ବଲିଉଡ୍ ଅଭିନେତ୍ରୀ ଦୀପିକା ପାଦ୍ୟୁକୋନ୍‌ ବହୁତ ଜଲ୍‌ଦି ଅମିତାଭ ବଚ୍ଚନଙ୍କ ‘କୌନ୍‌ ବନେଗା କରୋଡ଼ପତି’ ଶୋ’ ରେ ନଜର ଆସିବେ। ଏହି ଶୋ’ରେ ଦୀପିକା ତାଙ୍କର ସ୍ବାମୀ ରଣବୀର ସିଂହଙ୍କ ନାଁରେ ବିଗ୍‌ ବି’ଙ୍କ ନିକଟର ଅଭିଯୋଗ କରୁଥିବାର ଦେଖାଯିବେ। ଶୋ’ରେ ଦୀପିକା କହିଥିଲେ ଯେ, ରଣବୀର ତାଙ୍କୁ ଦେଇଥିବା କଥା ଆଜିଯାଏଁ ରଖିନାହାନ୍ତି।

ଦୀପିକା ପୂର୍ବରୁ ବିଗ୍‌ ବି’ଙ୍କ ସହିତ ‘ପିକୁ’ ଫିଲ୍ମରେ କାମ କରିଥିଲେ। ଫିଲ୍ମରେ ଅମିତାଭ ଦୀପିକାଙ୍କ ବାପା ଭୂମିକାରେ ଅଭିନୟ କରିଥିଲେ। ଦୀପିକା କେବିସି ଶୋ’ରେ ତାଙ୍କ ଅନ୍‌ସ୍କ୍ରିନ୍‌ ବାପାଙ୍କ ନିକଟରେ ସ୍ବାମୀ ରଣବୀର କପୁରଙ୍କ ନାଁରେ ଅଭିଯୋଗ ଆଣିଛନ୍ତି। ଶୋ’ରେ ଦୀପିକା କହିଥିଲେ ଯେ, ସେ ମୋତେ କଥା ଦେଇଥିଲେ ଦିନେ ମୋତେ ନିଜ ହାତରେ ଜଳଖିଆ ପ୍ରସ୍ତୁତ କରି ଖୁଆଇବେ। କିନ୍ତୁ ଆଜି ପର୍ଯ୍ୟନ୍ତ ତାହା ହୋଇପାରିଲା ନାହିଁ। ରଣବୀରଙ୍କ କ୍ଲାସ୍‌ ନେବା ପାଇଁ ବିଗ୍‌ ବି’ ଶୋ’ରେ ତାଙ୍କୁ ଫୋନ୍‌ ଲଗାଇଥିଲେ। ବିଗ୍‌ ବି’ ରଣବୀରଙ୍କୁ କହିଥିଲେ ଯେ- ତମ ପତ୍ନୀ ତୁମ ନାମରେ ଅଭିଯୋଗ ଆଣିଛନ୍ତି। ଏହି କଥା ଶୁଣିବା ପରେ ରଣବୀର ବେଶ୍ ମଜାକିଆ ଅନ୍ଦାଜରେ କହିଥିଲେ ଯେ, ତମେ ମୋ ବିଷୟରେ ଭଲ କହିବା ପରିବର୍ତ୍ତେ ମୋ ନାଁରେ ଅଭିଯୋଗ ଆଣୁଛ। ବଚ୍ଚନ ସାହେବ କହିଲେଣି ମାନେ ସେ ତାଙ୍କ କଥା ରଖିବେ ବୋଲି ରଣବୀର କହିଥିଲେ।

ଦୀପିକା ବହୁତ ଜଲ୍‌ଦି ଫର୍‌ହା ଖାନ୍‌ଙ୍କ ସହିତ ‘କେବିସି-୧୩’ ଶୋ’ରେ ନଜର ଆସିବେ। ଏହାର ପ୍ରୋମୋ ଚ୍ୟାନେଲ୍‌ ପକ୍ଷରୁ ଜାରି କରାଯାଇଛି।

ଏଠାରେ ପ୍ରକାଶ ଥାଉ କି, ଏହି ଶୋ’ରେ ଫର୍‌ହା ଖାନ୍ ଭାଗ ନେବା ପରେ ସେ କୋଭିଡ୍‌ ପଜିଟିଭ୍ ଚିହ୍ନଟ ହୋଇଛନ୍ତି। ଏହି ପରିପ୍ରେକ୍ଷୀରେ ଫର୍‌ହା କହିଛନ୍ତି ଯେ, ‘ମୁଁ ନିଜେ କରୋନା ଟିକା ନେବା ସହିତ କରୋନା ଟିକା ନେଇଥିବା ଲୋକଙ୍କ ସହ କାମ କରିଥିଲି। ତଥାପି ମୋତେ କେମିତି କରୋନା ହେଲା ତାହା ମୁଁ ଜାଣିପାରୁନାହିଁ ’। ଏହାପରେ ଉଭୟ ଦୀପିକା ଓ ବିଗ୍‌ ବି’ ସେମାନଙ୍କର କୋଭିଡ ପରୀକ୍ଷା କରାଇଥିଲେ ମଧ୍ୟ
ରିପୋର୍ଟ ନେଗେଟିଭ ଆସିଛି।

ଟେଲିଭିଜନ ଦୁନିଆର ଲୋକପ୍ରିୟ କୁଇଜ୍ ଶୋ ‘କୌନ ବନେଗା କରୋଡପତି’ର ସିଜିନ୍‌-୧୩ ନିକଟରେ ଆରମ୍ଭ ହୋଇଛି। ଏହି ଶୋ’ ଏବେ ଦର୍ଶକଙ୍କୁ ବେଶ୍‌ ଆକୃଷ୍ଟ କରିଛି। କେବିସିରେ ଭାଗ ନେଇ ଅନେକ ଲୋକଙ୍କର ଭାଗ୍ୟ ପରିବର୍ତ୍ତନ ହୋଇଛି। କିନ୍ତୁ ନିକଟରେ ଏହି ଶୋ’ରେ ରେଲୱେ କର୍ମଚାରୀ ଦେଶବନ୍ଧୁ ପାଣ୍ଡେ ଅଂଶଗ୍ରହଣ କରିବା ତାଙ୍କୁ ମହଙ୍ଗା ପଡିଛି। ଶୋ’ରେ ଦେଶବନ୍ଧୁ ମୋଟ ୩,୨୦,୦୦୦ ଟଙ୍କା ଜିତିଛନ୍ତି। ମାତ୍ର ଏହା ପରେ ତାଙ୍କର ଅଡୁଆ ବଢିଯାଇଛି। ରେଲୱେ ପକ୍ଷରୁ ତାଙ୍କୁ ଚାର୍ଜସିଟ୍ ଜାରି କରାଯାଇଛି।

ସୂଚନା ଅନୁଯାୟୀ, କୋଟା ରେଲ୍ ମଣ୍ଡଳର ସ୍ଥାନୀୟ ଖରିଦ ଅନୁଭାଗର କାର୍ଯ୍ୟାଳୟ ଅଧୀକ୍ଷକ ଦେଶବନ୍ଧୁ ପାଣ୍ଡେ ତାଙ୍କ ବିବାହର ୨୫ ବର୍ଷ ପୂର୍ତ୍ତି ଅବସରରେ ଶୋ’ର ହଟ୍‌ସିଟ୍‌ରେ ବସି ବହୁତ ଖୁସି ଥିଲେ।  କିନ୍ତୁ ଯେତେବେଳେ ରେଲୱେ ପ୍ରଶାସନ ଦ୍ବାରା ତାଙ୍କୁ ଚାର୍ଜସିଟ୍‌ ଧରାଇ ଦିଆଗଲା ଏଥିରେ ତାଙ୍କୁ ବଡ଼ ଝଟ୍‌କା ଲାଗିଛି। କେବିସି ପାଇଁ ଦେଶବନ୍ଧୁ ଅଗଷ୍ଟ ୯ରୁ ୧୩ ତାରିଖ ପର୍ଯ୍ୟନ୍ତ ମୁମ୍ବାଇରେ ରହିଥିଲେ। ନିଜ ଛୁଟି ପାଇଁ ଦେଶବନ୍ଧୁ ରେଲୱେ ଅଧିକାରୀଙ୍କୁ ମଧ୍ୟ ସୂଚନା ଦେଇଥଲେ। କିନ୍ତୁ ଏବେ କୁହାଯାଉଛି ଯେ, ତାଙ୍କ ଆବେଦନ ଉପରେ ବିଚାର କରାଯାଇ ନଥିଲା। ଫଳସ୍ବରୂପ ବିନା ଅନୁମତିରେ ଛୁଟି ନେଇଥିବା ଅଭିଯୋଗରେ ଦେଶବନ୍ଧୁଙ୍କୁ ରେଲୱେ ପ୍ରଶାସନ ଦ୍ବାରା ଚାର୍ଜସିଟ୍ ଧରାଇ ଦିଆଯାଇଛି।

କେବଳ ସେତିକି ନୁହେଁ, ତାଙ୍କର ଦରମା ବୃଦ୍ଧି ତିନି ବର୍ଷ ପାଇଁ ରୋକି ଦିଆଯାଇଛି। ଏକଥା ନିଜେ ଦେଶବନ୍ଧୁ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ କହିଛନ୍ତି। ଏବେ ରେଲୱେ କର୍ମଚାରୀ ସଂଗଠନଗୁଡ଼ିକ ଦେଶବନ୍ଧୁଙ୍କୁ ସମର୍ଥନ କରୁଥିବା ଜଣାଯାଇଛି। ରେଲୱେ ପ୍ରଶାସନର ଏଭଳି ନିଷ୍ପତ୍ତିକୁ ଅନେକ ଶ୍ରମିକ ସଂଗଠନ ବିରୋଧ କରୁଥିବା ଜଣାପଡିଛି। ଏଠାରେ ପ୍ରକାଶ ଥାଉ କି, ଶୋ’ରେ ଦେଶବନ୍ଧୁ ୬,୪୦,୦୦୦ ଟଙ୍କାର ୧୧ତମ ପ୍ରଶ୍ନର ଉତ୍ତର ଦେଇ ପାରିନଥିଲେ। ଯାହା ପରେ ତାଙ୍କୁ ୩,୨୦,୦୦୦ ଟଙ୍କାରେ ସନ୍ତୁଷ୍ଟ ହେବାକୁ ପଡିଥିଲା।