ବାରିପଦା: ଘରେ ପଶିଗଲା ମହାବଳ ବାଘ, ବାହାରୁ ତାଲା ପକାଇ ଦେଲେ ଗାଁ ଲୋକେ । ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ରେଞ୍ଜ ଅନ୍ତର୍ଗତ ଖପରାଖାଇ ଗାଁରେ ଏକ ଆଶ୍ଚର୍ଯ୍ୟଜନକ ତଥା ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଗାଁ ଭିତରକୁ ଏକ ମହାବଳ ବାଘ ପଶି ଆସିଥିବା ବେଳେ ଗ୍ରାମବାସୀ ସାହସିକତା ପ୍ରଦର୍ଶନ କରି ତାକୁ ଏକ ଘର ଭିତରେ ବନ୍ଦ କରିଦେଇଛନ୍ତି।

ସୂଚନା ଅନୁଯାୟୀ, ବାଘଟି ଜଙ୍ଗଲରୁ ପଳାଇ ଆସି ଗାଁର ଏକ ଘର ଭିତରେ ପଶିଯାଇଥିଲା। ଏହା ଦେଖି ସ୍ଥାନୀୟ ଲୋକେ ଭୟଭୀତ ନହୋଇ ବୁଦ୍ଧିମତା ଦେଖାଇଥିଲେ ଏବଂ ବାଘଟି ଘର ଭିତରେ ଥିବା ସମୟରେ ତୁରନ୍ତ ବାହାରୁ କବାଟ ବନ୍ଦ କରି ତାଲା ପକାଇ ଦେଇଥିଲେ। ଏହା ଫଳରେ ଏକ ବଡ଼ ଧରଣର ବିପଦ ଟଳିଯାଇଛି।
ଘଟଣା ସମ୍ପର୍କରେ ଖବର ପାଇ ବନ ବିଭାଗ ଟିମ୍ ତୁରନ୍ତ ଖପରାଖାଇ ଗାଁରେ ପହଞ୍ଚିଛି। ବାଘଟିକୁ କିଭଳି କୌଣସି କ୍ଷତି ନପହଞ୍ଚାଇ ସୁରକ୍ଷିତ ଭାବେ ଉଦ୍ଧାର କରାଯିବ, ସେନେଇ ବନ କର୍ମଚାରୀମାନେ ପ୍ରସ୍ତୁତି ଆରମ୍ଭ କରିଛନ୍ତି। ଅନ୍ୟପଟେ ବାଘ ଆସିବା ଖବର ପ୍ରଚାରିତ ହେବା ପରେ ସମଗ୍ର ଅଞ୍ଚଳରେ ଉତ୍ସୁକତା ସହ ଚାପା ଉତ୍ତେଜନା ଦେଖାଦେଇଛି।