ଇମ୍ରାନ ଖାନଙ୍କ ସ୍ୱାସ୍ଥ୍ୟାବସ୍ଥାକୁ ନେଇ ବିଶ୍ୱବ୍ୟାପୀ କ୍ରିକେଟ ଜଗତରେ ଉଦ୍‌ବେଗ ପ୍ରକାଶ ପାଇଛି। ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା ୧୯୯୨ ବିଶ୍ୱକପ ବିଜେତା ଅଧିନାୟକ ଇମ୍ରାନ ଖାନଙ୍କୁ ଉପଯୁକ୍ତ ଚିକିତ୍ସା ଏବଂ ମାନବିକ ଅଧିକାର ଯୋଗାଇଦେବା ପାଇଁ ପାକିସ୍ତାନ ସରକାରଙ୍କୁ ଅନୁରୋଧ କରାଯାଇଛି। ଭାରତର କିମ୍ବଦନ୍ତୀ ଖେଳାଳି ସୁନୀଲ ଗାଭାସ୍କର, କପିଲ ଦେବ ଏବଂ ଦିଲୀପ ଭେଙ୍ଗସରକାରଙ୍କ ସମେତ ବିଶ୍ୱର ବିଭିନ୍ନ ଦେଶର ୨୧ ଜଣ ପୂର୍ବତନ କ୍ରିକେଟ୍ ଅଧିନାୟକ ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଏକ ପତ୍ର ଲେଖିଛନ୍ତି।

ଦ୍ୱିତୀୟ ଥର ପାଇଁ ଅପିଲ

ଚଳିତ ବର୍ଷ ଫେବୃଆରୀ ମାସରେ ୧୪ ଜଣ ପୂର୍ବତନ ଅଧିନାୟକ ଇମ୍ରାନଙ୍କ ସ୍ୱାସ୍ଥ୍ୟକୁ ନେଇ ପ୍ରଥମେ ଚିଠି ଲେଖିଥିଲେ। ବର୍ତ୍ତମାନ ସେହି ତାଲିକାରେ ଆଉ ୭ ଜଣ ଅଧିନାୟକ ସାମିଲ ହୋଇଛନ୍ତି। ଅଷ୍ଟ୍ରେଲିଆର ପୂର୍ବତନ ଅଧିନାୟକ ଗ୍ରେଗ୍ ଚାପେଲଙ୍କ ନେତୃତ୍ୱରେ ଏହି ଅଭିଯାନ ଆରମ୍ଭ ହୋଇଛି। ଜେଲରେ ଥିବା ୭୩ ବର୍ଷୀୟ ଇମ୍ରାନ ଖାନଙ୍କ ଡାହାଣ ଆଖିର ଦୃଷ୍ଟିଶକ୍ତି କମିଯାଉଥିବା ନେଇ ରିପୋର୍ଟ ପ୍ରକାଶ ପାଇବା ପରେ ପୂର୍ବତନ ଖେଳାଳିମାନେ ଗଭୀର ଉଦ୍‌ବେଗ ପ୍ରକାଶ କରିଛନ୍ତି। ଏହି ଚିଠିରେ ଆଲାନ ବର୍ଡର, ଷ୍ଟିଭ ୱ, ମାଇକେଲ ଆଥରଟନ୍, ନାସିର ହୁସେନ୍, କ୍ଲାଇଭ ଲଏଡ୍ ଏବଂ ଅର୍ଜୁନ ରଣତୁଙ୍ଗାଙ୍କ ଭଳି ଦିଗ୍ଗଜ ଖେଳାଳିମାନେ ମଧ୍ୟ ସ୍ୱାକ୍ଷର କରିଛନ୍ତି।

ପ୍ରମୁଖ ଦାବିଗୁଡ଼ିକ

ଏହି ଚିଠିରେ ପୂର୍ବତନ ଅଧିନାୟକମାନେ ତିନୋଟି ପ୍ରମୁଖ ଦାବି ଉପସ୍ଥାପନ କରିଛନ୍ତି। ପ୍ରଥମତଃ, ପାକିସ୍ତାନ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଏକ ସ୍ୱାଧୀନ ମେଡିକାଲ ବୋର୍ଡ (ଯେଉଁଥିରେ ଇମ୍ରାନଙ୍କ ବ୍ୟକ୍ତିଗତ ଡାକ୍ତର ସାମିଲ ଥିବେ) ଦ୍ୱାରା ତାଙ୍କର ସମ୍ପୂର୍ଣ୍ଣ ସ୍ୱାସ୍ଥ୍ୟ ପରୀକ୍ଷା କରାଯାଉ। ଦ୍ୱିତୀୟତଃ, ପ୍ରତି ସପ୍ତାହରେ ପରିବାର ଲୋକଙ୍କୁ ବିନା କୌଣସି ପ୍ରତିବନ୍ଧକରେ ଇମ୍ରାନଙ୍କ ସହ ଭେଟିବାକୁ ଅନୁମତି ଦିଆଯାଉ। ତୃତୀୟତଃ, ସ୍ୱାସ୍ଥ୍ୟ ପରୀକ୍ଷା ପରେ ବିନା କୌଣସି ବିଳମ୍ବରେ ତାଙ୍କୁ ଆବଶ୍ୟକୀୟ ଚିକିତ୍ସା ପ୍ରଦାନ କରାଯାଉ।

ଏହି ଚିଠିରେ ଖେଳାଳିମାନେ ସ୍ପଷ୍ଟ କରିଛନ୍ତି ଯେ, ସେମାନେ କୌଣସି ରାଜନେତା ଭାବରେ ନୁହେଁ, ବରଂ କ୍ରିକେଟ୍ ପଡ଼ିଆରେ ଏକାଠି ଖେଳିଥିବା ସାଥୀ ଏବଂ ପ୍ରତିଦ୍ୱନ୍ଦ୍ୱୀ ଭାବରେ ଏହି ଅନୁରୋଧ କରୁଛନ୍ତି। ପାକିସ୍ତାନର ଘରୋଇ ଆଇନଗତ ପ୍ରକ୍ରିୟାରେ ହସ୍ତକ୍ଷେପ କରିବା ସେମାନଙ୍କର ଉଦ୍ଦେଶ୍ୟ ନୁହେଁ, ବରଂ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ସମ୍ମାନ ଜଣାଇ ଇମ୍ରାନଙ୍କୁ ମାନବିକତା ଆଧାରରେ ଉପଯୁକ୍ତ ଚିକିତ୍ସା ଯୋଗାଇଦେବାକୁ ସେମାନେ ନିବେଦନ କରିଛନ୍ତି। ସୂଚନାଯୋଗ୍ୟ ଯେ, ବିଭିନ୍ନ ମାମଲାରେ ଦୋଷୀ ସାବ୍ୟସ୍ତ ହୋଇ ଇମ୍ରାନ ଖାନ ଗତ ତିନି ବର୍ଷ ଧରି ଜେଲରେ ଅଛନ୍ତି।