ପଶ୍ଚିମ ଓଡ଼ିଶାରେ ଆଜି ପୁରପଲ୍ଲୀରେ ଖେଳିଯାଇଛି ଉତ୍ସବର ମାହୋଲ। କୃଷି ଏବଂ କୃଷକଙ୍କ ସହ ଜଡ଼ିତ ପଶ୍ଚିମ ଓଡ଼ିଶାର ସବୁଠାରୁ ବଡ଼ ଗଣପର୍ବ ନୂଆଁଖାଇ ଆଜି ମହାସମାରୋହରେ ପାଳିତ ହେଉଛି। ନୂଆ ଧାନ ଅମଳର ଖୁସିରେ ଚାଷୀମାନେ ନିଜର ଇଷ୍ଟଦେବୀଙ୍କୁ ପ୍ରଥମ ଅନ୍ନ ବା ନବାନ୍ନ ସମର୍ପଣ କରିବା ସହିତ ନୂଆ ଆଶା ଓ ନୂଆ ଉତ୍ସାହର ସହ ଏହି ପର୍ବକୁ ପାଳନ କରୁଛନ୍ତି।

ମା’ ସମଲେଶ୍ୱରୀଙ୍କ ନିକଟରେ ନବାନ୍ନ ଲାଗି

ନୂଆଁଖାଇର ସବୁଠାରୁ ପ୍ରମୁଖ ଆକର୍ଷଣ ହେଉଛି ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀଙ୍କ ପୀଠ। ପୂର୍ବ ନିର୍ଦ୍ଧାରିତ ଲଗ୍ନ ଅନୁଯାୟୀ, ଆଜି ଅର୍ଥାତ୍ ସେପ୍ଟେମ୍ବର ୧୫ ତାରିଖ ସକାଳ ୯.୪୦ ମିନିଟ୍‌ରୁ ୯.୫୪ ମିନିଟ୍ ମଧ୍ୟରେ ମା’ ସମଲେଶ୍ୱରୀଙ୍କ ନିକଟରେ ନବାନ୍ନ ଲାଗି କରାଯିବ। ନୂଆ ଧାନରୁ ପ୍ରସ୍ତୁତ ଏହି ସ୍ୱତନ୍ତ୍ର ଭୋଗକୁ ମା’ଙ୍କୁ ସମର୍ପଣ କରାଯିବା ପରେ ପଶ୍ଚିମ ଓଡ଼ିଶାର ବିଭିନ୍ନ ଅଞ୍ଚଳରେ ଲୋକେ ନିଜ ନିଜ ଗ୍ରାମଦେବତୀ ଓ ଇଷ୍ଟଦେବୀଙ୍କୁ ନବାନ୍ନ ଅର୍ପଣ କରିବେ। ଏହାପରେ ପରିବାରର ସମସ୍ତ ସଦସ୍ୟ ଏକାଠି ବସି ଏହି ନବାନ୍ନକୁ ଗ୍ରହଣ କରିବାର ପରମ୍ପରା ରହିଛି।

ନୂଆଁଖାଇ ଜୁହାର ଓ ଭେଟଘାଟ

ନୂଆଁଖାଇ କେବଳ ଏକ କୃଷି ପର୍ବ ନୁହେଁ, ଏହା ଭାଇଚାରା ଓ ଏକତାର ପ୍ରତୀକ। ଇଷ୍ଟଦେବୀଙ୍କ ନିକଟରେ ଭୋଗ ଲାଗିବା ଏବଂ ପରିବାର ସହ ନବାନ୍ନ ଖାଇବା ପରେ ଆରମ୍ଭ ହୋଇଥାଏ ପ୍ରସିଦ୍ଧ ନୂଆଁଖାଇ ଜୁହାର ପରମ୍ପରା। ଏହି ଅବସରରେ ସାନମାନେ ବଡ଼ମାନଙ୍କୁ ମୁଣ୍ଡିଆ ମାରି ଆଶୀର୍ବାଦ ଭିକ୍ଷା କରିଥାନ୍ତି। ସେହିପରି ସାଙ୍ଗସାଥୀ ଏବଂ ଆତ୍ମୀୟସ୍ୱଜନଙ୍କ ସହ ଆୟୋଜିତ ହୋଇଥାଏ ସ୍ୱତନ୍ତ୍ର ଭେଟଘାଟ କାର୍ଯ୍ୟକ୍ରମ। ସମସ୍ତ ପୁରୁଣା ରାଗରୁଷା ଏବଂ ମନାନ୍ତରକୁ ଭୁଲି ନୂଆ ସମ୍ପର୍କର ମୂଳଦୁଆ ପକାଇବାର ବାର୍ତ୍ତା ଦେଇଥାଏ ଏହି ପର୍ବ।

ଉତ୍ସବମୁଖର ପଶ୍ଚିମ ଓଡ଼ିଶା

ଆଜି ସମ୍ପୂର୍ଣ୍ଣ ପଶ୍ଚିମ ଓଡ଼ିଶା ଉତ୍ସବମୁଖର ହୋଇଉଠିଛି। ସମ୍ବଲପୁର, ବରଗଡ଼, ବଲାଙ୍ଗୀର, ଝାରସୁଗୁଡ଼ା, ସୁବର୍ଣ୍ଣପୁର, କଳାହାଣ୍ଡି, ବୌଦ୍ଧ ଏବଂ ଦେବଗଡ଼ ଭଳି ଜିଲ୍ଲାଗୁଡ଼ିକରେ ଘରେ ଘରେ ପିଠାପଣାର ଆସର ଜମିଛି। ନୂଆ ଲୁଗାପଟା ପିନ୍ଧିବା ସହ ପାରମ୍ପରିକ ସମ୍ବଲପୁରୀ ନୃତ୍ୟ ଓ ଗୀତରେ ମସଗୁଲ୍ ଅଛନ୍ତି ଲୋକେ। ଢୋଲ, ନିଶାନ ଓ ତାସାର ତାଳେ ତାଳେ ଆବାଳବୃଦ୍ଧବନିତା ନୂଆଁଖାଇକୁ ବେଶ୍ ଧୁମ୍‌ଧାମ୍‌ରେ ପାଳନ କରୁଛନ୍ତି।