ରାଉରକେଲା: ପାରିବାରିକ କଳହକୁ କେନ୍ଦ୍ର କରି ରାଉରକେଲାରେ ଜଣେ ବ୍ୟବସାୟୀ ବ୍ରାହ୍ମଣୀ ନଦୀର ନୂଆ ବ୍ରିଜ୍‌ ଉପରୁ ଡେଇଁ ପଡ଼ିଛନ୍ତି। ନିଖୋଜ ବ୍ୟବସାୟୀଙ୍କ ନାମ ଶିବରାମ ସାହୁ ଏବଂ ସେ ଉଦିତନଗର ଅଞ୍ଚଳର ଜଣେ ଟ୍ରାନ୍ସପୋର୍ଟ ବ୍ୟବସାୟୀ ବୋଲି ଜଣାପଡ଼ିଛି। ତାଙ୍କୁ ଉଦ୍ଧାର କରିବା ପାଇଁ ପୁଲିସ ଏବଂ ଅଗ୍ନିଶମ ବାହିନୀ ପକ୍ଷରୁ ଖୋଜାଖୋଜି ଜାରି ରହିଛି।

ମିଳିଥିବା ସୂଚନା ଅନୁଯାୟୀ, ଶୁକ୍ରବାର ସକାଳ ପ୍ରାୟ ୮ଟା ବେଳେ କୌଣସି କାରଣକୁ ନେଇ ଶିବରାମଙ୍କ ପରିବାରରେ କଳହ ସୃଷ୍ଟି ହୋଇଥିଲା। ଏହାପରେ ସେ ପ୍ଲାଣ୍ଟସାଇଟ୍ ଅଞ୍ଚଳର ଜଣେ ମହିଳା ବାନ୍ଧବୀଙ୍କୁ ନିଜ ଘରକୁ ଡାକିଥିଲେ। ଉଭୟଙ୍କ ମଧ୍ୟରେ କିଛି ସମୟ ଧରି ଆଲୋଚନା ହୋଇଥିଲା। ପରେ ଶିବରାମ ଉକ୍ତ ମହିଳାଙ୍କୁ ନିଜ କାର୍‌ରେ ବସାଇ ବେଦବ୍ୟାସ ଟିସିଆଇ ଛକ ଆଡ଼କୁ ନେଇଯାଇଥିଲେ। ସେଠାରେ ସେ କାର୍ ଭିତରେ ମହିଳାଙ୍କ ସାମ୍ନାରେ କିଛି ଔଷଧ ଖାଇ ଦେଇଥିଲେ। ମହିଳା ଜଣକ ତାଙ୍କୁ ବାରଣ କରିବା ସହ ଅଟକାଇବାକୁ ଚେଷ୍ଟା କରିଥିଲେ ସୁଦ୍ଧା ସେ କାହାରି କଥା ଶୁଣି ନଥିଲେ।

ପରେ ଶିବରାମ ମହିଳାଙ୍କୁ ଗାଡ଼ିର ପଛ ସିଟ୍‌ରେ ବସାଇ ବ୍ରାହ୍ମଣୀ ନୂଆ ବ୍ରିଜ୍ ଅଭିମୁଖେ ଯାଇଥିଲେ। ବ୍ରିଜ୍ ଉପରେ ପହଞ୍ଚିବା ମାତ୍ରେ ସେ ହଠାତ୍ କାର୍‌ରୁ ଓହ୍ଲାଇ ସିଧା ନଦୀକୁ ଡେଇଁ ପଡ଼ିଥିଲେ। ଏହା ଦେଖି ମହିଳା ଜଣକ ଚିତ୍କାର କରିବାରୁ ରାସ୍ତାରେ ଯାଉଥିବା ଲୋକେ ତୁରନ୍ତ ପୁଲିସ ଏବଂ ଅଗ୍ନିଶମ ବାହିନୀକୁ ଖବର ଦେଇଥିଲେ। ଖବର ପାଇ ବ୍ରାହ୍ମଣୀ ତରଙ୍ଗ ପୁଲିସ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଖୋଜ ବ୍ୟବସାୟୀଙ୍କୁ ଖୋଜାଖୋଜି ଆରମ୍ଭ କରିଛନ୍ତି। ଶେଷ ଖବର ସୁଦ୍ଧା ଶିବରାମଙ୍କ ପତ୍ତା ମିଳିପାରି ନାହିଁ ଏବଂ ପୁଲିସ ଏହି ଘଟଣାର ଅଧିକ ତଦନ୍ତ ଜାରି ରଖିଛି।

ଜଗତସିଂହପୁର: ଭାଙ୍ଗିଦେଲେ ବିଜୁ ପ୍ରତିମୂର୍ତ୍ତି । ଜଗତସିଂହପୁର ଜିଲ୍ଲାର ପ୍ରସିଦ୍ଧ ପର୍ଯ୍ୟଟନସ୍ଥଳୀ ଶିଆଳୀ ବେଳାଭୂମିରେ ଥିବା ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଏକ ପ୍ରତିମୂର୍ତ୍ତିକୁ ଦୁର୍ବୃତ୍ତମାନେ ଭଙ୍ଗାରୁଜା କରିଥିବା ଅଭିଯୋଗ ହୋଇଛି। ବୁଧବାର ବିଳମ୍ବିତ ରାତିରେ କିଛି ଅଜ୍ଞାତ ଦୁର୍ବୃତ୍ତ ଏହି କାଣ୍ଡ ଘଟାଇଥିବା ଜଣାପଡିଛି।

ଗୁରୁବାର ସକାଳେ ପର୍ଯ୍ୟଟକ ଏବଂ ସ୍ଥାନୀୟ ଲୋକେ ପ୍ରତିମୂର୍ତ୍ତିଟିକୁ ଭଙ୍ଗା ଅବସ୍ଥାରେ ଦେଖିବାକୁ ପାଇଥିଲେ। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏଭଳି ଏକ ପ୍ରମୁଖ ପର୍ଯ୍ୟଟନ ସ୍ଥଳୀରେ ଏପରି ନିନ୍ଦନୀୟ କାର୍ଯ୍ୟକୁ ଲୋକେ ଦୃଢ଼ ନିନ୍ଦା କରିବା ସହ ଦୋଷୀଙ୍କୁ ତୁରନ୍ତ ଚିହ୍ନଟ କରି ଗିରଫ କରିବାକୁ ଦାବି କରିଛନ୍ତି।

ଘଟଣାର ଖବର ପାଇବା ପରେ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପ୍ରତିମୂର୍ତ୍ତି ଭଙ୍ଗାରୁଜା କରିଥିବା ଲୋକମାନଙ୍କୁ ଚିହ୍ନଟ କରିବା ପାଇଁ ପ୍ରୟାସ ଜାରି ରହିଛି। ଭବିଷ୍ୟତରେ ଏଭଳି ଘଟଣାର ପୁନରାବୃତ୍ତି ରୋକିବା ପାଇଁ ଶିଆଳୀ ବେଳାଭୂମି ଅଞ୍ଚଳରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବା ସହ ରାତ୍ରିକାଳୀନ ପାଟ୍ରୋଲିଂ ବୃଦ୍ଧି କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।