ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ଏବଂ ହୋରମୁଜ୍ ପ୍ରଣାଳୀ (Strait of Hormuz) ସଙ୍କଟ କାରଣରୁ ଦେଶରେ ଦେଖାଦେଇଥିବା ରୋଷେଇ ଗ୍ୟାସର ଅଭାବକୁ ଦୃଷ୍ଟିରେ ରଖି ଭାରତ ଏକ ବଡ଼ ପଦକ୍ଷେପ ନେଇଛି। ଦୀର୍ଘ ୮ ବର୍ଷ ପରେ ପ୍ରଥମ ଥର ପାଇଁ ଇରାନରୁ ଏଲପିଜି (LPG) କିଣିଛି ଭାରତ। ଇଣ୍ଡିଆନ ଅଏଲ କର୍ପୋରେସନ୍ (IOC) ଦ୍ୱାରା ଏହି ଗ୍ୟାସ୍ କିଣାଯାଇଥିବା ବେଳେ ଏହାକୁ ନେଇ 'ସି ବାର୍ଡ' (Sea Bird) ନାମକ ଏକ ଜାହାଜ ଭାରତ ଅଭିମୁଖେ ବାହାରିଛି।

ମଧ୍ୟପ୍ରାଚ୍ୟ ସଙ୍କଟ ଓ ଯୋଗାଣରେ ବାଧା

ଆମେରିକା, ଇସ୍ରାଏଲ୍ ଏବଂ ଇରାନ ମଧ୍ୟରେ ବଢୁଥିବା ତିକ୍ତତା ଯୋଗୁଁ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ହୋରମୁଜ୍ ପ୍ରଣାଳୀ ଦେଇ ବାଣିଜ୍ୟିକ ଯାତାୟାତ ବହୁଳ ଭାବରେ ବାଧାପ୍ରାପ୍ତ ହୋଇଛି। ଭାରତ ତାର ମୋଟ ଏଲପିଜି ଚାହିଦାର ପ୍ରାୟ ୬୦ ପ୍ରତିଶତ ମଧ୍ୟପ୍ରାଚ୍ୟରୁ ଆମଦାନୀ କରିଥାଏ। ତେବେ ଏହି ଯୁଦ୍ଧ କାରଣରୁ ଯୋଗାଣ ଶୃଙ୍ଖଳା ପ୍ରଭାବିତ ହେବାରୁ ଦେଶରେ ଉତ୍କଟ ଗ୍ୟାସ୍ ସଙ୍କଟ ସୃଷ୍ଟି ହୋଇଛି। ଏପରିକି ଘରୋଇ ଉପଭୋକ୍ତାଙ୍କ ଆବଶ୍ୟକତାକୁ ପୂରଣ କରିବା ପାଇଁ ସରକାର ଶିଳ୍ପ ସଂସ୍ଥାଗୁଡ଼ିକୁ ଗ୍ୟାସ ଯୋଗାଣରେ କାଟ୍ କରିଛନ୍ତି।

ଆମେରିକାର କଟକଣା କୋହଳ ପରେ ଆଶ୍ୱସ୍ତି

ପଶ୍ଚିମ ଦେଶଗୁଡ଼ିକର କଟକଣା କାରଣରୁ ଭାରତ ୨୦୧୯ ମସିହାରୁ ଇରାନରୁ ତୈଳ ଓ ଗ୍ୟାସ ଆମଦାନୀ ବନ୍ଦ କରିଦେଇଥିଲା। କିନ୍ତୁ ବର୍ତ୍ତମାନର ବିଶ୍ୱସ୍ତରୀୟ ଜରୁରୀକାଳୀନ ପରିସ୍ଥିତିକୁ ଦୃଷ୍ଟିରେ ରଖି ଆମେରିକା ସରକାର ଇରାନ ଉପରେ ଲାଗୁ ହୋଇଥିବା କଟକଣାକୁ ୩୦ ଦିନ ପାଇଁ କୋହଳ କରିଛନ୍ତି। ଏହି ସୁଯୋଗରେ ଭାରତ ତୁରନ୍ତ ଇରାନରୁ ପ୍ରାୟ ୪୩,୦୦୦ ଟନ୍ ଏଲପିଜି କିଣିବାକୁ ଚୁକ୍ତି କରିଛି। ଏହି ବିପୁଳ ପରିମାଣର ଗ୍ୟାସକୁ ଇଣ୍ଡିଆନ ଅଏଲ ସମେତ ଭାରତ ପେଟ୍ରୋଲିୟମ୍ (BPCL) ଏବଂ ହିନ୍ଦୁସ୍ତାନ ପେଟ୍ରୋଲିୟମ୍ (HPCL) ମଧ୍ୟରେ ବଣ୍ଟାଯିବ। ବିଶେଷ କଥା ହେଉଛି, ଏହି କ୍ରୟ ପାଇଁ ଭାରତୀୟ ମୁଦ୍ରା 'ଟଙ୍କା' ଆକାରରେ ଦେୟ ପ୍ରଦାନ କରାଯିବ।

'ସି ବାର୍ଡ' ଜାହାଜରେ ଆସୁଛି ଏଲପିଜି

ଇରାନରୁ ଏହି ଗୁରୁତ୍ୱପୂର୍ଣ୍ଣ ଏଲପିଜି ଖେପ ଆଣୁଥିବା ଟ୍ୟାଙ୍କର 'ସି ବାର୍ଡ' କର୍ଣ୍ଣାଟକର ମାଙ୍ଗାଲୋର ବନ୍ଦରରେ ପହଞ୍ଚିବା ନେଇ ସୂଚନା ରହିଛି। ଅନ୍ୟପକ୍ଷରେ, ହୋରମୁଜ୍ ପ୍ରଣାଳୀରେ ଫସି ରହିଥିବା ଅନ୍ୟାନ୍ୟ ଭାରତୀୟ ଜାହାଜ ଯଥା ପାଇନ୍ ଗ୍ୟାସ୍ ଏବଂ ଜଗ୍ ବସନ୍ତ କୁ ମଧ୍ୟ କୂଟନୈତିକ ସ୍ତରରେ ଆଲୋଚନା ମାଧ୍ୟମରେ ସୁରକ୍ଷିତ ଭାବେ ବାହାର କରିବା ପାଇଁ କେନ୍ଦ୍ର ସରକାରଙ୍କ ପ୍ରୟାସ ଜାରି ରହିଛି, ଯାହାକି ଦେଶର ତୈଳ ଏବଂ ଗ୍ୟାସ ଚାହିଦାକୁ ପୂରଣ କରିବାରେ ସହାୟକ ହେବ।

ପଶ୍ଚିମ ଏସିଆରେ ଚାଲିଥିବା ଯୁଦ୍ଧ ମଧ୍ୟରେ ତୈଳ ଏବଂ ଗ୍ୟାସ୍ ଯୋଗାଣକୁ ନେଇ ସମଗ୍ର ବିଶ୍ୱରେ ଚିନ୍ତା ବଢ଼ିଥିବା ବେଳେ ଇରାନ ପକ୍ଷରୁ ଏକ ବଡ଼ ଆଶ୍ୱସ୍ତିକର ଖବର ଆସିଛି। ଆମେରିକା ଏବଂ ଇସ୍ରାଏଲ୍ ସହିତ ତିକ୍ତତା ମଧ୍ୟରେ ଇରାନ ମିଳିତ ଜାତିସଂଘକୁ ଏକ ବାର୍ତ୍ତା ପଠାଇଛି। ଏହି ବାର୍ତ୍ତାରେ ଇରାନ ସୂଚନା ଦେଇଛି ଯେ, ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ହୋରମୁଜ୍ ପ୍ରଣାଳୀ (Strait of Hormuz) ଦେଇ ଜାହାଜ ଚଳାଚଳକୁ ସୀମିତ ଭାବେ ଅନୁମତି ଦିଆଯିବ। କିନ୍ତୁ ଏଥିପାଇଁ କଠୋର ସର୍ତ୍ତ ଲାଗୁ ହେବ। ଏହି ନିଷ୍ପତ୍ତି ଫଳରେ ସେଠାରେ ଫସି ରହିଥିବା ୨୦ଟି ଭାରତୀୟ ଜାହାଜ ପାଇଁ ଆଶା ସଞ୍ଚାର ହୋଇଛି।

ବିଶ୍ୱ ଯୋଗାଣ ଉପରେ Hormuz ପ୍ରଣାଳୀର ଗୁରୁତ୍ୱ

ଗ୍ଲୋବାଲ୍ ସପ୍ଲାଏ ବା ବିଶ୍ୱ ଯୋଗାଣର ପ୍ରାୟ ୨୦ ପ୍ରତିଶତ କ୍ରୁଡ୍ ଅଏଲ୍ (ଅଶୋଧିତ ତୈଳ) ଏବଂ ଏଲପିଜି (LPG) ର ପରିବହନ ଏହି ହୋରମୁଜ୍ ପ୍ରଣାଳୀ ଦେଇ ହୋଇଥାଏ। ଯୁଦ୍ଧ ପରିସ୍ଥିତି କାରଣରୁ ଏହି ପଥ ବନ୍ଦ ହେବା ଫଳରେ ବିଭିନ୍ନ ଦେଶର ବହୁ ଜାହାଜ ଏଠାରେ ଫସି ରହିଥିଲେ, ଯାହା ଫଳରେ ବିଶ୍ୱସ୍ତରରେ ତୈଳ ଓ ଗ୍ୟାସ୍ ସଙ୍କଟ ଦେଖାଦେଇଥିଲା। ତେବେ ଇରାନର ନୂତନ ଯୋଜନା ଅନୁଯାୟୀ, ଆମେରିକା ଏବଂ ଇସ୍ରାଏଲ୍ ସହିତ ଜଡିତ ଥିବା ଜାହାଜଗୁଡ଼ିକ ଉପରେ ସମ୍ପୂର୍ଣ୍ଣ ପ୍ରତିବନ୍ଧକ ରହିବ, କିନ୍ତୁ ଭାରତ ଭଳି ଦେଶର ଜାହାଜଗୁଡ଼ିକ ଯାଞ୍ଚ ପରେ ଏହି ସାମୁଦ୍ରିକ ରାସ୍ତା ଦେଇ ଯାତାୟାତ କରିପାରିବେ।

ଫସି ରହିଛି ୨୦ ଭାରତୀୟ ଜାହାଜ

ଭାରତ ସରକାରଙ୍କ ପକ୍ଷରୁ ମଧ୍ୟ ଏହି ପ୍ରସଙ୍ଗରେ ସୂଚନା ଦିଆଯାଇଛି। ବନ୍ଦର ଏବଂ ଜଳପଥ ମନ୍ତ୍ରଣାଳୟର ସ୍ୱତନ୍ତ୍ର ସଚିବ ରାଜେଶ କୁମାର ସିହ୍ନା କହିଛନ୍ତି ଯେ ହୋରମୁଜ୍ ପ୍ରଣାଳୀର ପଶ୍ଚିମ ପାର୍ଶ୍ୱରେ ପ୍ରାୟ ୨୦ଟି ଭାରତୀୟ ଜାହାଜ ଅଟକି ରହିଛନ୍ତି ଏବଂ ଏହି ସଙ୍କଟପୂର୍ଣ୍ଣ ପଥକୁ ଅତିକ୍ରମ କରିବାକୁ ପ୍ରସ୍ତୁତ ଅଛନ୍ତି। ଏହା ମଧ୍ୟରେ ବିପୁଳ ପରିମାଣର ଏଲପିଜି ଏବଂ ଅଶୋଧିତ ତୈଳ ବହନ କରୁଥିବା ଜାହାଜ ସାମିଲ ରହିଛି। ସୂଚନାଯୋଗ୍ୟ ଯେ, ଭାରତୀୟ କୂଟନୈତିକ ପ୍ରୟାସ ପରେ ଏହାପୂର୍ବରୁ ଏମଟି ଶିବାଲିକ୍ (MT Shivalik) ଏବଂ ନନ୍ଦା ଦେବୀ (Nanda Devi) ଭଳି ଭାରତୀୟ ଏଲପିଜି ବାହକ ଜାହାଜ ସୁରକ୍ଷିତ ଭାବେ ଗୁଜରାଟ ଉପକୂଳରେ ପହଞ୍ଚି ସାରିଛନ୍ତି।

ଭାରତରେ ତୈଳ ଏବଂ ଗ୍ୟାସ୍ ଅଭାବ ନାହିଁ

ଏହି ଅନ୍ତର୍ଜାତୀୟ ଉତ୍ତେଜନା ମଧ୍ୟରେ ପେଟ୍ରୋଲିୟମ ମନ୍ତ୍ରଣାଳୟର ଯୁଗ୍ମ ସଚିବ ସୁଜାତା ଶର୍ମା ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ ବର୍ତ୍ତମାନ ଭାରତରେ ପର୍ଯ୍ୟାପ୍ତ ଏଲପିଜି (LPG) ଷ୍ଟକ୍ ମହଜୁଦ୍ ରହିଛି। ଏହା ସହିତ ଦେଶର ସମସ୍ତ ରିଫାଇନାରୀ ପୂର୍ଣ୍ଣ କ୍ଷମତାରେ କାର୍ଯ୍ୟ କରୁଛନ୍ତି, ତେଣୁ ଦେଶରେ ପେଟ୍ରୋଲ ଏବଂ ଡିଜେଲର (Petrol-Diesel) କୌଣସି ଅଭାବ ନାହିଁ। ଏହି ସଙ୍କଟ ସମୟରେ ଜାହାଜଗୁଡ଼ିକର ସୁରକ୍ଷିତ ଯାତାୟାତ ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇରାନର ରାଷ୍ଟ୍ରପତି ମାସୁଦ୍ ପେଜେସକିଆନ୍ (Masoud Pezeshkian) ଙ୍କ ସହ ମଧ୍ୟ ଫୋନ୍ ଯୋଗେ ଆଲୋଚନା କରିଥିଲେ।

ନୂଆଦିଲ୍ଲୀ : ମହଙ୍ଗା ହେଲା ଘରୋଇ ଏଳପିଜି ସିଲିଣ୍ଡର। ସିଲିଣ୍ଡର ପିଛା ୫୦ ଟଙ୍କା ବୃଦ୍ଧି କରାଯାଇଛି। ରାଜଧାନୀ ଦିଲ୍ଲୀରେ ବୁଧବାରଠାରୁ ଘରୋଇ ଏଲପିଜି ସିଲିଣ୍ଡରର ଦାମ ୧୧୦୩ ଟଙ୍କା ହୋଇଯାଇଛି। ପୂର୍ବରୁ ଏହାର ଦାମ ୧୦୫୩ ଟଙ୍କା ଥିଲା। ସେହିପରି କମର୍ସିଆଲ ସିଲିଣ୍ଡର ଦାମ ବି ବୃଦ୍ଧି କରାଯାଇଛି। କମର୍ସିଆଲ ସିଲିଣ୍ଡରର ଦାମ ୩୫୦ ଟଙ୍କା ବୃଦ୍ଧି କରାଯାଇଛି। ହୋଲି ପୂର୍ବରୁ ଏହା ଗ୍ରାହକଙ୍କୁ ବଡ ଝଟକା ଦେଇଛି।

ନୂଆଦିଲ୍ଲୀ: ସରକାର ଦେଶବାସୀଙ୍କ ବୋଝ ଉପରେ ନଳିତା ବିଡା ଲଦିଛନ୍ତି। ମହଙ୍ଗାକୁ ନେଇ ପୂର୍ବରୁ ସଙ୍କଟରେ ପଡିଥିବା ସାଧାରଣ ଲୋକ ଆଉ ଏକ ଅସୁବିଧାର ସମ୍ମୁଖୀନ ହୋଇଛନ୍ତି। ପୁଣି ଥରେ ରୋଷେଇ ଘରେ ମହଙ୍ଗା ମାଡ ହୋଇଛି। ଶନିବାର ଘରୋଇ ଏଲପିଜି ସିଲିଣ୍ଡରର ମୂଲ୍ୟ ୫୦ ଟଙ୍କା ବୃଦ୍ଧି ପାଇଛି। ଆଜିଠାରୁ ୧୪.୨ କିଲୋଗ୍ରାମ ଘରୋଇ ଏଲପିଜି ସିଲିଣ୍ଡରର ମୂଲ୍ୟ ୫୦ ଟଙ୍କା ବୃଦ୍ଧି କରାଯାଇଛି। ଘରୋଇ ଘରୋଇ ଗ୍ୟାସ ସିଲିଣ୍ଡରର ନୂତନ ମୂଲ୍ୟ ବର୍ତ୍ତମାନ ସିଲିଣ୍ଡର ପିଛା ୯୯୯.୫୦ ଟଙ୍କା ହେବ।

ଦେଶରେ ପ୍ରତ୍ୟେକ ଦିନ କୌଣସି ନା କୌଣସି ସାମଗ୍ରୀର ମୂଲ୍ୟ ବୃଦ୍ଧି ପାଇଛି। ଚଳିତ ସପ୍ତାହରେ ସାବୁନ, ସ୍ୟାମ୍ପୁ, ପାଉଡର ଭଳି ଅତ୍ୟାବଶ୍ୟକୀୟ ସାମଗ୍ରୀର ମୂଲ୍ୟ ବୃଦ୍ଧି କରିବାକୁ ୟୁନିଲିଭର ନିଷ୍ପତ୍ତି ନେଇଛି। ପୋଟ୍ରୋଲ ଓ ଡିଜେଲ ଦର ବୃଦ୍ଧି ସାଧାରଣ ଖାଉଟିଙ୍କ ଉପରେ ପଡିଛି। ଏହାରି ଭିତରେ ଜନସାଧାରଣଙ୍କ ଉପରେ ଉପରେ ମହଙ୍ଗା ମାଡ ହୋଇଛି। ପ୍ରାୟ ଦେଢ ମାସ ପରେ ପୁଣି ଥରେ ଘରୋଇ ଗ୍ୟାସ ସିଲିଣ୍ଡରର ମୂଲ୍ୟ ବୃଦ୍ଧି ପାଇଛି।

ବୁଧବାର ୧୪.୨ କିଲୋଗ୍ରାମ ଘରୋଇ ଏଲପିଜି ସିଲିଣ୍ଡରର ମୂଲ୍ୟ ୫୦ ଟଙ୍କା ବୃଦ୍ଧି କରାଯାଇଛି। ଏହି ମୂଲ୍ୟ ବୃଦ୍ଧି ପରେ ରାଜଧାନୀ ଦିଲ୍ଲୀରେ ଘରୋଇ ଘରୋଇ ଗ୍ୟାସ ସିଲିଣ୍ଡରର ନୂତନ ମୂଲ୍ୟ ୯୯୯.୫୦ ଟଙ୍କା ହୋଇଛି। ଏହା ପୂର୍ବରୁ ମାର୍ଚ୍ଚ ୨୨ରେ ଘରୋଇ ଏଲପିଜି ମୂଲ୍ୟ ସିଲିଣ୍ଡର ପିଛା ୫୦ ଟଙ୍କା ବୃଦ୍ଧି କରାଯାଇଥିଲା। ଏପ୍ରିଲ ପହିଲାରେ କମର୍ସିଆଲ ଗ୍ୟାସ ସିଲିଣ୍ଡର ପିଛା ୨୫୦ ଓ ମେ ୧ରେ ୧୦୨.୫୦ ଟଙ୍କା ବୃଦ୍ଧି ପାଇଥିଲା। ଫଳରେ ଜାତୀୟ ରାଜଧାନୀରେ କମର୍ସିଆଲ ସିଲିଣ୍ଡର ମୂଲ୍ୟ ୨୩୫୫.୫୦ ଟଙ୍କା ହୋଇଛି।

ସୂଚନାଯୋଗ୍ୟ, ୫ ରାଜ୍ୟର ବିଧାନସଭା ନିର୍ବାଚନ ସମୟରେ ଦେଶରେ LPG ଓ ତୈଳଦର ସ୍ଥିର ଥିଲା। ୬ ଅକ୍ଟୋବର ୨୦୨୧ ପରଠାରୁ ଏଥିରେ କୌଣସି ପରିବର୍ତ୍ତନ ଆସିନଥିଲା। କିନ୍ତୁ ମାର୍ଚ୍ଚ ୨୨ ପରଠାରୁ ଉଭୟ LPG ଓ ପେଟ୍ରୋଲ-ଡିଜେଲ ମୂଲ୍ୟ ବୃଦ୍ଧି ପାଇବାରେ ଲାଗିଛି। ଯାହାରୁ ପ୍ରଭାବ ସାଧାରଣ ଲୋକଙ୍କ ପକେଟ ଉପରେ ପଡିଛି। ତେବେ ଏହି ମୂଲ୍ୟ ବୃଦ୍ଧି ରାଜ୍ୟ ରାଜ୍ୟ ମଧ୍ୟରେ ଭିନ୍ନ ଭିନ୍ନ ହୋଇଥାଏ।

ନୂଆଦିଲ୍ଲୀ: ରନ୍ଧନ ଗ୍ୟାସ୍ ବା ଏଲ୍‌ପିଜି ସିଲିଣ୍ଡର ବ୍ୟବହାରକାରୀଙ୍କ ପାଇଁ ଖରାପ ଖବର। ମହଙ୍ଗା ବଜାର ଭିତରେ ଦେଶରେ ଏବେ ଏଲ୍‌ପିଜି ସିଲିଣ୍ଡର ମୂଲ୍ୟ ଅକାଶଛୁଆଁ ହୋଇଛି। ଦର ଏବେ ସିଲିଣ୍ଡର ପିଛା ଅଢ଼େଇ ହଜାର ଟଙ୍କା ଛୁଇଁବାକୁ ଯାଉଛି । ଏକ ଗୁରୁତ୍ବପୂର୍ଣ୍ଣ ଘଟଣାକ୍ରମେ ରାଷ୍ଟ୍ରାୟତ୍ତ ତୈଳ ବିପଣନକାରୀ କମ୍ପାନୀଗୁଡିକ ରବିବାର ଦେଶରେ ବାଣିଜ୍ୟିକ ଏଲ୍‌ପିଜି ସିଲିଣ୍ଡର ପିଛା ମୂଲ୍ୟ ୨୪୮୨ ଟଙ୍କା ୫୦ ପଇସାକୁ ବୃଦ୍ଧି ଘଟାଇଛନ୍ତି । ଏ ସମ୍ପର୍କରେ ଭାରତୀୟ ତୈଳ ନିଗମ ଲିମିଟେଡ୍ (ଆଇଓସିଏଲ) ପକ୍ଷରୁ କୁହାଯାଇଛି।

ବର୍ତ୍ତମାନ ଘରୋଇ ବଜାରରେ ପେଟ୍ରୋଲ ଡିଜେଲ ଦର ସହ ତାଳ ଦେଇ ରନ୍ଧନ ଗ୍ୟାସ୍ ବା ଏଲ୍‌ପିଜି ସିଲିଣ୍ଡର ମୂଲ୍ୟରେ ଅହେତୁକ ବୃଦ୍ଧି ଘଟିବାରେ ଲାଗିଛି । ଏହାକୁ ନେଇ ଖାଉଟିଙ୍କ ଅସନ୍ତୋଷ ଚରମ ସୀମାରେ ପହଞ୍ଚିଛି। ଦର ବୃଦ୍ଧି ପରେ ରାଜଧାନୀ ନୂଆଦିଲ୍ଲୀଠାରେ ବାଣିଜ୍ୟିକ ଏଲ୍‌ପିଜି ସିଲିଣ୍ଡର ପିଛା ମୂଲ୍ୟ ୧୦୨ ଟଙ୍କା ୦୫ ପଇସା ବୃଦ୍ଧି ଘଟି ୨୩୫୫ ଟଙ୍କା ୫୦ ପଇସା ହୋଇଛି। ଏହି ଅନୁଯାୟୀ ଭୁବନେଶ୍ବରରେ ମଧ୍ୟ ବାଣିଜ୍ୟିକ ଏଲ୍‌ପିଜି ସିଲିଣ୍ଡର ପିଛା ୧୦୩ ଟଙ୍କା ୫୦ ପଇସା ବୃଦ୍ଧି ଘଟି ୨୪୮୨ ଟଙ୍କା ୫୦ ପଇସାରେ ପହଞ୍ଚିଛି। ପୂର୍ବରୁ ଏଠାରେ ବାଣିଜ୍ୟିକ ଏଲ୍‌ପିଜି ସିଲିଣ୍ଡର (୧୪.୨ କେଜି) ପିଛା ମୂଲ୍ୟ ୨୩୭୯ ଟଙ୍କା ରହିଥିଲା। ଅପରପକ୍ଷେ ଘରୋଇ (୧୪.୨ କେଜି ) ଏଲ୍‌ପିଜି ସିଲିଣ୍ଡର ମୂଲ୍ୟ ୯୭୬ ଟଙ୍କାରେ ଅପରିବର୍ତ୍ତିତ ରହିଛି।

ନୂଆଦିଲ୍ଲୀ: ମଙ୍ଗଳବାର ସକାଳୁ ସାଧାରଣ ଲୋକଙ୍କ ଉପରେ ବୋଝ ବଢିଯାଇଛି। ସରକାରଙ୍କ ଦ୍ୱାରା ପେଟ୍ରୋଲ ଏବଂ ଡିଜେଲର ମୂଲ୍ୟ ୮୦ ପଇସା ବୃଦ୍ଧି ପାଇବା ପରେ ଏଲପିଜି ବା ରନ୍ଧନ ଗ୍ଯାସର ମୂଲ୍ୟ ମଧ୍ୟ ୫୦ ଟଙ୍କା ବୃଦ୍ଧି କରାଯାଇଛି। ଅର୍ଥାତ୍ ୧୪.୨ କିଲୋଗ୍ରାମ ସିଲିଣ୍ଡର ପାଇଁ ଏଣିକି ୯୪୯.୫୦ ଟଙ୍କା ଦିଲ୍ଲୀରେ ଦେବାକୁ ପଡିବ। ଏ ନେଇ ଏକ ନ୍ୟୁଜ୍ ଏଜେନ୍ସି  ପକ୍ଷରୁ ଏହି ସୂଚନା ଦିଆଯାଇଛି।

ସୂଚନା ଅନୁଯାୟୀ, ଶେଷ ଥର ପାଇଁ ୬  ଅକ୍ଟୋବରରେଏଲପିଜି ସିଲିଣ୍ଡରର ମୂଲ୍ୟ ବୃଦ୍ଧି କରାଯାଇଥିଲା।  ଆସନ୍ତୁ ଜାଣିବା ବର୍ତ୍ତମାନ ଅନ୍ୟ ସହରରେ ଏକ ସିଲିଣ୍ଡର ପାଇଁ କେତେ ଦେବାକୁ ପଡିବ …

ସହର        ପୂର୍ବରୁ           ବର୍ତ୍ତମାନ

୧- ଦିଲ୍ଲୀ         ୮୯୯.୫୦       ୯୪୯.୫୦

୨- ମୁମ୍ବଇ       ୮୯୯.୫୦        ୯୪୯.୫୦

୩-ଲକ୍ଷ୍ନୌ       ୯୩୭.୫୦      ୯୮୭.୫୦

୪-କୋଲକାତା  ୯୨୬.୦୦      ୯୭୬.୦୦

୫-ଚଣ୍ଡିଗଡ଼      ୯୦୯.୦୦      ୯୫୯.୦୦

୬- ପାଟନା      ୯୮୯.୫୦      ୧୦୩୯.୫୦

୬- ଶିମଲା       ୯୪୫.୦୦     ୯୯୫.୦୦

୭- ଡେରାଡୁନ    ୯୧୮.୦୦    ୯୬୮.୦୦

ଭୁବନେଶ୍ୱର: ଦୀର୍ଘ ଦିନ ପରେ ପେଟ୍ରୋଲ ଓ ଡିଜେଲ ଦର କମିଛି। ରନ୍ଧନ ଗ୍ୟାସ ଦର ହ୍ରାସ ପାଇଁ ବିଜେଡି ପକ୍ଷରୁ ଗୁରୁବାର ଦାବି କରାଯାଇଛି। ଏଥିପାଇଁ ବିଜେଡି ପକ୍ଷରୁ ୧୦ ଦିନିଆ ଡେଡ୍ ଲାଇନ୍ ଦିଆଯାଇଛି । ୧୦ ଦିନ ମଧ୍ୟରେ ଏଲପିଜି ରେଟ୍ ହ୍ରାସ ନକଲେ ବିଜେଡି ଆନ୍ଦୋଳନ କରିବ ବୋଲି ଚେତାବନୀ ଦେଇଛି । ବିଜେଡି ପକ୍ଷରୁ ଯୁବ ବିଜେଡି ସଭାପତି ବ୍ୟୋମକେଶ ରାୟ ଏ ନେଇ ଏକ ସାମ୍ବାଦୀକ ସମ୍ମିଳନୀ କରିଛନ୍ତି ।

ସେ ସାମ୍ବାଦୀକ ସମ୍ମିଳନୀ କହିଛନ୍ତି ଯେ,  ‘ଦୀର୍ଘ ଦିନର ବ୍ୟବଧାନ ପରେ କେନ୍ଦ୍ର ସରକାର ଏକସାଇଜ୍ ଡ୍ୟୁଟି ହ୍ରାସ କରିଛନ୍ତି। ବିଜେଡି ଆନ୍ଦୋଳନ ତୀବ୍ର ହେବାରୁ କେନ୍ଦ୍ର ଏହି ନିଷ୍ପତ୍ତି ନେଇଛନ୍ତି। ତେବେ ଏହି ଦର ହ୍ରାସରେ ୩୩ ପ୍ରତିଶତ ଓଡ଼ିଶା ସରକାର ବହନ କରୁଛନ୍ତି। ପେଟ୍ରଲରେ ୩.୩୦ ଟଙ୍କା ଓ ଡିଜେଲରେ ୧.୬୫ ଟଙ୍କା ରାଜ୍ୟ ଭାଗ ରହିଛି।  ଏହି ହିସାବ ବାଦ ଭାଟ୍ ହ୍ରାସ ହୋଇଛି।   ଯାହାକି ଗରିବଙ୍କ ପାଇଁ ଦୀପାବଳିରେ ଏକ ବଡ଼ ଖୁସି ଖବର। ଓଡ଼ିଶା ସରକାର ପେଟ୍ରୋଲରେ ୬.୩୦ ଟଙ୍କା ଓ ଡିଜେଲରେ ୪.୬୫ ଟଙ୍କା କମାଇଛନ୍ତି। ଏହି ଦର ହ୍ରାସ ପରେ ରାଜ୍ୟର ୨ ହଜାର କୋଟି ଟଙ୍କା କ୍ଷତି ହେବ । କିନ୍ତୁ ଖୁସିର କଥା ଯେ ସାରା ଦେଶରେ ତେଲ ଦର ଓଡ଼ିଶାରେ ସବୁଠାରୁ କମ।  ହେଲେ ଦୁର୍ଭାଗ୍ୟଜନକ କେନ୍ଦ୍ର ଯେଉଁ ସେସ ଆଦାୟ କରୁଛି, ତାହା କେନ୍ଦ୍ର ଓ ରାଜ୍ୟ ସରକାରଙ୍କ ଭିତରେ ଭାଗ ହେବା କଥା ବା ଉଛେଦ ହେବା କଥା। ଏହା ସଂଘୀୟ ବ୍ୟବସ୍ଥା ବିରୋଧୀ। କେନ୍ଦ୍ର ସରକାର ଖଚଏ ଦର ଉପରୁ  ଏକ୍ସାଇଜ ଓ ଅନ୍ୟ ଟ୍ୟାକ୍ସକୁ ତୁରନ୍ତ ହ୍ରାସ କରନ୍ତୁ।’

ବ୍ୟୋମକେଶ ଧମକ ଦେଇ କହିଛନ୍ତି ଯେ, ଦରଦାମ ବୃଦ୍ଧି ପ୍ରତିବାଦରେ ଯୁବ ଓ ଛାତ୍ର ଆନ୍ଦୋଳନ ଆସନ୍ତାକାଲିଠାରୁ ୧୦ ଦିନ ପାଇଁ ସ୍ଥଗିତ ରହିଛି। ଏହି ୧୦ ଦିନ ଭିତରେ ଏଲପିଜି ରେଟ ଯଦି କେନ୍ଦ୍ର ସରକାର ହ୍ରାସ ନ କରନ୍ତି ତେବେ ଆନ୍ଦୋଳନ ଆହୁରି ତୀବ୍ରତର ହେବ। ପଞ୍ଚାୟତ ଯାଏ ଚାଲି କେନ୍ଦ୍ର ସରକାରଙ୍କୁ ଦୃଢ଼ ଜବାବ ଦିଆଯିବ।

ସୂଚନାଯୋଗ୍ୟ ଯେ, ପେଟ୍ରୋଲ ଓ ଡିଜେଲ ଦର ବୃଦ୍ଧିକୁ ନେଇ କେନ୍ଦ୍ର ସରକାରଙ୍କ ବିରୋଧରେ ବିଜେଡ ରାସ୍ତାକୁ ଓହ୍ଲାଇଥିଲା । ତେବେ ଗତକାଲି (ବୁଧବାର) ରାତିରେ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରୁ ପେଟ୍ରୋଲ ଉପରୁ ୫ଟଙ୍କା ଓ ଡିଜେଲ ଉପରୁ ୧୦ ଟଙ୍କାର ଏକସାଇଜ୍ ଡ୍ୟୁଟି ହ୍ରାସ କରିଥିଲେ।ଫଳେ ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୬ଟଙ୍କା ୧୫ପଇସା ଓ ଡିଜେଲ ଲିଟର ପିଛା ୧୨ ଟଙ୍କା ୮୮ ପଇସା କମିଥିଲା । ପରେ ଗୁରୁବାର ଦିନ ରାଜ୍ୟ ସରକାର ଉଭୟ ପେଟ୍ରୋଲ ଓ ଡିଜେଲ ଉପରୁ ୩ ଟଙ୍କା ଭାଟ୍ ହ୍ରାସ କରିଛନ୍ତି । ଯାହାର ସୁଫଳ ଖାଉଟି ପାଇବେ । ଏହି ନୂଆ ଦର ଆସନ୍ତାକାଲି ମଧ୍ୟରାତ୍ରୀରୁ ଲାଗୁ ହେବ ।

ନୂଆଦିଲ୍ଲୀ: ପେଟ୍ରୋଲ ଏବଂ ଡିଜେଲ, ଏଲ୍‌ପିଜି ସମେତ ଅନ୍ୟ ଅତ୍ୟାବଶ୍ୟକ ସାମଗ୍ରୀ ଦର ଦିନକୁ ଦିନ ତୀବ୍ର ବେଗରେ ବଢ଼ିବାରେ ଲାଗିଛି। ବଜାର ମହଙ୍ଗା ହେବାର ଫଳ ଭୋଗୁଛି ବିଚରା ଖାଉଟି | ଏହି ମହଙ୍ଗା ମାଡ଼ରେ ବେହାଲ ହୋଇଯାଉଥିବା ଖାଉଟିଙ୍କୁ ଆଗକୁ ନିସ୍ତାର ମିଳିବା ସମ୍ଭାବନା କମ୍ । କାରଣ ଖୁବ୍‌ଶୀଘ୍ର ଖାଉଟିଙ୍କୁ ମିଳିବାକୁ ଯାଉଛି ମହଙ୍ଗା ମାଡ଼ର ଆଉ ଏକ ଝଟକା । ଆସନ୍ତା ସପ୍ତାହରେ ପୁଣି ଥରେ ବଢ଼ିବାକୁ ଯାଇଛି ରନ୍ଧନ ଗ୍ୟାସ୍ ଦର। ଯଦି ଏହା ହୁଏ ତେବେ ବଜାରରେ ଏଲ୍‌ପିଜି ସିଲିଣ୍ଡର ଦର ୧୦୦୦ ଟଙ୍କା ଛୁଇଁବ ।

ବଜାରରେ ପ୍ରତିଦିନ ଦ୍ରୁତ ଗତିରେ ବଢ଼ୁଥିବା ପେଟ୍ରୋଲ ଡିଜେଲ ମୂଲ୍ୟ ପରେ ଆସନ୍ତା ସପ୍ତାହରେ ଗ୍ୟାସ ସିଲିଣ୍ଡର ମୂଲ୍ୟ ବୃଦ୍ଧି ଘଟିବା ନେଇ ଖବର ମଧ୍ୟ ବାହାରକୁ ଆସୁଛି। ଇତି ମଧ୍ୟରେ ମଧ୍ଯ ଗତ ୧୧ ମାସରେ ଅର୍ଥାତ୍ ୨୦୨୦ ନଭେମ୍ବରଠାରୁ ଘରୋଇ ବଜାରରେ ରନ୍ଧନ ଗ୍ୟାସ ମୂଲ୍ୟରେ ୧୦ ଥରରେ ୨୦୦ ଟଙ୍କାରୁ ଅଧିକ ବୃଦ୍ଧି ଘଟି ଦର ହଜାରେ ଟଙ୍କା ଛୁଇଁବାକୁ ବସିଛି। ରନ୍ଧନ ଗ୍ୟାସର ନିୟମିତ ମୂଲ୍ୟ ବୃଦ୍ଧିରେ ସାଧାରଣ ଖାଉଟି ଅତିଷ୍ଠ ହୋଇପଡ଼ିଲେଣି। ତେଲ ଦର ବୃଦ୍ଧିକୁ ନେଇ ଅତିଷ୍ଠ ଖାଉଟି ଉପରେ ରନ୍ଧନ ଗ୍ୟାସ୍ ମୂଲ୍ୟ ବୃଦ୍ଧି ‘ବୋଝ ଉପରେ ନଳିତା ବିଡ଼ା ସଦୃଶ ହୋଇଛି । ଚଳିତ ମାସରେ ରାଷ୍ଟ୍ରାୟତ୍ତ ତୈଳ କମ୍ପାନୀଗୁଡିକ ଅଣ-ରିହାତି ରନ୍ଧନ ଗ୍ୟାସ ବା ଏଲ୍‌ପିଜି ସିଲିଣ୍ଡର (୧୪.୨ କେ.ଜି) ମୂଲ୍ୟରେ ୧୫ ଟଙ୍କା ବୃଦ୍ଧି ଘଟାଇଥିଲେ। ରନ୍ଧନ ଗ୍ୟାସ୍ ମୂଲ୍ୟରେ ଏହି ବୃଦ୍ଧି ପ୍ରତି ପରିବାରର ରୋଷେଇ ବଜେଟ୍‌ ବଢ଼ାଇ ଦେଇଛି। ବିଶେଷ କରି ମଧ୍ୟବିତ୍ତ ଶ୍ରେଣୀର ଲୋକଙ୍କ ପାଇଁ ଏହା ବେଶ ପୀଡ଼ାଦାୟକ । ରାଜଧାନୀ ଭୁବନେଶ୍ବରରେ (୧୪୨ କେଜି) ଅଣ-ରିଆତି ଏଲ୍‌ପିଜି ସିଲିଣ୍ଡର ପିଛା ମୂଲ୍ୟ ସମ୍ପ୍ରତି ୯୨୬ ଟଙ୍କା ରହିଛି ।

ତେବେ ଚଳିତବର୍ଷ ଜୁଲାଇ ପହିଲାଠାରୁ ଦେଶରେ ୧୪.୨ କିଲୋଗ୍ରାମ ଏଲପିଜି ସିଲିଣ୍ଡର ମୂଲ୍ୟରେ ୯୦ ଟଙ୍କା ବୃଦ୍ଧି ଘଟିଛି । ଅପରପକ୍ଷେ ବର୍ତ୍ତମାନ ଏଲପିଜି ବିକ୍ରି କ୍ଷେତ୍ରରେ ସରକାରଙ୍କୁ ସିଲିଣ୍ଡର ପିଛା ୧୦୦ ଟଙ୍କା କ୍ଷତି ହେଉଥିବା କମ୍ପାନୀ ଗୁଡ଼ିକ କହୁଛନ୍ତି । ଏହାଛଡା ତୈଳ କମ୍ପାନୀଙ୍କ ମତ ହେଉଛି, ସାଉଦି ଆରବରେ ଏଲପିଜି ଦର ଚଳିତ ମାସରେ ୬୦ ପ୍ରତିଶତ ବୃଦ୍ଧି ପାଇ ଟନ୍‌ ପିଛା ୮୦୦ ଡଲାରରେ ପହଞ୍ଚିଛି। ଏଥି ସହିତ ଅନ୍ତର୍ଜାତୀୟ ବଜାରରେ ବ୍ରେଣ୍ଟ କ୍ରୁଡ଼ ମୂଲ୍ୟ ବ୍ୟାରେଲ ପିଛା ୮୫.୪୨ ଡଲାରରେ ପହଞ୍ଚିଛି । ଏହାସତ୍ୱେ ଏଲପିଜି ବର୍ତ୍ତମାନ ଏକ ନିମନ୍ତ୍ରିତ ଦ୍ରବ୍ୟ । ଏଭଳି ପରିସ୍ଥିତିରେ ବୈଷୟିକ ଦୃଷ୍ଟିରୁ ଦେଖିଲେ ସରକାର ଏହାର ଖୁଚୁରା ମୂଲ୍ୟକୁ ନିୟନ୍ତ୍ରଣ କରିପାରିବେ, କିନ୍ତୁ ଏପରି କରିବା ଦ୍ଵାରା ପେଟ୍ରୋଲିୟମ କମ୍ପାନୀମାନଙ୍କୁ ମୂଲ୍ୟଠାରୁ କମ୍ ମୂଲ୍ୟରେ ବିକ୍ରି ପାଇଁ ହେଉଥିବା କ୍ଷତିର ଭରଣା କରିବାକୁ ପଡ଼ିବ ।

ନୂଆଦିଲ୍ଲୀ : ଗୋଟେ ପଟେ କୋରୋନାରେ ଲୋକେ ଜୀବନ ଜିବିକା ସଜାଡି ପାରିନଥିବାବେଳେ ଅନ୍ୟପଟେ ଦର ବୃଦ୍ଧି ଖାଉଟିଙ୍କ ଉପରେ ବୋଝ ଉପରେ ନଳିତା ବିଡା ସଦୃଶ ହୋଇଛି । ଗୋଟେପଟେ ତେଲ ଦର ଅଥୟ କରିଥିବାବେଳେ ଏପଟେ ବୃଦ୍ଧି ପାଇପାରେ ଲାଗିଛି ଏଲପିଜି ଗ୍ୟାସ ସିଲିଣ୍ଡର ଦର । ଫେବୃଆରୀ ମାସରେ ଗ୍ୟାସ ଦର ୧୦୦ ଟଙ୍କା ବୃଦ୍ଧି ପାଇଥିବା ବେଳେ ଆଜି ଅର୍ଥାତ ମାର୍ଚ୍ଚ ୧ ରେ ଦାମ୍ ପୁଣି ଥରେ ବୃଦ୍ଧି ପାଇଛି । ଏଲପିଜି ସିଲିଣ୍ଡରର ଦରରେ ସୋମବାର ଦିନ ପୁଣି ଥରେ ୨୫ ଟଙ୍କା ବୃଦ୍ଧି କରାଯାଇଛି । ତିନି ଦିନ ପୂର୍ବେ ଏହାର ମୂଲ୍ୟ ୨୫ ଟଙ୍କା ବୃଦ୍ଧି କରାଯାଇଥିଲା । ଗୋଟିଏ ସପ୍ତାହ ମଧ୍ୟରେ ଏଲପିଜି ସିଲିଣ୍ଡରର ମୂଲ୍ୟ ଦୁଇଥର ବୃଦ୍ଧି ପାଇଛି ।

ଏହାପୂର୍ବରୁ ଫେବୃଆରୀରେ ୪ ରେ ୨୫ ଟଙ୍କା, ୧୪ ରେ ୫୦ ଟଙ୍କା ବୃଦ୍ଧି ଘଟିଥିଲା । ଏଥି ସହିତ ୨୫ ଫେବୃଆରୀରେ ଏହା ୨୫ ଟଙ୍କା ବୃଦ୍ଧି ପାଇଥିଲା । ଫେବୃଆରୀରେ ଏଲପିଜି ଦାମ୍ ୧୦୦ ଟଙ୍କା ବୃଦ୍ଧି ପାଇଛି । ଗତ ଏକ ମାସରେ ଚତୁର୍ଥ ଥର ପାଇଁ ଦର ବୃଦ୍ଧି ପାଇଛି ଓ ଏପର୍ଯ୍ୟନ୍ତ ୧୨୫ ଟଙ୍କା ବୃଦ୍ଧି ପାଇଛି । ତିନି ଦିନ ପୂର୍ବେ ଏହାର ଦାମ୍ ୨୫ ଟଙ୍କା ବୃଦ୍ଧି କରାଯାଇଥିଲା । ଏଥି ସହିତ ଡିସେମ୍ବର ମାସରେ ଏହାକୁ ଦୁଇଥର ୫୦ ଟଙ୍କା ଲେଖାଏଁ ବୃଦ୍ଧି କରାଯାଇଥିଲା । ଅର୍ଥାତ୍ ବର୍ତ୍ତମାନ ପର୍ଯ୍ୟନ୍ତ ଏଲପିଜି ସିଲିଣ୍ଡରର ଦାମ୍ ପ୍ରାୟ ୨୦୦ ଟଙ୍କା ବୃଦ୍ଧି ପାଇଛି ।

ବର୍ତ୍ତମାନ ଆପଣଙ୍କୁ ୧୪.୨ କିଲୋଗ୍ରାମ ଅଣ ସବସିଡିଯୁକ୍ତ ଏଲପିଜି ଗ୍ୟାସ ସିଲିଣ୍ଡର ଅଧିକ ପାଇଁ ୨୫ ଟଙ୍କା ଦେବାକୁ ପଡିବ । ଆଜିଠାରୁ ଏହି ମୂଲ୍ୟ ପ୍ରଯୁଜ୍ୟ ହେବ । ବର୍ତ୍ତମାନ ରାଜଧାନୀ ଦିଲ୍ଲୀରେ ଘରୋଇ ଗ୍ୟାସ ସିଲିଣ୍ଡର ଦାମ ୭୯୪ ଟଙ୍କାରୁ ବଢି ୮୧୯ ଟଙ୍କା ହୋଇଛି। ମୁମ୍ବାଇରେ ମଧ୍ୟ ଘରୋଇ ସିଲିଣ୍ଡର ଦାମ ୮୧୯ ଟଙ୍କା ହୋଇଛି। କୋଲକାତାରେ ୮୪୫.୫୦ ଟଙ୍କା ହୋଇଥିବା ବେଳେ ଚେନ୍ନାଇରେ ୮୩୫ ଟଙ୍କା ହୋଇଛି। ଏହା ସହିତ ଦର ବୃଦ୍ଧି ପରେ ବର୍ତ୍ତମାନ ଭୁବନେଶ୍ୱରରେ ଘରୋଇ ଗ୍ୟାସର ଦର ୭୯୫.୫୦ ରୁ ୮୪୫.୫୦ ଟଙ୍କାକୁ ବୃଦ୍ଧି ପାଇଛି ।

ବାଣିଜ୍ୟିକ ଗ୍ୟାସର ଦାମ୍?

ପ୍ରତ୍ୟେକ ମାସର ପ୍ରଥମ ଦିନରେ ଏଲପିଜି ଦରରେ ପରିବର୍ତ୍ତନ ହୋଇଥାଏ । ୧୯ କିଲୋଗ୍ରାମ ବାଣିଜ୍ୟିକ ଗ୍ୟାସ ସିଲିଣ୍ଡରର ଦାମ୍ ୯୦.୫୦ ଟଙ୍କା ବୃଦ୍ଧି ପାଇଛି । ବର୍ତ୍ତମାନ ଏହି ସିଲିଣ୍ଡରର ଦାମ୍ ଦିଲ୍ଲୀରେ ୧୬୨୪ ଟଙ୍କା ହୋଇଛି । ସେହିଭଳି ମୁମ୍ବାଇର ଦର ବର୍ତ୍ତମାନ ସିଲିଣ୍ଡର ପିଛା ୧୫୬୩.୫୦ ଟଙ୍କାକୁ ବୃଦ୍ଧି ପାଇଛି । କୋଲକାତାରେ ଏହି ଦାମ୍ ୧୬୮୧.୫୦ ଟଙ୍କା ଓ ଚେନ୍ନାଇରେ ଏହି ଦାମ୍ ୧୭୩୦.୫ ଟଙ୍କା ରହିଛି । ଏହାପୂର୍ବରୁ ରାଜଧାନୀରେ ୧୯ କିଲୋଗ୍ରାମ ସିଲିଣ୍ଡରର ଦାମ୍ ୧୫୩୩.୦୦ ଟଙ୍କା, କୋଲକାତାରେ ୧୫୯୮.୫୦ ଟଙ୍କା, ମୁମ୍ବାଇରେ ୧୪୮୨.୫୦ ଟଙ୍କା ଓ ଚେନ୍ନାଇରେ ୧୬୪୯.୦୦ ଟଙ୍କା ରହିଛି ।

ଗତ ଦୁଇମାସ ଧରି ଏଲପିଜି ଗ୍ୟାସର ଦାମ୍ କ୍ରମାଗତ ଭାବେ ବୃଦ୍ଧି ପାଉଛି । ଜାନୁଆରୀରେ ତୈଳ ମାର୍କେଟିଂ କମ୍ପାନୀଗୁଡିକ ଏଲପିଜି ଗ୍ୟାସର ମୂଲ୍ୟ ପରିବର୍ତ୍ତନ କରିନଥିଲେ । ତେବେ ଡିସେମ୍ବର ମାସରେ ଦୁଇଥର ୫୦ ଟଙ୍କା ଲେଖାଏଁ ବୃଦ୍ଧି କରାଯାଇଥିଲା । ଏଥି ସହିତ ଫେବୃଆରୀରେ ତିନୋଟି ଭିନ୍ନ ସମୟରେ ଦର ବୃଦ୍ଧି ପାଇଥିଲା । ଫେବୃଆରୀରେ ମୋଟ ବୃଦ୍ଧି ୧୦୦ ଟଙ୍କା ହୋଇଥିଲା । ଯଦି ଡିସେମ୍ବରରୁ ଏଲପିଜି ସିଲିଣ୍ଡରର ଦରକୁ ଦେଖାଯାଏ ତେବେ ଏହା ପ୍ରାୟ ୨୦୦ଟଙ୍କା ବୃଦ୍ଧି ପାଇସାରିଛି ।