ବୋର୍ଡ ଅଫ୍ କଣ୍ଟ୍ରୋଲ୍ ଫର୍ କ୍ରିକେଟ୍ ଇନ୍ ଇଣ୍ଡିଆ (BCCI) ପକ୍ଷରୁ ଆଇପିଏଲ୍ ୨୦୨୬ (IPL 2026) ର ପ୍ଲେ-ଅଫ୍ ଏବଂ ଫାଇନାଲ୍ ମ୍ୟାଚ୍ ପାଇଁ ଭେନ୍ୟୁ ବା ଷ୍ଟାଡିୟମ୍ ଘୋଷଣା କରାଯାଇଛି। ତେବେ ଏକ ବଡ଼ ନିଷ୍ପତ୍ତି କ୍ରମେ ବିସିସିଆଇ ଚଳିତ ସିଜିନ୍‌ର ଫାଇନାଲ୍ ମୁକାବିଲାକୁ ବେଙ୍ଗାଲୁରୁ ପରିବର୍ତ୍ତେ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମ୍କୁ ସ୍ଥାନାନ୍ତର କରିଛି। ବିସିସିଆଇର ଏହି ନିଷ୍ପତ୍ତିକୁ ନେଇ କର୍ଣ୍ଣାଟକ ରାଜ୍ୟ କ୍ରିକେଟ୍ ସଂଘ (KSCA) ତୀବ୍ର ଅସନ୍ତୋଷ ବ୍ୟକ୍ତ କରିଛି।

କାହିଁକି ବାଦ୍ ପଡ଼ିଲା ବେଙ୍ଗାଲୁରୁ?

ବିସିସିଆଇ ପକ୍ଷରୁ ଜାରି କରାଯାଇଥିବା ବିବୃତ୍ତି ଅନୁଯାୟୀ, ବେଙ୍ଗାଲୁରୁର ଏମ୍ ଚିନ୍ନାସ୍ୱାମୀ ଷ୍ଟାଡିୟମ୍କୁ ପ୍ରଥମେ ଫାଇନାଲ୍ ଆୟୋଜନ ପାଇଁ ଚୟନ କରାଯାଇଥିଲା। ଗତ ବର୍ଷର ଚାମ୍ପିଅନ୍ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ହୋଇଥିବାରୁ ନିୟମ ଅନୁଯାୟୀ ସେମାନଙ୍କ ଘରୋଇ ପଡ଼ିଆରେ ଫାଇନାଲ୍ ହେବାର ଥିଲା। କିନ୍ତୁ କର୍ଣ୍ଣାଟକ କ୍ରିକେଟ୍ ସଂଘ ଏବଂ ସ୍ଥାନୀୟ ପ୍ରଶାସନର କିଛି ଦାବି ବିସିସିଆଇର ନିର୍ଦ୍ଧାରିତ ଗାଇଡଲାଇନ୍ ଏବଂ ପ୍ରୋଟୋକଲ୍ ବାହାରେ ଥିବାରୁ ଏଭଳି ପଦକ୍ଷେପ ନିଆଯାଇଛି। ବର୍ତ୍ତମାନ ଆଗାମୀ ମେ' ୩୧ ତାରିଖରେ ଅହମ୍ମଦାବାଦଠାରେ ଫାଇନାଲ୍ ମ୍ୟାଚ୍ ଖେଳାଯିବ।

କ୍ଷୋଭ ପ୍ରକାଶ କଲା କେଏସସିଏ

ଫାଇନାଲ୍ ଆୟୋଜନ ଅଧିକାର ଛଡ଼ାଇ ନିଆଯିବା ପରେ କେଏସସିଏ (KSCA) ନିରାଶ ହୋଇଛି। ସଂଘର ସଭାପତି ତଥା ପୂର୍ବତନ ଭାରତୀୟ କ୍ରିକେଟର୍ ଭେଙ୍କଟେଶ ପ୍ରସାଦ କହିଛନ୍ତି ଯେ, ସେମାନେ ଏହି ମ୍ୟାଚ୍ ଆୟୋଜନ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଥିଲେ ଏବଂ ଏ ନେଇ ବିସିସିଆଇ ସହିତ ଲଗାତାର ଯୋଗାଯୋଗରେ ଥିଲେ। ସବୁଠାରୁ ବଡ଼ କଥା ହେଉଛି, ଭେନ୍ୟୁ ବାତିଲ୍ କରିବାର କୌଣସି ସ୍ପଷ୍ଟ କାରଣ ସେମାନଙ୍କୁ ଆନୁଷ୍ଠାନିକ ଭାବେ ଜଣାଯାଇନାହିଁ ବୋଲି ସଂଘ ଅଭିଯୋଗ କରିଛି।

କେବେ ଏବଂ କେଉଁଠି ହେବ ପ୍ଲେ-ଅଫ୍ ମ୍ୟାଚ୍?

ଚଳିତ ଥର ବିସିସିଆଇ ଏକ ସ୍ୱତନ୍ତ୍ର ପଦକ୍ଷେପ ସ୍ୱରୂପ ତିନୋଟି ଭିନ୍ନ ସହରରେ ପ୍ଲେ-ଅଫ୍ ଏବଂ ଫାଇନାଲ୍ ଆୟୋଜନ କରିବାକୁ ଯାଉଛି। ଏହାର ସମ୍ପୂର୍ଣ୍ଣ ସୂଚୀ ନିମ୍ନରେ ଦିଆଗଲା:

ମେ' ୨୬: କ୍ୱାଲିଫାୟର୍-୧ (ଧର୍ମଶାଳା)

ମେ' ୨୭: ଏଲିମିନେଟର୍ (ନ୍ୟୁ ଚଣ୍ଡିଗଡ଼)

ମେ' ୨୯: କ୍ୱାଲିଫାୟର୍-୨ (ନ୍ୟୁ ଚଣ୍ଡିଗଡ଼)

ମେ' ୩୧: ଫାଇନାଲ୍ (ଅହମ୍ମଦାବାଦ)

ବେଙ୍ଗାଲୁରୁ ପ୍ରଶଂସକଙ୍କ ପାଇଁ ଏହି ଖବର ନିରାଶାଜନକ ହୋଇଥିବା ବେଳେ ଲଗାତାର ଭାବେ ପଞ୍ଚମ ବର୍ଷରେ ଚତୁର୍ଥ ଥର ପାଇଁ ଅହମ୍ମଦାବାଦ ଫାଇନାଲ୍ ଆୟୋଜନ କରିବାର ଗୌରବ ଲାଭ କରିଛି।

ବେଙ୍ଗାଲୁରୁ: ସହରାଞ୍ଚଳରେ ଆପାର୍ଟମେଣ୍ଟ ସଂସ୍କୃତି ବଢିବା ସହ ପୋଷା ଜୀବଜନ୍ତୁଙ୍କୁ ନେଇ ବିବାଦ ମଧ୍ୟ ବଢିବାରେ ଲାଗିଛି। ନିକଟରେ ବେଙ୍ଗାଲୁରୁର ଏକ ଆପାର୍ଟମେଣ୍ଟରେ କୁକୁର ପରିସ୍ରା କରିବାକୁ ନେଇ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ୱାକିଂ ପାଥ୍ ନିକଟରେ କୁକୁର ପରିସ୍ରା କରିବାରୁ କିଛି ବରିଷ୍ଠ ନାଗରିକ ସଂଘବଦ୍ଧ ହୋଇ କୁକୁର ମାଲିକଙ୍କୁ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଛି। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

Varthur, Bengaluru: Senior citizens give it back to a dog owner after his dog urinates in their walking area! 😂😂pic.twitter.com/V3pZv6CGS3

— Shilpa (@shilpa_cn) March 6, 2026

କ’ଣ ଥିଲା ପୂରା ଘଟଣା?

ରିପୋର୍ଟ ଅନୁଯାୟୀ, ଘଟଣାଟି ବେଙ୍ଗାଲୁରୁର ବର୍ଥୁର ଅଞ୍ଚଳରେ ଥିବା 'ବ୍ରିଗେଡ୍ ୟୁଟୋପିଆ' ଆପାର୍ଟମେଣ୍ଟରେ ଘଟିଛି। ମାର୍ଚ୍ଚ ୬ ତାରିଖ ସକାଳ ପ୍ରାୟ ୯.୩୦ ସମୟରେ ତରୁଣ ଅରୋରା ନାମକ ଜଣେ ବ୍ୟକ୍ତି ତାଙ୍କ କୁକୁରକୁ ବୁଲାଇବାକୁ ନେଇଥିଲେ। ସେଠାରେ ଥିବା ଏକ ନିର୍ଦ୍ଦିଷ୍ଟ ସ୍ଥାନ ବରିଷ୍ଠ ନାଗରିକମାନଙ୍କ ପାଇଁ ସଂରକ୍ଷିତ ଥିଲା। ତରୁଣଙ୍କ କୁକୁର ସେହି ସ୍ଥାନ ନିକଟରେ ପରିସ୍ରା କରିଦେବାରୁ ସେଠାରେ ଥିବା ବୃଦ୍ଧବୃଦ୍ଧାମାନେ ଉତ୍ତ୍ୟକ୍ତ ହୋଇଯାଇଥିଲେ। କଥା କଟାକଟିରୁ ଆରମ୍ଭ ହୋଇଥିବା ଏହି ବିବାଦ ଶେଷରେ ହାତାହାତି ପର୍ଯ୍ୟନ୍ତ ଯାଇଥିଲା।

ସିସିଟିଭିରେ କଏଦ ହେଲା ମାରପିଟ୍ ଦୃଶ୍ୟ

ଘଟଣାସ୍ଥଳରେ ଲାଗିଥିବା ସିସିଟିଭି କ୍ୟାମେରାରେ ମାରପିଟର ଦୃଶ୍ୟ କଏଦ ହୋଇଛି। ଭିଡିଓରେ ଦେଖିବାକୁ ମିଳିଛି ଯେ, କିଛି ବୟସ୍କ ବ୍ୟକ୍ତି ତରୁଣଙ୍କୁ ଘେରିଯାଇ ଚାପୁଡ଼ା ଓ ଗୋଇଠା ମାରୁଛନ୍ତି। ଆକ୍ରମଣ ଯୋଗୁଁ ତରୁଣ ତଳେ ପଡ଼ିଯାଇଥିଲେ ମଧ୍ୟ ସେମାନେ ତାଙ୍କୁ ଛାଡ଼ି ନଥିଲେ। ଅନ୍ୟପକ୍ଷରେ, ଘଟଣାରେ ସମ୍ପୃକ୍ତ ଥିବା ଜଣେ ମହିଳା ପାଲଟା ଅଭିଯୋଗ ଆଣି କହିଛନ୍ତି ଯେ, ତରୁଣ ପ୍ରଥମେ ତାଙ୍କୁ ଚାପୁଡ଼ା ମାରିଥିଲେ ଏବଂ ସେଠାରେ ଥିବା ବରିଷ୍ଠ ନାଗରିକମାନଙ୍କୁ ଧମକ ଦେଇଥିଲେ।

ପୋଲିସର ତଦନ୍ତ ଜାରି

ଏହି ଘଟଣାକୁ ନେଇ ଉଭୟ ପକ୍ଷରୁ ଥାନାରେ ଅଭିଯୋଗ ହୋଇଛି। ତରୁଣ ଅରୋରା ମାଡ଼ ମାରିବା ନେଇ ଅଭିଯୋଗ କରିଥିବାବେଳେ, ବିପକ୍ଷ ଗୋଷ୍ଠୀ ମଧ୍ୟ ଦୁର୍ବ୍ୟବହାର ଅଭିଯୋଗ ଆଣିଛନ୍ତି। ପୋଲିସ ବର୍ତ୍ତମାନ ସିସିଟିଭି ଫୁଟେଜ୍ ଯାଞ୍ଚ କରୁଛି ଏବଂ ପ୍ରକୃତରେ ପ୍ରଥମେ କିଏ ଆକ୍ରମଣ ଆରମ୍ଭ କରିଥିଲା, ତାହା ଖୋଜି ବାହାର କରିବାକୁ ଚେଷ୍ଟା କରୁଛି।

କର୍ଣ୍ଣାଟକର ରାଜଧାନୀ ବେଙ୍ଗାଲୁରୁରୁ ଏକ ସଙ୍ଗିନ ମାମଲା ସାମ୍ନାକୁ ଆସିଛି। ପ୍ରେମ ବିବାହ ପରେ ଜଣେ ଯୁବତୀଙ୍କୁ କିଭଳି ପ୍ରତାରଣାର ଶିକାର ହେବାକୁ ପଡିଛି, ତାହା ଏହି ଘଟଣାରୁ ସ୍ପଷ୍ଟ ବାରି ହୋଇପଡୁଛି। ଅଭିଯୋଗ ଅନୁଯାୟୀ, ବିବାହ ପୂର୍ବରୁ ଧର୍ମ ପରିବର୍ତ୍ତନ କରାଯିବ ନାହିଁ ବୋଲି ପ୍ରତିଶ୍ରୁତି ଦିଆଯାଇଥିଲା, କିନ୍ତୁ ବିବାହ ପରେ ଜବରଦସ୍ତ ଯୁବତୀଙ୍କ ନାମ ରୀତାରୁ ବଦଳାଇ ସାଦିଆ ତବସୁମ କରାଯାଇଛି। ଏବେ ଦୁଇ ସନ୍ତାନର ଜନନୀ ହେବା ପରେ ସ୍ୱାମୀ ତାଙ୍କୁ ଛାଡି ଦ୍ୱିତୀୟ ବିବାହ କରିଛନ୍ତି, ଯାହାକୁ ନେଇ ପୀଡିତା ନ୍ୟାୟ ପାଇଁ ପୋଲିସର ଦ୍ୱାରସ୍ଥ ହୋଇଛନ୍ତି।

ପ୍ରେମ ଜାଲରେ ଫସାଇ ବିବାହ

ଏହି ମାମଲା ୨୦୧୫ ମସିହାରେ ଆରମ୍ଭ ହୋଇଥିଲା। ଡିଜେ ହଲ୍ଲୀ ଅଞ୍ଚଳର ବାସିନ୍ଦା ରୀତା ପିୟୁସି ପଢିବା ସମୟରେ ତାଙ୍କର ସାକ୍ଷାତ ଡିଜେ ପରଭେଜଙ୍କ ସହ ହୋଇଥିଲା। ପରଭେଜ ତାଙ୍କୁ ପ୍ରେମ ଜାଲରେ ଫସାଇଥିଲେ। ଧର୍ମ ଅଲଗା ହୋଇଥିବାରୁ ରୀତାଙ୍କ ପରିବାର ଏହି ସମ୍ପର୍କକୁ ଦୃଢ ବିରୋଧ କରିଥିଲେ। କିନ୍ତୁ ପରଭେଜ କଥା ଦେଇଥିଲେ ଯେ ରୀତାଙ୍କ ଉପରେ କେବେବି ଧର୍ମ ପରିବର୍ତ୍ତନ ପାଇଁ ଚାପ ପକାଯିବ ନାହିଁ ଏବଂ ସେ ବିବାହ ପରେ ମଧ୍ୟ ହିନ୍ଦୁ ହୋଇ ରହିବେ। ଏହି ପ୍ରତିଶ୍ରୁତିକୁ ବିଶ୍ୱାସ କରି ୧୫ ଡିସେମ୍ବର ୨୦୧୯ରେ ଉଭୟଙ୍କ ବିବାହ ସମ୍ପନ୍ନ ହୋଇଥିଲା।

ପ୍ରତିଶ୍ରୁତି ଭାଙ୍ଗିଲେ ସ୍ୱାମୀ, ଧର୍ମ ବଦଳାଇବାକୁ ବାଧ୍ୟ କଲେ

ବିବାହର କିଛି ଦିନ ପରେ ପରଭେଜଙ୍କ ବ୍ୟବହାର ସମ୍ପୂର୍ଣ୍ଣ ବଦଳି ଯାଇଥିଲା। ରୀତାଙ୍କ ଅଭିଯୋଗ ମୁତାବକ, ଇସଲାମ ଧର୍ମ ଗ୍ରହଣ କରିବାକୁ ତାଙ୍କ ଉପରେ ଶାରୀରିକ ଓ ମାନସିକ ନିର୍ଯାତନା ଦିଆଯାଇଥିଲା। ଯଦି ସେ ଧର୍ମ ପରିବର୍ତ୍ତନ ନକରନ୍ତି, ତେବେ ଛାଡପତ୍ର ଦିଆଯିବ ବୋଲି ଧମକ ଦିଆଯାଇଥିଲା। ନିଜ ବୈବାହିକ ଜୀବନ ବଞ୍ଚାଇବାକୁ ଯାଇ ରୀତା ଶେଷରେ ଇସଲାମ ଧର୍ମ ଗ୍ରହଣ କରିଥିଲେ ଏବଂ ତାଙ୍କ ନାମ ବଦଳାଇ ‘ସାଦିଆ ତବସୁମ’ ରଖାଯାଇଥିଲା।

ଦ୍ୱିତୀୟ ବିବାହ ପରେ ଜୀବନରୁ ମାରିଦେବାକୁ ଧମକ

ସାଦିଆ ତବସୁମ ହେବା ପରେ ରୀତା ଦୁଇଟି ସନ୍ତାନ ଜନ୍ମ ଦେଇଥିଲେ, କିନ୍ତୁ ତଥାପି ପରଭେଜଙ୍କ ମନ ବଦଳି ନଥିଲା। ଅଭିଯୋଗ ରହିଛି ଯେ, କିଛି ଦିନ ପରେ ପରଭେଜ ବିନା ଛାଡପତ୍ରରେ ଅନ୍ୟ ଜଣେ ମହିଳାଙ୍କୁ ବିବାହ କରିନେଇଥିଲେ। ଯେତେବେଳେ ସାଦିଆ ଏହାର ବିରୋଧ କରିଥିଲେ, ତାଙ୍କୁ ଜୀବନରୁ ମାରିଦେବାକୁ ଏବଂ ଛାଡପତ୍ର ଦେବାକୁ ଧମକ ଦିଆଯାଇଥିଲା। ସ୍ଥାନୀୟ ଥାନାରୁ ଉପଯୁକ୍ତ ସାହାଯ୍ୟ ନ ମିଳିବାରୁ ପୀଡିତା ଏବେ ବେଙ୍ଗାଲୁରୁ ପୋଲିସ କମିଶନର, ଡିଜିପି ଏବଂ ଆଇଜିପିଙ୍କ ଦ୍ୱାରସ୍ଥ ହୋଇ ନିଜ ଦୁଇ ଛୁଆଙ୍କ ଭବିଷ୍ୟତ ପାଇଁ ନ୍ୟାୟ ଭିକ୍ଷା କରିଛନ୍ତି।

ନୂଆଦିଲ୍ଲୀ: ଲୁହରେ ଭିଜିଲା ଆରସିବିର ବିଜୟ ଉତ୍ସବ। ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁର ବିଜୟ ପରେଡ ବେଳେ ଦଳାଚକଟା କାରଣରୁ ୨୦ରୁ ଅଧିକ ଲୋକ ଗୁରୁତର ହୋଇଥିବା ବେଳେ ପାଖାପାଖି ୩ଜଣଙ୍କର ପ୍ରାଣହାନୀ ହୋଇଥିବା ଜଣାପଡିଛି। ଗୁରୁତରଙ୍କ ମଧ୍ୟରେ ଜଣେ ନାବାଳକ ରହିଥିବା ମଧ୍ୟ ଜଣାପଡିଛି। ବେଙ୍ଗାଲୁରୁର ଚିନ୍ନାସ୍ୱାମୀ ଷ୍ଟାଡିୟମ ବାହାରେ ବିଜୟ ଉତ୍ସବ ପାଳନ ବେଳେ ଏଭଳି ଅଘଟଣ ଘଟିଥିବା କୁହାଯାଉଛି। ଆରସିବି ଟିମ୍‌ ଏୟାରପୋର୍ଟରେ ପହଂଚିବା ପରେ ତାଙ୍କ ସ୍ୱାଗତ ପାଇଁ ହଜାର ହଜାର ଲୋକ ସେଠାରେ ଏକତ୍ର ହୋଇଥିଲେ।

ସ୍ଥାନୀୟ ଗଣମାଧ୍ୟମର ସୂଚନା ଅନୁଯାୟୀ, ଷ୍ଟାଡିୟମ ବାହାରେ ୫୦ହଜାରରୁ ଅଧିକ ଲୋକ ଏକତ୍ର ହୋଇଥିଲେ। ଦଳାଚକଟା କାରଣରୁ ଏତେବଡ ଅଘଟଣ ଘଟିଥିବା ପ୍ରାଥମିକ ସୂଚନା ମିଳିଛି। ରପୋର୍ଟ ଲେଖା ହେଲା ବେଳକୁ ୩ଜଣଙ୍କ ମୃତ୍ୟୁ ଖବର ସାମ୍ନାକୁ ଆସିଛି ଏହି ସଂଖ୍ୟା ଆଗକୁ ବଢିପାରେ।

ବେଙ୍ଗାଲୁରୁ: ଶେଷରେ ଗିରଫ ହେଲେ ପ୍ରଜ୍ବଳ ରେଭନ୍ନା । କର୍ଣ୍ଣାଟକ ଅଶ୍ଳୀଳ ଭିଡ଼ିଓ ମାମଲାରେ ପ୍ରଜ୍ବଳଙ୍କୁ ଗିରଫ କଲା SIT । ଜର୍ମାନୀରୁ ଫେରିବା ପରେ ବେଙ୍ଗାଲୁରୁ ଏୟାରପୋର୍ଟରୁ ଗିରଫ ହେଲେ ପ୍ରଜ୍ବଳ ରେଭନ୍ନା । ତାଙ୍କ ବିରୋଧରେ ଯୈାନ ନିର୍ଯାତନା ଅଭିଯୋଗ ଆସିବା ପରେ ସେ ଫେରାର ହୋଇଯାଇଥିଲେ । ଆଉ ୩୪ ଦିନ ପରେ ସେ ବେଙ୍ଗାଲୁୁରୁ ଫେରିବା ପରେ ଗିରଫ ହୋଇଛନ୍ତି । ଆଜି କୋର୍ଟରେ ତାଙ୍କୁ ହାଜର କରାଯିବ । ଏବେ ତାଙ୍କୁ ସିଆଇଡି କାର୍ଯ୍ୟାଳୟକୁ ନିଆଯାଇଛି ଏବଂ ଆଜି ତାଙ୍କୁ ପଚରାଉଚରା କରାଯାଉଛି ।

ଡାକ୍ତରୀ ମାଇନା ପରେ ପ୍ରଜ୍ବଳଙ୍କୁ ମାଜିଷ୍ଟ୍ରେଟ କୋର୍ଟରେ ହାଜର କରାଯିବ । ଏସଆଇଟି ତାଙ୍କୁ ରିମାଣ୍ଡ ଓ ହେପାଜତରେ ନେବାକୁ ଆବେଦନ କରିପାରେ । ସେକ୍ସ ସ୍କାଣ୍ଡାଲର ଭାଇରାଲ ଭିଡିଓ ଏବଂ ଅଡିଓ ନମୁନା ଯାଂଚ କରାଯିବ । ଜର୍ମାନୀରୁ ଭାରତ ଫେରିବା ପୂର୍ବରୁ ପ୍ରଜୱଲ ରେଭନ୍ନା କର୍ଣ୍ଣାଟକ କୋର୍ଟରେ ଆଗୁଆ ଜାମିନ ଆବେଦନ କରିଥିଲେ । ଏହି ଆବେଦନକୁ ନେଇ ତାଙ୍କ ମା’ କୋର୍ଟରେ ପହଂଚିଥିଲେ ମଧ୍ୟ ଆବେଦନ ଖାରଜ ହୋଇଯାଇଥିଲା ।

ସୂଚନାଯୋଗ୍ୟ, ଅନେକ ମହିଳାଙ୍କୁ ଯୌନ ନିର୍ଯାତନା ନେଇ ପ୍ରଜ୍ବଳଙ୍କ ବିରୋଧରେ ସାଂଘାତିକ ଅଭିଯୋଗ ହୋଇଛି। କେବଳ ବଳାତ୍କାର ନୁହେଁ, ତାଙ୍କ ଯୌନ ନିର୍ଯାତନାରେ ଶିକାର ମହିଳାଙ୍କୁ ସେ ବ୍ଲାକମେଲ କରିଥିବା ମଧ୍ୟ ଅଭିଯୋଗ ହୋଇଛି।

ବେଙ୍ଗାଲୁରୁ: ବାହା ହେବାକୁ ପ୍ରେମିକା ମନା କରିବାରୁ ରାଗରେ ଛୁରି ଭୁସି ହତ୍ୟାକଲା ନୃଶଂସ ପ୍ରେମିକ। ବେଙ୍ଗାଲୁରୁରେ ଘଟିଛି ଏପରି ଏକ ଅଭାବନୀୟ ଘଟଣା। ଶନିବାର ସନ୍ଧ୍ୟାରେ ସହରର ସାଲିନି ଗ୍ରାଉଣ୍ଡ ଅଞ୍ଚଳରେ ଏହି ଘଟଣା ଘଟିଛି। ପ୍ରେମିକା ବିବାହ ପ୍ରସ୍ତାବକୁ ପ୍ରତ୍ୟାଖ୍ୟାନ କରିବାରୁ ପ୍ରେମିକ ତାଙ୍କୁ ଏକାଧିକ ବାର୍‌ ଛୁରୀ ଭୁସି ହତ୍ୟା କରିଥିବା ଅଭିଯୋଗ ହୋଇଛି। ୩୫ ବର୍ଷୀୟ ପ୍ରେମିକ ଘଟଣା ଘଟାଇବା ପରେ ପୁଲିସ୍‌ ଷ୍ଟେସନ୍‌କୁ ଯାଇ ନିଜ ଅପରାଧ ସ୍ବୀକାର କରିଛି ।

ଅଭିଯୁକ୍ତ ଗିରିଶ ଏନଏଲ ଓରଫ ରେହାନ ଅହମ୍ମଦ ଗିରଫ ହୋଇଛି । ମୃତ ମହିଳା ହେଲେ ଜୟନଗର ଭି ବ୍ଲକର ୪୨ବର୍ଷୀୟ ଫରିହା ଖାତୁନ। ଫରିହା ବିବାହିତା ଓ ତାଙ୍କର ଦୁଇଟି ଝିଅ ମଧ୍ୟ ଅଛନ୍ତି। ଉଭୟ ଝିଅଙ୍କର ବୟସ ୨୧ ଓ ୧୬ବର୍ଷ। ଅଭିଯୁକ୍ତ ଗିରିଶ ବେଙ୍ଗାଲୁରୁର ଜୟନଗରର ବାସିନ୍ଦା ହୋଇଥିବା ବେଳେ ତାଙ୍କ ୪୨ ବର୍ଷୀୟା ପ୍ରେମିକା ପଶ୍ଚିମବଙ୍ଗର। ସେ ସହରର ଏକ ସ୍ପାରେ ନିଯୁକ୍ତ ଥିଲେ। ପୁଲିସର ସୂଚନାନୁସାରେ, ନିଜ ଭଉଣୀଙ୍କ ପାଇଁ ଉପଯୁକ୍ତ ବର ଖୋଜିବାରେ ଅସୁବିଧା ହେତୁ ଗିରିଶ ୨୦୧୧ ମସିହାରେ ଇସଲାମ ଧର୍ମ ଗ୍ରହଣ କରିଥିଲେ। ମାର୍ଚ ୨୯ ତାରିଖରେ ଗିରିଶଙ୍କ ଜନ୍ମଦିନ ପୂର୍ବରୁ ଫରିଦା ତାଙ୍କ ଝିଅମାନଙ୍କ ସହ ପଶ୍ଚିମବଙ୍ଗରୁ ବେଙ୍ଗାଲୁରୁ ଫେରିଥିଲେ।

ଫରିଦା ବେଙ୍ଗାଲୁରରୁ ଗିରିଶଙ୍କ ଜନ୍ମଦିନ ପାଳନ କରିବା ସହ ନିଜର ଏକ ଝିଅ ପାଇଁ କଲେଜ୍‌ ଖୋଜିବାକୁ ବି ଯାଇଥିଲେ। ଘଟଣା ଘଟିବା ଦିନ ଗିରିଶ ଫରିଦା ଓ ତାଙ୍କ ଝିଅମାନଙ୍କୁ କିଣାକିଣି କରାଇବା ସହ ମଧ୍ୟାହ୍ନ ଭୋଜନ କରାଇଥିଲେ। ପରେ ସେମାନେ ନିଜ ହୋଟେଲକୁ ଫେରିଥିଲେ। ସନ୍ଧ୍ୟାରେ, ସାଲିନି ଗ୍ରାଉଣ୍ଡରେ ଥିବାବେଳେ ଗିରିଶ ଫରିଦାଙ୍କୁ ବିବାହ ପ୍ରସ୍ତାବ ଦେଇଥିଲେ, କିନ୍ତୁ ସେ ଏହାକୁ ପ୍ରତ୍ୟାଖ୍ୟାନ କରିଥିଲେ। ଏଥିରେ ରାଗିଯାଇ ଗିରିଶ ତାଙ୍କୁ ଏକାଧିକ ଥର ଛୁରୀରେ ଆକ୍ରମଣ କରି ହତ୍ୟା କରି ପରେ ଜୟନଗର ପୁଲିସ ଷ୍ଟେସନରେ ଆତ୍ମସମର୍ପଣ କରିଥିଲେ।

ବେଙ୍ଗାଲୁରୁ: ଫାଇଟର୍‌ ପ୍ଲେନ୍‌ ‘ତେଜସ’ରେ ଉଡ଼ିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବେଙ୍ଗାଲୁରୁ ହାଲ୍ ଏୟାରବେସରୁ ତେଜସରେ ଉଡ଼ାଣ ଭରିଲେ ମୋଦି । ଉଡ଼ାଣ ପରେ ହାଲ୍, DRDO ଏବଂ ବାୟୁସେନାକୁ ଭୁରୀ ଭୁରୀ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ । ବେଙ୍ଗାଲୁରୁସ୍ଥିତ ହିନ୍ଦୁସ୍ତାନ ଏରୋନଟିକ୍ସ୍ ଲିମିଟେଡ୍’ର ଉତ୍ପାଦନ କାରଖାନାରେ ଚାଲିଥିବା କାର୍ଯ୍ୟ ସମୀକ୍ଷା କରିବା ଲାଗି ଆଜି ପ୍ରଧାନମନ୍ତ୍ରୀ ମୋଦି ବେଙ୍ଗାଲୁରୁ ଯାଇଥିଲେ। ବେଙ୍ଗାଲୁରୁସ୍ଥିତ ହିନ୍ଦୁସ୍ତାନ ଏରୋନେଟିକସ ଲିମିଟେଡ ପରିଦର୍ଶନ କରିବା ଅବସରରେ ତେଜସରେ ଉଡାଣ ଭରିଛନ୍ତି ପିଏମ ମୋଦି।

ଉଡ଼ାଣ ପରେ ମୋଦି କହିଛନ୍ତି- ସ୍ବଦେଶୀ ଜ୍ଞାନ କୌଶଳ ଓ ସାମର୍ଥ୍ୟ ଉପରେ ତାଙ୍କର ପୂର୍ଣ୍ଣ ଆସ୍ଥା ରହିଛି। ଟୁ-ସିଟର ତେଜସ ଟ୍ରେନର ଭାରିଆଣ୍ଟରେ ସେ ଉଡାଣ ଭରିଥିଲେ। ବାୟୁସେନା ଓ ନୌସେନା ଦ୍ବାରା ତେଜସ ପରିଚାଳିତ ହୋଇଥାଏ। ୪ ପଏଣ୍ଟ ୪ ଜେନେରେସନର ମଲ୍ଟିରୋଲ ଫାଇଟର ଏୟାରକ୍ରାଫ୍ଟ ତେଜସକୁ ଗ୍ରାଉଣ୍ଡ ଅପରେସନରେ ବ୍ୟବହାର କରାଯାଇଥାଏ।

ଚଳିତ ବର୍ଷ ପ୍ରାରମ୍ଭରେ ଆସାମର ତେଜପୁର ଏୟାରଫୋର୍ସ ଷ୍ଟେସନରୁ ସୁଖୋଇ ବିମାନରେ ଉଡାଣ ଭରିଥିଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ।

ବେଙ୍ଗାଲୁରୁ: କୋଟିଏ କି ଦୁଇ କୋଟି ନୁହେଁ, ରେଡବେଳେ ପୁରା ନଗଦ ୪୨ କୋଟି ଟଙ୍କା ଦେଖି ଅଧିକାରୀଙ୍କ ଆଖି ଟେରା ହୋଇଗଲା । କର୍ଣ୍ଣାଟକରେ ଆୟକର ବିଭାଗର ଚଢ଼ାଉବେଳେ କଣ୍ଟ୍ରାକ୍ଟରଙ୍କ ଘରୁ ଜବତ ହୋଇଛି ନଗଦ ୪୨ କୋଟି ଟଙ୍କା । ଏତେ ପରିମାଣର ଟଙ୍କାକୁ ଖଟ ତଳେ ପ୍ରାୟ ୨୩ଟି ପେଟିରେ ରଖିଥଲେ କଣ୍ଟ୍ରାକ୍ଟର । ଆୟକର ବିଭାଗ ଚଢ଼ାଉ ସମୟରେ ଏହି ବିପୁଳ ପରିମାଣର ନଗଦ ଟଙ୍କା ଜବତ କରାଯାଇଛି। ଏହି ମାମଲାରେ ଆୟକର ବିଭାଗ ପକ୍ଷରୁ ପୂର୍ବତନ କାଉନସିଲର ଏବଂ ତାଙ୍କ ସ୍ୱାମୀଙ୍କୁ ପଚରାଉଚରା କରାଯାଉଛି। ସୂତ୍ରରୁ ପ୍ରକାଶ ଯେ ଏହି ନଗଦ ରାଶି ପାଞ୍ଚ ନିର୍ବାଚନୀ ରାଜ୍ୟରେ ଫଣ୍ଡିଙ୍ଗ୍‌ ପାଇଁ ସଂଗ୍ରହ କରାଯାଇଥିଲା।

ଆରଟି ନଗର ନିକଟ ଆତ୍ମାନନ୍ଦା କଲୋନୀସ୍ଥିତ ଏକ ଫ୍ଲାଟରେ ଏତେ ପରିମାଣର ଟଙ୍କା ଥିବାନେଇ କୌଣସି ବିଶେଷ ସୂତ୍ରରୁ ବିଭାଗ ସୂଚନା ପାଇଥିଲା। ଏହାପରେ ବିଭାଗୀୟ ଅଧିକାରୀମାନେ ସେଠାରେ ଚଢ଼ାଉ କରିବା ସମୟରେ ୪୨ କୋଟି ଟଙ୍କାର ନଗଦ ରାଶି ଜବତ କରିଥିଲେ। ତେବେ ଆମେ କହିରଖୁ କି, ଆସନ୍ତା କିଛି ଦିନ ମଧ୍ୟରେ ରାଜସ୍ଥାନ, ମିଜୋରାମ, ତେଲେଙ୍ଗାନା, ମଧ୍ୟପ୍ରଦେଶ ଏବଂ ଛତିଶଗଡରେ ବିଧାନସଭା ନିର୍ବାଚନ ପାଇଁ ମତଦାନ ହେବାର ଅଛି। ଜବତ ହୋଇଥିବା ଏହି ଟଙ୍କା ସେଠାକୁ ଯିବାର ଥିଲା ବୋଲି ଆଶଙ୍କା କରାଯାଉଛି ।

ବେଙ୍ଗାଲୁରୁ: ଗ୍ରୀସ ଗସ୍ତରୁ ଫେରି ସିଧା ବେଙ୍ଗାଲୁରୁର ଇସ୍ରୋ ମୁଖ୍ୟାଳୟରେ ପହଞ୍ଚିଥିଲେ ମୋଦୀ । ଇସ୍ରୋ ମୁଖ୍ୟାଳୟରେ ପହଞ୍ଚି ଚନ୍ଦ୍ରଯାନ-୩ ମିଶନରେ ସମ୍ପୃକ୍ତ ବୈଜ୍ଞାନିକଙ୍କୁ ଭେଟି ପ୍ରଂଶସା କରିଛନ୍ତି। ଚନ୍ଦ୍ରଯାନ-୩କୁ ଚନ୍ଦ୍ରପୃଷ୍ଠକୁ ପଠାଇଥିବା ଇସ୍ରୋର ସବୁ ବୈଜ୍ଞାନିକମାନଙ୍କୁ ସାଲ୍ୟୁଟ୍ ଜଣାଇ ବେଶ୍‌ ଭାବବିହ୍ୱଳ ହୋଇପଡ଼ିଥିଲେ ମୋଦୀ । ଇସ୍ରୋ ବୈଜ୍ଞାନିକଙ୍କୁ ପ୍ରଶଂସା କରିବା ସହ କହିଛନ୍ତି, ଜୟ ବିଜ୍ଞାନ, ଜୟ ଅନୁସନ୍ଧାନ।

ଇସ୍ରୋ ବୈଜ୍ଞାନିକଙ୍କୁ ଅଜସ୍ର ପ୍ରଶଂସାରେ ପୋତି ପକାଇବା ସହ ଶୁଭେଚ୍ଛା ଜଣାଇଲେ ମୋଦୀ । ଏହି ଅବସରରେ ବୈଜ୍ଞାନିକଙ୍କୁ ସମ୍ବୋଧିତ କରି ମୋଦୀ କହିଛନ୍ତି, ଭାରତ ଏବେ ଚନ୍ଦ୍ରରେ ପହଞ୍ଚି ଯାଇଛି। ଏହାପଛରେ ଆପଣମାନଙ୍କ ଧୈର୍ଯ୍ୟ ସାମର୍ଥ୍ୟ, ତପସ୍ୟା ଥିବା ବେଳେ ତାହା ସମ୍ମୁଖରେ ମୁଁ ନତମସ୍ତକ ହେଉଛି।

ଅନ୍ୟପଟେ ଏଣିକି ଅଗଷ୍ଟ ୨୩ ତାରିଖ ଜାତୀୟ ମହାକାଶ ଦିବସ ଭାବେ ପାଳନ ହେବ । ଇସ୍ରୋ ବୈଜ୍ଞାନିକଙ୍କୁ ସମ୍ବୋଧନ ବେଳେ ପ୍ରଧାନମନ୍ତ୍ରୀ ଘୋଷଣା କରିଛନ୍ତି । ଚନ୍ଦ୍ରଯାନ-୩ ଚନ୍ଦ୍ରପୃଷ୍ଠରେ ଅବତରଣ ଦିନକୁ ମନେରଖିବାକୁ ପ୍ରତିବର୍ଷ ଏହି ଦିନ ପାଳିତ ହେବ ଜାତୀୟ ମହାକାଶ ଦିବସ । ‘ଚନ୍ଦ୍ରଯାନ-୩’ ଚନ୍ଦ୍ରପୃଷ୍ଠର ଯେଉଁ ସ୍ଥାନରେ ଲ୍ୟାଣ୍ଡ କଲା ଉକ୍ତ ସ୍ଥାନର ନାମକରଣ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଆଜିଠୁ ସମଗ୍ର ଦୁନିଆ ଉକ୍ତ ସ୍ଥାନକୁ ‘ଶିବଶକ୍ତି ପଏଣ୍ଟ’ ନାଁରେ ଜାଣିବ ବୋଲି କହିଲେ ମୋଦୀ । ଏଥିସହ ଚନ୍ଦ୍ରଯାନ-୨ର ପଦଚିହ୍ନ ସ୍ଥଳକୁ ‘ତ୍ରିରଙ୍ଗା’ ନାଁ ଦେଲେ ମୋଦୀ ।

ନୂଆଦିଲ୍ଲୀ: ଆଜିଠାରୁ ବେଙ୍ଗାଲୁରୁରେ ବିରୋଧୀ ଦଳଙ୍କ ଦୁଇ ଦିନିଆ ବୈଠକ ଆରମ୍ଭ ହେବାକୁ ଯାଉଛି। ୨୦୨୪ ନିର୍ବାଚନରେ କେନ୍ଦ୍ରରୁ ବିଜେପିକୁ ହଟାଇବା ଉଦ୍ଦେଶ୍ୟରେ ପ୍ରମୁଖ ବିରୋଧୀ ଦଳଙ୍କ ପ୍ରଥମ ବୈଠକ ପାଟନା ଠାରେ ଅନୁଷ୍ଠିତ ହୋଇଥିବା ବେଳେ ବେଙ୍ଗାଲୁରୁ ଠାରେ ଦ୍ବିତୀୟ ବୈଠକ ହେବାକୁ ଯାଉଛି। ଏହି ବୈଠକରେ ୨୪ଟି ରାଜନୈତିକ ଦଳ ଏକାଠି ହୋଇ ବିଜେପି ବିରୋଧୀ ରଣନୀତି ପ୍ରସ୍ତୁତି ଲାଗି ଆଲୋଚନା କରିବେ। କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଏହି ବୈଠକରେ ଯୋଗ ଦେବା ସହିତ ଦଳ ପକ୍ଷରୁ ସୋମବାର ଆୟୋଜିତ ରାତ୍ର ଭୋଜନରେ ସବୁ ଦଳୀୟ ନେତାଙ୍କୁ ଆପ୍ୟାୟିତ କରିବେ।

ସୋନିଆଙ୍କ ଏହି ‘ଡିନର ପାର୍ଟି’ କୂଟନୀତିକୁ ନେଇ ଏବେ ରାଜନୀତିକ ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଥିବା ବେଳେ ପ୍ରଥମ ବୈଠକରେ ଦିଲ୍ଲୀ ଅଧ୍ୟାଦେଶ ପ୍ରସଙ୍ଗକୁ ନେଇ ଅସନ୍ତୁଷ୍ଟ ରହିଥିବା ଆମ୍‌ ଆଦମୀ ପାର୍ଟି ଏହି ବୈଠକରେ ଯୋଗ ଦେବାକୁ ଘୋଷଣା କରିବା ଆହୁରି ରୋଚକ ହୋଇଛି। ଗତ ଜୁନ ମାସ ୨୩ ତାରିଖରେ ଜେଡିୟୁ ସୁପ୍ରିମୋ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ବରେ ଅନୁଷ୍ଠିତ ବୈଠକରେ ଦିଲ୍ଲୀ ଅଧ୍ୟାଦେଶ ପ୍ରସଙ୍ଗରେ କଂଗ୍ରେସ ତା’ର ଆଭିମୁଖ୍ୟ ସ୍ପଷ୍ଟ କରୁ ବୋଲି ଆପ୍‌ ମୁଖ୍ୟ ଅରବିନ୍ଦ କେଜ୍ରିୱାଲ କହିଥିଲେ। ଯଦି କଂଗ୍ରେସ ଏହି ଅଧ୍ୟାଦେଶକୁ ବିରୋଧ ନ କରେ ତେବେ ଏହି ବୈଠକରୁ ଆପ୍‌ ଓହରିଯିବ ବୋଲି ଧମକ ଦେଇଥିଲେ। ସେତେବେଳେ ରାହୁଲ ଗାନ୍ଧୀ ଏହି ବୈଠକରେ ପ୍ରତିନିଧିତ୍ବ କରିଥିଲେ ହେଁ ଦିଲ୍ଲୀ ଅଧ୍ୟାଦେଶକୁ ନେଇ ମୁହଁ ଖୋଲି ନଥିଲେ। ତେବେ ଏହି ପ୍ରସଙ୍ଗରେ ରବିବାର କଂଗ୍ରେସ ନିଜର ଆଭିମୁଖ୍ୟ ସ୍ପଷ୍ଟ କରିବା ସହିତ ସଂସଦରେ ଅଧ୍ୟାଦେଶକୁ ବିରୋଧ କରିବ ବୋଲି ଘୋଷଣା କରିଛି।

ଦେଶର ସଂଘୀୟ ବ୍ୟବସ୍ଥାକୁ ବିଜେପି ବାରମ୍ବାର କୁଠାରଘାତ କରି ଚାଲିଛି ଏବଂ ଅଣ ବିଜେପି ରାଜ୍ୟଗୁଡିକରେ ରାଜ୍ୟପାଳଙ୍କ ଦ୍ବାରା ଶାସନତନ୍ତ୍ରକୁ ପ୍ରଭାବିତ କରିଚାଲିଛି। ଏହାକୁ କଂଗ୍ରେସ ସବୁବେଳେ ବିରୋଧ କରି ଆସିଥିଲା ବେଳେ ଦିଲ୍ଲୀ ପ୍ରଶାସନିକ ସେବାକୁ ନେଇ କେନ୍ଦ୍ର ସରକାର ଯେଉଁ ଅଧ୍ୟାଦେଶ ଆଣିଛନ୍ତି ତାହାକୁ ଦଳ କଦାଚିତ୍‌ ସମର୍ଥନ କରିବ ନାହିଁ ବୋଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜ୍ଜନ ଖଡ଼ଗେ ରବିବାର ଘୋଷଣା କରିଛନ୍ତି। କଂଗ୍ରେସର ଏହି ଘୋଷଣା ପରେ ବେଙ୍ଗାଲୁରୁ ବୈଠକରେ ଯୋଗ ଦେବାକୁ ଆପ୍‌ ମୁଖ୍ୟ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି।

ଦିଲ୍ଲୀ ଅଧ୍ୟାଦେଶ ପ୍ରସଙ୍ଗକୁ ଆଧାର କରି କଂଗ୍ରେସ ସମେତ ପ୍ରମୁଖ ବିରୋଧୀ ଦଳ ଏକାଠି ହେଉଥିବାରୁ ବିଜେପି ପାଇଁ ଆଗାମୀ ଦିନରେ ବଡ଼ ଚ୍ୟାଲେଞ୍ଜ ସୃଷ୍ଟି ହେବ ବୋଲି କୁହାଯାଉଛି। ବର୍ତ୍ତମାନ ସୁଦ୍ଧା କଂଗ୍ରେସ ସମେତ ଟିଏମସି,ବିଆରଏସ୍‌,ସମାଜବାଦୀ ପାର୍ଟି, ଜେଏମଏମ୍‌, ସିପିଆଇ ସିପିଆଇ(ଏମ), ଶିବସେନା(ୟୁବିଟି), ଏନସିପି, ଜେଡିୟୁ, ଆରଜେଡି ଏବଂ ଡିଏମକେ ଅଧ୍ୟାଦେଶ ପ୍ରସଙ୍ଗରେ ଆପ୍‌କୁ ସମର୍ଥନ ଦେଇସାରିଛନ୍ତି। ଆଗାମୀ ୨୦ ତାରିଖରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଥିବା ବେଳେ କେନ୍ଦ୍ର ସରକାର ଏହି କାଳରେ ଦିଲ୍ଲୀ ଅଧ୍ୟାଦେଶ ସମେତ ୨୧ଟି ବିଲ ଆଗତ କରିବାକୁ ପ୍ରସ୍ତୁତ ହୋଇଛନ୍ତି। ତେବେ ଏହି ସମୟରେ ବିରୋଧୀଙ୍କ ଶକ୍ତି ପ୍ରଦର୍ଶନ କିଭଳି ରହିବ ଏବଂ ୨୦୨୪ ନିର୍ବାଚନରେ ଏହା କିଭଳି ପ୍ରତିଫଳିତ ହେବ ତାହାକୁ ନେଇ ବିଭିନ୍ନ ମହଲରେ ଉତ୍ସୁକତା ଜାରି ରହିଛି।

୨୦୨୪ ନିର୍ବାଚନ ପାଇଁ ରାଜନୈତିକ ମହଲରେ ପ୍ରାୟତଃ ପ୍ରସ୍ତୁତି ଆରମ୍ଭ ହୋଇଯାଇଛି। ଶାସକ ଏବଂ ବିରୋଧୀ ନିଜର ରଣନୀତି ପ୍ରସ୍ତୁତି ନେଇ କାର୍ଯ୍ୟ ଆରମ୍ଭ କରିଦେଇଛନ୍ତି। ଏହି ନିର୍ବାଚନରେ ବିଜେପିକୁ ହଟାଇବା ଲାଗି ସବୁ ବିରୋଧୀ ଆସନ୍ତାକାଲି ବେଙ୍ଗାଲୁରୁରେ ଏକାଠି ହେଉଥିବା ବେେଳ ଏହାର ପରଦିନ ଅର୍ଥାତ ଜୁଲାଇ ୧୮ରେ ବିଜେପି ନେତୃତ୍ବରେ ଏନଡିଏର ମଧ୍ୟ ମହାବୈଠକ ହେବାକୁ ଯାଉଛି। ୨୦୨୪ରେ କ୍ଷମତା ବଜାୟ ରଖିବା ନେଇ ବିଜେପି ନିଜର ରଣନୀତି ପ୍ରସ୍ତୁତି କରିବା ସହିତ ନିର୍ବାଚନ ପୂର୍ବରୁ ସହଯୋଗୀ ସମଭାବାପନ୍ନ ଦଳଙ୍କୁ ନିଜ ଆଡକୁ ଟାଣିବାକୁ ଉଦ୍ୟମ ଆରମ୍ଭ କରିଦେଇଛି। ଏହି ବୈଠକରେ ‘ହାମ୍‌’ ଦଳ ମୁଖ୍ୟ ଜିତନ୍‌ ରାମ ମାନଝୀ ଏବଂ ଏଲଜେପି(ରାମ ବିଳାସ) ମୁଖ୍ୟ ଚିରାଗ ପାଶୱାନ ଯୋଗ ଦେବେ ବୋଲି ସୂଚନା ମିଳିଛି। ଏହାବ୍ୟତୀତ ଅନ୍ୟ କେତେକ ଆଞ୍ଚଳିକ ଦଳକୁ ବିଜେପି ଏନଡିଏରେ ସାମିଲ କରିବାକୁ ମଧ୍ୟ ଉଦ୍ୟମ ଜାରି ରଖିଛି।

ଭୁବନେଶ୍ୱର: ପୁଣି ବଡ ହୃଦୟ ଦେଖାଇଲେ ବାଗଚୀ ଦମ୍ପତି । ଓଡ଼ିଶା ପରେ ବେଙ୍ଗାଲୁରୁରେ ବାଗଚୀ ଦମ୍ପତିଙ୍କ ଚର୍ଚ୍ଚା । ବେଙ୍ଗାଲୁରୁରେ ମଲ୍ଟି ସ୍ପେଶାଲିଟି ହସ୍ପିଟାଲ ପାଇଁ ପାର୍ଥସାରଥିଙ୍କ ସହ ୪୨୫କୋଟି ଟଙ୍କା ଦାନ କଲେ ସୁଶ୍ମିତା ବାଗଚୀ ଓ ସୁବ୍ରତ ବାଗଚୀ । ପାର୍ଥସାରଥିଙ୍କ ସହ ମିଶି ନିର୍ମାଣ କରିବେ ବିଶ୍ୱସ୍ତରୀୟ ଚିକିତ୍ସା ବିଜ୍ଞାନ ଗବେଷଣା କେନ୍ଦ୍ର । ମେଡିକାଲରେ ରହିବ ୮୦୦ ବେଡ ଏବଂ ହସ୍ପିଟାଲର ନାଁ ରହିବ ବାଗଚୀ-ପାର୍ଥସାରଥି ହସ୍ପିଟାଲ । ପୂର୍ବରୁ ବାଗଚୀ ଓଡିଶାରେ ବିଶ୍ୱସ୍ତରୀୟ କ୍ୟାନସର ହସ୍ପିଟାଲ ଓ ପାଲିଆଟିଭ୍ କେୟାର ସେଂଟର ପ୍ରତିଷ୍ଠା ପାଇଁ ୩୪୦ କୋଟି ଟଙ୍କା ଦାନ କରିଥିଲେ ।

Odisha gave us life, Karnataka gave us identity. Delighted to share, along with friends Radha & @nspartha Subroto & I will gift to @iiscbangalore fund for construction of a 800 bed Bagchi-Parthasarathy Hospital in IISc to bring engineering, science & medicine under one roof pic.twitter.com/XIV05nuOKB

— Susmita Bagchi (@Susmita4Odisha) February 14, 2022

ଓଡ଼ିଶାର ଲୋକଙ୍କ କୋଭଡ ବିପତ୍ତି ବେଳେ ସତର୍କ ଏବଂ ସାବଧାନ କରାଇଥିବା ସୁବ୍ରତ ବାଗଚୀ, ଓ଼ଡିଶାରେ କ୍ୟାନସର ମେଡିକାଲ ନିର୍ମାଣ ପାଇଁ ପୂର୍ବରୁ ୩୪୦ କୋଟି ଟଙ୍କା ଦାନ କରିଥିଲେ । ଓଡିଶାରେ ବିଶ୍ୱସ୍ତରୀୟ କ୍ୟାନସର ହସ୍ପିଟାଲ ଓ ପାଲିଆଟିଭ୍ କେୟାର ସେଂଟର ପ୍ରତିଷ୍ଠା ପାଇଁ ଏହି ଅର୍ଥ ରାଜ୍ୟ ସରକାରଙ୍କୁ ପ୍ରଦାନ କରିଥିଲେ । ଏବେ ପୁଣି ଥରେ ବାଗଚୀ ଦମ୍ପତିଙ୍କୁ ମିଳିଛି ବାହବା । ସଞ୍ଚିତ ଅର୍ଥରେ ନିର୍ମାଣ କରିବେ ବିଶ୍ୱ ସ୍ତରୀୟ ଗବେଷଣା କେନ୍ଦ୍ର । ଏନେଇ ସୂଚନା ଦେଇଛନ୍ତି ନିଜେ ସୁସ୍ମିତା ବାଗଚୀ ।

ବେଙ୍ଗାଲୁରୁ: ଗୋଟିଏ ଷଣ୍ଢର ଦାମ୍ ଯଦି କୋଟିଏ ଟଙ୍କା ତେବେ ଏହାକୁ କେହି ବିଶ୍ବାସ କରିବେ ନାହିଁ । କିନ୍ତୁ ବିଶ୍ବାସଯୋଗ୍ୟ ନହେଲେ ମଧ୍ୟ ଏଭଳି ଘଟଣା ବେଙ୍ଗାଲୁରୁରେ ଅନୁଷ୍ଠିତ କୃଷି ମେଳାରେ ଦେଖାଯାଇଛି। ପ୍ରତିବର୍ଷ ଭଳି ଚଳିତ ବର୍ଷ ଅନୁଷ୍ଠିତ ଏହି ମେଳାରେ କ୍ରିଷ୍ଣା ନାମକ ସାଢ଼େ ତିନି ବର୍ଷର ଷଣ୍ଢ ଏକ କୋଟି ଟଙ୍କାରେ ବିକ୍ରି ହୋଇଛି। ଏହାର ମାଲିକ ବୋରେଗୌଡା କହିଛନ୍ତି ଯେ ଷଣ୍ଢଟି ବିରଳ ‘ହଲିକର’ ପ୍ରଜାତିର। ଏହାକୁ ସବୁ ପ୍ରଜାତିର ମା’ ବୋଲି କୁହାଯାଇଥାଏ | ଏହି ପ୍ରଜାତି ଦିନକୁ ଦିନ ଲୋପ ହେବାରେ ଲାଗିଛି। ଏହାର ସିମେନର ମଧ୍ୟ ଚାହିଦା ଅଧୂକ ରହିଛି। ଗୋଟିଏ ଡୋଜ୍ ସିମେନ ହଜାରେ ଟଙ୍କାରେ ବିକ୍ରି ହୁଏ। ଏହି ଷଣ୍ଢକୁ ଦେଖିବା ପାଇଁ ମେଳାରେ ଭିଡ଼ ଲାଗିଥିଲା। ଲୋକେ ଏହା ସହ ସେଲ୍‌ଫି ମଧ୍ୟ ନେଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଚାରି ଦିନିଆ କୃଷି ମେଳାରେ ୧୨ ହଜାର କୃଷକ ସାମିଲ ହୋଇଥିଲେ। ଏଥିରେ ବିଭିନ୍ନ ପ୍ରଜାତିର ଗାଈଗୋରୁ, ଷଣ୍ଢ ସହିତ କୃଷି ଯନ୍ତ୍ରପାତି ମଧ୍ୟ ପ୍ରଦର୍ଶନ କରାଯାଇଥିଲା।

ଲୋକେ ଅନଲାଇନରେ ଏବଂ ପ୍ରତ୍ୟକ୍ଷ ଭାବେ ମେଳାରେ ସାମିଲ ହୋଇଥିଲେ। ତେବେ କ୍ରିଷ୍ଣା ମେଳାରେ ଆକର୍ଷଣର କେନ୍ଦ୍ର ପାଲଟି ଥିଲା । ଏହାକୁ ନେବା ପାଇଁ ଅନେକ ଲୋକ ନିଲାମ ଡାକିଥିଲେ । ପରିଶେଷରେ ଜଣେ ବ୍ୟକ୍ତି କୋଟିଏ ଟଙ୍କା ଦେଇ ଏହି ଷଣ୍ଡକୁ ନେଇଥିଲା। ହଲକର ପ୍ରଜାତିର ଗାଈ ଏକ ପ୍ରୋଟିନ ଯୁକ୍ତ କ୍ଷୀର ଦେଇଥାନ୍ତି। କିନ୍ତୁ ଦୁର୍ଭାଗ୍ୟର ବିଷୟ ଯେ ଏହି ପ୍ରଜାତି ଦିନକୁ ଦିନ ଲୋପ ପାଇବାରେ ଲାଗିଛି।