ବଲିଉଡ୍ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିଜ୍ଙ୍କ ପାଇଁ ଏକ ବଡ଼ ଝଟକା। ବହୁ ଚର୍ଚ୍ଚିତ ୨୦୦ କୋଟି ଟଙ୍କାର ଠକେଇ ଓ ମନି ଲଣ୍ଡରିଂ ମାମଲାରେ ଜ୍ୟାକଲିନ୍‌ଙ୍କୁ ଦିଲ୍ଲୀ କୋର୍ଟରୁ କୌଣସି ଆଶ୍ୱସ୍ତି ମିଳିପାରିନାହିଁ। ଶନିବାର ଦିଲ୍ଲୀର ପଟିଆଲା ହାଉସ୍ କୋର୍ଟ ମହାଠକ ସୁକେଶ ଚନ୍ଦ୍ରଶେଖର, ତାଙ୍କ ପତ୍ନୀ ଲୀନା ମାରିଆ ପଲ୍ ଏବଂ ଅଭିନେତ୍ରୀ ଜ୍ୟାକଲିନ୍‌ଙ୍କ ସମେତ ୧୫ ଜଣଙ୍କ ନାମରେ ଚାର୍ଜଫ୍ରେମ୍ (ଦୋଷାରୋପ) କରିବାକୁ ନିର୍ଦ୍ଦେଶ ଦେଇଛନ୍ତି। କୋର୍ଟ ସ୍ପଷ୍ଟ କରିଛନ୍ତି ଯେ ଜ୍ୟାକଲିନ୍ ଏହି ମାମଲାରେ ଜଣେ 'ପୀଡ଼ିତା' ନୁହଁନ୍ତି, ବରଂ ସେ ସୁକେଶଙ୍କ ସହ ଅପରାଧରେ ସମ୍ପୃକ୍ତ ଥିଲେ।

ସୁକେଶଙ୍କ ସହ ସାମିଲ ଥିଲେ ଅଭିନେତ୍ରୀ

ଏହି ମାମଲା ସାମ୍ନାକୁ ଆସିବା ଦିନଠାରୁ ଜ୍ୟାକଲିନ୍ ନିଜକୁ ଜଣେ ପୀଡ଼ିତା ବୋଲି ଦାବି କରିଆସୁଥିଲେ। ସେ କହିଥିଲେ ଯେ ସୁକେଶ ତାଙ୍କୁ ମିଛ କହି ଫସାଇଛନ୍ତି ଏବଂ ଉପହାରଗୁଡ଼ିକ କେଉଁଠାରୁ ଆସିଥିଲା ସେ ବିଷୟରେ ସେ ଅବଗତ ନଥିଲେ। କିନ୍ତୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ କୁହାଯାଇଥିଲା ଯେ ସୁକେଶଙ୍କ ଅପରାଧିକ କାର୍ଯ୍ୟକଳାପ ସମ୍ପର୍କରେ ଜ୍ୟାକଲିନ୍‌ଙ୍କୁ ଆଗରୁ ଜଣାଥିଲା। କୋର୍ଟ ଏହି ଦଲିଲ୍‌କୁ ଗ୍ରହଣ କରି ପ୍ରାଇମା ଫେସି (ପ୍ରଥମ ଦୃଷ୍ଟିରେ) ଆଧାରରେ ତାଙ୍କ ବିରୋଧରେ ଥିବା ପ୍ରମାଣକୁ ବିଚାରକୁ ନେଇଛନ୍ତି। କୋର୍ଟଙ୍କ କହିବା ଅନୁଯାୟୀ ସେ ମହାଠକ ସୁକେଶଙ୍କ ସହ ମିଳିମିଶି ଏହି କାରବାରରେ ସାମିଲ ଥିଲେ। ଆସନ୍ତା ଜୁନ୍ ୩ ତାରିଖରେ ଏହି ଚାର୍ଜସିଟ୍‌ରେ ବିଧିବଦ୍ଧ ଭାବେ ସ୍ୱାକ୍ଷର କରାଯିବ।

ତିହାର ଜେଲରୁ ଚାଲିଥିଲା ୨୦୦ କୋଟିର ଖେଳ

ସୂଚନାଯୋଗ୍ୟ, ୨୦୨୧ ମସିହାରେ ଦିଲ୍ଲୀର ତିହାର ଜେଲ ଭିତରେ ରହି ମହାଠକ ସୁକେଶ ଚନ୍ଦ୍ରଶେଖର ଏହି ବଡ଼ ଧରଣର ଠକେଇର ଷଡ଼ଯନ୍ତ୍ର ରଚିଥିଲେ। ସେ ନକଲି ଫୋନ୍ କଲ୍ ମାଧ୍ୟମରେ କେନ୍ଦ୍ର ଗୃହ ସଚିବ ଏବଂ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟର ବରିଷ୍ଠ ଅଧିକାରୀଙ୍କ ପରିଚୟ ଦେଇ ଫୋନ୍ କରୁଥିଲେ। ଏଭଳି ଢଙ୍ଗରେ ସେ ରାନବାକ୍ସିର ପୂର୍ବତନ ପ୍ରମୋଟର ଶିବିନ୍ଦର ମୋହନ ସିଂହଙ୍କ ପତ୍ନୀ ଅଦିତି ସିଂହଙ୍କୁ ଦଳୀୟ ପାଣ୍ଠି ନାମରେ ପ୍ରାୟ ୨୦୦ କୋଟି ଟଙ୍କା ଠକି ନେଇଥିଲେ। ପରବର୍ତ୍ତୀ ସମୟରେ ଠକେଇ ଟଙ୍କାରୁ ସେ ଜ୍ୟାକଲିନ୍‌ଙ୍କୁ କୋଟି କୋଟି ଟଙ୍କାର ଦାମୀ ଉପହାର ଦେଇଥିବା ତଦନ୍ତରୁ ଜଣାପଡ଼ିଥିଲା।

ବଲିଉଡ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିସ୍ଙ୍କୁ ୨୦୦ କୋଟି ଟଙ୍କାର ମନି ଲଣ୍ଡରିଂ (କଳାଧନ ବୈଧ) ମାମଲାରେ ବଡ଼ ଝଟକା ଲାଗିଛି। ମହାଠକ ସୁକେଶ ଚନ୍ଦ୍ରଶେଖରଙ୍କ ସହ ଜଡିତ ଏହି ମାମଲାରେ ସରକାରୀ ସାକ୍ଷୀ (ଆପ୍ରୁଭର୍) ହେବା ପାଇଁ ଜ୍ୟାକଲିନ୍ କରିଥିବା ଆବେଦନକୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କଡ଼ା ବିରୋଧ କରିଛି। ଇଡି ଦାବି କରିଛି ଯେ, ଅଭିନେତ୍ରୀ ଜଣକ ଏହି ମାମଲାରେ କେବଳ ଜଣେ ପୀଡ଼ିତା ନୁହଁନ୍ତି, ବରଂ ଜଣେ 'ସକ୍ରିୟ ଅଂଶଗ୍ରହଣକାରୀ' ଏବଂ ଅପରାଧରୁ ମିଳିଥିବା ଅର୍ଥର ବଡ଼ ଲାଭାର୍ଥୀ ଅଟନ୍ତି।

ଜାଣିଶୁଣି ଉପହାର ନେଇଥିଲେ ଜ୍ୟାକଲିନ୍

ଦିଲ୍ଲୀର ପଟିଆଲା ହାଉସ୍ କୋର୍ଟରେ ନିଜର ଜବାବ ଦାଖଲ କରି ଇଡି କହିଛି ଯେ, ସୁକେଶର ଅପରାଧିକ ପୃଷ୍ଠଭୂମି ସମ୍ପର୍କରେ ଜାଣିବା ସତ୍ତ୍ୱେ ଜ୍ୟାକଲିନ୍ ତାଙ୍କ ସହ ନିୟମିତ ଯୋଗାଯୋଗରେ ଥିଲେ। ମୁଖ୍ୟ ଅଭିଯୁକ୍ତ ସୁକେଶଙ୍କଠାରୁ ସେ ଜାଣିଶୁଣି ବହୁ ମୂଲ୍ୟବାନ ଉପହାର ଏବଂ ଆର୍ଥିକ ସୁବିଧା ଗ୍ରହଣ କରିଥିଲେ। ତେଣୁ ସେ ନିଜକୁ ଜଣେ 'ଅଜ୍ଞାତ ପୀଡ଼ିତା' ବୋଲି ଦାବି କରିବା ସମ୍ପୂର୍ଣ୍ଣ ଭିତ୍ତିହୀନ ଅଟେ। ଇଡିର କହିବା ଅନୁଯାୟୀ, ଅଭିନେତ୍ରୀ ଜଣକ ମନି ଲଣ୍ଡରିଂ ପ୍ରକ୍ରିୟାରେ ସକ୍ରିୟ ଭାବେ ସାମିଲ ହୋଇଥିଲେ ଏବଂ ଅପରାଧିକ ଅର୍ଥର ଉତ୍ସକୁ ଅଣଦେଖା କରିଥିଲେ।

ସରକାରୀ ସାକ୍ଷୀ କଲେ ନ୍ୟାୟ ପ୍ରକ୍ରିୟା ବାଧାପ୍ରାପ୍ତ ହେବ

ଇଡି ପକ୍ଷରୁ କୋର୍ଟରେ କୁହାଯାଇଛି ଯେ, ଏହି ଗମ୍ଭୀର ଅପରାଧରେ ଜ୍ୟାକଲିନଙ୍କୁ ସରକାରୀ ସାକ୍ଷୀ ଭାବେ ଗ୍ରହଣ କଲେ ତାହା ନ୍ୟାୟ ପ୍ରକ୍ରିୟାରେ ବାଧା ସୃଷ୍ଟି କରିବ ଏବଂ ଅପରାଧର ଗମ୍ଭୀରତାକୁ ହ୍ରାସ କରିବ। ଏହା ସହିତ ତଦନ୍ତ ସମୟରେ ଅଭିନେତ୍ରୀ ଜଣକ ସମ୍ପୂର୍ଣ୍ଣ ସହଯୋଗ କରିନଥିଲେ ଏବଂ ପ୍ରିଭେନ୍ସନ୍ ଅଫ୍ ମନି ଲଣ୍ଡରିଂ ଆକ୍ଟ (PMLA) ଅଧୀନରେ ରେକର୍ଡ କରାଯାଇଥିବା ବୟାନରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଲୁଚାଇଥିଲେ ବୋଲି କେନ୍ଦ୍ରୀୟ ତଦନ୍ତକାରୀ ସଂସ୍ଥା ଅଭିଯୋଗ କରିଛି।

ମେ' ୧୨ ରେ ପରବର୍ତ୍ତୀ ଶୁଣାଣି

ପଟିଆଲା ହାଉସ୍ କୋର୍ଟର ଅତିରିକ୍ତ ଦୌରା ଜଜ୍ ପ୍ରଶାନ୍ତ ଶର୍ମା ଏହି ମାମଲାର ଶୁଣାଣି କରି ଇଡିର ଆପତ୍ତି ଉପରେ ଜବାବ ରଖିବାକୁ ଜ୍ୟାକଲିନ୍ ଫର୍ଣ୍ଣାଣ୍ଡିସ୍‌ଙ୍କ ଓକିଲଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ମାମଲାର ପରବର୍ତ୍ତୀ ଶୁଣାଣି ମେ' ୧୨ ତାରିଖରେ ଅନୁଷ୍ଠିତ ହେବ। ସୂଚନାଯୋଗ୍ୟ ଯେ, ଗତ ମାସରେ ଜ୍ୟାକଲିନ୍ ଏହି ୨୦୦ କୋଟି ଟଙ୍କାର ଠକେଇ ମାମଲାରେ ସରକାରୀ ସାକ୍ଷୀ ହେବା ପାଇଁ କୋର୍ଟରେ ଆବେଦନ କରିଥିଲେ।

୨୦୦ କୋଟି ଟଙ୍କାର ଠକେଇ ଏବଂ ମନି ଲଣ୍ଡରିଂ ମାମଲାରେ ଅଭିଯୁକ୍ତ ମହାଠକ ସୁକେଶ ଚନ୍ଦ୍ରଶେଖର ଏବଂ ତାଙ୍କ ପତ୍ନୀ ଲୀନା ମାରିଆ ପଲୋସ୍ଙ୍କ ଜାମିନ ଆବେଦନ ଉପରେ ଦିଲ୍ଲୀ ହାଇକୋର୍ଟରେ ଅନ୍ତିମ ଶୁଣାଣି ଶେଷ ହୋଇଛି। କୋର୍ଟ ସମସ୍ତ ପକ୍ଷଙ୍କୁ ନିଜର ଯୁକ୍ତିର ସାରାଂଶ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ଏପ୍ରିଲ ୪ ତାରିଖରେ କୋର୍ଟ ଏହି ମାମଲାର ଚୂଡ଼ାନ୍ତ ରାୟ ଶୁଣାଇବେ।

ଜ୍ୟାକଲିନ୍ ଫର୍ଣ୍ଣାଣ୍ଡିଜଙ୍କ ନାମ ନେଲେ ଲୀନା

ଶୁଣାଣି ସମୟରେ ଲୀନା ମାରିଆଙ୍କ ଓକିଲ କୋର୍ଟରେ ଏକ ବଡ଼ ଦାବି କରିଛନ୍ତି। ସେ କହିଛନ୍ତି ଯେ ସୁକେଶଙ୍କ ସହ ଲୀନାଙ୍କ ସମ୍ପର୍କ ଆଉ ଭଲ ନାହିଁ ଏବଂ ସୁକେଶ ଅନ୍ୟ ଜଣେ ମହିଳାଙ୍କ ସହ ସମ୍ପର୍କରେ ଅଛନ୍ତି। କୋର୍ଟ ସେହି ମହିଳାଙ୍କ ନାମ ପଚାରିବାରୁ ଓକିଲ ବଲିଉଡ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିଜ୍ଙ୍କ ନାମ ନେଇଥିଲେ। ଲୀନାଙ୍କ ପକ୍ଷରୁ ଏହା ମଧ୍ୟ କୁହାଯାଇଥିଲା ଯେ ସେ ନିଜେ ଜଣେ ପ୍ରତିଷ୍ଠିତ ଅଭିନେତ୍ରୀ ଏବଂ ତାଙ୍କୁ ସୁକେଶଙ୍କ କ୍ରାଇମ୍ ସିଣ୍ଡିକେଟ୍ ବାବଦରେ କୌଣସି ପୂର୍ବ ସୂଚନା ନଥିଲା।

ଦିଲ୍ଲୀ ପୋଲିସର ଦୃଢ଼ ବିରୋଧ

ଅନ୍ୟପକ୍ଷରେ ଦିଲ୍ଲୀ ପୋଲିସ ଲୀନାଙ୍କ ଜାମିନ ଆବେଦନକୁ କଡ଼ା ବିରୋଧ କରିଛି। ପୋଲିସ କହିଛି ଯେ ଲୀନା ସଂଗଠିତ ଅପରାଧ ସିଣ୍ଡିକେଟରେ ଏକ ସକ୍ରିୟ ଭୂମିକା ଗ୍ରହଣ କରୁଥିଲେ। ସେ ସିଣ୍ଡିକେଟର ଆର୍ଥିକ କାରବାର ପରିଚାଳନା କରିବା ସହ ଅନ୍ୟ ସଦସ୍ୟମାନଙ୍କ ମଧ୍ୟରେ ଠକେଇ ଟଙ୍କା ବାଣ୍ଟୁଥିଲେ। ତେଣୁ ତାଙ୍କୁ କୌଣସି ପରିସ୍ଥିତିରେ ଜାମିନ ପ୍ରଦାନ କରାଯିବା ଉଚିତ୍ ନୁହେଁ ବୋଲି ପୋଲିସ ନିଜ ଯୁକ୍ତିରେ ଦର୍ଶାଇଛି।

ମାମଲାର ପୃଷ୍ଠଭୂମି

ସୂଚନାଯୋଗ୍ୟ ଯେ, ୨୦୦ କୋଟି ଟଙ୍କା ଠକେଇ ଏବଂ ହେରଫେର ଅଭିଯୋଗରେ ୨୦୨୧ ସେପ୍ଟେମ୍ବର ମାସରେ ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା (EOW) ଲୀନା ଏବଂ ସୁକେଶଙ୍କୁ ଗିରଫ କରିଥିଲା। ପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ମଧ୍ୟ ମନି ଲଣ୍ଡରିଂ ମାମଲାରେ ସେମାନଙ୍କୁ ଗିରଫ କରିଥିଲା। ସେମାନଙ୍କ ବିରୋଧରେ କଠୋର ମକୋକା (MCOCA) ଆଇନ ଅଧୀନରେ ମାମଲା ରୁଜୁ ହୋଇଛି। ନିକଟରେ ସୁପ୍ରିମକୋର୍ଟ ତିନି ସପ୍ତାହ ମଧ୍ୟରେ ଲୀନାଙ୍କ ଜାମିନ ଆବେଦନ ଉପରେ ନିଷ୍ପତ୍ତି ନେବାକୁ ଦିଲ୍ଲୀ ହାଇକୋର୍ଟଙ୍କୁ ନିର୍ଦ୍ଦେଶ ଦେଇଥିଲେ, ଯାହାର ପରବର୍ତ୍ତୀ ଶୁଣାଣି ଏପ୍ରିଲ ୪ରେ ହେବ।

ବଲିଉଡ୍ ଅଭିନେତ୍ରୀ ଜ୍ୟାକଲିନ୍ ଫର୍ଣ୍ଣାଣ୍ଡିଜ୍ ପୁଣି ଥରେ ଚର୍ଚ୍ଚାକୁ ଆସିଛନ୍ତି। ତିହାର୍ ଜେଲରେ ବନ୍ଦୀ ଥିବା ମହାଠକ ସୁକେଶ ଚନ୍ଦ୍ରଶେଖର ଭାଲେଣ୍ଟାଇନ୍ସ ଡେ ଅବସରରେ ଜ୍ୟାକଲିନ୍‌ଙ୍କ ପାଇଁ ଏକ ବିଶେଷ ଉପହାର ପଠାଇଛନ୍ତି। ରିପୋର୍ଟ ଅନୁଯାୟୀ, ସୁକେଶ ଜେଲରୁ ଅଭିନେତ୍ରୀଙ୍କୁ ଏକ ‘ଲଭ୍ ଲେଟର’ ଲେଖିବା ସହ ଏକ ଦାମୀ ହେଲିକପ୍ଟର ଉପହାର ଦେଇଥିବା ଦାବି କରିଛନ୍ତି।

୨୦୨୬ ଭାଲେଣ୍ଟାଇନ୍ସ ପାଇଁ ହେଲିକପ୍ଟର ଭେଟି

ସୂଚନା ମୁତାବକ, ସୁକେଶ ଚନ୍ଦ୍ରଶେଖର ଏହି ଚିଠିରେ ଜ୍ୟାକଲିନ୍‌ଙ୍କୁ ‘ମାଇଁ ବେବି ବୋମ୍ମା’ ବୋଲି ସମ୍ବୋଧନ କରିଛନ୍ତି। ସେ ଦାବି କରିଛନ୍ତି ଯେ ଚଳିତ ବର୍ଷ ଭାଲେଣ୍ଟାଇନ୍ସ ଡେ’ରେ ସେ ଜ୍ୟାକଲିନ୍‌ଙ୍କୁ ଏକ ବିଳାସପୂର୍ଣ୍ଣ ‘ଏୟାରବସ୍ ହେଲିକପ୍ଟର’ (Airbus Helicopter) ଉପହାର ଦେଇଛନ୍ତି। ସୁକେଶ ଚିଠିରେ ଉଲ୍ଲେଖ କରିଛନ୍ତି ଯେ ଏହି ଉପହାର ସମ୍ପୂର୍ଣ୍ଣ ବୈଧ ଏବଂ ଏଥିପାଇଁ ସମସ୍ତ ଟିକସ ପୈଠ କରାଯାଇଛି।

ଚିଠିରେ କ’ଣ ଲେଖିଛନ୍ତି ସୁକେଶ?

ମଣ୍ଡୋଲି ଜେଲରୁ ଲେଖାଯାଇଥିବା ଏହି ଚିଠିରେ ସୁକେଶ ନିଜର ପ୍ରେମ ନିବେଦନ କରିଛନ୍ତି। ସେ ଲେଖିଛନ୍ତି, “ତୁମେ ମୋ ଜୀବନର ସବୁଠାରୁ ସୁନ୍ଦର ଉପହାର। ଖୁବଶୀଘ୍ର ମୋର ଆଇନଗତ ସମସ୍ୟା ଦୂର ହେବ ଏବଂ ଆମେ ଏକାଠି ରହିବା।” ଗତ ବର୍ଷ (୨୦୨୫) ମଧ୍ୟ ସୁକେଶ ଜ୍ୟାକଲିନ୍‌ଙ୍କୁ ଏକ ‘ଗଲ୍ଫଷ୍ଟ୍ରିମ୍ ଜେଟ୍’ ଉପହାର ଦେଇଥିବା ଚର୍ଚ୍ଚା ହୋଇଥିଲା।

୨୦୦ କୋଟି ଟଙ୍କାର ଠକେଇ ମାମଲା

ଉଲ୍ଲେଖଯୋଗ୍ୟ ଯେ, ସୁକେଶ ଚନ୍ଦ୍ରଶେଖର ବର୍ତ୍ତମାନ ୨୦୦ କୋଟି ଟଙ୍କାର ମନି ଲଣ୍ଡରିଂ ମାମଲାରେ ଜେଲରେ ଅଛନ୍ତି। ସେ ବାରମ୍ବାର ଜେଲରୁ ଜ୍ୟାକଲିନ୍‌ଙ୍କ ନିକଟକୁ ଚିଠି ଲେଖି ନିଜର ଭାବନା ପ୍ରକାଶ କରିଆସୁଛନ୍ତି। ତେବେ ଜ୍ୟାକଲିନ୍ ଏହି ସମ୍ପର୍କକୁ ନେଇ କୌଣସି ସର୍ବସାଧାରଣ ପ୍ରତିକ୍ରିୟା ଦେଇନାହାନ୍ତି।

ମୁମ୍ବାଇ: ସୁକେଶ ଚନ୍ଦ୍ରଶେଖରଙ୍କ ସହ ଜଡିତ ମନି ଲଣ୍ଡରିଂ ମାମଲାରେ ନୂଆ ଟ୍ଵିଷ୍ଟ । ମୁହାଁମୁହିଁ ହୋଇଛନ୍ତି ଦୁଇ ବଲିଉଡ ଅଭିନେତ୍ରୀ ଜ୍ୟାକଲିନ ଏବଂ ନୋରା ଫତେଇ । ସୁକେଶଙ୍କ ସହ ଜବରଦସ୍ତି ନାଁ ଯୋଡିଥିବାରୁ ଜ୍ୟାକଲିନ ଫର୍ଣ୍ଣାଡିଜଙ୍କ ବିରୋଧରେ ଦିଲ୍ଲୀ କୋର୍ଟରେ ମାନହାନି ମକଦ୍ଦମା କରିଛନ୍ତି ନୋରା ଫତେହୀ ।

ଅଭିନେତ୍ରୀ ଜ୍ୟାକଲିନ୍‌ ଫର୍ଣ୍ଣାଣ୍ଡିସ୍‌ ବିଭିନ୍ନ ସମୟରେ ତାଙ୍କୁ ଅପମାନିତ କରିଥିବା ଏବଂ ବଦନାମ କରିଥିବା ମକଦ୍ଦମା ଫର୍ଦ୍ଦରେ ଦର୍ଶାଇଛନ୍ତି ନୋରା ଫତେଇ । ଅଭିଯୋଗରେ ନୋରା ଆହୁରି ମଧ୍ୟ ଲେଖିଛନ୍ତି ଯେ, ‘ଯେହେତୁ ଆମେ ଦୁଇ ଜଣ ଗୋଟିଏ ପେଶାରେ ରହିଛୁ ଏବଂ କାମ କରୁଛୁ ସେଥିପାଇଁ ଜ୍ୟାକଲିନ୍‌ ଫର୍ଣ୍ଣାଣ୍ଡିଜ୍‌ ବ୍ୟକ୍ତିଗତ ଉଦ୍ଦେଶ୍ୟ ସାଧନ କରିବାକୁ ମୋତେ ବଦନାମ କରିଛନ୍ତି । ମୋ କ୍ୟାରିୟନ ନଷ୍ଟ କରିବାକୁ ପ୍ରୟାସ କରିଛନ୍ତି । ଏହା ସହିତ ଅନ୍ୟାନ୍ୟ କାରଣ ଏବଂ ଉଦ୍ଦେଶ୍ୟ ମଧ୍ୟ ରହିଛି’।

ନୋରା ଅଭିଯୋଗ ଆଣିଛନ୍ତି ଯେ, ମହାଠକ ସୁକେଶ ଚନ୍ଦ୍ରଶେଖରଙ୍କ ୨୦୦ କୋଟି ମନି ଲଣ୍ଡ୍ରିଂ ମାମଲାରେ ତାଙ୍କ ନାମକୁ ଜବରଦସ୍ତ ଯୋଡା ଯାଉଛି । ସେ କହିଛନ୍ତି କି ମୋର ସୁକେଶ ସହିତ କୌଣସି ସିଧାସଳଖ ସଂପର୍କ ନାହିଁ । ସେ ସୁକେଶଙ୍କ ପତ୍ନୀ ଲୀନା ମାରିଆଙ୍କ ସହାୟତାରେ ସୁକେଶଙ୍କୁ ଜାଣିଥିଲେ । ନୋରା କହିଛନ୍ତି କି ସେ ସୁକେଶଙ୍କ ଠାରୁ କୌଣସି ଉପହାର ନେଇ ନାହାଁନ୍ତି । ସେପଟେ ମିଡିଆରେ ଏଭଳି କଥା ପ୍ରଚାର ହେବା ଫଳରେ ତାଙ୍କ ମର୍ଯ୍ୟଦା ନଷ୍ଟ ହେଉଥିବା କଥା ସେ ଅଭିଯୋଗ କରିଛନ୍ତି ।

ନୂଆଦିଲ୍ଲୀ: ମନି ଲଣ୍ଡରିଂ ମାମଲାରେ ବଲିଉଡ୍‌ ଅଭିନେତ୍ରୀ ଜ୍ୟାକ୍‌ଲିନ ଫର୍ଣ୍ଣାଣ୍ଡିଜ୍‌ଙ୍କ ଜାମିନ ଅବଧି ନଭେମ୍ବର ୧୦ ପର୍ଯ୍ୟନ୍ତ ବୃଦ୍ଧି ପାଇଛି। ଅଭିନେତ୍ରୀଙ୍କ ଜାମିନ ଆବେଦନର ଶୁଣାଣି କରି ପଟିୟାଲା ହାଉସ କୋର୍ଟ ଏହି ନିଷ୍ପତ୍ତି ଶୁଣାଇଛନ୍ତି। ତେବେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏହି ନିଷ୍ପତ୍ତିକୁ ତୀବ୍ର ବିରୋଧ କରିଛି। ଏଜେନ୍ସି ଅଭିଯୋଗ କରିଛି ଯେ ଜ୍ୟାକ୍‌ଲିନ୍‌ କେବେ ବି ଯାଞ୍ଚରେ ସହଯୋଗ କରିନାହାନ୍ତି। ପ୍ରମାଣ ମିଳିବାରୁ ସବୁ କିଛି ସାମ୍‌ନାକୁ ଆସିଥିଲା। ଅଭିନେତ୍ରୀ ଅନେକ ଥର ଦେଶରୁ ପଳାଇବାକୁ ପ୍ରୟାସ କରିଛନ୍ତି। ତେବେ ଏଲଓସି ଜାରି କରାଯାଇଥିବାରୁ ସେ ଏଥିରେ ବିଫଳ ହୋଇଛନ୍ତି। ସେ ଗୁରୁତ୍ବପୂର୍ଣ୍ଣ ପ୍ରମାଣ ମଧ୍ୟ ନଷ୍ଟ କରିଛନ୍ତି। ଠକ ସୁକେଶ ଚନ୍ଦ୍ରଶେଖର ସମ୍ବନ୍ଧିତ ୨୦୦ କୋଟି ଟଙ୍କାର ଠକେଇ ମାମଲାରେ ଜ୍ୟାକ୍‌ଲିନ୍‌ ପ୍ରମୁଖ ସାକ୍ଷୀ ଅଛନ୍ତି। ଏହା ପୂର୍ବରୁ ସେପ୍ଟେମ୍ବର ୧୬ରେ ୫୦ ହଜାର ଟଙ୍କାର ବେଲ୍‌ ବଣ୍ଡରେ କୋର୍ଟ ତାଙ୍କୁ ଅନ୍ତରୀଣ ଜାମିନ ପ୍ରଦାନ କରିଥିଲେ। ଏହି ଆବେଦନ ଉପରେ କୋର୍ଟ ଇଡିଠାରୁ ଜବାବ ମାଗିଥିଲେ।

ମୁମ୍ବାଇ: ବଲିଉଡ୍‌ ଅଭିନେତ୍ରୀ ଜ୍ୟାକ୍‌ଲିନ୍‌ ଫର୍ଣ୍ଣାଡିସ୍‌ଙ୍କୁ ସାମାନ୍ୟ ଆଶ୍ୱସ୍ତି । ବହୁ ଚର୍ଚ୍ଚିତ ୨୦୦ କୋଟି ଟଙ୍କାର ମନି ଲଣ୍ଡରିଂ ମାମଲାରେ ଜ୍ୟାକ୍‌ଲିନ୍‌ଙ୍କୁ ମିଳିଛି ଆଶ୍ୱସ୍ତି । ‘କନ୍‌ମ୍ୟାନ୍‌’ ସୁକେଶ ଚନ୍ଦ୍ରଶେଖରଙ୍କ ନାଁରେ ଚାଲିଥିବା ୨୦୦ କୋଟି ଟଙ୍କାର ‘ମନି ଲଣ୍ଡରିଂ’ ମାମଲାରେ ସମ୍ପୃକ୍ତ ଥିବା ଜାକ୍‌ଲିନ୍‌ଙ୍କୁ ଗତ ମାସରେ ଅନ୍ତରୀଣ ଜାମିନ ମିଳିଥିଲା। ନଭେମ୍ୱର ୧୦ ତାରିଖ ପର୍ଯ୍ୟନ୍ତ ଅନ୍ତରୀଣ ଜାମିନ୍‌ ବଢ଼ାଇଲେ କୋର୍ଟ । ଅଦାଲତ ପକ୍ଷରୁ ଇଡିକୁ ସମସ୍ତ ଚାର୍ଜସିଟ୍‌ ଏବଂ ଅନ୍ୟ ଦସ୍ତାବିଜ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଜାମିନ୍‌ ଏବଂ ଅନ୍ୟ ଦରଖାସ୍ତ ଗୁଡ଼ିକର ଶୁଣାଣି ନଭେମ୍ୱର ୧୦ ତାରିଖକୁ କୋର୍ଟ ଧାର୍ଯ୍ୟ କରିଛନ୍ତି ।

ଆଜି ଅଭିନେତ୍ରୀ ଜ୍ୟାକଲିନ ଶୁଣାଣି ପାଇଁ ନିଜ ଓକିଲ ପ୍ରଶାନ୍ତ ପାଟିଲଙ୍କ ସହିତ ଅଦାଲତରେ ପହଞ୍ଚିଥିଲେ। ଏହା ପୂର୍ବରୁ ୨୬ ସେପ୍ଟେମ୍ବରରେ କୋର୍ଟ ଜ୍ୟାକଲିନଙ୍କୁ ୫୦ ହଜାର ଟଙ୍କାର ମୁଚଲିକାରେ ଅନ୍ତରୀଣ ଜାମିନ ଦେଇଥିଲେ। ଇଡି ନିଜର ସପ୍ଲିମେଣ୍ଟାରୀ ଚାର୍ଜିଟରେ ଜ୍ୟାକଲିନଙ୍କୁ ଅଭିଯୁକ୍ତ ବୋଲି ଦର୍ଶାଇଥିଲା।

ସୂଚନାଯୋଗ୍ୟ, ୨୦୦ କୋଟି ମନି ଲଣ୍ଡରିଂ ମାମଲାରେ ଜେଲ୍‌ରେ ଥିବା ଠକ ସୁକେଶ ଚନ୍ଦ୍ରଶେଖର ଜୋର ଜବରଦସ୍ତ ଟଙ୍କା ଆଦାୟ କରି ଜ୍ୟାକଲିନଙ୍କୁ ୫ କୋଟି ୧୭ ଲକ୍ଷ ଟଙ୍କାର ଗିଫ୍ଟ ଦେଇଥିଲା । କେବଳ ସେତିକି ନୁହେଁ ସୁକେଶ ଜ୍ୟାକଲିନ୍ ପରିବାର ଲୋକଙ୍କୁ ମଧ୍ୟ ଟଙ୍କା ପଠାଇଥିଲା । ଦାମୀ ଗିଫ୍ଟ ସହ କାର୍ ଓ ଅନେକ ଜିନିଷ ଦେଇଥିଲା ସୁକେଶ । ସୁକେଶ ବାହାରିନରେ ଥିବା ଜ୍ୟାକଲିନଙ୍କ ମାତାପିତାଙ୍କ ଏବଂ ଆମେରିକାରେ ରହିଥିବା ଭଉଣୀକୁ ମହଙ୍ଗା କାର ଉପହାର ଦେଇଥିଲେ। ଏହାଛଡା ଭାଇକୁ ୧୫ ଲକ୍ଷ ଟଙ୍କା ଦେଇଥିଲେ।

ଯାଞ୍ଚ ସମୟରେ ଇଡି ଜ୍ୟାକଲିନଙ୍କ ବୟାନକୁ ରେକର୍ଡ କରିଥିଲେ। ଏହି ସମୟରେ ଜ୍ୟାକଲିନ ଇଡିକୁ କହିଥିଲେ କି, ସୁକେଶ ତାଙ୍କ ପରିବାର ଏବଂ ତାଙ୍କୁ ମହଙ୍ଗା ଗିଫ୍ଟ ଦେଇଥିଲେ। ଏଥିରେ ଲକ୍ଷେ ଟଙ୍କାର ଘୋଡା ମଧ୍ୟ ସାମିଲ ରହିଛି। ଏହା ଛଡା ଜ୍ୟାକ୍‌ଲିନ୍‌ ରହୁଥିବା ବିଳାସପୂର୍ଣ୍ଣ ହୋଟେଲର ଖର୍ଚ୍ଚ ମଧ୍ୟ ସୁକେଶ ଉଠାଉଥିଲେ।

ନୂଆଦିଲ୍ଲୀ: ଦୁଇ ଶହ କୋଟି ଟଙ୍କା ଠକେଇ ମାମଲାରେ ଫସିଥିବା ଅଭିନେତ୍ରୀ ଜ୍ୟାକଲିନ୍‌ ଫର୍ଣ୍ଣାଣ୍ଡିଜ୍‌ ଠକ ସୁକେଶ ଚନ୍ଦ୍ରଶେଖରଙ୍କୁ ବିବାହ କରିବାକୁ ଚାହୁଁଥିଲେ ବୋଲି ସୂଚନା ମିଳିଛି। ଅଭିନେତା ଅକ୍ଷୟ କୁମାର ଏବଂ ସଲ୍‌ମାନ ଖାନ୍‌ ସୁକେଶଠାରୁ ଦୂରେଇ ରହିବା ପାଇଁ ଜ୍ୟାକଲିନ୍‌କୁ ପରାମର୍ଶ ଦେଇଥିଲେ। ତେବେ ସେ ତାଙ୍କ କଥା ଶୁଣି ନ ଥିଲେ। ସେ ସୁକେଶକୁ ବିବାହ କରିବାକୁ ଚାହୁଁଥିବା ଅକ୍ଷୟ-ସଲ୍‌ମାନଙ୍କୁ କହିଥିଲେ। ସୁକେଶକୁ ଜଣେ ବ୍ୟବସାୟୀ ଏବଂ ରାଜନେତା ଭାବେ ପରିଚୟ ଦେଇଥିଲେ। ଜାକ୍‌ଲିନ୍‌ ସୁକେଶଠାରୁ ମହଙ୍ଗା ଉପହାର ନେବାରେ ଲାଗିଥିଲେ। ଜ୍ୟାକଲିନ୍‌ଙ୍କୁ ଆକୃଷ୍ଟ କରିବା ଲାଗି ସେ ତାଙ୍କ ମ୍ୟାନେଜର ପ୍ରଶାନ୍ତଙ୍କୁ ଏକ ଡୁକାତି ବାଇକ ଉପହାର ଦେଇଥିଲା। ଏବେ ଏହାକୁ ଜବତ କରାଯାଇଛି।

ନୂଆଦିଲ୍ଲୀ : ବଲିଉଡ୍ ଅଭିନେତ୍ରୀ ଜାକଲିନ୍ ଫର୍ଣ୍ଣାଣ୍ଡିଜ୍‌ଙ୍କୁ ଇଡିର ଜେରା । ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦେଶାଳୟ (ଇଡି) ତାଙ୍କୁ ୫ ଘଣ୍ଟା ହେବ ପଚରା ଉଚରା କରୁଥିବା ସୂଚନା ମିଳିଛି। ଦିଲ୍ଲୀରେ ଜ୍ୟାକଲିନ୍‌ଙ୍କୁ ପ୍ରବର୍ତ୍ତନ ନିର୍ଦେଶାଳୟ ଜେରା କରୁଥିବା ଜଣାପଡିଛି । କୋଟି କୋଟି ଟଙ୍କା ହେରଫେର ମାମଲାରେ ଜ୍ୟାକଲିନ୍‌ଙ୍କୁ ଇଡି ଜେରା କରୁଥିବା ଜଣାପଡିଛି।

Enforcement Directorate (ED) is questioning Bollywood actress Jacqueline Fernandez in Delhi for the last five hours, in a money laundering case.

(File photo) pic.twitter.com/ftUj2CkNcN

— ANI (@ANI) August 30, 2021

ତେବେ ବଲିଉଡ୍ ଅଭିନେତ୍ରୀ ଜାକଲିନ୍ ଫର୍ଣ୍ଣାଣ୍ଡିଜ୍‌ଙ୍କ ପୁର୍ବରୁ ଅନ୍ୟଜଣେ ବଲିଉଡ୍‌ ଅଭିନେତ୍ରୀ ୟାମୀ ଗୌତମଙ୍କୁ ମଧ୍ୟ ପ୍ରବର୍ତ୍ତନ ନିର୍ଦେଶାଳୟ (ଇଡି) ପଚରାଉଚୁରା କରିଥିଲା। ଗତ ୭ ଜୁଲାଇରେ ଟଙ୍କା ହେରଫେର ମାମଲାରେ ୟାମୀ ଗୌତମଙ୍କୁ ଇଡି ପଚରା ଉଚରା କରିଥିଲା।