ମଧ୍ୟପ୍ରାଚ୍ୟରେ ତିକ୍ତତା ବୃଦ୍ଧି ପାଉଥିବା ବେଳେ ଇରାନ ନିଜର ମାରଣାସ୍ତ୍ର ପ୍ରୟୋଗ କରି ଆମେରିକା ଏବଂ ଏହାର ମିତ୍ର ରାଷ୍ଟ୍ରଗୁଡ଼ିକୁ ଟାର୍ଗେଟ୍ କରୁଛି। ସାମ୍ପ୍ରତିକ ରିପୋର୍ଟ ଅନୁଯାୟୀ, ଆମେରିକାର ସହଯୋଗୀ ଖାଡ଼ି ଦେଶ ଏବଂ ମଧ୍ୟପ୍ରାଚ୍ୟରେ ଥିବା ଆମେରିକୀୟ ସାମରିକ ଘାଟି ଉପରେ ଇରାନ ତରଫରୁ ଲଗାତାର ଆକ୍ରମଣ କରାଯାଉଛି। ଏହି ଆକ୍ରମଣରେ ଇରାନ ତାର ଅତ୍ୟାଧୁନିକ ମିସାଇଲ୍ ଏବଂ ଡ୍ରୋନର ବହୁଳ ବ୍ୟବହାର କରୁଛି।

ଡ୍ରୋନ୍ ଏବଂ ମିସାଇଲ୍ ବର୍ଷା

ଏହି ଯୁଦ୍ଧରେ ଇରାନ ମୁଖ୍ୟତଃ ଶାହେଦ ଡ୍ରୋନ୍ (Shahed drones) ବ୍ୟବହାର କରୁଛି। ଏକାସାଙ୍ଗରେ ବହୁସଂଖ୍ୟାରେ ଶସ୍ତା ଡ୍ରୋନ୍ ଏବଂ ମିସାଇଲ୍‌ର ବର୍ଷା କରି ଶତ୍ରୁ ପକ୍ଷର ଏୟାର ଡିଫେନ୍ସ ସିଷ୍ଟମକୁ ଥକାଇ ଦେବା ଇରାନର ମୁଖ୍ୟ ରଣନୀତି। ଏହି 'ସାଚୁରେସନ୍ ଆଟାକ୍' (Saturation attack) ଦ୍ୱାରା ଆମେରିକା ଏବଂ ଇସ୍ରାଏଲ୍ ଭଳି ମିତ୍ର ରାଷ୍ଟ୍ରଙ୍କ ସୁରକ୍ଷା ବ୍ୟବସ୍ଥା ଓଭରଲୋଡ୍ ହୋଇଯାଉଛି, ଯାହା ଫଳରେ ଆକ୍ରମଣକୁ ରୋକିବା କଷ୍ଟକର ହୋଇପଡ଼ୁଛି।

ଫତେହ-୧ ଓ ଫତେହ-୨ ମିସାଇଲ୍

ଆକ୍ରମଣରେ ବ୍ୟବହୃତ ହେଉଥିବା ସବୁଠାରୁ ବିପଜ୍ଜନକ ଅସ୍ତ୍ର ହେଉଛି ଇରାନର ଫତେହ-୧ ଏବଂ ଫତେହ-୨ ମିସାଇଲ୍, ଯାହାକୁ 'କ୍ୟାରିଅର୍ କିଲର୍' ବୋଲି ମଧ୍ୟ କୁହାଯାଏ। ଏହି ମିସାଇଲଗୁଡ଼ିକ ଘଣ୍ଟାପ୍ରତି ୧୬ ରୁ ୧୮ ହଜାର କିଲୋମିଟର ବେଗରେ ଗତି କରିପାରୁଥିବା ବେଳେ ଏହାର ଲକ୍ଷ୍ୟଭେଦ କ୍ଷମତା ୧୪୦୦ କିଲୋମିଟର ପର୍ଯ୍ୟନ୍ତ ରହିଛି। ଏହା ମଝି ରାସ୍ତାରେ ନିଜର ଦିଗ ବଦଳାଇ ପାରୁଥିବାରୁ, ଆମେରିକାର ଏଜିସ୍ (Aegis) କିମ୍ବା SM-6 ଭଳି ଅତ୍ୟାଧୁନିକ ଡିଫେନ୍ସ ସିଷ୍ଟମକୁ ମଧ୍ୟ ସହଜରେ ଚକମା ଦେଇପାରିବ।

ଦୂରଗାମୀ ବାଲିଷ୍ଟିକ୍ ଓ କ୍ରୁଜ୍ ମିସାଇଲ୍

ଏହା ବ୍ୟତୀତ, ଇରାନ ପାଖରେ ୨୦୦୦ ରୁ ୩୦୦୦ କିଲୋମିଟର ରେଞ୍ଜ୍ ଥିବା ହଜାର ହଜାର ବାଲିଷ୍ଟିକ୍ ମିସାଇଲ୍ ରହିଛି, ଯେଉଁଥିରେ ସେଜ୍ଜିଲ (Sejjil) ଏବଂ ଖୋର୍ରମଶହର (Khorramshahr) ପ୍ରମୁଖ। ନୌସେନା ଜାହାଜ ଏବଂ ସ୍ଥଳଭାଗରେ ଆକ୍ରମଣ କରିବା ପାଇଁ ଇରାନ କାଦର, ଗାଦର ଏବଂ ଅବୁ ମହଦୀ ଭଳି କ୍ରୁଜ୍ ମିସାଇଲର ମଧ୍ୟ ଉପଯୋଗ କରୁଛି। ଏହି ମାରଣାସ୍ତ୍ରଗୁଡ଼ିକ କେବଳ ଆମେରିକା ପାଇଁ ନୁହେଁ, ବରଂ ଇସ୍ରାଏଲ୍ ସମେତ ସମ୍ପୂର୍ଣ୍ଣ ମଧ୍ୟପ୍ରାଚ୍ୟରେ ସୁରକ୍ଷା ପ୍ରତି ବଡ଼ ବିପଦ ସୃଷ୍ଟି କରିଛି।