ବେଙ୍ଗାଲୁରୁ : ସୋମବାର ବିଳମ୍ବିତ ରାତିରେ ବେଙ୍ଗାଲୁରୁର କୋରମଙ୍ଗଲାରେ ଏକ ସଡ଼କ ଦୁର୍ଘଟଣାରେ ୭ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ତାମିଲନାଡୁର ହୋସୁର ଡିଏମକେ ବିଧାୟକ ୱାଇ ପ୍ରକାଶଙ୍କ ପୁତ୍ର ଏବଂ ଭାବି ବଧୂ ମଧ୍ୟ ସାମିଲ ରହିଥିବା ଜଣାପଡ଼ିଛି। ଏକ ଅଡି କ୍ୟୁ-୩ କାରରେ ବିଧାୟକ ୱାଇ ପ୍ରକାଶଙ୍କ ପୁତ୍ର କରୁଣା ସାଗରଙ୍କ ସହିତ ତାଙ୍କ ବାନ୍ଧବୀ ବିନ୍ଦୂଙ୍କ ସମେତ ୭ ଜଣ ‘ଲେଟ୍‌ ନାଇଟ ଡ୍ରାଇଭ୍‌’ରେ ବାହାରିଥିଲେ। ହେଲେ ରାତି ପ୍ରାୟ ଅଢ଼େଇଟା ବେଳେ କାର୍‌ଟି ଦ୍ରୁତ ଗତିରେ ଯାଉଥିବା ବେଳେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। ସିସିଟିଭିରୁ ମିଳିଥିବା ଫୁଟେଜ୍‌ ଅନୁଯାୟୀ , ଯେ କାର୍‌ଟି ପ୍ରଥମେ ଭାରସାମ୍ୟ ହରାଇ ଫୁଟ୍‌ପାଥ୍‌ ଉପରକୁ ଚଢ଼ି ଯାଇଥିଲା। ଏହାପରେ ଏକ ବିଦ୍ୟୁତ୍ ଖୁଣ୍ଟରେ ପିଟି ହୋଇଥିଲା।

କାର୍‌ଟି ଏତେ ଜୋରରେ ବିଦ୍ୟୁତ୍ ଖୁଣ୍ଟରେ ପିଟି ହୋଇଥିଲା ଯେ ଏହାର ଦୁଇଟି ଆଗ ଚକ ବାହାରି ଉପରକୁ ଉଡ଼ି ଯାଇଥିଲା। ଘଟଣାସ୍ଥଳରେ ହିଁ ୩ ମହିଳାଙ୍କ ସମେତ ୬ ଜଣଙ୍କର ମୃତ୍ୟୁ ହୋଇଥିଲା ବୋଲି ପୁଲିସ କହିଛି। ଆଉ ଜଣଙ୍କର ହସ୍ପିଟାଲ୍‌ରେ ମୃତ୍ୟୁ ହୋଇଛି। ସମସ୍ତଙ୍କ ବୟସ ୩୦ ଭିତରେ ହେବ ବୋଲି ଜଣାପଡ଼ିଛି ଏବଂ ଅଧିକାଂଶ ଡାକ୍ତରୀ ଛାତ୍ର ଥିଲେ। ୭ ଜଣଙ୍କ ମଧ୍ୟରୁ ଅକ୍ଷୟ ଗୋଏଲ(୨୩) କେରଳର ହୋଇଥିବା ବେଳେ ଉତ୍ସବ(୨୩) ହରିୟାଣାର ବୋଲି ଜଣାପଡ଼ିଛି। କାରଟି ବିଦ୍ୟୁଟ୍‌ ଖୁଣ୍ଟରେ ପିଟି ହୋଇଥିଲେ ମଧ୍ୟ ଏହାର ଏୟାରବ୍ୟାଗ୍‌ ଖୋଲି ନଥିଲା ବୋଲି ଜଣାପଡ଼ିଛି। କେହି ମଧ୍ୟ ସିଟଇ ବେଲ୍ଟ ବାନ୍ଧି ନଥିବା ପୁଲିସ କହିଛି। ତେବେ ଏମାନଙ୍କ ମଧ୍ୟରେ କେହି ନିଶା ସେବନ କରିଥିଲେ କି ନାହିଁ ସେ ସମ୍ପର୍କରେ ପୁଲିସ ଅନୁସନ୍ଧାନ ଆରମ୍ଭ କରିଛି।