ଅହମ୍ମଦାବାଦ୍‌: ଟି-୨୦ ବିଶ୍ୱକପ୍ ୨୦୨୬ରେ ଟିମ୍ ଇଣ୍ଡିଆର ଐତିହାସିକ ବିଜୟ ପରେ ବିରାଟ କୋହଲି ୱିକେଟ୍ କିପର-ବ୍ୟାଟର ସଞ୍ଜୁ ସାମସନଙ୍କ ଉଚ୍ଚ ପ୍ରଶଂସା କରିଛନ୍ତି। ସାମସନଙ୍କ ଚମତ୍କାର ପ୍ରଦର୍ଶନ ପାଇଁ ତାଙ୍କୁ ଆଇସିସି ପକ୍ଷରୁ 'ପ୍ଲେୟାର ଅଫ୍ ଦି ଟୁର୍ଣ୍ଣାମେଣ୍ଟ' ଘୋଷଣା କରାଯାଇଛି।

ରବିବାର ରାତିରେ ବିରାଟ କୋହଲି ନିଜ ଇନଷ୍ଟାଗ୍ରାମ ଷ୍ଟୋରୀରେ ସାମସନଙ୍କ ଏକ ପୋଷ୍ଟର ସେୟାର କରି ତାଙ୍କୁ ଶୁଭେଚ୍ଛା ଜଣାଇଛନ୍ତି। ସେ ଲେଖିଛନ୍ତି, "ସବୁଠାରୁ ଯୋଗ୍ୟ ମ୍ୟାନ୍ ଅଫ୍ ଦି ଟୁର୍ଣ୍ଣାମେଣ୍ଟ ସଞ୍ଜୁ ସାମସନଙ୍କ ପକ୍ଷରୁ କି ଚମତ୍କାର ଟୁର୍ଣ୍ଣାମେଣ୍ଟ। ଆପଣ ସେହି ସମୟରେ ପ୍ରଦର୍ଶନ କରିଥିଲେ ଯେତେବେଳେ ଏହାର ସବୁଠାରୁ ଅଧିକ ଆବଶ୍ୟକତା ଥିଲା। ତୁମ ପାଇଁ ବହୁତ ଖୁସି, ଚେଟ୍ଟା।"

ଟୁର୍ଣ୍ଣାମେଣ୍ଟରେ ଅଭିଷେକ ଶର୍ମାଙ୍କ ଖରାପ ଫର୍ମ ପରେ ସାମସନଙ୍କୁ ରିପ୍ଲେସମେଣ୍ଟ ଭାବେ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା। ସେ ଲଗାତାର ତିନୋଟି ମ୍ୟାଚରେ ଅର୍ଦ୍ଧଶତକ ହାସଲ କରି ଭାରତକୁ ଏକ ଐତିହାସିକ ତୃତୀୟ ଟି-୨୦ ବିଶ୍ୱକପ୍ ଟାଇଟଲ୍ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। କର ବା ମର ସ୍ଥିତିରେ ଥିବା ସୁପର-୮ ପର୍ଯ୍ୟାୟରେ ୱେଷ୍ଟଇଣ୍ଡିଜ୍ ବିପକ୍ଷରେ ସେ ଅପରାଜିତ ୯୭ ରନ୍ ର ଏକ ଗୁରୁତ୍ୱପୂର୍ଣ୍ଣ ଇନିଂସ ଖେଳି ଦଳକୁ ବଞ୍ଚାଇଥିଲେ। ଏହା ଫଳରେ ସେ ଭାରତୀୟ ଦଳର ନୂଆ ହିରୋ ପାଲଟିଯାଇଥିଲେ।

ମୁମ୍ବାଇର ୱାଙ୍ଖେଡେ ଷ୍ଟାଡିୟମରେ ଖେଳାଯାଇଥିବା ସେମିଫାଇନାଲରେ ସେ ଇଂଲଣ୍ଡ ବିପକ୍ଷରେ ମାତ୍ର କିଛି ବଲ୍ ଖେଳି ୮୯ ରନ୍ ସଂଗ୍ରହ କରିଥିଲେ। ଏହି ମ୍ୟାଚରେ ଭାରତ ୨୫୩/୭ ରନ୍ ର ଏକ ବିଶାଳ ସ୍କୋର ଛିଡ଼ା କରି ଇଂଲଣ୍ଡକୁ ୭ ରନରେ ପରାସ୍ତ କରିଥିଲା। 

ସେହିପରି ଫାଇନାଲରେ ମଧ୍ୟ ଏହି ୩୫ ବର୍ଷୀୟ କେରଳ ବ୍ୟାଟରଙ୍କ ଯାଦୁ ଦେଖିବାକୁ ମିଳିଥିଲା। ନ୍ୟୁଜିଲ୍ୟାଣ୍ଡ ବିପକ୍ଷରେ ସେ ସର୍ବାଧିକ ୮୯ ରନ୍ କରି ଭାରତକୁ ଏକ ବଡ଼ ସ୍କୋର ପ୍ରଦାନ କରିବାରେ ସାହାଯ୍ୟ କରିଥିଲେ, ଯାହା ଫଳରେ ଭାରତ ଏହି ଫାଇନାଲକୁ ୯୬ ରନରେ ଜିତିନେଇଥିଲା। ଏହି ଐତିହାସିକ ବିଜୟ ସହ ଭାରତ ନିଜ ମାଟିରେ ବିଶ୍ୱକପ୍ ଜିତିବା ସହ ଲଗାତାର ଦୁଇଥର ଟାଇଟଲ୍ ଜିତିଥିବା ପ୍ରଥମ ଦେଶ ହେବାର ଗୌରବ ଅର୍ଜନ କରିଛି।

ଅହମ୍ମଦାବାଦ୍‌: ଭାରତ ଟି-୨୦ ବିଶ୍ୱକପ ୨୦୨୬ ଚମ୍ପିଅନ୍ । ଟାଇଟଲ ବଜାୟ ରଖିବାରେ ସଫଳ ହୋଇଛି ମେନ୍ ଇନ୍ ବ୍ଲୁ । ଫାଇନାଲରେ ନ୍ୟୁଜିଲାଣ୍ଡକୁ ୯୬ ରନ୍‌ରେ ହରାଇ ଟି-୨୦ ବିଶ୍ୱକପ ଟାଇଟଲ ହାତେଇଲା ଟିମ ଇଣ୍ଡିଆ । ସଞ୍ଜୁ ସାମସନ (୪୬ବଲ୍‌ରେ ୮୯ରନ୍‌), ଅଭିଷେକ ଶର୍ମା (୨୧ ବଲ୍‌ରେ ୫୨ରନ୍‌) ଓ ଇଶାନ କିଶାନ (୨୫ବଲ୍‌ରେ ୫୪ରନ୍‌)ଙ୍କ ବିସ୍ଫୋରକ ଅର୍ଦ୍ଧଶତକ, ଯଶ୍‌ପ୍ରୀତ୍‌ ବୁମ୍‌ରା ଓ ଅକ୍ଷର ପଟେଲଙ୍କ ଦମ୍‌ଦାରବୋଲିଂ ବଳରେ ଭାରତ ୨୦୨୬ ଟି-୨୦ ବିଶ୍ୱକପ୍‌ରେ ଚାମ୍ପିଅନ ଆଖ୍ୟା ଅର୍ଜନ କରିଛି। ନରେନ୍ଦ୍ର ମୋଦୀ ଷ୍ଟାଡିୟମରେ ରବିବାର ଅନୁଷ୍ଠିତ ଫାଇନାଲ ମ୍ୟାଚ୍‌ରେ ଡିଫେଣ୍ଡିଂ ଚାମ୍ପିଅନ ଭାରତ ୯୬ ରନ୍‌ରେ ନ୍ୟୁଜିଲାଣ୍ଡକୁ ହରାଇ କ୍ରମାଗତ ଦ୍ୱିତୀୟ ଓ ଟୁର୍ଣ୍ଣାମେଣ୍ଟରେ ସର୍ବାଧିକ ତୃତୀୟଥର ଟାଇଟଲ ବିଜୟୀ ହୋଇଛି। ଏହି ମ୍ୟାଚ୍‌ରେ ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୨୦ ଓଭରରେ ୫ ୱିକେଟ ହରାଇ ୨୫୫ ରନ୍‌ କରିଥିଲା। ଜବାବରେ ବୁମ୍‌ରା ସର୍ବାଧିକ ୪ଟି ଓ ଅକ୍ଷର ୩ଟି ଲେଖାଏଁ ୱିକେଟ ନେବା ଫଳରେ ୨୫୬ ରନ୍‌ର ବିଜୟ ଲକ୍ଷ୍ୟକୁ ପିଛା କରି ନ୍ୟୁଜିଲାଣ୍ଡ ୧୯ ଓଭରରେ ୧୫୯ ରନ୍‌ କରି ଅଲଆଉଟ ହୋଇଥିଲା। ଦଳ ପକ୍ଷରୁ ଓପନର ଟିମ୍‌ ସେଇଫର୍ଟ ୨୬ବଲ୍‌ରେ ୫୨ ଓ ଅଧିନାୟକ ମିଚେଲ ସାଣ୍ଟନର ୩୮ ବଲ୍‌ରେ ୪୩ ରନ୍‌ କରିଥିଲେ। ଫିନ୍‌ ଆଲେନ ୯, ରାଚିନ ରବୀନ୍ଦ୍ର ୧, ଗ୍ଲେନ ଫିଲିପ୍ସ ୫ ଓ ମାର୍କ ଚାପ୍‌ମ୍ୟାନ୍‌ ୩ ରନ୍‌ରେ ଆଉଟ ହେବା ଦଳଲାଗି ମହଙ୍ଗା ପଡ଼ିଥିଲା।

ଆଜିର ବିଜୟ ପରେ ବିଶ୍ୱକପ୍‌ରେ ନ୍ୟୁଜିଲାଣ୍ଡ ବିପକ୍ଷରେ ଥିବା ପରାଜୟର ଧାରା ଭାଙ୍ଗିବାରେ ସମର୍ଥ ହୋଇଛି ଭାରତ। ଏହା ପୂର୍ବରୁ ଉଭୟଙ୍କ ମଧ୍ୟରେ ୩ଟି ମୁକାବିଲା ହୋଇଥିଲା ଓ ସମସ୍ତ ୩ଟି ଯାକ ମ୍ୟାଚ୍‌ରେ ଭାରତ ପରାଜିତ ହୋଇଥିଲା। ସେହିପରି ରୋହିତ ଶର୍ମାଙ୍କ ନେତୃତ୍ୱରେ ଭାରତ ୨୦୨୪ରେ ଚାମ୍ପିଅନ ହୋଇଥିଲା। ଆଜି ଚାମ୍ପିଅନ ହେବା ପରେ କ୍ରମାଗତ ଟାଇଟଲ ଓ ସର୍ବାଧିକ ୩ଟି ଟାଇଟଲ ଜିତିବାରେ ଭାରତ ପ୍ରଥମ ଦଳ ଭାବେ ବିବେଚିତ ହୋଇଛି।

ପୂର୍ବରୁ ନ୍ୟୁଜିଲାଣ୍ଡ ଅଧିନାୟକ ମିଚେଲ ସାଣ୍ଟନର ଟସ୍‌ ଜିତିବା ପରେ ପ୍ରଥମେ ବ୍ୟାଟିଂ ଲାଗି ଭାରତକୁ ଆମନ୍ତ୍ରଣ କରିଥିଲେ। ଭାରତ ଆରମ୍ଭରୁ ଆକ୍ରମଣାତ୍ମକ ବ୍ୟାଟିଂ କରି ୪ ଓଭରରେ ୫୦ ଓ ପାୱାରପ୍ଲେ’ରେ ୯୨ ରନ୍‌ ଉଠାଇଥିଲେ। ୮ମ ଓଭର ବୋଲିଂ କରିବାକୁ ଆସି ଅଭିଷେକଙ୍କୁ ରାଚିନ ରବୀନ୍ଦ୍ର କଟ୍‌ବିହାଇଣ୍ଡ ଆଉଟ କରାଇ ଏହି ଯୋଡିକୁ ଭାଙ୍ଗିଦେଇଥିଲେ। ତାଙ୍କ ଆଉଟ ପରେ ସାମସନ ଓ ଇଶାନ କିଶାନ ହାତଖୋଲା ସଟ୍‌ ଖେଳି ୧୦୪ ରନ୍‌ ଉଠାଇଥିଲେ। ୧୬ତମ ଓଭରର ପ୍ରଥମ ବଲ୍‌ରେ ସାମସନ୍‌ଙ୍କୁ ଆଉଟ କରି ଜେମ୍ସ ନୀଶାମ କେବଳ ଏହି ଯୋଡି ଭାଙ୍ଗି ନ ଥିଲେ, ୫ମ ବଲ୍‌ରେ ଇଶାନ ଓ ୬ଷ୍ଠ ବଲ୍‌ରେ ସୂର୍ଯ୍ୟକୁମାରଙ୍କୁ ଆଉଟ କରି ଭାରତୀୟ ରନ୍‌ ହାରରେ ବ୍ରେକ୍‌ ଲଗାଇଦେଇଥିଲେ। ଫାଇନାଲରେ ସାମସନ ସର୍ବାଧିକ ୮୯ ରନ୍‌ କରିଥିଲେ। ସେ ୪୬ବଲ୍‌ ଖେଳି ୫ ଚୌକା ଓ ୮ ଛକା ସହ ଚଳିତ ଟୁର୍ଣ୍ଣାମେଣ୍ଟରେ ହ୍ୟାଟ୍ରିକ ଅର୍ଦ୍ଧତକ ହାସଲ କରିଥିଲେ। ପ୍ରଥମେ କର ଅବା ମର  ୱେଷ୍ଟଇଣ୍ଡିଜ୍‌ ବିପକ୍ଷ ସୁପର ଏଇଟସ ମ୍ୟାଚ୍‌ରେ ଅପରାଜିତ ୯୭, ଇଂଲଣ୍ଡ ବିପକ୍ଷ ସେମିଫାଇନାଲରେ ୮୯ ଓ ଏହି ମ୍ୟାଚ୍‌ରେ ମଧ୍ୟ ୮୯ ରନ୍‌ କରିଥିଲେ। ଇଶାନ ୨୫ବଲ୍‌ରେ ୪ ଚୌକା ଓ ୪ ଛକା ସହ ୫୪ରନ୍‌ର ଯୋଗଦାନ ଦେଇଥିଲେ। ଦଳର ପ୍ରଥମ ୩ଜଣ ଖେଳାଳି କ୍ଲିକ୍‌ କଲାପରେ ଭାରତ ୧୬ତମ ଓଭରରେ ୧, ୧୭ତମ ଓଭରରେ ୭ ଓ ୧୮ତମ ଓଭରରେ ୯  ଓ ୧୯ତମ ଓଭରରେ ୧୧ ରନ୍‌ସଂଗ୍ରହ କରିଥିଲା। ଏହି ୪ ଓଭରରେ ୩ ୱିକେଟ ହରାଇ ୨୮ ରନ୍‌ କରିବା ଫଳରେ ଦଳର ରନ୍‌ ହାର କମିଯାଇଥିଲା। ଶେଷ ଓଭରରେ ଶିବମ ଦୁବେ ୩ଟି ଚୌକା ଓ ୨ଟି ଛକା ସହାୟତାରେ ୨୪ ରନ୍‌ ଉଠାଇବା ଫଳରେ ଭାରତର ସ୍କୋର ୨୫୦ ରନ୍‌ ଅତିକ୍ରମ କରିଥିଲା। ଏକଦା ଦଳ ୨୮୦ରୁ ୨୯୦ ରନ୍‌ କରିବ ବୋଲି ଆଶା କରାଯାଉଥିଲାବେଳେ ଏହି ୪ ଓଭର ସେଥିରେ ପ୍ରତିବନ୍ଧକ ସୃଷ୍ଟି କରିଥିଲା। ନ୍ୟୁଜିଲାଣ୍ଡ ପକ୍ଷରୁ ସମସ୍ତ ବୋଲର ଭାରତର ପ୍ରଥମ ୩ଜଣ ବ୍ୟାଟରଙ୍କ ଆକ୍ରମଣର ଶିକାର ବନିଥିଲେ। ଦଳ ପକ୍ଷରୁ ଜେମ୍ସ ନୀଶାମ ଗୋଟିଏ ଓଭରରେ ୩ଟି ୱିକେଟ ନେଇଥିଲେ। ରାଚିନ ରବୀନ୍ଦ୍ର ଓ ମ୍ୟାଟ ହେନରୀଙ୍କୁ ଗୋଟିଏ ଲେଖାଏଁ ୱିକେଟ ମିଳିଥିଲା। 

ପାୱାର ପ୍ଲେ’ରେ ସର୍ବାଧିକ ସ୍କୋର
ଏହି ମ୍ୟାଚ୍‌ରେ ପ୍ରଥମେ ବ୍ୟାଟିଂ କରିବାର ସୁଯୋଗ ପାଇଥିବା ଭାରତ ପାୱାର ପ୍ଲେ ବା ପ୍ରଥମ ୬ ଓଭରରେ କୌଣସି ୱିକେଟ ନ ହରାଇ ୯୨ ରନ୍‌ କରିଥିଲା। ଏହା ଫଳରେ ଟି-୨୦ ବିଶ୍ୱକପ୍ର ପାୱାର ପ୍ଲେ’ରେ ଏହା ୱେଷ୍ଟଇଣ୍ଡିଜ୍‌ର ରେକର୍ଡ ସହ ସମକକ୍ଷ ହୋଇଛି। ୨୦୨୪ ବିଶ୍ୱକପ୍‌ର ବ୍ରିଜ୍‌ଟାଉନ୍‌ରେ ଅନୁଷ୍ଠିତ ଆଫଗାନିସ୍ତାନ ବିପକ୍ଷ ମୁକାବିଲାରେ ୱେଷ୍ଟଇଣ୍ଡିଜ୍‌ ୧ ୱିକେଟ ହରାଇ ୯୨ ରନ୍‌ କରିଥିଲା। ଚଳିତ ଟୁର୍ଣ୍ଣାମେଣ୍ଟରେ ନାମିବ୍ୟା ବିପକ୍ଷରେ ଭାରତ ୧ ୱିକେଟରେ ୮୬ ଓ ଦକ୍ଷିଣ ଆଫ୍ରିକା ବିପକ୍ଷ ସେମିଫାଇନାଲରେ ନ୍ୟୁଜିଲାଣ୍ଡ କୌଣସି ୱିକେଟ ନ ହରାଇ ୮୪ ରନ୍‌ କରିଥିଲେ। ଏହି ଇନିଂସରେ ଭାରତ ୪ ଓଭରରେ ୫୦ ରନ୍‌ ପୂରଣ କରିଥିଲା। ଟି-୨୦ ବିଶ୍ୱକପ୍‌ ନକ୍‌ଆଉଟ ସେମିଫାଇନାଲ ଓ ଫାଇନାଲରେ ଏହା ଗୋଟିଏ ଦଳର ସର୍ବାଧିକ ସ୍କୋର। ପାୱାର ପ୍ଲେ’ରେ ନ୍ୟୁଜିଲାଣ୍ଡ ୮ଟି ୱାଇଡ୍‌ ବଲ୍‌ ପକାଇ ଯୁଗ୍ମ ସର୍ବାଧିକ ୱାଇଡ୍‌ ଦେବାର ରେକର୍ଡ କରିଛି। 

ଗୋଟିଏ ସଂସ୍କରଣରେ ସର୍ବାଧିକ ରନ କଲେ ସଞ୍ଜୁ
ଭାରତୀୟ ବ୍ୟାଟର ଭାବେ ଟି-୨୦ ବିଶ୍ୱକପ୍‌ର ଗୋଟିଏ ସଂସ୍କରଣରେ ସର୍ବାଧିକ ରନ ସଂଗ୍ରହ କରିବାରେ ସଞ୍ଜୁ ସାମସନ ରେକର୍ଡ କରିଛନ୍ତି। ଶେଷ ହୋଇଥିବା ଏହି ସଂସ୍କରଣରେ ସଞ୍ଜୁ ଏହି ବିଶ୍ୱକପ୍‌ରେ ୫ଟି ମ୍ୟାଚରୁ ୮୦.୨୫ ହାରରେ ୩୨୧ ରନ ସଂଗ୍ରହ କରିଛନ୍ତି। ଯେଉଁଥିରେ ୩ଟି ଅର୍ଦ୍ଧଶତକୀୟ ପାଳି ସାମିଲ ରହିଛି। ଏହିକ୍ରମରେ ସେ ବିରାଟ କୋହଲିଙ୍କୁ ପଛରେ ପକାଇ ଦେଇଛନ୍ତି। ୨୦୧୪ ସଂସ୍କରଣରେ ବିରାଟ ୩୧୯ ରନ ସଂଗ୍ରହ କରି ତାଲିକାର ଶୀର୍ଷରେ ରହିଥିଲେ। ଇଶାନ କିଶାନ ମଧ୍ୟ ଏହି ବିଶ୍ୱକପରେ ୯ଟି ମ୍ୟାଚରୁ ୩୫.୨୨ ହାରରେ ୩୧୭ ରନ ନିଜ ନାମରେ ଲିପିବଦ୍ଧ କରିଛନ୍ତି। ଉଭୟ ସଞ୍ଜୁ ସାମ୍‌ସନ୍‌ ଅଭିଷେକ ଶର୍ମାଙ୍କ ଉପରେ ଟିମ୍‌ ମ୍ୟାନେଜମେଣ୍ଟ ଯେଉଁ ଭରସା ରଖିଥିଲା ତାହା ସେମାନେ ଭାରତକୁ ଚାମ୍ପିଅନ କରାଇ ଅତୁଟ ରଖିବାରେ ସମର୍ଥ ହୋଇଛନ୍ତି। 

ମୁମ୍ବଇ/କଲମ୍ବୋ: ଆଇସିସି (ଅନ୍ତର୍ଜାତୀୟ କ୍ରିକେଟ କାଉନ୍ସିଲ) ଆନୁକୂଲ୍ୟରେ ପୁରୁଷ ଟି-୨୦ ବିଶ୍ୱକପ୍‌ ଭାରତ ଓ ଶ୍ରୀଲଙ୍କାରେ ଆଜିଠାରୁ ଆରମ୍ଭ ହୋଇଛି । ବାଂଲାଦେଶକୁ ବହିଷ୍କାର, ଭାରତ ସହ ମୁକାବିଲାକୁ ପାକିସ୍ତାନର ବୟକଟ୍‌ ମଧ୍ୟରେ ଟି-୨୦ ବିଶ୍ୱକପ୍‌ର ୧୦ମ ସଂସ୍କରଣ ଆରମ୍ଭ ହୋଇଛି । ପୂର୍ବପରି ୧୬ଟି ଦଳକୁ ନେଇ ଏହି ଟୁର୍ଣ୍ଣାମେଣ୍ଟ ଲିଗ୍‌ ଓ ନକ୍‌ଆଉଟ ଭିତ୍ତିରେ ଖେଳାଯିବ। ଏହି ଟୁର୍ଣ୍ଣାମେଣ୍ଟ ଉଭୟ ଭାରତ ଓ ଶ୍ରୀଲଙ୍କାରେ ମିଳିତଭାବେ ଆୟୋଜିତ ହେଉଛି। ଆଇସିସିର ନୂଆ ରାଜିନାମା ଅନୁଯାୟୀ ଏହି ଟୁର୍ଣ୍ଣାମେଣ୍ଟ ଭାରତରେ ଆୟୋଜିତ ହେଉଥିବାରୁ ପାକିସ୍ତାନ ତାହାର ସମସ୍ତ ମ୍ୟାଚ୍‌ ଶ୍ରୀଲଙ୍କାର କଲମ୍ବୋ ସହରରେ ଖେଳିବ। ଟୁର୍ଣ୍ଣାମେଣ୍ଟରେ ମୋଟ ୫୫ଟି ମ୍ୟାଚ୍‌ ଉଭୟ ଦେଶରେ ଥିବା ୮ଟି ଭେନ୍ୟୁ ବା ଷ୍ଟାଡିୟମ୍‌ରେ ଖେଳାଯିବ ବୋଲି ସ୍ଥିର ହୋଇଛି। ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍‌ ଅହମ୍ମଦାବାଦ୍‌ରେ ମାର୍ଚ୍ଚ ୮ ତାରିଖରେ ଖେଳାଯିବାର କାର୍ଯ୍ୟକ୍ରମ ରହିଛି। କିନ୍ତୁ ପାକିସ୍ତାନ ଯଦି ଫାଇନାଲ ଖେଳିବାକୁ ଯୋଗ୍ୟତା ଅର୍ଜନ କରେ ତେବେ ଏହି ମୁକାବିଲା କଲମ୍ବୋରେ ଖେଳାଯିବ ବୋଲି କାର୍ଯ୍ୟକ୍ରମ ସ୍ଥିର ହୋଇଛି। 

ବିଶ୍ୱକପର ଉଦ୍‌ଘାଟନୀ ଦିବସରେ କଲମ୍ବୋରେ ପୂର୍ବାହ୍ନ ୧୧ଟାରେ ଗ୍ରୁପ୍‌-ଏ’ରେ ପାକିସ୍ତାନ ଓ ନେଦରଲାଣ୍ଡ୍‌ସ ମୁହାଁମୁହିଁ ହେଉଛନ୍ତି । ଏହାପରେ ଅପରାହ୍‌ଣ ୩ଟାରେ ଗ୍ରୁପ୍‌-ସି’ର ଏକ ମ୍ୟାଚ୍‌ରେ ୱେଷ୍ଟଇଣ୍ଡିଜ୍‌ ଓ ସ୍କଟ୍‌ଲାଣ୍ଡ କୋଲ୍‌କାତାରେ ଖେଳିବେ। ଶନିବାରର ଶେଷ ମ୍ୟାଚ୍‌ ମୁମ୍ବାଇରେ ରାତି ୭ଟାରେ ଖେଳାଯିବ। ଏଥିରେ ଆୟୋଜକ ଭାରତ ଭେଟିବ ଆମେରିକା (ୟୁଏସ୍‌ଏ)କୁ। ଟି-୨୦ ବିଶ୍ୱକପ୍‌ର ଉଦ୍‌ଘାଟନୀ ଦିବସର ଶେଷ ମ୍ୟାଚରେ ଆୟୋଜକ ଭାରତ ଓ ଆମେରିକା ସାମ୍ନାସାମ୍ନି ହେବେ। ରାତି ୭ଟାରେ ୱାଙ୍ଖଡେ ଷ୍ଟାଡିୟମରେ ଏହି ମ୍ୟାଚ୍‌ ଖେଳାଯିବ। ସଦ୍ୟ ଆଇସିସି ଟି-୨୦ Ñଙ୍କିଙ୍ଗ୍‌ରେ ଭାରତ ଶୀର୍ଷରେ ରହିଥିବାବେଳେ ଆମେରିକା ୧୮ତମ ସ୍ଥାନରେ ରହିଛି। ତେଣୁ ମାନ୍ୟତା ଦୃଷ୍ଟିରୁ ଭାରତ ଏହି ମ୍ୟାଚରେ ଫେଭରାଇଟ୍‌ ବିବେଚିତ ହେଉଛି। ଦୁଇ ଇନଫର୍ମ ବିସ୍ଫୋରକ ଓପନର ଇଶାନ କିଶାନ ଓ ଅଭିଷେକ ଶର୍ମାଙ୍କ ସହ ଅଧିନାୟକ ସୂର୍ଯ୍ୟକୁମାର, ତିଲକ ବର୍ମା ଏବଂ ବୋଲିଂରେ ଯଶପ୍ରୀତ ବୁମ୍‌ରାଙ୍କ ସହ ଅର୍ଶଦୀପ୍‌ ସିଂହ, କୁଲଦୀପ ଯାଦବ ଭାର ସମ୍ଭାଳିବେ। ସେହିଭଳି ହାର୍ଦ୍ଦିକ ପାଣ୍ଡ୍ୟା, ଶିଭମ ଦୁବେ, ଅକ୍ଷର ପଟେଲ, ୱାଶିଂଟନ ସୁନ୍ଦରଙ୍କ ଭଳି ଦକ୍ଷ ଅଲ୍‌ରାଉଣ୍ଡର ଥିବାରୁ ଭାରତ ଏଥର ପ୍ରମୁଖ ଟାଇଟଲ୍‌ ଦାବିଦାର ରହିଛି। 

ଅଭିଷେକଙ୍କ ସହ ଇଶାନ ଇନିଂସ ଓପନ୍‌ କରିବା ନେଇ ଅଧିନାୟକ ସୂର୍ଯ୍ୟ ସ୍ପଷ୍ଟ କରିସାରିଛନ୍ତି। ଅପରପକ୍ଷରେ ଏକାଧିକ ଦେଶର ଖେଳାଳିଙ୍କୁ ନେଇ ଆମେରିକା ଦଳ ଗଠିତ ହୋଇଛି। ଆମେରିକା ଜନ୍ମିତ ମାତ୍ର ୪ଜଣ ଖେଳାଳି ଦଳରେ ରହିଛନ୍ତି। ସେହିଭଳି ଅଧିନାୟକ ମୋନାକ ପଟେଲଙ୍କ ସମେତ ୫ଜଣ ଭାରତୀୟ, ୩ଜଣ ପାକିସ୍ତାନ ଜନ୍ମିତ ଖେଳାଳି ଆମେରିକା ଦଳରେ ସ୍ଥାନ ପାଇଛନ୍ତି। ଅଧିନାୟକ ମୋନାକ ଗୁଜରାଟ ପକ୍ଷରୁ ବିଭିନ୍ନ ବୟସ ବର୍ଗରେ ଖେଳି ପରବର୍ତ୍ତୀ ସମୟରେ ଆମେରିକା ପଳାଇଥିଲେ।

ନୂଆଦିଲ୍ଲୀ: ଟି-୨୦ ବିଶ୍ୱକପ ୨୦୨୬ ରେ ଭାରତ ବିପକ୍ଷ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ଖେଳିବାକୁ ପାକିସ୍ତାନ ମନା କରିବା ପରେ ତେଜିଛି ବିବାଦ । ଏହି ସମ୍ବେଦନଶୀଳ ପ୍ରସଙ୍ଗରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ଆନ୍ତର୍ଜାତୀୟ କ୍ରିକେଟ ପରିଷଦ (ICC)ର ଆଭିମୁଖ୍ୟକୁ ପୂର୍ଣ୍ଣ ସମର୍ଥନ ଜଣାଇଛି। ବିସିସିଆଇ ସ୍ପଷ୍ଟ କରିଛି ଯେ କ୍ରୀଡ଼ା ଭାବନା ବା 'ସ୍ପୋର୍ଟସମ୍ୟାନସିପ୍' ଉପରେ ଆଇସିସିର ଯୁକ୍ତି ଯଥାର୍ଥ ଅଟେ।

ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଳା ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, "ଆଇସିସି ଖେଳୁଆଡ଼ ମନୋଭାବ ସମ୍ପର୍କରେ ଏକ ବଡ଼ ବୟାନ ଜାରି କରିଛି ଏବଂ ଆମେ ଆଇସିସି ସହ ସମ୍ପୂର୍ଣ୍ଣ ଏକମତ। ତେବେ ଆମେ ଆଇସିସି ସହ ବିଧିବଦ୍ଧ ଆଲୋଚନା କରିବା ପରେ ଯାଇ ଏନେଇ ଅଧିକ ମନ୍ତବ୍ୟ ଦେବୁ।" ସୂଚନାଯୋଗ୍ୟ ଯେ, ପାକିସ୍ତାନ ସରକାର ସୋସିଆଲ ମିଡିଆରେ ଘୋଷଣା କରିଛନ୍ତି ଯେ ପାକିସ୍ତାନ ଦଳ ବିଶ୍ୱକପରେ ଅଂଶଗ୍ରହଣ କରିବ, କିନ୍ତୁ ଫେବୃଆରୀ ୧୫ରେ ଧାର୍ଯ୍ୟ ହୋଇଥିବା ଭାରତ ବିପକ୍ଷ ମ୍ୟାଚରେ ପଡ଼ିଆକୁ ଓହ୍ଲାଇବ ନାହିଁ।

ପାକିସ୍ତାନର ଏପରି ଅଂଶଗ୍ରହଣ ନିଷ୍ପତ୍ତିକୁ ଆଇସିସି ସମାଲୋଚନା କରିଛି। ଆଇସିସି କହିଛି ଯେ, ଏକ ବିଶ୍ୱସ୍ତରୀୟ କ୍ରୀଡ଼ା ଇଭେଣ୍ଟରେ ନିଜ ଇଚ୍ଛା ମୁତାବକ ମ୍ୟାଚ୍ ଖେଳିବା କ୍ରୀଡ଼ା ନିୟମ ଓ ଭାବନା ବିରୋଧୀ। ଏଭଳି ନିଷ୍ପତ୍ତି ବିଶ୍ୱ କ୍ରିକେଟ ଏବଂ ପ୍ରଶଂସକଙ୍କ ସ୍ୱାର୍ଥରେ ନାହିଁ। ପାକିସ୍ତାନ କ୍ରିକେଟ ବୋର୍ଡ ଏହାର ଦୀର୍ଘମିଆଦି ପ୍ରଭାବ ବିଷୟରେ ଚିନ୍ତା କରି ଏକ ଉପଯୁକ୍ତ ସମାଧାନ ବାହାର କରିବ ବୋଲି ଆଇସିସି ଆଶା ରଖିଛି।

ଅନ୍ୟପକ୍ଷରେ, ସୁରକ୍ଷା କାରଣ ଦର୍ଶାଇ ବାଂଲାଦେଶ କ୍ରିକେଟ ବୋର୍ଡ ଭାରତରେ ଖେଳିବାକୁ ମନା କରିବା ପରେ ଆଇସିସି ବିସିବି ବିପକ୍ଷରେ ବଡ ପଦକ୍ଷେପ ନେଇଛି। ବାଂଲାଦେଶ ବଦଳରେ ସ୍କଟଲ୍ୟାଣ୍ଡକୁ ଟୁର୍ଣ୍ଣାମେଣ୍ଟରେ ସାମିଲ କରାଯାଇଛି। ଫେବୃଆରୀ ୭ ତାରିଖରୁ ଆରମ୍ଭ ହେବାକୁ ଯାଉଛି ଟି-୨୦ ବିଶ୍ୱକପ ୨୦୨୬  ।

ବାର୍ବାଡୋସ୍: ସୂର୍ଯ୍ୟକୁମାରଙ୍କ ଅବିଶ୍ବସନୀୟ କ୍ୟାଚ୍‌ କଲା କମାଲ । ଭାରତକୁ ଦେଖାଇଲା ବିଜୟର ବାଟ । ଭାରତକୁ ଟି-୨୦ ବିଶ୍ୱକପ୍ ବିଜୟର ଅନ୍ୟତମ ଟର୍ଣ୍ଣିଙ୍ଗ ପଏଣ୍ଟ ଥିଲା ସୂର୍ଯ୍ୟକୁମାରଙ୍କ ଏକ ଅବିଶ୍ବସନୀୟ କ୍ୟାଚ୍‌ । ଦକ୍ଷିଣ ଆଫ୍ରିକାଠୁ ବିଜୟ ଛଡ଼ାଇ ଆଣିଥିଲା ସୂର୍ଯ୍ୟକୁମାରଙ୍କ ଏହି କ୍ୟାଚ । ଶେଷ ଓଭରରେ ଡେଭିଡ୍ ମିଲରଙ୍କ କ୍ୟାଚ୍ ଧରି ସୂର୍ଯ୍ୟକୁମାର ବିଜୟ ପାଇଁ ବାଟ ଖୋଲି ଦେଇଥିଲେ । ପ୍ରମାଣ କରିଦେଇଥିଲେ, କ୍ୟାଚ୍ କେବଳ ମ୍ୟାଚ୍ ଜିତାଏ ନାହିଁ, ଜିତାଏ ବିଶ୍ୱକପ୍ ।

ଶେଷ ଓଭରରେ ଦକ୍ଷିଣ ଆଫ୍ରିକାକୁ ବିଜୟ ପାଇଁ ଆବଶ୍ୟକ ହେଉଥିଲା ୧୬ ରନ୍ । ଯଶପ୍ରୀତ ବୁମରା ଓ ଅର୍ଶଦୀପ ସିଂହଙ୍କ ଓଭର ଶେଷ ହୋଇସାରିଥିଲା । କ୍ରିଜରେ ଅପରାଜିତ ଥିବା ଦୁର୍ଦ୍ଧର୍ଷ ମିଲର କ୍ଷଣକ ମଧ୍ୟରେ ବାଜି ପଲଟାଇବାର କ୍ଷମତା ରଖିଥିଲେ । ସେ ୨୧ରନ୍ କରି କ୍ରିଜରେ ଜମି ସାରିଥିଲେ । ପାଣ୍ଡ୍ୟା ୨୦ତମ ଓଭର ବୋଲିଂ କରିଥିଲେ । ମିଲରଙ୍କୁ ଅଫ ଷ୍ଟମ୍ପ ବାହାରେ ଏକ ୟର୍କର ବଲ୍ ପକାଇଥିଲେ । ବଲ୍କୁ ପିଚରେ ପଡ଼ିବାକୁ ନଦେଇ ଚତୁର ମିଲର ସିଧା ଲଙ୍ଗ ଅଫ ବାଉଣ୍ଡାରୀ ଅଞ୍ଚଳକୁ ଶକ୍ତିଶାଳୀ ସଟ୍ ଖେଳିଥିଲେ । ସେଠାରେ ଫିଲ୍ଡିଂ କରୁଥିବା ସୂର୍ଯ୍ୟ କୁମାର କ୍ୟାଚ୍ ଧରିଥିଲେ । ମାତ୍ର ନିୟନ୍ତ୍ରଣ ହରାଇ ବସିଥିଲେ । ବିଚଳିତ ନହୋଇ ସେ ବଲକୁ ଉପରକୁ ଫିଙ୍ଗି ବାଉଣ୍ଡାରୀ ବାହାରକୁ ଚାଲିଯାଇ ପ୍ରଥମେ ନିୟନ୍ତ୍ରଣ ରଖିଥିଲେ । ଏହାପରେ ଏକ ଜମ୍ପ ମାରି ଗ୍ରାଉଣ୍ଡକୁ ପ୍ରବେଶ କରିଥିଲେ, ହାତରେ ରହିଥିଲା ବଲ୍ । ଏ ଦୃଶ୍ୟ ସମସ୍ତଙ୍କ ମନ ଛୁଇଁଥିଲା । ଏହି କ୍ୟାଚ୍ ପରେ ଆରମ୍ଭ ହୋଇଥିଲା ବିଜୟର କ୍ରେଜ୍ ।

ଟିଭି ଅମ୍ପାୟାର ବାରମ୍ବାର ରିପ୍ଲେ ଦେଖି ପରୀକ୍ଷା କରିଥିଲେ । ସୂର୍ଯ୍ୟକୁମାର ବଲ୍ ସହ ବାଉଣ୍ଟାରୀ ଛୁଇଁ ନଥିବା ସ୍ପଷ୍ଟ ହୋଇଥିଲା । ଷ୍ଟାଡ଼ିୟମର ବିଶାଳ ସ୍କ୍ରିନରେ ଆଉଟ୍ ଲେଖି ହୋଇ ଯାଇଥିଲା । ଏହି ଵିକେଟ ପାଟଣା ପରେ ଆରମ୍ଭ ହୋଇ ଯାଇଥିଲା ଭାରତର ବିଶ୍ୱକପ ବିଜୟର ପ୍ରାକ୍ ଉତ୍ସବ ।

ବାର୍ବାଡୋସ: ୱେଷ୍ଟଇଣ୍ଡିଜ୍‌ର ବାର୍ବାଡୋସ ଦ୍ୱୀପପୁଞ୍ଜ ଅନ୍ତର୍ଗତ ବ୍ରିଜ୍‌ଟାଉନର କେନିସଙ୍ଗଟନ ଓଭାଲରେ ଶନିବାର ଅନୁଷ୍ଠିତ ୨୦୨୪ ଟି-୨୦ ବିଶ୍ୱକପ୍‌ ଫାଇନାଲରେ ଦକ୍ଷିଣ ଆଫ୍ରିକାକୁ ୭ ରନ୍‌ରେ ପରାସ୍ତ କରି ଭାରତ ଚାମ୍ପିଅନ ହୋଇଛି। ଭାରତର ଏହି ଟାଇଟଲ ବିଜୟରେ ସମସ୍ତେ ଖୁସି ହୋଇଛନ୍ତି। ଏହି ବିଶ୍ୱକପ୍‌ର ଆୟୋଜକ, ପ୍ରାୟୋଜକ, ବିଜ୍ଞାପନଦାତା, ବିସିସିଆଇ ଓ ଆଇସିସିର କର୍ମକର୍ତ୍ତା, ସମର୍ଥକ, ପ୍ରଶଂସକ ଓ କ୍ରିକେଟ ଖେଳକୁ ଭଲ ପାଉଥିବା ସମସ୍ତ ବ୍ୟକ୍ତିବିଶେଷ ଖୁସି ହୋଇଛନ୍ତି। ଟି-୨୦ ବିଶ୍ୱକପ ବିଜୟ ପରେ ଟିମ୍ ଇଣ୍ଡିଆକୁ ବିଭିନ୍ନ ମହଲରୁ ଛୁଟୁଛି ଶୁଭେଛାର ସୁଅ । ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପରି ବିଭିନ୍ନ ନେତାମାନେ ସୋସିଆଲ ମିଡ଼ିଆ ମାଧ୍ୟମରେ ରୋହିତ ବାହିନୀକୁ ଶୁଭେଛା ଜଣାଇଛନ୍ତି ।

ଭାରତୀୟ କ୍ରିକେଟ ଦଳ ଦେଶକୁ ଗର୍ବିତ କରିଛି: ନବୀନ
ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହି ଅବସରରେ ଚାମ୍ପିଅନ ଭାରତୀୟ ଦଳକୁ ଶୁଭେଚ୍ଛା ଜଣାଇଛନ୍ତି। ‘କଡ଼ା ସଂଘର୍ଷପୂର୍ଣ୍ଣ ଫାଇନାଲରେ ଦକ୍ଷିଣ ଆଫ୍ରିକାକୁ ପରାସ୍ତ କରି ଟି-୨୦ ବିଶ୍ୱକପ୍‌ ଟ୍ରଫି ଜିତିଥିବା ଭାରତୀୟ ଦଳକୁ ଅଭିନନ୍ଦନ। ଭାରତୀୟ ଦଳ ଅଲ୍‌ରାଉଣ୍ଡ ପ୍ରଦର୍ଶନ କରି ଆଜି ସମଗ୍ର ଦେଶକୁ ଗର୍ବିତ କରିଛି। ସାବାସ୍‌ ଚାମ୍ପିଅନ।’

ଆମେରିକା ଓ ୱେଷ୍ଟଇଣ୍ଡିଜରେ ଆରମ୍ଭ ହୋଇଥିବା ଟି-୨୦ ବିଶ୍ୱକପ୍‌ର ୯ମ ସଂସ୍କରଣରେ ଆରମ୍ଭରୁ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି। ଗୁରୁବାର ରାତିରେ ଗ୍ରୁପ୍‌ ଏ’ର ଏକ ମ୍ୟାଚ୍‌ରେ ଆସୋସିଏସଟ ଦେଶ ତଥା ଆୟୋଜକ ଆମେରିକା ଟେଷ୍ଟ ଖେଳୁଥିବା ପୂର୍ବତନ ଚାମ୍ପିଅନ ପାକିସ୍ତାନକୁ ସୁପର ଓଭରରେ ପରାସ୍ତ କରି ହଇଚଇ ସୃଷ୍ଟି କରିଛି। ଟି-୨୦ ବିଶ୍ୱକପ୍‌ ଇତିହାସରେ ଏହା ଅନ୍ୟତମ ଶ୍ରେଷ୍ଠ ବିପର୍ଯ୍ୟୟ ଭାବେ ପରିଗଣିତ ହେଉଛି। ତେବେ ବିଶ୍ୱକପ୍‌ରେ ଏଭଳି ବିପର୍ଯ୍ୟୟ ଆଦୌ ନୂଆ ନୁହଁ। ବିଶ୍ୱକପ୍‌ ଇତିହାସରେ ପୂର୍ବରୁ ଘଟିଥିବା ଏହି ଭଳି ସର୍ବବୃହତ୍‌ ୫ଟି ବିପର୍ଯ୍ୟୟକୁ ନେଇ ଆଲୋଚନା କରିବା।

୧. ପାକିସ୍ତାନକୁ ହରାଇଲା ଆମେରିକା (୨୦୨୪)
ଆୟୋଜକ ଭାବେ ପଦାର୍ପଣ କରିଥିବା ଆମେରିକା ପୂର୍ବରୁ ପାକିସ୍ତାନକୁ କୌଣସି ଅନ୍ତର୍ଜାତୀୟ ମ୍ୟାଚ୍‌ରେ ଭେଟି ନଥିଲେ ମଧ୍ୟ ଗୁରୁବାର ପାକିସ୍ତାନକୁ ପରାସ୍ତ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ପ୍ରଥମେ ବ୍ୟାଟିଂ କରି ପାକିସ୍ତାନ ୭ ୱିକେଟ ହରାଇ ୧୫୯ ରନ ସଂଗ୍ରହ କରିଥିଲା। ଜବାବରେ ଆମେରିକା ୩ ୱିକେଟ ହରାଇ ୧୫୯ ରନ ସଂଗ୍ରହ କରି ମ୍ୟାଚ୍‌ ଟାଇ ରଖିଥିଲା। ସୁପର ଓଭରରେ ପାକିସ୍ତାନ ପରାସ୍ତ ହୋଇଥିଲା। ଏଥିସହ ଆମେରିକା ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ପୂର୍ଣ୍ଣ ସଦସ୍ୟତା ପାଇଥିବା ଦେଶଗୁଡିକ ସହ ୪ଥର ଭେଟିଛି। ଆମେରିକା ଜିମ୍ବାୱେକୁ ପୂର୍ବରୁ ୩ଥର ଭେଟି ସବୁଥର ପରାସ୍ତ ହୋଇଥିଲା। ଆମେରିକା ଏବେ ଆଇସିସି ମାନ୍ୟତାର ଦ୍ୱାଦଶ ସ୍ଥାନରେ ରହିଛି। ଅନ୍ୟପଟେ ପାକିସ୍ତାନ ଷଷ୍ଠ ସ୍ଥାନରେ ରହିଛି। ପାକିସ୍ତାନ ୨୦୦୯ରେ ଟାଇଟଲ ହାସଲ କରିଥିଲା ଓ ଗତ ୨୦୨୨ ସଂସ୍କରଣରେ ଫାଇନାଲରେ ଇଂଲଣ୍ଡଠାରୁ ପରାସ୍ତ ହୋଇ ରନର୍ସଅପ୍‌ ବିବେଚିତ ହୋଇଥିଲା।

୨.ଅଷ୍ଟ୍ରେଲିଆ ୫ ୱିକେଟ ଜିମ୍ବାୱେଠାରୁ ପରାସ୍ତ (୨୦୦୭)
ବିଶ୍ୱକପ୍‌ର ପ୍ରଥମ ସଂସ୍କରଣ ୨୦୦୭ରେ ଖେଳାଯାଇଥିଲା ଓ ଏଥିରେ ମହେନ୍ଦ୍ର ସିଂ ଧୋନିଙ୍କ ନେତୃତ୍ୱାଧୀନ ଭାରତ ଚାମ୍ପିଅନ ହୋଇଥିଲା। ଏହି ବିଶ୍ୱକପ୍‌ରେ ମଧ୍ୟ ଏକ ବଡ଼ ବିପର୍ଯ୍ୟୟ ଦେଖିବାକୁ ମିଳିଥିଲା। ଗ୍ରୁପ୍‌ ବି’ର ଚତୁର୍ଥ ମ୍ୟାଚରେ ଜିମ୍ବାୱ ଗୋଟିଏ ବଲ୍‌ ବାକିଥାଇ ଅଷ୍ଟ୍ରେଲିଆକୁ ୫ ୱିକେଟରେ ହରାଇଥିଲା। ଟସ୍‌ ଜିତି ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୯ ୱିକେଟ ହରାଇ ୧୩୮ ରନ ସଂଗ୍ରହ କରିଥିଲା। ବ୍ରାଡ ହଗ୍‌ ସର୍ବାଧିକ ୩୫ ରନକରି ଅପରାଜିତ ରହିଥିଲେ। ଜିମ୍ବାୱେର ଏଲଟନ ଚିଗୁମ୍ବୁରା ସର୍ବାଧିକ ୩, ଗ୍ୟାରୀ ବ୍ରେଣ୍ଟ ୨ ୱିକେଟ ନେଇଥିଲେ। ଜବାବରେ ଜିମ୍ବାୱେ ୧୯.୫ ଓଭରରେ ୫ ୱିକେଟ ହରାଇ ୧୩୯ ରନକରି ବାଜି ମାରିଥିଲା। ବ୍ରେଣ୍ଡନ ଟେଲର ସର୍ବାଧିକ ଅପରାଜିତ ୬୦ ରନ ସଂଗ୍ରହ କରି ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ଅଷ୍ଟ୍ରେଲିଆର ଷ୍ଟୁଆର୍ଟ କ୍ଲର୍କ ୨ ୱିକେଟ ନେଇଥିଲେ।

୩. ନେଦରଲାଣ୍ଡସଠାରୁ ୪ ୱିକେଟରେ ହାରିଥିଲା ଇଂଲଣ୍ଡ (୨୦୦୯)
୨୦୦୯ରେ ଇଂଲଣ୍ଡରେ ଆୟୋଜିତ ଟି-୨୦ ବିଶ୍ୱକପ୍‌ରେ ନେଦରଲାଣ୍ଡ ଐତିହାସିକ ଲର୍ଡ୍ସ ଗ୍ରାଉଣ୍ଡରେ ଶେଷ ବଲ୍‌ରେ ଇଂଲଣ୍ଡକୁ ୪ ୱିକେଟରେ ପରାସ୍ତ କରି ଏକ ବଡ଼ ବିପର୍ଯ୍ୟୟ ଘଟାଇବା ସହ ଚର୍ଚ୍ଚା ସୃଷ୍ଟି କରିଥିଲା। ଟସ୍‌ ହାରି ଇଂଲଣ୍ଡ ପ୍ରଥମେ ବ୍ୟାଟିଂ କରି ୫ ୱିକେଟ ହରାଇ ୧୬୨ ରନ ସଂଗ୍ରହ କରିଥିଲା। ଦଳ ତରଫରୁ ଲୁକ୍‌ ରାଇଟ୍‌ ସର୍ବାଧିକ ୭୧ ରନ ସଂଗ୍ରହ କରିଥିଲେ। ଜବାବରେ ନେଦରଲାଣ୍ଡସ ୬ ୱିକେଟ ହରାଇ ଶେଷ ବଲରେ ହିଁ ବିଜୟ ଲକ୍ଷ୍ୟ ହାସଲ କରିନେଇଥିଲା। ନେଦରଲାଣ୍ଡସ ତରଫରୁ ଟମ୍‌ ଡି ଗ୍ରୁଥ୍‌ ସର୍ବାଧି ୪୯, ପିଟର ବୋରେନ୍‌ ୩୦ ଓ ରିଆନ ଟେନ୍‌ ଡୋଶଚେଟ୍‌ ଅପରାଜିତ ୨୨ ରନକରି ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଇଂଲଣ୍ଡ ତରଫରୁ ଦ୍ରୁତ ବୋଲର ଜେମ୍ସ ଆଣ୍ଡରସନ ସର୍ବାଧିକ ୩ ୱିକେଟ ନେଇଥିଲେ। ଟମ୍‌ ଡି ଗ୍ରୁଥ ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।

୪. ପାକିସ୍ତାନକୁ ୧ ରନରେ ହରାଇଥିଲା ଜିମ୍ବାୱେ (୨୦୨୨)
ଟି-୨୦ ବିଶ୍ୱକପ୍‌ ଗତ ସଂସ୍କରଣ ଅର୍ଥାତ ୨୦୨୨ରେ ଜିମ୍ବାୱେ ଗ୍ରୁପ୍‌-୨ରେ ପାକିସ୍ତାନକୁ ୧ ରନରେ ପରାସ୍ତ କରି ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲା। ଟସ୍‌ ଜିତି ଜିମ୍ବାୱେ ପ୍ରଥମେ ବ୍ୟାଟିଂ କରି ୮ ୱିକେଟ ହରାଇ ୧୩୦ ରନ ସଂଗ୍ରହ କରିଥିଲା। ଦଳ ତରଫରୁ ସିନ ୱିଲିୟମ୍ସ ସର୍ବାଧିକ ୩୧ ରନ ସଂଗ୍ରହ କରିଥିଲେ ଓ ପାକିସ୍ତାନର ମହମ୍ମଦ ୱାସିମ ସର୍ବାଧିକ ୪, ସଦାବ ଖାନ୍‌ ୩ ୱିକେଟ ନେଇଥିଲେ। ଜବାବରେ ପାକିସ୍ତାନ ୮ ୱିକେଟ ହରାଇ ୧୨୯ ରନରେ ସୀମିତ ରହି ବିଜୟଠାରୁ ୨ ରନ ଦୂରରେ ରହିଯାଇଥିଲା। ସାନ ମାସୁଦ ସର୍ବାଧବକ ୪୪ ରନ ସଂଗ୍ରହ କରିଥିଲେ। ମୂଲ୍ୟବାନ ୩ ୱିକେଟ ନେଇ ଜିମ୍ବାୱେ ବୋଲର ସିକନ୍ଦର ରାଜା ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ।

୫. ୱେଷ୍ଟଇଣ୍ଡିଜକୁ ୬ ରନରେ ହରାଇଥିଲା ଆଫଗାନିସ୍ତାନ(୨୦୧୬)
ଭାରତରେ ଅନୁଷ୍ଠିତ ୨୦୧୬ ବିଶ୍ୱକପ୍‌ରେ ନବାଗତ ଆଫଗାନିସ୍ତାନ ୬ ରନରେ ଡ୍ୱେନ ବ୍ରାଭୋ, ଡାରେନ ସାମି ଓ ଆନ୍ଦ୍ରେ ରସେଲଙ୍କ ଭଳି ଖେଳାଳିଙ୍କୁ ନେଇ ଗଠିତ ୱେଷ୍ଟଇଣ୍ଡିଜକୁ ହରାଇ ଏକ ବଡ଼ ବିପର୍ଯ୍ୟୟ ସୃଷ୍ଟି କରିଥିଲା। ଟସ ହାରି ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ୭ ୱିକେଟ ହରାଇ ୧୨୩ ରନ ସଂଗ୍ରହ କରିଥିଲା। ଦଳ ତରଫରୁ ନାଜିବୁଲ୍ଲ ଜଡ୍ରାନ ସର୍ବାଧିକ ଅପରାଜିତ ୪୮ ରନ ସଂଗ୍ରହ କରି ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ୱେଷ୍ଟଇଣ୍ଡିଜ ସାମୁଏଲ ବଦ୍ରି ୩ ଓ ରସେଲ ୨ ୱିକେଟ ନେଇଥିଲେ। ଜବାବରେ ୱେଷ୍ଟଇଣ୍ଡିଜ ୮ ୱିକେଟ ହରାଇ ୧୧୮ ରନରେ ସୀମିତ ରହି ବିଜୟଠାରୁ ୭ ରନ ଦୂରରେ ରହିଯାଇଥିଲା। ଦଳ ପାଇଁ ବ୍ରାଭୋ ସର୍ବାଧିକ ୨୮ ରନ ସଂଗ୍ରହ କରିଥିଲେ। ଆଫଗାନିସ୍ତାନ ପାଇଁ ମହମ୍ମଦ ନବୀ ଓ ରସିଦ ଖାନ୍‌ ୨ଟି ଲେଖାଏ ୱିକେଟ ନେଇଥିଲେ।

ନ୍ୟୁୟର୍କ: ଫୁଟବଲ ଖେଳରେ ବ୍ରାଜିଲ ଓ ଆର୍ଜେଣ୍ଟିନା ଲଢେ଼ଇ ଭଳି କ୍ରିକେଟ ଖେଳରେ ଭାରତ ଓ ପାକିସ୍ତାନ ମଧ୍ୟରେ ମୁକାବିଲା ସମର୍ଥକଙ୍କ ଲାଗି ସମାନ ସ୍ଥାନ ଗ୍ରହଣ କରିଛି। ଏହା ମଧ୍ୟରେ ଆମେରିକା ଓ ୱେଷ୍ଟଇଣ୍ଡିଜ୍‌ରେ ଚାଲିଥିବା ଟି-୨୦ ବିଶ୍‌କପ୍‌ରେ ଲୋ ସ୍କୋର, ବିଗ୍‌ ହିଟରଙ୍କ ଫ୍ଲପ୍‌ ଶୋ ଓ ଶୀର୍ଷ ଦଳଗୁଡିକର ପରାଜୟ ଏହି ଟୁର୍ଣ୍ଣାମେଣ୍ଟରେ ଭିନ୍ନ ଏକ ରୋମାଞ୍ଚ ଆଣିଛି। କେବଳ ବ୍ୟାଟିଂ ନୁହେଁ ଚତୁର ବୋଲିଂ ଓ ଫିଲ୍ଡିଂ ବଳରେ ଯେ ମ୍ୟାଚ୍‌ ଜିତିହେବ ତାହା ଚଳିତ ବିଶ୍ୱକପ୍‌ର ପ୍ରଥମ ୧୫ଟି ମ୍ୟାଚ୍‌ରୁ ସ୍ପଷ୍ଟ ପ୍ରମାଣିତ ହୋଇଯାଇଛି। ଏହି ପରିବେଶ ମଧ୍ୟରେ ନ୍ୟୁୟର୍କର ସହରତଳିରେ ଥିବା ନାସାଉ କାଉଣ୍ଟିରେ ଭାରତ ଓ ପାକିସ୍ତାନ ମଧ୍ୟରେ ଚଳିତ ଟି-୨୦ ବିଶ୍ୱକପ୍‌ର ଗ୍ରୁପ୍‌-ସି’ ମୁକାବିଲା ଆଜି ଅନୁଷ୍ଠିତ ହେବ। ଏହି ମୁକାବିଲାକୁ ସମସ୍ତ କ୍ରିକେଟ ଯୁଦ୍ଧର ଜନନୀ ବୋଲି ଅବିହିତ କରାଯାଉଛି। ମୁକାବିଲା ପୂର୍ବରୁ ଅଭ୍ୟାସ ଓ ଫର୍ମରେ ଭାରତ ଦୃଢ଼ ଆତ୍ମବିଶ୍ୱାସୀ ରହିଛି। ଦଳ ଏହି ପଡ଼ିଆରେ ଆୟର୍ଲାଣ୍ଡକୁ ୮ ୱିକେଟରେ ହରାଇ ପିଚ୍‌ ଓ ପରିବେଶ ସମ୍ପର୍କରେ ବେଶ ଅଭିଜ୍ଞତା ହାସଲ କରିଛି। ଅନ୍ୟପକ୍ଷରେ ଆୟୋଜକ ଆମେରିକା ନିକଟରୁ ପ୍ରଥମ ମ୍ୟାଚ୍‌ରେ ପରାଜିତ ହୋଇ ପାକିସ୍ତାନ ଚାପରେ ରହିଛି। ଏଠିକାର ପିଚ୍‌ ସମ୍ପର୍କରେ ମଧ୍ୟ ପାକିସ୍ତାନର ଅଭିଜ୍ଞତା ନାହିଁ। ଏହା ସତ୍ତ୍ବେପାକିସ୍ତାନ ଖେଳ ସମ୍ପର୍କରେ ଭବିଷ୍ୟବାଣୀ କରିବା ସମ୍ଭବ ନୁହେଁ। ଏହି ଦଳ କେତେବେଳେ କିପରି ଖେଳିବ ତାହା ଉପରେ କେହି ଗ୍ୟାରେଣ୍ଟି ଦେଇ ପାରିବନାହିଁ। ଗୋଟିଏ ପଟେ ଆତ୍ମବିଶ୍ୱାସୀ ଭାରତ ଓ ଅନ୍ୟପରେ ଚାପରେ ଥିବା ଅପ୍ରତ୍ୟାଶିତ ପ୍ରଦର୍ଶନକାରୀ ପାକିସ୍ତାନ ମଧ୍ୟରେ ଏହି ମୁକାବିଲା ଯେ ବେଶ ରୋମାଞ୍ଚକ ହେବ ଏହା ଆଶା କରାଯାଇପାରେ।

ଟିମ୍‌ କମ୍ବିନେସନ ଓ ରଣନୀତି
ଚଳିତ ବିଶ୍ୱକପ୍‌ ଆୟୋଜନ କରୁଥିବା ଉଭୟ ଆମେରିକା ଓ ୱେଷ୍ଟଇଣ୍ଡିଜ୍‌ର ପିଚ୍‌ରେ ବଲ ସ୍ଲୋ ଓ ଲୋ ରହୁଛି। ପିଚ୍‌ରେ କେତେବେଳେ ସୁଇଂ ହେଉଛି ତ ଆଉ କେତେବେଳେ ଅସ୍ୱାଭାବିକ ବାଉନ୍ସ। କେଉଁଠି ପେସ୍‌ ବୋଲରଙ୍କୁ ଅଧିକ ୱିକେଟ ମିଳୁଛି ତ ଆଉ କେଉଁଠି କ୍ୱାଲିଟି ସ୍ପିନରଙ୍କ ଦବ୍‌ଦବା ରହୁଛି। ଭାରତ ଓ ପାକିସ୍ତାନ ମଧ୍ୟରେ ଖେଳାଯିବାକୁ ଥିବା ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମ୍‌ର ପିଚ୍‌ ଏଯାଏ ଅସ୍ୱାଭିକ ରହିଛି। ଏଠାରେ ଭାରତ ଖେଳିଥିବା ଆୟର୍ଲାଣ୍ଡ ବିପକ୍ଷ ମ୍ୟାଚ୍‌ରେ ୪ଜଣ ପେସ୍‌ ବୋଲରଙ୍କୁ ଖେଳାଇଥିଲା। ଦଳର ବ୍ୟାଟିଂକୁ ଅଧିକ ଗୁରୁତ୍ୱ ଦେଇ ଶିବମ ଦୁବେ ଓ ଅକ୍ଷର ପଟେଲଙ୍କୁ ନେଇଥିଲା। ପାକିସ୍ତାନ ବିପକ୍ଷରେ ଏକମାତ୍ର ପରିବର୍ତ୍ତନ ଆଶା ରହୁଛି ରିଷ୍ଟ ସ୍ପିନର କୁଲଦୀପ ଯାଦବଙ୍କୁ ସାମିଲ କରିବା। ନଚେତ ଆୟର୍ଲାଣ୍ଡ ବିପକ୍ଷ ମ୍ୟାଚ ଖେଳିଥିବା ଭାରତୀୟ ଦଳରେ ଆଉ କୌଣସି ପରିବର୍ତ୍ତନ ହେବାର ଆଶା କମ୍‌। ପୂର୍ବପରି ରୋହିତ ଶର୍ମା ଓ ବିରାଟ କୋହଲି ପାଳି ଆରମ୍ଭ କରିବେ ଓ ଋଷଭ ପନ୍ତ୍‌ ନଂ-୩ରେ ବ୍ୟାଟିଂ କରିବେ। ଯଶ୍‌ପ୍ରୀତ ବୁମ୍‌ରା, ମହମ୍ମଦ୍‌ ସିରାଜ, ଅର୍ଶଦୀପ ସିଂ ଓ ହାର୍ଦ୍ଦିକ ପାଣ୍ଡ୍ୟାଙ୍କ ଉପରେ ଭାରତୀୟ ପେସ୍‌ ବୋଲିଂ ନିର୍ଭର କରିବ।

ପାକିସ୍ତାନ: ସେହିପରି ଆମେରିକା ନିକଟରୁ ପରାଜୟ ଲାଗି ଅଧିନାୟକ ବାବର ଆଜମ ବୋଲରମାନଙ୍କୁ ଦାୟୀ କରିଥିଲେ। ପ୍ରକୃତରେ ଏହି ମ୍ୟାଚ୍‌ରେ ପାକିସ୍ତାନର ଖେଳାଳି ଭଳି କେହି ଖେଳି ନଥିଲେ। ବ୍ୟାଟର ହୁଅନ୍ତୁ କି ବୋଲର ସମସ୍ତଙ୍କ ନିକଟରୁ ଆଦୌ ଭଲ ଖେଳ ଦେଖିବାକୁ ମିଳି ନଥିଲା। ଯାହା ଫଳରେ ଦଳ ଏହି ମ୍ୟାଚ୍‌ରେ ସୁପର ଓଭରକୁ ଯାଇ ମଧ୍ୟ ହାରିଯାଇଥିଲା। ଏହାର ଅର୍ଥ ନୁହେଁ ଯେ ଭାରତ ବିପକ୍ଷରେ ଦଳ ସେହିପରି ଖେଳିବ। ଗୋଟିଏ କଥା ସତ ଯେ ଆମେରିକାକୁ ପାକିସ୍ତାନ ସେତେଟା ଗୁରୁତ୍ୱ ଦେଇ ନ ଥିଲା। ଯାହା ଫଳରେ ଦଳକୁ ଅପ୍ରତ୍ୟାଶିତ ପରାଜୟ ବରଣ କରିବାକୁ ପଡ଼ିଥିଲା। ଦଳ ପକ୍ଷରୁ କେବଳ ସଦାବ ଖାନ ଓ ଅଧିନାୟକ ବାବର ଆଜମ ଭଲ ଖେଳିଥିଲେ। ବାବର ୪୪ ବଲ୍‌ରେ ୪୩ ରନ୍‌ କରିବା ଆଦୌ ଗ୍ରହଣୀୟ ହୋଇ ପାରି ନ ଥିଲା। ଭାରତ ହେଉ ବା ପାକିସ୍ତାନ ବ୍ୟାଟର ମାନେ ହିଟର ଭାବେ ଜଣାଶୁଣା। ଏମାନେ କେହି ସଫଳ ହୋଇ ନ ଥିଲେ କିମ୍ବା ଦଳର ପ୍ରତିଷ୍ଠିତ ଫାଷ୍ଟ ବୋଲରମାନେ ଫେଲ ମାରିଥିଲେ। ଆମେରିକାଠାରୁ ମ୍ୟାଚ୍‌ ହାରିବା ପରେ ପାକିସ୍ତାନ ଦଳ ଡଲାସରୁ ଆସି ନାସାଉ କାଉଣ୍ଟିରେ ରହିଥିଲା। ପରଦିନ ବିଶ୍ରାମ ନେଇଥିବାରୁ କେବଳ ଶନିବାର ପିଚ୍‌ ଓ ପରିବେଶ ସମ୍ପର୍କରେ ଜାଣିବାକୁ ପାଇଛି। ନାସାଉରେ ଏବେ ଥଣ୍ଡା ପାଗ ରହିଛି ଓ ବର୍ଷା ମଧ୍ୟ ହେଉଛି। ଏଭଳି ସ୍ଥିତିରେ ପାକିସ୍ତାନ ପେସ୍‌ ବୋଲରଙ୍କୁ ମୁକାବିଲା କରିବା ଭାରତ ପକ୍ଷେ ନିଶ୍ଚିତ କଷ୍ଟକର ହେବ।

ନ୍ୟୁୟର୍କ: ବିଜୟରୁ ବିଶ୍ୱକପ ଅଭିଯାନ ଆରମ୍ଭ କଲା ଭାରତ। ଦମଦାର ବିଜୟ ସହ ଆମେରିକା-ୱେଷ୍ଟଇଣ୍ଡିଜରେ ଖେଳା ଯାଉଥିବା ଟି-୨୦ ବିଶ୍ୱକପ ଅଭିଯାନ ଆରମ୍ଭ କରିଛି ଟିମ ଇଣ୍ଡିଆ। ପ୍ରଥମ ମ୍ୟାଚ୍‌ରେ ଦଳ ଏକତରଫା ଭାବେ ଆୟର୍ଲ୍ୟାଣ୍ଡକୁ ୮ ୱିକେଟରେ ପରାସ୍ତ କରିଛି।

ବିଜୟରୁ ବିଶ୍ୱକପ ଅଭିଯାନ ଆରମ୍ଭ କଲା ଭାରତ। ଦମଦାର ବିଜୟ ସହ ଆମେରିକା-ୱେଷ୍ଟଇଣ୍ଡିଜରେ ଖେଳା ଯାଉଥିବା ଟି-୨୦ ବିଶ୍ୱକପ ଅଭିଯାନ ଆରମ୍ଭ କରିଛି ଟିମ ଇଣ୍ଡିଆ। ପ୍ରଥମ ମ୍ୟାଚ୍‌‌ରେ ଦଳ ଏକତରଫା ଭାବେ ଆୟର୍ଲ୍ୟାଣ୍ଡକୁ ୮ ୱିକେଟରେ ପରାସ୍ତ କରିଛି। ବୁଧବାର ଖେଳାଯାଇଥିବା ମ୍ୟାଚ୍‌ରେ ପ୍ରଥମ ବ୍ୟାଟିଂ କରିଥିବା ଆୟର୍ଲାଣ୍ଡ ମାତ୍ର ୯୬ ରନ କରି ଅଲଆଉଟ ହୋଇଥିଲା। ଫଳରେ ଭାରତ ଆଗରେ ୯୭ ରନର ଲକ୍ଷ୍ୟ ଥିଲା। ଅଧିନାୟକ ରୋହିତ ଶର୍ମାଙ୍କ ନେତୃତ୍ୱରେ ଭାରତ ୧୨.୨ ଓଭରରେ ମାତ୍ର ୨ଟି ୱିକେଟ୍‌‌ରେ ବିଜୟ ଲକ୍ଷ୍ୟ ୯୭ ରନ୍‌‌ କରିଛି। ଏହି ମ୍ୟାଚରେ ରୋହିତ ଶର୍ମା ୩୭ଟି ବଲ୍‌‌ ଖେଲି ୪ଟି ଚୌକା ଓ ୩ଟି ଛକା ମାରିଛନ୍ତି। ଏଥି ସହିତ ଭାରତ ଚଳିତ ଟୁର୍ଣ୍ଣାମେଂଟର ବିଜୟରୁ ଅଭିଯାନ ଆରମ୍ଭ କରିଛି। ପ୍ରଥମେ ବୋଲରମାନେ କମାଲ କରି ଆୟର୍ଲ୍ୟାଣ୍ଡକୁ କେବଳ ୧୬ ଓଭରରେ ୯୬ ରନରେ ଅଲଆଉଟ କରି ଦେଇଥିଲେ। ୯୭ ରନର ଟାର୍ଗେଟକୁ ଟିମ ଇଣ୍ଡିଆ, ଅଧିନାୟକ ରୋହିତ ଶର୍ମାଙ୍କ ଅପରାଜିତ ୫୨ ରନ ବଳରେ ଅତି ସହଜରେ ହାସଲ କରି ନେଇଛି।

ବୁଧବାର ମ୍ୟାଚରେ ଯୁବ ବ୍ୟାଟର ଋଷଭ ପନ୍ତ ବ୍ୟକ୍ତିଗତ ଭାବେ ଅପରାଜିତ ୩୬ ରନ୍‌‌ ସଂଗ୍ରହ କରିଥିଲେ। ସେ ୨୬ଟି ବଲ୍‌‌ ଖେଳି ୩ଟି ଚୌକା ଓ ୨ଟି ଛକା ମାରିଥିଲେ। ବିରାଟ କୋହଲି ‌୧ ରନ୍‌‌ ଓ ସୂର୍ଯ୍ୟକୁମାର ଯାଦବ ୨ ରନ୍‌‌ ସଂଗ୍ରହ କରି ପାଭିଲିଅନ୍‌‌‌ ଫେରିଯାଇଥିଲେ।

ନ୍ୟୁୟର୍କସ୍ଥିତ ନସାଉ କାଉଂଟି ଅନ୍ତର୍ଜାତୀୟ କ୍ରିକେଟ୍‌‌ ଷ୍ଟାଡିୟମରେ ଭାରତ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । କିନ୍ତୁ ଆରମ୍ଭରୁ ଭାରତୀୟ ବୋଲରମାନେ ଆୟର୍ଲାଣ୍ଡର ବ୍ୟାଟ୍ସମାନଙ୍କୁ ଚାପରେ ରଖିଥିଲେ । ଭାରତ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା ୩ଟି ୱିକେଟ ନେଇଥିବାବେଳେ ଯଶପ୍ରୀତ ବୁମରା ଓ ଅର୍ଶଦୀପ ସିଂ ୨ଟି ଲେଖାଏଁ ୱିକେଟ ନେଇଥିଲେ । ମହମ୍ମଦ ସିରାଜ ଓ ଅକ୍ଷର ପଟେଲ ଗୋଟିଏ ଲେଖାଏଁ ୱିକେଟ ନେଇଥିଲେ । ଆସନ୍ତା ୯ତାରିଖ ଭାରତ ତାର ଚୀରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ନୁୟର୍କ ପଡ଼ିଆରେ ଭେଟିବ। ଚଳିତ ବିଶ୍ୱକପ୍‌ରେ ନୂଆ ଓପନିଂ କମ୍ବିନେସବ ସହ ମୈଦାନରେ ଦମ ଦେଖାଉଛି ଟିମ୍‌ ଇଣ୍ଡିଆ।

ନ୍ୟୁୟର୍କ: ଆଇସିସି ବିଶ୍ୱକପ୍‌ର ୯ମ ସଂସ୍କରଣ ଯୁକ୍ତରାଷ୍ଟ୍ର ଆମେରିକା ଓ ୱେଷ୍ଟଇଣ୍ଡିଜରେ ଆରମ୍ଭ ହୋଇଯାଇଛି। ଭାରତୀୟ ସମୟ ଅନୁସାରେ ରବିବାର ସକାଳ ୬ଟାରେ ଆୟୋଜକ ଆମେରିକା ଓ କାନାଡା ମଧ୍ୟରେ ଚଳିତ ସଂସ୍କରଣର ଉଦ୍‌ଘାଟନୀ ମୁକାବିଲା ଖେଳାଯାଇଛି। ଡଲାସର ଗ୍ରାଣ୍ଡ ପ୍ରାଇରି ଷ୍ଟାଡିୟମରେ ଗ୍ରୁପ୍‌-ଏ’ର ଏହି ମ୍ୟାଚ୍‌ ଅନୁଷ୍ଠିତ ହୋଇଛି। ପ୍ରଥମ ମ୍ୟାଚରେ ୟୁଏସ୍ ପ୍ରଥମେ ଟସ୍ ଜିତି କାନାଡାକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା । ତେବେ କାନାଡା ବ୍ୟାଟର ପ୍ରାରମ୍ଭରୁ ଜବରଦସ୍ତ ବ୍ୟାଟିଂ ପ୍ରଦର୍ଶନ କରିଥିଲେ । ନିର୍ଦ୍ଧାରିତ ୨୦ ଓଭରରେ ଦଳ ୧୯୪ ରନ କରିବାରେ ସକ୍ଷମ ହୋଇଛି । କାନାଡା ପକ୍ଷରୁ ନଭନୀତ୍ ଧିଲଓ୍ବାଲ ସର୍ବାଧିକ ୬୧ ରନ ସଂଗ୍ରହ କରିଛନ୍ତି । ନିକୋଲାସ୍ କୀର୍ତ୍ତନ ମଧ୍ୟ ଅର୍ଦ୍ଧଶତକୀୟ ପାଳି ଖେଳିଛନ୍ତି । ସେପଟେ ୧୯୫ ରନ୍‌ର ଟାର୍ଗେଟକୁ ପିଛା କରି ପ୍ରାରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଛି ୟୁଏସଏ । ଓପନର ଷ୍ଟିଭେନ୍ ଟେଲର ଶୂନ ରନ୍ କରି ପାଭେଲିୟନ ଫେରିଛନ୍ତି ।

ସେହିଭଳି ଆଜି ଦ୍ୱିତୀୟ ମୁକାବିଲାରେ ଅନ୍ୟତମ ଆୟୋଜକ ୱେଷ୍ଟଇଣ୍ଡିଜ ଓ ପାପୁଆ ନ୍ୟୁ ଗିନି ପରସ୍ପରକୁ ଭେଟିବେ। ସନ୍ଧ୍ୟା ୬ଟାରେ ବିଶ୍ୱକପ୍‌ର ଏକ ଦର୍ଶନୀୟ ଉଦ୍‌ଘାଟନୀ ଉତ୍ସବ ଅନୁଷ୍ଠିତ ହେବ ବୋଲି ଜଣାପଡ଼ିଛି। ଚଳିତ ବିଶ୍ୱକପ୍‌ରେ ୨୦ ଗୋଟି ଦଳ ଅଂଶଗ୍ରହଣ କରିଛନ୍ତି। ଏହି ୨୦ ଦଳକୁ ୪ଟି ଗ୍ରୁପ୍‌ରେ ଭାଗ କରାଯାଇଛି। ଗ୍ରୁପ୍‌ ପର୍ଯ୍ୟାୟ ପରେ ପ୍ରତି ଗ୍ରୁପ୍‌ର ଦୁଇ ଶ୍ରେଷ୍ଠ ଦଳ ସୁପର୍‌-୮କୁ ଉନ୍ନୀତ ହେବେ। ଗ୍ରୁପ୍‌-ଏ’ରେ ସ୍ଥାନ ପାଇଥିବା ଭାରତ ଜୁନ ୫ରେ ଆୟର୍ଲାଣ୍ଡ ବିପକ୍ଷରୁ ଖେଳି ବିଶ୍ୱକପ୍‌ ଅଭିଯାନ ଆରମ୍ଭ କରିବ। ଏହାପରେ ଜୁନ ୯ରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନ ବିପକ୍ଷରେ ଏକ ହାଇଭୋଲଟେଜ ମ୍ୟାଚ୍‌ ଖେଳିବ।

ମେଲବୋର୍ଣ୍ଣ: ଆଜି ଟି-୨୦ ବିଶ୍ୱକପ ଫାଇନାଲରେ ମୁହାଁମୁହିଁ ହେବେ ପାକିସ୍ତାନ ଓ ଇଂଲଣ୍ଡ । ମେଲବର୍ଣ୍ଣରେ ଖେଳାଯିବ ଫାଇନାଲ ମ୍ୟାଚ୍। ଦିନ ଗୋଟାଏ ୩୦ରେ ପାକିସ୍ତାନକୁ ଭେଟିବ ଇଂଲଣ୍ଡ। ଟ୍ରଫି ହାତେଇବାକୁ କସରତ କରିବେ ଦୁଇ ଦଳ। ତେବେ ପାକିସ୍ତାନ ଥରେ ଟି-୨୦ ବିଶ୍ୱକପ ଟାଇଟଲ ହାସଲ କରିଥିବା ବେଳେ ଇଂଲଣ୍ଡ ମଧ୍ୟ ଥରେ ବିଶ୍ୱକପ ଟାଇଟଲ ହାତେଇଛି ।

କୁହାଯାଏ କ୍ରିକେଟ ଏକ ଅନିଶ୍ଚିତ ଖେଳ। ଏଠାରେ ଚାଲିଥିବା ଟି-୨୦ ବିଶ୍ୱକପରେ କ୍ରିକେଟ ଖେଳଠାରୁ ପାକିସ୍ତାନ ଖେଳାଳିଙ୍କ ପ୍ରଦର୍ଶନ ମଧ୍ୟ ଅଧିକ ଅନିଶ୍ଚିତ ହୋଇଛି। ଏହି ଟୁର୍ଣ୍ଣାମେଣ୍ଟର ସୁପର-୧୨ରେ ଭାରତ ଓ ଜିମ୍ବାୱେଠାରୁ ପରାଜିତ ହୋଇ ପ୍ରତିଯୋଗିତାରୁ ବିଦାୟ ନେବାର ଦ୍ୱାରଦେଶରେ ପହଞ୍ଚିଥିଲା ପାକିସ୍ତାନ। କିନ୍ତୁ ଏହି ରାଉଣ୍ଡରେ ଦକ୍ଷିଣ ଆଫ୍ରିକାକୁ ନେଦରଲାଣ୍ଡ୍‍ସ ହରାଇବା ପରେ ପାକିସ୍ତାନ ତିଷ୍ଠି ରହିଥିଲା ଓ ଏହାର ପର ମ୍ୟାଚରେ ବାଂଲାଦେଶକୁ ହରାଇ ସେମିଫାଇନାଲରେ ପ୍ରବେଶ କରିଥିଲା। ଏହା ପରେ ପାକିସ୍ତାନ ଆତ୍ମବିଶ୍ୱାସ ଫେରିପାଇଥିଲା ଓ ସେମିଫାଇନାଲରେ ନ୍ୟୁଜିଲାଣ୍ଡକୁ ପରାସ୍ତ କରି ଫାଇନାଲରେ ପ୍ରବେଶ କରିଛି। ଏଠାରେ ରବିବାର ଫାଇନାଲ ମୁକାବିଲା ଇଂଲଣ୍ଡ ସହ ଅନୁଷ୍ଠିତ ହେବ। ୧୯୯୨, ଅଷ୍ଟ୍ରେଲିଆରେ ଅନୁଷ୍ଠିତ ଦିନିକିଆ ବିଶ୍ୱକପ୍‍ରେ ପାକିସ୍ତାନ ଯେତେବେଳେ ବିଦା ହେବା ସ୍ଥିତିରେ ପହଞ୍ଚିଥିଲା ଠିକ୍‍ ସେତିକିବେଳେ ଦକ୍ଷିଣ ଆଫ୍ରିକାକୁ ହରାଇ ପ୍ରତିଯୋଗିତାରେ ତିଷ୍ଠି ରହିଥିଲା।

ଏହି ଟୁର୍ଣ୍ଣାମେଣ୍ଟର ସେମିଫାଇନାଲରେ ନ୍ୟୁଜିଲାଣ୍ଡକୁ ହରାଇ ପାକିସ୍ତାନ ଫାଇନାଲରେ ପ୍ରବେଶ କରିଥିଲା। ଇମ୍ରାନ ଖାନ୍‍, ଜାଭେଦ ମିଆଁଦାଦ୍‍ ଓ ୱାସିମ ଆକ୍ରମଙ୍କ ପ୍ରଭାବୀ ପ୍ରଦର୍ଶନ ବଳରେ ପାକିସ୍ତାନ ଏହି ଟୁର୍ଣ୍ଣାମେଣ୍ଟରେ ଚାମ୍ପିଅନ୍‍ ହୋଇଥିଲା। ଏହି ଇତିହାସକୁ ପାଥେୟ କରି ବାବର ଆଜମଙ୍କ ନେତୃତ୍ୱରେ ପାକିସ୍ତାନ ନାଟକୀୟ ଭାବେ ବିଶ୍ୱକପ୍‍ ଜିତିବାକୁ ଆଶା ରଖିଛି। ଟାଇଟଲ ବିଜୟରେ ପ୍ରତିବନ୍ଧକ ହେଉଛି ଜୋଶ୍‍ରେ ଥିବା ଜୋଶ୍‍ ବଟ୍ଟଲରଙ୍କ ଇଂଲଣ୍ଡ ଦଳ। ଏହି ଦଳରେ ଅଛନ୍ତି ଏକାଧିକ ମ୍ୟାଚ୍‍ ବିଜେତା ଓ ସବୁଠାରୁ ବଡ଼ କଥା ହେଉଛି ଇଂଲଣ୍ଡ ଖେଳାଳିଙ୍କ ମାନସିକତା। ବଟ୍ଟଲର, ଆଲେକ୍ସ ହେଲ୍ସ, ବେନ ଷ୍ଟୋକ୍ସ, ମୋଇନ ଅଲିଙ୍କ ପରି ପ୍ରତିଷ୍ଠିତ ଖେଳାଳି ଅଛନ୍ତି। ଏହି ଦଳ ନିକଟରେ ନିର୍ଭୟରେ ଖେଳିବାର ମାନସିକତା ରହିଛି। ଏମାନେ ସେମିଫାଇନାଲରେ ଭାରତ ବିପକ୍ଷରେ ୧୦ ୱିକେଟରେ ଜିତି ଏହାକୁ ଦେଖାଇ ସାରିଛନ୍ତି। ନିକଟରେ ଏହି ଦଳ ଏକାଧିକ ବିଶ୍ୱକପ୍‍ ଜିତିବାରେ ସମର୍ଥ ହୋଇଛି। ଇଓନ ମୋର୍ଗାନଙ୍କ ନେତୃତ୍ୱରେ ଇଂଲଣ୍ଡ ଘରୋଇ ମାଟିରେ ଅନୁଷ୍ଠିତ ୨୦୧୯ ଦିନିକିଆ ବିଶ୍ୱକପ୍‍ରେ ଚାମ୍ପିଅନ୍‍ ହୋଇଥିଲା। ଏଣୁ ଫର୍ମ, ଆତ୍ମବିଶ୍ୱାସ, ଆକ୍ରମଣାତ୍ମକ ଖେଳ ଓ ଦକ୍ଷତାରେ ଇଂଲଣ୍ଡ ଦଳ ସାମାନ୍ୟ ଆଗୁଆ ରହିଛି।

ଫାଇନାଲ ଜିତିବାକୁ ଇଂଲଣ୍ଡ ନିକଟରେ ସମସ୍ତ ଅସ୍ତ୍ର ଥିଲେ ମଧ୍ୟ ପାକିସ୍ତାନକୁ ଆଦୌ ଅଣ ଦେଖା କରି ହେବ ନାହିଁ। ଦଳର ଷ୍ଟାର ଓପନର ବାବର ଆଜମ ଓ ମହମ୍ମଦ୍‍ ରିଜୱାନ ସେମିଫାଇନାଲରେ ଫର୍ମକୁ ଫେରିଛନ୍ତି। ବିଶ୍ୱରେ ଏହି ଯୋଡି ଏବେ ସବୁଠାରୁ ସଫଳ ଯୋଡି ଭାବେ ବିବେଚିତ। ମହମ୍ମଦ ହାରିସ୍‍, ଇଫତିକର ଅହମ୍ମଦ୍‍ ଓ ସାନ ମାସୁଦ ମଧ୍ୟ ଏମାନଙ୍କୁ ସାଥ୍‍ ଦେବାକୁ ଅଛନ୍ତି। ଫାଷ୍ଟ ବୋଲର ସାହିନ ଆଫ୍ରିଦୀ ଗୋଟିଏ ସ୍ପେଲରେ ମ୍ୟାଚ୍‍ ଜିତାଇବାର ଅନେକ ନଜର ରହିଛି। ସେ ଏବେ ଟପ୍‍ ଫର୍ମରେ। ହାରିସ୍‍ ରୌଫ୍‍ଙ୍କ ସହ ନସୀମ ଶାହ କିମ୍ବା ମହମ୍ମଦ୍‍ ୱାସିମ ଜୁନିଅର ମଧ୍ୟ ବେଶ ପ୍ରଭାବ ପକାଇଛନ୍ତି। ଦୁଇ ସ୍ପିନର ସାଦାବ ଖାନ୍‍ ଓ ମହମ୍ମଦ ନୱାଜଙ୍କୁ ଖେଳିବା କଷ୍ଟକର। ଏମାନଙ୍କ ଫର୍ମ ସହ ଇତିହାସ ପାକିସ୍ତାନ ସପକ୍ଷରେ ରହିଛି।

ଆଡିଲେଡ୍‌: ଟି୨୦ ବିଶ୍ୱକପର ଦ୍ଵିତୀୟ ସେମିଫାଇନାଲ ମ୍ୟାଚରେ ଇଂଲଣ୍ଡଠାରୁ ଅତି ଶୋଚନୀୟ ଭାବେ ହାରିଛି ଭାରତ । ଇଂଲଣ୍ଡ ହାତରୁ ପରାଜୟ ପରେ ଭାରତୀୟ ଦଳର ବିଜୟ ଯାତ୍ରା ଅଭିଯାନ ସମାପ୍ତ ହେବା ସହ ବିଶ୍ଵ କପ୍ ଜିତିବା ସ୍ଵପ୍ନ ଧୂଳିସାତ ହୋଇଛି। ତେବେ ମ୍ୟାଚ୍‌ ପରେ ଭାବ ବିହ୍ଵଳ ଦୃଶ୍ୟ ଦେଖିବାକୁ ମିଳିଛି। ଭାରତୀୟ ଦଳର ଅଧିନାୟକ ରୋହିତ ଶର୍ମାଙ୍କ ଆଖି ଛଳ ଛଳ ହୋଇ ଉଠିଛି। ଡଗ୍ ଆଉଟ୍‌ରେ ବସି ରୋହିତ ନିଜ ଆଖିର ଲୁହ ପୋଛୁଥିବା ଦେଖିବାକୁ ମିଳିଛି।

ମ୍ୟାଚ୍ ସରିବା ପରେ ଯେବେ ଭାରତୀୟ ଦଳର ଖେଳାଳି ଇଂଲଣ୍ଡ ଖେଳାଳିଙ୍କ ସହ ହାତ ମିଳାଇ ଡଗ୍ ଆଉଟ୍‌ରେ ପହଞ୍ଚିଲେ, ସେହି ସମୟରେ ରୋହିତ ଶର୍ମା ବହୁତ ଭାବୁକ ହୋଇ ପଡିଥିଲେ। ବହୁ ସମୟ ଧରି ରୋହିତ ଶର୍ମାଙ୍କୁ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡଙ୍କ ସହ ଆଲୋଚନା କରୁଥିବା ଦେଖିବାକୁ ମିଳିଛି। ଆଲୋଚନା ପରେ ରୋହିତ ଶର୍ମା ବହୁତ ଭାବୁକ ହୋଇ ପଡିଥିଲେ ଏବଂ କୋଚ୍ ରାହୁଲ ଦ୍ରାବିଡ ତାଙ୍କୁ ସମ୍ଭାଳୁଥିବା ଦେଖିବାକୁ ମିଳିଥିଲା। ଅନ୍ୟପଟେ ଟିମ୍ ଇଣ୍ଡିଆର ପୂର୍ବତନ କ୍ୟାପଟେନ୍ ବିରାଟ କୋହଲି ମଧ୍ୟ ପଡିଆରେ ଖୁବ୍ ନିରାଶ ଥିବା ଜଣାପଡୁଥିଲେ।

pic.twitter.com/Suz9nHjpTs

— Tanay Vasu (@videoformtanay) November 10, 2022

୧୬୯ ରନର ବିଜୟ ଲକ୍ଷ୍ୟ ପିଛା କରିଥିବା ଇଂଲଣ୍ଡ ଦଳର ଦୁଇ ଓପନର ଆଲେକ୍ସ ହେଲ୍ସ ଏବଂ ଅଧିନାୟକ ଜୋସ୍ ବଟଲର ଦୃଢତାର ସହ ବ୍ୟାଟିଂ ଆରମ୍ଭ କରିଥିଲା। ନିଜର ଖ୍ୟାତି ଅନୁସାରେ ବ୍ୟାଟିଂ କରି ଦୁଇ ବ୍ୟାଟସମ୍ୟାନ ଭାରତୀୟ ବୋଲରଙ୍କୁ ଆରମ୍ଭରୁ ନିର୍ମମ ପ୍ରହାର କରିଥିଲେ। ଏପରିକି ପ୍ରତିପକ୍ଷ ବୋଲରଙ୍କୁ କୌଣସି ସୁଯୋଗ ବି ଦେଇନଥିଲେ। ପ୍ରଥମେ ଅର୍ଦ୍ଧଶତକୀୟ, ପୁଣି ଶତକୀୟ ଭାଗିଦାରୀ ଯୋଡି ହେଲ୍ସ ଏବଂ ବଟଲର ଇଂଲଣ୍ଡର ବିଜୟକୁ ସହଜ କରିଥିଲେ। ଏହି କ୍ରମରେ ଦୁଇ ବ୍ୟାଟସମ୍ୟାନ ନିଜର ଅର୍ଦ୍ଧଶତକ ପୂରଣ କରିଥିଲେ। ଭାରତୀୟ ବୋଲର ଏମିତି ଦୟନୀୟ ବୋଲିଂ କରିଥିଲେ ଯେ, ବିରୋଧୀ ଦଳର ଗୋଟିଏ ହେଲେ ଓ୍ଵିକେଟ୍ ହାସଲ କରିପାରିନଥିଲେ। ସମସ୍ତ ବୋଲର ଇଂରେଜର ଦୁଇ ଓପନଙ୍କ ସମ୍ମୁଖରେ ସଂପୂର୍ଣ୍ଣ ଫିକା ପଡି ଯାଇଥିଲେ। ପରିଶେଷରେ ଇଂଲଣ୍ଡ ୧୬ ଓଭରରେ କୌଣସି ଓ୍ଵିକେଟ୍ ନହରାଇ ଅନାୟସରେ ୧୬୯ ରନର ବିଜୟ ଲକ୍ଷ୍ୟ ହାସଲ କରି ନେଇଛି। ଏପରିକି ଆହୁରି ୨୪ଟି ବଲ ବାକିଥାଇ ଇଂଲଣ୍ଡ ନିଜର ଲକ୍ଷ୍ୟ ହାସଲ କରି ନେଇଥିଲା । ମ୍ୟାଚର ଉଭୟ ବ୍ୟାଟିଂ ଓ ବୋଲିଂରେ ଇଂଲଣ୍ଡ ଦଳ ଭାରତ ଉପରେ ପ୍ରଭାବ ବିସ୍ତାର କରି ଖେଳିଥିଲା ।