ଭୁବନେଶ୍ୱର: ପ୍ରଥମ ଭାରତୀୟ ବ୍ୟାଡ୍‌ମିଣ୍ଟନ ଖେଳାଳି ଭାବେ ପିଭି ସିନ୍ଧୁ ଜାପାନ ଓପନ ଟାଇଟଲ୍‌ ଜିତିଛନ୍ତି। ରବିବାର ଟୋକିଓରେ ଅନୁଷ୍ଠିତ ମହିଳା ଫାଇନାଲରେ ସିନ୍ଧୁ ୨୧-୧୭, ୨୧-୧୭ ସିଧାସଳଖ ଗେମରେ ଘରୋଇ ତାରକା ତଥା ତିନିଥରର ବିଶ୍ୱ ଚାମ୍ପିଅନ ଅକାନେ ୟାମାଗୁଚିଙ୍କୁ ପରାସ୍ତ କରିଥିଲେ। ଦୁଇ ବର୍ଷର ପ୍ରତୀକ୍ଷାର ଅନ୍ତ ପରେ ପ୍ରଥମ ଓ ମୋଟ୍‌ ଉପରେ ୬ଷ୍ଠ ବିଡବ୍ଲ୍ୟୁଏଫ୍‌ ୱାର୍ଲ୍ଡ ଟୁର୍‌ ଟାଇଟଲ୍‌ ଜିତିଥିବା ସିନ୍ଧୁଙ୍କୁ ଏହି ଅବସରରେ ଚାରିଆଡ଼ୁ ଶୁଭେଚ୍ଛାର ସୁଅ ଛୁଟିଛି। ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏକ୍ସ’ ଜରିଆରେ ସିନ୍ଧୁଙ୍କୁ ଶୁଭେଚ୍ଛା ଜଣାଇଛନ୍ତି। ‘ଅକାନେ ୟାମାଗୁଚିଙ୍କୁ ପରାସ୍ତ କରି ଜାପାନ ଓପନ ଟାଇଟଲ୍‌ ଜିତିଥିବା ପିଭି ସିନ୍ଧୁଙ୍କୁ ଅଭିନନ୍ଦନ। ସେ ପ୍ରଥମ ଭାରତୀୟ ଭାବରେ ଏହି ଟାଇଟଲ୍‌ ବିଜୟୀ ହୋଇଛନ୍ତି। ଫାଇନାଲରେ ତାଙ୍କର ନିଖୁଣ ପ୍ରଦର୍ଶନ ତାଙ୍କୁ ଘରୋଇ ତାରକା ଏବଂ ତିନିଥର ବିଶ୍ୱ ଚାମ୍ପିଅନ ୟାମାଗୁଚିଙ୍କୁ ସିଧାସଳଖ ଗେମରେ ପରାସ୍ତ କରିବାରେ ସାହାଯ୍ୟ କରିଥିଲା। ସେ ତାଙ୍କର ଚମତ୍କାର ପ୍ରଦର୍ଶନ ଜାରି ରଖନ୍ତୁ ଏବଂ ଦେଶ ପାଇଁ ଅଧିକ ଗୌରବ ଆଣନ୍ତୁ। ଶୁଭକାମନା’ ବୋଲି ନବୀନ ତାଙ୍କ ଶୁଭେଚ୍ଛା ବାର୍ତ୍ତାରେ ଉଲ୍ଲେଖ କରିଛନ୍ତି। 

ନବୀନଙ୍କ ଅଭିନନ୍ଦନକୁ ସ୍ୱୀକାର କରି ସିନ୍ଧୁ ତୁରନ୍ତ ଧନ୍ୟବାଦ ଜଣାଇବା ସହ ତାଙ୍କର ଏହି ସ୍ମରଣୀୟ ବିଜୟକୁ ମହାପ୍ରଭୁ ଜଗନ୍ନାଥଙ୍କୁ ଉତ୍ସର୍ଗ କରିଛନ୍ତି। ଏଥିସହ ଏକ ହୃଦୟସ୍ପର୍ଶୀ ବାର୍ତ୍ତାରେ, ସିନ୍ଧୁ ରାଜ୍ୟ ସହିତ ତାଙ୍କର ଗଭୀର ବ୍ୟକ୍ତିଗତ ସମ୍ପର୍କ ଓ ନବୀନଙ୍କ ଶାସନକୁ ବେଶ୍‌ ପ୍ରଶଂସା କରିଛନ୍ତି। ସିନ୍ଧୁ କହିଛନ୍ତି, “ମୋର ଶ୍ୱଶୁର, ଯିଏ ଜଣେ ବରିଷ୍ଠ ବ୍ୟୁରୋକ୍ରାଟ ଭାବରେ କାର୍ଯ୍ୟ କରିଥିଲେ, ସର୍ବଦା ଆପଣଙ୍କୁ, ଆପଣଙ୍କ ନେତୃତ୍ୱକୁ ଏବଂ ଓଡ଼ିଶାର ଶାସନ ବିଷୟରେ ବହୁତ ଉଚ୍ଚ ପ୍ରଶଂସା କରିଛନ୍ତି। ଧନ୍ୟ ମନେ କରୁଛି ଯେ ଏହି ବିଜୟ ମହାପ୍ରଭୁ ଜଗନ୍ନାଥଙ୍କ ପବିତ୍ର ରଥଯାତ୍ରା ସମୟରେ ଆସିଛି। ମୁଁ ଆଶା କରୁଛି ଯେ ଶୀଘ୍ର ପୁରୀ ଫେରିବି ଏବଂ ଜଗନ୍ନାଥ ମନ୍ଦିରରେ ମହାପ୍ରଭୁଙ୍କ ଦର୍ଶନ କରି ଆଶୀର୍ବାଦ ଲୋଡ଼ିବି। ପୁଣିଥରେ ଧନ୍ୟବାଦ, ମହାଶୟ। ଆପଣଙ୍କ ଶୁଭେଚ୍ଛା ମୋ ପାଇଁ ବହୁତ ଗୁରୁତ୍ୱପୂର୍ଣ୍ଣ।’’

ଭାରତୀୟ ବ୍ୟାଡମିଣ୍ଟନ ତାରକା ତଥା ଦୁଇ ଥରର ଅଲିମ୍ପିକ୍ ପଦକ ବିଜେତା ପିଭି ସିନ୍ଧୁ ଫର୍ମକୁ ଫେରିଛନ୍ତି। ସେ ଚୀନ୍‌ର ଅଲିମ୍ପିକ୍ ଚାମ୍ପିଅନ୍ ଚେନ୍ ୟୁଫେଇଙ୍କୁ ସେମିଫାଇନାଲରେ ପରାସ୍ତ କରି ଜାପାନ ଓପନ୍ ୨୦୨୬ର ଫାଇନାଲରେ ପ୍ରବେଶ କରିଛନ୍ତି।

ଦୁଇ ବର୍ଷ ପରେ ଫାଇନାଲ୍‌ରେ ଏଣ୍ଟ୍ରି

ଦୀର୍ଘ ଦୁଇ ବର୍ଷର ଲମ୍ବା ବ୍ୟବଧାନ ପରେ ପିଭି ସିନ୍ଧୁ କୌଣସି ବିଡବ୍ଲ୍ୟୁଏଫ୍ (BWF) ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛନ୍ତି। ଶେଷ ଥର ପାଇଁ ସେ ୨୦୨୪ ମସିହାରେ ସୟଦ ମୋଦି ଇଣ୍ଟରନ୍ୟାସନାଲ୍ ଟୁର୍ନାମେଣ୍ଟର ଫାଇନାଲ ଖେଳିଥିଲେ। ଜାପାନ ଓପନ୍‌ର ଏହି ସେମିଫାଇନାଲ୍ ମ୍ୟାଚ୍‌ରେ ସିନ୍ଧୁ ନିଜର ଶ୍ରେଷ୍ଠ ଖେଳ ପ୍ରଦର୍ଶନ କରିଛନ୍ତି।

ଆହତ କାରଣରୁ ଓହରିଲେ ଚେନ୍ ୟୁଫେଇ

ସେମିଫାଇନାଲ୍ ମ୍ୟାଚ୍‌ରେ ସିନ୍ଧୁ ଦମଦାର ଆରମ୍ଭ କରି ପ୍ରଥମ ଗେମ୍‌କୁ ୨୧-୧୯ରେ ଜିତି ନେଇଥିଲେ। ଦ୍ୱିତୀୟ ଗେମ୍‌ରେ ସିନ୍ଧୁ ୧୫-୧୦ରେ ଆଗୁଆ ଥିବା ବେଳେ ବିଶ୍ୱର ୪ ନମ୍ବର ଖେଳାଳି ଚେନ୍ ୟୁଫେଇ ହାମଷ୍ଟ୍ରିଙ୍ଗ୍ ଆହତ ସମସ୍ୟା କାରଣରୁ ମ୍ୟାଚ୍‌ରୁ ଓହରି ଯାଇଥିଲେ। ଫଳରେ ସିନ୍ଧୁଙ୍କୁ ବିଜୟୀ ଘୋଷଣା କରାଯିବା ସହ ସେ ଫାଇନାଲ୍ ଟିକେଟ୍ ହାତେଇଛନ୍ତି।

ଭାଙ୍ଗିଲା ୭ ବର୍ଷର ଅପେକ୍ଷା

ଏହି ବିଜୟ ସିନ୍ଧୁଙ୍କ ପାଇଁ ଅନେକ ମାଇନେ ରଖୁଛି। କାରଣ ଦୀର୍ଘ ୭ ବର୍ଷ ପରେ ସେ ଚେନ୍ ୟୁଫେଇଙ୍କୁ କୌଣସି ମ୍ୟାଚ୍‌ରେ ହରାଇବାରେ ସଫଳ ହୋଇଛନ୍ତି। ଶେଷ ଥର ପାଇଁ ସେ ତାଙ୍କୁ ୨୦୧୯ ମସିହାରେ ପରାସ୍ତ କରିଥିଲେ। ଏଥିସହିତ ଚୀନ୍ ଖେଳାଳିଙ୍କ ବିପକ୍ଷରେ ଥିବା ତାଙ୍କର କ୍ରମାଗତ ୫ଟି ମ୍ୟାଚ୍‌ର ପରାଜୟ ଧାରାରେ ବ୍ରେକ୍ ଲାଗିଛି।

ଟାଇଟଲ୍ ପାଇଁ ହେବ ଜୋରଦାର ଲଢ଼େଇ

ରବିବାର ଖେଳାଯିବାକୁ ଥିବା ଫାଇନାଲ୍ ମୁକାବିଲାରେ ଟାଇଟଲ୍ ହାତେଇବା ପାଇଁ ପିଭି ସିନ୍ଧୁ କୋର୍ଟକୁ ଓହ୍ଲାଇବେ। ଜାପାନର ଆକାନେ ୟାମାଗୁଚି ଏବଂ ଇଣ୍ଡୋନେସିଆର ପୁତ୍ରୀ କୁସୁମା ୱାର୍ଦାନୀଙ୍କ ମଧ୍ୟରୁ ଯିଏ ସେମିଫାଇନାଲ୍ ଜିତିବେ, ତାଙ୍କ ସହ ସିନ୍ଧୁଙ୍କର ଫାଇନାଲ୍ ଲଢ଼େଇ ହେବ। ଦୁଇ ବର୍ଷ ପରେ ଟାଇଟଲ୍ ଜିତିବା ଆଶାରେ ଭାରତୀୟ ପ୍ରଶଂସକମାନେ ଉତ୍ସାହର ସହ ଅପେକ୍ଷା କରି ରହିଛନ୍ତି।

ଭାରତର ତାରକା ବ୍ୟାଡମିଣ୍ଟନ ଖେଳାଳି ପିଭି ସିନ୍ଧୁ (PV Sindhu) ସୁରକ୍ଷିତ ଭାବେ ନିଜ ଘରକୁ ଫେରିଛନ୍ତି। ମଧ୍ୟପ୍ରାଚ୍ୟରେ ଆମେରିକା ଏବଂ ଇରାନ ମଧ୍ୟରେ ଲାଗିରହିଥିବା ଯୁଦ୍ଧ ପରିସ୍ଥିତି ଯୋଗୁଁ ସିନ୍ଧୁ ଦୁବାଇ ବିମାନବନ୍ଦରରେ ଫସି ରହିଥିଲେ। ସେ ସମ୍ମାନଜନକ ଅଲ ଇଂଲଣ୍ଡ ଓପନ (All England Open 2026) ଟୁର୍ଣ୍ଣାମେଣ୍ଟରେ ଅଂଶଗ୍ରହଣ କରିବା ପାଇଁ ବର୍ମିଂହାମ ଯାଉଥିବା ବେଳେ ଏହି ଅଘଟଣ ଘଟିଥିଲା। ଯୁଦ୍ଧ କାରଣରୁ ବିମାନ ଚଳାଚଳ ବାଧାପ୍ରାପ୍ତ ହେବାରୁ ତାଙ୍କୁ ଦୁବାଇରେ ଅଟକି ରହିବାକୁ ପଡ଼ିଥିଲା।

ଦୁବାଇରେ ଭୟଙ୍କର ଅନୁଭୂତି

ସୋସିଆଲ ମିଡିଆରେ ନିଜର ଅନୁଭୂତି ବର୍ଣ୍ଣନା କରି ସିନ୍ଧୁ କହିଛନ୍ତି ଯେ ସେଠାକାର ପରିସ୍ଥିତି ଅତ୍ୟନ୍ତ ଭୟଙ୍କର ଥିଲା। ସେ ଏବଂ ତାଙ୍କ କୋଚ୍ ଇରୱାନସ୍ୟା ଆଦି ପ୍ରତାମା (Irwansyah Adi Pratama) ଦୁବାଇ ବିମାନବନ୍ଦରରେ ଥିବା ସମୟରେ ନିକଟରେ ବିସ୍ଫୋରଣ ଶବ୍ଦ ଶୁଣିବାକୁ ପାଇଥିଲେ। ସିନ୍ଧୁ ଲେଖିଛନ୍ତି, "ଆମ ମୁଣ୍ଡ ଉପରେ ଯୁଦ୍ଧ ବିମାନର ଶବ୍ଦ ଏବଂ ବିସ୍ଫୋରଣ ଅତ୍ୟନ୍ତ ଡରାଇବା ଭଳି ଥିଲା।" ସୁରକ୍ଷା ଦୃଷ୍ଟିରୁ ସେମାନଙ୍କୁ ଏକ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା।

ଭାବବିହ୍ୱଳ ପୋଷ୍ଟ ଏବଂ କୃତଜ୍ଞତା

ବେଙ୍ଗାଲୁରୁରେ ପହଞ୍ଚିବା ପରେ ସିନ୍ଧୁ 'ଏକ୍ସ' (ପୂର୍ବରୁ ଟ୍ୱିଟର)ରେ ଏକ ଭାବବିହ୍ୱଳ ପୋଷ୍ଟ ସେୟାର କରିଛନ୍ତି। ସେ ଲେଖିଛନ୍ତି, "ଘରକୁ ଫେରି ମୁଁ ବହୁତ ଖୁସି ଏବଂ ସୁରକ୍ଷିତ ଅନୁଭବ କରୁଛି। ବିଗତ କିଛି ଦିନ ମୋ ପାଇଁ ଅତ୍ୟନ୍ତ କଷ୍ଟକର ଥିଲା।" ଏହି କଠିନ ସମୟରେ ସାହାଯ୍ୟ କରିଥିବାରୁ ସେ ଦୁବାଇ କର୍ତ୍ତୃପକ୍ଷ, ବିମାନବନ୍ଦର କର୍ମଚାରୀ ଏବଂ ଭାରତୀୟ ଦୂତାବାସକୁ ଧନ୍ୟବାଦ ଜଣାଇଛନ୍ତି। ଦୁର୍ଭାଗ୍ୟବଶତଃ, ଏହି ଘଟଣା ଯୋଗୁଁ ସିନ୍ଧୁ ଚଳିତ ବର୍ଷ ଅଲ ଇଂଲଣ୍ଡ ଓପନରୁ ବାଦ ପଡ଼ିଛନ୍ତି।

ସିଙ୍ଗାପୁର: ପୁଣି ଚମକିଲେ ଡବଲ ଅଲିମ୍ପିକ ପଦକ ବିଜେତା ପିଭି ସିନ୍ଧୁ। ଭାରତର ଏହି ଷ୍ଟାର ମହିଳା ବ୍ୟାଡମିଂଟନ ଖେଳାଳି ପ୍ରଥମ ଥର ପାଇଁ ସିଙ୍ଗାପୁର ଓପନ ସୁପର ସିରିଜ ୫୦୦ ଟାଇଟଲ ହାସଲ କରିଛନ୍ତି । ମହିଳା ସିଙ୍ଗଲ୍ସ ଫାଇନାଲରେ ସେ ଚୀନର ଜେଡୱାଇ ୱାଙ୍ଗଙ୍କୁ ଏକ ସଂଘର୍ଷପୂର୍ଣ୍ଣ ମୁକାବିଲାରେ ୨୧-୯, ୧୧-୨୧ ଓ ୨୧-୧୫ରେ ପରାସ୍ତ କରିଥିଲେ । ପ୍ରଥମ ସେଟରେ ସିନ୍ଧୁ ଜବରଦସ୍ତ ପ୍ରଦର୍ଶନ କରି ୱାଙ୍ଗଙ୍କୁ ହରାଇଥିଲେ । ମାତ୍ର ଦ୍ୱିତୀୟ ସେଟରେ ୱାଙ୍ଗ ବିଜୟୀ ହୋଇ ମ୍ୟାଚରେ ରୋମାଂଚ ଭରି ଦେଇଥିଲେ । ନିର୍ଣ୍ଣାୟକ ସେଟରେ ସିନ୍ଧୁ ୨୧-୧୫ରେ ବିଜୟୀ ହୋଇଥିଲେ । ଚଳିତ ବର୍ଷ ସିନ୍ଧୁଙ୍କ ଏହା ତୃତୀୟ ଟାଇଟଲ । ସେ ଏହା ପୂର୍ବରୁ କୋରିଆ ଓପନ ଓ ସୁଇସ ଓପନରେ ଚାମ୍ପିୟନ ହୋଇ ସାରିଛନ୍ତି । ରାଜ୍ୟଗୋଷ୍ଠୀ କ୍ରୀଡା ପୂର୍ବରୁ ସେ ଭଲ ଫର୍ମରେ ଥିବାରୁ ଭାରତ ପାଇଁ ଏକ ପଦକ ନିଶ୍ଚିତ ବୋଲି ବିବେଚନା କରାଯାଉଛି ।

ଟୋକିଓ : ରିଓ ଅଲମ୍ପିକ୍ସର ରୌପ୍ୟ ପଦକ ବିଜେତା ପି ଭି ସିନ୍ଧୁ ଶନିବାର ଦିନ ମହିଳା ବ୍ୟାଡମିଣ୍ଟନ ସିଙ୍ଗଲ୍ସର ସେମିଫାଇନାଲରେ ତାଇ ଜୁ ୟିଙ୍ଗଙ୍କଠାରୁ ପରାସ୍ତ ହୋଇଛନ୍ତି । ଏହା ସହିତ ଭାରତର ରୌପ୍ୟ କିମ୍ବା ସ୍ୱର୍ଣ୍ଣ ପଦକର ଆଶା ଶେଷ ହୋଇଛି । ସିନ୍ଧୁଙ୍କୁ ପରାଜୟ ସହିତ ୧୩୦ କୋଟି ଭାରତୀୟଙ୍କ ସ୍ୱର୍ଣ୍ଣ ଆଶାକୁ ଜୋରଦାର ଝଟକା ଲାଗିଛି । ତାଇ ଏହି ମୁକାବିଲାକୁ ୨୧-୧୮ ଓ ୨୧-୧୨ରେ ଜିତିଥିଲେ । ତେବେ ସିନ୍ଧୁଙ୍କ ପାଇଁ ଏବେବି ବ୍ରୋଞ୍ଚ ଜିତିବାର ଆଶା ରହିଛି । ବ୍ରୋଞ୍ଜ ପଦକ ପାଇଁ ସେ ଚୀନର ବିଙ୍ଗ୍ ଜିଆଓଙ୍କ ମୁକାବିଲା କରିବେ । ପ୍ରି କ୍ୱାର୍ଟରରେ ଡେନମାର୍କ ଓ କ୍ୱାର୍ଟରରେ ଜାପାନର ଅକାନେ ୟମାଗୁଚିଙ୍କୁ ପରାସ୍ତ କଲା ପରେ ସେମିରେ ତାଇ ଜୁ ୟିଙ୍ଗଙ୍କୁ ଭେଟିଥିଲେ ସିନ୍ଧୁ। ରବିବାର ସନ୍ଧ୍ୟାରେ ସିନ୍ଧୁ ବ୍ରୋଞ୍ଜ ପଦକ ପାଇଁ ଖେଳିବେ। ସେମିଫାଇନାଲର ପ୍ରଥମ ଗେମରେ ସିନ୍ଧୁ ଭଲ ଆରମ୍ଭ କରିଥିଲେ ।

କିନ୍ତୁ ଖେଳ ଆରମ୍ଭ ହେବାର କିଛି ସମୟ ପରେ ସେ ଲୟ ହରାଇ ବସିଥିଲେ । ଖେଳ ଆରମ୍ଭର କିଛି ସମୟ ମଧ୍ୟରେ ସେ ୭-୪ରେ ଆଗୁଆ ଥିଲେ । ନେଟ୍ ସଟ୍ ଓ ସ୍ମେଶର ସେ ଜବରଦସ୍ତ ବ୍ୟବହାର କରି ସେ ୧୧-୭ରେ ଆଗୁଆ ଥିଲେ । ତେବେ ତାଇ ଜୋରଦାର ପ୍ରତ୍ୟାବର୍ତ୍ତନ କରିଥିଲେ । ତାଇ ସ୍କୋରକୁ ୧୩-୧୩ରେ ଡ୍ର’ କରିଥିଲେ । କିନ୍ତୁ ପରେ ତାଇ ୨୧-୧୮ ଗେମକୁ ନିଜର କରିଥିଲେ । ଦ୍ୱିତୀୟ ଗେମରେ ସିନ୍ଧୁ ଚାପରେ ଖେଳୁଥିବା ଲକ୍ଷ୍ୟ କରାଯାଇଥିଲା । ସିନ୍ଧୁଙ୍କ ଦୀଗହୀନ ସଟର ଫାଇଦା ତାଇ ନେଇଥଇଲେ । ତାଇ ୪-୪ ସ୍କୋର ପରେ ଯେଉଁ ପଏଣ୍ଟ୍ ନେବା ଆରମ୍ଭ କରିଥିଲେ ତାହାର ଚାପ ସିନ୍ଧୁଙ୍କ ଉପରେ ପଡିଥିଲା । ତାଇ ଗେମକୁ ୨୧-୧୨ରେ ଯିତିଥିଲେ । ରବିବାର ମ୍ୟାଚରେ ଯଦି ସିନ୍ଧୁ ଜିତନ୍ତି ତେବେ ଭାରତ ଖାତାକୁ ଆଉ ଏକ ବ୍ରୋଞ୍ଚ୍ ପଦକ ଆସିବ ।

ଟୋକିଓ: ଟୋକିଓ ଅଲିମ୍ପିକ୍ସରେ ବିଜୟରୁ ନିଜର ଅଭିଯାନ ଆରମ୍ଭ କରିଛନ୍ତି ଭାରତୀୟ ବ୍ୟାଡ୍‌ମିଣ୍ଟନ ଷ୍ଟାର ପି.ଭି ସିନ୍ଧୁ । ଇସ୍ରାଏଲ ପ୍ରତିପକ୍ଷ କସେନିଆଙ୍କ ବିପକ୍ଷରେ ସେ ୨୧-୭, ୨୧-୧୦ ସେଟ୍‌ରେ ବିଜୟୀ ହୋଇଛନ୍ତି । ମାତ୍ର ୨୮ ମିନିଟରେ ପ୍ରଥମ ମୁକାବିଲାକୁ ନିଜ ନାଁରେ କରିଥିଲେ ପି. ଭି. ସିନ୍ଧୁ । ମ୍ୟାଚରେ ପ୍ରଥମରୁ ହିଁ ଆଗୁଆ ରହିଥିଲେ ପି.ଭି ସିନ୍ଧୁ ।

ଅପରପକ୍ଷରେ ମହିଳା ସୁଟର ମନୁ ଭାକେର ଏବଂ ୟଶସ୍ୱିନୀ ସିଂହ ୧୦ ମିଟର ଏୟାର ପିଷ୍ଟଲ ଫାଇନାଲ ପାଇଁ ଯୋଗତ୍ୟା ହାସଲରେ ବିଫଳ ହୋଇଛନ୍ତି । ପିସ୍ତଲ୍‌ରେ ତ୍ରୁଟି ଦେଖା ଦେବାରୁ ଭାକରଙ୍କୁ ୫ ମିନିଟ୍‌ରୁ ଅଧିକ ସମୟ ଅପେକ୍ଷା କରିବାକୁ ପଡ଼ିଥିଲା। ଅନ୍ତିମ ଦୁଇ ରାଉଣ୍ଡ୍‌ରେ ସେ ଭଲ ପ୍ରଦର୍ଶନ କରିଥିଲେ ବି ଶେଷ ସଟ୍‌ରେ ୮ରେ ଅଟକି ଯିବାରୁ ଫାଇନାଲ୍‌ରେ ପ୍ରବେଶ କରିବାରୁ ବଞ୍ଚିତା ହୋଇଥିଲେ। ଅପରପକ୍ଷରେ ରୋଇଂରେ ଅରବିନ୍ଦ ସିଂହ ଏବଂ ଅର୍ଜୁନ ଜଟ୍ ତୃତୀୟ ସ୍ଥାନ ହାସଲ କରିବା ସହ ସେମିଫାଇନାଲ ପାଇଁ କ୍ୱାଲିଫାଇ କରିଛନ୍ତି ।