ନୂଆଦିଲ୍ଲୀ: ଜଣେ ବ୍ୟକ୍ତିର ପରିଚୟକୁ ଶାରୀରିକ ଭାବେ କିମ୍ବା ଇଲେକ୍ଟ୍ରୋନିକ୍ ରୂପରେ ପ୍ରମାଣିତ କରିବା ପାଇଁ ଆଧାର ସ୍ୱୀକାର କରିବା ପୂର୍ବରୁ, ସଂସ୍ଥାଗୁଡ଼ିକୁ ସେମାନଙ୍କ ଆଧାର ଯାଞ୍ଚ କରିବା ଉଚିତ୍। ଏ ନେଇ ଭାରତୀୟ ଏକକ ପରିଚୟ ପ୍ରାଧିକରଣ (ୟୁଆଇଡିଏଆଇ) ପକ୍ଷରୁ ରାଜ୍ୟଗୁଡିକୁ ଗୁରୁବାର ପରାମର୍ଶ ଦିଆଯାଇଛି।

ୟୁଆଇଡିଏଆ କହିଛି ଯେ, ଆଧାରଧାରକଙ୍କ ସହମତି ପରେ ଜଣେ ବ୍ୟକ୍ତିଙ୍କ ଦ୍ୱାରା ଉପସ୍ଥାପିତ ଆଧାର ନମ୍ବରର ଯାଞ୍ଚ, ଆଧାରର ଯେକୌଣସି ପ୍ରକାରର ରୂପ (ଆଧାର ପତ୍ର, ଇ-ଆଧାର, ଆଧାର ପିଭିସି କାର୍ଡ ଏବଂ ଏମ୍-ଆଧାର)ର ଯାଞ୍ଚ ସତ୍ୟତା ପ୍ରମାଣିତ କରିବା ନିମନ୍ତେ ଉପଯୁକ୍ତ ପଦକ୍ଷେପ। ଏହା ଅସାଧୁ ଏବଂ ସମାଜ ବିରୋଧୀ ତତ୍ତ୍ୱମାନଙ୍କ ଦ୍ବାରା ଆଧାରର ଯେକୌଣସି ସମ୍ଭାବ୍ୟ ଅପବ୍ୟବହାର ରୋକିବାରେ ସହାୟକ ହେବ। ଏହାର ବ୍ୟବହାର ସ୍ୱଚ୍ଛତାକୁ ମଧ୍ୟ ପ୍ରୋତ୍ସାହିତ କରିବ। ୟୁଆଇଡିଏଆଇର ପକ୍ଷରୁ ଗୁରୁତ୍ବାରୋପ କରି କୁହାଯାଇଛି ଯେ କୌଣସି ୧୨ ଅଙ୍କ ବିଶିଷ୍ଟ ସଂଖ୍ୟା ଆଧାର ନୁହେଁ । ଆଧାର ତଥ୍ୟ ଗୁଡିକର ଅଫଲାଇନ୍ ଯାଞ୍ଚ ଦ୍ୱାରା ଟ୍ୟାମ୍ପରିଂକୁ ଚିହ୍ନଟ କରାଯାଇପାରିବ। ଟ୍ୟାମ୍ପରିଂ ଏକ ଦଣ୍ଡନୀୟ ଅପରାଧ ଏବଂ ଆଧାର ଅଧିନିୟମର ଧାରା ୩୫ ଅନୁଯାୟୀ ଏଥିପାଇଁ ଦଣ୍ଡବିଧାନ ବ୍ୟବସ୍ଥା ରହିଛି। ବ୍ୟବହାର ପୂର୍ବରୁ ଆଧାର ଯାଞ୍ଚର ଆବଶ୍ୟକତା ଉପରେ ଗୁରୁତ୍ୱ ଦେବା ଉପରେ ୟୁଆଇଡିଏଆଇ ରାଜ୍ୟ ସରକାର ମାନଙ୍କୁ ଅନୁରୋଧ କରିଛନ୍ତି ଏବଂ ଆବଶ୍ୟକ ନିର୍ଦ୍ଦେଶ ଦେବାକୁ ରାଜ୍ୟ ମାନଙ୍କୁ ଅନୁରୋଧ କରିଛନ୍ତି।

ଯେତେବେଳେ ବି ଆଧାର ପରିଚୟପତ୍ର ପ୍ରମାଣ ଭାବରେ ଦାଖଲ ହେବ, ଲୋକମାନଙ୍କର ପ୍ରାମାଣୀକରଣ/ଯାଞ୍ଚ ସମ୍ପୃକ୍ତ ସଂସ୍ଥା ଦ୍ୱାରା କରାଯିବା ପରେ ଏକକ ପରିଚୟ ତଥ୍ୟ ଭାବରେ ଆଧାରକୁ ବ୍ୟବହାର କରାଯିବ। ପ୍ରାମାଣୀକରଣ/ଯାଞ୍ଚ ନିମନ୍ତେ ସ୍ୱୀକୃତିପ୍ରାପ୍ତ ଏବଂ ଅନ୍ୟାନ୍ୟ ସଂସ୍ଥାଗୁଡିକ ଗୁରୁତ୍ୱ ଦେବା ଏବଂ ଏ ଦିଗରେ ଅନୁସରଣ କରାଯିବାକୁ ଥିବା ପ୍ରୋଟୋକଲ୍ ପାଳନ କରିବା ପାଇଁ ୟୁଆଇଏଡିଆଇ ପକ୍ଷରୁ ସର୍କୁଲାର୍ ଜାରି କରାଯାଇଛି। ଯେ କୌଣସି ଆଧାରକୁ ଏମ୍-ଆଧାର ଆପ୍, କିମ୍ବା ଆଧାର କ୍ୟୁଆର୍ କୋଡ୍ ସ୍କାନର୍ ବ୍ୟବହାର କରି ଆଧରର ସମସ୍ତ ପ୍ରକାର (ଆଧାର ପତ୍ର, ଇ-ଆଧାର, ଆଧାର ପିଭିସି କାର୍ଡ, ଏବଂ ଏମ୍ – ଆଧାର)ରେ ଉପଲବ୍ଧ କ୍ୟୁଆର୍ କୋର୍ଡକୁ ବ୍ୟବହାର କରି ଯାଞ୍ଚ କରାଯାଇପାରିବ। ଉଭୟ ଆଣ୍ଡ୍ରୋଏଡ୍ ଏବଂ ଆଇଓଏସ୍ ଆଧାରିତ ମୋବାଇଲ୍ ଫୋନ୍ ତଥା ୱିଣ୍ଡୋ ଆଧାରିତ ଆପ୍ ଗୁଡ଼ିକ ପାଇଁ କ୍ୟୁଆର୍ କୋଡ୍ ସ୍କାନର୍ ସ୍ୱତନ୍ତ୍ର ଭାବରେ ଉପଲବ୍ଧ।

ଲୋକମାନେ କାଗଜ କିମ୍ବା ଇଲେକ୍ଟ୍ରୋନିକ୍ ରୂପରେ ନିଜର ପରିଚୟପତ୍ର ଉପସ୍ଥାପନ କରି ନିଜର ପରିଚୟ ପ୍ରମାଣ କରିବା ପାଇଁ ସ୍ୱେଚ୍ଛାକୃତ ଭାବରେ ଆଧାର ନମ୍ବର ବ୍ୟବହାର କରିପାରିବେ। ପୂର୍ବରୁ ଲୋକମାନଙ୍କ ପାଇଁ କ’ଣ କରିବା ଉଚିତ ଓ ଅନୁଚିତ, ସେ ସମ୍ପର୍କରେ ୟୁଆଇଡିଏଆଇ ପକ୍ଷରୁ ତଥ୍ୟ ଜାରି କରାଯାଇସାରିଛି। ଲୋକମାନେ ସେମାନଙ୍କର ଆଧାରକୁ ଆତ୍ମବିଶ୍ୱାସର ସହିତ ବ୍ୟବହାର କରିପାରିବେ ।

ନୂଆଦିଲ୍ଲୀ: ଏଣିକି ଆଧାର ବ୍ୟବହାର କରି ଆପଣ ୟୁପିଆଇ କାରବାର କରିପାରିବେ। ଅନଲାଇନ ପେମେଣ୍ଟ ଆପ୍ ଫୋନ୍‌ ପେ ଏବେ ଆଧାର ଦ୍ବାରା ୟୁପିଆଇ ସେବା ଆରମ୍ଭ କରିଛି। ଏହି ନୂଆ ସେବା ଦ୍ବାରା ଆଧାରକୁ ୟୁପିଆଇ ସହ ସଂଯୋଗ କରି କାରବାର କରିହେବ। ଏଥିରେ ଆଧାର ସାହାଯ୍ୟରେ ଓଟିପି ଭେରିଫାଇ ହୋଇ କାରବାର ସମ୍ପନ୍ନ ହେବ। ବର୍ତ୍ତମାନ ୟୁପିଆଇ ସର୍ଭିସ ପାଇଁ ୟୁଜରଙ୍କୁ ବାଧ୍ୟତାମୂଳକ ଭାବରେ ଏକ ବୈଧ ଡେବିଟ୍ କାର୍ଡ ନମ୍ବର ଦେବାକୁ ପଡ଼ିଥାଏ। ଓଟିପି ଭେରିଫାଇ ପାଇଁ ଡେବିଟ୍ କାର୍ଡ ଆବଶ୍ୟକ ହୋଇଥାଏ। ପୁଣି ଏହାଦ୍ବାରା ୟୁପିଆଇ ଆପ୍ଲିକେସନ ଆରମ୍ଭ ହୋଇଥାଏ। କିନ୍ତୁ ଫୋନ୍ ପେ ଆଧାର ଦ୍ବାରା ୟୁପିଆଇ କାରବାର ଆରମ୍ଭ କରିବାର ସୁବିଧା ଦେଉଛି। କାରଣ ଗୋଟିଏ ଆଧାରରେ ଅନେକ ବ୍ୟାଙ୍କ ଯୋଡ଼ି ହୋଇଥାଏ ଯାହାର ଫାଇଦା ୟୁପିଆଇରେ ମିଳିଥାଏ।

ଏ ସମ୍ପର୍କରେ ଫୋନ୍ ପେ ପକ୍ଷରୁ କୁହାଯାଇଛି ଯେ ଆଧାର କାର୍ଡ ଅଥଣ୍ଟିକେସନ ଦ୍ବାରା ଡେବିଟ୍ କାର୍ଡର ବାଧ୍ୟତା ଶେଷ ହୋଇଥାଏ। ଏଥିରେ କେବଳ ୟୁପିଆଇ ସହ ଆଧାର ନମ୍ବର ଯୋଡ଼ିବାକୁ ପଡ଼ିଥାଏ। ଏହାର ଫାଇଦା ଉପାନ୍ତ ଅଞ୍ଚଳରେ ବସବାସ କରୁଥିବା ଲୋକେ ପାଇପାରିବେ, ଯେଉଁଠାରେ ବ୍ୟାଙ୍କ ଶାଖା ଖୁବ୍‌ କମ୍ ରହିଥାଏ ବା ଦୂରରେ ରହିଥାଏ। ଏଭଳି ଲୋକ ଆଧାର ସହ ଡିଜିଟାଲ କାରବାରର ଲାଭ ଉଠାଇପାରିବେ। ଏହି ପ୍ରକ୍ରିୟା ଆରମ୍ଭ କରିବା ପାଇଁ ୟୁଜରଙ୍କୁ ୟୁପିଆଇ ଆପ୍‌ରେ ନିଜର ଆଧାର ନମ୍ବର ଦେବାକୁ ହେବ। ଏହାପରେ ୟୁପିଆଇ ତରଫରୁ ଫୋନ୍‌ରେ ଏକ ଓଟିପି ମିଳିବ। ଆଧାର ସହ ସଂଯୋଗ ଥିବା ବ୍ୟାଙ୍କରୁ ମଧ୍ୟ ଓଟିପି ଆସିବ ଯାହାକୁ ଭେରିଫିକେସନ ଦେବାକୁ ହେବ। ଭେରିଫିକେସନ ହେବା ପରେ ଫୋନ ପେ’ ରେ ପେମେଣ୍ଟ ସେବା ଆରମ୍ଭ ହୋଇଯିବ। ତେବେ ଏକଥାର ଧ୍ୟାନ ରଖିବାକୁ ହେବ ଯେ ଆଧାର ସହ ୟୁପିଆଇ ଚଳାଇବା ପାଇଁ ୟୁଜରଙ୍କ ମୋବାଇଲ ନମ୍ବର ତାଙ୍କ ଆଧାର ସହ ଲିଙ୍କ୍ ହୋଇଥିବା ଦରକାର। ଏହ ସହ ବ୍ୟାଙ୍କ ଖାତା ସହ ମଧ୍ୟ ଆଧାର ଲିଙ୍କ୍ ହୋଇଥିବା ଦରକାର।

ଭୁବନେଶ୍ୱର: ମିଠା ମିଠା କଥା କହି ଫସାଉଛନ୍ତି; ବାହା ବି ହେଉଛନ୍ତି। ବାହା ହେବା ପରେ ଜଣା ପଡୁଛି ପୂର୍ବ ବିବାହ କଥା। ଏମିତି ଏକାଧିକ ମାମଲା ରାଜ୍ୟ ମହିଳା କମିସନଙ୍କ ନିକଟରେ ପହଞ୍ଚିବା ପରେ ବିବାହର ବାଧ୍ୟତାମୂଳକ ପଞ୍ଜୀକରଣ ସହ ବିବାହ ପ୍ରମାଣପତ୍ରକୁ ଆଧାର ପ୍ରମାଣପତ୍ର ସହ ଯୋଡ଼ିବା ପାଇଁ ଯୋଜନା ପ୍ରସ୍ତୁତ ହୋଇଛି। ଏ ନେଇ ରାଜ୍ୟ ମହିଳା କମିସନ ପ୍ରସ୍ତାବ ଦେବା ପରେ ଜାତୀୟ ମହିଳା କମିସନ ଏହାକୁ ସ୍ବାଗତ କରିଛନ୍ତି। ଯଦି ଓଡ଼ିଶାର ପ୍ରସ୍ତାବ କାର୍ଯ୍ୟକାରୀ ହୁଏ ତେବେ ଏକାଧିକ ବିବାହ ସମ୍ପର୍କରେ ଜଣାପଡ଼ିବ। ବିବାହ ପୂର୍ବରୁ ଝିଅ କିମ୍ବା ପୁଅ ସମ୍ପର୍କରେ ତଥ୍ୟ ମିଳିଲେ ଏକାଧିକ ଥର ବିବାହକୁ ରୋକାଯାଇପାରିବ ବୋଲି ମହିଳା କମିସନ ଦୃଢ଼ ଆଶାବାଦୀ ଅଛନ୍ତି। ପ୍ରସ୍ତାବ ଅନୁସାରେ ଦେଶ ପାଇଁ ଏକକ ବିବାହ ପ୍ରମାଣପତ୍ର ବ୍ୟବସ୍ଥା ରହିବ ବୋଲି ରାଜ୍ୟ ମହିଳା କମିସନ ଅଧ୍ୟକ୍ଷା ମିନତୀ ବେହେରା କହିଛନ୍ତି।

ପ୍ରସ୍ତାବ କେମିତି କାର୍ଯ୍ୟକାରୀ ହେବ ସେ ନେଇ ପୂରା ନକ୍ସା ପ୍ରସ୍ତୁତ ହୋଇଛି। ରାଜ୍ୟର ପ୍ରସ୍ତାବ ଅନୁସାରେ ବିବାହ ପଞ୍ଜୀକରଣ ବାଧ୍ୟତାମୂଳକ ହେବ। ସମସ୍ତଙ୍କ ପାଖରେ ବିବାହ ପଞ୍ଜୀକରଣ ପ୍ରମାଣ ପତ୍ର ରହିବ। ଏହି ଡୋମେନରେ ସମସ୍ତଙ୍କ ବିବାହ ସମ୍ପର୍କିତ ତଥ୍ୟ ରହିଲେ ଯାଞ୍ଚ୍ ବେଳେ ବିବାହ ସମ୍ପର୍କିତ ତଥ୍ୟ ଜଣାପଡ଼ିବ। ସରକାରଙ୍କ ତରଫରୁ ପ୍ରତି ଜିଲ୍ଲାପାଳଙ୍କ କାର୍ଯ୍ୟାଳୟରେ ସେଲ୍‌ ଖୋଲି ବିବାହ ପଞ୍ଜୀକରଣକୁ ବାଧ୍ୟତାମୂଳକ କରାଯିବା ଆବଶ୍ୟକ। ଏହାଦ୍ୱାରା କିଏ କେଉଁଠି ବିବାହ କରିଛନ୍ତି, ତାହାର ସମସ୍ତ ସୂଚନା ଗୋଟେ କ୍ଲିକ୍‍ରେ ଜାଣିହେବ। ଯାହାର ଆଧାରରେ ପ୍ରତି ଜିଲ୍ଲାପାଳଙ୍କ ଅଫିସରେ ଏକ ମ୍ୟାରେଜ୍‍ ରେଜିଷ୍ଟ୍ରେସନ୍‍ ସାର୍ଟିଫିକେଟ୍‍ ଅଫିସ୍‍ କରାଯିବ। ଯେଉଁଠି ଦମ୍ପତ୍ତିମାନେ ନିଜର ଆଧାରକାର୍ଡ ଦେଖାଇ ବିବାହ ସାର୍ଟିଫିକେଟ୍‍ ପାଇଁ ଆବେଦନ କରିପାରିବେ। ପରବର୍ତ୍ତୀ ସମୟରେ ଆଧାରକାର୍ଡ ଓ ବିବାହ ପଞ୍ଜିକୃତ ସାର୍ଟିଫିକେଟ୍‍କୁ ଏକାଠି ଲିଙ୍କ କରି ଗୋଟିଏ ପ୍ଲାଟ୍‍ଫର୍ମରେ ରଖାଯିବାକୁ ପ୍ରସ୍ତାବ ଦିଆଯାଇଥିବା ଶ୍ରୀମତୀ ବେହେରା କହିଛନ୍ତି।

ବୈବାହିକ ସ୍ଥିତି ସମ୍ପର୍କରେ ତଥ୍ୟ ନ ଜାଣି ସମ୍ପର୍କ ଆଗକୁ ଯାଉଛି। ଏହି ସମ୍ପର୍କ ଆଗକୁ ଯାଇ ଅପରାଧରେ ପହଞ୍ଚୁଛି। ପରକୀୟା ପ୍ରୀତିକୁ ନେଇ ନିକଟରେ ଗ୍ଲିଡେନ୍‍ (ଡେଟିଂ ଆପ୍‍) ପକ୍ଷରୁ କରାଯାଇଥିବା ସର୍ଭେ ଅନୁସାରେ ପରକୀୟାର ସଂଖ୍ୟା ଦିନକୁ ଦିନ ବଢୁଛି। ମେଟ୍ରୋସିଟି ସମେତ ରାଜଧାନୀ ଭୁବନେଶ୍ବରରେ ମଧ୍ୟ ଏହି ମାମଲା ସାମ୍ନାକୁ ଆସିଛି। ବୈବାହିକ ସ୍ଥିତି ସମ୍ପର୍କରେ କୌଣସି ତଥ୍ୟ ଉପଲବ୍ଧ ହେଉ ନ ଥିବାରୁ ଅନେକ ସମୟରେ ମହିଳାମାନେ ଫସିଯାଉଛନ୍ତି। ରାଜ୍ୟ ବାହାରୁ ପ୍ରସ୍ତାବ ଆସିଲେ କିମ୍ବା ନିଜ ଅଞ୍ଚଳ ବାହାରୁ ପ୍ରସ୍ତାବ ଆସିଲେ ବିବାହକୁ ନେଇ ସବୁ ତଥ୍ୟ ଜାଣିବା କଷ୍ଟକର ହୋଇପଡୁଛି। ରାଜ୍ୟ ବାହାରେ ବିବାହ କରି ଅନେକ ଝିଅ ହଇରାଣ ହେଉଥିବା ମାମଲା ସାମ୍ନାକୁ ଆସୁଛି।

ମହିଳା ହିଂସା ବଢ଼ିଛି ବୋଲି କହିବା କଷ୍ଟକର। କିନ୍ତୁ ସଚେତନତା ବଢୁଥିବାରୁ ଅନେକ ଅଭିଯୋଗ ଆସୁଛି। ନିର୍ଯାତିତ ମହିଳା ପୁଲିସ, ମହିଳା କମିସନ, କୋର୍ଟଙ୍କ ଦ୍ବାରସ୍ଥ ହେଉଛନ୍ତି। ବିବାହକୁ ସୁରକ୍ଷିତ କରିବା ପାଇଁ ରାଜ୍ୟ ମହିଳା କମିସନଙ୍କ ପ୍ରସ୍ତାବକୁ ଜାତୀୟ ମହିଳା କମିସନ ସ୍ବାଗତ କରିଥିବାରୁ ଏ ନେଇ ଗୁରୁତ୍ବପୂର୍ଣ୍ଣ ପଦକ୍ଷେପ ନିଆଯିବା ନେଇ ସମ୍ଭାବନା ସୃଷ୍ଟି ହୋଇଛି।