ମହାକାଶରେ ଆମେରିକା ନିଜର ଅସ୍ତ୍ରଶସ୍ତ୍ର ମୁତୟନ କରିଥିବା ପ୍ରଥମ ଥର ପାଇଁ ଖୋଲାଖୋଲି ଭାବେ ସ୍ୱୀକାର କରିଛି। ଆମେରିକୀୟ ସ୍ପେସ୍ ଫୋର୍ସ ପକ୍ଷରୁ କୁହାଯାଇଛି ଯେ, ଶତ୍ରୁମାନଙ୍କ ଆକ୍ରମଣରୁ ରକ୍ଷା ପାଇବା ପାଇଁ ପୃଥିବୀର କକ୍ଷପଥ (ଅର୍ବିଟ୍) ରେ ଅସ୍ତ୍ରଶସ୍ତ୍ର ମୁତୟନ କରାଯାଇଛି। ଆମେରିକାର ଏହି ଘୋଷଣା ମହାକାଶକୁ ଯୁଦ୍ଧକ୍ଷେତ୍ରରେ ପରିଣତ କରିବା ଦିଗରେ ଏକ ବଡ଼ ପରିବର୍ତ୍ତନ ବୋଲି ବିବେଚନା କରାଯାଉଛି।

କେବଳ ପ୍ରତିରକ୍ଷା ନୁହେଁ, ଆକ୍ରମଣାତ୍ମକ ରଣନୀତି

ବାୟୁସେନା ସଚିବ ଟ୍ରୋୟ ମେଙ୍କ କହିଛନ୍ତି ଯେ, ଏହି ମୁତୟନ ବିଶେଷ ଭାବରେ ଶତ୍ରୁଙ୍କ ଆକ୍ରମଣକୁ ପ୍ରତିହତ କରିବା ପାଇଁ ଉଦ୍ଦିଷ୍ଟ। ସ୍ପେସ୍ ଫୋର୍ସର ନିୟମ ଅନୁଯାୟୀ, ମହାକାଶରେ ନିୟନ୍ତ୍ରଣ ବଜାୟ ରଖିବା ପାଇଁ ଶତ୍ରୁ ପକ୍ଷର ଉପଗ୍ରହ (ସାଟେଲାଇଟ୍) ଗୁଡ଼ିକୁ ନଷ୍ଟ କରିବା, ସେମାନଙ୍କ ଯୋଗାଯୋଗରେ ବାଧା ସୃଷ୍ଟି କରିବା ଏବଂ ନିଜ ଉପଗ୍ରହକୁ ସୁରକ୍ଷା ଦେବା ଏହି ଅପରେସନରେ ସାମିଲ ରହିଛି। ଆମେରିକାର ଏହି ପଦକ୍ଷେପ ସ୍ପଷ୍ଟ କରୁଛି ଯେ ଏବେ ଦେଶ କେବଳ ପ୍ରତିରକ୍ଷା ନୁହେଁ ବରଂ ସକ୍ରିୟ ନିୟନ୍ତ୍ରଣ କ୍ଷମତା ମଧ୍ୟ ହାସଲ କରିସାରିଛି। ଆମେରିକା ପକ୍ଷରୁ ସ୍ପଷ୍ଟ କରାଯାଇଛି ଯେ ମହାକାଶରେ ଉଭୟ ପ୍ରତିରକ୍ଷା ଏବଂ ଆକ୍ରମଣାତ୍ମକ ଅସ୍ତ୍ରଶସ୍ତ୍ର ରଖାଯାଇଛି।

ଗୁପ୍ତ ରହିଛି ଅସ୍ତ୍ରଶସ୍ତ୍ରର ପ୍ରକାର ଓ ସଂଖ୍ୟା

ଏପର୍ଯ୍ୟନ୍ତ ପେଣ୍ଟାଗନ ଏହି ଅସ୍ତ୍ରଶସ୍ତ୍ରର ସଂଖ୍ୟା କିମ୍ବା ପ୍ରକାରଭେଦ ବିଷୟରେ କୌଣସି ବିସ୍ତୃତ ସୂଚନା ଦେଇନାହିଁ। ଏହି ଅସ୍ତ୍ରଗୁଡ଼ିକ କାଇନେଟିକ୍ (ସିଧାସଳଖ ଧକ୍କା ଦେଉଥିବା) ନା ନନ୍-କାଇନେଟିକ୍ (ଯେପରିକି ଜାମିଂ ବା ଲେଜର) ସେ ନେଇ କିଛି ସ୍ପଷ୍ଟ କରାଯାଇ ନାହିଁ। ଦୀର୍ଘ ଦିନରୁ ବିଶେଷଜ୍ଞମାନେ ଆଶଙ୍କା କରୁଥିଲେ ଯେ ଆମେରିକା, ଚୀନ୍ ଏବଂ ରୁଷ ଭଳି ମହାଶକ୍ତିଙ୍କ ମଧ୍ୟରେ ମହାକାଶରେ ପ୍ରତିଦ୍ୱନ୍ଦ୍ୱିତା ବୃଦ୍ଧି ପାଉଛି। କିନ୍ତୁ ଏଭଳି ଏକ ଆନୁଷ୍ଠାନିକ ପୁଷ୍ଟିକରଣ ପୂର୍ବରୁ କେବେବି ଆସିନଥିଲା।

ସାମ୍ନାକୁ ଆସିଲା ଦୁଇଟି ନୂଆ ଡ୍ରୋନର ନାମ

ଏହି ଅବସରରେ ଟ୍ରୋୟ ମେଙ୍କ ଏୟାର ଫୋର୍ସର 'କୋଲାବୋରେଟିଭ୍ କମ୍ବାଟ୍ ଏୟାରକ୍ରାଫ୍ଟ' କାର୍ଯ୍ୟକ୍ରମର ଦୁଇଟି ନୂଆ ଡ୍ରୋନର ନାମ ଘୋଷଣା କରିଛନ୍ତି। ସେଗୁଡ଼ିକ ହେଲା ଏଫ୍‌କ୍ୟୁ-୪୨ ଭେଞ୍ଜେନ୍ସ (FQ-42 Vengeance) ଏବଂ ଏଫ୍‌କ୍ୟୁ-୪୪ ଫ୍ୟୁରୀ (FQ-44 Fury)। ବାୟୁସେନା ଏହି ସେମି-ଅଟୋନୋମସ୍ ଡ୍ରୋନଗୁଡ଼ିକୁ ମାନବ ଚାଳିତ ଜେଟ୍ ସହିତ ଯୋଡ଼ି ବ୍ୟବହାର କରିବାକୁ ଯୋଜନା କରୁଛି। ଯୋଜନା ଅନୁଯାୟୀ, ୨୦୩୨ ସୁଦ୍ଧା ପ୍ରାୟ ୧୦୦୦ ଏଭଳି ସିଷ୍ଟମ୍ କିଣିବାକୁ ଲକ୍ଷ୍ୟ ରଖାଯାଇଛି, ଯେଉଁଥିରୁ ୫୦୦ଟି ବିମାନ ନିର୍ଦ୍ଧାରିତ ସମୟ ସୁଦ୍ଧା ଉପଲବ୍ଧ ହେବ। ଏହି ଡ୍ରୋନ୍ ଗୁଡ଼ିକ ଆମେରିକୀୟ ବାୟୁସେନାର ପହଞ୍ଚ ଏବଂ ସୁରକ୍ଷା କ୍ଷମତାକୁ ଆହୁରି ମଜବୁତ କରିବା ପାଇଁ ନିର୍ମାଣ କରାଯାଇଛି।

ଅନ୍ତର୍ଜାତୀୟ ଚୁକ୍ତି ଉପରେ ପଡ଼ିବ ପ୍ରଭାବ

ଆମେରିକାର ଏହି ପଦକ୍ଷେପ ଆଗାମୀ ବର୍ଷଗୁଡ଼ିକରେ ଅନ୍ତର୍ଜାତୀୟ ନିୟମ, ଚୁକ୍ତି ଏବଂ ମହାକାଶ ପ୍ରତିଦ୍ୱନ୍ଦ୍ୱିତାକୁ ଏକ ନୂଆ ରୂପ ଦେଇପାରେ। ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଏବଂ ସ୍ୱୟଂଚାଳିତ ସିଷ୍ଟମ୍ ସାହାଯ୍ୟରେ ପରିଚାଳିତ ଏହି ଆଧୁନିକ ଅସ୍ତ୍ରଶସ୍ତ୍ର ଆଧୁନିକ ଯୁଦ୍ଧର ପ୍ରକୃତିକୁ ବଦଳାଇଦେବ। ମହାକାଶକୁ ଶାନ୍ତିପୂର୍ଣ୍ଣ ରଖିବା ପାଇଁ ହେଉଥିବା ପ୍ରୟାସ ଏବେ କେତେ ଦୂର ସଫଳ ହେବ, ତାହା ନୀତି ନିର୍ଦ୍ଧାରକ ଏବଂ ସୁରକ୍ଷା ବିଶେଷଜ୍ଞଙ୍କ ପାଇଁ ଏକ ବଡ଼ ଚିନ୍ତାର ବିଷୟ ପାଲଟିଛି।