ଆନ୍ଧ୍ରପ୍ରଦେଶ: ଆନ୍ଧ୍ରପ୍ରଦେଶର ଶ୍ରୀକାକୁଲମ୍ ଜିଲ୍ଲା ନିକଟରେ ଏକ ମର୍ମନ୍ତୁଦ ଟ୍ରେନ୍ ଦୁର୍ଘଟଣା ଘଟିଛି। ବ୍ରହ୍ମପୁରରୁ ଗୁଣୁପୁର ଯାଉଥିବା ରାଜ୍ୟରାଣୀ ଏକ୍ସପ୍ରେସ୍ ଧକ୍କାରେ ୪ ଜଣ ଯୁବକଙ୍କର ପ୍ରାଣହାନି ଘଟିଥିବା ବେଳେ ଅନ୍ୟ ଜଣେ ଯୁବକ ଗୁରୁତର ଆହତ ହୋଇଛନ୍ତି।

ସରକାରୀ ଅଧିକାରୀଙ୍କ ସୂଚନା ଅନୁଯାୟୀ, ଟ୍ରାକ୍ ନିକଟରେ ଥିବା ବେଳେ ଏହି ଯୁବକମାନଙ୍କ ଉପରେ ରାଜ୍ୟରାଣୀ ଏକ୍ସପ୍ରେସ୍ ମାଡ଼ି ଯାଇଥିଲା। ମୃତକମାନଙ୍କୁ ବିସରାଧାରାଓ, ଦିଲୀପ, ଶରତ ଏବଂ ଶିବା ଭାବରେ ଚିହ୍ନଟ କରାଯାଇଛି। ସେମାନେ ସମସ୍ତେ ଟେକ୍କାଲି ମଣ୍ଡଳ ଅନ୍ତର୍ଗତ ଡାମରା ଗ୍ରାମର ବାସିନ୍ଦା ଅଟନ୍ତି। ଏହି ଘଟଣାରେ ଗୁରୁତର ଆହତ ହୋଇଥିବା ଅନ୍ୟ ଜଣେ ଯୁବକ ସୋଲୋମନ ରାଜୁଙ୍କୁ ଉଦ୍ଧାର କରାଯାଇ ତୁରନ୍ତ ଚିକିତ୍ସା ପାଇଁ ଟେକ୍କାଲି ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଛି।

ଦୁର୍ଘଟଣା ପରେ ପ୍ରଶାସନ ପକ୍ଷରୁ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି। ଏହି ଛାତିଥରା ଦୁର୍ଘଟଣା କେଉଁ ପରିସ୍ଥିତିରେ ଘଟିଲା, ସେ ନେଇ ବିଭାଗୀୟ ଅଧିକାରୀମାନେ ଏକ ତଦନ୍ତ ଆରମ୍ଭ କରିଛନ୍ତି।