ନୂଆଦିଲ୍ଲୀ: ଆର୍ଟିିଫିସିଆଲ ଇଣ୍ଟେଲିଜେନ୍ସ(ଏଆଇ)କୁ ନେଇ ଦୈନିକ କିଛି ନା କିଛି ବଡ଼ ଖବର ସାମ୍ନାକୁ ଆସୁଛି। ମନୁଷ୍ୟ କାମକୁ ସହଜ କରିବା ଲକ୍ଷ୍ୟ ନେଇ ଏଆଇର ସୃଷ୍ଟି। ପୁଣି ଏବେ କୁହାଯାଉଛି ଯେ, ଏଆଇ ବିଶ୍ୱବ୍ୟାପୀ ୪୦% ଚାକିରି ଖାଇଯିବ। ଖୋଦ୍‌ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ମୁଖ୍ୟ କ୍ରିଷ୍ଟାଲିନା ଜର୍ଜିଆଭା ଏହା କହିଛନ୍ତି। ଆର୍ଟିଫିସିଆଲ୍ ଇଣ୍ଟେଲିଜେନ୍ସ ସମଗ୍ର ବିଶ୍ୱରେ ଚାକିରି ସୁରକ୍ଷା ପାଇଁ ବିପଜ୍ଜନକ ପ୍ରମାଣିତ ହେବ। ବିକଶିତ ଦେଶଗୁଡିକରେ ୬୦ ପ୍ରତିଶତ ଚାକିରୀ ଏଆଇ ହେତୁ ବିପଦରେ ପଡ଼ିବ ବୋଲି ଆଜି ସ୍ୱିଜରଲ୍ୟାଣ୍ଡ୍‌ର ଡାଭୋସ୍‌ଠାରେ ଆରମ୍ଭ ହୋଇଥିବା ବିଶ୍ୱ ଅର୍ଥନୈତିକ ଫୋରମ୍‌ର ବାର୍ଷିକ ବୈଠକରେ ଯୋଗଦେବା ପୂର୍ବରୁ ଜର୍ଜିଆଭା ଏହା କହିଛନ୍ତି।

ଆଇଏମ୍‌ଏଫ୍‌ର ଏକ ନୂତନ ରିପୋର୍ଟକୁ ଦର୍ଶାଇ ଜର୍ଜିଆଭା କହିଛନ୍ତି ଯେ ବିକାଶଶୀଳ ଦେଶମାନଙ୍କରେ ଏଆଇର ପ୍ରଭାବ କମ୍ ହୋଇପାରେ, କିନ୍ତୁ ବିଶ୍ୱରେ ପ୍ରାୟ ୪୦% ଚାକିରି ଏଆଇ ଦ୍ୱାରା ପ୍ରଭାବିତ ହୋଇପାରେ। ଏଥିସହିତ ସେ ୨୦୨୪କୁ ନେଇ ସେ ବିଶ୍ୱକୁ ଚେତାବନୀ ଦେଇଛି। ୨୦୨୪ ବିଶ୍ୱ ଅର୍ଥନୀତି ପାଇଁ ଏକ କଷ୍ଟକର ବର୍ଷ ହୋଇପାରେ। କରୋନା ଅବଧି ସମୟରେ ନିଆଯାଇଥିବା ଋଣ ଜାଲରୁ ଦୁନିଆ ଏ ପର୍ଯ୍ୟନ୍ତ ମୁକୁଳି ପାରିନାର୍ହି। ଚଳିତ ବର୍ଷ ବିଶ୍ବର ୬୦ରୁ ଅଧିକ ଦେଶରେ ନିର୍ବାଚନ ଅନୁଷ୍ଠିତ ହେଉଛି। ଏଭଳି ପରିସ୍ଥିତିରେ ସରକାର ଲୋକଙ୍କୁ ମନାଇବା ପାଇଁ ଟଙ୍କା ଖର୍ଚ୍ଚ କରିବେ, ଏହାଦ୍ୱାରା ଦେଶର ଉପରେ ଋଣ ଭାର ଆହୁରି ବୃଦ୍ଧି ପାଇବ। ତଥାପି, ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଉତ୍ପାଦନ ବୃଦ୍ଧି ପାଇଁ ସୁଯୋଗ ସୃଷ୍ଟି କରିବ। ଆଇଏମ୍ଏଫ୍ ମୁଖ୍ୟ କହିଛନ୍ତି, ବତ୍ତର୍ମାନ ସ୍ୱଳ୍ପ ଆୟକାରୀ ଦେଶଗୁଡ଼ିକୁ ଶୀଘ୍ର ଆଗକୁ ବଢ଼ିବାରେ ସାହାଯ୍ୟ କରିବା ଉପରେ ଆମେ ବିଶେଷ ଧ୍ୟାନ ଦେବା ଉଚିତ୍, ଯାହା ଦ୍ବାରା ସେମାନେ ଏଆଇ ଆସିବାଦ୍ୱାରା ସୃଷ୍ଟି ହୋଇଥିବା ସୁଯୋଗର ଲାଭ ଉଠାଇପାରିବେ। ଆଇଏମ୍ଏଫ୍ ରିପୋର୍ଟରେ କୁହାଯାଇଛି ଯେ ବିଶ୍ବ ବ୍ୟାପୀ ଅଧା ଚାକିରୀ ଏଆଇ ଦ୍ୱାରା ପ୍ରଭାବିତ ହେବ। ଚାକିରିର ଅବଶିଷ୍ଟ ଅଧା ଉପରେ ଏହାର ସକରାତ୍ମକ ପ୍ରଭାବ ଦେଖିବାକୁ ମିଳେ | ରିପୋର୍ଟ ଅନୁଯାୟୀ, ଯେଉଁ ଦେଶରେ ଉଚ୍ଚ କୁଶଳୀ ଚାକିରିର ଚାହିଦା ରହିଛି ସେଠାରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ବିପଦ ସର୍ବାଧିକ ହେବ। ଆଇଏମ୍ଏଫ୍ ମୁଖ୍ୟ ଜର୍ଜିଆଭା କହିଛନ୍ତି, ଗୋଟିଏ ପଟେ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ଆଗମନ ସହିତ ଆପଣଙ୍କ ଚାକିରି ସମ୍ପୂର୍ଣ୍ଣ ରୂପେ ଚାଲିଯାଇପାରେ। ଅନ୍ୟ ପଟେ, ଚାକିରି ସଂଖ୍ୟା ବଢ଼ିପାରେ। ଯଦି ଚାକିରିର ସୁଯୋଗ ବୃଦ୍ଧି ହୁଏ, ତେବେ ଆପଣଙ୍କର ଉତ୍ପାଦକତା ମଧ୍ୟ ବୃଦ୍ଧି ପାଇବ। ଏହାଦ୍ୱାରା ଆୟ ଏବଂ ଜୀବନଧାରଣ ମାନ ମଧ୍ୟ ବୃଦ୍ଧି ପାଇବ। ଏହା ଦେଶର ଅର୍ଥନୀତି ଉପରେ ସିଧାସଳଖ ପ୍ରଭାବ ପକାଇବ।

କଲମ୍ବୋ: ଭୟଙ୍କର ଆର୍ଥିକ ସଙ୍କଟରୁ ଶ୍ରୀଲଙ୍କାକୁ ଉଦ୍ଧାର କରିବ ଅନ୍ତରାଷ୍ଟ୍ରୀୟ ମୁଦ୍ରା ପାଣ୍ଠି (ଆଇଏମ୍‌ଏଫ୍‌)। ଶ୍ରୀଲଙ୍କାକୁ ୨.୯ ବିଲିୟନ ଡଲାର ଋଣ ଦେବା ପାଇଁ ଆଇଏମ୍‌ଏଫ୍‌ ରାଜି ହୋଇଛି। ସ୍ୱାଧୀନତା ପରଠାରୁ ଶ୍ରୀଲଙ୍କା ଆଜି ଯାଏଁର ସବୁଠୁ ବଡ଼ ଆର୍ଥିକ ସଙ୍କଟର ସାମନା କରୁଛି। ଦେଶରେ ବୈଦେଶିକ ମୁଦ୍ରାର ଘୋର ଅଭାବ ରହିଛି, ଯେଉଁ କାରଣରୁ ଏହା ଅତ୍ୟାବଶ୍ୟକ ସାମଗ୍ରୀ ଆମଦାନୀ କରିବାରେ ଅସମର୍ଥ ହେଉଛି । ଆଇଏମ୍ଏଫ୍ ଏକ ବିବୃତ୍ତିରେ କହିଛି ଯେ ଆଇଏମ୍ଏଫ୍ ପ୍ରାୟ ୨.୯ ବିଲିୟନ ଡ଼ଲାରର ବିସ୍ତାରିତ ପାଣ୍ଠି ସୁବିଧା ଅଧୀନରେ ୪୮ ମାସର ଋଣ ପାଇଁ ରାଜି ହୋଇଛି। ଆଇଏମ୍ଏଫ୍ ଆହୁରି ମଧ୍ୟ କହିଛି ଯେ ଆଇଏମ୍ଏଫ୍ ଏବଂ ଶ୍ରୀଲଙ୍କାର ଅଧିକାରୀମାନେ ଅବରୋଧିତ ଦେଶର ଅର୍ଥନୈତିକ ନୀତିକୁ ସମର୍ଥନ କରିବାକୁ କର୍ମଚାରୀ ସ୍ତରୀୟ ଚୁକ୍ତିରେ ସହମତ ହୋଇଛନ୍ତି। ଏହି ବ୍ୟବସ୍ଥା ଅନୁଯାୟୀ, ୪୮ ମାସ ମଧ୍ୟରେ ବିସ୍ତାରିତ ପାଣ୍ଠି ସୁବିଧା ରେ ୨.୯ ବିଲିୟନ ଡ଼ଲାର ଋଣ ଯୋଗାଇ ଦିଆଯିବ। ଆର୍ଥିକ ସହାୟତା ଦେବା ପୂର୍ବରୁ ଆଇଏମ୍ଏଫ୍ ଶ୍ରୀଲଙ୍କାକୁ ଅନେକ ସଂସ୍କାର ପଦକ୍ଷେପ ନେବାକୁ କହିଥିଲେ। ସେହିପରି ପାକିସ୍ତାନକୁ ମଧ୍ୟ ସାହାଯ୍ୟ ଯୋଗାଇଦେବା ଲାଗି ଆଇଏମ୍‌ଏଫ୍‌ ହାତ ବଢାଇଛି।

ନୂଆଦିଲ୍ଲୀ: କରୋନାର ନୂତନ ଭାରିଆଣ୍ଟ ‘ଓମିକ୍ରନ୍’ ପୁଣିଥରେ ବିଶ୍ବ ଅର୍ଥନୀତି ପାଇଁ ନକାରାତ୍ମକ କାର୍ଯ୍ୟ କରିବ। ଏହି କାରଣରୁ ବିଶ୍ବ ଅର୍ଥନୀତିରେ ଅବନତି ଘଟିପାରେ ବୋଲି ବର୍ତ୍ତମାନ ଏକ ଭୟ ସୃଷ୍ଟି ହୋଇଛି । ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ମୁଖ୍ୟ ପରିଚାଳନା ନିର୍ଦ୍ଦେଶକ କ୍ରିଷ୍ଟାଲିନା ଜର୍ଜିଭା କହିଛନ୍ତି ଯେ, ଓମିକ୍ରନ୍ ଭାରିଆଣ୍ଟ ବିଶ୍ବ ଅର୍ଥନୀତିରେ ଆଇଏମ୍ଏଫ୍ର ଦୃଷ୍ଟିକୋଣକୁ ହ୍ରାସ କରିପାରେ। ଓମିକ୍ରନ୍‌ ଅତି ଶୀଘ୍ର ବିସ୍ତାର ଲାଭ କରିପାରେ। ଏହି କାରଣରୁ ଆମେ ବିଶ୍ବ ଅଭିବୃଦ୍ଧି ନେଇ ଅକ୍ଟୋବରରେ କରିଥିବା ଆକଳନରେ ହ୍ରାସ ଘଟାଉଛୁ। ଜର୍ଜିଭା କହିଛନ୍ତି ଯେ ଓମିକ୍ରନ୍ ପୂର୍ବରୁ ମଧ୍ୟ ଡେଲଟା ଭାରିଆଣ୍ଟର ନକାରାତ୍ମକ ପ୍ରଭାବ ଯୋଗୁ ବିଶ୍ବ ଅଭିବୃଦ୍ଧି ମନ୍ଥରତା ରହିବା ନେଇ ଆଇଏମ୍ଏଫ୍ ଚିନ୍ତିତ ଥିଲା । ଏଥିଯୋଗୁ ଆମେରିକା ଏବଂ ଚାଇନାରେ ସାମଗ୍ରୀ ଉତ୍ପାଦନରେ ବିଳମ୍ବ ଘଟିଛି। ଅକ୍ଟୋବରରେ ଆଇଏମ୍ଏଫ୍ ଆକଳନ କରିଥିଲା ଯେ, ବିକଶିତ ଅର୍ଥନୀତି ଥିବା ରାଷ୍ଟ୍ରଗୁଡିକ ୨୦୨୨ରେ କରେନା ମହାମାରୀ ପୂର୍ବରୁ ସେମାନଙ୍କର ଉତ୍ପାଦନକୁ ପୁନସଂସ୍ଥାପିତ କରିପାରିବେ ।

କାବୁଲ: ଆଫଗାନିସ୍ତାନକୁ ଦଖଲ କରିବା ପରେ ତାଲିବାନକୁ ଲାଗିଛି ବଡ଼ ଝଟକା। ସମ୍ପୂର୍ଣ୍ଣ ଆଫଗାନିସ୍ତାନକୁ ନିଜ ନିୟନ୍ତ୍ରଣକୁ ନେବା ପରେ ମଧ୍ୟ ତାଲିବାନ ପାଇଁ ଚାରିଆଡୁ ସଙ୍କଟ ଘନେଇବାରେ ଲାଗିଛି। ଆମେରିକା ପରେ ଏବେ ଆଇଏମ୍‌ଏଫ୍‌ ବା ଅର୍ନ୍ତରାଷ୍ଟ୍ରୀୟ ମୁଦ୍ରାକୋଷ ତାଲିବାନକୁ ସମସ୍ତ ଆର୍ଥିକ ସହାୟତା ବନ୍ଦ କରି ଦେଇଛି।। ଆଇଏମ୍ଏଫ୍ ମୁଖପାତ୍ର ଗ୍ୟାରି ରାଇସ୍ ଏନେଇ ଟ୍ବିଟ୍ କରି ସୂଚନା ଦେଇଛନ୍ତି। ଟ୍ୱିଟ୍‌ରେ ସେ ଲେଖିଛନ୍ତି, ‘ସବୁଥର ପରି ଆଇଏମଏଫ ବିଶ୍ବ ସମୁଦାୟର ବିଚାର ଦ୍ୱାରା ପରିଚାଳିତ | ଆଫଗାନିସ୍ତାନ ସରକାରକୁ ନେଇ ବିଶ୍ବ ସମୁଦାୟ ମଧ୍ୟରେ ବର୍ତ୍ତମାନ ସ୍ପଷ୍ଟତାର ଅଭାବ ରହିଛି। ଫଳସ୍ୱରୂପ, ସମ୍ପ୍ରତି ଆଫଗାନିସ୍ତାନକୁ ସ୍ବତନ୍ତ୍ର ଅର୍ଥ ଉଠାଣ ଅଧିକାର(ଏସଡିଆର୍) ଦିଆଯିବ ନାହିଁ କିମ୍ବା ଆଇଏମ୍ଏଫର ଅନ୍ୟାନ୍ୟ ସମ୍ପତ୍ତିର ଉପଯୋଗ କରିପାରିବ ନାହିଁ | ଉଲ୍ଲେଖଯୋଗ୍ୟ ଯେ, ଆଫଗାନିସ୍ତାନରୁ ଆମେରିକୀୟ ଏବଂ ନାଟୋ ସୈନ୍ୟ ଓହରିବା ପରେ ସେଠାରେ ତାଲିବାନର ପ୍ରାଧାନ୍ୟ ବୃଦ୍ଧି ପାଇଛି ଏବଂ ବର୍ତ୍ତମାନ ରାଜଧାନୀ କାବୁଲ ମଧ୍ୟ ତାଲିବାନ କବଜାକୁ ଆସିଯାଇଛି ।

ଏହାପୂର୍ବରୁ ଆଫଗାନିସ୍ତାନର କେନ୍ଦ୍ରୀୟ ବ୍ୟାଙ୍କର ମୁଖ୍ୟ ମଧ୍ୟ ବୁଧବାର କହିଥିଲେ ଯେ ଦେଶକୁ ଦଖଲ କରିବା ସତ୍ତ୍ୱେ ତାଲିବାନକୁ ଦେଶର ଅଧିକାଂଶ ନଗଦ ଜମା ଏବଂ ସୁନା ଷ୍ଟକର ପାଖ ମାଡିବାକୁ ଦିଆଯିବ ନାହିଁ। ଆଫଗାନିସ୍ତାନ ବ୍ୟାଙ୍କ (ଡିଏବି) ର ଗଭର୍ଣ୍ଣର ଅଜମଲ ଅହମ୍ମଦ ଟ୍ୱିଟରରେ କହିଛନ୍ତି ଯେ ଏହି ବ୍ୟାଙ୍କର ପାଖାପାଖି ୯ ବିଲିୟନ ଡଲାରର ଭଣ୍ଡାର ଅଛି, କିନ୍ତୁ ଏହାର ଅଧିକାଂଶ ଅଂଶ ବିଦେଶୀ ବ୍ୟାଙ୍କରେ ରହିଥିବାରୁ ଏହା ତାଲିବାନ ପହଞ୍ଚରୁ ଦୂରରେ। ତାଲିବାନ ରାଜଧାନୀରେ ପ୍ରବେଶ କରିବା ପରେ ଭୟରେ ରବିବାର ଦେଶ ଛାଡି ପଳାଇଥିବା ଅହମ୍ମଦ କହିଛନ୍ତି ଯେ ଆନ୍ତର୍ଜାତୀୟ ମାନଦଣ୍ଡ ଅନୁଯାୟୀ ଟ୍ରେଜେରୀ ଏବଂ ଅଧିକାଂଶ ସମ୍ପତ୍ତି ସୁରକ୍ଷିତ ଅଛି।