଣ ଅକ୍ଷତ ରହିଥିବା ଜଣାପଡ଼ିଛି। ତେବେ ଏହି ବ୍ୟାଙ୍କ ଶାଖାରେ ବିପୁଳ ପରିମାଣର ଆର୍ଥିକ କାରବାର ହେବା ସହ ବିପୁଳ ପରିମାଣର ସୁନା ବନ୍ଧକ ରହୁଥିଲା।

ହେଲେ ବ୍ୟାଙ୍କ ପକ୍ଷରୁ ଏଠାରେ କୌଣସି ସଶସ୍ତ୍ର ସୁରକ୍ଷା ବ୍ୟବସ୍ଥା ରଖାଯାଇ ନ ଥିଲା। ଏପରିକି ବ୍ୟାଙ୍କର ସୁରକ୍ଷା ଆଲାର୍ମ ଘଣ୍ଟା ମଧ୍ୟ କିଛି ଦିନ ହେଲା ଅଚଳ ହୋଇପଡ଼ିଥିଲା। ଏଭଳି ଏକ ଅସୁରକ୍ଷିତ ବ୍ୟବସ୍ଥା ମଧ୍ୟରେ ବ୍ୟାଙ୍କ ଶାଖା ଦୀର୍ଘ ଦିନ ହେଲା ଚାଲିଆସୁଥିଲା ବେଳେ ଏହା ଏକ ସୁପରିକଳ୍ପିତ ଏବଂ ଯୋଜନାବଦ୍ଧ ଡକାୟତି ବୋଲି ସାଧାରଣରେ ସନ୍ଦେହ ସୃଷ୍ଟି ହୋଇଛି। ସୂଚନା ମୁତାବକ ବୁଧବାର ମଧ୍ୟାହ୍ନ ୧ଟା ୫ ମିନିଟ ସମୟରେ ୬ ଜଣ ଡକାୟତ ସାଧାରଣ ପୋଷାକରେ ଗ୍ରାହକ ସାଜି ବ୍ୟାଙ୍କ ଶାଖାରେ ପ୍ରବେଶ କରିଥିଲେ। ସେମାନଙ୍କ ମଧ୍ୟରୁ ଜଣେ ମୁହଁରେ ରୁମାଲ ବାନ୍ଧି ଥିଲା ବେଳେ ଅନ୍ୟ ଦୁଇଜଣ ମୁହଁରେ ମାସ୍କ ଲଗାଇଥିଲେ। ଜଣେ ମୁଖ୍ୟଫାଟକ ଭିତର ପଟେ ଜଗି ରହିଥିଲା ବେଳେ ଅନ୍ୟ ୫ଜଣ ଭିତରକୁ ପଶିଥିଲେ।

କେହି କିଛି ବୁଝିବା ପୂର୍ବରୁ ସେହି ସମୟରେ ବ୍ୟାଙ୍କରେ ଉପସ୍ଥିତ ଥିବା ୧୧ ଜଣ ମହିଳା ଓ ପୁରୁଷ ଖାତାଧାରୀ ଏବଂ ୭ ଜଣ ବ୍ୟାଙ୍କ କର୍ମଚାରୀଙ୍କୁ ବନ୍ଧୁକ ଓ ଭୁଜାଲି ମୁନରେ ଭୟଭୀତ କରାଇବା ସହ ସେମାନଙ୍କ ମୋବାଇଲ ଛଡ଼ାଇ ନେଇ ଗୋଟିଏ ଧଳା କନା ବ୍ୟାଗରେ ଭର୍ତ୍ତି କରିଥିଲେ। ଏହାସହିତ ଖାତାଧାରୀ ଓ କର୍ମଚାରୀମାନଙ୍କୁ ପୃଥକ ଭାବେ ଜଣେ ଜଣେ ବନ୍ଧୁକଧାରୀ ଡକାୟତ ସେହି କାର୍ଯ୍ୟାଳୟ ମଧ୍ୟରେ ଅଟକ ରଖିଥିଲେ। ବ୍ରାଞ୍ଚ ମ୍ୟାନେଜର ନୈନିତ ଖାଲକୋ ଓ କ୍ୟାସିୟର ବିକ୍ରମ ପ୍ରଧାନଙ୍କୁ ଚାପୁଡ଼ା ମାରି ଏବଂ ମୁଣ୍ଡରେ ବନ୍ଧୁକ ଲଗାଇ ଭୟଭୀତ କରାଇବା ସହ କ୍ୟାସଡ୍ରୟର, ଷ୍ଟ୍ରଙ୍ଗ ରୁମ ଓ ଲକର ଚାବି ଛଡାଇ ନେଇଥିଲେ। ଜଣେ ଡକାୟତ ଷ୍ଟ୍ରଙ୍ଗ ରୁମ ଚାବି ଖୋଲି ଭିତରେ ପ୍ରବେଶ କରିବା ସହିତ ସେଥିରେ ଥିବା ୨ କିଗ୍ରାରୁ ଅଧିକ ଓଜନର ବନ୍ଧକ ସୁନାକୁ ଦୁଇଟି ବଡ ଧଳା ଜରି ବ୍ୟାଗରେ ପୁରାଇ ବାହାରକୁ ବାହାରିଥିଲେ।

ସେହି ସମୟରେ ଜଣେ ଡକାୟତ କ୍ୟାସ ଲକର ଖୋଲି ସେଥିରୁ ୪୧ ଲକ୍ଷ ଟଙ୍କା ଓ ଅନ୍ୟ ଜଣେ କ୍ୟାସ ଡ୍ରୟର ଖୋଲି ସେଥିରୁ ୮ ଲକ୍ଷରୁ ଅଧିକ ନଗଦ ଟଙ୍କା ପୃଥକ ଦୁଇଟି ବଡ ନାଇଲନ ବ୍ୟାଗରେ ପୁରାଇଥିଲେ। ପରେ ସମସ୍ତ ଖାତାଧାରୀ ଏବଂ କର୍ମଚାରୀଙ୍କୁ ଷ୍ଟ୍ରଙ୍ଗ ରୁମ ଭିତରେ ପୁରାଇ ବାହାରୁ ବନ୍ଦ କରିଦେଇଥିଲେ ବୋଲି ଖାତାଧାରୀ ଉଦୟପୁର ଗ୍ରାମର ଜୟନ୍ତ ପଟ୍ଟାୟତ, କୃଷ୍ଣନଗର ଗ୍ରାମର ମୌସୁମୀ ଜେନା, ଚକପଦ୍ମପୁର ଗ୍ରାମର ଗୋଲକ ପ୍ରଧାନ, ନାଫରାଇ ଗ୍ରାମର ପ୍ରିୟଗୋପାଳ ସାମଲ, ଫୁଲବଣୀ ଗ୍ରାମର ପ୍ରକାଶ ଚାନ୍ଦ, ବିଚିତ୍ରପୁର ଗ୍ରାମର ଅଜୟ ପ୍ରଧାନ, ବ୍ୟାଙ୍କର ସୁନାରୀ ବାଡସରିଷା ଗ୍ରାମର ଅସିତ ରଣା ଓ ଜଳେଶ୍ୱରରୁ କୋରିଅର ନେଇ ଆସିଥିବା ସପନ ଦାସ ପ୍ରକାଶ କରିଛନ୍ତି। ଡକାୟତମାନଙ୍କୁ ଏହି ସମସ୍ତ କାର୍ଯ୍ୟ କରିବା ପାଇଁ ମାତ୍ର ୧୫ ମିନିଟ ସମୟ ଲାଗିଥିବା ସେମାନେ କହିଛନ୍ତି।

ତେବେ ଡକାୟତମାନେ ଯିବା ସମୟରେ ବ୍ୟାଙ୍କରେ ଲାଗିଥିବା ସିସିଟିଭି ହାର୍ଡଡିସ୍କ ଖୋଲି ନେଇଯାଇଥିବା ଏବଂ ଗୋଟିଏ କୋଣରେ ମୋବାଇଲ ଭର୍ତ୍ତି ବ୍ୟାଗ ରଖିଯାଇଥିବା ଦେଖିବାକୁ ମିଳିଛି। ଏହାସହିତ ମୁଖ୍ୟଫାଟକରେ ତାଲା ବନ୍ଦ କରି ଦୁଇଟି ନମ୍ୱର ବିହୀନ କଳା ରଙ୍ଗର ଆପାଚି ବାଇକରେ ସମସ୍ତ ୬ ଜଣ ଡକାୟତ ପଶ୍ଚିମବଙ୍ଗ ରାସ୍ତାରେ ଚାଲି ଯାଇଥିବା ସ୍ଥାନୀୟ ଏକ ଦୋକାନରେ ଲାଗିଥିବା ସିସିଟିଭି ଫୁଟେଜରୁ ଦେଖିବାକୁ ମିଳିଛି। ତେବେ ଷ୍ଟ୍ରଙ୍ଗ ରୁମ ମଧ୍ୟରେ ବନ୍ଦ ହୋଇ ରହିଥିବା ଖାତାଧାରୀ ସ୍ଥାନୀୟ ଚକପଦ୍ମପୁର ଗ୍ରାମର ଗୋଲକ ପ୍ରଧାନ କୌଶଳ କରି ନିଜର ଗୋଟିଏ ମୋବାଇଲକୁ ପିନ୍ଧିଥିବା ପ୍ୟାଣ୍ଟ ଭିତରେ ଲୁଚାଇ ଦେଇଥିଲେ। ସେ ସେହି ଫୋନ ଯୋଗେ ସ୍ଥାନୀୟ କିଛି ଦୋକାନୀ ସମେତ ତାଳସାରି ମେରାଇନ ଥାନା ପୁଲିସକୁ ଖବର ଦେଇଥିଲେ।

ସୂଚନା ପାଇ ତାଳସାରି ମେରାଇନ ଥାନା ଆଇଆଇସି ଚମ୍ପାବତି ସୋରେନ ଏବଂ ଚନ୍ଦନେଶ୍ୱର ପୁଲିସ ଫାଣ୍ଡି ଅଧିକାରୀ ବିଶ୍ୱନାଥ କର ସଦଳବଳେ ଘଟଣାସ୍ଥଳରେ ପହଞ୍ଚି ବ୍ୟାଙ୍କ ମୁଖ୍ୟ ଫାଟକର ତାଲା ଭାଙ୍ଗି ଭିତରେ ପ୍ରବେଶ କରିବା ସହିତ ଷ୍ଟ୍ରଙ୍ଗ ରୁମ ଖୋଲି ଅଟକ ଥିବା ବ୍ୟାଙ୍କ କର୍ମଚାରୀ ଓ ଖାତାଧାରୀମାନଙ୍କୁ ଉଦ୍ଧାର କରିଥିଲେ। ଖବର ପାଇ ଜଳେଶ୍ୱର ଏସଡିପିଓ ଦିଲ୍ଲୀପ କୁମାର ସାହୁ, ଭୋଗରାଇ ଥାନା ଆଇଆଇସି ପ୍ରଭଞ୍ଜନ ବେହେରା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା ବେଳେ ପୂର୍ବାଞ୍ଚଳ ଆଇଜି ହିମାଂଶୁ ଲାଲ ଓ ବାଲେଶ୍ୱର ଏସପି ସାଗରିକା ନାଥ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଛନ୍ତି। ପରେ ଏସପି ସାଗରିକା ନାଥଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ ଗଠନ କରାଯାଇ ତଦନ୍ତ ଆରମ୍ଭ ହୋଇଛି ଏବଂ ଅତିଶୀଘ୍ର ସମ୍ପୃକ୍ତ ଡକାୟତମାନଙ୍କୁ ଖୋଜି ବାହାର କରି ଗିରଫ କରାଯିବ ବୋଲି ଆଇଜି ହିମାଂଶୁ ଲାଲ ସୂଚନା ଦେଇଛନ୍ତି।

ଏହାସହିତ ବାଲେଶ୍ୱରରୁ ସାଇଣ୍ଟିଫିକ ଟିମ ଓ ପୁଲିସ ସନ୍ଧାନୀ କୁକୁର ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅନ୍ୟପକ୍ଷରେ ୟୁନିୟନ ବ୍ୟାଙ୍କ ଅଫ ଇଣ୍ଡିଆ ବାଲେଶ୍ୱର ଜୋନାଲ ଅଫିସରୁ ଏକ ୩ ଜଣିଆ ଅଧିକାରୀ ଦଳ ଘଟଣାସ୍ଥଳରେ ପହଞ୍ଚି ଲୁଟ ଟଙ୍କା ଓ ସୁନାର ପ୍ରକୃତ ପରିମାଣ ଆକଳନ ଆରମ୍ଭ କରିଛନ୍ତି। ଏହି ଡକାୟତି ଘଟଣା ପ୍ରଚାରିତ ହେବା ମାତ୍ରେ ଏହି ବ୍ୟାଙ୍କରେ ସୁନା ବନ୍ଧକ ରଖି ଋଣ ନେଇଥିବା ଶତାଧିକ ଗ୍ରାହକ ବ୍ୟାଙ୍କ ଶାଖାରେ ପହଞ୍ଚି କିପରି ସେମାନଙ୍କ ସୁନା ଫେରି ପାଇବେ ସେ ନେଇ ଭିଡ଼ ଜମାଇଥିବା ଦେଖିବାକୁ ମିଳିଛି।

ଅନ୍ୟପକ୍ଷରେ ଗତ ୨୦୨୦ ସେପ୍ଟେମ୍ୱର ୧୩ ତାରିଖରେ ଜଳେଶ୍ୱର-ଚନ୍ଦନେଶ୍ୱର ୫୭ନଂ ରାଜ୍ୟ ରାଜପଥର ଭୋଗରାଇ ଥାନା ଅନ୍ତର୍ଗତ ଚୌକି ୟୁକୋ ବ୍ୟାଙ୍କ ଶାଖାରୁ ଠିକ ଏହି ଭଳି ସମାନ ଧରଣର ସଶସ୍ତ୍ର ଡକାୟତି ହୋଇଥିଲା ବେଳେ ଆଜି ପର୍ଯ୍ୟନ୍ତ ପୁଲିସ ଡକାୟତମାନଙ୍କୁ ଧରିବାରେ ବିଫଳ ହୋଇଛି। ତେବେ ଆଜିର ଏହି ୟୁନିୟନ ବ୍ୟାଙ୍କ ଅଫ ଇଣ୍ଡିଆ ଚନ୍ଦନେଶ୍ୱର ଶାଖା ଡକାୟତିରେ ଚୌକି ୟୁକୋ ବ୍ୟାଙ୍କ ଡକାୟତି ଗ୍ୟାଙ୍ଗ ସମ୍ପୃକ୍ତି ଥିବା ସାଧାରଣରେ ଆଲୋଚନା ହେଉଛି।

ପୁରୀ: ପୁରୀ ଜିଲ୍ଲା ଡେଲାଙ୍ଗ ଇନ୍ଦିପୁର ଷ୍ଟେଟ ବ୍ୟାଙ୍କରୁ ବୁଧବାର ବିଳମ୍ବିତ ରାତିରେ ଦୁର୍ବୃତ୍ତମାନେ ଲୁଟ ଉଦ୍ୟମ କରିଛନ୍ତି। ଦୁର୍ବୃତ୍ତମାନେ ଏଟିଏମ ଭାଙ୍ଗିବା ସହ ଲକର ତାଡ଼ି ଲୁଟ ଉଦ୍ୟମ କରିଥିବା ଜଣାପଡ଼ିଛି। ଠିକ ସମୟରେ ସ୍ଥାନୀୟ ହୋମ ଗାର୍ଡ ବିବେକାନନ୍ଦ ସେନାପତିଙ୍କ ସାହାସିକତା ପାଇଁ ଲୁଟ ଉଦ୍ଯମ ବିଫଳ ହୋଇଛି। ଖବର ପାଇ ଘଟଣା ସ୍ଥଳରେ ସତ୍ୟବାଦୀ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ସନ୍ଦେହରେ ଜଣଙ୍କୁ ଅଟକ ରଖାଯାଇଛି।

ସାଲେପୁର :  ବନ୍ଧୁକ ଦେଖାଇ ବ୍ୟାଙ୍କରୁ ୩ଲକ୍ଷରୁ ଉର୍ଦ୍ଧ୍ବ ଟଙ୍କା ଲୁଟି ନେଇଛନ୍ତି ଲୁଟେରା। ଘଟଣା ଘଟିଛି ସାଲେପୁର ଅଞ୍ଚଳରେ । ସାଲେପୁର ମାଛୁଆତି ବଜାରରେ ଥିବା ଉତ୍କର୍ଷ ସ୍ମଲ ଫାଇନାନ୍ସ ବ୍ୟାଙ୍କ ଭିତରୁ ବନ୍ଧୁକ ମୁନରେ ୩ ଲକ୍ଷରୁ ଉର୍ଦ୍ଧ୍ବ ଟଙ୍କାର ଡକାୟତି ହୋଇଛି। ୩ ଜଣ ଦୁର୍ବୃତ୍ତ ଗୋଟିଏ ବାଇକ୍ ରେ ମୁଖା ପିନ୍ଧି ଆସି ବନ୍ଧୁକ ଦେଖାଇ ଲୁଟି ନେଇଥିବା ଅଭିଯୋଗ ହୋଇଛି । ଘଟଣାସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି।

ବ୍ୟାଙ୍କର ଜଣ ଜଣ କର୍ମଚାରୀଙ୍କୁ ପୁଲିସ ଘଟଣା ସମ୍ପର୍କରେ ପଚରାଉଚରା କରିବା ସହ ବ୍ୟାଙ୍କର ସିସିଟିଭିକୁ ମଧ୍ୟ ଯାଞ୍ଚ କରୁଛନ୍ତି । ଏଥିସହ କଟକ, ଜଗତପୁର, କେନ୍ଦ୍ରାପଡ଼ା, ଯାଜପୁର ଓ ଜଗତସିଂହପୁର ଆଦି ଅଞ୍ଚଳର ଏଭଳି କ୍ରିମିନାଲମାନଙ୍କର ଗତିବିଧିକୁ ତର୍ଜମା କରୁଛନ୍ତି ।

ଭୁବନେଶ୍ୱର: ଖେଳନା ବନ୍ଧୁକ ଦେଖାଇ ବ୍ୟାଙ୍କରୁ ଲୁଟ୍ ଉଦ୍ୟମ ପଣ୍ଡ । ଭୁବନେଶ୍ୱର ଉପକଣ୍ଠ ବାଲିଅନ୍ତା ଅଟଳା ଷ୍ଟେଟ ବ୍ୟାଙ୍କକୁ ଲୁଟ୍ ଉଦ୍ୟମ କରି ଗିରଫ ହେଲା ଲୁଟେରା । ଗିରଫ ଅଭିଯୁକ୍ତ ବାଲିଅନ୍ତା ଅଞ୍ଚଳର ଉମା ଶଙ୍କର ପରିଡ଼ା । ପୋଲିସର ସୂଚନା ମୁତାବକ ଗତକାଲି ସନ୍ଧ୍ୟା ୫ଟା ବେଳେ ବ୍ୟାଙ୍କ ବନ୍ଦ ହେବା ସମୟରେ ଲୁଟେରା ଜଣକ ବ୍ୟାଙ୍କ ଭିତରେ ପଶି ହଠାତ ପିଅନ ଗଙ୍ଗାଧର ବେହେରାଙ୍କୁ ଛୁରି ଦେଖାଇ ଭୟଭୀତ କରିଥିଲା । ଏହାପରେ ତାଙ୍କ ବେକରେ ଛୁରି ଲଗାଇ ଶାଖା ପରିଚାଳକ ଏବଂ ଅନ୍ୟ ଦୁଇ କର୍ମଚାରୀଙ୍କୁ ‌ଭୟଭୀତ କରାଇ ରେକର୍ଡ ରୁମ ଭିତରେ ପୂରାଇ ବାହାର ପଟୁ ବନ୍ଦ କରି ଦେଇଥିଲା ।

କ୍ୟାସିୟରଙ୍କୁ ଭୟଭୀତ କରାଇ କ୍ୟାସ ଡ୍ରରେ ଥିବା ୮ ଲକ୍ଷ ଟଙ୍କା  ଓ ଲକରରେ ଥିବା ସମସ୍ତ ସୁନା ଗହଣାକୁ ବ୍ୟାଗରେ ପୂରାଇ ଖସି ପଳାଇଯିବାକୁ ଉଦ୍ୟମ କରିଥିଲା । କର୍ମଚାରୀମାନେ ଝରକା ବାଟେ ଚୋର ଚୋର ବୋଲି ଚିତ୍କାର କରିଥିଲେ । ଫୋନ୍ କରି ସ୍ଥାନୀୟ ଜଗନ୍ନାଥପୁର ଗାଁର ଯୁବକ ମାନଙ୍କୁ ସାହାଯ୍ୟ କରିବାକୁ କହିଥିଲେ । ସେମାନଙ୍କ ପାଟି ଶୁଣି ଆପାର୍ଟମେଣ୍ଟ ପରିସରରେ ଖେଳୁଥିବା ଯୁବକମାନେ ଲୁଟେରାକୁ ଗୋଡ଼ାଇଥିଲେ । ଫୋନ୍ କଲ ପାଇ ଜଗନ୍ନାଥପୁର ଗାଁର ଯୁବକମାନେ ବି ପହଞ୍ଚିଥିଲେ । କାଦୁଅ ବିଲ ଭିତରେ ଦୌଡ଼ି ଖସି ପଳାଇବାକୁ ଉଦ୍ୟମ କରୁଥିବା ଲୁଟେରାକୁ ସେମାନେ କାବୁ କରି ନେଇଥିଲେ ।

ଖବର ପାଇ ବାଲିଅନ୍ତା ଥାନା ଅଧିକାରୀ ଯୁବରାଜ ସ୍ୱାଇଁ ଏବଂ ପାହାଳ ଫାଣ୍ଡି ଅଧିକାରୀ ଷ୍ଟାଲିନ ବିଶ୍ୱାଳ ପହଞ୍ଚି ଛାନଭିନ୍ କରିଥିଲେ । ଘଟଣାସ୍ଥଳରୁ ପୋଲିସ ଲୁଟରେ ବ୍ୟବହୃତ ବାଇକଟିକୁ ମଧ୍ୟ ଜବତ କରିଛି । ଆହତ କର୍ମଚାରୀ ଗଙ୍ଗାଧର ବେହେରାକୁ ଚିକିତ୍ସା କରାଯାଉଛି । ବ୍ୟାଙ୍କ ଶାଖା ପରିଚାଳକଙ୍କ ସହ ଅନ୍ୟ କର୍ମଚାରୀଙ୍କୁ ଥାନାକୁ ନେଇ ପଚରାଉଚରା ଚଳାଇଛି । ସମ୍ପୃକ୍ତ ଲୁଟେରାକୁ ଥାନାରେ ଅଟକ ରଖି ପଚରାଉଚରା ଚଳାଇଛି ।