ଭୁବନେଶ୍ୱର: ରାଜ୍ୟରେ ଆଗାମୀ ପୌର ପରିଷଦ, ବିଜ୍ଞାପିତ ଅଞ୍ଚଳ ପରିଷଦ (ଏନଏସି) ଏବଂ ମହାନଗର ନିଗମ ନିର୍ବାଚନ ପାଇଁ ପ୍ରସ୍ତୁତି ଜୋରଦାର ହୋଇଛି। ଆସନ୍ତା ସାଧାରଣ ନିର୍ବାଚନ ନିମନ୍ତେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଶୁକ୍ରବାର ଦିନ ୱାର୍ଡ ସୀମା ନିର୍ଦ୍ଧାରଣ (ଡିଲିମିଟେସନ୍) ଏବଂ ଆସନ ସଂରକ୍ଷଣ ପାଇଁ ଏକ ସଂଶୋଧିତ କାର୍ଯ୍ୟସୂଚୀ ଜାରି କରାଯାଇଛି। ପୂର୍ବରୁ ଜାରି ହୋଇଥିବା କାର୍ଯ୍ୟସୂଚୀରେ ଆଂଶିକ ପରିବର୍ତ୍ତନ କରାଯାଇ ବୌଦ୍ଧ ଜିଲ୍ଲାକୁ ବାଦ୍ ଦେଇ ଅନ୍ୟ ସମସ୍ତ ଜିଲ୍ଲାପାଳଙ୍କୁ ଏ ସମ୍ପର୍କରେ ଅବଗତ କରାଯାଇଛି।

ସଂଶୋଧିତ ତାଲିକା ଅନୁଯାୟୀ, ଆସନ୍ତା ସେପ୍ଟେମ୍ବର ୨୪, ୨୦୨୬ ରେ ସମ୍ପୃକ୍ତ ଜିଲ୍ଲାପାଳମାନଙ୍କ ଦ୍ୱାରା ୱାର୍ଡ ସୀମା ନିର୍ଦ୍ଧାରଣ ଏବଂ ଆସନ ସଂରକ୍ଷଣ ସମ୍ପର୍କିତ ଡ୍ରାଫ୍ଟ ବିଜ୍ଞପ୍ତି ପ୍ରକାଶ ପାଇବ। ଏଥିପାଇଁ ସାଧାରଣ ଜନତାଙ୍କଠାରୁ ଆପତ୍ତି ଏବଂ ପରାମର୍ଶ ଆହ୍ୱାନ କରାଯିବ। ଆପତ୍ତି ଓ ପରାମର୍ଶ ଦାଖଲ କରିବାର ଶେଷ ତାରିଖ ଅକ୍ଟୋବର ୩, ୨୦୨୬ ଧାର୍ଯ୍ୟ କରାଯାଇଛି। ଏହାପରେ ଅକ୍ଟୋବର ୭ ରେ ୱାର୍ଡ ସୀମା ଓ ଆସନ ସଂରକ୍ଷଣ ନେଇ ପ୍ରାଥମିକ ବିଜ୍ଞପ୍ତି ଜାରି କରାଯିବ। ଏହି ବିଜ୍ଞପ୍ତି ବିରୋଧରେ ଅକ୍ଟୋବର ୭ ରୁ ଅକ୍ଟୋବର ୨୧ ମଧ୍ୟରେ ଗୃହ ଓ ନଗର ଉନ୍ନୟନ ବିଭାଗ ନିକଟରେ ଅପିଲ୍ କରାଯାଇପାରିବ।

ମିଳିଥିବା ଅପିଲଗୁଡ଼ିକୁ ଜିଲ୍ଲାପାଳମାନେ ନିଜର ସୁପାରିଶ ସହ ଅକ୍ଟୋବର ୨୨ ସୁଦ୍ଧା ସ୍ୱତନ୍ତ୍ର ଦୂତଙ୍କ ଜରିଆରେ ପୌର ପ୍ରଶାସନ ନିର୍ଦ୍ଦେଶକଙ୍କ କାର୍ଯ୍ୟାଳୟକୁ ପଠାଇବେ। ପରବର୍ତ୍ତୀ ପର୍ଯ୍ୟାୟରେ, ରାଜ୍ୟ ସରକାର ଅପିଲ୍ କର୍ତ୍ତୃପକ୍ଷ ଭାବରେ ଏହାର ଶୁଣାଣି କରିବେ ଏବଂ ଅକ୍ଟୋବର ୨୬ ରୁ ୨୮ ମଧ୍ୟରେ ଚୂଡ଼ାନ୍ତ ନିଷ୍ପତ୍ତି ନେବେ। ଶେଷ ପର୍ଯ୍ୟାୟରେ, ଅକ୍ଟୋବର ୩୧ ରେ ଜିଲ୍ଲାପାଳମାନଙ୍କ ଦ୍ୱାରା ୱାର୍ଡର ପୁନଃ ସୀମା ନିର୍ଦ୍ଧାରଣ ଏବଂ ଆସନ ସଂରକ୍ଷଣ ସମ୍ପର୍କରେ ଚୂଡ଼ାନ୍ତ ବିଜ୍ଞପ୍ତି ପ୍ରକାଶ ପାଇବ। ଏହାର ନକଲ ରାଜ୍ୟ ନିର୍ବାଚନ କମିଶନ, ରାଜ୍ୟ ସରକାର ଏବଂ ସମ୍ପୃକ୍ତ ପୌରାଞ୍ଚଳ (ULB) ଗୁଡ଼ିକୁ ପ୍ରଦାନ କରାଯିବ।