ମୋରଡା: ରକ୍ତ ସମ୍ପର୍କରେ ଲାଗିଲା ରକ୍ତର ଛିଟା । ମାତ୍ର ୪୦୦ଟଙ୍କା ପାଇଁ ବାପାକୁ ହତ୍ୟା କଲା ନୃଶଂସ ପୁଅ । ସଜନା ଛୁଇଁ ବିକ୍ରି କରି ରଖିଥିବା ଟଙ୍କା ଦେବାକୁ ମନା କରିବାରୁ ବାପାକୁ ବାଉଁଶକାଠ ଓ ଲୁହାନଳୀରେ ପିଟିପିଟି ହତ୍ୟା କଲା କୁଳଙ୍ଗାର ପୁଅ। ଘଟଣା ଘଟିଛି ମୟୂରଭଞ୍ଜ ଜିଲ୍ଲାର ମୋରଡା ଥାନା ଅଧୀନ ହଲଦୀପାଳ ପଞ୍ଚାୟତ ଲଦ ଡ଼ିହି ଗ୍ରାମରେ। ମୃତକ ହେଲେ ଲଦ ଡ଼ିହି ଗ୍ରାମର ଗୋବିନ୍ଦ ମାରାଣ୍ଡି। 

ମୃତ ଗୋବିନ୍ଦଙ୍କ ଝିଅଙ୍କ କହିବା ମୁତାବକ ପ୍ରତିଦିନ ହତ୍ୟାକାରୀ ମଧୁ ମାରାଣ୍ଡି ନିଶା ସେବନ କରି ବାପାଙ୍କୁ ଟଙ୍କା ମାଗିଥାନ୍ତି। ଯଦି ବାପା ଟଙ୍କା ଦେବାକୁ ମନା କରନ୍ତି ସେ ନିର୍ମମ ଭାବେ ପିଟିଥାଏ। ତେବେ ବୁଧବାର ଦିନ ବାପା ସଜନା ଛୁଇଁ ବିକ୍ରି କରି ରଖିଥିବା ୪୦୦ଟଙ୍କାକୁ ମାଗିଥିଲା ହତ୍ୟାକାରୀ ପୁଅ । ବାପା ମନା କରିବାରୁ ପୁଅ ବାଉଁଶ କାଠ ଓ ଲୁହାନଳୀରେ ପିଟିପିଟି ହତ୍ୟା କରିଥିଲା। ଖବର ପାଇ ଫାଣ୍ଡି ଅଧିକାରୀ ପହଞ୍ଚି ଅଭିଯୁକ୍ତ ପୁଅକୁ ଗିରଫ କରି ଥାନାକୁ ଆଣିଥିବା ବେଳେ ଘଟଣାସ୍ଥଳରେ ପୋଲିସ ପହଞ୍ଚି ଅଧିକ ତଦନ୍ତ ଜାରି ରଖିଛି । 

ମୋରଡ଼ା: ହାତୀ ମୃତଦେହ ଠାବ। ବାରିପଦା ବନଖଣ୍ଡ ଅଧୀନରେ ଥିବା ବେତନଟୀ ରେଞ୍ଜ ଅନ୍ତର୍ଗତ ସୁନାହଜା ଗ୍ରାମ ନିକଟରେ ଏକ ବିଲରେ ବୁଧୁବାର ଦିନ ୬ବର୍ଷ ବୟସର ଏକ ଅଣ୍ଡିରା ହାତୀ କାଦୁଅରେ ପୋତି ହୋଇ ମୃତ୍ୟୁବରଣ କରିଥିବାର ଦେଖିବାକୁ ମିଳିଛି।

ଏସସିଏଫ ରବିନାରାୟଣ ମହାନ୍ତିଙ୍କ ସୂଚନା ମୁତାବକ,  ଦୀର୍ଘଦିନ ହେବ ୧୧ ଟିକିଆ ହାତୀପଲ ଦୁର୍ଗାପୁର ସଂରକ୍ଷିତ ଜଙ୍ଗଲରେ ଥିବାବେଳେ ତିନିଦିନ ହେବ ହାତୀ ମାନେ ନିଜନିଜ ମଧ୍ୟରେ ଲଢେଇ ଲାଗୁଥିବାର ଦେଖିବାକୁ ମିଳୁଥିବାବେଳେ ସୁନାହଜା ଗ୍ରାମର ଗଜସାଥୀ ତଥା ବନସୁରକ୍ଷା ସମିତି ସଭାପତି ମହେଶ୍ୱର ମହାନ୍ତଙ୍କ କହିବା ମୁତାବକ ସେ ସକାଳୁ ବିଳକୁ ପାଣି ଛାଡିବା ପାଇଁ ଆସିଥିବା ସମୟରେ ହାତୀ ଟିକୁ କାଦୁଅରେ ପୋତି ହୋଇ ଫସି ରହିଥିବାର ଦେଖିବାକୁ ପାଇଥିଲେ। ଏ ସମ୍ପର୍କରେ ସେ ବନବିଭାଗକୁ ଖବର ଦେବାପରେ ଘଟଣାସ୍ଥଳରେ ଏସସିଏଫ ରବିନାରାୟଣ ମହାନ୍ତି, ରେଞ୍ଜର ମନୱାର ଖାଁ, ଫୋରେଷ୍ଟର ପ୍ରଶାନ୍ତ କୁମାର ସିଂ ସାମନ୍ତ,ଦୀପକ କୁମାର ପାତ୍ର, ଫୋରେଷ୍ଟ ଗାର୍ଡ ବିଜୟ କୁମାର ମହାନ୍ତ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଗୁରୁବାର ଦିନ ଶବ ବ୍ୟବଚ୍ଛେଦ କରାଯାଇ ହାତୀଟିର ଶବ ସତ୍କାର କରାଯିବ ବୋଲି ଜଣାପଡିଛି।

ମୋରଡ଼ା: ଦିନ ଥିଲା ଯେଉଁ ଜାଗାରେ ଦୁବ କଅଁଳୁ ନଥିଲା ସେଠାରେ ଆଜି ସୁସ୍ୱାଦୁ ଆମ୍ବ ଫଳୁଛି । ବର୍ଷ ବର୍ଷ ଧରି ପଡିଆ ପଡି ଥିବା ଜାଗାରେ ଏବେ ସୁନା ଫଳୁଛି । ମୟୂରଭଞ୍ଜ ଜିଲ୍ଲା ମୋରଡ଼ା ବ୍ଲକ ଭାଳିଆଡିହା ଓ ଘୋଳ ମୁହାଁ ପଞ୍ଚାୟତରେ ହୋଇଥିବା ଆମ୍ବ ବଗିଚାର ଦୃଶ୍ୟ ସମସ୍ତଙ୍କୁ ଆଚମ୍ବିତ କରେ। ଛୋଟ ଛୋଟ ଗଛରେ ଫଳିଛି ପେନ୍ଥା ପେନ୍ଥା ଆମ୍ବ। ଏସବୁ ଆମ୍ବ ଦେଖିବାକୁ ଯେତିକି ସୁନ୍ଦର ତାର ସ୍ୱାଦ ମଧ୍ୟ ସେତିକି ଚିତ୍ତାକର୍ଷକ। ଯେଉଁଥିପାଇଁ ଏସବୁ ଆମ୍ବର ଚାହିଦା ଏବେ ଦେଶ ବିଦେଶରେ ବଢୁଛି। ଆମ୍ବଚାଷୀ କୁଆଁର ସରେନ କୁହନ୍ତି ୧୯୯୩ ମସିହା ଓ ୨୦୧୨-୧୩ ମସିହାରେ ସରକାରଙ୍କ ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାରେ ସରକାର ଏହି ସବୁ ଆମ୍ବ ଗଛ ଲଗାଇବା ସହ ଏବେ ଆମ୍ବ ବିକ୍ରି କେମିତି ହେବ ତାହା ମଧ୍ୟ ବୁଝୁଛନ୍ତି । ଆଦିବାସୀ ବହୁଳ ମୟୂରଭଞ୍ଜ ଜିଲ୍ଲାରେ ଆଦିବାସୀଙ୍କୁ ସ୍ୱାବଲମ୍ବୀ କରିବା ପାଇଁ ୧୯୯୩ ମସିହା ଓ ୨୦୧୨-୨୦୧୩ ମସିହାରେ ମୟୂରଭଞ୍ଜ ଜିଲ୍ଲା ମୋରଡ଼ା ବ୍ଲକ ଭାଳିଆଡିହା ଓ ଘୋଳମୁହାଁ ପଞ୍ଚାୟତର ଡକୋଇ ଅମଳ ନାମା, କିଷାନତାଣ୍ଡି, ଆଣୁଆଁ, ଉଲିଡ଼ିହି, ତାଡ଼କି ଆଦି ଗାଁରେ ୯୫ ଏକର ଜାଗାରେ ୪୨୦୦ ରୁ ଉର୍ଦ୍ଧ୍ବ ଆମ୍ବଗଛ ଲାଗିଥିବା ବେଳେ ୮୯ ଜଣ ଆମ୍ବଚାଷୀ ଏହି ଚାଷ ଦ୍ୱାରା ଲାଭବାନ ହେଉଛନ୍ତି।

ତେବେ ଚଳିତ ବର୍ଷ ମହାମାରୀ କରୋନା ଓ ବାତ୍ୟା ୟାସ ପାଇଁ ଆମ୍ବ ନଷ୍ଟ ହୋଇଥିଲେ ସୁଦ୍ଧା ଏବେ ଏହି ଆମ୍ବ ବଗିଚାରୁ ଆମ୍ବ ଦିଲ୍ଲୀ, ଟାଟା, ବକାର ଓ ଅନ୍ୟ ରାଜ୍ୟର ରାଜଧାନୀ ମାନଙ୍କରେ ଚାହିଦା ବଢୁଛି। ଅନ୍ୟପକ୍ଷରେ ଆମ୍ବଚାଷୀ ବାହାଦୂର ସରେନ କହିଛନ୍ତି ବର୍ଷକୁ ଆମ୍ବଚାଷ କରି ୧୯୯୩ରେ ଲାଗିଥିବା ଆମ୍ବ ଗଛରୁ ଏକର ପ୍ରତି ୪୦,୦୦୦ ହଜାର ଟଙ୍କା ଓ ୨୦୧୨ -୨୦୧୩ରେ ଲାଗିଥିବା ଆମ୍ବ ଗଛରୁ ଏକର ପ୍ରତି ୪୦୦୦ ହଜାରରୁ ୫୦୦୦ ହଜାର ଟଙ୍କା ରୋଜଗାର କରୁଛନ୍ତି ଆମ୍ବଚାଷୀ। ସରକାରୀ ଯୋଜନାରେ ଆମ୍ବଚାଷ କରି ଆଦିବାସୀ ଆମ୍ବଚାଷୀ ଏବେ ଲାଭବାନ ହେବା ସହ ଚାଷୀଙ୍କ ମୁହଁରେ ହସ ଫୁଟିପାରିଛି ।