ରାଜକୋଟ: ଆଜି ଭାରତ ଓ ଶ୍ରୀଲଙ୍କା ମଧ୍ୟରେ ଚାଲିଥିବା ଟି-୨୦ ସିରିଜ୍‌‌ର ତୃତୀୟ ତଥା ଶେଷ ମୁକାବିଲା । ଆଜିର ମ୍ୟାଚ ରାଜକୋଟର ସୌରାଷ୍ଟ୍ର କ୍ରିକେଟ ଆସୋସିଏସନ ଗ୍ରାଉଣ୍ଡରେ ଖେଳାଯିବ। ଏହି ସିରିଜ୍‌‌ର ପ୍ରଥମ ମ୍ୟାଚକୁ ଭାରତ ୨ ରନ୍‌‌ରେ ଓ ଦ୍ୱିତୀୟ ମ୍ୟାଚ୍‌‌କୁ ଶ୍ରୀଲଙ୍କା ୧୬ ରନ୍‌‌ରେ ଜିତିବା ପରେ ଏହି ସିରିଜ୍‌‌ ୧-୧ ବରାବର ସ୍ଥିତିରେ ରହିଛି। ଏଣୁ ରାଜକୋଟରେ ଯେଉଁ ଦଳ ବିଜୟୀ ହେବ ସେହି ଦଳ ଏହି ସିରିଜ୍‌‌ କବ୍‌‌ଜା କରିବ।

ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ୱରେ ଏହି ସିରିଜ୍‌‌ ଖେଳୁଥିବା ଭାରତୀୟ ଦଳରେ ଅନେକ ଯୁବ ଖେଳାଳି ସ୍ଥାନ ପାଇଛନ୍ତି। ଏମାନଙ୍କ ନିକଟରେ ଅଭିଜ୍ଞତା କମ୍‌‌ ରହିଛି। ତଥାପି ପ୍ରଥମ ଦୁଇଟି ମ୍ୟାଚ୍‌‌ରେ ଭଲ ପ୍ରତିଦ୍ୱନ୍ଦ୍ୱିତା ହୋଇଛି। ପ୍ରଥମ ମ୍ୟାଚ୍‌‌କୁ ଭାରତ ଶେଷ ବଲ୍‌‌ରେ ଜିତିବା ପରେ ଦ୍ୱିତୀୟ ମ୍ୟାଚ୍‌‌ରେ ଶ୍ରୀଲଙ୍କା ଖେଳାଳିଙ୍କ ଦବ୍‌‌ଦବା ରହିଥିଲା। ଏହି ମ୍ୟାଚ୍‌‌ରେ ଅକ୍ଷର ପଟେଲ ଓ ଶିବମ ମାଭିଙ୍କ ବ୍ୟାଟିଂ ଦକ୍ଷତା ଦେଖିବାକୁ ମିଳିଥିଲା। କିନ୍ତୁ ଭାରତୀୟ ଦଳର ଅନେକ ଅସୁବିଧା ରହିଛି। ପ୍ରଥମ ଦୁଇଟି ମ୍ୟାଚ୍‌‌ରେ ୬୦ ରନ୍‌‌ ମଧ୍ୟରେ ଦଳର ଅଧା ବ୍ୟାଟ୍ଟର ପାଭିଲିୟନ ଫେରିଯାଇଥିଲେ। ଏଭଳି ମ୍ୟାଚ୍‌‌ରେ ଟପ୍‌‌ ଅର୍ଡର ବିଫଳ ହେଲେ ଲଢ଼େଇ କରିବା କଷ୍ଟକର। ତଥାପି ପ୍ରଥମ ମ୍ୟାଚ୍‌‌ରେ ପାଣ୍ଡ୍ୟା, ଦୀପକ ହୁଦା ଓ ଅକ୍ଷର ପଟେଲ ସ୍ଥିତି ସମ୍ଭାଳିଥିଲେ ଓ ଦଳକୁ ମ୍ୟାଚ୍‌‌ ଜିତାଇବାରେ ସହାୟତା କରିଥିଲେ। ସେହିପରି ଦ୍ୱିତୀୟ ମ୍ୟାଚ୍‌‌ରେ ସୂର୍ଯ୍ୟକୁମାର ଯାଦବ, ଅକ୍ଷର ଓ ଶିବମ ଭାରତର ଦୟନୀତ ସ୍ଥିତିକୁ ଏଡ଼ାଇବାରେ ସମର୍ଥ ହୋଇଥିଲେ। ଏହା ଠିକ୍‌‌ କଥା ଯେ, ଭାରତର ବ୍ୟାଟିଂ ଲାଇନ୍‌‌ ଅପ୍‌‌ ଦୃଢ଼ ରହିଛି। କିନ୍ତୁ ଟପ୍‌‌ ଅର୍ଡର ଫ୍ଲପ୍‌‌ ହେଲେ ଶେଷଭାଗ ବ୍ୟାଟର ସର୍ବଦା ମ୍ୟାଚ୍‌‌ ଜିତାଇବା କଷ୍ଟକର।

ସେହିପରି ଦଳର ଦ୍ୱିତୀୟ ମୁଖ୍ୟ ଅସୁବିଧା ହେଉଛି ପେସ୍‌‌ ବୋଲିଂ। ଏଥିରେ ସମସ୍ତ ଯୁବ ଖେଳାଳି ରହିଛନ୍ତି। ଉମ୍ରାନ ମଲ୍ଲିକ ହୁଅନ୍ତୁ କିମ୍ବା ଅର୍ଶଦୀପ ସିଂ କିମ୍ବା ପ୍ରଥମ ମ୍ୟାଚ୍‌‌ରେ ଡେବ୍ୟୁ କରିଥିବା ଶିବମ ମାଭି, ସମସ୍ତଙ୍କ ନିକଟରେ ଅନ୍ତର୍ଜାତୀୟ ମ୍ୟାଚ୍‌‌ ଖେଳିବାର ଅଭିଜ୍ଞତା କମ୍‌‌ ରହିଛି। କିନ୍ତୁ ଦ୍ୱିତୀୟ ମ୍ୟାଚ୍‌‌ରେ ଅର୍ଶଦୀପ୍‌‌ ପ୍ରଥମ ୨ ଓଭରରେ ୫ଟି ନୋ ବଲ ପକାଇବା ପରେ ମ୍ୟାଚ୍‌‌ର ଗତିପଥ ବଦଳିଯାଇଥିଲା। ନୋ ବଲ ପକାଇବା ଅର୍ଥ ଅନ୍ତର୍ଜାତୀୟ ମ୍ୟାଚ୍‌‌ରେ ଅପରାଧ କରିବା ସହ ସମାନ ବୋଲି ଅଧିନାୟକ ପାଣ୍ଡ୍ୟା କହନ୍ତି। ଏକଥା ୨୩ ବର୍ଷୀୟ ଫାଷ୍ଟ ବୋଲର ଅର୍ଶଦୀପ ଠିକ୍‌‌ ଭାବେ ବୁଝିଥିବେ ଓ ତୃତୀୟ ମ୍ୟାଚ୍‌‌ରେ ଏହି ଭୂଲକୁ ନିଶ୍ଚିତ ସୁଧାରିନେବେ। ଡେବ୍ୟୁ ମ୍ୟାଚ୍‌‌ରେ ଚମତ୍କାର ପ୍ରଦର୍ଶନ କରିଥିବା ଶିବମ ଦ୍ୱିତୀୟ ମ୍ୟାଚ୍‌‌ରେ ବ୍ୟୟବହୁଳ ସାବ୍ୟସ୍ତ ହୋଇଥିଲେ। ଉମ୍ରାନ ମଲିକ ତାଙ୍କ ଲାଇନ୍‌‌ ଉପରେ ନିୟନ୍ତ୍ରଣ ରଖିବାରେ ସମର୍ଥ ହେଉନାହାନ୍ତି। ଏହି ୩ଜଣ ପେସ୍‌‌ ବୋଲର ଯଦି ତାଙ୍କ ତ୍ରୁଟି ନ ସୁଧାରନ୍ତି, ତେବେ ଭାରତ ମ୍ୟାଚ୍‌‌ ଜିତିବା କଷ୍ଟକର।

ହେଡ କୋଚ୍‌‌ ରାହୁଲ ଦ୍ରାବିଡ୍‌‌ କହନ୍ତି, ଆମେ ଭବିଷ୍ୟତ ଲାଗି ଟିମ୍‌‌ ଗଠନ ଉପରେ ଗୁରୁତ୍ୱ ଦେଉଛୁ। ଦଳରେ ଯୁବ ଖେଳାଳିମାନେ ସ୍ଥାନ ପାଇଛନ୍ତି ଓ ଅଭିଜ୍ଞତା ଅଭାବରୁ ଖରାପ ପ୍ରଦର୍ଶନ କରୁଛନ୍ତି। ଆମେ ବାରମ୍ବାର ଖେଳାଳି ବଦଳାଇବା ସପକ୍ଷରେ ନାହୁଁ। ଏହାର ଅର୍ଥ ତୃତୀୟ ମ୍ୟାଚ୍‌‌ ଲାଗି ଦଳରେ ବିଶେଷ ପରିବର୍ତ୍ତନ ହେବାର ସମ୍ଭାବନା କମ୍‌‌।

ଅନ୍ୟପକ୍ଷରେ ରାଜକୋଟ ପିଚ୍‌‌ ଏବେ କିଭଳି ବ୍ୟବହାର କରିବ ତାହାକୁ ନେଇ ସନ୍ଦେହ ରହିଛି। ଏଠାରେ ଦକ୍ଷିଣ ଆଫ୍ରିକା ସହ ଗତବର୍ଷ ଖେଳାଯାଇଥିବା ଶେଷ ମ୍ୟାଚ୍‌‌ରେ ସ୍ପିନରଙ୍କ କମାଲ ଦେଖିବାକୁ ମିଳିଥିଲା। ଭାରତ ଏହି ମ୍ୟାଚ୍‌‌ରେ ୧୬୯ ରନ୍‌‌ କରିବା ପରେ ଦକ୍ଷିଣ ଆଫ୍ରିକାକୁ ୮୭ ରନ୍‌‌ରେ ଆଉଟ କରିଦେଇଥିଲା। ଏଭଳି ପିଚ୍‌‌ରେ ଟସ୍‌‌ର ଭୂମିକା ଗୁରୁତ୍ୱ ହୋଇଥାଏ। ଉଭୟ ଦଳ ଟାର୍ଗେଟ ଚେଜ୍‌‌ ଉପରେ ଗୁରୁତ୍ୱ ଦେଇଥିବାରୁ ଟସ୍‌‌ ଜିତିଲେ ପ୍ରଥମେ ବୋଲିଂ କରିବା ନିଶ୍ଚିତ। ସେ ଯାହାହେଉ ଏହି ମ୍ୟାଚ୍‌‌ଟି ଏସିଆ ଚାମ୍ପିଅନ୍‌‌ ଶ୍ରୀଲଙ୍କା ଜିତି ଦିନିକିଆ ସିରିଜ୍‌‌ ପୂର୍ବରୁ ମନୋବଳ ଦୃଢ଼ କରିବ ବୋଲି ଆଶା ରଖିଛି। ବିଶେଷ କରି ଏହାର ଅଧିନାୟକ ଦୁଇଟି ଯାକ ମ୍ୟାଚ୍‌‌ରେ ନିର୍ଣ୍ଣାୟକ ଭୂମିକା ନେଇଥିବାରୁ ତାଙ୍କ ପ୍ରଦର୍ଶନ ଉପରେ ସିରିଜ୍‌‌ର ଭାଗ୍ୟ ନିର୍ଣ୍ଣୟ ହେବ।

ମୁମ୍ବଇ: ଏସିଆ କପ୍‌‌ ଚାମ୍ପିଅନ୍‌‌ ଶ୍ରୀଲଙ୍କା ସହ ଭାରତ ଏକ ୩ ମ୍ୟାଚ୍‌‌ ବିଶିଷ୍ଟ ଟି-୨୦ ସିରିଜ୍‌‌ ଆଜିଠାରୁ ଖେଳିବାକୁ ଯାଉଛି। ଏହି ସିରିଜ୍‌‌ରେ ଭାରତର ୩ ସୁପରଷ୍ଟାର ରୋହିତ ଶର୍ମା, ବିରାଟ କୋହଲି ଓ ଲୋକେଶ ରାହୁଲଙ୍କୁ ସାମିଲ କରାଯାଇ ନାହିଁ। ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏହି ନୂଆ ଭାରତୀୟ ଟି-୨୦ ଦଳର ନେତୃତ୍ୱ ନେବେ। ଅନ୍ୟ ପକ୍ଷରେ କହିବାକୁ ଗଲେ ଏବେ ଭାରତୀୟ ଟି-୨୦ ଦଳର ଭାଗ୍ୟ ବିଧାତା ହେବେ ହାର୍ଦ୍ଦିକ। ନୂଆ ଖେଳାଳି, ନୂଆ ଟିମ୍‌‌ ଓ ନୂଆ ମ୍ୟାନେଜମେଣ୍ଟ ସହ ଭାରତ ତାହାର ଟି-୨୦ ଅଭିଯାନ ଆରମ୍ଭ କରିବ। ଅଷ୍ଟ୍ରେଲିଆରେ ଖେଳାଯାଇଥିବା ଟି-୨୦ ବିଶ୍ୱକପ୍‌‌ରେ ଭାରତୀୟ ଦଳର ପ୍ରଦର୍ଶନ ଯାହା ହେଉନା କାହିଁକି, ଖେଳାଳିଙ୍କଠାରୁ ସାହସିକ ଖେଳ ଦେଖିବାକୁ ମିଳି ନଥିଲା। ଯାହାକି ସମାଲୋଚନାର ଖୋରାକ ଯୋଗାଇଥିଲା ସମସ୍ତଙ୍କୁ। ଟି-୨୦ ବା ଫଟା ଫଟ କ୍ରିକେଟରେ ଆରମ୍ଭରୁ ହେଉ ଅବା ଶେଷରେ ଯେପରି ଆକ୍ରମଣ କରାଯାଇଥାଏ, ତାହା ଭାରତୀୟ ଖେଳାଳିଙ୍କଠାରେ ଆଦୌ ଦେଖିବାକୁ ମିଳି ନଥିଲା। ଯାହା ଫଳରେ ଦଳ ଆତ୍ମବିଶ୍ୱାସଭରା କ୍ରିକେଟ ଖେଳିବାରେ ଅସମର୍ଥ ହୋଇଥିଲା। ଏଭଳି ସ୍ଥିତିରେ ନୂଆ ଖେଳାଳିଙ୍କୁ ସୁଯୋଗ ମିଳିବା ଅର୍ଥ ନୂଆ ଆରମ୍ଭ କରିବା।

ଏହି ସିରିଜ୍‌‌ରେ ଭାରତ ଓପନିଂରେ ନୂଆ ଯୋଡି ଇଶାନ କିସାନ ଓ ଋତୁରାଜ ଗାଏକ୍ୱାଡଙ୍କୁ ସୁଯୋଗ ଦେଇପାରେ। ଏହା ଯଦି ସମ୍ଭବ ହୁଏ, ତେବେ ଶୁବମାନ ଗିଲଙ୍କୁ ଡେବ୍ୟୁ କରିବାକୁ ଅପେକ୍ଷା କରିବାକୁ ହେବ। ନଂ-୩ରେ ନଂ-୧ ବ୍ୟାଟର ସୂର୍ଯ୍ୟକୁମାର ଯାଦବ ଖେଳିବେ। ଅଭିଜ୍ଞ ୱିକେଟକିପର ସଞ୍ଜୁ ସାମସନଙ୍କୁ ନଂ-୪ରେ ଖେଳିବାକୁ ନିଶ୍ଚୟ ସୁଯୋଗ ମିଳିବ। ଟି-୨୦ ଏକ ଅଲରାଉଣ୍ଡରଙ୍କ ଖେଳ। ଏଥିରେ ପାଣ୍ଡ୍ୟାଙ୍କ ସହ ଦୀପକ ହୁଦା, ୱାଶିଂଟନ ସୁନ୍ଦରଙ୍କୁ ଖେଳିବାର ସୁଯୋଗ ମିଳିଲେ ଆଶ୍ଚର୍ଯ୍ୟ ହେବାର କିଛି ନାହିଁ। ଯୁଜବେନ୍ଦ୍ର ଚହଲ ଓ ଅକ୍ଷର ପଟେଲଙ୍କ ମଧ୍ୟରେ ଅନ୍ୟ ସ୍ଥାନ ଲାଗି ପ୍ରତିଦ୍ୱନ୍ଦ୍ୱିତା ହୋଇପାରେ। ଅଭିଜ୍ଞ ହର୍ଷଲ ପଟେଲ, ଅର୍ଶଦୀପ ସିଂ ଓ ଉମ୍ରାନ ମଲ୍ଲିକଙ୍କ ଉପରେ ପେସ ବାହିନୀର ଦାୟିତ୍ୱ ରହିବ।

ଶ୍ରୀଲଙ୍କା ମଧ୍ୟ ବେଶିକିଛି ପରିବର୍ତ୍ତନ କରିବ ନାହିଁ ବୋଲି ଆଶା କରାଯାଉଛି। ଟି-୨୦ ବିଶ୍ୱକପ୍‌‌ ଖେଳିଥିବା ପ୍ରାୟ ସମସ୍ତ ଖେଳାଳି ପ୍ରଥମ ମ୍ୟାଚ୍‌‌ରେ ସୁଯୋଗ ପାଇବେ। କେବଳ କସୁନ ରଜିଥାଙ୍କ ସ୍ଥାନରେ ଦିଲସାନ ମଦୁଶଙ୍କାଙ୍କୁ ସାମିଲ କରିବାର ସମ୍ଭାବନାକୁ ଏଡାଇ ଦେଇ ହେବ ନାହିଁ।

ହାଇସ୍କୋରିଂ ମ୍ୟାଚ୍‌‌

ଏହି ମ୍ୟାଚ୍‌‌ ୱାଙ୍ଖେଡେ ଷ୍ଟାଡିୟମ୍‌‌ରେ ଖେଳାଯିବ। ଏଠିକାର ବାଉଣ୍ଡରୀ ଛୋଟ। ଏଣୁ ଟି-୨୦ରେ ଖୁବ୍‌‌ ବଡ଼ ବଡ଼ ସଟ୍‌‌ ଦେଖିବାକୁ ମିଳିବ। ଯାହା ଫଳରେ ମ୍ୟାଚ୍‌‌ ନିଶ୍ଚିତ ହାଇସ୍କୋରିଂ ହେବ ବୋଲି ଆଶା କରାଯାଇପାରେ। ଏହି ପିଚ୍‌‌ରେ ଦ୍ୱିତୀୟ ପାଳିରେ ବ୍ୟାଟିଂ କରିଥିବା ଦଳକୁ ଫାଇଦା ମିଳିପାରେ। ଟାର୍ଗେଟ ଦେବା ଅପେକ୍ଷା ଏଠାରେ ଟାର୍ଗେଟ ଚେଜ୍‌‌ କରିବା ସହଜ ହୋଇଥାଏ।

ଦୁବାଇ: ଚଳିତ ଏସିଆ କପ୍‍ ରେ ଭାରତ ଆଜି ସୁପର-୪ରେ ତା’ର ଦ୍ୱିତୀୟ ମ୍ୟାଚ୍‍ ରେ ଶ୍ରୀଲଙ୍କାକୁ ଭେଟିବ। ରବିବାର ଭାରତ ୫ ୱିକେଟରେ ପାକିସ୍ତାନଠାରୁ ପରାସ୍ତ ହୋଇଥିଲା। ଫଳରେ ଭାରତ ପାଇଁ ସ୍ଥାନୀୟ ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍‍ ରେ ‘କର ବା ମର’ ସ୍ଥିତି ସୃଷ୍ଟି ହୋଇଛି। ପାକିସ୍ତାନଠାରୁ ହାରିବା ପରେ ଭାରତର ବୋଲିଂ ଓ ଫିଲ୍ଡିଂ ଦୁର୍ବଳତା ଓ ଦଳ ଚୟନ ନେଇ ଦ୍ୱନ୍ଦ୍ୱ ପଦାରେ ପଡ଼ିଛି। ଏହି ମ୍ୟାଚ୍‍ ରେ ଭାରତ ଓ ଶ୍ରୀଲଙ୍କା ପରସ୍ପରକୁ ୨୬ଥର ପାଇଁ ଭେଟିବେ। ଟି-୨୦ରେ ଶ୍ରୀଲଙ୍କା ବିପକ୍ଷରେ ଭାରତର ଭଲ ରେକର୍ଡ ରହିଛି। ଗତ ୨୫ଟି ମୁକାବିଲାରେ ଭାରତ ୧୭ଟିରେ ବିଜୟୀ ହୋଇଥିବା ବେଳେ ୭ଟିରେ ପରାଜୟ ବରଣ କରିଛି। ଗୋଟିଏ ମ୍ୟାଚ୍‍ ବାତିଲ ହୋଇଥିଲା।

ଏହାପୂର୍ବରୁ ୨୦୧୬ ମାର୍ଚ୍ଚ ୧ରେ ଢାକାର ମୀରପୁରରେ ଦୁଇଦଳ ଟି-୨୦ ଏସିଆ କପ୍‍ରେ ପରସ୍ପରକୁ ଭେଟିଥିଲେ ଓ ଏଥିରେ ଭାରତ ୫ ୱିକେଟରେ ବିଜୟ ହାସଲ କରିଥିଲା। ଟି-୨୦ ଦୃଷ୍ଟିକୋଣରୁ ଦେଖିବାକୁ ଗଲେ ଶ୍ରୀଲଙ୍କା ଦଳରେ ଏକାଧିକ ମ୍ୟାଚ୍‍ ୱିନର ରହିଛନ୍ତି। ଦଳରେ ପଥୁମ ନିଶାଙ୍କା, କୁସଲ ମେଣ୍ଡିସ୍‍, ଦନୁଷ୍କା ଗୁଣତିଲକା ଓ ଭାନୁକା ରାଜପକ୍ଷେଙ୍କ ଭଳି ବ୍ୟାଟର ରହିଛନ୍ତି। ଗତ ଆଫଗାନିସ୍ତାନ ବିପକ୍ଷରେ ଏମାନେ ଦମ୍‍ଦାର ପ୍ରଦର୍ଶନ କରିଛନ୍ତି। ସୁପରଷ୍ଟାର ବିରାଟ କୋହଲି ଓ ଲୋକେଶ ରାହୁଲ ଫର୍ମକୁ ଫେରିବ ଭାରତୀୟ ପ୍ରଶଂସକଙ୍କ ପାଇଁ ଖୁସି ଖବର ସାବ୍ୟସ୍ତ ହୋଇଛି। ଦୁବାଇର ଏହି ଷ୍ଟାଡିୟମରେ ଗତ ୫ଟି ଇନିଂସରେ ୧୮୦ରୁ ଊର୍ଦ୍ଧ୍ବ ସ୍କୋର ହୋଇଛି। ତେବେ ପିଚ୍‍ ଉପରେ ସବୁକିଛି ନିର୍ଭର କରେ। ଅପରପକ୍ଷରେ ଶ୍ରୀଲଙ୍କା ଏହି ମ୍ୟାଚ ଜିତି ହ୍ୟାଟ୍ରିକ ବିଜୟ ଲକ୍ଷ୍ୟରେ ରହିଛି। ପ୍ରଥମ ମ୍ୟାଚ୍‍ ରେ ଆଫଗାନିସ୍ତାକୁ ହରାଇଥିବାରୁ ଶ୍ରୀଲଙ୍କ ବିଜୟୀ ହେଲେ ଫାଇନାଲରେ ସ୍ଥାନ ପକ୍କା କରିବାର ନିକଟତର ହେବ। ଶ୍ରୀଲଙ୍କା ଦଳ ଅପରିବର୍ତ୍ତିତ ରହିବ ବୋଲି ଆଶା କରାଯାଉଛି। ଦ୍ରୁତ ବୋଲର ଆଭେସ ଖାନ୍‍ ଉପଲବ୍ଧ ହେଲେ ଭାରତ ୩ ଦ୍ରୁତ ବୋଲର, ଜଣେ ସ୍ପିନର ଓ ଦୁଇଜଣ ଅଲରାଉଣ୍ଡରଙ୍କୁ ନେଇ ପଡ଼ିଆକୁ ଓହ୍ଲାଇବ। ଫଳରେ ରବି ବିଷ୍ଣୋଇଙ୍କ ବଦଳରେ ଅକ୍ଷର ପଟେଲ ଦଳରେ ସ୍ଥାନ ପାଇବେ।

କଲମ୍ବୋ: ଭାରତ ଓ ଶ୍ରୀଲଙ୍କା ମଧ୍ୟରେ ରବିବାରଠାରୁ ୩ ମ୍ୟାଚ୍‍ ବିଶିଷ୍ଟ ଟି-୨୦ ସିରିଜ୍‍ ଆରମ୍ଭ ହେବ। ଦିନିକିଆ ସିରିଜ୍‍ ରେ ଭାରତ ୨-୧ରେ ବିଜୟୀ ହୋଇଥିଲେ ମଧ୍ୟ ଦକ୍ଷତା ଅନୁଯାୟୀ ଖେଳ ପ୍ରଦର୍ଶନ କରିପାରି ନାହିଁ। ଦ୍ୱିତୀୟ ଦିନିକିଆରେ ଦୀପକ ଚହର ଭାରତକୁ ବିପର୍ଯ୍ୟୟରୁ ଉଦ୍ଧାର କରିଥିଲାବେଳେ ତୃତୀୟ ଦିନିକିଆରେ କେହି ଉଦ୍ଧାରକାରୀ ନଥିଲେ। ଦଳର ବୋଲିଂ ମଧ୍ୟ ଦୁର୍ବଳ ରହିଥିଲା। ଏହାରି ଭିତରେ ଭାରତ ଆତ୍ମବିଶ୍ୱାସ ଫେରିପାଇବା ଲାଗି ଟି-୨୦ ସିରିଜ୍‍କୁ ଟାର୍ଗେଟ କରିବ। ଦଳ ଏଥିରେ ନବାଗତ ଖେଳାଳିଙ୍କୁ ସୁଯୋଗ ଦେବାର ସମ୍ଭାବନା କମ୍‍ ଥିଲେ ମଧ୍ୟ ସ୍ପିନର ବରୁଣ ଚକ୍ରବର୍ତ୍ତୀ ଡେବ୍ୟୁ କରିପାରନ୍ତି। କିନ୍ତୁ ଏହି ମ୍ୟାଚ୍‍ କିମ୍ବା ସିରିଜ୍‍ ରେ ଭାରତୀୟ ଦଳ କୌଣସି ତ୍ରୁଟି କରିବାକୁ ପସନ୍ଦ କରିବେ ନାହିଁ। ଚଳିତବର୍ଷ ହେବାକୁ ଥିବା ଟି-୨୦ ବିଶ୍ୱକପ୍‍ ଲାଗି ସବୁ ଖେଳାଳିଙ୍କ ପ୍ରଦର୍ଶନ ଉପରେ ନଜର ରହିବ।

ପ୍ରଥମ ଟି-୨୦
ଭେନ୍ୟୁ- ଆର୍‍ପି ଷ୍ଟାଡିୟମ୍‍, କଲମ୍ବୋ
ଖେଳ ଆରମ୍ଭ- ରାତି ୮ଟା
ପ୍ରସାରଣ- ସୋନି ସ୍ପୋର୍ଟ୍ସ ନେଟ୍‍ୱର୍କ

ଅନ୍ୟପକ୍ଷରେ କ୍ରମାଗତ ୩ଟି ସିରିଜ୍‍ ରେ ଗୋଟିଏ ହେଲେ ମ୍ୟାଚ୍‍ ଜିତି ପାରି ନଥିବା ଶ୍ର୍ରୀଲଙ୍କା ତୃତୀୟ ଦିନିକିଆକୁ ଜିତିବା ପରେ ନୂଆ ଆଶା ନେଇ ଖେଳିବ।