କୋଲକାତା: ପ୍ରଥମେ କହିଲେ ଲଢ଼ିବେନି, ପୁଣି କହିଲେ ଲଢ଼ିବେ । ପଶ୍ଚିମବଙ୍ଗର ମୁର୍ସିଦାବାଦ ଜିଲ୍ଲା ଅନ୍ତର୍ଗତ ରେଜିନଗର ବିଧାନସଭା କ୍ଷେତ୍ରର ଉପନିର୍ବାଚନକୁ ନେଇ ନାଟକୀୟ ସ୍ଥିତି ଜାରି ରହିଛି। ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ (ଟିଏମସି) ଗୋଷ୍ଠୀର ପ୍ରାର୍ଥୀ ରବିଉଲ୍ ଆଲାମ୍ ଚୌଧୁରୀ ପ୍ରଥମେ ନିଜର ନାମାଙ୍କନ ପ୍ରତ୍ୟାହାର କରିବେ ବୋଲି ଘୋଷଣା କରିଥିଲେ ମଧ୍ୟ ପରେ ଏହି ନିଷ୍ପତ୍ତିରୁ ଓହରି ଯାଇଛନ୍ତି। ସେ ପୁଣି ରେଜିନଗରରେ ନିର୍ବାଚନ ଲଢ଼ିବେ ବୋଲି ଜଣାଇଛନ୍ତି । ମମତା ବନାର୍ଜୀଙ୍କ ସହ ଆଲୋଚନା ପରେ ସେ ନିଷ୍ପତ୍ତି ବଦଳାଇଥିବା କୁହାଯାଉଛି ।

ଦିନର ପ୍ରଥମ ଭାଗରେ ରବିଉଲ୍ ଆଲାମ୍ ଚୌଧୁରୀ ସାମ୍ବାଦିକମାନଙ୍କୁ ସୂଚନା ଦେଇଥିଲେ ଯେ, ନିର୍ବାଚନ କମିଶନଙ୍କ ଦ୍ୱାରା ଦଳକୁ ଆବଣ୍ଟିତ ନୂଆ ଚିହ୍ନକୁ ନେଇ କର୍ମୀମାନେ ପ୍ରଚାର କରିବାକୁ ଅନିଚ୍ଛା ପ୍ରକାଶ କରୁଛନ୍ତି। ଏହାସହ ପ୍ରଶାସନିକ ଚାପର କାରଣ ଦର୍ଶାଇ ସେ ପ୍ରାର୍ଥୀପତ୍ର ପ୍ରତ୍ୟାହାର କରିବେ ବୋଲି କହିଥିଲେ। ଏହି ନିଷ୍ପତ୍ତି ଦଳର ନେତ୍ରୀ ମମତା ବାନାର୍ଜୀଙ୍କ ସହ ଆଲୋଚନା ପରେ ନିଆଯାଇଥିଲା ବୋଲି ସେ ଦାବି କରିଥିଲେ। ତେବେ କିଛି ଘଣ୍ଟା ମଧ୍ୟରେ ରାଜନୈତିକ ଦୃଶ୍ୟପଟ୍ଟ ବଦଳି ଯାଇଥିଲା। ଦଳୀୟ ନେତୃତ୍ୱ ଏବଂ ମମତା ବାନାର୍ଜୀଙ୍କ ଅନୁରୋଧ କ୍ରମେ ସେ ପୁଣି ନିର୍ବାଚନ ମଇଦାନରେ ରହିବେ ବୋଲି ଘୋଷଣା କରିଥିଲେ।

ଏହି ଘଟଣାକ୍ରମକୁ ନେଇ ମୁର୍ସିଦାବାଦର ଟିଏମସି ଲୋକସଭା ସାଂସଦ ଆବୁ ତାହେର ଖାନ୍ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ରେଜିନଗରରେ ପ୍ରାର୍ଥୀ ଦେବା ନିଷ୍ପତ୍ତିକୁ ସେ ସମାଲୋଚନା କରି କହିଛନ୍ତି ଯେ, କିଛି ଲୋକ ସବୁବେଳେ ମମତାଙ୍କୁ ବିଭ୍ରାନ୍ତ କରିଆସିଛନ୍ତି ଏବଂ ଏଥର ମଧ୍ୟ ତାଙ୍କୁ ବିଭ୍ରାନ୍ତ କରାଯାଇଛି।

ରେଜିନଗର ସହିତ ପୂର୍ବ ମେଦିନୀପୁର ଜିଲ୍ଲାର ନନ୍ଦିଗ୍ରାମ ବିଧାନସଭା ଆସନ ପାଇଁ ଆସନ୍ତା ଅକ୍ଟୋବର ୬ ତାରିଖରେ ମତଦାନ ହେବ ଏବଂ ଅକ୍ଟୋବର ୯ରେ ଭୋଟ୍ ଗଣତି କରାଯିବ। ସୂଚନାଯୋଗ୍ୟ ଯେ, ଗୋଟିଏ ଦିନ ପୂର୍ବରୁ ନନ୍ଦିଗ୍ରାମ ଉପନିର୍ବାଚନ ପାଇଁ ମମତାଙ୍କ ଗୋଷ୍ଠୀର ପ୍ରାର୍ଥୀ ହୋଇଥିବା ସଞ୍ଚିତା ଦେ ପ୍ରଧାନ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସହ ଏକ ବୈଠକ ପରେ ନିଜ ନାମାଙ୍କନ ପ୍ରତ୍ୟାହାର କରିନେଇଥିଲେ। ଏହାପରେ ମମତା ବାନାର୍ଜୀ ନନ୍ଦିଗ୍ରାମରେ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ ଘୋଷଣା କରିଥିଲେ। 

ଅନ୍ୟପଟେ ୨୦୨୬ ବିଧାନସଭା ନିର୍ବାଚନରେ ଆଜେୟୁପି (AJUP) ନେତା ହୁମାୟୁନ୍ କବୀର ରେଜିନଗର ଓ ନାଓଦା ଆସନରୁ ବିଜୟୀ ହୋଇଥିଲେ। ସେ ନାଓଦା ଆସନ ନିଜ ପାଖରେ ରଖିବାକୁ ନିଷ୍ପତ୍ତି ନେବାରୁ ରେଜିନଗରରେ ଉପନିର୍ବାଚନ ଆବଶ୍ୟକ ହୋଇଛି। ଏଠାରେ ତାଙ୍କ ପୁଅ ଗୋଲାମ ନବୀ ଆଜାଦ ଏବେ ଆଜେୟୁପି ପ୍ରାର୍ଥୀ ଭାବେ ନିର୍ବାଚନ ଲଢୁଛନ୍ତି।

ନିକଟରେ ଭାରତୀୟ ନିର୍ବାଚନ କମିଶନ (ECI) ମମତା ବାନାର୍ଜୀଙ୍କ ନେତୃତ୍ୱାଧୀନ ଗୋଷ୍ଠୀକୁ “ମମତା ଅଲ୍ ଇଣ୍ଡିଆ ତୃଣମୂଳ କଂଗ୍ରେସ” ନାମ ଏବଂ “ଫୁଟବଲ୍ ଖେଳାଳି” ଚିହ୍ନ ପ୍ରଦାନ କରିଛନ୍ତି। ସେହିପରି ରିତବ୍ରତ ବାନାର୍ଜୀଙ୍କ ନେତୃତ୍ୱାଧୀନ ପ୍ରତିଦ୍ୱନ୍ଦ୍ୱୀ ଗୋଷ୍ଠୀକୁ “ଡେମୋକ୍ରାଟିକ୍ ତୃଣମୂଳ କଂଗ୍ରେସ” ନାମ ଏବଂ “ଲଫାପା” (Envelope) ଚିହ୍ନ ପ୍ରଦାନ କରାଯାଇଛି। ପୂର୍ବରୁ କମିଶନ ମୂଳ ଦଳର ନାମ “ଅଲ୍ ଇଣ୍ଡିଆ ତୃଣମୂଳ କଂଗ୍ରେସ” ଏବଂ ଏହାର ପାରମ୍ପରିକ “ଫୁଲ ଓ ଘାସ” ଚିହ୍ନକୁ ଫ୍ରିଜ୍ କରିଥିଲେ।

କୋଲକାତା: ପଶ୍ଚିମବଙ୍ଗ ରାଜନୀତିରେ ହଟଚମଟ । ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ ଗୋଷ୍ଠୀକୁ ଆଉ ଏକ ବଡ଼ ଝଟକା । ନନ୍ଦିଗ୍ରାମ ପରେ ଏବେ ମୁର୍ସିଦାବାଦ ଜିଲ୍ଲାର ରେଜିନଗର ବିଧାନସଭା ଉପନିର୍ବାଚନରୁ ମମତା ଗୋଷ୍ଠୀର ପ୍ରାର୍ଥୀ ରବିଉଲ ଆଲମ ଚୌଧୁରୀ ଶନିବାର ନିଜର ପ୍ରାର୍ଥିପତ୍ର ପ୍ରତ୍ୟାହାର କରିନେଇଛନ୍ତି।

ଗୋଟିଏ ଦିନ ପୂର୍ବରୁ ନନ୍ଦିଗ୍ରାମ ଉପନିର୍ବାଚନ ପାଇଁ ମମତା ଗୋଷ୍ଠୀର ପ୍ରାର୍ଥୀ ଥିବା ସଞ୍ଚିତା ଦେ ପ୍ରଧାନ ମଧ୍ୟ ମୁଖ୍ୟମନ୍ତ୍ରୀ ସୁଭେନ୍ଦୁ ଅଧିକାରୀଙ୍କ ସହ ଆଲୋଚନା ପରେ ପ୍ରାର୍ଥିପତ୍ର ପ୍ରତ୍ୟାହାର କରିଥିଲେ। ଶୁକ୍ରବାର ଗଣମାଧ୍ୟମକୁ ପ୍ରତିକ୍ରିୟା ଦେଇ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ରେଜିନଗରରୁ ଓହରିବା ନେଇ ସଙ୍କେତ ଦେଇଥିଲେ। ସେ କହିଥିଲେ ଯେ, ନନ୍ଦିଗ୍ରାମରେ ଆମେ କଂଗ୍ରେସ ପ୍ରାର୍ଥୀଙ୍କୁ ସମର୍ଥନ ଦେବାକୁ ନିଷ୍ପତ୍ତି ନେଇଛୁ। ରେଜିନଗର ପ୍ରସଙ୍ଗରେ ପରେ ନିଷ୍ପତ୍ତି ନିଆଯିବ।

ନିଜ ନିଷ୍ପତ୍ତି ସମ୍ପର୍କରେ ସ୍ପଷ୍ଟୀକରଣ ଦେଇ ରବିଉଲ ଆଲମ ଚୌଧୁରୀ କହିଛନ୍ତି ଯେ, ଭାରତୀୟ ନିର୍ବାଚନ କମିଶନଙ୍କ ଦ୍ୱାରା ପ୍ରଦାନ କରାଯାଇଥିବା ନୂଆ ନିର୍ବାଚନ ଚିହ୍ନକୁ ନେଇ ପ୍ରଚାର କରିବାକୁ ଦଳୀୟ କର୍ମୀମାନେ ରାଜି ନାହାନ୍ତି। ଏହା ସହ ପ୍ରଶାସନ ପକ୍ଷରୁ କର୍ମୀଙ୍କ ଉପରେ ଚାପ ପକାଯାଉଥିବା ଏବଂ ଅନେକ କର୍ମୀଙ୍କୁ ଗିରଫ କରାଯାଇଥିବା ସେ ଅଭିଯୋଗ କରିଛନ୍ତି। ଏହି ପରିସ୍ଥିତିରେ ନିର୍ବାଚନ ଲଢ଼ିବା କଷ୍ଟକର ହୋଇପଡ଼ିଛି ବୋଲି ସେ ପ୍ରକାଶ କରିଛନ୍ତି। ମମତା ବାନାର୍ଜୀଙ୍କ ସହ ଆଲୋଚନା ପରେ ହିଁ ଏହି ନିଷ୍ପତ୍ତି ନିଆଯାଇଛି ବୋଲି ସେ ସ୍ପଷ୍ଟ କରିଛନ୍ତି।

ନନ୍ଦିଗ୍ରାମ ଓ ରେଜିନଗର ଉଭୟ ଆସନରୁ ଓହରିବା ପରେ, ୧୯୯୮ ମସିହା ପରଠାରୁ ଏହା ପ୍ରଥମ ଥର ପାଇଁ ଘଟିବାକୁ ଯାଉଛି ଯେ ପଶ୍ଚିମବଙ୍ଗ ନିର୍ବାଚନରେ ମମତା ବାନାର୍ଜୀଙ୍କ ଦ୍ୱାରା ପ୍ରତିଷ୍ଠିତ ଏବଂ ନେତୃତ୍ୱାଧୀନ କୌଣସି ଦଳ ମଇଦାନରେ ନାହାନ୍ତି। ଶୁକ୍ରବାର ନିର୍ବାଚନ କମିଶନ ମମତା ଗୋଷ୍ଠୀକୁ 'ମମତା ଅଲ୍ ଇଣ୍ଡିଆ ତୃଣମୂଳ କଂଗ୍ରେସ' ନାମ ଏବଂ 'ଫୁଟବଲ୍ ଖେଳାଳି' ଚିହ୍ନ ପ୍ରଦାନ କରିଥିଲେ। ଅନ୍ୟପକ୍ଷରେ ରିତବ୍ରତ ବାନାର୍ଜୀଙ୍କ ଗୋଷ୍ଠୀକୁ 'ଡେମୋକ୍ରାଟିକ୍ ତୃଣମୂଳ କଂଗ୍ରେସ' ନାମ ଏବଂ 'ଲଫାପା' ଚିହ୍ନ ମିଳିଥିଲା। ପୂର୍ବରୁ କମିଶନ ମୂଳ ଦଳର ନାମ ଏବଂ ଏହାର ପାରମ୍ପରିକ 'ଘାସଫୁଲ' ଚିହ୍ନକୁ ଫ୍ରିଜ୍ ବା ଅଚଳ କରିଦେଇଥିଲେ।

ସୂଚନାଯୋଗ୍ୟ ଯେ, ନନ୍ଦିଗ୍ରାମ ଏବଂ ରେଜିନଗର ଆସନ ପାଇଁ ଆସନ୍ତା ଅକ୍ଟୋବର ୬ ତାରିଖରେ ମତଦାନ ଅନୁଷ୍ଠିତ ହେବ ଏବଂ ଅକ୍ଟୋବର ୯ ତାରିଖରେ ଭୋଟ୍ ଗଣତି ହେବ। ଏଜେୟୁପି ନେତା ହୁମାୟୁନ କବୀର ରେଜିନଗର ଏବଂ ନାଓଦା ବିଧାନସଭା ଆସନରୁ ବିଜୟୀ ହେବା ପରେ ନାଓଦା ଆସନ ରଖି ରେଜିନଗର ଛାଡ଼ିବାରୁ ଏଠାରେ ଉପନିର୍ବାଚନ ହେଉଛି। ଏବେ ତାଙ୍କ ପୁଅ ଗୋଲାମ ନବୀ ଆଜାଦ ଏଠାରୁ ଏଜେୟୁପି ପ୍ରାର୍ଥୀ ଭାବେ ନିର୍ବାଚନ ଲଢ଼ୁଛନ୍ତି।