ନୂଆଦିଲ୍ଲୀ: ଏମ୍‌ଏମ୍‌ଡ଼ିଆର୍‌ ସଂଶୋଧନ ବିଲ୍‌କୁ ରାଜ୍ୟସଭାରେ ତୀବ୍ର ବିରୋଧ କରିଛି ବିଜେଡି । ଆଲୋଚନା ସମୟରେ ସାଂସଦ ମାନସ ମଙ୍ଗରାଜ ବିଲ୍‌କୁ ବିରୋଧ କରିବା ସହ ଏହା ଓଡ଼ିଶା ଓ ଅନ୍ୟ ଖଣିଜ ସମ୍ପଦପୂର୍ଣ୍ଣ ରାଜ୍ୟଗୁଡ଼ିକର ସ୍ୱାର୍ଥ ବିରୋଧୀ ବୋଲି ଅଭିହିତ କରିଛନ୍ତି। ଏହା ସହ ବିଲ୍‌କୁ ସିଲେକ୍ଟ କମିଟିକୁ ପଠାଇବାକୁ ମଧ୍ୟ ସେ ଦାବି କରିଛନ୍ତି । ଆଲୋଚନାରେ ଭାଗ ନେଇ ସେ କହିଛନ୍ତି ଯେ ଓଡ଼ିଶା ଦେଶର ଅନ୍ୟତମ ପ୍ରମୁଖ ଖଣିଜ ଉତ୍ପାଦନକାରୀ ରାଜ୍ୟ୤ ଲୁହାପଥର, ବକ୍ସାଇଟ୍‌, ମାଙ୍ଗାନିଜ୍‌ ସମେତ ବିଭିନ୍ନ ଖଣିଜ ସମ୍ପଦ ଦେଶର ଶିଳ୍ପ ବିକାଶରେ ବଡ଼ ଅବଦାନ ରଖୁଛି। କିନ୍ତୁ ଖଣି ଅଞ୍ଚଳର ଲୋକମାନେ ଦୀର୍ଘଦିନ ଧରି ପରିବେଶୀୟ ଓ ସାମାଜିକ କ୍ଷତିର ବହୁମୂଲ୍ୟ ଦେଇ ଆସୁଛନ୍ତି । 

ବିଲ୍‌ରେ ଧାରା-୯ (ଡ଼ି)ର ବ୍ୟବସ୍ଥା ଅନୁସାରେ ଖଣିଜ ଅଧିକାର ଓ ଖଣିଜ ସମ୍ପଦ ଥିବା ଜମି ଉପରେ ରାଜ୍ୟ ସରକାରଙ୍କ ଦ୍ୱାରା କର, ସେସ୍‌ କିମ୍ବା ଅନ୍ୟାନ୍ୟ ଲେଭି ଲଗାଇବାର କ୍ଷମତା ଉପରେ କେନ୍ଦ୍ରୀୟ ନିୟନ୍ତ୍ରଣ ବଢ଼ିପାରେ। ଏହା ଫଳରେ ଖଣିଜ ସମୃଦ୍ଧ ରାଜ୍ୟଗୁଡ଼ିକର ଆର୍ଥିକ ସ୍ୱାୟତ୍ତତା ଓ ରାଜସ୍ୱ ସଂଗ୍ରହର କ୍ଷମତା ସୀମିତ ହେବ। ଓଡ଼ିଶା ପରି ଖଣିଜ ସମୃଦ୍ଧ ରାଜ୍ୟ ପାଇଁ ଖଣିଜ ରାଜସ୍ୱ କେବଳ ସରକାରୀ ଆୟର ଏକ ସ୍ରୋତ ନୁହେଁ। ଖଣି ପ୍ରଭାବିତ ଅଞ୍ଚଳରେ ରାସ୍ତା, ଶିକ୍ଷା, ସ୍ୱାସ୍ଥ୍ୟ, ପୁନର୍ବାସ, ଜୀବିକା ଓ ପରିବେଶ ପୁନରୁଦ୍ଧାର ଭଳି କାର୍ଯ୍ୟରେ ଏହି ରାଜସ୍ୱର ଗୁରୁତ୍ୱ ରହିଛି। ତେଣୁ ଏହି ଆର୍ଥିକ କ୍ଷେତ୍ରକୁ ସଂକୁଚିତ କରାଗଲେ ଏହାର ସିଧାସଳଖ ପ୍ରଭାବ ରାଜ୍ୟର ବିକାଶ ଓ ଖଣି ଅଞ୍ଚଳର ଲୋକଙ୍କ ଉପରେ ପଡ଼ିବ ବୋଲି ଶ୍ରୀ ମଙ୍ଗରାଜ କହିଛନ୍ତି । ସେ ପୁଣି କହିଛନ୍ତି ଯେ ବିଲ୍‌ଟି ସଂଘୀୟ ବ୍ୟବସ୍ଥାକୁ ମଧ୍ୟ ଦୁର୍ବଳ କରିବାର ଆଶଙ୍କା ରହିଛି । ଖଣିଜ ସମ୍ପଦ ସମ୍ପର୍କିତ ରାଜ୍ୟଗୁଡ଼ିକର ଆର୍ଥିକ ଓ ସାମାଜିକ ପରିସ୍ଥିତି ଭିନ୍ନ। ଓଡ଼ିଶାର ଖଣି ଅଞ୍ଚଳରେ ଆଦିବାସୀ ସମୁଦାୟ, ସ୍ଥାନୀୟ ଜନସାଧାରଣ ଓ ପରିବେଶୀୟ ସମସ୍ୟା ସହ ଜଡ଼ିତ ଅନେକ ସ୍ୱତନ୍ତ୍ର ପ୍ରସଙ୍ଗ ରହିଛି। ଏପରି ସ୍ଥିତିରେ ଗୋଟିଏ ସମାନ କେନ୍ଦ୍ରୀୟ ନୀତି ଦ୍ୱାରା ସବୁ ରାଜ୍ୟର ସମସ୍ୟା ସମାଧାନ କରିବା ବାସ୍ତବସମ୍ମତ ନୁହେଁ । ନିବେଶ ବୃଦ୍ଧି  ଓ ଇଜ୍‌ ଅଫ୍‌ ଡ଼ୁଇଂ ବିଜିନେସନ ନାମରେ ଖଣି କ୍ଷେତ୍ରର ସଂସ୍କାରକୁ ଆମେ ବିରୋଧ କରୁନାହୁଁ । ମାତ୍ର କୌଣସି ମୂଲ୍ୟରେ ରାଜ୍ୟର ନ୍ୟାୟସଙ୍ଗତ ରାଜସ୍ୱ ଅଧିକାର କିମ୍ବା ଖଣି ପ୍ରଭାବିତ ଲୋକଙ୍କ ସ୍ୱାର୍ଥ ସହ ସାଲିସ କରାଯାଇ ପାରିବ ନାହିଁ।

 ଖଣି ଉତ୍ତୋଳନ ଓ ଶିଳ୍ପ ବିକାଶକୁ ଓଡ଼ିଶା ସମର୍ଥନ କରିଆସିଛି; କିନ୍ତୁ ଖଣିଜ ସମ୍ପଦରୁ ଖଣିଜ ସମୃଦ୍ଧ ରାଜ୍ୟ ଓ ସ୍ଥାନୀୟ ଲୋକଙ୍କୁ ନ୍ୟାୟସଙ୍ଗତ ଏବଂ ଦୀର୍ଘସ୍ଥାୟୀ ଲାଭ ମିଳିବା ଆବଶ୍ୟକ। ତେଣୁ ବିଲ୍‌ଟିକୁ ତରବରିଆ ଭାବେ ପାସ୍‌ ନ କରି ରାଜ୍ୟଗୁଡ଼ିକ ସହ ବ୍ୟାପକ ପରାମର୍ଶ ଓ ସାମ୍ବିଧାନିକ ଯାଞ୍ଚ ପାଇଁ ସିଲେକ୍ଟ କମିଟିକୁ ପଠାଯିବା ଉଚିତ୍‌ ହେବ ବୋଲି ଶ୍ରୀ ମଙ୍ଗରାଜ କହିଛନ୍ତି । 

ନୂଆଦିଲ୍ଲୀ: ନିଟ୍‌ ପ୍ରଶ୍ନପତ୍ର ଲିକ୍‌ ପ୍ରସଙ୍ଗରେ ଦିଲ୍ଲୀରେ କକ୍ରୋଚ ଜନତା ପାର୍ଟିର ଆନ୍ଦୋଳନ ତୀବ୍ର ହେଉଥିବା ବେଳେ କେନ୍ଦ୍ର ସରକାରଙ୍କ ଅଡୁଆ ବଢ଼ିବାରେ ଲାଗିଛି। ଦିଲ୍ଲୀରେ ଛାତ୍ରଛାତ୍ରୀଙ୍କ ଉପରେ ପୁଲିସ କରିଥିବା ଦମନଲୀଳାକୁ ତୀବ୍ର ନିନ୍ଦା କରିଛନ୍ତି ବିଜେଡି ସାଂସଦ । 

ବର୍ବରୋଚିତ, ଅତ୍ୟନ୍ତ ନିନ୍ଦନୀୟ: ମାନସ ମଙ୍ଗରାଜ
ଗତକାଲି ଯନ୍ତରମନ୍ତରରୁ ସଂସଦ ଅଭିମୁଖେ ଛାତ୍ରଛାତ୍ରୀମାନେ ଯାଉଥିବା  ସମୟରେ ଯାହା ସବୁ ଘଟଣା ଘଟିଲା ତାହା ଅତ୍ୟନ୍ତ ନିନ୍ଦନୀୟ, ଅତ୍ୟନ୍ତ ବର୍ବରୋଚିତ। ଏଥିପାଇଁ  ବିଜୁ ଜନତା ଦଳର ସମସ୍ତ ସାଂସଦ, ଆମର ନେତା ନବୀନ ପଟ୍ଟନୟକ ଅତ୍ୟନ୍ତ ମର୍ମାହତ। କେନ୍ଦ୍ରମନ୍ତ୍ରୀ ଜେପି ନ‡ା ଛାତ୍ରମାନଙ୍କ ସହ ଆଲୋଚନା ଆରମ୍ଭକଲେ, ମାତ୍ର ଏହି ଆଲୋଚନା ଯଦି ପୂର୍ବରୁ ହୋଇପାରିଥାନ୍ତା, ହୁଏତ କାଲିର ଏହି ଘଟଣାକୁ ଏଡ଼ାଇ ଯାଇପାରିଥାନ୍ତା। ତେଣୁ ସଂସଦର ସବୁ କାର୍ଯ୍ୟକ୍ରମକୁ ତୁରନ୍ତ ବାତିଲ  ବା ସ୍ଥଗିତ ରଖାଯାଉ ଏବଂ ଛାତ୍ର ଆନ୍ଦୋଳନ ଉପରେ ସ୍ୱତନ୍ତ୍ର ଆଲୋଚନା କରାଯାଉ। ଶିକ୍ଷା ବ୍ୟବସ୍ଥା ଓ ଗତକାଲି ଯାହା ହିଂସା ହେଲା ତା’ ଉପରେ ମଧ୍ୟ ଆଲୋଚନା କରାଯାଉ। ଦୁଇଦିନ ତଳେ ଆମର ନେତା ନବୀନ ପଟ୍ଟନାୟକ କହିଥିଲେ ଯେ ଶିକ୍ଷା କ୍ଷେତ୍ରରେ ସଂସ୍କାରର ଆବଶ୍ୟକତା ରହିଛି। ଶିକ୍ଷାର ସଂସ୍କାର ନ ହେବାରୁ  ଏ ଦେଶ କୁଆଡେ଼ ଯାଉଛି ଆପଣମାନେ ଜାଣିଛନ୍ତି। ତେଣୁ ଏହା ଉପରେ ଆଲୋଚନା ପାଇଁ ଆମେ ଦାବି ରଖୁଛୁ।

ସରକାରଙ୍କ ନିରବତାରୁୁ ବିଶୃଙ୍ଖଳା: ସଂତୃପ୍ତ ମିଶ୍ର
ଗଣତନ୍ତ୍ରର ଆଧାର ହେଲା ଆଲୋଚନା। ଗଣତନ୍ତ୍ରର ମୂଲ୍ୟବୋଧ ହେଲା ଯଦି ଆମର କୌଣସି ଅସୁବିଧା ଅଛି ସେ ଶବ୍ଦଟା ସରକାରଙ୍କ ପାଖରେ ପହଞ୍ଚିବା ଉଚିତ୍‌। ସେଥିପାଇଁ  ଛାତ୍ରଛାତ୍ରୀମାନେ ଶିକ୍ଷା ବିଷୟରେ, ପରୀକ୍ଷା ବିଷୟରେ, ନିଟ୍‌ ବିଷୟରେ ଏବଂ ଅନ୍ୟାନ୍ୟ ବିଷୟରେ ସରକାରଙ୍କ ପାଖରେ ନିଜର ମତ, ନିଜର ଦାବି ଉପସ୍ଥାପନ କରିବାପାଇଁ ଆସିଥିଲେ। କିନ୍ତୁ  ସରକାର ତାଙ୍କ ସହିତ କଥା ନହୋଇ ୨୫ -୨୬ ଦିନ ଆନ୍ଦୋଳନ ଚାଲିବାପରେ ମଧ୍ୟ ଚୁପ୍‌୍‌ଚାପ୍‌ ରହିଲେ; ଯଦ୍ୱାରା ଏସବୁ ଗତକାଲିର ବିଶୃଙ୍ଖଳା ହେଲା। ଗଣତନ୍ତ୍ରରେ ହିଂସାର କୌଣସି ସ୍ଥାନ ନାହିଁ। କିନ୍ତୁ ଯେତେବେଳେ ସରକାରଙ୍କଠୁ କୌଣସି ଉତ୍ତର ନମିଳେ, ଅନେକ ସମୟରେ ଏଭଳି ଦୁର୍ଘଟଣା ଘଟିଥାଏ। ଆମେ ସେଥିପାଇଁ ଅତ୍ୟନ୍ତ ଦୁଃଖିତ। ଛାତ୍ରଛାତ୍ରୀମାନଙ୍କୁ ଯୋଉ ଆଘାତ ଲାଗିଲା, ଯୋଉ ପୁଲିସ କର୍ମୀମାନଙ୍କୁ ଆଘାତ ଲାଗିଲା, ସେଥିପାଇଁ ଆମେମାନେ ଦୁଃଖ ପ୍ରକାଶ କରୁଛୁ।

ଆକ୍ରମଣକୁ କଠୋର ଶବ୍ଦରେ ନିନ୍ଦା କରୁଛୁ:  ସସ୍ମିତ ପାତ୍ର
ବିଗତ ଦିନରେ ମଧ୍ୟ ଆମର ନେତା ନବୀନ ପଟ୍ଟନାୟକ ସ୍ପଷ୍ଟ କରିଥିଲେ ଯେ  ନ୍ୟାୟ ପାଇଁ ଯେଉଁମାନେ ଦିଲ୍ଲୀରେ ସଂଘର୍ଷ କରୁଛନ୍ତି ସେମାନଙ୍କ ସହ ସେ ଓ ବିଜୁ ଜନତା ଦଳ ଅଛନ୍ତି। ଗତକାଲି ଯାହା ଘଟିଲା ସେଥିରେ ବିଜୁ ଜନତା ଦଳ ଏବଂ ଆମର ନେତା ନବୀନ ପଟ୍ଟନାୟକ ମହୋଦୟ ଅତ୍ୟନ୍ତ ଦୁଃଖିତ। ସବୁବେଳେ ଗଣତାନ୍ତ୍ରିକ ବ୍ୟବସ୍ଥା ମଧ୍ୟରେ ଚର୍ଚ୍ଚା ଆଲୋଚନାର ଜାଗା ଥାଏ। କିନ୍ତୁ ସେହି ଜାଗାରେ ଛାତ୍ରଛାତ୍ରୀ ମାନଙ୍କ ଉପରେ ଯେଉଁ ପ୍ରକାର ଭାବରେ ବର୍ବରୋଚିତ ଆକ୍ରମଣ କରାଗଲା ତାହା ଅତ୍ୟନ୍ତ ନିନ୍ଦନୀୟ। ବିଜୁ ଜନତା ଦଳ ଏହାକୁ ଘୋର ଭାବରେ ଆମେ ନିନ୍ଦା କରୁଛୁ ଏବଂ ଆଶା କରୁଛୁ ଯେ ଛାତ୍ରଛାତ୍ରୀ ମାନଙ୍କର ଯୋଉ ନାଯ୍ୟ ଦାବି ରହିଛି, ସେ ଦାବି ଉପରେ ସରକାର ବିଚାର ଆଲୋଚନା କରିବେ। ଛାତ୍ରଛାତ୍ରୀମାନେ ଭାରତବର୍ଷର ଭବିଷ୍ୟତ ଏବଂ ତାଙ୍କର ବିକାଶ ଏବଂ ସୁରକ୍ଷା ସର୍ବାଗ୍ରେ ରହିବା ଦରକାର।

ଶିକ୍ଷାବ୍ୟବସ୍ଥାକୁ ଶେଷ ଲାଗି ପ୍ରୟାସ ଚାଲିଛି: ସୁଲତା ଦେଓ
ଏ ସରକାର ଶିକ୍ଷା ବ୍ୟବସ୍ଥାକୁ ଶେଷ କରିଦେବା ପାଇଁ ଚେଷ୍ଟା କରୁଛନ୍ତି। ଶାନ୍ତିପୂର୍ଣ୍ଣ ପ୍ରତିବାଦରୁ ସୋନମ ୱାଙ୍ଗଚୁକଙ୍କୁ ଜବରଦସ୍ତି ଉଠେଇନିଆଗଲା।  ପିଲାମାନେ ଶାନ୍ତିପୂର୍ଣ୍ଣ ଭାବରେ ପ୍ରତିବାଦ କରୁଥିଲେ ମଧ୍ୟ ସେମାନଙ୍କୁ ଲାଠି ଚାର୍ଜ ସହ ଟିଅର ଗ୍ୟାସ, ରବର ବୁଲେଟ ମାରି ତାଙ୍କୁ କ୍ଷତାକ୍ତ କରାଗଲା। ଆମେ ସେ ପିଲାମାନଙ୍କ ସାଙ୍ଗରେ ଅଛୁ। ନବୀନ ପଟ୍ଟନାୟକ ଆଗରୁ ମଧ୍ୟ ଟ୍ୱିଟ କରି କହିଥିଲେ ଯେ ଶିକ୍ଷା ବ୍ୟବସ୍ଥାକୁ ସୁଧାରନ୍ତୁ। ଶିକ୍ଷା ବ୍ୟବସ୍ଥାରେ ନିଟରେ ଯାହା ପେପର ଲିକ୍‌ ହେଇଛି ତା ପାଇଁ ଯିଏ ଉତ୍ତରଦାୟୀ ସିଏ ଇସ୍ତଫା ଦେବାର ମଧ୍ୟ ଆବଶ୍ୟକତା ଅଛି। ପିଲାଙ୍କ ସାଙ୍ଗରେ ବିଜୁ ଜନତା ଦଳ ଥିଲା ଓ ସବୁବେଳେ ଅଛି। ଆମେ ଆଶା କରୁଛୁ ଯେ ଶିକ୍ଷା ବ୍ୟବସ୍ଥାର ଆମୂଳଚୂଳ ପରିବର୍ତ୍ତନ ହେଉ। ସଂସଦର ସବୁ ଆଲୋଚନାକୁ ସ୍ଥଗିତ କରାଯାଉ। ସବୁଠୁ ବଡ ଆଲୋଚନା ହୋଉଛି ଶିକ୍ଷା ଏବଂ ପିଲାମାନେ। ଏ ବ୍ୟବସ୍ଥା ଉପରେ ଆଲୋଚନା ହେଉ, ନହେଲେ ଆମେ ସଂସଦରେ ମଧ୍ୟ ଏ ବିଷୟରେ ପ୍ରତିବାଦ କରିବୁ।

ଛାତ୍ରଛାତ୍ରୀଙ୍କ ସହ ବିଜେଡି ରହିଛି: ସୁଭାଶିଷ ଖୁଣ୍ଟିଆ
ଦେଶରେ ଶିକ୍ଷା ବ୍ୟବସ୍ଥା ଉପରେ ଲୋକଙ୍କର ଭରସା ତୁଟିଗଲାଣି। ଗତକାଲି ଯେଉଁଭଳି ଭାବେ ଶିକ୍ଷାର୍ଥୀଙ୍କ ଉପରେ ଅମାନୁଷିକ ଭାବେ ଅତ୍ୟାଚାର କରାଯାଇଛି, ତାହା ଅତ୍ୟନ୍ତ ନିନ୍ଦନୀୟ। ଲାଠି ଚାର୍ଜଠାରୁ ଆରମ୍ଭକରି ଅନ୍ୟ ଅତ୍ୟାଚାର କାରଣରୁ ଅନେକ ଛାତ୍ରଛାତ୍ରୀମାନେ ଆଜି ମେଡିକାଲରେ ଆଡମିଶନ ହୋଇଛନ୍ତି।  ନବୀନ ବାବୁ ଓ ରାଜ୍ୟସଭାର ସାଂସଦମାନେ ତାଙ୍କ ସହିତ ଛାତ୍ରଛାତ୍ରୀମାନଙ୍କ ସହିତ ଅଛୁ। ଶିକ୍ଷାରେ ଯଦି କୌଣସି ତ୍ରୁଟି ବିଚ୍ୟୁତି ହେଲା, ତାକୁ ସରକାର ତଥା ଲୋକଲୋଚନକୁ ଆଣିବାପାଇଁ ଛାତ୍ରଛାତ୍ରୀଙ୍କ ଅଧିକାରରହିଛି।  ଆମେ ଏହି ଆକ୍ରମଣକୁ ଦୃଢ଼ ନିନ୍ଦା କରୁଛୁ ଏବଂ ବିଜୁ ଜନତା ଦଳର ସମର୍ଥନ ଛାତ୍ରଛାତ୍ରୀମାନଙ୍କୁ ଜଣାଉଛୁ। ଆଗାମୀ ଦିନରେ ଯଦି ସରକାର ଏହା ଉପରେ ଦୃଷ୍ଟି ଆକର୍ଷଣ ନ କରନ୍ତି, ଆଗାମୀ ଦିନରେ ୟାର ଭୟାବହ ପରିସ୍ଥିତି ହେବ।

ଭୁବନେଶ୍ୱର: ଲୋକସଭାରେ ୧୩୧ତମ ସମ୍ୱିଧାନ ସଂଶୋଧନ ବିଲ୍‌ ପାରିତ କରିବାରେ କେନ୍ଦ୍ର ସରକାର ବିଫଳ ହେବା ପରେ ଏହାକୁ ନେଇ ବିଭିନ୍ନ ମହଲରେ ମତ, ମନ୍ତବ୍ୟ ପ୍ରକାଶ ପାଉଛି। ବିଶେଷକରି ଦେଶର ତମାମ ବିରୋଧୀ ଦଳ ମହିଳା ବିଲ୍‌ ସଂରକ୍ଷଣ ଆଳରେ ନିଜ ଇଚ୍ଛା ମୁତାବକ ସୀମା ପୁନଃନିର୍ଦ୍ଧାରଣ ବିଲ ପାରିତ କରିବାକୁ ନେଇ କେନ୍ଦ୍ର ସରକାରଙ୍କ କୁଟିଳତାପୂର୍ଣ୍ଣ ଯୋଜନାକୁ ନେଇ କଡ଼ା ପ୍ରତିକ୍ରିୟା ରଖୁଛନ୍ତି। ଏହିକ୍ରମରେ ଓଡ଼ିଶାରୁ ରାଜ୍ୟସଭାକୁ ପ୍ରତିନିଧିତ୍ୱ କରୁଥିବା ବିଜେଡି ସାଂସଦମାନେ ମଧ୍ୟ କେନ୍ଦ୍ର ସରାକରଙ୍କୁ କଡ଼ା ସମାଲୋଚନା କରିଛନ୍ତି। କେନ୍ଦ୍ର ସରକାରଙ୍କର ସବୁ ଷଡ଼ଯନ୍ତ୍ର ବିଫଳ ହୋଇଛି। ଯଦିି ସରକାର ସତରେ ମହିଳା ସଶକ୍ତିକରଣ ପାଇଁ ପ୍ରତିବଦ୍ଧ, ତାହେଲେ  ବର୍ତ୍ତମାନର ୫୪୩ ଲୋକସଭା ଆସନରେ ୩୩ ପ୍ରତିଶତ ସଂରକ୍ଷଣ କାର୍ଯ୍ୟକାରୀ କରନ୍ତୁ ବୋଲି ବିଜେଡି ସାଂସଦମାନେ ଦାବି କରିଛନ୍ତି। 

ରାଜ୍ୟସଭାରେ ବିଜେଡି ସଂସଦୀୟ ଦଳ ନେତା ମାନସ ମଙ୍ଗରାଜ ସାମାଜିକ ଗଣମାଧ୍ୟମ ଏକ୍ସରେ ଏନେଇ ନିଜର ମତ ରଖିଛନ୍ତି। ସେ କହିଛନ୍ତି ଯେ ବିଜେଡି ମହିଳା ସଶକ୍ତିକରଣ ପାଇଁ ସର୍ବଦା ଦୃଢ଼ ଭାବେ ଛିଡ଼ା ହୋଇଛି ଏବଂ ମହିଳା ସଂରକ୍ଷଣ ବିଲ୍‌ କାର୍ଯ୍ୟକାରିତାର ଦୃଢ଼ ସମର୍ଥକ ଭାବେ ରହି ଆସିଛି। ବିଧାନସଭା ଓ ସଂସଦରେ ମହିଳାଙ୍କ ପାଇଁ ଅଧିକ ପ୍ରତିନିଧିତ୍ୱ ନିଶ୍ଚିତ କରିବା ପାଇଁ ଆମର ପ୍ରତିବଦ୍ଧତା କେବେ କମ୍‌ ହୋଇନାହିଁ। ମାତ୍ର ନବୀନ ପଟ୍ଟନାୟକଙ୍କ ନେତୃତ୍ୱରେ ଆମେ ମହିଳା ଆଇନର ଆଳରେ ଅତ୍ୟନ୍ତ ତରବରିଆ ଭାବେ ମହିଳା ସଂରକ୍ଷଣ ଆଇନକୁ ପାରିତ କରିବାର କୁଟିଳ ପ୍ରୟାସକୁ ବିରୋଧ କରିଛୁ। ଏହି ବିଲ୍‌ ପାରିତ ହେବା ଦ୍ୱାରା ଓଡ଼ିଶା ଏବଂ ଅନ୍ୟ ଅନେକ ରାଜ୍ୟଗୁଡ଼ିକ ସେମାନଙ୍କର ନ୍ୟାଯ୍ୟ ଅଧିକାରରୁ ବଞ୍ଚିତ ହେବାର ଆଶଙ୍କା ସୃଷ୍ଟି କରିଥିଲା। ସେହି ଷଡ଼ଯନ୍ତ୍ର ବର୍ତ୍ତମାନ ବିଫଳ ହୋଇଛି ବୋଲି ଶ୍ରୀ ମଙ୍ଗରାଜ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଏହା ସ୍ପଷ୍ଟ ଆବଶ୍ୟକ ଯେ ମହିଳା ସଂରକ୍ଷଣ ବିଲ୍‌ ୨୦୨୩ରେ ପାରିତ ହୋଇସାରିଛି ଏବଂ ୨୦୨୬ରେ ବିଜ୍ଞପିତ ହୋଇସାରିଛି। ଯଦି ସରକାର ପ୍ରକୃତରେ ମହିଳା ସଂରକ୍ଷଣ ପାଇଁ ପ୍ରତିବଦ୍ଧ ଅଛନ୍ତି, ତେବେ ଆଉ ବିଳମ୍ବ ନ କରି ବର୍ତ୍ତମାନ ଥିବା ୫୪୩ ଲୋକସଭା ଆସନରେ ୩୩ ପ୍ରତିଶତ ସଂରକ୍ଷଣ କାର୍ଯ୍ୟକାରୀ କରିପାରିବେ। ମିଥ୍ୟାର ପରାଜୟ ହୋଇଛି ଏବଂ ସତ୍ୟର ବିଜୟ ହୋଇଛି ବୋଲି ଶ୍ରୀ ମଙ୍ଗରାଜ କହିଛନ୍ତି। 

ରାଜ୍ୟସଭାରେ ବିଜେଡିର ଉପନେତା ସୁଲତା ଦେଓ କହିଛନ୍ତି, ସୀମା ପୁନଃନିର୍ଦ୍ଧାରଣ ବିଲ୍‌-୨୦୨୬ ନାମରେ କେନ୍ଦ୍ର ସରକାର ଏକ ଅନ୍ଧ ଆଇନ ଆଣିବାକୁ ଚେଷ୍ଟା କରୁଥିବା ବେଳେ ବିରୋଧୀ ଏହି ପ୍ରୟାସକୁ ବିଫଳ କରିଛନ୍ତି। ସରକାରଙ୍କ ଯଦି ମହିଳା ସଶକ୍ତିକରଣ ପାଇଁ ସତରେ ପ୍ରତିବଦ୍ଧ, ତାହେଲେ ୨୦୨୩ ମସିହାରେ ପାରିତ ଆଇନ ଅନୁଯାୟୀ ଦିଅନ୍ତୁ ବୋଲି ସେ ଦାବି କରିଛନ୍ତି ।

ଗଣମାଧ୍ୟମକୁ ପ୍ରତିକ୍ରିୟା ଦେଇ ଶ୍ରୀମତି ଦେଓ କହିଛନ୍ତି ଯେ ମହିଳା ସଂରକ୍ଷଣକୁ ବିଲକୁ ଜଣେ ହେଲେବି ସାଂସଦ କେବେ ହେଲେ ବିରୋଧ କରିନାହାନ୍ତି। ୨୦୨୩ରେ ଯେତେବେଳେ ନାରୀଶକ୍ତି ବନ୍ଦନ ଅଧିନିୟମ ଆସିଥିଲା, ସେତେବେଳେ ସମସ୍ତ ରାଜନୈତିକ ଦଳ ଏହାକୁ ସମର୍ଥନ ଦେଇଥିଲେ। ସେତେବେଳେ କେନ୍ଦ୍ର ସରକାର କହିଥିଲେ ଯେ ୨୦୨୬ ଜନଗଣନା ପରେ ଏହାକୁ ଲାଗୁ କରିବେ ବୋଲି କହିଥିଲେ। ବର୍ତ୍ତମାନ ଜନଗଣନା ଚାଲୁ ରହିଥିବା ବେଳେ ବର୍ତ୍ତମାନର ସ୍ୱତନ୍ତ୍ର ଅଧିବେଶନ ଡାକିବାର ଅଭିପ୍ରାୟ କଣ ଥିଲା। କେନ୍ଦ୍ର ସରକାର ମହିଳାଙ୍କ ସହ ଅନ୍ୟାୟ କରୁଛନ୍ତି। ବର୍ତ୍ତମାନ ଥିବା ୫୪୩ ଲୋକସଭା ସିଟରେ ଆପଣ କାହିିଁକି ସଂରକ୍ଷଣ ଦେଉନାହାନ୍ତି ବୋଲି ସେ ପ୍ରଶ୍ନ କରିଛନ୍ତି।

ସେହିପରି ବିଜେଡିର ଅନ୍ୟତମ ସାଂସଦ ଡ. ସଂତୃପ୍ତ ମିଶ୍ର କହିଛନ୍ତି ଯେ ଗତକାଲି ଲୋକସଭାରେ ୧୩୧ତମ ସମ୍ୱିଧାନ ସଂଶୋଧନ ବିଲ୍‌ ପାରିତ ନହେବା ଫଳରେ ଦୁଇଟି ମୁଖ୍ୟ ଉଦ୍ଦେଶ୍ୟ ପୂରଣ ହୋଇଛି। ୧୦୬ତମ ସଂଶୋଧନ ଅନୁଯାୟୀ ମହିଳାଙ୍କ ପାଇଁ ସଂରକ୍ଷଣ ପୁନଃ ଏକ ଆଇନ୍‌ ଭାବରେ ବିଜ୍ଞପ୍ତି ହୋଇଛି ଏବଂ ଏକ କାର୍ଯ୍ୟକାରୀ ତାରିଖ ସହିତ ଲାଗୁ ହୋଇଛି, ସେହିପରି ଓଡ଼ିଶାର ଲୋକସଭାରେ ପ୍ରଚଳିତ ପ୍ରତିନିଧିତ୍ୱର ସୁରକ୍ଷା ବଜାୟ ରହିଛି। ଜଟିଳ ଜାତୀୟ ସମସ୍ୟାଗୁଡ଼ିକୁ ସମାଧାନ କରିବା ପାଇଁ ବିଜୁ ଜନତା ଦଳ ସଭାପତି ନବୀନ ପଟ୍ଟନାୟକ କରିଥିବା ପ୍ରଚେଷ୍ଟା ଅଧିକରୁ ଅଧିକ ରାଜନୈତିକ ଦଳଠାରୁ  ଆବଶ୍ୟକତା ରହିଛି। ରାଜନୀତି ଗଣତନ୍ତ୍ର ପାଇଁ ଉଦ୍ଦିଷ୍ଟ , ଗଣତନ୍ତ୍ର ରାଜନୀତିର ସେବା କରିବା ପାଇଁ ନାହିଁ ବୋଲି ସେ କହିଛନ୍ତି।

ସେହିପରି ବିଜେଡିର ଅନ୍ୟତମ ସାଂସଦ ସୁଭାଶିଷ ଖୁଣ୍ଟିଆ କହିଛନ୍ତି ଯେ ଗତକାଲି ସଂସଦରେ ଘଟିଥିବା ଘଟଣା ଦେଶର ଗଣତନ୍ତ୍ରୀୟ ଇତିହାସରେ ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ଭାବେ ଲେଖାଯିବ। ଦେଖିବାକୁ ଗଲେ ଏହା ପ୍ରକୃତରେ ମହିଳା ସଂରକ୍ଷଣ ବିଲ ନଥିଲା। ଏହା କେରଳ, ତାମିଲନାଡୁ ଏବଂ ପଶ୍ଚିମବଙ୍ଗ ବିଧାନସଭା ନିର୍ବାଚନ ଜିତିବା ସକାଶେ ଏକ ଜୁମ୍ଲା ଓ ଅସାଧୁ ଚାଲ ଥିଲା । କାରଣ ମହିଳା ସଂରକ୍ଷଣ ବିଲ ୨୦୨୩ରେ ପାର୍ଲିଆମେଣ୍ଟରେ ସର୍ବସମ୍ମତି କ୍ରମେ ପାରିତ ହୋଇସାରିଛି । ଏହା ମହିଳା ସଂରକ୍ଷଣ ବିଲ୍‌ ନୁହେଁ; ବରଂ ବହୁଚର୍ଚ୍ଚିତ ଓ ବିବାଦୀୟ ଡିଲିମିଟେସନ୍‌ ବିଲ୍‌ (୧୩୧ତମ ସଂବିଧାନ ସଂଶୋଧନ) ସଂସଦରେ ପରାଜିତ ହୋଇଛି। ଏହା ଓଡ଼ିଶା ପରି ରାଜ୍ୟମାନଙ୍କ ପାଇଁ ଏକ ଐତିହାସିକ ଓ ନ୍ୟାୟସଙ୍ଗତ ବିଜୟ, କାରଣ ଏହି ବିଲ୍‌ ପାସ୍‌ ହେଲେ ରାଜ୍ୟର ନ୍ୟାଯ୍ୟ ଅଧିକାର ଓ ପ୍ରତିନିଧିତ୍ୱ ଗୁରୁତର ଭାବେ ପ୍ରଭାବିତ ହେବାର ଆଶଙ୍କା ଥିଲା।

ଏହି ସମ୍ୱେଦନଶୀଳ ଓ ରାଜ୍ୟର ଭବିଷ୍ୟତ ସହ ଜଡ଼ିତ ବିଷୟରେ ଆମର ନେତା ନବୀନ ପଟ୍ଟନାୟକଙ୍କ ଦୃଢ଼ ନେତୃତ୍ୱ ଓ ଦୂରଦର୍ଶୀତାର ପରିଚୟ ଦେଇଛନ୍ତି। ସେ କେବଳ ଏହି ବିଲ୍‌ ବିରୋଧରେ ଜୋରଦାର ଆପତ୍ତି ଜଣାଇନଥିଲେ, ବରଂ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଚିଠି ଲେଖି ଦଳୀୟ ସୀମାରୁ ଉଦ୍ଧ୍ୱର୍କୁ  ଯାଇ ଏକତାବଦ୍ଧ ଭାବେ ରାଜ୍ୟର ସ୍ୱାର୍ଥ ସୁରକ୍ଷା ଦିଗରେ ଲଢ଼ିବା ପାଇଁ ଆହ୍ୱାନ କରିଥିଲେ। ତାଙ୍କର ଏହି ଦୂରଦର୍ଶୀ ପଦକ୍ଷେପ ଏକ ଦକ୍ଷ ରାଜନେତାର ଦାୟିତ୍ୱବୋଧ ଓ ଲୋକହିତ ପ୍ରତି ଅଙ୍ଗୀକାରକୁ ପ୍ରକାଶ କରେ। କିନ୍ତୁ ଦୁଃଖର କଥା ଓଡ଼ିଶାର ୨୦ ଜଣ ବିଜେପି ଲୋକସଭା ସାଂସଦ ଏହି ସମ୍ୱେଦନଶୀଳ ମୁହୂର୍ତ୍ତରେ ରାଜ୍ୟର ହିତରେ ଦୃଢ଼ ଭାବେ ଠିଆ ହୋଇପାରିଲେ ନାହିଁ। ଅଧିକନ୍ତୁ ଆମ ନେତା ନବୀନ ବାବୁଙ୍କୁ ବିଭିନ୍ନ ଗଣମାଧ୍ୟମ ଜରିଆରେ ସମାଲୋଚନା କଲେ। ସେମାନେ ରାଜ୍ୟର ଅଧିକାର ଓ ଲୋକଙ୍କର ଆକାଂକ୍ଷାକୁ ପ୍ରାଥମିକତା ଦେବା ପ୍ରତି ଅବହେଳା କରି, ଦଳୀୟ ନିର୍ଦ୍ଦେଶକୁ ଅଧିକ ଗୁରୁତ୍ୱ ଦେଉଥିବା ଦେଖାଗଲା। ଏହା ଓଡ଼ିଶାବାସୀଙ୍କ ଆଶା ଓ ବିଶ୍ୱାସକୁ ନିରାଶ କରିଛି। ତଥାପି ଏହି ପରିସ୍ଥିତିରେ ସତ୍ୟ ଓ ନ୍ୟାୟର ବିଜୟ ହୋଇଛି। ସଂସଦରେ ସୀମିତ ପ୍ରତିନିଧିତ୍ୱ ଥିଲେ ମଧ୍ୟ, ଆମେ ଗର୍ବ କରୁଛୁ ଯେ ଆମର ନେତୃତ୍ୱ ନିରନ୍ତର ଭାବେ ଓଡ଼ିଶାର ଅଧିକାର, ସମ୍ମାନ ଓ ଭବିଷ୍ୟତ ପାଇଁ ଲଢ଼ୁଛି। ଏହା ଆମ ସମସ୍ତଙ୍କୁ ଏକତାବଦ୍ଧ ହୋଇ ରାଜ୍ୟର ହିତରେ ସଚେତନ ଓ ସକ୍ରିୟ ରହିବାକୁ ପ୍ରେରଣା ଦେଉଛି ବୋଲି ସେ କହିଛନ୍ତି।

ଭୁବନେଶ୍ୱର: ରାଜଧାନୀ ଦିଲ୍ଲୀରେ ‘ଓଡ଼ିଶା ସାଂସ୍କୃତିକ କେନ୍ଦ୍ର ଓ ଐତିହ୍ୟ ଲାଇବ୍ରେରୀ’ ସ୍ଥାପନ ସମ୍ପର୍କରେ କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ସଂସଦରେ ସାଂସଦ ମାନସ ରଞ୍ଜନ ମଙ୍ଗରାଜଙ୍କ ପ୍ରଶ୍ନର ଉତ୍ତର ଦେଇ କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ କହିଛନ୍ତି ଯେ ନୂଆଦିଲ୍ଲୀରେ ଏକ ନିର୍ଦ୍ଦିଷ୍ଟ ‘ଓଡ଼ିଶା ସାଂସ୍କୃତିକ କେନ୍ଦ୍ର ଓ ଐତିହ୍ୟ ଲାଇବ୍ରେରୀ’ ପ୍ରତିଷ୍ଠା ପାଇଁ ଓଡ଼ିଶା ସରକାରଙ୍କ ପକ୍ଷରୁ କୌଣସି ପ୍ରସ୍ତାବ ମନ୍ତ୍ରଣାଳୟ ପାଖକୁ ଆସିନାହିଁ। ମନ୍ତ୍ରୀ ଆହୁରି କହିଛନ୍ତି ଯେ ଏପରି କୌଣସି ପ୍ରସ୍ତାବ ବର୍ତ୍ତମାନ କେନ୍ଦ୍ର ସରକାରଙ୍କ ନିକଟରେ ମଧ୍ୟ ବିଚାରାଧୀନ ନାହିଁ ଓ ଏହା ସମ୍ୱନ୍ଧରେ କୌଣସି ସମୟସୀମା ନିର୍ଦ୍ଧାରିତ ହୋଇନାହିଁ। ତେଣୁ ନିକଟ ଭବିଷ୍ୟତରେ ଏହି ପ୍ରକଳ୍ପ କାର୍ଯ୍ୟକାରୀ ହେବା ସମ୍ଭାବନା ନାହିଁ ବୋଲି ସ୍ପଷ୍ଟ ହୋଇଛି। 

ଗୁରୁବାର ରାଜ୍ୟସଭାରେ ସାଂସଦ ଶ୍ରୀ ମଙ୍ଗରାଜ, ଓଡ଼ିଶା ସରକାରଙ୍କ ଦ୍ୱାରା ନୂଆଦିଲ୍ଲୀରେ ଏକ ନିର୍ଦ୍ଦିଷ୍ଟ ‘ଓଡ଼ିଶା ସାଂସ୍କୃତିକ କେନ୍ଦ୍ର ଓ ଐତିହ୍ୟ ଲାଇବ୍ରେରୀ’ ସ୍ଥାପନ ପାଇଁ କୌଣସି ପ୍ରସ୍ତାବ ମନ୍ତ୍ରଣାଳୟ ପାଖକୁ ଆସିଛି କି ବୋଲି ପ୍ରଶ୍ନ କରିଥିଲେ। ଏହାସହ ଯଦି ପ୍ରସ୍ତାବ ଆସିଥାଏ, ତେବେ ଏହାର ବିବରଣୀ ଏବଂ ଏହାର ପରୀକ୍ଷଣ/ଅନୁମୋଦନର ବର୍ତ୍ତମାନ ସ୍ଥିତି କ’ଣ ଜଣାଇବାକୁ ଆଗ୍ରହ ପ୍ରକାଶ କରିଥିଲେ। ଯଦି ନାହିଁ, ତେବେ କେନ୍ଦ୍ର ସରକାର କୌଣସି ଯୋଜନା ଅଧୀନରେ କିମ୍ୱା ଓଡ଼ିଶା ସରକାର ସହ ମିଳିତ ଭାବେ ଏହି ପଦକ୍ଷେପ ନେବେ କି? ଉକ୍ତ ସାଂସ୍କୃତିକ କେନ୍ଦ୍ର ଓ ଐତିହ୍ୟ ଲାଇବ୍ରେରୀ କେବେ ସ୍ଥାପିତ ହେବାର ସମ୍ଭାବନା ଅଛି ବୋଲି ଜଣାଇବାକୁ ପ୍ରଶ୍ନ କରିଥିଲେ। ଏହାର ଉତ୍ତରେ ମନ୍ତ୍ରୀ ଶ୍ରୀ ଶେଖାୱତ ଉପରୋକ୍ତ ତଥ୍ୟ ସହ ଏନେଇ କୌଣସି ଯୋଜନା ନାହିଁ ବୋଲି ସ୍ପଷ୍ଟ କରିଛନ୍ତି।

ମନ୍ତ୍ରୀ ଆହୁରି କହିଛନ୍ତି, ଦେଶର ବିଭିନ୍ନ ରାଜ୍ୟର ଲୋକକଳା ଓ ସଂସ୍କୃତିକୁ ପ୍ରୋତ୍ସାହନ ଦେବା ପାଇଁ ପ୍ରୟାଗରାଜଠାରେ ଉତ୍ତର କେନ୍ଦ୍ରାଞ୍ଚଳ ସାଂସ୍କୃତିକ କେନ୍ଦ୍ର ମାଧ୍ୟମରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି। ଏହି ପରିସ୍ଥିତିରେ ଓଡ଼ିଶାର ଏକ ସ୍ୱତନ୍ତ୍ର ସାଂସ୍କୃତିକ କେନ୍ଦ୍ର ସ୍ଥାପନ ପାଇଁ ପ୍ରଥମେ ରାଜ୍ୟ ସରକାରଙ୍କ ପକ୍ଷରୁ ପ୍ରସ୍ତାବ ଆସିବା ଆବଶ୍ୟକ ବୋଲି ମନ୍ତ୍ରଣାଳୟ ସୂଚନା ଦେଇଛି।

ଭୁବନେଶ୍ୱର: ଆୟୁଷ୍ମାନ ଭାରତ ସ୍ୱାସ୍ଥ୍ୟ ଭିତ୍ତିଭୂମି ମିଶନରେ କେନ୍ଦ୍ର ସରକାରଙ୍କ ପକ୍ଷରୁ ଲଗାତାର ଭାବେ ଓଡ଼ିଶାକୁ ଅର୍ଥ କମ୍‌ ମଞ୍ଜୁର କରାଯାଉଛି। ୨୦୨୨-୨୩ ମସିହାରେ ୨୧୧କୋଟି ଟଙ୍କା କେନ୍ଦ୍ରୀୟ ଅନୁଦାନ ମଞ୍ଜୁର କରାଯାଇଥିଲା ବେଳେ ୨୦୨୩-୨୪ ମସିହାରେ ୧୭୧ କୋଟି ଟଙ୍କା ଅନୁଦାନ ମିଳିଛି। ସେହିପରି ୨୦୨୪-୨୫ରେ ଏହା ଆହୁରି ହ୍ରାସ ପାଇଛି ଓ ଅନୁଦାନ ମାତ୍ର ୧୪୯ କୋଟିରେ ପହଞ୍ଚିଛି। ରାଜ୍ୟରେ ସ୍ୱାସ୍ଥ୍ୟ ବ୍ୟବସ୍ଥା ପ୍ରତି ସମ୍ବେଦନଶୀଳତା ବଢୁଥିଲା ବେଳେ ଭିତ୍ତିଭୂମି ମିଶନରେ ଏଭଳି କେନ୍ଦ୍ରୀୟ ଅନୁଦାନ ହ୍ରାସକୁ ନେଇ ସଂସଦରେ ଉଦ୍‌ବେଗ ପ୍ରକାଶ କରିଛନ୍ତି ନେଇ ରାଜ୍ୟସଭା ସାଂସଦ ମାନସ ମଙ୍ଗରାଜ। ୨୦୨୨ ମସିହାରୁ ୨୦୨୫ ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ବିଭିନ୍ନ ସ୍ୱାସ୍ଥ୍ୟ ଯୋଜନାରେ ମୋଟ କେତେ କେନ୍ଦ୍ରୀୟ ଗ୍ରାଣ୍ଟ୍‌ ପ୍ରଦାନ କରାଯାଇଛି। ଯୋଜନା-ୱାରୀ ଏବଂ କ୍ଷେତ୍ର-ୱାରୀ ବିଭକ୍ତୀକରଣ ଓ କେନ୍ଦ୍ର ପକ୍ଷରୁ ଓଡ଼ିଶାକୁ ଅତିରିକ୍ତ ରାଶି ପ୍ରଦାନ ପ୍ରସଙ୍ଗରେ କେଉଁ ପଦକ୍ଷେପ ଗ୍ରହଣ କରାଯାଉଛି ବୋଲି ଶ୍ରୀ ମଙ୍ଗରାଜ ପ୍ରଶ୍ନ କରିଛନ୍ତି । 

କେନ୍ଦ୍ରସ୍ୱାସ୍ଥ୍ୟ ମନ୍ତ୍ରୀ ପ୍ରତାପ ରାଓ ଯାଦବ କହିଛନ୍ତି ଯେ  ସମାନ, ସୁଲଭ ଏବଂ ଗୁଣାତ୍ମକ ସ୍ୱାସ୍ଥ୍ୟସେବା ସେବା ପାଇଁ ସାର୍ବଜନୀନ ପ୍ରବେଶ ହାସଲ କରିବା ଲକ୍ଷ୍ୟରେ, ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଜାତୀୟ ସ୍ୱାସ୍ଥ୍ୟ ମିଶନ କାର୍ଯ୍ୟକାରୀ କରୁଛି। ସରକାର ରାଜ୍ୟ, କେନ୍ଦ୍ରଶାସିତ ପ୍ରଦେଶଗୁଡ଼ିକୁ ସ୍ୱାସ୍ଥ୍ୟ ଭିତ୍ତିଭୂମିରେ ଉନ୍ନତି, ସ୍ୱାସ୍ଥ୍ୟ ସୁବିଧା ପାଇଁ ପର୍ଯ୍ୟାପ୍ତ ମାନବ ସମ୍ୱଳର ଉପଲବ୍ଧତା, ବିଶେଷକରି ଅବହେଳିତ ଏବଂ ଅବହେଳିତ ଗୋଷ୍ଠୀ ପାଇଁ ଗୁଣାତ୍ମକ ସ୍ୱାସ୍ଥ୍ୟସେବାର ଉପଲବ୍ଧତା ଏବଂ ସୁଗମତାକୁ ଉନ୍ନତ କରିବା ପାଇଁ ବୈଷୟିକ ଏବଂ ଆର୍ଥିକ ସହାୟତା ପ୍ରଦାନ କରନ୍ତି। ପ୍ରଧାନମନ୍ତ୍ରୀ ଆୟୁଷ୍ମାନ ଭାରତ ସ୍ୱାସ୍ଥ୍ୟ ଭିତ୍ତିଭୂମି ମିଶନ(ପିଏମ୍‌ ଅଭିମ୍‌) ଏକ କେନ୍ଦ୍ରୀୟ ପ୍ରାୟୋଜିତ ଯୋଜନ;  ଯାହା କିଛି କେନ୍ଦ୍ରୀୟ କ୍ଷେତ୍ର ଉପାଦାନ ସହିତ ରହିଛି ଯାହାର ଯୋଜନା ଅବଧି (୨୦୨୧-୨୨ ରୁ ୨୦୨୫-୨୬) ପାଇଁ ୬୪,୧୮୦ କୋଟି ଟଙ୍କା ବ୍ୟୟବରାଦ ହୋଇଛି। ପିଏମ୍‌ ଅଭିମ୍‌ ଅଧୀନରେ ପଦକ୍ଷେପଗୁଡ଼ିକ ପ୍ରାଥମିକ, ମାଧ୍ୟମିକ ଏବଂ ତୃତୀୟ ସ୍ତରର ସମସ୍ତ ସ୍ୱାସ୍ଥ୍ୟ ବ୍ୟବସ୍ଥା ଏବଂ ପ୍ରତିଷ୍ଠାନଗୁଡ଼ିକର ଦକ୍ଷତା ବିକାଶ ଉପରେ ଧ୍ୟାନ କେନ୍ଦ୍ରିତ କରେ, ଯାହା ଦ୍ୱାରା ସ୍ୱାସ୍ଥ୍ୟ ବ୍ୟବସ୍ଥାକୁ ବର୍ତ୍ତମାନ ଏବଂ ଭବିଷ୍ୟତର ମହାମାରୀ ବା ବିପର୍ଯ୍ୟୟର ପ୍ରଭାବଶାଳୀ ପ୍ରତିକ୍ରିୟା ପାଇଁ ପ୍ରସ୍ତୁତ କରାଯାଇପାରିବ। ପିଏମ-ଅଭିମ୍‌ରେ ରାଜ୍ୟକୁ ଲଗାତାର କମ୍‌ ଅର୍ଥ ରିଲିଜ କରାଯାଇଥିବା ସେ ସ୍ୱୀକାର କରିଛନ୍ତି । ତେବେ  ଜାତୀୟ ସ୍ୱାସ୍ଥ୍ୟ ମିଶନରେ ରାଜ୍ୟକୁ ଅଧିକ ଅର୍ଥ ଦିଆଯାଇଥିବା ଉଲ୍ଲେଖ କରି ମନ୍ତ୍ରୀ ଆୟୁଷ୍ମାନ ଭାରତ ସ୍ୱାସ୍ଥ୍ୟ ଭିତ୍ତିଭୂମି ପ୍ରସଙ୍ଗକୁ ଏଡ଼ାଇ ଯାଇଛନ୍ତି । 

ଭୁବନେଶ୍ୱର: ଓଡ଼ିଶାରେ କ୍ରୀଡ଼ା ଭିତ୍ତିଭୂମି ବିକାଶ ପାଇଁ କେନ୍ଦ୍ରକୁ ରାଜ୍ୟ ସରକାର କିଛି ପ୍ରସ୍ତାବ ଦେଇଛନ୍ତି କି? ଯଦି ହଁ ତାହେଲେ ଗତ ୩ ବର୍ଷରେ କେତୋଟି ପ୍ରସ୍ତାବ ବାବଦରେ କେତେ ଅର୍ଥ ପ୍ରଦାନ କରିଛନ୍ତି? ଆକାଂକ୍ଷୀ ଜିଲ୍ଲାରେ କ୍ରୀଡ଼ା ଭିତ୍ତିଭୂମି ବିକାଶ ପାଇଁ କେନ୍ଦ୍ର ସରକାର କଣସବୁ ପଦକ୍ଷେପ ନେଇଛନ୍ତି? ଆଜି ରାଜ୍ୟସଭାରେ ଅଣତାରକା ପ୍ରଶ୍ନ ଜରିଆରେ କେନ୍ଦ୍ର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରୀଙ୍କୁ ଏପରି ପ୍ରଶ୍ନ ପଚାରିଥିଲେ ସାଂସଦ ମାନସ ରଞ୍ଜନ ମଙ୍ଗରାଜ। ଲିଖିତ ଜବାବରେ କେନ୍ଦ୍ରମନ୍ତ୍ରୀ ମନସୁଖ ମାଣ୍ଡଭ୍ୟ କହିଛନ୍ତି, କ୍ରୀଡ଼ା ହେଉଛି ରାଜ୍ୟ ବିଷୟ। କ୍ରୀଡ଼ା ଭିତ୍ତିଭୂମି ବିକାଶ କରିବା ରାଜ୍ଯ ସରକାରଙ୍କ ଦାୟିତ୍ବ। ଏପରିକି କୌଣସି ଷ୍ଟାଡିୟମର ପୁନରୁଦ୍ଧାର ଓ ଅପଗ୍ରେଡେସନ ରାଜ୍ୟ ସରକାରଙ୍କ ପରିସରଭୁକ୍ତ। କେନ୍ଦ୍ର ସରକାର ରାଜ୍ୟମାନଙ୍କ ପ୍ରସ୍ତାବ ଆଧାରରେ ଆର୍ଥିକ ସହାୟତା ପାଇଁ କ୍ରିଟିକାଲ ଗ୍ୟାପ ଫଣ୍ଡିଂ କରିଥାନ୍ତି। ଖେଲୋ ଇଣ୍ଡିଆ ଓ ଜାତୀୟ କ୍ରୀଡ଼ା ବିକାଶ ପାଣ୍ଠି ଅନ୍ତର୍ଗତ ଓଡ଼ିଶାକୁ ଗତ ୩ ବର୍ଷରେ ମୋଚ ୬ ହଜାର ୬୨୧ କୋଟି ୫ ଲକ୍ଷ ଟଙ୍କା ପ୍ରଦାନ କରାଯାଇଛି। ସେଥିରୁ ମୋଟ ୬ ହଜାର ୩୪୬ କୋଟି ୩୧ ଲକ୍ଷ ଟଙ୍କା ଖର୍ଚ୍ଚ ହୋଇଛି।

ନୂଆଦିଲ୍ଲୀ: କୋଇଲା ରୟାଲଟିରେ ଓଡ଼ିଶା ପାଉନି ହକ । ଓଡ଼ିଶା ପ୍ରତି ଅନ୍ୟାୟ କରାଯାଉଛି । ଏପରି ଅଭିଯୋଗ କରି ଆଜି ଶୂନ୍ୟକାଳରେ ରାଜ୍ୟସଭାରେ ଏହି ପ୍ରସଙ୍ଗ ଉଠାଇ ଚିନ୍ତା ପ୍ରକଟ କରିଛନ୍ତି ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜ ।

ମାନସ ପ୍ରସଙ୍ଗ ଉଠାଇବା ସହ କହିଛନ୍ତି, କୋଇଲା ଉତ୍ପାଦନରେ ନିରନ୍ତର ବୃଦ୍ଧି, ମୁଦ୍ରାସ୍ଫୀତିରେ ବୃଦ୍ଧି, ପରିଚାଳନା ଖର୍ଚ୍ଚରେ ବୃଦ୍ଧି ସତ୍ତ୍ବେ ଗତ ୧୦ ବର୍ଷ ହେଲା କୋଇଲା ରୟାଲଟି ଦର ନିର୍ଣ୍ଣୟ ନେଇ ସଂଶୋଧନ କରାଯାଇନି । ଏହି ବିଳମ୍ବ ସକାଶେ ରାଜ୍ୟ ବାର୍ଷିକ ୧୦ ହଜାର କୋଟି ଟଙ୍କାର କ୍ଷତି ସହୁଛି । ଯାହାଦ୍ବାରା ରାଜ୍ୟର ବିକାଶ ଓ ଜନକଲ୍ଯାଣକାରୀ ବିନିଯୋଗ ପ୍ରଭାବିତ ହେଉଛି ।

ସେ କହିଛନ୍ତି, ଓଡି଼ଶାରୁ କୋଇଲା ଆଣି ଦେଶ ବେଶ ଅର୍ଥ କମାଉଥିବାବେଳେ ଓଡ଼ିଶାକୁ କିନ୍ତୁ ବହୁମୂଲ୍ୟ ଦେବାକୁ ପଡୁଛି । କୋଇଲା ଖଣି ଅଞ୍ଚଳରେ ଲୋକେ ବାୟୁ ପ୍ରଦୂଷଣ, ଜଙ୍ଗଲ ଉଚ୍ଛେଦ, ବିଷାକ୍ତ ପାଣି ସହ ବିସ୍ଥାପନ ସମସ୍ୟା ଭୋଗୁଛନ୍ତି । ତେଣୁ ଦେଶକୁ ଅଧିକ ଅର୍ଥ ଯୋଗାଉଥିବା ଏକ ଖଣିଜ ସମ୍ପଦ ଭରା ରାଜ୍ୟ ଆର୍ଥିକ ଦୃଷ୍ଟିରୁ ପଛୁଆ ରହିବା ଉଚିତ ନୁହେଁ । ତେଣୁ ତୁରନ୍ତ କୋଇଲା ରୟାଲଟି ଦରରେ ସଂଶୋଧନ କରିବାକୁ ସେ ଦାବି କରିଛନ୍ତି । ସେଗୁଡିକୁ ବଜାର ମୂଲ୍ୟ ଓ ମୁଦ୍ରାସ୍ଫୀତି ସହିତ ସଂଯୋଗ କରିବାକୁ ସେ ଦାବି କରିଛନ୍ତି । ଯାହାଦ୍ବାରା ରାଜ୍ୟରେ ନିରନ୍ତର ବିକାଶ ହେବା ସହ ସଂଘୀୟ ବ୍ଯବସ୍ଥା କାଏମ ରହିପାରିବ ବୋଲି ସେ କହିଛନ୍ତି ।

ଭୁବନେଶ୍ୱର: ରାଜ୍ୟର ମୋଟ ୧୨୭ଟି ପ୍ରକଳ୍ପ ପରିବେଶ ମଞ୍ଜୁରୀ ଅପେକ୍ଷାରେ ରହିଛି। ଉଭୟ ରାଜ୍ୟ ଓ କେନ୍ଦ୍ର ମନ୍ତ୍ରଣାଳୟ ନିକଟରେ ଏହି ପ୍ରକଳ୍ପଗୁଡ଼ିକ ବିଚାରାଧୀନ ଅବସ୍ଥାରେ ରହିଛି ବୋଲି ଗୁରୁବାର ରାଜ୍ୟସଭାରେ ବିଜେଡି ସାଂସଦ ମାନସ ରଞ୍ଜନ ମଙ୍ଗରାଜଙ୍କ ପ୍ରଶ୍ନରେ ଉତ୍ତର ଦେଇ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳଯର ରାଷ୍ଟ୍ର ମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂ କହିଛନ୍ତି। 

ଓଡ଼ିଶାର ଶିଳ୍ପ, ଖଣି ଓ ଭିତ୍ତିଭୂମି ଆଦି ସମ୍ପର୍କିତ କେତୋଟି ପ୍ରକଳ୍ପ ପରିବେଶ ଅନୁମତି ଅପେକ୍ଷାରେ ରହିଛି। ଏଭଳି ପ୍ରକଳ୍ପଗୁଡ଼ିକୁ ମଞ୍ଜୁରି ଦେବାରେ ବିଳମ୍ୱ ହେବାର ପ୍ରମୁଖ କାରଣ ସହ ଅଧିକ ଖଣିଜ ନିର୍ଭରଶୀଳତା ଥିବା ଓଡ଼ିଶା ଭଳି ରାଜ୍ୟଗୁଡ଼ିକ ପାଇଁ ପରିବେଶ ମଞ୍ଜୁରି ପ୍ରକ୍ରିୟାକୁ ତ୍ୱରାନ୍ୱିତ କରିବା ଲାଗି ସରକାର କୌଣସି ପଦକ୍ଷେପ ନେଇଛନ୍ତି କି ବୋଲି ଶ୍ରୀ ମଙ୍ଗରାଜ ପ୍ରଶ୍ନ କରିଥିଲେ। ଏହା ବ୍ୟତୀତ ପ୍ରକଳ୍ପଗୁଡ଼ିକ ମଞ୍ଜୁରି ପରେ ଏହା ଯେପରି ସ୍ଥାନୀୟ ସମୁଦାୟଙ୍କ ପରିବେଶ ସନ୍ତୁଳନ ବଜାୟ ରଖିବ ଏବଂ ଜଙ୍ଗଲ ଅଧିକାରକୁ ସୁନିଶ୍ଚିତ ରଖିବ, ସେନେଇ କେଉଁ ପଦକ୍ଷେପ ନିଆଯାଉଛି ସେ ବିଷୟରେ ଅବଗତ କରାଇବାକୁ ଶ୍ରୀ ମଙ୍ଗରାଜ ପ୍ରଶ୍ନ କରିଥିଲେ। 

ଏହାର ଉତ୍ତରରେ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳଯର ରାଷ୍ଟ୍ର ମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂ କହିଛନ୍ତି, ପରିବେଶ ପ୍ରଭାବ ଆକଳନ (ଇଆଇଏ) ବିଜ୍ଞପ୍ତି ୨୦୦୬ର ସଂଶୋଧିତ ବ୍ୟବସ୍ଥା ଅନୁଯାୟୀ, ପ୍ରକଳ୍ପଗୁଡ଼ିକ ସହିତ ଜଡ଼ିତ ସମସ୍ତ ପରିବେଶଗତ ପ୍ରଭାବକୁ ବିଚାରକୁ ନେଇ ବିଶେଷଜ୍ଞ ମୂଲ୍ୟାଙ୍କନ କମିଟି (ଇଏସି) କିମ୍ୱା ରାଜ୍ୟସ୍ତରୀୟ ବିଶେଷଜ୍ଞ ମୂଲ୍ୟାଙ୍କନ କମିଟି (ଏସ୍‌ଇଏସି) ଦ୍ୱାରା ପ୍ରସ୍ତାବଗୁଡ଼ିକର ମୂଲ୍ୟାଙ୍କନ କରାଯାଇଥାଏ। ଇଏସି/ଏସ୍‌ଇଏସିର ସୁପାରିସ ଆଧାରରେ ପ୍ରକଳ୍ପଗୁଡ଼ିକୁ ମନ୍ତ୍ରଣାଳୟ କିମ୍ୱା ରାଜ୍ୟ ପରିବେଶ ପ୍ରଭାବ ଆକଳନ ପ୍ରାଧିକରଣ (ଏସ୍‌ଇଆଇଏଏ) ଦ୍ୱାରା ପରିବେଶ ମଞ୍ଜୁରୀର ଅନୁମୋଦନ କରାଯାଏ। ତେବେ ‘ପରିବେଶ’ ପୋର୍ଟାଲରେ ଉପଲବ୍ଧ ତଥ୍ୟ ଅନୁଯାୟୀ, ଗତ ୧୨ ତାରିଖ ସୁଦ୍ଧା ଓଡ଼ିଶାର ଶିଳ୍ପ, ଖଣି ଏବଂ ଭିତ୍ତିଭୂମି  ସମ୍ୱନ୍ଧୀୟ ମୋଟ ୧୨୭ଟି ପ୍ରକଳ୍ପ ପରିବେଶ ମଞ୍ଜୁରୀ ପାଇଁ ରହିଛି। ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ପରିବେଶ ସମ୍ୱନ୍ଧୀୟ ପ୍ରସଙ୍ଗ ଉପରେ ବିଚାର କରିବା ଏବଂ ପରିବେଶ ପରିଚାଳନା ଯୋଜନା (ଇଏମ୍‌ପି) ରେ ନିର୍ଦ୍ଧାରିତ ପ୍ରଶମନ ପଦକ୍ଷେପ ସମେତ ଉପଯୁକ୍ତ ପରିବେଶ ସୁରକ୍ଷା ବ୍ୟବସ୍ଥା ଅନ୍ତର୍ଭୁକ୍ତ କରିବା ପରେ ଏଗୁଡ଼ିକୁ ପରିବେଶ ମଞ୍ଜୁରୀ ପ୍ରଦାନ କରାଯାଇଥାଏ ବୋଲି ମନ୍ତ୍ରୀ ସୂଚନା ଦେଇଛନ୍ତି।

ଭୁବନେଶ୍ୱର: ରାଜ୍ୟରେ ଆୟୁଷ ଭିତ୍ତିଭୂମିରେ ସୁଧାର ଆସିବାରେ ନାଆଁ ଧରୁନି। ଖାଲିଥିବା ଆୟୁଷ ପଦଗୁଡ଼ିକ ପୂରଣ ହେଉନାହିଁ। ନିଯୁକ୍ତି ଅପେକ୍ଷାରେ ଥିବା ଯୁବକଯୁବତୀଙ୍କୁ ନିଯୁକ୍ତି ମିଳୁନାହିଁ । ଏହି ପ୍ରସଙ୍ଗକୁ ନେଇ ରାଜ୍ୟସଭାରେ ଉଦ୍‌ବେଗ ପ୍ରକାଶ କରିଛନ୍ତି ସାଂସଦ ମାନସ ମଙ୍ଗରାଜ।  

ମଙ୍ଗଳବାର ରାଜ୍ୟସଭାରେ ଶ୍ରୀ ମଙ୍ଗରାଜ ଓଡ଼ିଶାରେ କେତେ ସଂଖ୍ୟକ ଆୟୁଷ ହସ୍ପିଟାଲ, ଡିସ୍ପେନ୍‌ସରୀ,  ୱେଲ୍‌ନେସ୍‌ ସେଣ୍ଟର ରହିଛି ଓ କେତେ ଡାକ୍ତର, ଫାର୍ମାସିଷ୍ଟ୍‌ ଏବଂ ପାରାମେଡିକାଲ୍‌ ପଦ ଖାଲି ରହିଛି ବୋଲି ପ୍ରଶ୍ନ ଉଠାଇଛନ୍ତି। ଏହା ସହିତ ଆୟୁଷ ପଦବୀ ପୂରଣ ପାଇଁ ନେଇଥିବା ପଦକ୍ଷେପ ଓ ଓଡ଼ିଶା  ସରକାର ଆୟୁଷ ଭିତ୍ତିଭୂମି ସୁଦୃଢ଼ କରିବାକୁ ଦେଇଥିବା ପ୍ରସ୍ତାବ ଅଟକିଛି କି ବୋଲି ପ୍ରଶ୍ନ କରିଥିଲେ।

ଏହାର ଉତ୍ତରରେ ବିଭାଗୀୟ ମନ୍ତ୍ରୀ ପ୍ରତାପରାଓ ଯାଦବ କହିଛନ୍ତି ଯେ ଓଡ଼ିଶାରେ ମୋଟ୍‌ ୭ଟି ଆୟୁଷ ହସ୍ପିଟାଲ ରହିଛି। ସେହିପରି ୧୧୯୧ ଡିେସ୍ପେନ୍‌ସରୀ, ୧୪୮୫ ଆୟୁଷ ୟୁନିଟ୍‌ ରହିଛି। କେନ୍ଦ୍ରୀୟ ଯୋଜନା ଅଧୀନରେ ଓଡ଼ିଶାରେ ଜାତୀୟ ଆୟୁଷ ମିଶନ ଚାଲୁଛି। ଏହି ଯୋଜନା ଅଧୀନରେ ରାଜ୍ୟ ସରକାର ୫୦ ଶଯ୍ୟା, ୩୦ ଶଯ୍ୟା ଓ ୧୦ ଶଯ୍ୟା ବିଶିଷ୍ଟ ସାମଗ୍ରିକ ହସ୍ପିଟାଲ ନିର୍ମାଣ କରି ପାରିବେ ଏବଂ ଡାକ୍ତର, ଫାର୍ମାସିଷ୍ଟ୍‌ ଏବଂ ପାରାମେଡିକାଲ୍‌ଙ୍କୁ ନିଯୁକ୍ତି କରିପାରିବେ। ମାତ୍ର ଏଥିପାଇଁ ରାଜ୍ୟ ସରକାର ମାର୍ଗଦର୍ଶିକା ଅନୁସାରେ ଆଗୁଆ ରାଜ୍ୟସ୍ତରୀୟ ବାର୍ଷିକ ଆକ୍ସନ ପ୍ଲାନ୍‌ ଦାଖଲ କରିବା ଆବଶ୍ୟକ।

ଭୁବନେଶ୍ୱର: ନିକଟ ଭବିଷ୍ୟତରେ ପେଟ୍ରୋଲ-ଡ଼ିଜେଲ ମୂଲ୍ୟ କମିବାର ସମ୍ଭାବନା ନାହିଁ। ଏପରିକି ଏହି ଦୁଇ ପେଟ୍ରୋଲିୟମ ସାମଗ୍ରୀକୁ ଜିଏସ୍‌ଟି ପରିସରଭୁକ୍ତ କରିବାର କୌଣସି ସମ୍ଭାବନା ନାହିଁ ବୋଲି ରାଜ୍ୟସଭାରେ ସ୍ପଷ୍ଟ ସୂଚନା ଦେଇଛନ୍ତି କେନ୍ଦ୍ର ପେଟ୍ରୋଲିୟମ ଓ ପ୍ରାକୃତି ଗ୍ୟାସ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ସୁରେଶ ଗୋପୀ।
  
ରାଜ୍ୟସଭାରେ ସାଂସଦ ମାନସ ମଙ୍ଗରାଜ ସାରା ଦେଶରେ ତୈଳ ଦରର ସମାନତା ସୁନିଶ୍ଚିତ ନିମନ୍ତେ ପେଟ୍ରୋଲ ଓ ଡ଼ିଜେଲକୁ ଜିଏସ୍‌ଟି ପରିସରଭୁକ୍ତ କରିବାକୁ ଦାବି କରିଥିଲେ। ଏହା ସହିତ ଏହାକୁ ଜିଏସ୍‌ଟି ପରିସରଭୁକ୍ତ କରିବା ଓ ଏଥିପାଇଁ କୌଣସି ନିର୍ଦ୍ଧାରିତ ସମୟ ସୀମା ଧାର୍ଯ୍ୟ ହୋଇଛି କି ନାହିଁ ବୋଲି ପ୍ରଶ୍ନ କରିଥିଲେ। ଯଦି ଏପରି ପ୍ରସ୍ତାବ ନାହିଁ, ତେବେ ଏହାର କାରଣ କ’ଣ ବୋଲି ସେ କେନ୍ଦ୍ର ସରକାରଙ୍କଠାରୁ ଜାଣିବାକୁ ଚାହିଁଥିଲେ। ଏହି ପ୍ରଶ୍ନର ଉତ୍ତରରେ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟର ରାଷ୍ଟ୍ରମନ୍ତ୍ରୀ ସୁରେଶ ଗୋପୀ କହିଛନ୍ତି, ସମ୍ୱିଧାନର ଧାରା ୨୭୯ କ (୫) ଅନୁଯାୟୀ ଜିଏସଟି ପରିଷଦ ପେଟ୍ରୋଲିୟମ କ୍ରୁଡ୍‌, ହାଇ ସ୍ପିଡ୍‌ ଡିଜେଲ୍‌, ମୋଟର ସ୍ପିରିଟ୍‌ (ସାଧାରଣତଃ ପେଟ୍ରୋଲ୍‌ ଭାବେ ପରିଚିତ) ପ୍ରାକୃତିକ ଗ୍ୟାସ୍‌ ଏବଂ ଏଭିଏସନ୍‌ ଟର୍ବାଇନ୍‌ ଫ୍ୟୁଏଲ୍‌ ଉପରେ ଜିଏସଟି କେବେ ଲାଗୁ ହେବ, ତାହାର ତାରିଖ ସୁପାରିଶ କରିବ। ସିଜିଏସଟି ଆଇନ ୨୦୧୭ର ଧାରା ୯ (୨) ଅନୁଯାୟୀ ଏହି ଉତ୍ପାଦଗୁଡ଼ିକୁ ଜିଏସଟିରେ ସାମିଲ କରିବା ପାଇଁ ଜିଏସ୍‌ଟି ପରିଷଦର ସୁପାରିସ ଆବଶ୍ୟକ ହେବ। ମାତ୍ର ଏପର୍ଯ୍ୟନ୍ତ ଜିଏସଟି ପରିଷଦ ଏହି ସାମଗ୍ରୀଗୁଡ଼ିକୁ ଜିଏସଟି ଅଧୀନରେ ଅନ୍ତର୍ଭୁକ୍ତ କରିବା ପାଇଁ କୌଣସି ସୁପାରିଶ କରିନାହାଁନ୍ତି ବୋଲି ମନ୍ତ୍ରୀ ସୂଚନା ଦେଇଛନ୍ତି।

ନୂଆଦିଲ୍ଲୀ : ଜାତୀୟ ବିପର୍ଯ୍ୟୟ ପରିଚାଳନା ପାଣ୍ଠି ବା ଏନଡିଆରଏଫର ବ୍ୟବହାରକୁ ବିକେନ୍ଦ୍ରୀକରଣ କରିବା ବଦଳରେ କେନ୍ଦ୍ର ସରକାର ଏହା ଉପରେ ଅଧିକ ନିୟନ୍ତ୍ରଣ ଜାହିର କରିଛନ୍ତି। ମୂଳ ଆଇନରେ ଜାତୀୟ, ରାଜ୍ୟ ଓ ଜିଲ୍ଲା ସ୍ତରରେ ପଦାଧିକାରୀମାନଙ୍କ ଦାୟିତ୍ବକୁ ଗୁରୁତ୍ବ ଦିଆଯାଇଥିବାବେଳେ ନୂଆ ବିଲରେ ଏସବୁର ବିପରୀତ ଦିଗକୁ ପ୍ରାଧାନ୍ୟ ଦିଆଯାଇଛି। ଏଣୁ ଏହି ବିପର୍ଯ୍ୟୟ ପରିଚାଳନା ସଂଶୋଧନ ବିଲ ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ବୋଲି କହିଛନ୍ତି ରାଜ୍ୟସଭା ସାଂସଦ ମାନସ ମଙ୍ଗରାଜ।

ରାଜ୍ୟସଭାରେ ବିପର୍ଯ୍ୟୟ ପରିଚାଳନା ସଂଶୋଧନ ବିଲ ସମ୍ପର୍କରେ ଆଲୋଚନା ବେଳେ ସାଂସଦ ମାନସ ମଙ୍ଗରାଜ କହିଛନ୍ତି -ଗତ ୨୫ ବର୍ଷରେ ଓଡିଶା ୧୭ଟି ବଡ ବନ୍ୟା, ୧୧ଟି ମରୁଡି, ୧୨ରୁ ଅଧିକ ସାଇକ୍ଲୋନର ସମ୍ମୁଖୀନ ହୋଇଛି। ଏହି ସବୁ କାରଣରୁ ୨୦୦୦ରୁ ୨୦୨୦ ମଧ୍ୟରେ ଓଡ଼ିଶା ୮ ଲକ୍ଷ ୫୦ ହଜାର କୋଟି ଟଙ୍କାର କ୍ଷତି ସହିଛି। କିନ୍ତୁ କେନ୍ଦ୍ର ସରକାର ଏହି କ୍ଷତିର ଏକ ଦଶମାଂଶ ଅର୍ଥାତ ମାତ୍ର ୭ ହଜାର ୫୦୦ କୋଟିରୁ କମ୍ ଟଙ୍କା ଦେଇଛନ୍ତି। କେନ୍ଦ୍ର ସରକାରଙ୍କ ଏହି ନଗଣ୍ୟ ଅନୁଦାନ ଅତ୍ୟନ୍ତ ଦୁଃଖଦାୟକ ଏବଂ ବିପୁଳ କ୍ଷତିର ସମ୍ମୁଖୀନ ହୋଇଥିବା ପୀଡ଼ିତଙ୍କ ଲାଗି ଏକ ଉପହାସ। ତେଣୁ ବିପର୍ଯ୍ୟୟ ପରିଚାଳନ କ୍ଷେତ୍ରରେ କେନ୍ଦ୍ର ସରକାର ନିଜର ମାନସିକତାରେ ପରିବର୍ତ୍ତନ କରନ୍ତୁ ବୋଲି କହିଛନ୍ତି ସାଂସଦ ମାନସ ମଙ୍ଗରାଜ।

ସାଂସଦ ମାନସ ମଙ୍ଗରାଜ ଆହୁରି ମଧ୍ୟ କହିଛନ୍ତି ଯେ  ୨୯ ଅକ୍ଟୋବର ୧୯୯୯ ମହାବାତ୍ୟାରେ ଓଡ଼ିଶା ଭୟଙ୍କର କ୍ଷତିଗ୍ରସ୍ତ ହୋଇଥିଲା। ୧୦ ହଜାର ଲୋକ ପ୍ରାଣ ହରାଇଥିବା ନେଇ ସରକାରୀ ରିପୋର୍ଟ ଥିଲେ ବି ଏହି ସଂଖ୍ୟା ବହୁତ ଅଧିକ ଥିଲା। ଏଥିରେ ୧୩ ଲକ୍ଷ ହେକ୍ଟର ଧାନଚାଷ, ୧ ଲକ୍ଷ ୭୬ ହଜାର ହେକ୍ଟର ଉଦ୍ୟାନ ଚାଷ, ୨ ଲକ୍ଷ ୫୭ ହଜାର ହେକ୍ଟର ଅନ୍ୟାନ୍ୟ ଚାଷ ନଷ୍ଟ ହୋଇଯାଇଥିଲା। ଏସବୁକୁ ଦୃଷ୍ଟିରେ ରଖି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଐତିହାସିକ ବିପର୍ଯ୍ୟୟ ପରିଚାଳନା ନିଷ୍ପତ୍ତି ନେଇଥିଲେ ବୋଲି ସେ କହିଛନ୍ତି। ୨୦୧୩ରେ ଫାଇଲିନ, ୨୦୧୪ରେ ହୁଦହୁଦ, ୨୦୧୮ରେ ତିତଲି, ୨୦୧୯ରେ ଫନି, ୨୦୨୦ରେ ଅମ୍ଫାନ, ୨୦୨୧ରେ ଆସିଥିଲା ସାଇକ୍ଲୋନ ୟାସ। ନବୀନଙ୍କ ଦୃଢ ନେତୃତ୍ବ ବଳରେ ଏହି ସମସ୍ତ ବିପର୍ଯ୍ୟୟର ସଫଳ ମୁକାବିଲା କରାଯାଇଥିଲା। କ୍ଷୟକ୍ଷତି ପରିମାଣ ବି ଉଲ୍ଲେଖନୀୟ ଭାବେ ହ୍ରାସ ପାଇଥିଲା। ଏହି ସଫଳତା କାରଣରୁ ଓଡିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ବା ଓସଡମା କେନ୍ଦ୍ର ସରକାରଙ୍କ ସୁଭାଷ ଚନ୍ଦ୍ର ବୋଷ ଆପଦା ପ୍ରବନ୍ଧନ ପୁରସ୍କାର ଲାଭ କରିଥିଲା। ପ୍ରତି ଜୀବନ ମୂଲ୍ୟବାନ ସଂକ୍ରାନ୍ତ ନବୀନଙ୍କ ବାର୍ତ୍ତାକୁ ବି ଜାତିସଂଘ ପ୍ରଶଂସା କରିଥିଲା।

ଓଡିଶାକୁ ଏକ ବିପର୍ଯ୍ୟୟ ପ୍ରତିରୋଧୀ ରାଜ୍ୟରେ ପରିଣତ କରିବାରେ ନବୀନଙ୍କ ଭୂମିକା ଅଗ୍ରଗଣ୍ୟ। ଏହି ସଫଳତା ସତ୍ତ୍ବେ କେନ୍ଦ୍ର ସରକାରଙ୍କ ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠିରୁ ଓଡିଶାକୁ ପର୍ଯ୍ୟାପ୍ତ ସହାୟତା ଯୋଗାଯାଇନାହିଁ। ପ୍ରସ୍ତାବିତ ସଂଶୋଧନ ବିଲ୍ ଏହି ପାଣ୍ଠିର ବ୍ୟବସ୍ଥା ନେଇ ଅଧିକ ଆଶଙ୍କା ସୃଷ୍ଟି କରୁଛି। ୨୦୦୫ର ମୂଳ ଆଇନରେ ବିପର୍ଯ୍ୟୟ ମୁକାବିଲାକୁ ଏକ ବିପଜ୍ଜନକ ବିପର୍ଯ୍ୟୟ ସ୍ଥିତି ବା ବିପର୍ଯ୍ୟୟ ବୋଲି ଦର୍ଶାଯାଇଛି। ମାତ୍ର ନୂଆ ବିଲରେ ବିପର୍ଯ୍ୟୟ ପରିଚାଳନାରର ବିଭିନ୍ନ ଦିଗକୁ ବିଚାର କରାଯିବ ବୋଲି ରହିଛି। ଏହି ପରିବର୍ତ୍ତନ ଅତ୍ୟନ୍ତ ଚିନ୍ତାଦାୟକ ବୋଲି କହିଛନ୍ତି ସାଂସଦ ମାନସ ମଙ୍ଗରାଜ। ଏହି ପାଣ୍ଠିର ବ୍ୟବହାରକୁ ବିକେନ୍ଦ୍ରୀକରଣ କରିବା ବଦଳରେ କେନ୍ଦ୍ର ସରକାର ଏହା ଉପରେ ଅଧିକ ନିୟନ୍ତ୍ରଣ ଜାହିର କରିଛନ୍ତି ସରକାର।

ଯାହା ବିପର୍ଯ୍ୟୟ ସମୟରେ ରିଲିଫ ସଂକ୍ରାନ୍ତ କାର୍ଯ୍ୟକ୍ରମରେ ଏହା ବାଧା ସୃଷ୍ଟି କରିବ। ସେ ଆହୁରି କହିଛନ୍ତି- ନୀତି ଆୟୋଗ ରିପୋର୍ଟ ଅନୁସାରେ ଦେଶର ଜିଡିପିକୁ ସହରାଞ୍ଚଳ ୬୦ ପ୍ରତିଶତ ଅବଦାନ ଦେଇଥାନ୍ତି। ମାତ୍ର ସଂଶୋଧନ ବିଲରେ ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ବା ଏନଡିଏମଏ ଓ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ବା ଏସଡିଏମଏ ଜରିଆରେ ବିପର୍ଯ୍ୟୟ ପରିଚାଳନାକୁ ବିକେନ୍ଦ୍ରୀକରଣ କରାଯାଇଛି। ଆର୍ଥିକ ସଶକ୍ତିକରଣ ବଦଳରେ ଏହି ନିଷ୍ପତ୍ତି ଦୁର୍ଭାଗ୍ୟଜନକ ଏବଂ ଅଧିକ ସମସ୍ୟା ସୃଷ୍ଟି କରିବ। ତତକାଳୀନ ବିଜୁ ଜନତା ଦଳ ନେତୃତ୍ବାଧୀନ ସରକାରଙ୍କ ଆଖିଦୃଶିଆ ଉଦାହରଣ ସତ୍ତ୍ବେ ପାଣ୍ଠି କ୍ଷେତ୍ରରେ ରାଜ୍ୟକୁ ବାରମ୍ବାର ଅବହେଳିତ କରାଯାଇଛି। ତେଣୁ ରାଜ୍ୟକୁ ଉପକୃତ କରିପାରିବା ପରି ଏକ ବିପର୍ଯ୍ୟୟ ପରିଚାଳନା ନୀତି ସରକାର ଆଣନ୍ତୁ ବୋଲି ଦାବି କରିଛନ୍ତି ସାଂସଦ ମାନସ ମଙ୍ଗରାଜ।

ଭୁବନେଶ୍ବର: ରାଜ୍ୟରେ ଶିଳ୍ପ ପ୍ରକଳ୍ପ ବିଳମ୍ବ ନେଇ ଅଣତାରକା ପ୍ରଶ୍ନରେ ଉତ୍ତର ମାଗିଛନ୍ତି ରାଜ୍ୟସଭା ସାଂସଦ ମାନସ ମଙ୍ଗରାଜ। ପରିବେଶ ମଞ୍ଜୁରୀ ମିଳିବାରେ ବିଳମ୍ବ ଯୋଗୁଁ ରାଜ୍ୟର ବହୁ ଶିଳ୍ପ ପ୍ରକଳ୍ପ କାମ ବିଳମ୍ବ ହେଉଛି କି ବୋଲି ସେ ପ୍ରଶ୍ନ କରିଛନ୍ତି।  ବିଜେଡି ସାଂସଦ ମାନସ ମଙ୍ଗରାଜ ଏନେଇ ଆଜି କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ଠାରୁ ଏକ ଅଣତାରକା ପ୍ରଶ୍ନରେ ଉତ୍ତର ମାଗିଛନ୍ତି । ଏଥିସହିତ ଅନୁମୋଦନ ଅପେକ୍ଷାରେ ଥିବା ପ୍ରକଳ୍ପ ସମ୍ପର୍କରେ ବିସ୍ତ୍ରୁତ ତଥ୍ୟ ମାଗିବା ସହ ପ୍ରକଳ୍ପ କାମ ତ୍ବରାନ୍ବିତ କରିବାକୁ ପରିବେଶ ମଞ୍ଜୁରୀ ପ୍ରକ୍ରିୟାକୁ ଶୃଙ୍ଖଳିତ କରିବା ନେଇ କେନ୍ଦ୍ର ସରକାର ଗ୍ରହଣ କରୁଥିବା ପଦକ୍ଷେପ ସମ୍ପର୍କରେ ସାଂସଦ ମାନସ ମଙ୍ଗରାଜ ପଚାରିଥିବା ପ୍ରଶ୍ନର ଉତ୍ତର ଦେଇଛନ୍ତି କେନ୍ଦ୍ର ଜଙ୍ଗଲ ଓ ପରିବେଶ ରାଷ୍ଟ୍ରମନ୍ତ୍ରୀ କିର୍ତ୍ତୀବର୍ଦ୍ଧନ ସିଂହ।

କେନ୍ଦ୍ରମନ୍ତ୍ରୀ କହିଛନ୍ତି ଯେ, ସବୁ ଶିଳ୍ପ ପ୍ରକଳ୍ପର ପରିବେଶ ମଞ୍ଜୁରୀ ପ୍ରସ୍ତାବକୁ ଏକ୍ସପର୍ଟ ଆପ୍ରାଇଜାଲ କମିଟି କିମ୍ବା ରାଜ୍ୟ ସ୍ତରୀୟ ଏକ୍ସପର୍ଟ ଆପ୍ରାଇଜାଲ କମିଟି ଅନୁଧ୍ୟାନ କରିଥାନ୍ତି। ଏକ୍ସପର୍ଟ ଆପ୍ରାଇଜାଲ କମିଟିର ସୁପାରିଶ ଆଧାରରେ କେନ୍ଦ୍ର ପରିବେଶ ମନ୍ତ୍ରଣାଳୟ କିମ୍ବା ରାଜ୍ୟ ପରିବେଶ ଇମ୍ପାକ୍ଟ ଆସେସମେଣ୍ଟ ଅଥୋରିଟି ପରିବେଶ ମଞ୍ଜୁରୀ ଦେଇଥାନ୍ତି କିମ୍ବା ଅଗ୍ରାହ୍ୟ କରିଥାନ୍ତି ।

ପରିବେଶ ପୋର୍ଟାଲ ତଥ୍ୟ ଅନୁଯାୟୀ, ଚଳିତ ବର୍ଷ ଫେବ୍ରୁଆରୀ ୧୦ ତାରିଖ ସୁଦ୍ଧା ପରିବେଶ ମନ୍ତ୍ରଣାଳୟ ନିକଟରେ ୫ଟି ଏବଂ ରାଜ୍ୟ ପରିବେଶ ଇମ୍ପାକ୍ଟ ଆସେସମେଣ୍ଟ ଅଥୋରିଟି ନିକଟରେ ୧୨ଟି ଶିଳ୍ପ ପ୍ରକଳ୍ପର ପରିବେଶ ମଞ୍ଜୁରୀ ପ୍ରକଳ୍ପ ବିଚାରଧିନ ରହିଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ଏଥିସହିତ ସିଙ୍ଗଲୱିଣ୍ଡୋ ବ୍ୟବସ୍ଥାରେ ପରିବେଶ ମଞ୍ଜୁରୀ ପ୍ରକ୍ରିୟାର ସରଳୀକରଣ ପାଇଁ ମଧ୍ୟ ଏକାଧିକ ପଦକ୍ଷେପ ନିଆଯାଇଥିବା କେନ୍ଦ୍ରମନ୍ତ୍ରୀ ସୂଚନା ଦେଇଛନ୍ତି ।

ସେହିପରି, ରାଜ୍ୟରେ କେତୋଟି ଆୟୁଷ ହସ୍ପିଟାଲ ଓ ୱେଲନେସ ସେଣ୍ଟର କାର୍ଯ୍ୟକ୍ଷମ ରହିଛି । ନୂଆ ହସ୍ପିଟାଲ ପ୍ରତିଷ୍ଠା ନେଇ କେନ୍ଦ୍ର ସରକାରଙ୍କ କୌଣସି ପ୍ରସ୍ତାବ ରହିଛି କି ବୋଲି ଆଜି ବିଜେଡି ସାଂସଦ ମାନସ ରଂଜନ ମଙ୍ଗରାଜ କେନ୍ଦ୍ର ଆୟୁଷ ମନ୍ତ୍ରୀଙ୍କୁ ପ୍ରଶ୍ନ କରିଛନ୍ତି।

ଏହାର ଉତ୍ତରରେ କେନ୍ଦ୍ର ଆୟୁଷ ମନ୍ତ୍ରୀ ପ୍ରତାପ ରାଓ ଯାଦବ କହିଛନ୍ତି ଯେ, ରାଜ୍ୟରେ ଏବେ ତିନୋଟି ଆୟୁଷ ହସ୍ପିଟାଲ ଓ ୪୨୨ଟି ଆୟୁଷ ୱେଲନେସ ସେଣ୍ଟର କାର୍ଯ୍ୟକ୍ଷମ ରହିଛି । ସ୍ବାସ୍ଥ୍ୟ ଏକ ରାଜ୍ୟ ସମ୍ପର୍କିତ ବିଷୟବସ୍ତୁ ହୋଥିବାରୁ ରାଜ୍ୟ ସରକାରଙ୍କ ପ୍ରସ୍ତାବ ଆଧାରରେ ଆୟୁଷ ହସ୍ପିଟାଲ ପ୍ରତିଷ୍ଠା ହୋଇଥାଏ । ଅବଶ୍ୟ ଏଥିପାଇଁ ରାଜ୍ୟମାନଙ୍କୁ ୫୦ ଶଯ୍ୟା ବିଶିଷ୍ଟ ଆୟୁଷ ହସ୍ପିଟାଲ ପାଇଁ ଜାତୀୟ ଆୟୁଷ ମିଶନରେ ଆର୍ଥିକ ସହାୟତା ପ୍ରଦାନ କରାଯାଇଥାଏ । ୨୦୧୬-୧୭ରୁ ୨୦୧୯-୨୦ ମଧ୍ୟରେ ଢେଙ୍କାନାଳ, ବ୍ରହ୍ମପୁର ଓ ବାଲେଶ୍ବରରେ ତିନୋଟି ଆୟୁଷ ହସ୍ପିଟାଲ ପ୍ରତିଷ୍ଠା ରାଜ୍ୟ ସରକାର ପ୍ରସ୍ତାବ ଦେଇଥିଲେ । ଏଥିପାଇଁ ଆୟୁଷ ମନ୍ତ୍ରଣାଳୟ ୪୧କୋଟି ୬୧ ଲକ୍ଷ ଟଙ୍କା ଆର୍ଥିକ ସହାୟତା ଦେଇଥିଲେ ବୋଲି କେନ୍ଦ୍ରମନ୍ତ୍ରୀ ସୂଚନା ଦେଇଛନ୍ତି ।