କୋଲକାତା : ପଶ୍ଚିମବଙ୍ଗର ସବୁ ବିଶ୍ୱ ବିଦ୍ୟାଳୟର କୁଳାଧିପତି ହେବେ ମମତା ବାନାର୍ଜୀ । ରାଜ୍ୟପାଳ ଜଗଦୀପ ଧନଖଡଙ୍କ ସ୍ଥାନରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟ ସଞ୍ଚାଳିତ ବିଶ୍ୱ ବିଦ୍ୟାଳୟର କୁଳାଧିପତି ହେବେ। ଏ ସମ୍ପର୍କିତ ବିଲ୍ ଆଜି ପଶ୍ଚିମବଙ୍ଗ ବିଧାନସଭାରେ ପାରିତ ହୋଇଛି । ତେବେ ଆଜି ବିଜେପି ବିଧାୟକମାନେ ଏହି ବିଧେୟକକୁ ବିରୋଧ କରିଥିଲେ ମଧ୍ୟ ୧୮୨ ବିଧାୟକଙ୍କ ସମର୍ଥନରେ ଏହି ବିଲ୍ ବିଧାନସଭାରେ ପାରିତ ହୋଇଥିଲା । ୪୦ ଜଣ ବିଜେପି ବିଧାୟକ ଏହି ବିଲକୁ ବିରୋଧ କରିଥିଲେ ।

ସମସ୍ତ ରାଜ୍ୟର ରାଜ୍ୟପାଳମାନେ ରାଜ୍ୟରେ ସଞ୍ଚାଳିତ ବିଶ୍ୱ ବିଦ୍ୟାଳୟ ଗୁଡିକର କୁଳାଧିପତି ହୋଇଥାନ୍ତି।ରାଜ୍ୟରେ ଥିବା ସମସ୍ତ ବିଶ୍ୱବିଦ୍ୟାଳୟରେ କୁଳପତି ନିଯୁକ୍ତ କରିବାର ଅଧିକାର ରାଜ୍ୟପାଳଙ୍କ ପାଖରେ ରହିଥାଏ। କିନ୍ତୁ ପଶ୍ଚିମବଙ୍ଗ ସରକାର ଏହାକୁ ପରିବର୍ତ୍ତନ କରିଛନ୍ତି। ଆଜି ବେଙ୍ଗଲ ବିଧାନସଭାରେ ପାରିତ ହୋଇଥିବା ବିଲ୍‌ ଅନୁଯାୟୀ, ରାଜ୍ୟରେ ଥିବା ସମସ୍ତ ବିଶ୍ୱବିଦ୍ୟାଳୟରେ କୁଳପତି ନିଯୁକ୍ତ କରିବାର ଅଧିକାର ରାଜ୍ୟପାଳଙ୍କ ବଦଳରେ ମୁଖ୍ୟମନ୍ତ୍ରୀଙ୍କୁ ମିଳିବ। ଏଥିସହ ରାଜ୍ୟର ଥିବା ସମସ୍ତ ବିଶ୍ୱବିଦ୍ୟାଳୟର କୁଳାଧିପତି ହେବେ ମୁଖ୍ୟମନ୍ତ୍ରୀ। ପୂର୍ବରୁ ରାଜ୍ୟପାଳ କୁଳାଧିପତିର ମାନ୍ୟତା ପାଉଥିଲେ।

ସୋମବାର ପଶ୍ଚିମବଙ୍ଗ ବିଧାନସଭାରେ ଏହି ବିଲ୍ ପାରିତ ହେବା ପରେ ପଶ୍ଚିମବଙ୍ଗ ଶିକ୍ଷାମନ୍ତ୍ରୀ ବ୍ରତ୍ୟ ବସୁ କହିଛନ୍ତି, ମୁଖ୍ୟମନ୍ତ୍ରୀ ବିଶ୍ୱବିଦ୍ୟାଳୟର କୁଳାଧିପତି ପଦ ସମ୍ଭାଳିବା କିଛି ବି ଭୁଲ୍ ନୁହେଁ । ପ୍ରଧାନମନ୍ତ୍ରୀ ଯେତେବେଳେ କେନ୍ଦ୍ରୀୟ ବିଶ୍ୱବିଦ୍ୟାଳୟ ଓ ବିଶ୍ୱଭାରତୀର କୁଳାଧିପତି ରହୁଛନ୍ତି, ସେତେବେଳେ ମୁଖ୍ୟମନ୍ତ୍ରୀ ମଧ୍ୟ ରାଜ୍ୟର ବିଶ୍ୱବିଦ୍ୟାଳୟର କୁଳାଧିପତି କାହିଁକି ରହିପାରିବେନି ବୋଲି ସେ କହିଛନ୍ତି । ଏ ସମ୍ପର୍କରେ ପୁଂଛି କମିଶନଙ୍କ ସୁପାରିଶ ଦେଖିବାକୁ ସେ କହିଛନ୍ତି ।ବର୍ତ୍ତମାନର ରାଜ୍ୟପାଳ ଯିଏ କୁଳାଧିପତି ଭାବେ କାର୍ଯ୍ୟ କରୁଛନ୍ତି, ସିଏ ଏକାଧିକ ପ୍ରସଙ୍ଗରେ ପ୍ରୋଟକଲ ଉଲ୍ଲଙ୍ଘନ କରିଛନ୍ତି। ତେଣୁ ମୁଖ୍ୟମନ୍ତ୍ରୀ କୁଳାଧିପତି ହେବା ଦରକାର ବୋଲି ସେ ଯୁକ୍ତି ବାଢ଼ିଥିଲେ।

ଅନ୍ୟପଟେ ପଶ୍ଚିମବଙ୍ଗ ବିଧାନସଭାରେ ଆଜି ଏହି ବିଲ୍ ପାରିତ କରାଯାଇଥିଲା। ୨୯୪ ସଦସ୍ୟ ବିଶିଷ୍ଟ ପଶ୍ଚିମବଙ୍ଗ ବିଧାନସଭାରେ ୧୮୨ ବିଧାୟକ ବିଧେୟକ ସପକ୍ଷରେ ମତଦାନ କରିଥିବା ବେଳେ ୪୦ ସଦସ୍ୟ ଏହା ବିରୋଧରେ ମତଦାନ କରିଛନ୍ତି । ଏହାର ବିରୋଧ କରି ବିରୋଧୀ ଦଳ ବିଜେପି କହିଛି ଯେ, ମୁଖ୍ୟମନ୍ତ୍ରୀଙ୍କୁ କୁଳାଧିପତି ଭାବେ ନିଯୁକ୍ତି କରିବାର ଅର୍ଥ ବର୍ତ୍ତମାନ ଶିକ୍ଷା ପ୍ରଣାଳୀରେ ସିଧାସଳଖ ରାଜନୈତିକ ହସ୍ତକ୍ଷେପ ରହିବ । ଏନେଇ ବିଜେପି ବିଧାୟକ ଅଗ୍ନିମିତ୍ର ପଲ୍ କହିଛନ୍ତି, ରାଜ୍ୟ ସରକାର ସବୁ କିଛି ନିୟନ୍ତ୍ରଣ କରିବାକୁ ଚାହୁଁଛନ୍ତି । ମୁଖ୍ୟମନ୍ତ୍ରୀଙ୍କୁ କୁଳାଧିପତି ଭାବେ ନିଯୁ୍‌କ୍ତ କରିବାର ନିର୍ଣ୍ଣୟ କେବଳ ରାଜ୍ୟର ଶିକ୍ଷା ପ୍ରଣାଳୀରେ କ୍ଷମତାସୀନ ଦଳର ସିଧାସଳଖ ହସ୍ତକ୍ଷେପକୁ ଆହୁରି ସୁବିଧାଜନକପାଇଁ ଉଦ୍ଦିଷ୍ଟ ।

ଭୁବନେଶ୍ୱର: ପ୍ରଫେସର ତଥା ବରିଷ୍ଠ ବୈଜ୍ଞାନିକ ଶରତ କୁପାର ପଳିତା ହେଲେ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ଭାରପ୍ରାପ୍ତ କୁଳପତି । ଯେପର୍ଯ୍ୟନ୍ତ ପରବର୍ତ୍ତୀ କୁଳପତିଙ୍କୁ ନିଯୁକ୍ତ କରାନଯାଇଛି, ସେ ପର୍ଯ୍ୟନ୍ତ କେନ୍ଦ୍ରୀୟ ବିଶ୍ୱବିଦ୍ୟାଳୟର ଦାୟିତ୍ୱ ନିର୍ବାହ କରିବେ ଶରତ କୁପାର ପଳିତା । ଜଣେ ଦକ୍ଷ ଏବଂ ବରିଷ୍ଠ ପ୍ରଫେସର ଭାବରେ ଏମଆଇ ଓ ୟୁଜିସିର ପ୍ରାବଧାନ ଅନୁସାରେ ଭାରପ୍ରାପ୍ତ କୁଳପତି ଭାବେ କର୍ତ୍ତବ୍ୟ ନିର୍ବାହ ପାଇଁ ପ୍ରଫେସର ପଳିତାଙ୍କୁ ଅନୁମତି ଦିଆଯାଇଛି ।

ପ୍ରଫେସର ପଳିତା ମଧ୍ୟ ଜଣେ ବୈଜ୍ଞାନିକ ଅଟନ୍ତି । ସେ ବିଶ୍ୱବିଦ୍ୟାଳୟରେ ଜୈବ ବିବିଧତା ଏବଂ ପ୍ରାକୃତିକ ସମ୍ପଦ ସରଂକ୍ଷଣର ବରିଷ୍ଠ ପ୍ରଫେସର ଅର୍ଥାତ ଡିନ ଭାବରେ ନିଯୁକ୍ତ ରହିଥିଲେ । ସେହିପରି ପୂର୍ବରୁ ବିଶ୍ୱବିଦ୍ୟାଳରେ ଇନଚାର୍ଜ ଭାବେ ମଧ୍ୟ ନିଜର ଦକ୍ଷତା ପ୍ରକାଶ କରିଛନ୍ତି । ପୂର୍ବରୁ ବିଶ୍ୱ ବିଦ୍ୟାଳୟ ଦାୟିତ୍ୱରେ ଥିବା ବେଳେ ପ୍ରଫେସର ପଳିତା ଅନେକ ଉନ୍ନତି ମୂଳକ ପଦକ୍ଷେପ ନେଇଥିଲେ । କିପରି କଲେଜରେ ଶିକ୍ଷାଦାନର ମାନ ବୃଦ୍ଧି ପାଇବ ଏବଂ ଏଥିପାଇଁ ସମସ୍ତ ଅଧ୍ୟାପକ, କର୍ମଚାରୀଙ୍କ ସହଯୋଗ ଆବଶ୍ୟକ ତାହାକୁ ବିଶେଷ ପ୍ରାଧାନ୍ୟ ଦେଇଥିଲେ ।

ପ୍ରଫେସର ପଳିତା ଦୀର୍ଘ ୩୮ ବର୍ଷ ଧରି ଶିକ୍ଷାଦାନ ଜାରି ରଖିଥିବାବେଳେ ୨୯ ବର୍ଷ ବୟସରୁ ଅଧ୍ୟାପନା ଆରମ୍ଭ କରିଥିଲେ । କେନ୍ଦ୍ରାପଡ଼ା ଏବଂ ନୟାଗଡ଼ ସ୍ୱୟଂ ଶାସିତ କଲେଜରୁ ଜୁଲୋଜି ଅଦ୍ୟାପକ ଭାବେ କାର୍ଯ୍ୟ ଆରମ୍ଭ କରିଥିଲେ । ଏହା ଭିତରେ ୮ ବର୍ଷ ହେବ କେନ୍ଦ୍ରୀୟ ବିଶ୍ୱ ବିଦ୍ୟାଳୟରେ ଜୈବ ବିବିଧତା ଉପରେ ଶିକ୍ଷାଦାନ ଜାରି ରଖିଥିଲେ । ବର୍ତ୍ତମାନ ତାଙ୍କୁ କେନ୍ଦ୍ରୀୟ ବିଶ୍ୱବିଦ୍ୟାଳୟରେ ଭାରପ୍ରାପ୍ତ କୁଳପତି ଭାବେ ନିଯୁକ୍ତ କରାଯାଇଥିବା ନେଇ ବିଜ୍ଞପ୍ତି ପ୍ରକାଶ ପାଇଛି ।