ଭୁବନେଶ୍ୱର: ନୂଆଦିଲ୍ଲୀରେ ଆନ୍ଦୋଳନରତ ଛାତ୍ରଛାତ୍ରୀଙ୍କ ଉପରେ ପୁଲିସର ବର୍ବର ଆକ୍ରମଣ ଘଟଣାକୁ ନେଇ ସାରା ଦେଶରେ ତୀବ୍ର ପ୍ରତିକ୍ର୍ରି୍ରୟା ପ୍ରକାଶ ପାଇଛି । ନିଟ୍‌ ବିଭ୍ରାଟକୁ ନେଇ ସାରା ଦେଶରେ ଅସନ୍ତୋଷ ଚରମ ରୂପ ଧାରଣ କରିଛି। ଏହି ପ୍ରସଙ୍ଗରେ ବିଜେଡି ସୁପ୍ରିମୋ ଗତକାଲି ନୂଆଦିଲ୍ଲୀରେ ଦେଇଥିବା ମନ୍ତବ୍ୟ ଉପରେ ମନଗଢ଼ା ଟିପ୍ପଣୀ ଦେଇ ଫସିଯାଇଛନ୍ତି ବିଜେପି ସାଂସଦ ଭର୍ତ୍ତୃହରି ମହତାବ। ନବୀନଙ୍କ ସମ୍ପର୍କରେ ଅତ୍ୟନ୍ତ ଅବାନ୍ତର, ଅରୁଚିକର, ଅଶୋଭନୀୟ ଓ ନିମ୍ନରୁଚିର ମନ୍ତବ୍ୟକୁ ନେଇ ରାଜ୍ୟରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଥିବାବେଳେ ବିଜେଡିର ସମସ୍ତ ରାଜ୍ୟସଭା ସାଂସଦ ଭର୍ତ୍ତୃହରିଙ୍କୁ ତାଙ୍କର ରାଜନୈତିକ ଜୀବନର ଇତିହାସ ସ୍ମରଣ କରାଇ ଦେଇଛନ୍ତି । 

ବିଜେଡି ସଂସଦୀୟ ଦଳ ନେତା ମାନସ ରଞ୍ଜନ ମଙ୍ଗରାଜ କହିଛନ୍ତି ଯେ ବିଜେଡି ଓ ଆମର ନେତା ନବୀନ ପଟ୍ଟନାୟକ ‘କ୍ରକୋଚ’ ଆନ୍ଦୋଳନକୁ ସମର୍ଥନ କରୁନାହାନ୍ତି। ମାତ୍ର ଛାତ୍ରଛାତ୍ରୀଙ୍କ ଉପରେ ହୋଇଥିବା ବର୍ବର ଆକ୍ରମଣ, ଲାଠିମାଡ଼, ରବର ବୁଲେଟ୍‌ ଓ ପାଣି ମାଡ଼ ଆଦି ଘଟଣାକୁ ନେଇ ଆମେ ଦୁଃଖ ପ୍ରକାଶ କରିଛୁ ଏବଂ ଆମର ନେତା ଏହାକୁ କଠୋର ଶବ୍ଦରେ ନିନ୍ଦା କରିଛନ୍ତି । ଏହାକୁ ନେଇ ନବୀନ ପଟ୍ଟନାୟକ ଅତ୍ୟନ୍ତ ମର୍ମାହତ ବୋଲି ମଧ୍ୟ ମନ୍ତବ୍ୟ ଦେଇଛନ୍ତି । ମାତ୍ର ଭର୍ତ୍ତୃହରି ବାବୁ ସମ୍ଭବତଃ ନବୀନ ବାବୁଙ୍କ ବକ୍ତବ୍ୟକୁ ନ ଶୁଣି  ଅନ୍ୟଦ୍ୱାରା ପ୍ରରୋଚିତ ହୋଇ ଏଭଳି ବକ୍ତବ୍ୟ ଦେଇଛନ୍ତି।  ବିଜେପିରୁ ସାଂସଦ ହେବା ପୂର୍ବରୁ ଭର୍ତ୍ତୃହରିବାବୁଙ୍କୁ ନବୀନବାବୁଙ୍କ ୬ଥର ସାଂସଦ ପଠାଇଥିଲେ।  ନବୀନ ବାବୁ ହିଂସାକୁ କେତେ ମାତ୍ରାରେ ନିନ୍ଦା ତଥା ବିରୋଧ କରନ୍ତି, ତାହା ଭର୍ତ୍ତୃହରି ବାବୁ ଭଲ ଭାବେ ଜାଣିଛନ୍ତି। ତେଣୁ ଭର୍ତ୍ତୃହରି ବାବୁଙ୍କ ମୁହଁରୁ ଏପରି କଥା ଶୋଭା ପାଏନାହିଁ। ବୋଧହୁଏ ସେ ବିଜେପିରୁ ଥିବାରୁ  ଏପରି କହିଥାଇପାରନ୍ତି। ମାତ୍ର ୨୦ ତାରିଖରେ ଯେପରି ଛାତ୍ରଛାତ୍ରୀଙ୍କ ଉପରେ ଆକ୍ରମଣ କରାଗଲା ସେ ସମ୍ପର୍କରେ ଭର୍ତ୍ତୃହରିବାବୁ କାହିଁକି ନିରବ ରହିଛନ୍ତି? ଗତ ୨ ବର୍ଷରେ ଓଡ଼ିଶାରେ ୨୦ଥରରୁ ଉଦ୍ଧ୍ୱର୍ ପେପର ଲିକ୍‌ ଘଟଣାରେ ଭର୍ତ୍ତୃହରି କାହିଁକି ଚୁପ୍‌ ରହିଛନ୍ତି? ଓଡ଼ିଶାରେ ୧୭୦୦ରୁ ଉଦ୍ଧ୍ୱର୍ ପୁସ୍ତକ ମୁଦ୍ରଣ ଜନିତ ତ୍ରୁଟି ସାମ୍ନାକୁ ଆସିଛି। ଏନେଇ ସେ କାହିିଁକି ଚୁପ୍‌ ରହିଛନ୍ତି ବୋଲି ସେ ପ୍ରଶ୍ନ କରିଛନ୍ତି। 

ଡ. ସଂତୃପ୍ତ ମିଶ୍ର କହିଛନ୍ତି ଯେ ଭର୍ତ୍ତୃହରି ମହତାବଙ୍କ ଅବାନ୍ତର, ଅନାବଶ୍ୟକ ଏବଂ ଅଶୋଭନୀୟ ମନ୍ତବ୍ୟ ଅତ୍ୟନ୍ତ ନିନ୍ଦନୀୟ। ସେ ନବୀନ ବାବୁଙ୍କର ବକ୍ତବ୍ୟକୁ ଶୁଣିଥିଲେ ବା ପଢ଼ିଥିଲେ, ଏପରି କଥା କହି ନ ଥାନ୍ତେ। କଠିନ ପରିଶ୍ରମ କରି ଜୀବନରେ ସଫଳତା ପାଇଥିବା ଲୋକମାନେ ପରିଶ୍ରମର ମୂଲ୍ୟ କ’ଣ ତାହା ଜାଣନ୍ତି। ଏ କଥା ସେ ବୁଝି ପାରିବେ ନାହିଁ। ଯଦି ତାଙ୍କର ସତ୍‌ସାହସ ଅଛି, ତେବେ ସେ ଛାତ୍ରଛାତ୍ରୀଙ୍କ ସହ ଯାହା ସବୁ ଘଟିଛି ଓ ଘଟୁଛି; ସେ ସମ୍ପର୍କରେ କଟକରେ ଆସି ଓଡ଼ିଶାର ସ୍କୁଲ ଓ କଲେଜ ପିଲାଙ୍କ ନିକଟରେ ମନ୍ତବ୍ୟ ରଖନ୍ତୁ। ପ୍ରଶ୍ନପତ୍ର ଲିକ୍‌, ବାରମ୍ବାର ପରୀକ୍ଷା, ଲାଠି ଚାର୍ଜ ସବୁ ଠିକ୍‌ ବୋଲି କହନ୍ତୁ ବୋଲି ଡ଼. ମିଶ୍ର ଆହ୍ୱାନ ଦେଇଛନ୍ତି । ସାଂସଦ ଡ. ସସ୍ମିତ ପାତ୍ର କହିଛନ୍ତି ଯେ ଭର୍ତ୍ତୃହରିଙ୍କ ମନ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟଜନକ, ନିନ୍ଦନୀୟ। ନିଟ୍‌୍‌ରେ ଯେଉଁ ପ୍ରକାର ଭାବରେ ସ୍କାମ୍‌ ଘଟିଲା ଏବଂ ସେଥିପାଇଁ ଯେ ସ୍ୱତଃପ୍ରବୃତ୍ତ ଭାବରେ ଭାରତବର୍ଷ ସାରା ଛାତ୍ରଛାତ୍ରୀମାନଙ୍କର ହୃଦୟରେ ଆବେଗ ବଢ଼ିଲା ଏବଂ ପ୍ରତିବାଦ ବଢ଼ିଲା, ସେଇ ପ୍ରତିବାଦ ସହିତ ବିଜେଡି ଓ ନବୀନ ବାବୁ ଅଛନ୍ତି। ସେହିପରି ନବୀନ ବାବୁ ଓ ବିଜୁ ଜନତା ଦଳ ପ୍ରତ୍ୟେକଟି ହିଂସାକୁୁ ଖଣ୍ଡନ କରି ଆସିଛନ୍ତି।  ଯଦି କୌଣସି ଜାଗାରେ ଛାତ୍ରଛାତ୍ରୀମାନେ ହିଂସା କରିଛନ୍ତି ତାହା ବି ଗ୍ରହଣୀୟ ନୁହେଁ। ସେଥିପାଇଁ ଆମର ନେତା ସ୍ୱର ଉତ୍ତୋଳନ କରିଥିଲେ।  ନବୀନ ବାବୁଙ୍କ କାର୍ଯ୍ୟକାଳରେ ୩୨ରୁ ଅଧିକ ମନ୍ତ୍ରୀମାନଙ୍କୁ ରିଜାଇନ୍‌ କରିବାକୁ ପଡ଼ିଥିଲା ନହେଲେ ସେମାନଙ୍କୁ କାଢ଼ି ଦିଆଯାଇଥିଲା। ନବୀନ ବାବୁଙ୍କ ସରକାରରେ ଯେ ଭୁଲ କରିଛି, ତାର ମନ୍ତ୍ରୀ ପଦ ଯାଇଛି। ନବୀନ ବାବୁଙ୍କୁ ଓଡ଼ିଶାବାସୀ ଭଲ ପାଆନ୍ତି। ଆଜି ଆମେ ସରକାରରେ ଥାଉ ନଥାଉ, ନବୀନ ବାବୁ ମୁଖ୍ୟମନ୍ତ୍ରୀ ଥାଆନ୍ତୁ ନଥାଆନ୍ତୁ କିନ୍ତୁ ଓଡ଼ିଶାବାସୀଙ୍କ ହୃଦୟରେ ଆଜିବି ସେ ତାଙ୍କର ମୁଖ୍ୟମନ୍ତ୍ରୀ ଅଛନ୍ତିବୋଲି ସସ୍ମିତ୍‌ କହିଛନ୍ତି ।

ସାଂସଦ ସୁଲତା ଦେଓ କହିଛନ୍ତି ଯେ ଯିଏ ଶିକ୍ଷାର ମୂଲ୍ୟ ବୁଝେ ନାହିଁ, ସେ ଶିକ୍ଷା ସମ୍ପର୍କରେ ଜାଣିବ କିପରି? ଯିଏ ଆଜି ଏତେ ବଡ଼ ବଡ଼ କଥା କହୁଛନ୍ତି, ସେ କାହିଁକି ଓଡ଼ିଶାରେ ସ୍କୁଲ ପିଲାଙ୍କ ପଢ଼ା ବହିରେ ମାଳ ମାଳ ଭୁଲ ପ୍ରସଙ୍ଗରେ ଚୁପ୍‌ ରହିଛନ୍ତି।  ପିଲାଙ୍କୁ ମାଡ଼ ହବ, କଣ୍ଟା ଲଗା ବାଡ଼ିରେ ପିଟ଼ା ହବ, ଆଉ ସାଧା ପୋଷାକରେ ପୋଷାକରେ ପୁଲିସ ପିଲାଙ୍କୁ ବାଡେ଼ଇବେ ପିଲାଙ୍କୁ, ତାହେଲେ ତାଙ୍କୁ କେହି କିଛି କହିବେନି। ଆପଣଙ୍କର ମାନସିକତା କେମିତି ତାହା ଓଡ଼ିଶାର ସମସ୍ତ ଲୋକ ଜାଣିସାରିଲେଣି ବୋଲି ସେ ସମାଲୋଚନା ଛଳରେ କହିଛନ୍ତି। ସାଂସଦ ସୁଭାଶିଷ ଖୁଣ୍ଟିଆ ମଧ୍ୟ ଭର୍ତ୍ତୃହରିଙ୍କ ବୟାନର କଡ଼ା ନିନ୍ଦା କରିଛନ୍ତି। ସେ କହିଛନ୍ତି ଯେ ନବୀନ ବାବୁ ଏପରି ଏକ ନେତୃତ୍ୱ ଯେ ଓଡ଼ିଶାର ସ୍ୱାର୍ଥ ପାଇଁ, ଓଡ଼ିଶାର ଛାତ୍ରଛାତ୍ରୀଙ୍କ ପାଇଁ, ଦେଶର ଛାତ୍ରଛାତ୍ରୀମାନଙ୍କ ପାଇଁ  ଏବଂ ଆଗାମୀ ଦିନରେ ଦେଶର ଭବିଷ୍ୟତଙ୍କ ସହିତ ଠିଆ ହୋଇଛନ୍ତି। ନବୀନ ବାବୁଙ୍କ ବ୍ୟକ୍ତିତ୍ୱକୁ ସାରା ଭାରତବର୍ଷ ଜାଣିଛି ଏବଂ ସର୍ବା ସଦାସର୍ବଦା ସେ ସବୁବେଳେ ନ୍ୟାୟର ସହିତ ରହିଛନ୍ତି। ଆଗାମୀ ଦିନରେ ଛାତ୍ରଛାତ୍ରୀମାନେ ଆପଣଙ୍କୁ ଉଚିତ ଜବାବ ଦେବେ। ଆପଣଙ୍କ ଏ କୁମ୍ଭୀର କାନ୍ଦଣା ଏବଂ ନବୀନ ବାବୁଙ୍କ ବିରୁଦ୍ଧରେ ମନ୍ତବ୍ୟକୁ ନେଇ ରାଜ୍ୟବାସୀ ଆପଣଙ୍କୁ କ୍ଷମା କରିବେ ନାହିଁ ବୋଲି ସେ ଦୃଢେ଼ାକ୍ତି ପ୍ରକାଶ କରିଛନ୍ତି।

ଭୁବନେଶ୍ୱର: ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ବିରୋଧରେ ବିଜେପି ସାଂସଦ ଭର୍ତ୍ତୃହରି ମହତାବ ଦେଇଥିବା ମନ୍ତବ୍ୟ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ । ନୂଆଦିଲ୍ଲୀରେ ଚାଲିଥିବା ଛାତ୍ର ଆନ୍ଦୋଳନର ସମାଧାନ ବର୍ବରୋଚିତ ଆକ୍ରମଣ ନୁହେଁ ବରଂ ଗଣତାନ୍ତ୍ରିକ ଆଲୋଚନା ମାଧ୍ୟମରେ ହେବା ଉଚିତ ବୋଲି ଶ୍ରୀ ପଟ୍ଟନାୟକ ଆହ୍ୱାନକୁ ବିକୃତ କରିବାର ପ୍ରୟାସକୁ କଡ଼ା ନିନ୍ଦା କରିଛି ବିଜେଡି। 

 ବୁଧବାର ଶଙ୍ଖ ଭବନରେ ଦଳର ବରିଷ୍ଠ ଉପସଭାପତି ଦେବୀ ପ୍ରସାଦ ମିଶ୍ର କହିଥିଲେ ଯେ ଦେଶର ରାଜଧାନୀରେ ଦେଖାଦେଇଥିବା ଏହି ଅସନ୍ତୋଷ ସମଗ୍ର ଦେଶର ଯୁବପିଢ଼ିଙ୍କ ମଧ୍ୟରେ ଗଭୀର କ୍ଷୋଭ ସୃଷ୍ଟି କରିଛି। ସରକାର ସେମାନଙ୍କ ଦାବିକୁ ଶୁଣି ସମାଧାନ କରିବା ପରିବର୍ତ୍ତେ ନୀରବ ରହିଲେ, ଯାହାଫଳରେ ପରିସ୍ଥିତି ଅଧିକ ଜଟିଳ ହୋଇପଡିଲା । ଗତ ୧୪ ବର୍ଷ ମଧ୍ୟରେ ଦେଶରେ ପ୍ରାୟ ୯୯ଟି ପରୀକ୍ଷା ପ୍ରଶ୍ନପତ୍ର ଲିକ୍‌ ହେବା ଯୋଗୁଁ ପ୍ରାୟ ୬.୫ କୋଟିରୁ ଅଧିକ ଛାତ୍ରଛାତ୍ରୀ ପ୍ରଭାବିତ ହୋଇଛନ୍ତି । ଦିଲ୍ଲୀରେ ଚାଲିଥିବା ଛାତ୍ର ଆନ୍ଦାଳନ କୌଣସି ରାଜନୈତିକ ଦଳର ଆନୁଷ୍ଠାନିକ କାର୍ଯ୍ୟକ୍ରମ ନଥିଲା । ଛାତ୍ରଛାତ୍ରୀମାନେ ଆନ୍ଦୋଳନକୁ ଓହ୍ଲାଇବା ପରେ ସେମାନଙ୍କ ସହ ଆଲୋଚନା କରି ସମାଧାନର ବାଟ ବାହାର କରିବା ସରକାରଙ୍କ ଦାୟିତ୍ୱ। ମାତ୍ର ପ୍ରତିବାଦ କରୁଥିବା ଛାତ୍ରଛାତ୍ରୀଙ୍କୁ ଦେଶବିରୋଧୀ ଏବଂ ପାକିସ୍ତାନ ଓ ଚୀନ ଏଜେଣ୍ଟ ବୋଲି ଅଭିହିତ କରିବା ସମ୍ପୂର୍ଣ୍ଣ ଅଗ୍ରହଣୀୟ। ଶିକ୍ଷା ବ୍ୟବସ୍ଥାକୁ ସଠିକ୍‌ ଭାବେ ପରିଚାଳନା କରିବାରେ ସରକାର ବିଫଳ ହେଲେ ସମ୍ପୃକ୍ତ ମନ୍ତ୍ରୀଙ୍କୁ ଏହାର ନୈତିକ ଦାୟିତ୍ୱ ନେବାକୁ ପଡ଼ିବ। ମନ୍ତ୍ରୀ ନୈତିକ ଦାୟିତ୍ୱ ନେଇ ଇସ୍ତଫା ଦେଇଦେବା ଉଚିତ୍‌ । କଟକର ସାଂସଦ ଭର୍ତ୍ତୃହରି ମହତାବ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୋଧରେ ଦେଇଥିବା ମନ୍ତବ୍ୟ ଅତ୍ୟନ୍ତ ଦୁର୍ଭାଗ୍ୟଜନକ ଏବଂ ଜଣେ ଜନପ୍ରତିନିଧିଙ୍କ ପାଇଁ ଶୋଭନୀୟ ନୁହେଁ ବୋଲି ସେ କହିଛନ୍ତି।

ଉପସଭାପତି ତଥା ବରିଷ୍ଠ ଗଣମାଧ୍ୟମ ସଂଯୋଜକ ଶ୍ରୀ ପ୍ରତାପ ଜେନା କହିଥିଲେ ଯେ ସମଗ୍ର ଦେଶରେ ବାରମ୍ୱାର ପ୍ରଶ୍ନପତ୍ର ଲିକ୍‌ ଯୋଗୁଁ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାରକୁ ଠେଲି ହୋଇଯାଉଛି। ଏପରି ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ମତ ରଖିବା ପରିବର୍ତ୍ତେ ଭର୍ତ୍ତୃହରି ମହତାବ ନବୀନ ପଟ୍ଟନାୟକଙ୍କ ବିରୋଧରେ ରାଜନୈତିକ ମନ୍ତବ୍ୟ ଦେଇ ସାଧାରଣ ଜନତାଙ୍କ ଦୃଷ୍ଟିକୁ ଭିନ୍ନ ଦିଗକୁ ନେବାକୁ ଚେଷ୍ଟା କରିଛନ୍ତି। ନବୀନ ପଟ୍ଟନାୟକ ସର୍ବଦା ଗଣତାନ୍ତ୍ରିକ ମୂଲ୍ୟବୋଧର ସପକ୍ଷରେ ରହିଆସିଛନ୍ତି। ଯୁବପିଢ଼ି ଓ ଛାତ୍ରଛାତ୍ରୀଙ୍କ ସ୍ୱାର୍ଥ ପାଇଁ ସବୁବେଳେ ସ୍ୱର ଉତ୍ତୋଳନ କରିଆସିଛନ୍ତି। ନବୀନ ପଟ୍ଟନାୟକଙ୍କ ବିବୃତି ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ନଥିଲା। ସେ କେବଳ ସରକାରଙ୍କୁ ଛାତ୍ରଛାତ୍ରୀଙ୍କ ଦାବି ଶୁଣିବାକୁ ଅନୁରୋଧ କରିଥିଲେ। ତେଣୁ ଭର୍ତ୍ତୃହରି ନବୀନଙ୍କ ବିରୋଧରେ ଦେଇଥିବା ମନ୍ତବ୍ୟ ପ୍ରତ୍ୟାହାର କରିବା ସହିତ ନିଃସର୍ତ୍ତ କ୍ଷମା ପ୍ରାର୍ଥନା କରନ୍ତୁ ବୋଲି ସେ ଦାବି କରିଛନ୍ତି।

ନୂଆଦିଲ୍ଲୀ: ଅଠର ତମ ଲୋକସଭା ଅଧିବେଶନ ୨୪ ତାରିଖରୁ ଆରମ୍ଭ ହେବାକୁ ଯାଉଛି। ଏହି ସମୟରେ ବାଚସ୍ପତି ଏବଂ ଉପ-ବାଚସ୍ପତି ନିର୍ବାଚନ ହେବ। ଏହା ପୂର୍ବରୁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସମ୍ବିଧାନର ଧାରା ୯୫(୧) ଅନୁଯାୟୀ ବିଜେପି ସାଂସଦ ଭର୍ତ୍ତୃହରି ମହତାବଙ୍କୁ ପ୍ରୋଟେମ ସ୍ପିକର ନିଯୁକ୍ତ କରିଛନ୍ତି। ସେ ସଂସଦର ନବ ନିର୍ବାଚିତ ସାଂସଦଙ୍କୁ ଶପଥପାଠ କରାଇବେ। ଭର୍ତ୍ତୃହରି ମହତାବ କଟକରୁ ସାତ ଥର ସାଂସଦ ହୋଇଛନ୍ତି। ସେ ଲୋକସଭା ନିର୍ବାଚନ ପୂର୍ବରୁ ବିଜେଡି ଛାଡ଼ି ବିଜେପିରେ ସାମିଲ ହୋଇଥିଲେ। ୨୦୧୭ରେ ଶ୍ରେଷ୍ଠ ପ୍ରଦର୍ଶନ ପାଇଁ ତାଙ୍କୁ ଆଉଟଷ୍ଟାଣ୍ଡି ପାଲ୍ୟାମେଣ୍ଟାରିଆନ ଆୱାର୍ଡ ମିଳିଥିଲା। ଏହା ବ୍ୟତୀତ ରାଷ୍ଟ୍ରପତି ସମ୍ବିଧାନର ଧାରା ୯୯ ଅନୁଯାୟୀ ବାଚସ୍ପତିଙ୍କୁ ସହାୟତା କରିବା ନିମନ୍ତେ ସୁରେଶ କୋଡିକୁନ୍ନିଲ, ଥିକୋଟଇ ରାଜୁଥେବର ବାଲୁ, ରାଧା ମୋହନ ସିଂହ, ଫଗନ ସିଂହ କୁଲସ୍ତେ ଏବଂ ସୁଦୀପ ବନ୍ଦୋପାଧ୍ୟାୟଙ୍କୁ ନିଯୁକ୍ତି କରିଛନ୍ତି।

ନୂଆଦିଲ୍ଲୀ: କଟକ ଲୋକସଭା ବିଜେଡି ସାଂସଦ ଭର୍ତ୍ତୃହରି ମହତାବ ହୃଦଘାତ ଜନିତ ଅସୁସ୍ଥତା ଅନୁଭବ କରିବାକୁ ରବିବାର ନୂଆଦିଲ୍ଲୀସ୍ଥିତ ରାମ ମନୋହର ଲୋହିଆ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଶେଷ ଖବର ସୁଦ୍ଧା ଶ୍ରୀ ମହତାବଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶ୍ରୀ ମହତାବଙ୍କ ପୁଅଙ୍କ ସହ ଫୋନ୍‍ରେ କଥା ହୋଇ ତାଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି। ଏନେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଟୁଇଟ୍‍ କରି ସୂଚନା ଦେଇଛନ୍ତି। ତାଙ୍କର ଆଶୁ ଆରୋଗ୍ୟ ଓ ଉତ୍ତମ ସ୍ୱାସ୍ଥ୍ୟ କାମନା କରିଛନ୍ତି।

କଟକ ସାଂସଦ ଶ୍ରୀ ଭତୃହରି ମହତାବ ଅସୁସ୍ଥତା କାରଣରୁ ଡାକ୍ତରଖାନାରେ ଚିକିତ୍ସିତ ହେଉଥିବା ଜାଣିବା ପରେ ପୁଅଙ୍କ ସହ ଫୋନରେ କଥା ହୋଇ ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ବୁଝିଲି। ତାଙ୍କର ଆଶୁଆରୋଗ୍ୟ ଓ ଉତ୍ତମ ସ୍ୱାସ୍ଥ୍ୟ କାମନା କରୁଛି।

— Naveen Patnaik (@Naveen_Odisha) December 20, 2021

ସେହିପରି କେନ୍ଦ୍ର ସ୍ଵାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡଭିୟ ମଧ୍ୟ ଭର୍ତ୍ତୃହରି ମହତାବଙ୍କ ସ୍ୱାସ୍ଥ୍ୟ ଅବସ୍ଥା ପଚାରି ବୁଝିଛନ୍ତି। ଭର୍ତ୍ତୃହରି ଏବେ ସଂସଦର ଶୀତକାଳୀନ ଅଧିବେଶନ ଚାଲୁଥିବାରୁ ଦିଲ୍ଲୀରେ ରହିଥିଲେ। ଏହାପରେ ତାଙ୍କ ଶରୀର ଅସୁସ୍ଥ ହେବାର ଖବର ଆସିଛି। ଚଳିତ ଅଧିବେଶନରେ ଭର୍ତ୍ତୃହରି ପ୍ରତ୍ୟେକ ଦିନ ସଂସଦରେ ଉପସ୍ଥିତ ରହୁଥିଲେ।