ନୂଆଦିଲ୍ଲୀ: ଦୀର୍ଘ ୬ ବର୍ଷ ପରେ ପୁଣି ଥରେ ଚୀନ୍‌ରୁ ଭାରତ ଯିବା ଆସିବା କରିବ ବିମାନ । ଆସନ୍ତା ସେପ୍ଟେମ୍ବର ୨୧ ତାରିଖରୁ ଗୁଆଙ୍ଗଜୋ-ନୂଆଦିଲ୍ଲୀ ବିମାନ ସେବା । ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ‘ବ୍ରିକ୍ସ ସମ୍ମିଳନୀ ୨୦୨୬’ ରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ବୈଠକ ପୂର୍ବରୁ ଏହି ବଡ଼ ଘୋଷଣା କରାଯାଇଛି। ଆସନ୍ତା ସେପ୍ଟେମ୍ବର ୨୧ ତାରିଖରୁ ଚୀନ୍ ସଦର୍ଣ୍ଣ ଏୟାରଲାଇନ୍ସ ପକ୍ଷରୁ ଗୁଆଙ୍ଗଜୋ ଏବଂ ନୂଆଦିଲ୍ଲୀ ମଧ୍ୟରେ ନିୟମିତ ବିମାନ ସେବା ପୁଣି ଆରମ୍ଭ କରାଯିବ ବୋଲି ଘୋଷଣା କରାଯାଇଛି।

ଦୀର୍ଘ ୬ ବର୍ଷର ବ୍ୟବଧାନ ପରେ ଏହି ସେବା ପୁନର୍ବାର ଆରମ୍ଭ ହେବାକୁ ଯାଉଛି। ଏୟାରଲାଇନ୍ସ ପକ୍ଷରୁ କୁହାଯାଇଛି ଯେ, ଏହି ଅଞ୍ଚଳରେ ଥିବା ଆଠଟି ରାଉଣ୍ଡ-ଟ୍ରିପ୍ ରୁଟ୍ରେ ସାପ୍ତାହିକ ୧୦୦ ରୁ ଅଧିକ ବିମାନ ଚଳାଚଳ କରିବ।

ଚଳିତ ବର୍ଷ ଭାରତ ଏବଂ ଚୀନ୍ ମଧ୍ୟରେ ସିଧାସଳଖ ବିମାନ ସେବା ଧୀରେ ଧୀରେ ସ୍ୱାଭାବିକ ହେବାରେ ଲାଗିଛି। ଗତ ଫେବୃଆରୀ ମାସରେ ଏୟାର ଇଣ୍ଡିଆ ଏହାର ନୂଆଦିଲ୍ଲୀ-ଚୀନ୍ ସେବା ଆରମ୍ଭ କରିଥିଲା। ସେହିପରି ଏପ୍ରିଲ ୧୮ରେ ଚୀନ୍ ଇଷ୍ଟର୍ଣ୍ଣ ଏୟାରଲାଇନ୍ସ କୁନମିଂ-କୋଲକାତା ରୁଟ୍ ପୁନରୁଦ୍ଧାର କରିଥିବା ବେଳେ, ଏୟାର ଚୀନ୍ ମଧ୍ୟ ଏପ୍ରିଲରେ ବେଜିଂ-ଦିଲ୍ଲୀ ସେବା ଆରମ୍ଭ କରିଥିଲା। ଏହାବ୍ୟତୀତ ଇଣ୍ଡିଗୋ ଗତ ମାର୍ଚ୍ଚ ୩୦ରେ କୋଲକାତା ଏବଂ ସାଂଘାଇ ମଧ୍ୟରେ ଦୈନିକ ବିମାନ ସେବା ଆରମ୍ଭ କରିଥିଲା।

ନୂଆଦିଲ୍ଲୀରେ ଆୟୋଜିତ ହେଉଥିବା ୧୮ଶ ବ୍ରିକ୍ସ ସମ୍ମିଳନୀରେ ଯୋଗଦେବା ପାଇଁ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଭାରତ ଅଭିମୁଖେ ବାହାରିଛନ୍ତି। ପ୍ରାୟ ୭ ବର୍ଷ ପରେ ସେ ଭାରତ ଗସ୍ତରେ ଆସୁଛନ୍ତି। ସେପ୍ଟେମ୍ବର ୧୨ ରୁ ୧୩ ତାରିଖ ପର୍ଯ୍ୟନ୍ତ ହେବାକୁ ଥିବା ଏହି ଦୁଇ ଦିନିଆ ସମ୍ମିଳନୀରେ ଉଭୟ ନେତାଙ୍କ ମଧ୍ୟରେ ଏକ ଦ୍ୱିପାକ୍ଷିକ ବୈଠକ ହେବାର ସମ୍ଭାବନା ରହିଛି।

୨୦୨୦ ମସିହାରେ ଘଟିଥିବା ଘାତକ ଗଲୱାନ ସଂଘର୍ଷ ପରେ ଉଭୟ ଦେଶ ମଧ୍ୟରେ ସମ୍ପର୍କକୁ ସ୍ଥିର କରିବା ପାଇଁ ଉଦ୍ୟମ ଜାରି ରହିଛି। ସୀମାରେ ଶାନ୍ତି ବଜାୟ ରଖିବା ହିଁ ଦ୍ୱିପାକ୍ଷିକ ସମ୍ପର୍କର ବିକାଶ ଏବଂ ପ୍ରଗତି ପାଇଁ ଏକମାତ୍ର ପୂର୍ବ ସର୍ତ୍ତ ବୋଲି ଭାରତ ବାରମ୍ବାର ସ୍ପଷ୍ଟ କରିଆସୁଛି।