ଭୁବନେଶ୍ୱର: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୭୬ତମ ଜନ୍ମଦିବସ । ଏହି ବିଶେଷ ଅବସରରେ ସମଗ୍ର ଦେଶରେ ବିଭିନ୍ନ ଉତ୍ସବ ସହ 'ଆଶୀର୍ବାଦ' ଦୀପ ପ୍ରଜ୍ଜ୍ୱଳନ ଭଳି ବହୁ କାର୍ଯ୍ୟକ୍ରମ ଆୟୋଜିତ ହେଉଛି। ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ ସୋସିଆଲ ମିଡିଆ ପୋଷ୍ଟ ଜରିଆରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଜନ୍ମଦିନର ହାର୍ଦ୍ଦିକ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। 

ନିଜ ବାର୍ତ୍ତାରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ପ୍ରଧାନମନ୍ତ୍ରୀଙ୍କୁ 'ବିକଶିତ ଭାରତ'ର ସ୍ୱପ୍ନଦ୍ରଷ୍ଟା, ଜଣେ ପ୍ରେରଣାଦାୟୀ ଜନନାୟକ ତଥା କୋଟି କୋଟି ଭାରତୀୟଙ୍କ ଆତ୍ମସମ୍ମାନର ପ୍ରତୀକ ଭାବେ ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ପ୍ରଧାନମନ୍ତ୍ରୀଙ୍କ ରୂପାନ୍ତରଣକାରୀ ଦୂରଦୃଷ୍ଟି ଏବଂ ଓଡ଼ିଶା ପ୍ରତି ତାଙ୍କର ଅତୁଟ ଭଲପାଇବା ଏକ ଶକ୍ତିଶାଳୀ, ଆତ୍ମନିର୍ଭରଶୀଳ ଓ ସମୃଦ୍ଧ ରାଜ୍ୟ ଗଠନ ଦିଗରେ ନିରନ୍ତର ଉତ୍ସାହ ଯୋଗାଉଛି।

ଜନସେବା ପ୍ରତି ମୋଦୀଙ୍କ ସମର୍ପିତ ଜୀବନ ସାଧାରଣ ଲୋକଙ୍କ କଲ୍ୟାଣ ତଥା ନିଷ୍ଠାର ସହ ଦେଶର ସେବା କରିବା ପାଇଁ ସମସ୍ତଙ୍କୁ ଅନୁପ୍ରାଣିତ କରିବ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି।