ହିନ୍ଦୀ ସିନେମାର ସ୍ୱର୍ଣ୍ଣିମ ଯୁଗରେ ନିଜର ସୁମଧୁର କଣ୍ଠରେ କୋଟି କୋଟି ଶ୍ରୋତାଙ୍କ ହୃଦୟ ଜିଣିଥିବା ବଲିଉଡର କିମ୍ବଦନ୍ତୀ ଗାୟିକା ସୁମନ କଲ୍ୟାଣପୁରଙ୍କ ପରଲୋକ ଘଟିଛି। ମୁମ୍ବାଇରେ ୮୯ ବର୍ଷ ବୟସରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ବାର୍ଦ୍ଧକ୍ୟଜନିତ ସମସ୍ୟା କାରଣରୁ ତାଙ୍କର ଦେହାନ୍ତ ହୋଇଥିବା ପରିବାର ପକ୍ଷରୁ ସୂଚନା ମିଳିଛି। ତାଙ୍କ ବିୟୋଗରେ ଭାରତୀୟ ସଙ୍ଗୀତ ଜଗତରେ ଏକ ସ୍ୱର୍ଣ୍ଣିମ ଅଧ୍ୟାୟର ଅନ୍ତ ଘଟିଛି।

ସଙ୍ଗୀତ ଦୁନିଆରେ ଆକସ୍ମିକ ପ୍ରବେଶ

ସ୍ୱାଧୀନତା ପୂର୍ବରୁ ଢାକାରେ ଜନ୍ମଗ୍ରହଣ କରିଥିବା ସୁମନ କଲ୍ୟାଣପୁରଙ୍କ ସଙ୍ଗୀତ ଦୁନିଆରେ ପ୍ରବେଶ ସମ୍ପୂର୍ଣ୍ଣ ଆକସ୍ମିକ ଥିଲା। ସେ ପ୍ରାରମ୍ଭିକ ପର୍ଯ୍ୟାୟରେ ମୁମ୍ବାଇର ପ୍ରତିଷ୍ଠିତ ଜେଜେ ସ୍କୁଲ୍ ଅଫ୍ ଆର୍ଟରେ ଚିତ୍ରକଳା (ପେଣ୍ଟିଂ) ଶିକ୍ଷା କରୁଥିଲେ। ତେବେ କଲେଜର ଏକ କାର୍ଯ୍ୟକ୍ରମରେ ସେ ଗୀତ ଗାଉଥିବା ସମୟରେ ପ୍ରସିଦ୍ଧ ଗାୟକ ତଲତ ମେହମୁଦ ତାଙ୍କ କଣ୍ଠସ୍ୱର ଶୁଣି ପ୍ରଭାବିତ ହୋଇଥିଲେ। ଏହା ପରେ ତାଙ୍କ ପାଇଁ ବଲିଉଡର ଦ୍ୱାର ଖୋଲିଯାଇଥିଲା ଏବଂ ୧୯୫୪ ମସିହାରେ ମୁକ୍ତିଲାଭ କରିଥିବା ଫିଲ୍ମ 'ମଙ୍ଗୁ' ଜରିଆରେ ସେ ନିଜର ପ୍ଲେବ୍ୟାକ୍ ସିଙ୍ଗିଂ କ୍ୟାରିଅର୍ ଆରମ୍ଭ କରିଥିଲେ।

ଲତା ମଙ୍ଗେସକରଙ୍କ ଯୁଗ ଓ ନିଜସ୍ୱ ପରିଚୟ

ଯେଉଁ ସମୟରେ ସୁମନ କଲ୍ୟାଣପୁର ବଲିଉଡରେ ପାଦ ଥାପିଥିଲେ, ସେତେବେଳେ ସଙ୍ଗୀତ ଜଗତରେ ଲତା ମଙ୍ଗେସକରଙ୍କ ଏକଚାଟିଆ ଆଧିପତ୍ୟ ରହିଥିଲା। ଉଭୟଙ୍କ କଣ୍ଠସ୍ୱରରେ ଅନେକ ସମାନତା ଥିବା ସତ୍ତ୍ୱେ, ସୁମନ ନିଜ ପାଇଁ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଥିଲେ। ଯେତେବେଳେ ରୟାଲିଟି ବିବାଦ କାରଣରୁ ଲତା ମଙ୍ଗେସକର ଏବଂ ମହମ୍ମଦ ରଫି ଏକାଠି ଗୀତ ଗାଇବା ବନ୍ଦ କରିଦେଇଥିଲେ, ସେହି ସମୟରେ ସୁମନ କଲ୍ୟାଣପୁର ଏବଂ ରଫିଙ୍କ ଯୋଡ଼ି ଅନେକ ହିଟ୍ ଗୀତ ଭେଟି ଦେଇଥିଲେ। ସେମାନେ ମିଳିତ ଭାବେ ପ୍ରାୟ ୧୪୦ ଗୀତ ରେକର୍ଡ କରିଥିଲେ।

ଅଭୁଲା ଗୀତ ଓ ସମ୍ମାନ

ନିଜର ସଙ୍ଗୀତ କ୍ୟାରିଅରରେ ସୁମନ ଅନେକ ଲୋକପ୍ରିୟ ଗୀତ ଗାଇଛନ୍ତି। ସେଥିମଧ୍ୟରୁ 'ଆଜକଲ୍ ତେରେ ମେରେ ପ୍ୟାର କେ ଚର୍ଚ୍ଚେ', 'ନା ନା କରତେ ପ୍ୟାର' ଏବଂ 'ବେହନା ନେ ଭାଇ କି କଲାଇ ସେ' ଭଳି ଗୀତ ଆଜି ବି ଶ୍ରୋତାଙ୍କ ମନରେ ସତେଜ ରହିଛି। ଅନେକ ସମୟରେ ଶ୍ରୋତାମାନେ ତାଙ୍କ ଗୀତ ଶୁଣି ତାହା ଲତା ମଙ୍ଗେସକର ଗାଉଛନ୍ତି ବୋଲି ଭାବି ନେଉଥିଲେ। ଭାରତୀୟ ସଙ୍ଗୀତ ଜଗତକୁ ତାଙ୍କର ଅତୁଳନୀୟ ଅବଦାନ ପାଇଁ ଭାରତ ସରକାର ତାଙ୍କୁ ୨୦୨୩ ମସିହାରେ ସମ୍ମାନଜନକ ପଦ୍ମଭୂଷଣ ଉପାଧିରେ ସମ୍ମାନିତ କରିଥିଲେ। ତାଙ୍କ ବିୟୋଗରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ଙ୍କ ସମେତ ଅନେକ ବିଶିଷ୍ଟ ବ୍ୟକ୍ତି ଶୋକ ପ୍ରକାଶ କରି ଏହାକୁ "ସଙ୍ଗୀତର ଏକ ସ୍ୱର୍ଣ୍ଣିମ ଅଧ୍ୟାୟର ଅନ୍ତ" ବୋଲି ବର୍ଣ୍ଣନା କରିଛନ୍ତି।

ନୂଆଦିଲ୍ଲୀ: ପ୍ରଖ୍ୟାତ ମୂର୍ତ୍ତିକାର ରାମ ଭାଞ୍ଜି ସୂତାରଙ୍କ ଦେହାନ୍ତ ହୋଇଛି। ସେ ପ୍ରାୟ ୧୦୦ ବର୍ଷ ବୟସରେ ନୋଏଡାର ସେକ୍ଟର ୧୯ସ୍ଥିତ ତାଙ୍କ ବାସଭବନରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସେ ବିଶ୍ୱର ସବୁଠାରୁ ଉଚ୍ଚ ପ୍ରତିମା, ଷ୍ଟାଚ୍ୟୁ ଅଫ ୟୁନିଟି ଡିଜାଇନ କରିଥିଲେ। ସମ୍ପ୍ରତି ମହାରାଷ୍ଟ୍ର ସରକାର ତାଙ୍କୁ ତାଙ୍କର ସର୍ବୋଚ୍ଚ ନାଗରିକ ପୁରସ୍କାର ‘ମହାରାଷ୍ଟ୍ର ଭୂଷଣ’ରେ ସମ୍ମାନିତ କରିଛନ୍ତି। ତାଙ୍କୁ ପୂର୍ବରୁ ପଦ୍ମଶ୍ରୀ, ପଦ୍ମଭୂଷଣ ଏବଂ ଟାଗୋର ପୁରସ୍କାର ପ୍ରଦାନ କରାଯାଇଥିଲା।

ରାମ ସୂତାର ୧୯ ଫେବ୍ରୁଆରୁ ୧୯୨୫ ରେ ମହାରାଷ୍ଟ୍ରର ଧୂଲେ ଜିଲାର ଗୋଣ୍ଡୁର ଗ୍ରାମରେ ଏକ ସାଧାରଣ ବଢ଼େଇ ପରିବାରରେ ଜନ୍ମଗ୍ରହଣ କରିଥିଲେ। ପିଲାଦିନରୁ ତାଙ୍କର କଳା ପ୍ରତି ଗଭୀର ଆଗ୍ରହ ଥିଲା। ତାଙ୍କ ପ୍ରତିଭାକୁ ତାଙ୍କ ଗୁରୁ ରାମକୃଷ୍ଣ ଜୋଶୀ ସ୍ବୀକୃତି ଦେଇଥିଲେ ଏବଂ ତାଙ୍କୁ ମୁମ୍ବାଇର ପ୍ରତିଷ୍ଠିତ ଜେ.ଜେ. କଳା ବିଦ୍ୟାଳୟରେ ନାମ ଲେଖାଇବାକୁ ଉତ୍ସାହିତ କରିଥିଲେ। ଏହିଠାରୁ ତାଙ୍କର ମୂର୍ତ୍ତି ର୍ନିମାଣ ଯାତ୍ରା ଆରମ୍ଭ ହୋଇଥିଲା, ଯାହା ପରେ ତାଙ୍କୁ ଅନ୍ତର୍ଜାତୀୟ ଖ୍ୟାତି ପ୍ରଦାନ କରିଥିଲା।

୧୯୫୯ ମସିହାରେ, ରାମ ସୂତାର ଦିଲ୍ଲୀ ଆସି ସୂଚନା ଏବଂ ପ୍ରସାରଣ ମନ୍ତ୍ରଣାଳୟରେ କାମ କରିବା ଆରମ୍ଭ କରିଥିଲେ। ତଥାପି, କଳା ପ୍ରତି ତାଙ୍କର ସମର୍ପଣ ଏତେ ଗଭୀର ଥିଲା ଯେ ସେ କିଛି ସମୟ ପରେ ସରକାରୀ ଚାକିରି ଛାଡି ମୂର୍ତ୍ତିକଳା ପାଇଁ ତାଙ୍କ ଜୀବନକୁ ସମ୍ପୂର୍ଣ୍ଣ ଭାବରେ ଉତ୍ସର୍ଗ କରିଥିଲେ। ୧୯୬୧ରେ, ଗାନ୍ଧୀ ସାଗର ଡ୍ୟାମରେ ତାଙ୍କର ୪୫ ଫୁଟ ଉଚ୍ଚ ଦେବୀ ଚମ୍ବଲଙ୍କ ପ୍ରତିମୂର୍ତ୍ତି ତାଙ୍କୁ ଜାତୀୟ ସ୍ତରରେ ପରିଚିତି ଆଣିଥିଲା। ପରବର୍ତ୍ତୀ ସମୟରେ ସେ ସଂସଦ ଭବନ ପରିସରରେ ଗୋବିନ୍ଦ ବଲ୍ଲଭ ପନ୍ତଙ୍କ ଜୀବନ ଆକାର ପ୍ରତିମୂର୍ତ୍ତି ସମେତ ଅନେକ ଗୁରୁତ୍ୱପୂର୍ଣ୍ଣ କୃତି ସୃଷ୍ଟି କରିଥିଲେ।

ସଂସଦ ଭବନ ପରିସରରେ ସ୍ଥାପିତ ମହାତ୍ମା ଗାନ୍ଧୀଙ୍କ ଧ୍ୟାନ ପ୍ରତିମୂର୍ତ୍ତି ତାଙ୍କର ସବୁଠାରୁ ପ୍ରସିଦ୍ଧ କୃତି ମଧ୍ୟରୁ ଗୋଟିଏ। ମହାରାଜା ରଣଜିତ ସିଂହ, ଛତ୍ରପତି ଶାହୁ ମହାରାଜ, ଇନ୍ଦିରା ଗାନ୍ଧୀ, ଜୟପ୍ରକାଶ ନାରାୟଣ, ମହାତ୍ମା ଫୁଲେ, ପଣ୍ଡିତ ନେହେରୁ ଏବଂ ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ମଧ୍ୟ ଦେଶର ବିଭିନ୍ନ ସ୍ଥାନରେ ସ୍ଥାପିତ ହୋଇଛି।

ରାମ ସୂତାର ପଥର, ମାର୍ବଲ ଏବଂ କାଂସ୍ୟ ସମେତ ବିଭିନ୍ନ ମାଧ୍ୟମରେ କାମ କରିଥିଲେ, କିନ୍ତୁ କାଂସ୍ୟ ତାଙ୍କର ପ୍ରିୟ ଧାତୁ ଥିଲା। ତାଙ୍କର ସବୁଠାରୁ ପ୍ରସିଦ୍ଧ କୃତି ହେଉଛି ଗୁଜରାଟରେ ୧୮୨ ମିଟର ଉଚ୍ଚ ଷ୍ଟାଚ୍ୟୁ ଅଫ ୟୁନିଟି, ଯାହା ବିଶ୍ୱର ସବୁଠାରୁ ଉଚ୍ଚ ପ୍ରତିମୂର୍ତ୍ତି ରହିଛି। ବେଙ୍ଗାଲୁରୁରେ ଥିବା ବିଶାଳ ଶିବ ପ୍ରତିମା, ପୁଣେର ମୋଶିରେ ଥିବା ସମ୍ଭାଜୀ ମହାରାଜଙ୍କ ପ୍ରତିମା ଏବଂ ଅଯୋଧ୍ୟାର ଲତା ମଙ୍ଗେଶକର ଚୌକରେ ଥିବା ବିଶାଳ ବୀଣା ମଧ୍ୟ ତାଙ୍କ କଳାର ଉଦାହରଣ। ରାମ ସୂତାରଙ୍କ ସଦ୍ୟତମ କୃତି ହେଉଛି ଦକ୍ଷିଣ ଗୋଆର ଶ୍ରୀ ସଂସ୍ଥାନ ଗୋକର୍ଣ୍ଣ ଜୀବୋତ୍ତମ ମଠରେ ଥିବା ଭଗବାନ ରାମଙ୍କ ୭୭ ଫୁଟ ଉଚ୍ଚତା ବିଶିଷ୍ଟ ବ୍ରୋଞ୍ଜ ପ୍ରତିମା।

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏକ ବଡ ନିଷ୍ପତ୍ତି ନେଇଛନ୍ତି। ପ୍ରତିବର୍ଷ ଭଳି ଏଥର ମଧ୍ୟ ପଦ୍ମ ପୁରସ୍କାର ପାଇଁ ଦିଲ୍ଲୀରୁ କେନ୍ଦ୍ର ସରକାରଙ୍କୁ ନାମ ପଠାଯିବ। କିନ୍ତୁ ଦିଲ୍ଲୀ ସରକାର କେବଳ ଡାକ୍ତର ଏବଂ ସ୍ୱାସ୍ଥ୍ୟ କର୍ମୀଙ୍କ ନାମ ପଠାଇବେ। ଏଥିପାଇଁ ଦିଲ୍ଲୀ ସରକାର ଏକ ଇମେଲ ଆଇଡି  (padmaawards.delhi@gmail.com) ମଧ୍ୟ ଜାରି କରିଛନ୍ତି। ଯେଉଁଥିରେ  ଡାକ୍ତର ଓ ସ୍ବାସ୍ଥ୍ଯକର୍ମୀ ତାଙ୍କ ନାମ ପଠାଇ ପାରିବେ।  ଆଜି ଏ ନେଇ କେଜ୍ରିୱାଲ ଏକ ଡିଜିଟାଲ ସାମ୍ବାଦିକ ସମ୍ମିଳନୀ ମାଧ୍ୟମରେ ସୂଚନା ଦେଇଛନ୍ତି।

ଗତ ଦେଢ ବର୍ଷ ଧରି ମାହାମାରୀରୁ ଜୀବନ ରକ୍ଷା କରିବା ପାଇଁ ସ୍ୱାସ୍ଥ୍ୟ କର୍ମୀମାନେ ନିରନ୍ତର ପରିଶ୍ରମ କରିଥିବାରୁ ଆମେ ସମସ୍ତେ କୃତଜ୍ଞ। କେବଳ ଦେଶ ନୁହେଁ ସମଗ୍ର ବିଶ୍ୱ ସେମାନଙ୍କ ନିକଟରେ କୃତଜ୍ଞ ଜଣାଉଛି ବୋଲି କେଜ୍ରିୱାଲ କହିଥିଲେ।

କେଜ୍ରିୱାଲ ଏହା ମଧ୍ୟ କହିଛନ୍ତି ଯେ, ସାରା ଦେଶରେ କେବଳ ଦଲ୍ଲୀ ସରକାର କରୋନାରୁ ସହିଦ ହୋଇଥିବା ଫ୍ରଣ୍ଟ ଲାଇନ କର୍ମଚାରୀଙ୍କୁ ଏକ କୋଟି ଟଙ୍କାର ସମ୍ମାନ ପ୍ରଦାନ କରିଛି। ବର୍ତ୍ତମାନ ସମସ୍ତ ଡାକ୍ତର ଓ ସ୍ୱାସ୍ଥ୍ୟ କର୍ମୀମାନଙ୍କୁ ଉପଯୁକ୍ତ ସମ୍ମାନ ଦେବାର ସମୟ ଆସିଛି। ଏଥିପାଇଁ ଦିଲ୍ଲୀ ସରକାର ଏଥର ନିଷ୍ପତ୍ତି ନେଇଛନ୍ତି ଯେ, ପଦ୍ମ ପୁରସ୍କାର ଅଧୀନରେ ପାଇବାକୁ ଥିବା ତିନିଟି ପୁରସ୍କାର ପାଇଁ ରାଜ୍ୟ ସରକାର କେନ୍ଦ୍ର ସରକାରଙ୍କୁ ପଠାଇଥିବା ନାମରେ କେବଳ ଡାକ୍ତର ଏବଂ ସ୍ୱାସ୍ଥ୍ୟ କର୍ମଚାରୀଙ୍କ ନାମ ରହିବ। ଏହି ନାମ ସାର୍ବଜନୀନ କରାଯିବ।

ଏଥିପାଇଁ କେଜ୍ରିୱାଲ ଏକ ଇମେଲ ଆଇଡି ମଧ୍ୟ ଦେଇଛନ୍ତି। ଯେଉଁଥିରେ ପଦ୍ମ ପୁରସ୍କାର ପାଇବାକୁ ଚାହୁଁଥିବା  ଡାକ୍ତର କିମ୍ବା ସ୍ୱାସ୍ଥ୍ୟକର୍ମୀମାନେ ପଠାଇ ପାରିବେ। ଇମେଲ ପ୍ରେରକଙ୍କୁ ଡାକ୍ତର କିମ୍ବା ସ୍ୱାସ୍ଥ୍ୟ କର୍ମଚାରୀଙ୍କ ନାମ ତଥା ପଦ୍ମ ପୁରସ୍କାର ପାଇବାକୁ ଚାହୁଁଥିବା କାରଣ ବିଷୟରେ ବିସ୍ତୃତ ଭାବରେ ଉଲ୍ଲେଖ କରିବାକୁ ପଡିବ।

ଆବେଦନ କରିବା ପ୍ରକ୍ରିୟା :-
-ଇମେଲ୍ ଆଇଡି- padmaawards.delhi@gmail.com 

-ଅଗଷ୍ଟ ୧୫ ସୁଦ୍ଧା ଚାହୁଁଥିବା ଡାକ୍ତର କିମ୍ବା ସ୍ୱାସ୍ଥ୍ୟ କର୍ମଚାରୀଙ୍କ ନାମ ପଠାନ୍ତୁ ଏବଂ ତାଙ୍କ କାର୍ଯ୍ୟକୁ ବିସ୍ତୃତ ଭାବରେ ବର୍ଣ୍ଣନା କରନ୍ତୁ।

– ଦିଲ୍ଲୀ ଉପମୁଖ୍ଯମନ୍ତ୍ରୀ ମନୀଷ ସିସୋଦିଆ ଏହି କମିଟିର ଅଧ୍ୟକ୍ଷ ହେବେ। ଏହି କମିଟି ଅଗଷ୍ଟ ୧୫ ସୁଦ୍ଧା ପଠାଯାଇଥିବା ଜନସାଧାରଣଙ୍କ ପରାମର୍ଶକୁ ଯାଞ୍ଚ କରିବ ଏବଂ ଏହା ପରେ ମନୋନୀତ ନାମଗୁଡିକ ସେପ୍ଟେମ୍ବର ୧୫ ସୁଦ୍ଧା କେନ୍ଦ୍ର ସରକାରଙ୍କ ନିକଟକୁ ପଠାଯିବ।