ଭୁବନେଶ୍ୱର: ଭୀଷଣ ବାତ୍ୟାର ରୂପନେଲା ବାତ୍ୟା ମୋନ୍ଥା । ସମୁଦ୍ରରୁ ଶକ୍ତି ସଂଗ୍ରହ କରି ସ୍ଥଳଭାଗକୁ ମାଡ଼ି ଆସୁଛି ବାତ୍ୟା ମୋନ୍ଥା । ଘଣ୍ଟା ପ୍ରତି ୧୫ କିଲୋମିଟର ବେଗରେ ଆଗକୁ ବଢୁଛି । ମଚ୍ଛଲିପଟ୍ଟନମରୁ ୧୯୦ କିମି ଦୂରରେ ରହିଛି ବାତ୍ୟା । କାକିନାଡ଼ାରୁ ୨୭୦ କିମି ଦୂରରେ ବାତ୍ୟା ମୋନ୍ଥା । ବିଶାଖାପଟ୍ଟନମରୁ ୩୪୦ କିମି ଦୂରରେ ରହିଛି ବାତ୍ୟା । ଗୋପାଳପୁରରୁ ୫୫୦ କିମି ଦୂରରେ ରହିଛି । ଆଜି ସନ୍ଧ୍ୟାରୁ ରାତି ଭିତରେ ବାତ୍ୟା କାକିନାଡ଼ାରେ ଲ୍ୟାଣ୍ଡଫଲ୍ କରିବ। ଏହାର ପ୍ରଭାବରେ ଆନ୍ଧ୍ରପ୍ରଦେଶର ଉପକୂଳ ଅଞ୍ଚଳରେ ପ୍ରବଳରୁ ଅତି ପ୍ରବଳ ବର୍ଷା ଲାଗି ରହିଛି । ସନ୍ଧ୍ୟା ୫ଟାରୁ ରାତି ୮ଟା ଭିତରେ କୋନାସୀମାରେ ଲ୍ୟାଣ୍ଡଫଲ୍ କରିପାରେ ଭୀଷଣ ବାତ୍ୟା ମୋନ୍ଥା । ଲ୍ୟାଣ୍ଡଫଲ ପରେ ଉତ୍ତରପଶ୍ଚିମ ଦିଗରେ ଗତି କରି ଦୁର୍ବଳ ହେବ ବାତ୍ୟା ମୋନ୍ଥା । ଛତିଶଗଡ଼ ମୁହାଁ ହୋଇ ଦୂର୍ବଳ ହେବ ।

ବାତ୍ୟା ମୋନ୍ଥା ପ୍ରଭାବରେ ସମୁଦ୍ର ଅଶାନ୍ତ ରହିଛି । ପବନର ବେଗ ବଢ଼ିବା ସହିତ ସମୁଦ୍ରରେ ଆସୁଛି ଉଚ୍ଚ ଉଚ୍ଚ ଜୁଆର। ବେଳାଭୂମି ରାସ୍ତା ଉପରକୁ ମାଡ଼ି ଆସୁଛି ସମୁଦ୍ର ପାଣି। ଘଣ୍ଟାକୁ ୯୦ରୁ୧୦୦ କିଲୋମିଟର ବେଗରେ ପବନ ବହୁଛି । ଝଟକା ପବନର ବେଗ ରହିଛି ୧୧୦ କିଲୋମିଟର । 

ବାତ୍ୟା ପ୍ରଭାବରେ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ଛେଚୁଛି। ଲଗାଣ ବର୍ଷା ଯୋଗୁଁ ବିଭିନ୍ନ ଜଳାଭଣ୍ଡାର ଗୁଡ଼ିକ ଫୁଲିବାରେ ଲାଗିଛି। ବାତ୍ୟା ପାଇଁ ୮ଟି ଜିଲ୍ଲା ମାଲକାନଗିରି, କୋରାପୁଟ, ନବରଙ୍ଗପୁର, ଗଞ୍ଜାମ, ଗଜପତି, ରାୟଗଡ଼ା, କନ୍ଧମାଳ ଓ କଳାହାଣ୍ଡି ଅଧିକ ପ୍ରଭାବିତ ହେବା ଆଶଙ୍କା ଅଛି । ଆସନ୍ତା ୨ଦିନ ଏସବୁ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ରହିଛି ।

ଭୁବନେଶ୍ବର: ପାଣିପାଗ ବିଭାଗର ପୂର୍ବାନୁମାନ ମୁତାବକ ଆଗାମୀ ସମ୍ଭାବ୍ୟ ବାତ୍ୟା 'ମୋନ୍ଥା' ପାଇଁ ସମ୍ପୂର୍ଣ୍ଣ ପ୍ରସ୍ତୁତ ହୋଇ ରହିଛି ଅଗ୍ନିଶମ ଓ ଜରୁରୀକାଳୀନ ସେବା। ଓଡ଼ିଶାରେ ଭୁସ୍ଖଳନ ବା ଲ୍ୟାଣ୍ଡ ସ୍ଲାଇଡ଼ ହେବା ଗୋଟିଏ ବଡ଼ ଚ୍ୟଲେଞ୍ଜ ସୃଷ୍ଟି ହୋଇପାରେ। ବାତ୍ୟା ଠାରୁ ପ୍ରବଳ ବର୍ଷା ଅଧିକ ସମସ୍ୟା ଆଣିପାରେ। କଳିଙ୍ଗା ଘାଟି, ମାଲକାନଗିରିର କେତେକ ସ୍ଥାନ  ଥୁଆମୂଳ ରାମପୁରରେ ଏଭଳି ଲ୍ୟାଣ୍ଡ ସ୍ଲାଇଡ଼ ବା ମାଟି ଅତଡା ଖସୁଥିବାକ ଦେଖାଯାଇଛି। ସେଥିପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଛି ଟିମ। ପାଣିରୁ ଉଦ୍ଧାର ପାଇଁ ବ୍ୟାପକ ଡ଼ଙ୍ଗାର ବ୍ୟବସ୍ଥା ହୋଇଛି। ବୁଡି ଯାଉଥିବା ଲୋକଙ୍କୁ ଉଦ୍ଧାର ପାଇଁ ଅଭିଜ୍ଞ ଫାୟାର ଅଫିସରଙ୍କୁ ଦାୟିତ୍ୱ  ଦିଆଯାଇଛି। ପର୍ଯ୍ୟଟକଙ୍କ ପାଇଁ ସମ୍ପୂର୍ଣ୍ଣ ବ୍ୟବସ୍ଥା କରାଯାଇଛି। ପୁରୀରେ ୧୦୦ ଲାଇଫଗାର୍ଡ ଅଛନ୍ତ । ସେହିପରି ଗୋପାଳପୁରରେ ମଧ୍ୟ ଲାଇଫଗାର୍ଡ ରହିଛନ୍ତି। ଗଜପତି, ମାଲକାନଗିରି, ବ୍ରହ୍ମପୁର, କୋରାପୁଟ ୧୩୦ ଟି ଟିମ ଯାଇଛି। ବାତ୍ୟାର ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଅଛି ଟିମ। ଫାୟାର ଫାଇଟିଂ ପାଇଁ ଅତ୍ୟାଧୁନିକ ଜ୍ଞାନକୌଶଳର ବ୍ୟବହାର କରାଯାଇଛି ବୋଲି ସୂଚନା ଦେଇଛନ୍ତି ଅଗ୍ନିଶମ ଓ ଜରୁରୀକାଳୀନ ସେବାର ଡିଜିପି ସୁଧାଂଶୁ ଷଡଙ୍ଗୀ।

ଭୁବନେଶ୍ବର: ୧୦ ତାରିଖରେ ସୃଷ୍ଟି ହେବାକୁ ଥିବା ଲଘୁଚାପ ଭୀଷଣ ବାତ୍ୟାରେ ପରିଣତ ହେବ। ସମ୍ଭବତଃ ଏହା ଆହୁରି ଅଧିକ ଶକ୍ତିଶାଳୀ ମଧ୍ୟ ହୋଇପାରେ। ବାତ୍ୟାକୁ ଶକ୍ତିଶାଳୀ କରିବା ପାଇଁ ସମସ୍ତ ପ୍ରକାର ପାଗ ଅନୁକୂଳ ରହିଛି । ବର୍ତ୍ତମାନ ଆଣ୍ଡାମାନ ସାଗରରେ ମେଘଖଣ୍ଡ ଏକାଠି ହୋଇ ଚାଲିଛି। ଏହାଦ୍ବାରା ଶୁକ୍ରବାର ସୁଦ୍ଧା ଆଣ୍ଡାମାନ ସାଗରରେ ଏକ ଘୂର୍ଣ୍ଣବଳୟ ସୃଷ୍ଟି ହେବ ଏବଂ ଏହାର ପ୍ରଭାବରେ ହିଁ ୧୦ ତାରିଖରେ ଲଘୁଚାପ ସୃଷ୍ଟି ହେବ ବୋଲି ଆକଳନ କରାଯାଉଛି। ଅନ୍ୟପଟେ ସମୟ ଗଡ଼ିବା ସହିତ ବାତ୍ୟା ହେବା ନେଇ ମଧ୍ୟ ଆଶଙ୍କା ଦୃଢ଼ୀଭୂତ ହେବାରେ ଲାଗିଛି। ଆଇଏମଡି ପକ୍ଷରୁ ଧୀରେ ଧୀରେ ବାତ୍ୟା ଆଶଙ୍କା ନେଇ ସ୍ପଷ୍ଟ କରିଛି । ଗୁରୁବାର ବିଭାଗ ପକ୍ଷରୁ ପ୍ରକାଶ ପାଇଥିବା ବିସ୍ତାରିତ ପରିସର ଆକଳନରେ ଦର୍ଶାଯାଇଛି ଯେ ୧୦ରେ ସୃଷ୍ଟି ହେବାକୁ ଥିବା ଲଘୁଚାପ ୧୪ ତାରିଖରେ ଅବପାତର ରୂପ ନେବ। ଏହା ଆହୁରି ଘନୀଭୂତ ହେବାର ଶତ ପ୍ରତିଶତ ସମ୍ଭାବନା ରହିଛି ବୋଲି ବିଭାଗ ସ୍ପଷ୍ଟ କରିଛି।

ପାଣିପାଗ କେନ୍ଦ୍ରର ପୂର୍ବତନ ନିର୍ଦ୍ଦେଶକ ଡ. ଶରତ ଚନ୍ଦ୍ର ସାହୁ କହିଛନ୍ତି ଯେ ବାତ୍ୟା ହେବା ଏକ ପ୍ରକାର ନିଶ୍ଚିତ। ଏମିତି କି ବାତ୍ୟାଟି ଅଧିକ ଘନୀଭୂତ ହୋଇ ଭୀଷଣ ବାତ୍ୟା ( ସିଭିୟର ସାଇକ୍ଳୋନ୍) କିମ୍ବା ଏହାଠାରୁ ଅଧିକ ଶକ୍ତିଶାଳୀ ହୋଇପାରେ। ଏହା ସମ୍ଭବତଃ ୧୬ କିମ୍ବା ୧୭ ତାରିଖରେ ସ୍ଥଳଭାଗ ଅତିକ୍ରମ କରିପାରେ । ମାତ୍ର ଏହା କେଉଁଠାରେ ସ୍ଥଳଭାଗ ଅତିକ୍ରମ କରିବା ତାହା ବର୍ତ୍ତମାନ ପର୍ଯ୍ୟନ୍ତ ସଠିକ୍ କହିହେବ ନାହିଁ । ତାଙ୍କ କହିବା ଅନୁଯାୟୀ ବର୍ତ୍ତମାନ ପର୍ଯ୍ୟନ୍ତ ମଡ଼େଲଗୁଡ଼ିକ ବାତ୍ୟାର ସ୍ଥଳଭାଗ ଅତିକ୍ରମ ନେଇ ଏକମତ ହେଉନାହାନ୍ତି । ତେବେ ବାତ୍ୟାର ବିପଦ ଓଡ଼ିଶା ଉପରେ ରହିବ ନାହିଁ ବୋଲି ଏଡ଼ାଇ ଦିଆଯାଇପାରିବ ନାହିଁ ବୋଲି ସେ କହିଛନ୍ତି। ସାଧାରଣତଃ ଲଘୁଚାପ ଘନୀଭୂତ ହୋଇ ଅବପାତର ରୂପ ନେବା ସମୟରେ ଶକ୍ତିଶାଳୀ ହେଲେ ଏହା ପୂର୍ବ ଆକଳନ ଦିଗରେ ଗତି କରିଥାଏ। ମାତ୍ର ଯଦି ଏହା ଦୁର୍ବଳ ହୁଏ ତେବେ ଗତିପଥ ପରବର୍ତ୍ତନ କରିଥାଏ। ତେଣୁ ଲଘୁଚାପ ସୃଷ୍ଟି ପରେ ହିଁ ଅଧିକ ସଠିକ କହିହେବ ବୋଲି ଡ. ସାହୁ ମତ ଦେଇଛନ୍ତି |

ଅନ୍ୟପଟେ ଭୀଷଣ ବାତ୍ୟା ହେଲେ ବପନର ବେଗ ୧୦୦-୧୧୦ କିମି ଛୁଇଁବ । ଏହାର ଝଟକା ବଢ଼ି ୧୨୦ କିମି ପର୍ଯ୍ୟନ୍ତ ପହଞ୍ଚିପାରେ। ସେହିପରି ଅତି ଭୀଷଣ ବାତ୍ୟାରେ ପରିଣତ ହେଲେ ପବନର ବଗେ ଆହୁରି ବୃଦ୍ଧି ହୋଇ ୧୫୦ କିମି ପର୍ଯ୍ୟନ୍ତ ଯାଇପାରେ । ଯାହାଦ୍ୱାରା ବାତ୍ୟା ମାଡ଼ ସମୟରେ ବ୍ୟାପକ କ୍ଷୟକ୍ଷତିର ଆଶଙ୍କା କରାଯାଇଛି। ସେହିପରି ୧୦ ତାରିଖରେ ସୃଷ୍ଟି ହେବାକୁ ଥିବା ସମ୍ଭାବ୍ୟ ଲଘୁଚାପ ପାଇଁ ସ୍ଥିତି ଅନୁକୂଳ ହେଉଥିବା ବେଳେ ଆଗାମୀ ୫ ଦିନ ମଧ୍ୟରେ ଆଣ୍ଡାମାନ ନିକୋବର ଦ୍ଵୀପପୁଞ୍ଜରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏହାସହିତ ୧୦ ତାରିଖରେ ଲଘୁଚାପ ପରେ ୧୪ ତାରିଖ ସୁଦ୍ଧା ଏହା ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଏକ ଅବପାତରେ ପରିଣତ ହେବ । ଏହା ପଶ୍ଚିମ ଉତ୍ତର ପଶ୍ଚିମ ଦିଗରେ ଗତି କରିବ।

ଭୁବନେଶ୍ୱର: ଚଳିତ ବର୍ଷ ରାଜ୍ୟକୁ ବାତ୍ୟା ଆଶଙ୍କା ବୃଦ୍ଧି ପାଇଛି। ସେପ୍ଟେମ୍ୱର ମାସରୁ ଲା-ନିନାର ପ୍ରଭାବ ଦେଖାଯିବ। ଏହା ଯୋଗୁଁ ବଙ୍ଗୋପସାଗରରେ ବାତ୍ୟା ସୃଷ୍ଟି ହେବା ପାଇଁ ପରିବେଶ ଅନୁକୂଳ ରହିବାର ଆଶଙ୍କା ଦୃଢ଼ୀଭୂତ ହୋଇଛି। ପୂର୍ବରୁ ଲା-ନିନା ସକ୍ରିୟ ଥିବା ବର୍ଷଗୁଡ଼ିକରେ ଓଡ଼ିଶାକୁ ବାରମ୍ବାର ବାତ୍ୟା ମାଡ଼ ହୋଇଥିବାରୁ ଏବେଠାରୁ ବାତ୍ୟା ଡର ଆରମ୍ଭ ହୋଇଯାଇଛି। ଲା-ନିନା ପ୍ରଭାବ ସାଙ୍ଗକୁ ଇଣ୍ଡିଆନ୍‍ ଓସେନ ଡାଇପୋଲ୍‍ ନେଗେଟିଭ୍‍ ରହିବାର ସମ୍ଭାବନା ଥିବାରୁ ବାତ୍ୟା ସୃଷ୍ଟି ପାଇଁ ପରିସ୍ଥିତି ସୁହାଇଥାଏ ବୋଲି ପୂର୍ବରୁ ନଜିର ରହିଛି।

ଏସିଆ ପେସିଫିକ୍‍ କ୍ଲାଇମେଟ ସେଣ୍ଟର ପକ୍ଷରୁ କରାଯାଇଥିବା ଆକଳନ ଅନୁଯାୟୀ ଚଳିତ ବର୍ଷ ଅଗଷ୍ଟ ସେପ୍ଟେମ୍ବରରେ ଓଡ଼ିଶାରେ ନିଅଣ୍ଟିଆ ବର୍ଷା ହେବାର ଥିବା ବେଳେ ଅକ୍ଟୋବର ମାସରେ ସ୍ୱାଭାବିକଠାରୁ ୫୦-୬୦ ପ୍ରତିଶତ ଅଧିକ ବର୍ଷା ହେବାର ସମ୍ଭାବନା ରହିଛି। ଅକ୍ଟୋବର ମାସଟି ବାତ୍ୟା ସୃଷ୍ଟି ପାଇଁ ପ୍ରକୃଷ୍ଟ ସମୟ ହୋଇଥିବାରୁ ଚିନ୍ତା ବଢ଼ିଛି। ଆମେରିକାର ଏନ୍‍ଓଏଏ ପକ୍ଷରୁ ଜିଏଫ୍‍ଏସ ମଡେଲରୁ ଜଣାପଡ଼ୁଛି ଯେ ଅଗଷ୍ଟରୁ ଅକ୍ଟୋବର ମଧ୍ୟରେ ସମୁଦ୍ର ପୃଷ୍ଠର ତାପମାତ୍ରା ସ୍ୱାଭାବିକଠାରୁ ଅଧିକ ରହିବ। ଏହି ଦୁଇ ବିଶ୍ୱସ୍ତ ପାଣିପାଗ ସଂସ୍ଥାର ଆକଳନରୁ ବାତ୍ୟା ଆଭାସ ଏକ ପ୍ରକାର ସ୍ପଷ୍ଟ ହେବାରେ ଲାଗିଛି।

ଇଣ୍ଡିଆନ୍‍ ନ୍ୟାସନାଲ୍‍ ସେଣ୍ଟର ଫର ଓସିନ୍‍ ଇନଫର୍ମେସନ ସର୍ଭିସ (ଆଇଏନସିଓଆଇଏସ୍‍)ର ବୈଜ୍ଞାନିକମାନଙ୍କ ଦ୍ୱାରା କରାଯାଇଥିବା ଏକ ସର୍ଭେରୁ ଜଣାପଡ଼ିଛି ଯେ ଲା-ନିନା ବର୍ଷରେ ମୋଟ୍‍ ୨୦ ଟି ବାତ୍ୟା ହୋଇଥିବା ବେଳେ ଏଲ୍‍-ନିନୋ ବର୍ଷରେ ମାତ୍ର ୯ଟିି ବାତ୍ୟା ସୃଷ୍ଟି ହୋଇଛି। ଏହାସହିତ ଲା-ନିନା ବର୍ଷରେ ଟ୍ରପିକାଲ୍‍ ସାଇକ୍ଲୋନ୍‍ର ସର୍ବାଧିକ ସୃଷ୍ଟି ହୋଇଥାଏ। ଚଳିତ ବର୍ଷ ମଧ୍ୟ ସମାନ ଘଟଣା ଘଟିବାର ଆଶଙ୍କା ସୃଷ୍ଟି ହୋଇଛି। ସେହିପରି ଆଇଏମ୍‍ଡିର ଅଧ୍ୟୟନରୁ ଜଣାପଡ଼ିଛି ଯେ ମୌସୁମୀ ପରବର୍ତ୍ତୀ ସମୟରେ ଲା-ନିନା ସ୍ଥିତି ଦେଖାଦେଲେ ବର୍ଷାର ପରିମାଣ କମିଥାଏ। ମାତ୍ର ବାତ୍ୟା ସୃଷ୍ଟି ହେଲେ ଏହା ଅଧିକ ଶକ୍ତିଶାଳୀ ହୋଇଥାଏ। ପୂର୍ବରୁ ଲା-ନିନା ବର୍ଷଗୁଡ଼ିକରେ ରାଜ୍ୟ ଅନେକ ବାତ୍ୟାର ସମ୍ମୁଖୀନ ହୋଇଥିବା ବେଳେ ୧୯୯୯ ମସିହା ମହାବାତ୍ୟା ସହିତ ୨୦୧୩ରେ ଫାଇଲିନ୍‍ ହିଟ୍‍ କରିଥିଲା। ଉଭୟ ବାତ୍ୟା ଲା-ନିନା ବର୍ଷରେ ହିଁ ସୃଷ୍ଟି ହୋଇଥିଲେ। ଅଧ୍ୟୟନରୁ ଜଣାଯାଏ ଯେ ଲା-ନିନା ସମୟରେ ପ୍ରଶାନ୍ତ ମହାସାଗରରେ ପବନର ଦିଗ ପରିବର୍ତ୍ତନ ହୋଇ ଆଫ୍ରିକାଠାରୁ ଇଣ୍ଡୋନେସିଆକୁ ପବନର ବେଗ ବୃଦ୍ଧି ପାଇଥାଏ। ଏହି ବର୍ଦ୍ଧିତ ପବନର ଗତିର ପରିଣାମ ସ୍ୱରୂପ, ଇଣ୍ଡୋନେସିଆରେ ଗଚ୍ଛିତ ଉଷ୍ମ ଜଳ ପରେ ବଙ୍ଗୋପସାଗରକୁ ଉଷ୍ମ କରିଥାଏ। ସମୁଦ୍ରରେ ତାପମାତ୍ରା ବୃଦ୍ଧି ହେବା କାରଣରୁ ହିଁ ବାତ୍ୟା ସୃଷ୍ଟି ହୋଇଥାଏ।