ପ୍ରସିଦ୍ଧ ପରିବେଶବିତ୍ ତଥା ସାମାଜିକ କର୍ମୀ ସୋନମ୍ ୱାଙ୍ଗଚୁକ୍ (Sonam Wangchuk) ଶନିବାର କେନ୍ଦ୍ର ସରକାରଙ୍କୁ ନିଜର ପ୍ରତିଶ୍ରୁତି ମନେ ପକାଇ ଦେଇଛନ୍ତି। ନିକଟରେ ଶେଷ ହୋଇଥିବା ୨୬ ଦିନିଆ ଅନଶନ ସମୟରେ କେନ୍ଦ୍ର ସରକାର ଦେଇଥିବା ଲିଖିତ ପ୍ରତିଶ୍ରୁତିଗୁଡ଼ିକୁ ଯଥାଶୀଘ୍ର ପୂରଣ କରିବାକୁ ସେ ଆହ୍ୱାନ ଦେଇଛନ୍ତି। ଏଥିସହ ଆନ୍ଦୋଳନରତ ଛାତ୍ରଛାତ୍ରୀଙ୍କ ବିରୋଧରେ କୌଣସି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଏବଂ ଆତ୍ମହତ୍ୟା କରିଥିବା ଛାତ୍ରଛାତ୍ରୀଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ପ୍ରଦାନ କରିବାକୁ ସେ ଦାବି କରିଛନ୍ତି।

ସୋସିଆଲ୍ ମିଡିଆରେ ବାର୍ତ୍ତା

ଲାଦାଖ୍‌ରେ ଥିବା ନିଜର ପୈତୃକ ଗାଁକୁ ଫେରିବା ପରେ ଏକ୍ସ (X)ରେ ଏକ ଭିଡିଓ ବାର୍ତ୍ତା ସେୟାର କରିଛନ୍ତି ୱାଙ୍ଗଚୁକ୍। ସେ ଏହି ପୋଷ୍ଟରେ ଲେଖିଛନ୍ତି, 'ଗାଁକୁ ଫେରିଆସିଛି... କିନ୍ତୁ କାରଣଗୁଡ଼ିକୁ ଭୁଲି ନାହିଁ। ଆଶା କରୁଛି ସରକାର ବାକି ଥିବା ପ୍ରତିଶ୍ରୁତିଗୁଡ଼ିକୁ ମଧ୍ୟ ପୂରଣ କରିବେ।' ଭିଡିଓରେ ସେ ଦର୍ଶାଇଛନ୍ତି ଯେ ସେ ବର୍ତ୍ତମାନ ବିଶ୍ରାମ ନେଉଛନ୍ତି ଏବଂ ଶକ୍ତି ସଞ୍ଚୟ କରୁଛନ୍ତି। ଠିକ୍ ସମୟରେ ପଦକ୍ଷେପ ନେଲେ ସରକାରଙ୍କ ପ୍ରତି ସମ୍ମାନ ବଢ଼ିଥାଏ ବୋଲି ସେ ମତ ଦେଇଛନ୍ତି। ବିଶେଷ କରି ଛାତ୍ର ଆନ୍ଦୋଳନ ଏବଂ ପରୀକ୍ଷା ବିଭ୍ରାଟ ଯୋଗୁଁ ଯେଉଁ ଛାତ୍ରଛାତ୍ରୀମାନେ ନିଜ ଜୀବନ ହାରିଛନ୍ତି, ସେମାନଙ୍କ ପରିବାରକୁ ନ୍ୟାୟ ଏବଂ କ୍ଷତିପୂରଣ ଦେବାର ସମୟ ଆସିଯାଇଛି ବୋଲି ସେ ସ୍ପଷ୍ଟ କରିଛନ୍ତି।

ଛାତ୍ର ଆନ୍ଦୋଳନ ଓ ଅନଶନ

ସୂଚନାଯୋଗ୍ୟ ଯେ, ନିଟ୍ (NEET) ପରୀକ୍ଷା ଦୁର୍ନୀତି ଏବଂ ଅନ୍ୟାନ୍ୟ ଶିକ୍ଷାଗତ ଅନିୟମିତତାକୁ ନେଇ ନୂଆଦିଲ୍ଲୀର ଯନ୍ତରମନ୍ତର ଠାରେ ଛାତ୍ରଛାତ୍ରୀମାନେ ବିକ୍ଷୋଭ ପ୍ରଦର୍ଶନ କରୁଥିଲେ। ଏହି ଆନ୍ଦୋଳନକୁ ସମର୍ଥନ ଜଣାଇ ୱାଙ୍ଗଚୁକ୍ ଜୁନ୍ ୨୮ ତାରିଖରୁ ଅନଶନରେ ବସିଥିଲେ। ପରେ କେନ୍ଦ୍ର ମନ୍ତ୍ରୀ ଜେ.ପି ନଡ୍ଡା ଏବଂ ଜିତେନ୍ଦ୍ର ସିଂହଙ୍କ ଉପସ୍ଥିତିରେ ଲିଖିତ ପ୍ରତିଶ୍ରୁତି ପାଇବା ପରେ ସେ ନିଜର ଅନଶନ ଭାଙ୍ଗିଥିଲେ। ଶାନ୍ତିପୂର୍ଣ୍ଣ ପ୍ରଦର୍ଶନକାରୀଙ୍କ ଉପରେ କୌଣସି ମାମଲା ରୁଜୁ ହେବ ନାହିଁ ବୋଲି ସରକାର ସେତେବେଳେ ଆଶ୍ୱାସନା ଦେଇଥିଲେ।

ଭାରତୀୟ ରେଳବାଇ ପ୍ରସଙ୍ଗ

ଅନ୍ୟପକ୍ଷରେ ୱାଙ୍ଗଚୁକ୍ ନିକଟରେ ଭାରତୀୟ ରେଳବାଇକୁ ନେଇ ଦେଇଥିବା ନିଜର ମନ୍ତବ୍ୟକୁ ସମର୍ଥନ କରିଛନ୍ତି। କାଶ୍ମୀରକୁ ରେଳପଥ ସମ୍ପ୍ରସାରଣ ଏବଂ ଏହାର ଇଞ୍ଜିନିୟରିଂ କାର୍ଯ୍ୟକୁ ପ୍ରଶଂସା କରିଥିବାରୁ କିଛି ବ୍ୟକ୍ତି ତାଙ୍କୁ ସମାଲୋଚନା କରିଥିଲେ ଏବଂ ଏହାକୁ ସରକାରଙ୍କ ସପକ୍ଷବାଦୀ ମନୋଭାବ ବୋଲି ଆକ୍ଷେପ କରିଥିଲେ। ଏହାର ଉତ୍ତରରେ ୱାଙ୍ଗଚୁକ୍ କହିଛନ୍ତି ଯେ ରେଳବାଇ କିମ୍ବା ଇସ୍ରୋ (ISRO) ଭଳି ଜାତୀୟ ପ୍ରତିଷ୍ଠାନଗୁଡ଼ିକର ସଫଳତାକୁ କେବେହେଲେ ରାଜନୈତିକ ଦୃଷ୍ଟିକୋଣରୁ ବିଚାର କରାଯିବା ଉଚିତ୍ ନୁହେଁ। ଆମେ କ'ଣ ଏତେ ସଂକୀର୍ଣ୍ଣମନା ହୋଇଯାଇଛୁ ବୋଲି ପ୍ରଶ୍ନ କରି ସେ ଜାତୀୟ ସେବା ପାଇଁ ହଜାର ହଜାର ଇଞ୍ଜିନିୟରଙ୍କ ଅବଦାନକୁ ସ୍ୱୀକୃତି ଦେବା ଜରୁରୀ ବୋଲି ମତବ୍ୟକ୍ତ କରିଛନ୍ତି।

ନୂଆଦିଲ୍ଲୀ: ଗୃହିଣୀମାନଙ୍କ ପାଇଁ ସର୍ବୋଚ୍ଚ ନ୍ୟାୟାଳୟ ଗୁରୁବାର ଦିନ ଏକ ବଡ଼ ରାୟ ଶୁଣାଇଛନ୍ତି। ସଡ଼କ ଦୁର୍ଘଟଣାରେ ପ୍ରାଣ ହରାଉଥିବା ଗୃହିଣୀମାନଙ୍କ ପାଇଁ କ୍ଷତିପୂରଣ ଆକଳନ କରିବା ସମୟରେ, ସେମାନଙ୍କର ବିନା ଦରମାରେ କରୁଥିବା ଘରୋଇ କାର୍ଯ୍ୟର ମୂଲ୍ୟ ମାସିକ ସର୍ବନିମ୍ନ ୩୦,୦୦୦ ଟଙ୍କା ଭାବରେ ଗଣନା କରାଯିବା ଉଚିତ୍ ବୋଲି କୋର୍ଟ କହିଛନ୍ତି। ଏଥିସହ ପରିବାର ଏବଂ ସମାଜରେ ମହିଳାମାନଙ୍କର କେନ୍ଦ୍ରୀୟ ଭୂମିକାକୁ ଗୁରୁତ୍ୱ ଦେଇ ଗୃହିଣୀମାନଙ୍କୁ 'ରାଷ୍ଟ୍ର ନିର୍ମାତା' ଭାବରେ ସ୍ୱୀକୃତି ମିଳିବା ଉଚିତ୍ ବୋଲି ଖଣ୍ଡପୀଠ ଘୋଷଣା କରିଛନ୍ତି।

ବିଚାରପତି ସଞ୍ଜୟ କାରୋଲ ଏବଂ ଏନ୍ କୋଟିଶ୍ୱର ସିଂଙ୍କୁ ନେଇ ଗଠିତ ଖଣ୍ଡପୀଠ ଏହି ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ପୂର୍ବରୁ ଦେଶରେ ଗୃହିଣୀମାନଙ୍କ ଆୟକୁ କୁଶଳୀ ଶ୍ରମିକଙ୍କ ମଜୁରୀ ସହିତ ସମାନ ଭାବେ ଗଣନା କରାଯିବାର ନ୍ୟାୟିକ ପ୍ରଥା ରହିଥିଲା। ତେବେ ଏହି ପୁରୁଣା ନିୟମକୁ ଖଣ୍ଡପୀଠ ପ୍ରତ୍ୟାଖ୍ୟାନ କରିଛନ୍ତି। କୋର୍ଟ ଦର୍ଶାଇଛନ୍ତି ଯେ ଏପରି ଆଭିମୁଖ୍ୟ ଘରୋଇ କାର୍ଯ୍ୟର ପ୍ରକୃତ ଅର୍ଥନୈତିକ ଏବଂ ସାମାଜିକ ମୂଲ୍ୟକୁ ଠିକ୍‌ ଭାବେ ଆକଳନ କରିବାରେ ବିଫଳ ହୋଇଥାଏ। ବିଚାରପତି କାରୋଲ କହିଛନ୍ତି ଯେ, କୋର୍ଟ ଏକ ନୂତନ ନିୟମ ଲାଗୁ କରିଛନ୍ତି, ଯାହା ଅନୁଯାୟୀ ଘରୋଇ ଯତ୍ନର କ୍ଷତି ପାଇଁ ମାସିକ ସର୍ବନିମ୍ନ ୩୦,୦୦୦ ଟଙ୍କା କ୍ଷତିପୂରଣ ଭାବେ ଆକଳନ କରାଯିବ।

ପଞ୍ଜାବର ଏକ ମୋଟର ଦୁର୍ଘଟଣା ଜନିତ କ୍ଷତିପୂରଣ ଆବେଦନର ଶୁଣାଣି ବେଳେ ଏହି ରାୟ ଆସିଛି। ନଭେମ୍ବର ୨୦୦୧ ମସିହାରେ ପଞ୍ଜାବର ରେଶମା ନାମକ ଜଣେ ମହିଳାଙ୍କର ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିଲା। ତାଙ୍କ ସ୍ୱାମୀ ଏବଂ ତିନି ପିଲା କ୍ଷତିପୂରଣ ଦାବି କରି ମୋଟର ଦୁର୍ଘଟଣା ଦାବି ଟ୍ରିବ୍ୟୁନାଲଙ୍କ ଦ୍ୱାରସ୍ଥ ହୋଇଥିଲେ। ୨୦୦୩ ରେ ଟ୍ରିବ୍ୟୁନାଲ କ୍ଷତିପୂରଣ ପ୍ରଦାନ କରିଥିଲେ ମଧ୍ୟ ଏହି ମାମଲା ବର୍ଷ ବର୍ଷ ଧରି ନ୍ୟାୟାଳୟରେ ପଡ଼ିରହିଥିଲା। ଶେଷରେ ଡିସେମ୍ବର ୨୦୨୪ ରେ, ଅର୍ଥାତ୍ ଦୁର୍ଘଟଣାର ଦୁଇ ଦଶନ୍ଧିରୁ ଅଧିକ ସମୟ ପରେ, ପଞ୍ଜାବ ଏବଂ ହରିୟାଣା ହାଇକୋର୍ଟ ଏହି ଆବେଦନ ଉପରେ ନିଷ୍ପତ୍ତି ନେଇଥିଲେ।

କ୍ଷତିପୂରଣ ମାମଲାରେ ଏତେ ବର୍ଷର ବିଳମ୍ବକୁ ନେଇ ସୁପ୍ରିମକୋର୍ଟ ଉଦ୍‌ବେଗ ପ୍ରକାଶ କରିଛନ୍ତି। ସାଧାରଣତଃ ମୋଟର ଯାନ ଦୁର୍ଘଟଣା ଜନିତ କ୍ଷତିପୂରଣ ଦାବିର ଶୁଣାଣି ସାଧାରଣତଃ ଗୋଟିଏ ବର୍ଷ ମଧ୍ୟରେ ଶେଷ ହେବା ଉଚିତ୍ ବୋଲି ସୁପ୍ରିମକୋର୍ଟ କହିଛନ୍ତି। ଏଥିପାଇଁ ସମସ୍ତ ହାଇକୋର୍ଟର ମୁଖ୍ୟ ବିଚାରପତିମାନଙ୍କୁ ଏଭଳି ମାମଲା ଉପରେ ନଜର ରଖିବାକୁ ଏବଂ ନିର୍ଦ୍ଧାରିତ ସମୟ ମଧ୍ୟରେ ଯେପରି ଶୁଣାଣି ଶେଷ ହେବ, ସେଥିପାଇଁ ଉପଯୁକ୍ତ ପ୍ରଶାସନିକ ନିର୍ଦ୍ଦେଶ ଜାରି କରିବାକୁ କୋର୍ଟ ଅନୁରୋଧ କରିଛନ୍ତି। ଯଦି ପୀଡ଼ିତ ପରିବାରକୁ ନ୍ୟାୟ ପାଇଁ ଦଶନ୍ଧି ଦଶନ୍ଧି ଅପେକ୍ଷା କରିବାକୁ ପଡ଼େ, ତେବେ ମୋଟର ଯାନ ଆଇନର କଲ୍ୟାଣକାରୀ ଉଦ୍ଦେଶ୍ୟ ବିଫଳ ହେବ ବୋଲି ଖଣ୍ଡପୀଠ ମତ ଦେଇଛନ୍ତି।

ସୁପ୍ରିମକୋର୍ଟ ନିର୍ଦ୍ଧାରଣ କରିଥିବା ଏହି ନୂତନ ମାନଦଣ୍ଡଟି ୨୦୧୭ ମସିହାରେ କୋର୍ଟଙ୍କ ସାମ୍ବିଧାନିକ ପୀଠ ଦ୍ୱାରା ଦିଆଯାଇଥିବା ପ୍ରଣୟ ସେଠୀ ମାମଲାର ରାୟ ସହିତ ମିଳିତ ଭାବେ କାର୍ଯ୍ୟକାରୀ ହେବ। ପୂର୍ବରୁ ମଧ୍ୟ କୋର୍ଟ ସ୍ପଷ୍ଟ କରିଥିଲେ ଯେ ଗୃହିଣୀମାନେ ମାସିକ ଦରମା ପାଉନଥିବାରୁ ସେମାନଙ୍କ ସେବାକୁ କେବେ ମଧ୍ୟ ମୂଲ୍ୟହୀନ ବୋଲି ବିବେଚନା କରାଯାଇପାରିବ ନାହିଁ। ବର୍ତ୍ତମାନର ଏହି ନୂଆ ଐତିହାସିକ ରାୟ ଦ୍ୱାରା ଦେଶବ୍ୟାପୀ ମୋଟର ଦୁର୍ଘଟଣା ମାମଲାରେ ଗୃହିଣୀମାନଙ୍କ ମୃତ୍ୟୁ ହେଲେ, ମିଳିବାକୁ ଥିବା କ୍ଷତିପୂରଣ ରାଶି ଯଥେଷ୍ଟ ବୃଦ୍ଧି ପାଇବ ବୋଲି ଆଶା କରାଯାଉଛି। 

ମଧ୍ୟପ୍ରଦେଶ ହାଇକୋର୍ଟ ଏକ ୧୬ ବର୍ଷ ପୁରୁଣା ମାମଲାରେ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ବିମାନବନ୍ଦରର ସୁରକ୍ଷା ଯାଞ୍ଚ ସମୟରେ ରୋଷେଇ ଘରେ ବ୍ୟବହୃତ ହେଉଥିବା ଆମଚୁର ପାଉଡର (Amchur Powder) ଏବଂ ଗରମ ମସଲାକୁ ନିଶାଦ୍ରବ୍ୟ ବା ଡ୍ରଗ୍ସ ଭାବି ଜଣେ ନିର୍ଦ୍ଦୋଷ ଇଞ୍ଜିନିୟରଙ୍କୁ ଗିରଫ କରାଯାଇଥିଲା। ଏହି ଘଟଣାରେ ୫୭ ଦିନ ଧରି ଜେଲ୍ ଦଣ୍ଡ ଭୋଗିଥିବା ଗ୍ୱାଲିୟରର ଇଞ୍ଜିନିୟର ଅଜୟ ସିଂହଙ୍କୁ ଏବେ ୧୦ ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରିବାକୁ କୋର୍ଟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

କ'ଣ ଥିଲା ପୂରା ଘଟଣା?

ସୂଚନା ଅନୁଯାୟୀ, ମଇ ୨୦୧୦ରେ ଅଜୟ ସିଂହ ଭୋପାଳର ରାଜା ଭୋଜ ବିମାନବନ୍ଦରରୁ ଦିଲ୍ଲୀ ଅଭିମୁଖେ ଯାତ୍ରା କରୁଥିଲେ। ସୁରକ୍ଷା ଯାଞ୍ଚ ସମୟରେ ତାଙ୍କ ଲଗେଜ୍‌ରେ ଥିବା ଏକ ପ୍ୟାକେଟ୍‌କୁ ଏକ୍ସପ୍ଲୋସିଭ୍ ଟ୍ରେସ୍ ଡିଟେକ୍ଟର (ETD) ମେସିନ୍ ସ୍କାନ୍ କରି ସେଥିରେ ହେରୋଇନ୍ ଏବଂ ନିଶାଦ୍ରବ୍ୟ ଥିବା ନେଇ ସଙ୍କେତ ଦେଇଥିଲା। ଏହା ପରେ ବିମାନବନ୍ଦର ଅଧିକାରୀମାନେ ତାଙ୍କୁ ଅଟକ ରଖି ପୋଲିସକୁ ହସ୍ତାନ୍ତର କରିଥିଲେ। ସାଧାରଣ ଆମଚୁର ପାଉଡରକୁ ଡ୍ରଗ୍ସ ବୋଲି ଦର୍ଶାଇ ପୋଲିସ ଅଜୟ ସିଂହଙ୍କ ବିରୋଧରେ NDPS ଆକ୍ଟ ଅଧୀନରେ ମାମଲା ରୁଜୁ କରି ତାଙ୍କୁ ଜେଲ୍ ପଠାଇ ଦେଇଥିଲା।

ଫୋରେନ୍ସିକ୍ ଲ୍ୟାବର ଅବହେଳା ଓ ୫୭ ଦିନ ଜେଲ୍

ଜବତ ହୋଇଥିବା ପାଉଡରର ନମୁନା ପ୍ରଥମେ ସ୍ଥାନୀୟ ରିଜିଓନାଲ୍ ଫୋରେନ୍ସିକ୍ ଲ୍ୟାବ୍‌କୁ ପଠାଯାଇଥିଲା। କିନ୍ତୁ ସେଠାରେ ଆବଶ୍ୟକୀୟ ଯନ୍ତ୍ରପାତି ନଥିବାରୁ ନମୁନାକୁ ହାଇଦ୍ରାବାଦ ସ୍ଥିତ ସେଣ୍ଟ୍ରାଲ୍ ଫୋରେନ୍ସିକ୍ ଲାବୋରେଟୋରୀକୁ ପଠାଗଲା। ୩୦ ଜୁନ୍ ୨୦୧୦ରେ ହାଇଦ୍ରାବାଦ ଲ୍ୟାବ୍‌ରୁ ରିପୋର୍ଟ ଆସିବା ପରେ ସ୍ପଷ୍ଟ ହୋଇଥିଲା ଯେ ଜବତ ହୋଇଥିବା ପାଉଡରରେ କୌଣସି ପ୍ରକାରର ନିଶାଦ୍ରବ୍ୟ ନାହିଁ। କିନ୍ତୁ ରିପୋର୍ଟ ଆସିବାରେ ବିଳମ୍ବ କାରଣରୁ ନିର୍ଦ୍ଦୋଷ ହୋଇ ମଧ୍ୟ ଅଜୟ ସିଂହଙ୍କୁ ୫୭ ଦିନ ଜେଲ୍‌ରେ ବିତାଇବାକୁ ପଡ଼ିଥିଲା। ଏହାଦ୍ୱାରା ତାଙ୍କର ବ୍ୟକ୍ତିଗତ ତଥା ପେସାଦାର ଜୀବନ ବହୁତ ପ୍ରଭାବିତ ହୋଇଥିଲା।

୧୬ ବର୍ଷ ପରେ ମିଳିଲା ନ୍ୟାୟ

ଦୀର୍ଘ ୧୬ ବର୍ଷର ଆଇନଗତ ଲଢ଼େଇ ପରେ ଶେଷରେ ଇଞ୍ଜିନିୟରଙ୍କୁ ନ୍ୟାୟ ମିଳିଛି। ମଧ୍ୟପ୍ରଦେଶ ହାଇକୋର୍ଟର ବିଚାରପତି ଜଷ୍ଟିସ୍ ଦୀପକ ଖୋଟ ଏହି ମାମଲାର ଶୁଣାଣି କରି ସରକାରୀ ବ୍ୟବସ୍ଥାରେ ଥିବା ତ୍ରୁଟି ଏବଂ ଫୋରେନ୍ସିକ୍ ଭିତ୍ତିଭୂମିର ଅଭାବକୁ କଡ଼ା ସମାଲୋଚନା କରିଛନ୍ତି। କେବଳ ମେସିନ୍‌ର ଯାନ୍ତ୍ରିକ ତ୍ରୁଟି ଏବଂ ପ୍ରଶାସନର ଖାମଖିଆଲି ମନୋଭାବ ଯୋଗୁଁ ଜଣେ ନିର୍ଦ୍ଦୋଷ ବ୍ୟକ୍ତିଙ୍କ ମୌଳିକ ଅଧିକାର କ୍ଷୁର୍ଣ୍ଣ ହୋଇଥିବାରୁ, କୋର୍ଟ ପୀଡ଼ିତଙ୍କୁ ୧୦ ଲକ୍ଷ ଟଙ୍କାର କ୍ଷତିପୂରଣ ଦେବା ପାଇଁ ଆଦେଶ ଦେଇଛନ୍ତି। ଏହା ସହିତ ରାଜ୍ୟର ସମସ୍ତ ଫୋରେନ୍ସିକ୍ ଲ୍ୟାବ୍‌ର ସ୍ଥିତି ଯାଞ୍ଚ କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି。

ଉତ୍ତର ପ୍ରଦେଶର ଜାଲୌନ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ସ୍ୱାସ୍ଥ୍ୟ ବିଭାଗର କାର୍ଯ୍ୟଶୈଳୀ ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଏଠାରେ ଜଣେ ମହିଳା ପରିବାର ନିୟୋଜନ ଅସ୍ତ୍ରୋପଚାର (ନସବନ୍ଦୀ) କରାଇବାର ବର୍ଷକ ପରେ ପୁନର୍ବାର ଗର୍ଭବତୀ ହୋଇ ଏକ ସୁସ୍ଥ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ଏହି ଘଟଣା ପରେ ଦମ୍ପତି ଏହାକୁ "ସରକାରୀ ଦାନ" ବୋଲି କହିବା ସହ ପିଲାର ଭରଣପୋଷଣ ପାଇଁ ସରକାରଙ୍କ ନିକଟରେ କ୍ଷତିପୂରଣ ଦାବି କରିଛନ୍ତି।

୨୦୨୩ ମସିହାରେ ହୋଇଥିଲା ଅପରେସନ

ସୂଚନା ଅନୁଯାୟୀ, ଜାଲୌନର ଡାକୋର ଗ୍ରାମର ବାସିନ୍ଦା ଭାନୁ ପ୍ରତାପ ତାଙ୍କ ପତ୍ନୀ ଭୂରୀଙ୍କର ୨୦୨୩ ମସିହାରେ ଏକ ସରକାରୀ ଡାକ୍ତରଖାନାରେ ନସବନ୍ଦୀ କରାଇଥିଲେ। ସେ ସମୟରେ ଡାକ୍ତରମାନେ ଅପରେସନ ସଫଳ ହୋଇଥିବା ନେଇ ଦମ୍ପତିଙ୍କୁ ଆଶ୍ୱାସନା ଦେଇଥିଲେ। ପରିବାର ନିୟୋଜନ ପାଇଁ ସରକାରୀ ବ୍ୟବସ୍ଥା ଉପରେ ଭରସା କରି ଦମ୍ପତି ନିଶ୍ଚିନ୍ତ ରହିଥିଲେ। କିନ୍ତୁ ନିକଟରେ ଭୂରୀ ଏକ ପୁତ୍ର ସନ୍ତାନ ପ୍ରସବ କରିବା ପରେ ସ୍ୱାସ୍ଥ୍ୟ ବିଭାଗର ସମସ୍ତ ଦାବି ଫମ୍ପା ପ୍ରମାଣିତ ହୋଇଛି।

ସରକାରଙ୍କ ଠାରୁ ଆର୍ଥିକ ସହାୟତା ଦାବି

ଏହି ଘଟଣା ପରେ ଭାନୁ ପ୍ରତାପ ଏବଂ ତାଙ୍କ ପତ୍ନୀ ଚିନ୍ତାରେ ପଡ଼ିଯାଇଛନ୍ତି। ଆର୍ଥିକ ଅନଟନ ଦେଇ ଗତି କରୁଥିବା ଏହି ଦମ୍ପତି କହିଛନ୍ତି ଯେ ସରକାରୀ ଡାକ୍ତରଙ୍କ ଅବହେଳା ଯୋଗୁଁ ଏହି ଅନାକାଙ୍କ୍ଷିତ ସନ୍ତାନର ଜନ୍ମ ହୋଇଛି। ତେଣୁ ସେମାନେ ନବଜାତ ଶିଶୁକୁ "ସରକାରୀ ଅମାନତ" ବୋଲି ଅଭିହିତ କରିବା ସହ ତା’ର ଲାଳନପାଳନ ଏବଂ ଭବିଷ୍ୟତ ଖର୍ଚ୍ଚ ସରକାର ବହନ କରନ୍ତୁ ବୋଲି ଦାବି କରିଛନ୍ତି।

ସ୍ୱାସ୍ଥ୍ୟ ବିଭାଗର ଏଭଳି ତ୍ରୁଟି ଯୋଗୁଁ କେବଳ ଏହି ଗୋଟିଏ ପରିବାର ନୁହେଁ, ବରଂ ସମଗ୍ର ଅଞ୍ଚଳରେ ପରିବାର ନିୟୋଜନ କାର୍ଯ୍ୟକ୍ରମର ବିଶ୍ୱସନୀୟତା ଉପରେ ସାଧାରଣ ଲୋକଙ୍କ ଆସ୍ଥା ତୁଟିବାରେ ଲାଗିଛି। ପ୍ରଶାସନ ଏହି ଘଟଣାକୁ ଗୁରୁତ୍ୱର ସହ ଗ୍ରହଣ କରି ତଦନ୍ତ କରିବା ସହ ପୀଡ଼ିତ ପରିବାରକୁ ନ୍ୟାୟ ପ୍ରଦାନ କରିବାକୁ ସାଧାରଣରେ ଦାବି ହେଉଛି।

ଆମେରିକାର ସିଆଟେଲରେ ପୋଲିସ ଗାଡ଼ି ଧକ୍କାରେ ପ୍ରାଣ ହରାଇଥିବା ୨୩ ବର୍ଷୀୟା ଭାରତୀୟ ଛାତ୍ରୀ ଜାହ୍ନବୀ କାନ୍ଦୁଲାଙ୍କ ପରିବାରକୁ ମିଳିବ ବଡ଼ ଧରଣର କ୍ଷତିପୂରଣ। ସିଆଟେଲ ପ୍ରଶାସନ ମୃତ ଛାତ୍ରୀଙ୍କ ପରିବାରକୁ ୨୯ ମିଲିୟନ ଡଲାର ବା ଭାରତୀୟ ମୁଦ୍ରାରେ ପ୍ରାୟ ୨୪୨ କୋଟି ଟଙ୍କା ପ୍ରଦାନ କରିବାକୁ ରାଜି ହୋଇଛି। ଜାହ୍ନବୀ ସିଆଟେଲର ନର୍ଥ ଇଷ୍ଟର୍ଣ୍ଣ ୟୁନିଭରସିଟିରେ ମାଷ୍ଟର୍ସ ଡିଗ୍ରୀ କରୁଥିଲେ।

୨୦୨୩ ମସିହା ଜାନୁଆରୀ ମାସରେ ଜାହ୍ନବୀ ରାସ୍ତା ପାର ହେଉଥିବା ସମୟରେ ପୋଲିସ ଅଧିକାରୀ କେଭିନ୍ ଡେଭଙ୍କ ଦ୍ରୁତଗାମୀ ପାଟ୍ରୋଲିଂ ଗାଡ଼ି ତାଙ୍କୁ ଧକ୍କା ଦେଇଥିଲା। ରିପୋର୍ଟ ଅନୁଯାୟୀ, ଦୁର୍ଘଟଣା ସମୟରେ ପୋଲିସ ଗାଡ଼ିଟି ଘଣ୍ଟା ପ୍ରତି ୧୧୯ କିଲୋମିଟର (୭୪ ମାଇଲ୍) ବେଗରେ ଗତି କରୁଥିଲା, ଯେତେବେଳେ କି ସେଠାରେ ସର୍ବାଧିକ ବେଗ ସୀମା ମାତ୍ର ୪୦ କିଲୋମିଟର ରହିଥିଲା।

ବିବାଦୀୟ ମନ୍ତବ୍ୟ ଓ କାର୍ଯ୍ୟାନୁଷ୍ଠାନ

ଏହି ଦୁଃଖଦ ଘଟଣା ପରେ ଅନ୍ୟ ଜଣେ ପୋଲିସ ଅଧିକାରୀ ଡାନିଏଲ ଅଡେରରଙ୍କ ବଡି କ୍ୟାମେରା ରେକର୍ଡିଂ ସାମ୍ନାକୁ ଆସିବା ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା। ଭିଡିଓରେ ଅଧିକାରୀ ଜଣକ ଜାହ୍ନବୀଙ୍କ ମୃତ୍ୟୁକୁ ନେଇ ହସିବା ସହ ଅପମାନଜନକ ମନ୍ତବ୍ୟ ଦେଇଥିଲେ। ସେ କହିଥିଲେ ଯେ ଜାହ୍ନବୀଙ୍କ ଜୀବନର ମୂଲ୍ୟ 'ସୀମିତ' ଏବଂ ସହର କେବଳ ଏକ ଚେକ୍ ଲେଖିଦେଲେ ସମସ୍ୟା ସମାଧାନ ହୋଇଯିବ। ଏହି ଭିଡିଓ ଭାଇରାଲ ହେବା ପରେ ଭାରତ ସମେତ ବିଶ୍ୱବ୍ୟାପୀ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ଏବଂ ନ୍ୟାୟ ଦାବି ହୋଇଥିଲା।

ତଦନ୍ତ ପରେ ବିବାଦୀୟ ମନ୍ତବ୍ୟ ଦେଇଥିବା ଅଧିକାରୀ ଅଡେରରଙ୍କୁ ଚାକିରିରୁ ବରଖାସ୍ତ କରାଯାଇଥିଲା। ଅନ୍ୟପକ୍ଷରେ, ଦୁର୍ଘଟଣା ଘଟାଇଥିବା ଡ୍ରାଇଭର କେଭିନ୍ ଡେଭଙ୍କୁ ଅବହେଳା ପାଇଁ ୫,୦୦୦ ଡଲାର ଜରିମାନା କରାଯାଇଥିଲେ ମଧ୍ୟ ତାଙ୍କ ବିରୋଧରେ କୌଣସି ଅପରାଧିକ ମାମଲା ରୁଜୁ କରାଯାଇ ନାହିଁ।

ସିଆଟେଲ ସିଟି ଆଟର୍ଣ୍ଣି ଏରିକା ଇଭାନ୍ସ ବୁଧବାର ଏକ ବିବୃତ୍ତିରେ କହିଛନ୍ତି ଯେ ଜାହ୍ନବୀଙ୍କ ମୃତ୍ୟୁ ଅତ୍ୟନ୍ତ ହୃଦୟବିଦାରକ ଥିଲା। ଏହି ଆର୍ଥିକ ସମାଧାନ ପରିବାରକୁ କିଛି ମାତ୍ରାରେ ଆଶ୍ୱସ୍ତି ଦେବ ବୋଲି ଆଶା କରାଯାଉଛି। ତେବେ ଏହି ୨୯ ମିଲିୟନ ଡଲାର ମଧ୍ୟରୁ ପ୍ରାୟ ୨୦ ମିଲିୟନ ଡଲାର ସହରର ବୀମା କମ୍ପାନୀ ବହନ କରିବ ବୋଲି ସୂଚନା ମିଳିଛି।

ଭୁବନେଶ୍ୱର: ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ସାପ କାମୁଡ଼ାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାର ପାଇଁ କ୍ଷତିପୂରଣ ରାଶି ବୃଦ୍ଧି କରିବାକୁ ଓଡ଼ିଶା ସରକାର ବିଚାର କରୁଛନ୍ତି।

ରାଜସ୍ୱ ଓ ବିପର୍ଯ୍ଯୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ବୁଧବାର କହିଛନ୍ତି ଯେ, କ୍ଷତିପୂରଣ ରାଶି ବୃଦ୍ଧି ପ୍ରସ୍ତାବକୁ ରାଜ୍ୟ ସରକାର ସମୀକ୍ଷା କରୁଛନ୍ତି। ସେ ଆହୁରି ମଧ୍ୟ କହିଥିଲେ ଯେ, ଏହି ରାଶି ବୃଦ୍ଧି ପାଇଁ ଓଡ଼ିଶା ସରକାର ପୂର୍ବରୁ କେନ୍ଦ୍ରକୁ ଚିଠି ଲେଖି ସୁପାରିଶ କରିଥିଲେ। ସାପ କାମୁଡ଼ା ମୃତ୍ୟୁ ପାଇଁ ବର୍ତ୍ତମାନ ୪ ଲକ୍ଷ ଟଙ୍କା କ୍ଷତିପୂରଣ ଦିଆଯାଉଛି। ନିକଟରେ ଏକ ମାମଲାରେ ସର୍ବୋଚ୍ଚ ନ୍ୟାୟାଳୟ ଏହି ରାଶିକୁ ୧୦ ଲକ୍ଷ ଟଙ୍କାକୁ ବୃଦ୍ଧି କରିବାକୁ ସମସ୍ତ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

ଆନ୍ଧ୍ର ପ୍ରଦେଶ ର ଗୁଣ୍ଟୁର ର ଏକ ମାଛ ଫାର୍ମରେ ବିଦ୍ଯୁତ ଦୁର୍ଘଟଣାରେ ଗୁଣୁପୁରର ୬ ଜଣ ଓଡ଼ିଆ ପ୍ରବାସୀ ଶ୍ରମିକ ପ୍ରାଣ ହରାଇଥିବା ଘଟଣାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକ ପ୍ରକାଶ କରିଛନ୍ତି । ଶୋକସନ୍ତପ୍ତ ପରିବାରବର୍ଗଙ୍କୁ ମୁଖ୍ୟମନ୍ତ୍ରୀ ଗଭୀର ସମବେଦନା ଜଣାଇବା ସହ ମୃତକଙ୍କ ନିକଟତମ ଆତ୍ମୀୟଙ୍କ ପାଇଁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଦୁଇ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରିଛନ୍ତି ।

ସୂଚନାଯୋଗ୍ୟ ଯେ, ଆନ୍ଧ୍ର ପ୍ରଦେଶ ଗୁଣ୍ଟୁର ଜିଲ୍ଲା ରେପଲ୍ଲେ ଗ୍ରାମରେ ବିଦ୍ୟୁତ ସର୍ଟସର୍କିଟ ହେତୁ ନିଆଁରେ ପୋଡି ୬ ଜଣ ପ୍ରବାସୀ ଓଡ଼ିଆ ଶ୍ରମିକ ପ୍ରାଣ ହରାଇଥିଲେ । ମିଳିଥିବା ସୂଚନା ଅନୁଯାୟୀ, ମୃତକଙ୍କ ମଧ୍ୟରୁ ଜଣେ ଗୁଣପୁରର ହୋଇଥିବା ବେଳେ ୩ ଜଣ ତାରମାଳର ଓ ୨ ଜଣ ଫୁଲଫୁଟି ଗାଁର। ତେବେ ମୃତକମାନଙ୍କ ପରିଚୟ ମିଳି ନଥିବା ବେଳେ ଫ୍ୟାକ୍ଟ୍ରି ମାଲିକଙ୍କୁ ଅଟକ ରଖି ପଚରା ଉଚରା କରାଯାଉଛି।