ଖୋର୍ଦ୍ଧା: ଏକ ଘରୋଇ ସ୍କୁଲ ପରିସରରେ ଥିବା ହଷ୍ଟେଲ ନିକଟସ୍ଥ ଆମ୍ବ ଗଛରେ ଝୁଲନ୍ତା ଅବସ୍ଥାରେ ଦଶମ ଶ୍ରେଣୀ ଛାତ୍ରର ମୃତଦେହ ଉଦ୍ଧାର କରାଯଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ଖୋର୍ଦ୍ଧା ନୟାଗଡ଼ ରାସ୍ତାରେ ଥିବା ଏକ ଘରୋଇ ପବ୍ଲିକ ସ୍କୁଲ ପରିସରରେ। ସେଇ ସ୍କୁଲରେ ପଢୁଥିବା ଦଶମ ଶ୍ରେଣୀର ଛାତ୍ରର ମୃତଦେହ ଗତ ରାତିରେ ଏକ ଆମ୍ମ୍ୱ ଗଛରେ ଝୁଲୁଥିବା ଦେଖି ସ୍କୁଲ ଅଧକ୍ଷ ପୁଲିସକୁ ଖବର ଦେଇଥିଲେ। ମୃତ ଛାତ୍ରର ନାମ ପାବିଲ୍ୟାସ କର୍ଜି। ସେ ଦଶମ ଶ୍ରେଣୀରେ ପଢ଼ୁଥିଲା। ତାର ଘର ଗଜପତି ଜିଲ୍ଲା ପାରଳାଖେମୁଣ୍ଡି ଅଞ୍ଚଳରେ। ମୃତ୍ୟୁର କାରଣ ଅସ୍ପଷ୍ଟ ରହିଛି। ଘଟଣା ସ୍ଥଳରେ ମୃତଦେହ ପୁଲିସ ଜବତ କରିଛି। ଖୋର୍ଦ୍ଧା ତହସିଲଦାର ବିଭାସ ପାଣିଗ୍ରାହୀ, ଏସଡିପିଓ ଦିଲ୍ଲୀପ ଦାସ, ଆଦର୍ଶ ଥାନା ଅଧିକାରୀ ତାରିଖ ଆହମ୍ମଦ ପ୍ରମୁଖ ପହଞ୍ଚି ତଦନ୍ତ ଚଳାଇଛନ୍ତି।

ଖୋର୍ଦ୍ଧା/ଭୁଶୁଣ୍ଢପୁର: ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ଭୁଷଣ୍ଡପୁରରେ ବାଣ ବିସ୍ଫୋରଣ ଘଟିଛି। ଏହି ବିସ୍ଫୋରଣରେ ୪ଜଣଙ୍କର ମୃତ୍ୟୁ ଘଟିଥିବା ବେଳେ ୪ ଜଣ ଗୁରୁତର ହୋଇଥିବା ଜଣାଯାଇଛି। ଏ ନେଇ ଖୋର୍ଦ୍ଧା ଏସପି ସିଦ୍ଧାର୍ଥ କଟାରିଆ ସୂଚନା ଦେଇଛନ୍ତି।

ନିରାକାରପୁର: ହାତୀଙ୍କ ଉପଦ୍ରବରେ ଲୋକେ ଅତିଷ୍ଠ ହେବାରୁ ଖୋର୍ଦ୍ଧା ଜିଲ୍ଲା ଟାଙ୍ଗୀ ବନାଞ୍ଚଳ ଘୁରି ବୁଲୁଥିବା ହାତୀମାନଙ୍କ ଉପରେ ନଜର ରଖିବା ଓ ତାଙ୍କ ଗତିବିଧି ଜାଣିବା ପାଇଁ ବାହାର ରାଜ୍ୟର କିଛି ହାତୀ ବିଶେଷଜ୍ଞଦଳ ଆସି ଖୋର୍ଦ୍ଧାର ୩/୪ ଦିନ ହେବ ଆସି ଡେରା ପକାଇ ରହିଥିଲେ। ସେମାନେ ହାତୀକୁ ଟ୍ରାଙ୍କୁଲାଇଜ କରି ଗତିବିଧି ଜାଣିବା ପାଇଁ ଶରୀରରେ ରେଡ଼ିଓ କଳାର ଲଗାଇବା ପାଇଁ ପ୍ରୟାସ ଜାରି ରଖିଥିଲେ। ପ୍ରଥମେ ଜଙ୍କିଆ ମୁଣ୍ଡାମ୍ବରେ ଥିବା ଏକ ନରହନ୍ତା ମାରଣା ହାତୀକୁ ଟାର୍ଗେଟ କରି ବନ ବିଭାଗ ଓ ବିଶେଷଜ୍ଞ ଦଳ ଗତ କାଲି ରାତିରୁ ନଜର ରଖି ଆଜି ଭୋରୁ ଟ୍ରାଙ୍କୁଲାଇଜ କରିଥିଲେ। ଏଥିରେ ହାତୀଟି ଉଗ୍ର ହୋଇ ପାଖରେ ଥିବା ଫରେଷ୍ଟର ସିଧୁ ଚରଣ ସିଂ , ଏସିଏଫ୍ ଅରବିନ୍ଦ ମହାନ୍ତି ଓ ଦୁଇଜଣ ବିଶେଷଜ୍ଞ ଦଳ ସଭ୍ୟଙ୍କୁ ଆକ୍ରମଣ କରିଥିଲା। ଏଥିରେ ଫରେଷ୍ଟର ଶ୍ରୀ ସିଂ ଗୁରୁତର ଆହତ ହୋଇଛନ୍ତି। ଦୌଡଦୌଡ଼ି କରି ଏସି ଏଫ୍ ଓ ଅନ୍ୟ ଦୁଇଜଣ ଆହତ ହୋଇଥିବା ଜଣାପଡିଛି। ସମସ୍ତେ ବର୍ତ୍ତମାନ ଭୁବନେଶ୍ବର ଏମ୍ସ ହସ୍ପିଟାଲରେ ଚିକିତ୍ସା ହେଉଥିବା ସୂଚନା ମିଳିଛି। ଖୋର୍ଦ୍ଧା ଡିଏଫଓ ପହଞ୍ଚି ଚିକିତ୍ସା ବ୍ୟବସ୍ଥାର ତଦାରଖ କରୁଛନ୍ତି।

ଖୋର୍ଦ୍ଧା: ଅମାନବୀୟ ତାଲିବାନୀ ଶାସନ କରୁଛି ମାନବବାଦ ସଂଗଠନ । ଚରମ ସୀମାରେ ପହଂଚିଛି ହିଂସ୍ରତା । ସଙ୍ଗଠନରେ ସାମିଲ ନହେବାରୁ ମାନବିକତାର ସବୁସୀମା ଟପିଗଲେ ମାନବବାଦ ସଂଗଠନର କର୍ମକର୍ତ୍ତା । ବାପ ପୁଅଙ୍କୁ ଗୋରୁ ଗାଈଙ୍କ ଭଳି ପିଟିଲେ ଯାହାର ଭିଡ଼ିଓ ଏବେ ସାମାଜିକ ଗଣମାଧ୍ୟମରେ ଭାଇରଲ ହେବାରେ ଲାଗିଛି । ଏଭଳି ଘଟଣା ଘଟିଛି ଖୋର୍ଦ୍ଧା ଜିଲ୍ଲା କରଡ଼ଗାଡ଼ିଆ ଅଞ୍ଚଳରେ। ଇଏ ସେଇ ମାନବବାଦ ସଂଗଠନ ଯିଏ ଗତ ୨ ତାରିଖ ରାତିରେ ଅଭିମାନପୁର ଗ୍ରାମର ସତ୍ୟବ୍ରତ ନାୟକଙ୍କୁ ହତ୍ୟା କରି ପୋଡ଼ି ଦେଇଥିବା ଅଭିଯୋଗ ହୋଇଥିଲା । କିନ୍ତୁ ତା ପୂର୍ବରୁ କଡବ ଗ୍ରାମର ମାଗୁଣି ନାୟକ ଏବଂ ତାଙ୍କ ପୁଅଙ୍କୁ ମାନବବାଦ ସଂଗଠନର କର୍ମକର୍ତ୍ତା ଘରୁ ଡାକିନେଇ କରଡ଼ଗାଡ଼ିଆ କୋଠଘରେ ନିର୍ଧୁମ ମାଡ଼ ମାରିଥିବାର ଭିଡ଼ିଓ ଏବେ ସୋସିଆଲ ମିଡିଆରେ ଭାଇରଲ ହେଉଛି । ସଙ୍ଗଠନ କର୍ମକର୍ତାଙ୍କ ଭୟରେ ମାଗୁଣି ଏବଂ ତାଙ୍କ ପୁଅ ଥାନାରେ ଅଭିଯୋଗ କରିନଥିବା ଜଣାପଡିଛି । ସେପଟେ ଘଟଣା ପଛରେ ମାନବବାଦ ସଂଗଠନର ମୁଖ୍ୟ ଓକିଲ ମାନସ ଦାସ ରହିଥିବା କହିଛନ୍ତି ।

ଘଟଣା ସମ୍ପର୍କରେ ବେଗୁନିଆ ଥାନା ଅଧିକାରୀ ଲକ୍ଷ୍ମୀ ପ୍ରଶାଦ ଶତପଥୀ କହିଛନ୍ତି ଭାଇରଲ ଭିଡ଼ିଓ ସମ୍ପର୍କରେ କୌଣକି ରିପୋର୍ଟ ଆମପାଖକୁ ଆସିନି । ତେବେ ଆମେ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବୁ । ଅନ୍ୟପକ୍ଷରେ ଘଟଣାର ତଦନ୍ତ ନିମନ୍ତେ ଏସ୍ସି ରାଜକିଶୋର ଦୋରା ବେଗୁନିଆ ଥାନାଧିକାରୀଙ୍କୁ ନିର୍ଦେଶ ଦେଇଥିବା କହିଛନ୍ତି ।