ଜାପାନର ଆଇଚି-ନାଗୋୟାରେ ଚାଲିଥିବା ଏସୀୟ କ୍ରୀଡ଼ା ୨୦୨୬ରେ ଭାରତୀୟ ସୁଟରମାନେ ନିଜର ଦମଦାର ପ୍ରଦର୍ଶନ ଜାରି ରଖିଛନ୍ତି। ପୁରୁଷ ୫୦ ମିଟର ରାଇଫଲ ଥ୍ରି-ପୋଜିସନ୍ସ (3P) ଟିମ୍ ଇଭେଣ୍ଟରେ ଭାରତୀୟ ତ୍ରିମୂର୍ତ୍ତୀ ଐଶ୍ୱରୀ ପ୍ରତାପ ସିଂହ ତୋମାର, ରୁଦ୍ରାକ୍ଷ ପାଟିଲ ଏବଂ ନୀରଜ କୁମାର ଦେଶ ପାଇଁ ରୌପ୍ୟ ପଦକ ଜିତିଛନ୍ତି। ଏହି ବିଜୟ ସହ ଭାରତର ପଦକ ସଂଖ୍ୟାରେ ଆଉ ଏକ ସଫଳତା ଯୋଡ଼ି ହୋଇଛି।

ଚୀନକୁ ସ୍ୱର୍ଣ୍ଣ, ଦକ୍ଷିଣ କୋରିଆକୁ ବ୍ରୋଞ୍ଜ

ଶୁକ୍ରବାର ଦିନ ଅନୁଷ୍ଠିତ ହୋଇଥିବା ଫାଇନାଲ ମ୍ୟାଚରେ ଭାରତୀୟ ସୁଟରମାନେ ମିଳିତ ଭାବେ ଉତ୍କୃଷ୍ଟ ଖେଳ ପ୍ରଦର୍ଶନ କରିଥିଲେ। ତିନି ଖେଳାଳି ମୋଟ ୧୭୬୨-୯୪x ପଏଣ୍ଟ ସ୍କୋର କରି ଦ୍ୱିତୀୟ ସ୍ଥାନରେ ରହି ରୌପ୍ୟ ପଦକ କବଜା କରିଛନ୍ତି। ଅନ୍ୟପକ୍ଷରେ, ଚୀନ ଦଳ ଉନ୍ନତ ପ୍ରଦର୍ଶନ ସହ ମୋଟ ୧୭୬୬-୯୫x ସ୍କୋର କରି ପ୍ରଥମ ସ୍ଥାନରେ ରହିବା ସହ ସ୍ୱର୍ଣ୍ଣ ପଦକ ହାସଲ କରିଛି। ସେହିପରି ଦକ୍ଷିଣ କୋରିଆ ମୋଟ ୧୭୫୧-୮୭x ସ୍କୋର ସହ ତୃତୀୟ ସ୍ଥାନରେ ରହି ବ୍ରୋଞ୍ଜ ପଦକରେ ସନ୍ତୁଷ୍ଟ ହୋଇଛି।

ବ୍ୟକ୍ତିଗତ ଫାଇନାଲକୁ ଉନ୍ନୀତ ହେଲେ ଐଶ୍ୱରୀ ଓ ନୀରଜ

ଦଳଗତ ଇଭେଣ୍ଟରେ ପଦକ ଜିତିବା ବ୍ୟତୀତ ବ୍ୟକ୍ତିଗତ ବର୍ଗରେ ମଧ୍ୟ ଭାରତୀୟ ଖେଳାଳିମାନେ ଉତ୍ତମ ପ୍ରଦର୍ଶନ କରିଛନ୍ତି। ଟିମ୍ ଇଭେଣ୍ଟରେ ଭଲ ସ୍କୋର କରିବା ଆଧାରରେ ଐଶ୍ୱରୀ ପ୍ରତାପ ସିଂହ ତୋମାର ଏବଂ ନୀରଜ କୁମାର ବ୍ୟକ୍ତିଗତ ଇଭେଣ୍ଟ ଫାଇନାଲ ପାଇଁ ଯୋଗ୍ୟତା ଅର୍ଜନ କରିଛନ୍ତି। ଯୋଗ୍ୟତା ପର୍ଯ୍ୟାୟ ତାଲିକାରେ ଐଶ୍ୱରୀ ମୋଟ ୫୮୯-୩୪x ସ୍କୋର ସହିତ ତୃତୀୟ ସ୍ଥାନରେ ଥିବା ବେଳେ ନୀରଜ ୫୮୮-୩୪x ସ୍କୋର କରି ଚତୁର୍ଥ ସ୍ଥାନରେ ରହିଛନ୍ତି। ସେହିପରି ରୁଦ୍ରାକ୍ଷ ୫୮୫-୨୬x ସ୍କୋର ସହ ନବମ ସ୍ଥାନରେ ରହିଥିଲେ। ଏହି ଇଭେଣ୍ଟରେ ଉଭୟ ଐଶ୍ୱରୀ ଏବଂ ନୀରଜ ଆଗକୁ ପଦକ ଜିତିବେ ବୋଲି ଭାରତୀୟ କ୍ରୀଡ଼ାପ୍ରେମୀମାନେ ଆଶା ରଖିଛନ୍ତି।