ଟୋକିଓ: ଟୋକିଓ ଅଲିମ୍ପିକ୍ସରେ ଭାରତକୁ ମିଳିଛି ଆଉ ଏକ ପଦକ। ୫୭ କେଜି ଫ୍ରି ଷ୍ଟାଇଲ ବର୍ଗରେ ରୌପ୍ୟ ପଦକ ଜିତିଛନ୍ତି ରବି ଦହିୟା । ଫାଇନାଲରେ ଋଷର କୁସ୍ତି ଯୋଦ୍ଧା ଜବୁର ୟୁଗେବଙ୍କ ସହ ମୁହାଁମୁହିଁ ହୋଇଥିଲେ ରବି ଦହିୟା । ସଂଘର୍ଷପୂର୍ଣ୍ଣ ଫାଇନାଲ ଲଢ଼େଇରେ ହାରି ରବିଙ୍କୁ ରୌପ୍ୟରେ ସନ୍ତୁଷ୍ଟ ହେବାକୁ ପଡ଼ିଛି ।

Another medal for @WeAreTeamIndia!

Kumar Ravi of #IND takes #silver in the men’s freestyle 57kg #Wrestling#StrongerTogether | @Tokyo2020 | @Wrestling pic.twitter.com/7bNZ4jdfya

— Olympics (@Olympics) August 5, 2021

ଆଜି ଫାଇନାଲ ମୁକାବିଲା ଆରମ୍ଭରୁ ହିଁ ଋୁଷର ଖେଳାଳି ରବିଙ୍କ ଉପରେ ପ୍ରାଧାନ୍ୟ ବିସ୍ତାର କରିିଥିଲେ । ପ୍ରଥମ ରାଉଣ୍ଡରେ ରବି ଦହିୟା ୨-୪ରେ ପଛରେ ରହିବା ସହିତ ଶେଷକୁ ୪-୭ରେ ପଛୁଆ ରହି ପରାଜୟ ଭୋଗିଛନ୍ତି । ତେବେ ରବିଙ୍କ ଏହି ରୌପ୍ୟ ପଦକ ଭାରତୀୟଙ୍କ ମନରେ ଉତ୍ସାହ ଭରିଛି ।

ଦ୍ୱିତୀୟ ଭାରତୀୟ କୁସ୍ତି ଯୋଦ୍ଧା ଭାବେ ରବି ଫାଇନାଲରେ ପହଞ୍ଚିଥିଲେ । ଏହା ପୂର୍ବରୁ ୨୦୧୨ରେ ସୁଶୀଲ କୁମାର ଫାଇନାଲକୁ ଯାଇଥିଲେ । ରବି ଦହିୟାଙ୍କୁ ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ୍ ଖଟ୍ଟର ୪ କୋଟି ଟଙ୍କା ପୁରସ୍କାର ଦେବାକୁ ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିଙ୍କୁ ଶୁଭେଚ୍ଛା ଜଣାଇଛନ୍ତି ।

Congratulations wrestler #RaviKumarDahiya on clinching Silver medal in Men’s Freestyle 57kg at #Tokyo2020. Your gritty fight will continue to inspire sportspersons across the country. Wish you all the best for future. #Cheer4India

— Naveen Patnaik (@Naveen_Odisha) August 5, 2021

ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ କୁସ୍ତିଯୋଦ୍ଧା ରବିଙ୍କୁ ଶୁଭେଚ୍ଛା ଜଣାଇଛନ୍ତି । ରବି ଅନ୍ୟ ଖେଳାଳିଙ୍କ ଲାଗି ପ୍ରେରଣା ହେବେ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଏଥିସହ ଟୋକିଓ ଅଲିମ୍ପିକ୍ସରେ ଭାରତର ପଦକ ସଂଖ୍ୟା ୫କୁ ବୃଦ୍ଧି ପାଇଛି ।

ଭୁବନେଶ୍ୱର: ପ୍ରଥମଥର ପାଇଁ ଭାରତୀୟ ମହିଳା ହକି ଟିମ୍‌ ଅଲିମ୍ପିକ୍ସ ସେମିଫାଇନାଲରେ ପ୍ରବେଶ କରିଛି। ଅଷ୍ଟ୍ରେଲିଆକୁ ୧-୦ରେ ହରାଇଛି ମହିଳା ହକି ଟିମ୍‌। ଏହା ପୂର୍ବରୁ ଭାରତୀୟ ପୁରୁଷ ହକି ଟିମ୍‌ ମଧ୍ୟ ଦୀର୍ଘ ୪୧ ବର୍ଷ ପରେ ଅଲମ୍ପିକ୍‌ରେ ସେମି ଫାଇନାଲକୁ ପ୍ରବେଶ କରିଛି। ୨୦୧୮ରୁ ଓଡ଼ିଶା ଭାରତୀୟ ହକି ଟିମ୍‌ର ପ୍ରାୟୋଜକ ରହିଛି ଖାଲି ସେତିକି ନୁହେଁ ହକି ପାଇଁ ଓଡ଼ିଶାର ଅବଦାନ ମଧ୍ୟ ଅନନ୍ୟ। ଓଡ଼ିଶାରେ ହକିର ଉନ୍ନତି ହେବାରୁ ଆଜି ଓଡ଼ିଶାରୁ ପୁରୁଷ ହକି ଟିମ୍‌ରେ ଉପ ଅଧିନାୟକ ବିରେନ୍ଦ୍ର ଲାକ୍ରା ଥିବା ବେଳେ ମହିଳା ଟିମ୍‌ରେ ଦିପ୍‌ ଗ୍ରେସ୍‌ ଏକ୍କା ଅଛନ୍ତି। ସେଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଛୁଟୁଛି ବିଭିନ୍ନ ମହଲରୁ ପ୍ରଶଂସାର ସୁଅ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ହକିକୁ ନୂଆ ଦିଗ ଦେଇଛନ୍ତି। କଳିଙ୍ଗ ଷ୍ଟାଡିଅମକୁ ନବୀନ ନୂଆରୂପ ଦେଇଛନ୍ତି ବୋଲି କହିଛନ୍ତି କଂଗ୍ରେସ ବିଧାୟକ ସୁରେଶ ରାଉତ ରାୟ। ସେ ଆହୁରି ମଧ୍ୟ କହିଛନ୍ତି କି ବଜେଟକୁ ୮ କୋଟିରୁ ୩୦ କୋଟି କରାଯାଇଛି। ଓଡ଼ିଶାରେ ନବୀନ ନିଜେ ହକି ମ୍ୟାଚର ଆୟୋଜନ କରିଥିବା ବେଳେ ପୁରା ବିଶ୍ୱ ଆଗରେ କଳିଙ୍ଗ ଷ୍ଟାଡିଅମକୁ ପରିଚିତ କରାଇଛନ୍ତି। ଯେଉଁଥିପାଇଁ ହକି ଟିମ୍‌କୁ ସାରା ବିଶ୍ୱ ପ୍ରଶଂସା କରିଥିଲା। ସେପଟେ ହକି ଟିମର ପ୍ରାୟୋଜକ ବ୍ୟବସ୍ଥା ଏବଂ ସୁନ୍ଦରଗଡରେ ନୂଆ ହକି ଷ୍ଟାଡିଅମ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ସୁରେଶ ରାଉତରାୟ।

ସେପଟେ ଅଲମ୍ପିକ୍ସରେ ପୁରୁଷ ଓ ମହିଳା ହକିର ବିକାଶ ପାଇଁ ରହିଛି ଓଡ଼ିଶା ସରକାରଙ୍କ ହାତ। ଏଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କ୍ରୀଡ଼ା ବିଭାଗ, ବିଶାଲ ଦେବ, ଭିନିଲ କ୍ରାଷ୍ଣାଙ୍କୁ ଧନ୍ୟବାଦ ଜଣାଇଛନ୍ତି ପୂର୍ବତନ ଅଧିନାୟକ ଦିଲ୍ଲୀପ ତିର୍କୀ। ମୁଖ୍ୟମନ୍ତ୍ରୀ ହକିକୁ ଅନ୍ୟ ଖେଳ ପରି ପ୍ରାଥମିକତା ଦେଇ ଏହାର ବିକାଶ କରୁଛନ୍ତି। ଦୁଇ ବର୍ଷ ହେବ ପୁରୁଷ ଓ ମହିଳା ହକି ଟିମର ପ୍ରାୟୋଜକ ରହିଛି ଓଡ଼ିଶା। ପ୍ରାୟୋଜକ ପାଇଁ କେହି ରାଜି ହେଉନଥିବା ବେଳେ, ଓଡ଼ିଶା ପ୍ରାୟୋଜକ ହୋଇଥିଲା ବୋଳି ଦିଲ୍ଲୀପ ତିର୍କୀ କହିଛନ୍ତି। ହକିର ପ୍ରସାର ପାଇଁ ବିଶ୍ୱକପ ହେଲା ଯାହା ବଡ଼ ସଫଳତା। ହକି କ୍ୟାମ୍ପ, ଚାମ୍ପିଅନସ ଟ୍ରଫି ମଧ୍ୟ ଆୟୋଜନ କରାଗଲା। ଆଗାମୀ ବିଶ୍ୱକପ ବି ରାଉରକେଲା ଓ ଭୁବନେଶ୍ୱରରେ ହେବ।

ବିଜୟ ପରେ ଓଡ଼ିଆ ଖେଳାଳିଙ୍କୁ ଅଭିନନ୍ଦନ ଜଣାଇଲେ କ୍ରୀଡ଼ାମନ୍ତ୍ରୀ। ବିଶ୍ୱରେ ଓଡ଼ିଶାର ଟେକ ରଖିଲେ ଆମ ଖେଳାଳି ବୋଲି କହିଛନ୍ତି କ୍ରିଡ଼ାମନ୍ତ୍ରୀ। ମୁଖ୍ୟମନ୍ତ୍ରୀଙ୍କ ହକି ପ୍ରତି ପ୍ରତିବଦ୍ଧତାରୁ ଅନେକ ସଫଳତା ମିଳିଛି। ମୁଖ୍ୟମନ୍ତ୍ରୀଙ୍କ ଚେଷ୍ଟା ପାଇଁ ତୃଣମୂଳସ୍ତରରୁ ଖେଳାଳିଙ୍କ ପ୍ରତିଭାର ବିକଶିତ କରାଯାଉଛି। ତେବେ ଉଭୟ ଦଳ ପଦକ ନେଇ ଫେରନ୍ତୁ ବୋଲି କହିଛନ୍ତି କ୍ରିଡ଼ାମନ୍ତ୍ରୀ।

The one neta who deserves a big salaam today is @Naveen_Odisha . At a time when most netas want to be BCCI members,corporates want IPL glamour, Odisha govt has invested in hockey, sponsored both women and men’s team, built world class infra. Take a bow Odisha!👍👍🙏#hockeyindia

— Rajdeep Sardesai (@sardesairajdeep) August 2, 2021

ସେହିପରି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରିଛନ୍ତି। ଆଜି ଯଦି କିଏ ସବୁଠୁ ବେଶି ଖୁସି ଓ ଉତ୍ସାହିତ ହେବା କଥା ସେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ କହିଛନ୍ତି।  ଓଡ଼ିଶା ଭାରତୀୟ ହକି ଦଳର ପ୍ରାୟୋଜକ ହୋଇଥିବାରୁ ପ୍ରଶଂସା କରିଛନ୍ତି। ସବୁଠାରୁ ବଡ଼ କଥା ହେଉଛି ଭାରତୀୟ ମହିଳା ହକି ଦଳର ବିଜୟର ସମସ୍ତ ଶ୍ରେୟ ଓଡ଼ିଶା ମୁଖ୍ୟମନ୍ତ୍ରୀଙ୍କୁ ଯିବ ବୋଲି କହିଛନ୍ତି ରାଜଦୀପ ସରଦେଶାଇ। ଅଧିକାଂଶ ରାଜନେତା ଓ କର୍ପୋରେଟ୍‌ କ୍ରିକେଟ ସହିତ ସଂଶ୍ଳିଷ୍ଟ। କାରଣ କ୍ରିକେଟରେ ରହିଛି ହକିଠାରୁ ଅଧିକ ରୋମାଞ୍ଚ। ସେଥିପାଇଁ ଯେହେତୁ କ୍ରିକେଟରେ ଅଧିକ ରୋମାଞ୍ଚ ରହିଛି ସେଥିପାଇଁ ସମସ୍ତେ ସେଥିରେ ଯୋଡ଼ି ହୋଇଛନ୍ତି। କିନ୍ତୁ ଓଡ଼ିଶା ଏମିତି ଏକ ରାଜ୍ୟ ଯିଏ ହକି ସହିତ ଯୋଡ଼ି ହୋଇ ଏବେ ବିଶାଳ ଉଦାହରଣ ସୃଷ୍ଟି କରିଛି। ଭାରତୀୟ ମହିଳା ହକି ଟିମ୍‌ର ବିଜୟ ପରେ ଟ୍ୱିଟ୍‌ କରି ଏଭଳି ସୂଚନା ଦେଇଛନ୍ତି ବରିଷ୍ଠ ସାମ୍ବାଦିକ ରାଜଦୀପ ସରଦେଶାଇ।

ଭୁବନେଶ୍ୱର: ହକି ଇଣ୍ଡିଆର ବିଜୟରେ ଖୁସି ମନାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୀର୍ଘ ୪୧ ବର୍ଷ ପରେ ଭାରତୀୟ ପୁରୁଷ ହକି ଟିମ ଅଲିମ୍ପିକ୍ସର ସେମି ଫାଇନାଲକୁ ପ୍ରବେଶ କରିଛି । ଭାରତୀୟ ହକି ଟିମର ଏହି ଐତିହାସିକ ବିଜୟରେ ଖୁସି ପ୍ରକଟ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଚ୍ଚନାୟକ । ମୁଖ୍ୟମନ୍ତ୍ରୀ ନବୀନ ନିବାସରେ ବସି ସମ୍ପୂର୍ଣ୍ଣ ମ୍ୟାଚ ଦେଖିବା ସହ ଟ୍ୱିଟ କରି ଭାରତୀୟ ହକି ଟିମକୁ ଶୁଭେଛା ଜଣାଇଛନ୍ତି ।

ଭାରତୀୟ ହକି ଟିମ ଇତିହାସର ପୁନରାବୃତ୍ତି କରିବା ନେଇ ଆଶା ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଚ୍ଚନାୟକ । ଆଗାମୀ ମ୍ୟାଚରେ ଭାରତୀୟ ପୁରୁଷ ହକି ଟିମ ବେଲଜିୟମକୁ ଭେଟିବାକୁ ଯାଉଥିବାବେଳେ ନିଶ୍ଚୟ ବିଜୟ ହାସଲ କରିବ ବୋଲି ମଧ୍ୟ ଆଶା ପ୍ରକଟ କରିଛନ୍ତି ମୁଖ୍ୟମନ୍ତ୍ରୀ । ସେହିଭଳି ଟୋକିଓ ଅଲିମ୍ପିକ୍ସରେ ଟିମ ବିଜୟ ହାସଲ କରିବା ନେଇ ଶୁଭେଛା ବାର୍ତ୍ତା ଦେଇଛନ୍ତି ମୁଖ୍ୟମନ୍ତ୍ରୀ ।

Well played!

Congratulate Indian Men’s #Hockey Team on registering a stunning victory in the quarter-final against Great Britain at #Tokyo2020. May the team continue its momentum & bring much awaited medal for the country. Wish the team all the best.#Cheer4India @thehockeyindia pic.twitter.com/9eBkrlyxY1

— Naveen Patnaik (@Naveen_Odisha) August 1, 2021

ଅନ୍ୟପଟେ ଯେତେବେଳେ ଭାରତ ସହ ବ୍ରିଟେନର ମ୍ୟାଚ ଜାରି ରହିଥିଲା । ସେତେବେଳେ ମୁଖ୍ୟମନ୍ତ୍ରୀ ନିଜ ବାସଭବନରେ ରହି ସମ୍ପୂର୍ଣ୍ଣ ମ୍ୟାଚକୁ ଦେଖୁଥିଲେ । ନବୀନ ନିବାସରେ ମୁଖ୍ୟମନ୍ତ୍ରୀଙ୍କ ସହ ତାଙ୍କର ବ୍ୟକ୍ତିଗତ ସଚିବ ଭି. କାର୍ତ୍ତିକେୟ ପାଣ୍ଡିୟାନ ମଧ୍ୟ ଉପସ୍ଥିତ ରହିଥିଲେ । ଯେଉଁ ସମୟରେ ଭାରତୀୟ ପୁରୁଷ ହକି ଟିମ ବ୍ରିଟେନକୁ ପରାଜୟ କରିବା ସହ ବିଜୟ ହୋଇଥିଲା, ସେହି ସମୟରେ ମୁଖ୍ୟମନ୍ତ୍ରୀ ଠିଆ ହୋଇପଡିଥିଲେ ଏବଂ ଭାରତୀୟ ଟିମକୁ ଉତ୍ସାହିତ କରିବା ସହ ତାଳି ମଧ୍ୟ ମାରିଥିଲେ ।

ଟୋକିଓ ଅଲିମ୍ପିକ୍ସ ପୁରୁଷ ହକିରେ ଭାରତର ଦମଦାର ବିଜୟ । ଗ୍ରେଟ ବ୍ରିଟେନକୁ ହାରଇ ସେମିଫାଇନାଲରେ ପ୍ରବେଶ କରିଛି ଭାରତ। ଆଜିର  କ୍ୱାର୍ଟରରେ ବ୍ରିଟେନ୍‌କୁ ୧-୩ ଗୋଲ୍‌ରେ ଭାରତ ପରାସ୍ତ କରିଛି। ଏଥିସହ ଦୀର୍ଘ ୪୧ ବର୍ଷ ପରେ ଅଲିମ୍ପିକ୍ସ ସେମିରେ ଭାରତ ପ୍ରବେଶ କରିଛି। ଆଜି କ୍ବାର୍ଟର ଫାଇନାଲରେ ଭାରତ ପକ୍ଷରୁ ଦିଲପ୍ରୀତ, ଗୁରଜନ୍ତ ଓ ହାର୍ଦ୍ଦିକ୍ ଗୋଟିଏ ଲେଖାଁଏ ଗୋଲ ସ୍କୋର କରିଥିଲେ।

ସେମିଫାଇନାଲରେ ଭାରତ ଓ ବେଲଜିୟମ୍ ମଧ୍ୟରେ ମୁକାବିଲା ହେବ।

ଟୋକିଓ: ଟୋକିଓ ଅଲିମ୍ପିକ୍ସ ବକ୍ସିଂ ଇଭେଣ୍ଟରେ ଭାରତର ଏକାଧିକ ପଦକ ଆଶା ମଉଳିବାରେ ଲାଗିଛି । ଅଲିମ୍ପିକ୍ସ ପୁରୁଷ ବକ୍ସିଂରେ ନିରାଶ କଲେ ସତୀଶ କୁମାର । ଗତକାଲି ବିଶ୍ୱର ନମ୍ବର ୱାନ ବକ୍ସର ଅମିତ ପଙ୍ଘାଲ ୫୨ କେଜି ବର୍ଗର ପ୍ରି-କ୍ୱାର୍ଟରରୁ ହାରି ବିଦାୟ ନେଇଥିବା ବେଳେ ଆଜି ସୁପରହେଭି ବର୍ଗ (୯୧ କେଜିରୁ ଊର୍ଦ୍ଧ୍ୱ)ର କ୍ୱାର୍ଟର ଫାଇନାଲରେ ମଧ୍ୟ ଭାରତକୁ ନିରାଶ ହେବାକୁ ପଡିିଛି । ଏହି ବର୍ଗରେ ଭାରତର ସତୀଶ କୁମାର ବିଶ୍ୱର ନମ୍ବର ୱାନ ବକ୍ସର ଉଜବେକିସ୍ତାନର ବାଖୋଦିର ଜାଲୋଲୋଭଙ୍କ ଠାରୁ ପରାସ୍ତ ହୋଇ ବାଦ୍ ପଡ଼ିଛନ୍ତି । ସତୀଶ ତାଙ୍କ ପ୍ରତିପକ୍ଷ ଜାଲୋଲୋଭଙ୍କ ଚ୍ୟାଲେଞ୍ଜ ପ୍ରତିହତ କରିବାକୁ ଯଥା ସମ୍ଭବ ଉଦ୍ୟମ କରିଥିଲେ । ଶେଷ ଯାଏଁ ଲଢ଼ିଥିଲେ ଏହି ଭାରତୀୟ ବକ୍ସର । କିନ୍ତୁ ଜାଲୋଲୋଭ ତାଙ୍କୁ ପ୍ରାଧାନ୍ୟ ବିସ୍ତାର କରିବାକୁ ସୁଯୋଗ ହିଁ ଦେଇନଥିଲେ ।

ଡାକ୍ତରଙ୍କଠାରୁ ଅନୁମତି ମିଳିବା ପରେ ଆଜି ସତୀଶ କୁମାର କ୍ୱାର୍ଟର ଫାଇନାଲ୍ ଖେଳିଥିଲେ। କାରଣ ପ୍ରି-କ୍ୱାର୍ଟର ଫାଇନାଲ୍‌ରେ ତାଙ୍କ ଡାହାଣ ଆଖି ଉପରେ ଆଘାତ ଲାଗିଥିଲା ଓ ୭ଟି ଷ୍ଟିଚ୍ ପଡ଼ିଥିଲା। ପ୍ରି-କ୍ୱାର୍ଟର ଫାଇନାଲ୍‌ରେ ସେ ଜାମାଇକାର ରିକାର୍ଡୋ ବ୍ରାଉନ୍‌ଙ୍କୁ ୪-୧ରେ ପରାସ୍ତ କରିଥିଲେ।

ଟୋକିଓ: ଅଲିମ୍ପିକ୍ସ ଗ୍ରୁପ ପର୍ଯ୍ୟାୟର କର ବା ମର ମ୍ୟାଚରେ ଜବରଦସ୍ତ ପ୍ରଦର୍ଶନ କରିଛି ଭାରତୀୟ ମହିଳା ହକି ଟିମ । ପୁଲ୍ ପର୍ଯ୍ୟାୟର ଶେଷ ମ୍ୟାଚ୍ ରେ ଭାରତୀୟ ମହିଳା ହକି ଦଳ ଦକ୍ଷିଣ ଆଫ୍ରିକାକୁ ୪-୩ ଗୋଲରେ ରେ ପରାସ୍ତ କରିଛି । ଏହା ସହିତ ଭାରତ କ୍ୱାର୍ଟର ଫାଇନାଲରେ ପହଞ୍ଚିବା ଆଶା ଉଜ୍ଜୀବିତ ରଖିଛି । ଗ୍ରୁପ୍ ପର୍ଯ୍ୟାୟରେ ୫ଟି ପାଞ୍ଚରୁ ଭାରତ ୨ଟିରେ ବିଜୟୀ ହୋଇଛି । ଭାରତର ଭାଗ୍ୟ ଆୟର୍ଲାଣ୍ଡ ଏବଂ ଗ୍ରେଟ୍ ବ୍ରିଟେନ ମଧ୍ୟରେ ମ୍ୟାଚ୍ ଉପରେ ନିର୍ଭର କରୁଛି। ଯଦି ଆୟର୍ଲାଣ୍ଡ ପରାସ୍ତ ହୁଏ, ତେବେ ଭାରତ କ୍ବାର୍ଟର ଫାଇନାଲରେ ପହଞ୍ଚିବ ।

ଦକ୍ଷିଣ ଆଫ୍ରିକା ବିପକ୍ଷ ସଂଘର୍ଷପୂର୍ଣ୍ଣ ମ୍ୟାଚରେ ଭାରତ ପାଇଁ ବନ୍ଦନା କାଟାରିଆ ହ୍ୟାଟ୍ରିକ ଗୋଲ ସ୍କୋର କରିଥିଲେ। ଅଲିମ୍ପିକ୍ ମ୍ୟାଚ୍ ରେ ହ୍ୟାଟ୍ରିକ୍ ଗୋଲ ସ୍କୋର କରିବାରେ ବନ୍ଦନା ହେଉଛନ୍ତି ପ୍ରଥମ ଭାରତୀୟ ମହିଳା ହକି ଖେଳାଳି।

ଟୋକିଓ: ଟୋକିଓ ଅଲିମ୍ପିକ୍ସର ଅଷ୍ଟମ ଦିନ ଭାରତ ପାଇଁ ଏକ ଭଲ ଦିନ ଥିଲା । ଟୋକିଓ ଅଲିମ୍ପିକ୍ସ ପୁରଷ ହକିରେ ଭାରତର ଦମଦାର ବିଜୟ । ଜାପାନକୁ ୫-୩ ଗୋଲରେ ହରାଇଲା ଭାରତ । ଏହାସହ ଭାରତ ତାର ସମସ୍ତ ପୁଲ ମ୍ୟାଚ ଶେଷ କରିଛି । ପୁଲ ମ୍ୟାଚରେ ଭାରତ ୪ଟି ମ୍ୟାଚରେ ବିଜୟୀ ହୋଇଥିବା ବେଳେ ଗୋଟିଏ ମ୍ୟାଚରେ ପରାଜିତ ହୋଇଛି । ବିଶ୍ବ କ୍ରୀଡ଼ା ମହାକୁମ୍ଭ ‘ଅଲିମ୍ପିକ୍ସ’ର ୮ମ ଦିନରେ ମହିଳା ମୁଷ୍ଟିଯୁଦ୍ଧା ୬୯ କିଲୋ କ୍ବାର୍ଟର ଫାଇନାଲରେ ଚାଇନାର ନିଏନ ଚିନ ଚେନଙ୍କୁ ପରାସ୍ତ କରି ସେମିଫାଇନାଲରେ ଏଣ୍ଟ୍ରି କରିଛନ୍ତି। ମହିଳା ବ୍ୟାଟମିଣ୍ଟନ୍ ଖେଳାଳି ପିଭି ସିନ୍ଧୁ ଟୋକିଓ ଅଲିମ୍ପିକ ସେମିଫାଇନାଲରେ କରିଛନ୍ତି ପ୍ରବେଶ। ଆଜି ମହିଳା ସିଙ୍ଗଲ୍ସରେ ସିନ୍ଧୁ ଆୟୋଜକ ଜାପାନର ଷ୍ଟାର ଖେଳାଳି ଅକାନେ ୟାମାଗୁଚିଙ୍କୁ ସିଧାସଳଖ ୨୧-୧୩ ଓ ୨୨-୨୦ସେଟ୍‌ରେ ହରାଇ ସେମିଫାଇନାଲରେ ସ୍ଥାନ ପାଇଛନ୍ତି। ମହିଳା ହକିରେ ଭାରତ ଆୟର୍ଲାଣ୍ଡକୁ ୧-୦ ରେ ପରାସ୍ତ କରିଛି।

ପୁଲ ଏ ର ଶେଷ ମ୍ୟାଚରେ ଭାରତୀୟ ପୁରୁଷ ହକି ଦଳ ଜାପାନକୁ ୫-୩ ଗୋଲରେ ପରାସ୍ତ କରିଛି। ଏହା ହେଉଛି ଟିମ୍ ଇଣ୍ଡିଆର କ୍ରମାଗତ ତୃତୀୟ ବିଜୟ। ଭାରତୀୟ ଦଳ ଆରମ୍ଭରୁ ଆକ୍ରମଣାତ୍ମକ ଖେଳ ଖେଳିଥିଲା। ଖେଳର ଅର୍ଦ୍ଧ ସମୟରେ ଭାରତ ୨-୧ରେ ଆଗୁଆ ରହିଥିଲା। କିଛି ସମୟ ପରେ ଜାପାନ ୩୧ ମିନିଟରେ ଗୋଲ ସ୍କୋର କରି ସ୍କୋରକୁ ୨-୨ ରେ ପହଞ୍ଚାଇଲା | କିଛି ସମୟ ପରେ ଭାରତ ୩୪ ତମ ମିନିଟରେ ଆଉ ଏକ ଗୋଲ ସ୍କୋର କରି ଜାପାନଠାରୁ ୩-୨ ଅଗ୍ରଣୀ ହାସଲ କଲା | ୫୧ ମିନିଟରେ ନୀଲକାନ୍ତ ଭାରତ ପାଇଁ ଗୋଲ ଦେଇଥିଲେ। ଏହା ସହିତ ଟିମ୍ ଇଣ୍ଡିଆ ଜାପାନଠାରୁ ୪-୨ ଅଗ୍ରଣୀ ହାସଲ କରିଥିଲା | ଏଥି ସହିତ ଗୁରୁଜନ୍ତ ୫୬ ମିନିଟରେ ଗୋଟିଏ ଗୋଲ ସ୍କୋର କରି ଟିମ ଇଣ୍ଡିଆକୁ ୫-୨ ଅଗ୍ରଣୀ କରାଇଥିଲେ। ଏଥି ସହିତ ଖେଳର ୫୯ ମିନିଟରେ ଜାପାନ ଗୋଲ ସ୍କୋର କରିଥିଲା। ଏହି ପୂର୍ଣ୍ଣ ସମୟ ଆସିବା ପରେ ଭାରତ ୫-୩ ମ୍ୟାଚ୍ ଜିତିଲା | ଏହି ବିଜୟ ସହିତ ଟିମ୍ ଇଣ୍ଡିଆ ପୁଲ୍ ଏରେ ଦ୍ୱିତୀୟ ସ୍ଥାନ ଅଧିକାର କରିଛି ଏବଂ ବର୍ତ୍ତମାନ ଅଗଷ୍ଟ ୧ ରେ କ୍ୱାର୍ଟର ଫାଇନାଲରେ ଗ୍ରୁପ୍ ବି’ର ତୃତୀୟ ସ୍ଥାନିତ ଦଳକୁ ଭେଟିବ |

ଅଷ୍ଟ୍ରେଲିଆଠାରୁ ହାରିବା ପରେ ଭାରତୀୟ ଟିମ୍ ସ୍ପେନ୍, ଆର୍ଜେଣ୍ଟିନା ଓ ଆଜି ଜାପାନକୁ ହରାଇଛି। ଆୟୋଜକ ଜାପାନ ଅଲିମ୍ପିକରେ ଏପର୍ଯ୍ୟନ୍ତ ଗୋଟିଏ ବି ମ୍ୟାଚ୍ ଜିତିପାରିନି। ଭାରତୀୟ ଟିମ୍ ଦୁଇଟି ମ୍ୟାଚ୍‌ରେ ଜିତିବାର ଉତ୍ସାହ ଓ ଆତ୍ମବିଶ୍ବାସ ସହିତ ଜାପାନ ବିପକ୍ଷ ମ୍ୟାଚ୍ ଖେଳିବାକୁ ଓହ୍ଲାଇଥିଲା।

ଟୋକିଓ: ଟୋକିଓ ଅଲିମ୍ପିକ୍ସରେ ବିଜୟରୁ ନିଜର ଅଭିଯାନ ଆରମ୍ଭ କରିଛନ୍ତି ଭାରତୀୟ ବ୍ୟାଡ୍‌ମିଣ୍ଟନ ଷ୍ଟାର ପି.ଭି ସିନ୍ଧୁ । ଇସ୍ରାଏଲ ପ୍ରତିପକ୍ଷ କସେନିଆଙ୍କ ବିପକ୍ଷରେ ସେ ୨୧-୭, ୨୧-୧୦ ସେଟ୍‌ରେ ବିଜୟୀ ହୋଇଛନ୍ତି । ମାତ୍ର ୨୮ ମିନିଟରେ ପ୍ରଥମ ମୁକାବିଲାକୁ ନିଜ ନାଁରେ କରିଥିଲେ ପି. ଭି. ସିନ୍ଧୁ । ମ୍ୟାଚରେ ପ୍ରଥମରୁ ହିଁ ଆଗୁଆ ରହିଥିଲେ ପି.ଭି ସିନ୍ଧୁ ।

ଅପରପକ୍ଷରେ ମହିଳା ସୁଟର ମନୁ ଭାକେର ଏବଂ ୟଶସ୍ୱିନୀ ସିଂହ ୧୦ ମିଟର ଏୟାର ପିଷ୍ଟଲ ଫାଇନାଲ ପାଇଁ ଯୋଗତ୍ୟା ହାସଲରେ ବିଫଳ ହୋଇଛନ୍ତି । ପିସ୍ତଲ୍‌ରେ ତ୍ରୁଟି ଦେଖା ଦେବାରୁ ଭାକରଙ୍କୁ ୫ ମିନିଟ୍‌ରୁ ଅଧିକ ସମୟ ଅପେକ୍ଷା କରିବାକୁ ପଡ଼ିଥିଲା। ଅନ୍ତିମ ଦୁଇ ରାଉଣ୍ଡ୍‌ରେ ସେ ଭଲ ପ୍ରଦର୍ଶନ କରିଥିଲେ ବି ଶେଷ ସଟ୍‌ରେ ୮ରେ ଅଟକି ଯିବାରୁ ଫାଇନାଲ୍‌ରେ ପ୍ରବେଶ କରିବାରୁ ବଞ୍ଚିତା ହୋଇଥିଲେ। ଅପରପକ୍ଷରେ ରୋଇଂରେ ଅରବିନ୍ଦ ସିଂହ ଏବଂ ଅର୍ଜୁନ ଜଟ୍ ତୃତୀୟ ସ୍ଥାନ ହାସଲ କରିବା ସହ ସେମିଫାଇନାଲ ପାଇଁ କ୍ୱାଲିଫାଇ କରିଛନ୍ତି ।

ଟୋକିଓ: ମହାମାରୀର ଭୟ ମଧ୍ୟରେ ଆଜିଠାରୁ ଆରମ୍ଭ ହେବାକୁ ଯାଉଛି କ୍ରୀଡ଼ା ମହାକୁମ୍ଭ ଅଲିମ୍ପିକ୍ସ । ଦେଶବାସୀଙ୍କ ବିରୋଧ ଓ ବିକ୍ଷୋଭ ସତ୍ତ୍ୱେ ବିନା ଦର୍ଶକରେ ଆରମ୍ଭ ହେବାକୁ ଯାଉଛି ବିଶ୍ୱର ଏହି ପୁରାତନ ଓ ସର୍ବଶ୍ରେଷ୍ଠ ପ୍ରତିଷ୍ପର୍ଦ୍ଧା । ଚଳିତ ଥରର ଅଲିମ୍ପିକ୍ସରେ ୨୦୦ରୁ ଅଧିକ ଦେଶର ପାଖାପଖି ୧୧୪୦୦ ପ୍ରତିଯୋଗୀ ନିଜ ଅପୂର୍ବ କ୍ରୀଡ଼ା ଦକ୍ଷତାର ବଳିଷ୍ଠ ନିଦର୍ଶନ ଦେବେ । ୩୩ କ୍ରୀଡ଼ାର ୫୦ ଶୃଙ୍ଖଳା ଓ ୩୩୯ ଇଭେଣ୍ଟରେ ଜାପାନ ରାଜଧାନୀ ଟୋକିଓରେ ଶୁକ୍ରବାରଠାରୁ ଅଗଷ୍ଟ ୮ ତାରିଖ ପର୍ଯ୍ୟନ୍ତ ଚାଲିବ ଏହି କ୍ରୀନା ମହାସମର । କରୋନା କାରଣରୁ ଅଲିମ୍ପିକ୍ସ ୨୦୨୦ରେ ହେବାକୁ ଥିବା ବେଳେ ଏହାକୁ ଘୁଞ୍ଚାଇ ଚଳିତ ବର୍ଷ କରାଯାଉଛି ।

ତେବେ ଚଳିତ ବର୍ଷର ଅଲିମ୍ପିକ୍ସ ଅନେକ ଦୃଷ୍ଟିରୁ ଅସାଧାରଣ, ଅସ୍ୱାଭାବିକ ଓ ଆହ୍ୱାନପୂର୍ଣ୍ଣ ରହିବ । ଏଥିସହିତ କରମର୍ଦ୍ଦନ, ପଦକ ପ୍ରଦାନ, ଆଲିଙ୍କନ ଭଳି ଅନେକ ପ୍ରକ୍ରିୟା ଉପରେ କଟକଣା ଲାଗୁ କରାଯାଇଛି । ଅପରପକ୍ଷରେ ଏସବୁ ସତ୍ତ୍ୱେ ଆବେଗ ଭିତରେ ଏକତା’ର ବାର୍ତ୍ତା ବହନ କରୁଥିବା ଟୋକିଓ ଅଲିମ୍ପିକ୍ସ ସଫଳତାର ସହ ଶେଷ ହେବ ବୋଲି ଅନ୍ତର୍ଜାତୀୟ ଅଲିମ୍ପିକ୍ସ କମିଟି ଆଶା ରଖିଛି । ତେବେ ପ୍ରଥମ ଥର ପାଇଁ ୧୨୭ ଜଣ ଖେଳାଳିଙ୍କୁ ଭାରତ ଟୋକିଓ ପଠାଇଥିବା ବେଳେ ନିଜ ପଦକ ସଂଖ୍ୟାକୁ ୨ ଅଙ୍କରେ ପହଞ୍ଚାଇବ ବୋଲି ଆଶା ରଖିଛି । ଯଦି ଓଡ଼ିଶା କଥା ଦେଖିବା ଦୌଡ଼ରାଣୀ ଦୂତି ଚାନ୍ଦ ଏବଂ ହକି ତାରକା ବୀରେନ୍ଦ୍ର ଲାକ୍ରା, ଅମିତ ରାହିଦାସ, ଦୀପଗ୍ରେସ ଏକ୍କା, ନମିତା ଟୋପ୍ପୋ ଏଥର ଅଲିମ୍ପିକ୍ସରେ ନିଜ ଯାଦୁ ଦେଖାଇବେ ।

କରୋନା ମହାମାରୀ ଜନିତ ନିରାଶା ମଧ୍ୟରେ ବିଶ୍ୱ କ୍ରୀଡାର ଏହି ମହାକୁମ୍ଭ ଆୟୋଜନ ପାଇଁ ପ୍ରସ୍ତୁତ ଟୋକିଓ ନଗରୀ । ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ଚଳିତ ଥରର ସଂସ୍କରଣକୁ ‘ଆଶାର ଅଲିମ୍ପିକ୍ସ’ ଭାବେ ଅଭିହିତ କରିଥିବା ବେଳେ ନିଜ ଇତିହାସରେ ସବୁଠୁ ବଡ଼ ଦଳ ସହ ଯାଇଥିବା ଭାରତ ମଧ୍ୟ ଏଥର ନିଜ କ୍ରୀଡା ସାମର୍ଥ୍ୟର ପ୍ରଦର୍ଶନ ପାଇଁ ଅଣ୍ଟା ଭିଡିଛି । ଏଥର ଟୋକିଓରେ ଏକ ନୂଆ ଇତିହାସ ରଚିବାକୁ ଲକ୍ଷ୍ୟ ରଖିଛି ଭାରତୀୟ ଦଳ । ବିଶେଷକରି ଶୁଟିଂ, ବକ୍ସିଂ, ରେସଲିଂରେ ଏକାଧିକ ପଦକ ସହ ନିଜ ନୈରାଶ୍ୟଜନକ ଅଲିମ୍ପିକ୍ସ ରେକର୍ଡ ସୁଧାରିବାକୁ ଆଉ ଏକ ସୁଯୋଗ ପାଇଛି ଭାରତ ।

କୋଭିଡ୍‌-୧୯ ଯୋଗୁଁ ଗୋଟିଏ ବର୍ଷ ସ୍ଥଗିତ ରହିବା ପରେ ବି ଟୋକିଓ ଅଲିମ୍ପିକ୍ସ ଉପରୁ ଏହି ମହାମାରୀର ବିପଦ ଟଳି ନାହିଁ । ଆୟୋଜକ ନଗରୀ ଟୋକିଓରେ ବି କରୋନା ସ୍ଥିତି ବେଶ୍ ଗମ୍ଭୀର । ଏଠାରେ ପ୍ରତ୍ୟହ ହଜାରେରୁ ଊର୍ଦ୍ଧ୍ୱ ମାମଲା ରେକର୍ଡ କରାଯାଉଛି । ତନ୍ମଧ୍ୟରୁ ଅଲିମ୍ପିକ୍ସରେ ଏଯାବତ ଠାବ ହୋଇଥିବା ସଂକ୍ରମିତଙ୍କ ସଂଖ୍ୟା ନଗଣ୍ୟ ଥିଲେ ବି ପ୍ରତିଯୋଗୀଙ୍କ ମନରେ ଭୟ ରହିଛି । ସଂକ୍ରମଣ ଭୟକୁ ଦୃଷ୍ଟିରେ ରଖି ଦର୍ଶକଙ୍କୁ ବାରଣ କରାଯାଇଛି । ଫଳରେ ଏହି କ୍ରୀଡା ମହାକୁମ୍ଭ ସହ ଜଡିତ ସେହି ଉତ୍ସାହ ନାହିଁ । ତଥାପି ଟୋକିଓ ଅଲିମ୍ପିକ୍ସକୁ ଆଶାର ବର୍ତ୍ତିକା ଭାବେ ଉପସ୍ଥାପନ କରିବାକୁ ଆଇଓସି ପକ୍ଷରୁ ଯଥାସମ୍ଭବ ଉଦ୍ୟମ କରାଯାଇଛି ଏବଂ ଏହାର ସକାରାତ୍ମକ ଦିଗ ଉପରେ ଧ୍ୟାନ ଦେବାକୁ ଅଂଶଗ୍ରହଣକାରୀ ଆଥଲେଟ ମାନଙ୍କୁ ମଧ୍ୟ ପରାମର୍ଶ ଦିଆଯାଇଛି ।

ଆଇଓସି ସଭାପତି ଥୋମାସ୍ ବାକ୍ କହିଛନ୍ତି ଯେ, କରୋନା ସଙ୍କଟର ମୁକାବିଲା କରିବା ପାଇଁ ଟୋକିଓ ଅଲିମ୍ପିକ୍ସ ଏକ ମାଧ୍ୟମ । ଅଲିମ୍ପିକ୍ସ ପରେ ଆଶାର ଏହି ବାର୍ତ୍ତା ଆତ୍ମବିଶ୍ୱାସର ସନ୍ଦେଶରେ ପରିଣତ ହେବ ।

ଶୁକ୍ରବାର ଉଦଘାଟନୀ ଉତ୍ସବ ସହ ଅଗଷ୍ଟ ୮ ଯାଏଁ ଅନୁଷ୍ଠିତ ହେବାକୁ ଥିବା ଟୋକିଓ ଅଲିମ୍ପିକ୍ସର ଶୁଭାରମ୍ଭ ହେବ । ବାକ୍ ଆଶାବାଦୀ ଯେ ଏହି ଅଲିମ୍ପିକ୍ସ ପ୍ରତିଯୋଗିତା ଆନନ୍ଦ ଓ ଆଶ୍ୱସ୍ତିର ମୁହୂର୍ତ୍ତ ହେବ ।