ଆଠଗଡ଼: ଲଗାଣ ବର୍ଷା ଯୋଗୁଁ କଟକ ଜିଲ୍ଲା ଆଠଗଡ଼ ସ୍ଥିତ ସାପୁଆ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ନଦୀରେ ବନ୍ୟା ଆସିବା ଫଳରେ ଆଠଗଡ଼ର କନ୍ତୋଲ ଠାରେ ଥିବା ଏକ ପୁରୁଣା ଘାଇ ଦେଇ ବନ୍ୟା ଜଳ ଗାଁ ଭିତରେ ପ୍ରବେଶ କରିଛି। ଏହା ଫଳରେ ସ୍ଥାନୀୟ ଅଞ୍ଚଳରେ ଘୋର ଅସୁବିଧା ସୃଷ୍ଟି ହେବା ସହ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।

ପ୍ରାପ୍ତ ସୂଚନା ଅନୁଯାୟୀ, ବନ୍ୟା ଜଳ ମାଡ଼ି ଆସିବା ଫଳରେ କନ୍ତୋଲର ୧୨ ଓ ୧୩ ନମ୍ବର ୱାର୍ଡ ସବୁଠାରୁ ଅଧିକ ପ୍ରଭାବିତ ହୋଇଛି। ଲୋକଙ୍କ ଘର, ବାଡ଼ି ଏବଂ ସ୍ଥାନୀୟ ମନ୍ଦିର ଭିତରେ ବନ୍ୟା ଜଳ ପଶିଯାଇଛି। ଘର ଭିତରେ ପାଣି ଲହଡ଼ି ମାରୁଥିବାରୁ ସାଧାରଣ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଏହି ଅଞ୍ଚଳରେ ଲୋକଙ୍କ ଦୈନନ୍ଦିନ ଜୀବନ ସମ୍ପୂର୍ଣ୍ଣ ରୂପେ ବାଧାପ୍ରାପ୍ତ ହୋଇଛି।

କେବଳ ଗାଁ ଭିତରେ ନୁହେଁ, ବରଂ ବନ୍ୟା ଜଳ ରାସ୍ତା ଉପରକୁ ମଧ୍ୟ ମାଡ଼ି ଆସିଛି। ପୁରୁଣା କଟକ-ସମ୍ବଲପୁର ରାସ୍ତା ଉପରେ ଏବେ ବନ୍ୟା ପାଣି ଚାଲୁଥିବାରୁ ଯାତାୟାତ ସମ୍ପୂର୍ଣ୍ଣ ରୂପେ ଠପ୍ ହୋଇଯାଇଛି। ରାସ୍ତା ଉପରେ ପାଣି ପ୍ରବାହିତ ହେଉଥିବାରୁ ଯାନବାହନ ଚଳାଚଳ ବନ୍ଦ ହୋଇଯାଇଛି ଏବଂ ସାଧାରଣ ଲୋକଙ୍କ ଯାତାୟାତ ନେଇ ଘୋର ସମସ୍ୟା ଦେଖାଦେଇଛି। ସ୍ଥାନୀୟ ପ୍ରଶାସନ ସ୍ଥିତି ଉପରେ ନଜର ରଖିଥିବା ବେଳେ ବନ୍ୟା ପ୍ରଭାବିତ ଲୋକମାନେ ତୁରନ୍ତ ସହାୟତା ଅପେକ୍ଷାରେ ଅଛନ୍ତି।